ماذا تفعل اول يوم فى الغربة

[محمودسعد]

السلام عليكم

كنت عاوز اعرف ماذا افعل اول يوم فى الغربه

علشان انا مسافر ان شاء الله وميش عارف لما اروح هناك اعمل وخاصه اول يوم

وجزاكم الله خيرا

[محمودسعد]

وكنت عاوز اعرف ايه هى الاشياء اللى هخدها معايا من هنا علشان السفر

وكنت عاوز اعرف ايه اخبار الجو فى الرياض حاليا

[capitshino]

وكنت عاوز اعرف ايه هى الاشياء اللى هخدها معايا من هنا علشان السفر

ايه السؤال الصعب ده؟

[osmel33]

السلام عليكم

كنت عاوز اعرف ماذا افعل اول يوم فى الغربه

علشان انا مسافر ان شاء الله وميش عارف لما اروح هناك اعمل وخاصه اول يوم

وجزاكم الله خيرا

أول يوم فى أى مكان جديد باحب أكتشف المكان اللى أنا فيه

يعنى باقضيها لف mfb:

[dongol]

بصفتي رحاله قديم

أنا أول ما رجلي تخطي أي بلد جديده أروح لابد في الفندق و هاتك يا فرجه علي القنوات المحليه علشان أعرف الناس دول بيفكروا ازاي

يعني هما شعب منفتح علي العالم و لا ناس مقفله و هتجيبلي كالو في دماغي

أما تاني يوم بقي ما اقلكش هاتك يا فرجه علي المحلات و مشي في الشوارع بدون هدف محدد لمجرد اني اتفرج علي البلد

[محمودسعد]

انتوا فين

[doha]

من ناحية اول يوم تعمل ايه فمقدرش افيدك فيه لاني معرفش انت جاي على شغل على طول فاول يوم هتروح تلقي عليه نظره ولا جاي على فيزا فاول يوم تسلم على الناس قرايبك الي هنا وتوصيهم يدوروا معاك ولا جاي بر هتنام اول يوم لمده سنه ولا اثنين على ماترتاح ولا جاي جو ولا بحر .. الخلاصه حكايه اول يوم دي سيبها لاول يوم وخليها تمشي بظروفها ..

بالنسبة لتجيب معاك ايه ..

طبعا هتعمل حسابك انك مش نازل مصر باذن الله قبل سنتين في الغالب .. هتجيب معاك اكيد كل مايمكن ان يلزمك من مصر ومش هتقدر تجيبه خلال سنتين ..

مبدئيا هات معاك على الاقل اكرمكم الله جوز جزم جديده .. الاحذية في مصر رائعه ورخيصة اوي مقارنة بهنا .. ده لو انت بتدور على الشياكه اما لو بتدور على اي حاجه عملية تمشي الحال كوتشي مثلا يبقى هات من هنا الحاجات الصيني مالية البلد .. يعني الكوتشيات ام عشرين تلاتين جنيه دي هنا ببلاش لكن الاحذية المحترمه اعتقد من مصر احسن ..

هات معاك فوطتين .. .هنا ارخص لكن في مصر احسن مية مرة لا تقارن بهنا ..

متكثرش قمصان خروج او تيشرتات هنا مالية البلد وارخص من مصر بس برضه هات معاك اثنين ثلاثه اكيد لزوم التغيير فيهم لغايه ماتعرف الاسواق والمحلات ..

هات معاك ملابس داخليه جديده تكفيك سنتين لان بتاعت مصر احسن من هنا بكتير .

برضه لازم يكون معاك بدلة على الاقل وكل ماكان شغلك في شركه او ماشابه هتحتاج بدل اكتر بس متكترش في البدايه لغايه ماتشوف الوضع هنا ايه ..

هات جاكيت شتوي وبلوفر واحد على الاقل عشان تلبسه لما البرد يهجم فجأه على ماتلحق تشتري تاني .. لو عندك من الاول كذا واحد خلاص هاتهم لكن متشتريش جديد لان من هنا احسن واشيك .. بس برضه هتحتاج وقت على ماتعرف المحلات لان هنا في تفاوت رهيب في الاسعار والبضاعه غالبا وحده يعني نفس الصنف بنفس الماركه والموديل تلاقيه في محل مخفض بسعر وتلاقيه في محل تاني في حته راقية بسعر ثلاث او اربع اضعاف عادي جدا ..

متجيبش بلاطي مثلا تقيلة اوي لان الشتا هنا مش زي بتاع مصر .. لو عندك اصلا واحد ومستخسره هاته بس غالبا مش هتحتاجه هنا .. برضه القمصان الصيفي الثقيلة متنفعش هنا لان حر هنا جهنم الحمرا يعني هات حاجه صيفي خفيفه وشتوي متوسطه وحاجه لما بين الفصول .. برضه تعمل حسابك لو ناوي تشتري في كل الاحوال يبقى متجيبش كتير او عندك كتير وملوش لزوم يبقى تجيب كل الي عندك وبرضه لو شغلتك في حته نائية مثلا مش محتاج لبس فراعي النقطه دي ..

هات معاك مكواة للملابس برضه عشان تكوي هدومك .. هنا المغاسل ( المكوجية ) ماليين البلد وفي كل شارع وزاوية .. عاوز تغسل عندهم وتكوي ماشي عاوز تغسل وتكوي بنفسك ماشي شوف حسب اسلوب معيشتك وميزانيتك .. لو شغال في شركه ومش ناوي تبعت غسيلك برا متنساش تجيب معاك مكواه ..

هات طبعا مستلزمات العناية الشخصية يعني فرشة الشعر , فرشة الاسنان , ادوات الحلاقة .. مقص اظافر.. الخ حط كل دول في شنطه صغيره او كيس لوحدهم وخليهم ضمن حاجتك ..

هات سجاده صلاه .. هنا مالية الدنيا برضه بس على ماتشتري وحده هات معاك بتاعتك ..

متجيبش معاك اكل هنا كل شيء .. ممكن تجيب معاك اكل يومين نواشف .. يعني مثلا بسكويت .. علبة جبن مثلثات .. كيس عيش .. علبة تونه ... الخ الحاجات البسيطه دي هات تموين يومين تلاته للطواريء على ماتعرف راسك من رجلك . . والهدف منها طبعا مش انك تاكل بقدر ماهو تفتكر مصر كل ماتبص لها وتعيط شويه ..

هتجيب طبعا لبس تلبسه في البيت او السكن عباره عن ترنجين تلاته .. متشتريش جديد هنا احسن وارخص من مصر هات الي عندك على ماتجيب من هنا ..

هات طبعا كل اوراقك اللازمه والغير لازمه .. وصورها كمان كل مستند صورتين تلاته او اربعه خمسه على حسب لو لسه هتدور على شغل .. كمان اعمل صور شخصية ليك اربعه في سته كتييييير وبخلفية بيضا .. هتحتاجها هنا كتير اوي فبدال ماتقعد تلف على الاستوديوهات هاتها معاك من مصر كمية افضل ..

عندك لا قدر الله ادوية بتتناولها بانتظام متنساش تجيب معاك كمية تكفيك شهرين تلاته قدام لغايه ماتلاقي بديل او تتصرف لان مش كل الادوية موجوده هنا في لها بدائل احيانا واحيانا موجوده بس صناعه تانية وسعرها برضه احيانا بيكون فرق كبير جدا عن الي في مصر .

هات معاك نوته فيها كل ارقام تليفونات الناس الي تهمك في مصر محدش عارف يمكن تحتاجها .. برضه هات اكيد ارقام الناس الي تعرفهم هنا واجب برضه تسلم عليهم من وقت للتاني .

هات مصحف صغير تقرأ فيه .

كل ماسبق مجرد امثله لما يمكن ان تحضره معاك ومالايلزم انك تتعب نفسك وتشيله .. فانت قرر وفقا للوضع الي انت جاي عليه والعيشه الي متعود تعيشها في مصر وهات مايلزمك ويكفيك لمده سنتين باذن الله واترك ماقد لا تحتاجه عشان ميكونش معاك وزن زايد يضايقك وانت راجع ..

بالنسبة للجو حاليا في الرياض هو ربيعي بس مش زي ربيع مصر طبعا .. ربيعي هنا يعني زي ايام الصيف في مصر لما يبقى الجو حلو .. يعني مصيفين حاليا ولابسين نص كم في البيت بس بيقلب الجو ساعات بس اكيد مش بنلبس صوف خلاص وعن نفسي شلت اللبس الشتوي خلاص .. اعتقد الجو في مصر لسه بيميل للبروده .. هنا لسه مبنشغلش التكييف احيانا بس اليومين الجايين غالبا هنبدأ نعتمد عليه ..

[شاب مصري]

ربنا معاك ويتسهل لك سفرك ان شاء الله وتحقق أهدافك .

[محمودسعد]

جزاكى الله كل خيرا

والله حضرتك افادينى

ولكن للعلم انا قادم على تاشيرة عمل

هل فى جديد ممكن نتنصحينى بيه

[الباشمهندس ياسر]

طبعا بعد مداخلة الاخت الفاضلة مش هنلاقى كلام نقوله

بس هات معاك فرشاة اسنانك و معجونك و ماكينة الحلاقة بتاعتك

هات معاك البودى كير بتاعك كله

يعنى لو بتستعمل مزيل معين هات منه شويه ..لان اللى هنا بيبقى دائما مختلف

حتى البودى اسبراى بتاعك لو اكس مثلا .. هات شوية لان اللى هنا برده مختلف

البرفانات بقى .. متجبش معاك اصلا غير الازايز بتاعتك .. هنا البرفانات اجمد

هات معاك 18 صورة بخلفية زرقاء و زيهم بخلفية بيضاء عشان شوية يطلبوا دى و شوية يطلبوا التانية

هات معاك حلويات .. الناس ف الخليج بتحب الحلويات اللى جاية من مصر

تقريبا انا مش باخد غير دول

[الرويناء]

الجو فى الرياض جاف جدا لو اى حدجلده حساس فى الغالب هيلتهب فخد معاك مرطب للجلد

والربيع فى الرياض مش ربيع تراب وبس فى اى وقت وفجاء

غير كده متخدش غير اقطان (ملابس داخليه فوط ملايات)وجلود هما اللى فى مصر احسن بكتير

[waaaf]

بنرحب بيك معانا وأقولك حاجة أول ماتيجي تأمل . وقلل من كلامك يعني إسمع أكثر ماتتكلم مش ربنا خلق لنا ودنين ولسان واحد ؟ . بكدة هاتقدر تعرف أكتر ............ ربنا يوفقك

[elfakhrany]

ياعم متفكرش كتير الموضوع زى شكة الأبرة أول يوم ده تقضية فى النوم عشان تفوق و تقوم تخلص ورقك عشان تستلم شغلك

[desert_eagle70]

أول يوم أشترى خط تليفون وخلى حد يشحنه وأتصل بمصر وطمنهم عليك .. وافتح الشنطة وطلع الأكل اللى انت جايبة وأكل اى حد قاعد معاك منه عشان يحطوك فى عنيهم :lol: .. وأتعرف على الناس اللى موجودة وارتاح عشان هيبقى بكرة وراك يوم طويل . بس متنساش اهم حاجة أكلهم معاك عشان يبقى عيش وملح من اولها كده. :blink: وربنا معاك ويوفقك.

[suavemente]

هى الصفحة دى للغربة عامة وللى رايحين كندا ولا السعودية بس ؟

[ايه اتش تلت سبعات اي دي]

طيب

ربنا يستر

يارب

انا مسافر الفتره القادمه

وكان ليا اصدقاء اعرفهم هناك

واحد في المدينه يقؤلي الجو هنا مولع نار

وواحد في الرياض يقؤلي الجو هنا متلج برد

لدرجه اني حسيت ان الرياض دوله والمدينه دوله ؟

مبقتش فاهم حاجه

هو الجو هناك عامل ازاي ؟

ثانيا انا كنت بعاني من حسياسه للصدر

والبخاخات هنا غاليه جدا

هل معني كده اني هلاقيها في السعوديه اغلي من هنا ؟

اسمع ان الجو في السعوديه عامة افضل من الجو في مصر كمناخ ونضافه

طرق ونضافه هواء اساسا فهل ده فعلا حقيقي ؟

هل فعلا الادويه في السعوديه بتدخل بطريقه انضف من اللي بتدخل مصر بمعني ادق الفرز منها انضف وافضل ؟

لو معايا خط اتصالات مصري هل ينفع اشغله في السعوديه علشان استبقي عليه ولا مينفعش ؟

[فارس بلاجواد]

ما شاء الله الأخت ضحى ما سبتش حاجه الا لما قالتهالك دى حضرت لك الشنطه يا عم مفضلش غير انك تجيب بعضك وتيجى بألف سلامه وابقى سلم لنا على مصر قبل ما تيجى لحسن وحشتنا جدااااااااااااااااا