اسأل عن بنك سعودى لقرض سيارة وأكون مالك أول

[amrlink]

السلام عليكم ورحمة الله وبركاته

يا إخوانى اريد معرفة البنوك التى تعطى قروض او تمويل سيارة جديدة فى السعودية وتكون اسلامية وفى نفس الوقت أكون أنا المالك الأول للسيارة حتى استطيع فى حاله رغبتى فيما بعد جمركة السيارة وتركها فى مصر حيث ان معظم البنوك تتمك السيارة وبعد انتهاء تسديد اقساطها تصبح السيارة ملكك ولكنك لست المالك الأول

منتظر الرد لمن لديه خبرة حيث أننى أريد ان أحول راتبى على البنك الذى يوفر ميزةقرض سيارة وأكون المالك الأول لها وتكون المعامله اسلاميه

وشكرا

تم تعديل 20 مارس 2009 بواسطة amrlink

[وهيج الجبيل]

اخوى بنك الراجحى يقدم قروض سيارات

وهو اما انك تشتري سيارة من نفس السيارات الموجودة لدى الراجحي

او انك تذهب للوكالة وتحضر بيانات ومعلومات السيارة المرغوب بشرائها

ومن ثم يذهب الراجحي لشرائها ويسجلها باسمه ومن ثم يبيعها لك

وفي حال توقيع العقد معهم يجبرك الراجحي على شرائها منه

• بدون كفيل

• مطلوب تحويل الراتب

• مدة التقسيط تصل إلى 60 شهراً

• البرنامج يشمل المواطن والمقيم

والراجحي خال من اي تعامل ربوي ان شاء الله بشهادة جميع العلماء والمشايخ

وممكن ترووح بنك الرياض عندهم قرض اسمه التورق الاسلامي

وروح عند الموظف خله يشرح لك وهو اقل بنك في الوقت هذا ياخذ زياده

دة على حسب علمى وتجارب ناس اعرفهم

تم تعديل 20 مارس 2009 بواسطة وهيج الجبيل

[se_ Elsyed]

لن تكون مالك اول الا اذا ضمنتك الشركة وهي اللي وقعت على الايصالات .. او اي موظف حكومي سعودي .. بحيث لو ما سددتش يُقتطع المبلغ منهم

[amrlink]

شكرا اخوانى على الردود وبجد انا هنا بقالى اكتر من اسبوعين فى الرياض ولسة جديد فى السعوديه بس انا اعرفكم من زمان زكنت لما حتاجكم بخش اقرى مشاركتم سواء القديمة أو الحالية وكنت بستفاد جدا منها بس اول مرة احس بدفء المشاركة مع اخوانى خصوصا لما تلاقى رد سريع وخالص لوجه الله وحسيت كاننا اسرة واحدة وبجدد شكرى للاخ وهيج الحبيل والاخ سى السيد اللى قريتله كتير على المنتدى

لو رجعت لموضوعى ...ياريت الاخوة المصريين اللى فى السعودية وسبق انهم نزلوا عربيتهم مصر نهائى (جمرك يعنى),يقولولنا عملو اية فى شرط المالك الاول للسيارة.

ويا اخ سى السيد يعنى اشوف حد سعودى اخدة البنك يضمنى طب ازاى برضة والبنك هوة اول واحد بيشترى العربية عشان يكون القرض اسلامى معلش انا محتاج منك توضيح اكتر

مستنى ردودكم

السلام عليكم ورحمة الله وبركاتة

[doha]

خلي بالك ان عربيات الخليج مواصفاتها خليجي يعني مصممه تتحمل الجو الحار الجاف هنا متنفعش تنزل مصر في الجو الرطب هتاكلها الباروما غالبا خاصه لو ساكن في حته ساحلية في مصر ...

بعدين ايه يخليك تزنق نفسك وتشتري سيارة وترتبط بيها مدى الحياه وتاخذها معاك لما ترجع .. شكلها كده دي اول سيارة ليك لانك لسه جديد وعاوز تاخذها وانت راجع فان كانت كده نصيحة اشتري حاجه نص عمر تقلب فيها وتلطش فيها وتتعلم لغايه ماتبقى بريمو وساعتها هات حاجه اخر موديل ونزلها معاك وانت راجع ..

ممكن يكون رايي صح وممكن يكون غلط عشان كده استخير الاول وفكر برضه المستعمل مش وحش خاصه وانت ممكن تلاقي فيه حاجه لقطه وخاصه اكتر واسعار السيارات ممكن تنزل بعد كده زي مابنسمع من سنين .. يعني يمكن يكون الصح انك تمشي حالك باي حاجه دلوقت وتخلي سيارة بعدين لبعدين .. واكيد الاستخاره هي الافضل في احوال زي دي ..

[amrlink]

الأخت / ضحى

جزاكى الله كل خير ووجهة نظرك فعلا هفكر فيها انا مخلينى أرشح عربية جديدة هية انها مش هتحتاج صيانة لمدة خمس سنين قدام لية اصحابى اشترو عربيات مستعمله وكل يوم عند الميكانيكى بمعنى لو مثلا عربية كرولا 2009 وانا انتقالى بالسيارة شبة قليل يا دوب شغلى القريب من السكن والفسح اخر الاسبوع وبكدة العربية مع المحافظة هتفضل كويسة ان شاء الله لها ذلك وفى نفس الوقت مش هتكلفنى صيانة وتركيب قطع غيار وخلافة لمدة طويله بالاضافة لاحساسك وانتى معاكى سيارة جديدة بيدى نوع من السعادة ..والتويوتا تمنها بيفضل فيها وبرضة يكون معاكى الافضلية لو قررتى تنزليها بلدك طعا منزوددش عن 1600 سى سى .واتمنى ربنا يوفقنى للى فية خير وشكرا جدا جدا جدا على ردك وجزاكى الله خير

[doha]

احلى حته بتاعت ان العربية الجديده بتدي احساس بالسعاده .. كلامك سليم مية في المية

بس في نقطة مهمه انت لما تشتري سيارة هتحس بسعاده طاغية انك امتلكتها وبرضه هتحس بثقة كده وانت نازل من عربية آخر موديل .. لكن خلي بالك ان الاحساس ده بيكون مؤقت لان العربية الآخر موديل دي مش هتفضل كده على طول ومصيرها بعد كام سنة شئت ام ابيت هتبقى دقة قديمه مع الاسف .. وبرضه حاجه اهم وهي ان احساسنا بالسعادة لامتلاك شيء باهظ بيكون متعة لحظية بتتلاشى بعد فترة قصيرة جدا من امتلاكه .. لاحظها في اي حاجه كنت حاسس انك ( هتموت ) لو مشتريتهاش ودفعت فيها مبلغ كبير .. هتكتشف انك فرحت بيها شويه في الاول وبعد كده لا طلعتك من حالة زعل كنت فيها ولا خلتك تبطل تحلم بامتلاك شيء افضل ..

صحيح انت هتتعتق من مصاريف صيانتها كل شويه لكن هتتعب اكتر في الخوف عليها والحرص انها متتخبطش ومتتخدش فضلا عن انها بعد الشر متتسرقش . .

اكيد محدش بيقولك هات سيارة مستعمله تعبانه .. عن نفسي احيانا بشوف سيارات الواحد يمشي على رجله اكرم له مايركبها بس برضه في سيارات مستعمله استعمال نظيف وموديلها مش قديم اوي.. دي الي قصدي عليها .. بتبقى حلوة وشيك في الركوب واهم حاجه لو خسرتها مش هتخسر كتير ولو بعتها في الآخر ممكن تطلع بعد الي دفعته فيها كسبان ..

اما عن حكايه انك هتحافظ عليها فده بيفكرني بمرة زماااان نجحت في حاجه اظن ثاني ثانوي او شيء زي كده وبابا اخذنا محل ذهب وقالي اختاري الي عوزاه .. اشتريت خاتم عيار 18 مليان فصوص . . انا مش من هواة اقتناء الذهب اوي ودائما كنت اسمع الي اكبر مني يقولوا ان الحاجه عيار 18 دي مش كويسه لان لو بعتها هتخسر فيها خاصه لو فيها فصوص .. وانا بشتريه كنت عارفه وبابا نبهني ان خساره اشتري شيء كله فصوص و18 كمان .. بس اصريت عليه .. قلت في نفسي ان ده جميل اوي واني مستحيل افرط فيه ولو حتى بعت ايه مش هبيعه هي يعني جات على ده ..

فضلت لبساه فترة ومعتزه بيه وفرحانه اني احسنت الاختيار بخاتم فيه فصوص شكله حلو ومش هخسره لاني مش هبيعه لو ايه ..

في يوم من الايام خلعته عشان اغسل الاطباق مهو الخاتم الي بفصوص عشان تحافظ عليه لازم ميتبلش كتير .. سبحان الله في خلال دقائق لقيت ماما بتقولي هو الخاتم المرمي على الارض ده بتاعك ؟ ببص كده لقيته وقع على الارض معرفش ازاي ومين معرفش معدي داس عليه وخلاه حلقة مبططه متساويش نكله ..

زعلت بل صعقت لما شفته بالمنظر ده .. طبعا اخذته للصايغ يصلحه بعد كده خاصه لما فصوصه وقعت من هول الحادث ..

مش هكدب عليك .. شكله بعد التعديل مكانش هو خاصه ان الصايغ جزاه الله خير تبرع وبرده معرفش ليه .. فقد فصوصه الي بقت بتقع كل شويه وفقد لمعته نتيجة عملية السنفرة الي البيه عملها فيه من غير ماطلبها.. بصراحة من وقتها الخاتم مرمي عندي في علبة مع شويه اشياء ملبستهاش من اكتر من 15 سنة ..

يمكن بعدت شويه عن موضوع السيارة بس برضه كان تطرق لابد منه لشرح وجهة نظري ..

الخلاصة : لو امكانياتك الماديه كبيرة اوي وتسمح انك تشتري سيارة آخر موديل لدلوقت توكل على الله واشتري .. اما لو امكانياتك متوسطه وعاوز تشتري حاجه لدلوقت وبعدين عشان تحس انك عملت شيء ( كبير ) فاشتري سيارة نص نص حالتها حلوة لدلوقت .. اما لبعدين فحتفظ بكل قرش ينفعك تشتري حاجه جد قيمتها مش بتقل مع السنين وانما بتزيد زي شقة مثلا ولا قطعة ارض وساعتها هتحس انك فعلا عملت حاجه وهيبقى البرستيج بتاعك اترسم مظبوط وعلى واقع مش خيال ..

وبرضه اقول استخير ..

[amrlink]

جزاكى الله كل خير أخت / ضحى

انا مش عارف اشكرك ازاى على وقتك ده ونصايحك دى عموما انا ميال انى اخد بنصيحتك خصوصا ان كل الظروف والاولويات متجهة ناحية القديم بس برضة كان نفسى باقى الاخوة يتفاعلو معانا ويعرفونا برضة ازاااااااااااااااااى ..؟

على كل حال جزا الله خير كل اعضاء المنتدى الجميل وخصوصا من تجاوبو بالرد ا/وهيج الجبيل و ا/سى السيد والاخت /ضحى

[dentogabalo]

يا جماعة انا والدي بقاله في السعودية 23 سنة و عايز يشتري عربية زيرو بنفس الطريقة برده ... تكون تقسيط على سنة واحدة و يكون المالك الاول ليها ... وتقسيط اسلامي ... عشان عايز يرجع بيها .. يا ريت لو حد يقولنا ايه الاجراءات و فين البنك اللي يخليني المالك الاول

[egyptian dentist]

الزميل الفاضل

ممنوع الكتابة بلغة غير العربية

وإذا لم يكن عندك لوحة مفاتيح عربي .. فيُمكنك عمل بحث عن طريق جوجل للحصول عليها بمنتهى السهولة .

[mokhtarelmalahy]

يا اخى انا من رأى الاخت Doha انك تشوف حاجه استعمال تكون نظيفه يعنى لانسر 2002 او صنى 2003 او كورولا 2002 وتكشف عليها كويس فى اى مركز خدمه قبل الشراء وتطمن بعد كده هتشيلك الكام سنه دول لحد ماترجع مصر جايز الاسعار تكون نزلت جامد ولو ناوى تنزل برى يبقى تشوف 4*4 باجيرو او نيسان باثفيندر عشان هما دول اللى بيستحملوا السفر

برضه فكره الزيرو مش سيئه للدرجه دى يعنى لو خلاص هتجيب زيرو يقعد معاك كام سنه وتحافظ عليه وتنزله فى الاخر احسن اختيار دلوقتى الهيونداى النترا 1.6 او نيسان تيدا 1.6 عربيتين دول بجد من الاخر قوه متانه اعتماديه اوبشن رائع والالنترا بتمسك سعر كويس اما الكورولا مع انها عربيه توب بس غاليه اوى مجرد علامه تويوتا مخلياها غاليه جدا وسعرها داخل فى شريحه اعلى اللى هى شريحه 2000 سى سى وانت طالع مع الهيونداى سوناتا والشيفروليه ابيكا

[منصورالفان]

الاخ العزيز

السلام عليكم

يا تري عملت ايه في موضوع العربية

انا واقع في نفس مشكلتك لكن فكرتك في الشراء بنظام التأجير المنتهي بالتملك

واللي جبرني افكر في كده ان معييش سيولة كفاية تجيب عربية متبهدلنيش و مستعجل اجيب عربية علشان الاهل معايا و تعبوا من البهدلة في الوانيت

يا تري عملت ايه

اشتريت ولا لسه و رأيك ايه؟

[dentogabalo]

يا جماعة انا والدي بقاله في السعودية 23 سنة و عايز يشتري عربية زيرو بنفس الطريقة برده ... تكون تقسيط على سنة واحدة و يكون المالك الاول ليها ... وتقسيط اسلامي ... عشان عايز يرجع بيها .. يا ريت لو حد يقولنا ايه الاجراءات و فين البنك اللي يخليني المالك الاول

في انتظار رد من الاخوة الافاضل

[dentogabalo]

check this

http://www.nilemotors.com/Nile/showthread.php?t=68233

[ياسر ابوعامر]

jkzxfhh

[ياسر ابوعامر]

أخي العزيز في البداية ومن واقع خبرتي في موضوع السيارات يوجد أمامك شركة اليسر للتقسيط وبنك الرياض

شركة اليسر سوف تطلب منك 2000ريال مقابل استخراج استمارة السيارة بأسمك لتسجيلها في السفارة ومن ثم استكمال الإجرائات وبنك الرياض مصاريفة 3500 ريال اذا احتجت التفاصيل والشروط راسلني لكي ارسل لك كافة الشروط المطلوبة ونسب الفائدة.

[حاتم الكفراوي]

السلام عليكم ، اخبارك يا باشا ، على فكره فيه شركة اليسر للتقسيط عامله الموضوع ده ، مكانها في الملز ممكن تشتريلك سيارة وتكون المالك الأول وعلى فكره فيه دلوقتي سيارات حلوه جداً جيب التيروس 4×4 ( هي دايهاتسوا ) بس ياباني من عبد اللطيف جميل

وعلى فكره ده تليفون شركة ا ليسر 920000711 ده تليفون موحد وفيه جوال لواحد هناك اسمه عبد اللطيف تليفونه 0515111354 ، بتطلعلك الاستمارة باسمك ورخصة السير كمان باسمك كانوا عاملين إعلانات ماليه الدنيا في المنفوحة ، وعلى فكره برده عبد اللطيف جميل فرع البديعة فيه واحد هناك اسمه شادي ممكن يعملك الموضوع ده . ياريت تتصل بيهم وتقولي عملت إيه اخوك حاتم تليفون 0506710643

[amrlink]

يا جماعة الخير اشكر كل اللى رد ...وجزاكم الله خير بس لو حد عندة اى طرق تانية وانا بحاول اتصل بالناس اللى تليفوناتها موجودة ولما اوصل لحل ان شاء الله هبلغكم وشكرا لكم