التأشيره على موقع الخارجية السعودية

[عبدالمنعم الحسينى]

استلمت التأشيره وكل ما ادخل على موقع الخارجية السعودية علشان أتأكد

من التأشيره يقولى لاتوجد تأشيره بهذا الرقم او البيانات المدخله غير صحيحه

بس والله دخلت رقم التأشيره ورقم السجل عشرين مره ويقولى نفس الجواب

بالله عليكم أفيدونى

تم تعديل 19 مارس 2009 بواسطة عصام

[عبدالمنعم الحسينى]

القراءات بتزيد ومفيش حد بيجاوب

بجد انا قلقان جدن ومش عارف اعمل ايه

[عصام]

الأخ الفاضل

دا منتدى مش تشات ..

يعنى الناس بتدخل على مدار اليوم مش قاعدين قدام الموقع 24/7 عشان تتوقع رد بالسرعة دى

بالإضافة لأنه مش حل انك عشان تستعجل الناس تعمل 10 موضوعات بنفس المعنى !!

تم حذف الموضوع الآخر ونرجوا الالتزام بعدم فتح موضوعات أخرى لنفس الغرض كما تم تغيير عنوان الموضوع ليعبر عن مضمونه

الإدارة

[الباشمهندس ياسر]

ابسط حاجة تاخد بعضك و تطلع ع السفارة تسال هناك

و برده دى اجابة اللى ميعرفش

و ممكن يكون فيه مشكلة ف الموقع بتاعهم او الرقم بتاع تاشيرتك متنقلش للموقع الالكترونى عشان فيه مشكله عندهم

متقلقش لان قلقك مش هيحل المشكلة

هدى اعصابك علشان تعرف تفكر كويس

و بالتوفيق

[doudy]

ابسط حاجة انك مش انت اللى تدخل على موقع الخارجية

مكتب العمالة اللى بيخلص الورق هوة اللى ليه الصلاحية انه يدخل الموقع لانه مسجل فيه و دافع فلوس

للسفارة وواخد باسوورد على موقع الخارجية

دة الموضوع ببساطة

[doha]

انا الي اعرفه ان التاشيرة بتظهر على موقع وزارة الخارجية قبل ماتؤخذ انما بعد ماتاخذها على الجواز وتتسجل باسمك مش عارفه ان كانت بتظهر ولا لاه احتمال يكون ده سبب عدم ظهورها لانها بتبقى على الموقع على حد علمي فترة معينة بعدها بتحذف لانتهاء صلاحيتها ..

على كل حال سبق واجبتك ان في علامه مستحيل تزويرها بتكون على التاشيرة وقلنا شكل التاشيرة بيكون نفس شكل الرقم القومي تقريبا يعني فيه صورتك الي قدمتها مطبوعه على اورق الجواز مش ملصوقة عليه وفيه بياناتك وبيانات التاشيرة واهم حاجه فوق صورتك في علامه مجسمه مينفعش تتزور لونها فضي وشكل القرش لكن صغيره في الحجم عنه لو قلبتها يمين وشمال يظهر لك شكل سيفين ونخلة ولو قلبتها تاني يظهر لك كلمه فيزا بالانجليزي .. لو عندك الكلام ده كله على جوازك يبقى مستحيل تكون التاشيرة مضروبه . ياريت بقى تقولنا هل الحكايه دي عندك ولا مكتوب لك شيء تاني لا قدر الله ؟

[عبدالمنعم الحسينى]

شكراً لكل اللى أجابو عليا

عموماً التأشيره فعلا نفس شكل الرقم القومى والصوره مطبوعه وفيها بيانتى وبيانات الكفيل والعلامه اللى زى القرش كمان موجوده وفعلا فيها سيفيت ونخله وكلمة فيزا بالانجليزى بس اعذرونى كلكم انا اول مره بالنسبة ليا وفى حاجه تانيه ياريت لو حد عنده اجابه

هل الاسم الرابع فى اسم الشخص مش بيبقى موجود فعلاً وبيكتبو الاسم الخير اقصد اسم العائله يعنى مثلا

اسمى فى الجواز والبطاقه ارجو الانتباه فى الاختلاف عبدالمنعم محمد الحسينى عبدالمنعم ابراهيم وده الصح

التأشيره طالع فيها الاسم.عبدالمنعم محمد الحسينى ابراهيم يعنى الاسم الرابع مش موجود فهل دى تعتبر مشكله او ممكن ما يتمش سفرى بسببها

[doha]

اقولك حاجه تطمنك يااخ عبد المنعم انا جايه تاشيرة زياره على والدتي لانها طبيبة في وزارة الصحة احلى حاجه كاتبين اسم الوالده في التاشيرة غلط تماما .. وعدت ولا حد سالني عليها .. عاوز اكتر من كده ؟ مرة من كام سنة بس كان عندي اقامة وقتها دخلت المملكة وقعدت ماشاء الله لي ان اقعد ولما جيت اطلع تاشيرة خروج وعوده اكتشفوا ان الموظف الي دخلني من المطار ( نسي ) يختم الجواز دخول يعني اصلا متسجلش عندهم اني دخلت المملكه من الاساس عشان يتسجل اني طالعه منها .. ومشي حالك ولا حد سأل ولا حد قال وعدت الحكايه .. بص طالما انت مش عامل حاجه غلط ومعليكش جرائم لاقدر الله الف مرة يبقى خش البلد واطلع وانت قلبك مطمئن باذن الله مش بيمنعوا حد غير الي عامل عامله فيما عدا ذلك حط في بطنك بطيخة صيفي ..

وبالمناسبة .. الاسم في التاشيرة رباعي بس يعني انت كده ماشي سليم .

برضه احب اقولك حاجه مهمه ياريت تحطها في بالك لان شكلك قلقان شويه .. الارزاق دي حاجه بيد الله وعمر ربنا مابيقدر للانسان غير الخير . فمتقعدش تفكر ياترى التاشيرة صح ولا غلط مضروبه ولا متطبطب عليها .. فكر بس ان دلوقت خلاص ربنا اكرمك بالتاشيرة يبقى تستعد لحاجتين انك تسافر وانك تشتغل بذمة وضمير على قدر ربنا مايقدرك .. لا تقعد تفكر ياترى هجيب فلوس ولامجيبش ياترى هنفع ولا منفعش .. علي ان اسعى وليس علي ادراك النجاح .. اعمل الي عليك وسيب الباقي على ربنا .. طلعت بعد كده التاشيرة زي ماتطلع مش هتفرق معاك اهم شيء انت تعمل الي عليك والباقي على ربنا ..

نصيحة استمتع باليومين الي انت قاعدهم في مصر دلوقت بدون قلق بخصوص التاشيرة لان ايام ( الرحرحة ) مفاضلش عليها كتير ..

[عبدالمنعم الحسينى]

كل الشكر والتقدير ليكى مدام ضحى

وربنا يطمنك دايماً

[خالد شحاته]

اخي الفاضل التاشيره بتظهر علي موقع الخارجيه قبل ما تخدها علي جواز سفرك وبعد ما تخدها بتتعرف انت متي اشرت علي الجواز وبتاريخ الان الموقع واضح جدااااااااااا بالنسبه لتاشيرات العمل واي حد عايز يتاكد من صحتة ومش عارف يرسلني علي الخاص وانا اوضح له انه اخذ التاشيره فيوم كذا وبرقم كذ وربنا يوفق الجميع