شركة بإدارة ذاتية

[الباشمهندس ياسر]

أيون ...

كده بالظبط

عايزكم تشدوا حيلكم معايا

ربنا يكرمكم جميعا

و لنا عودة عشان نتناقش شوية

[osmel33]

بصوا يا سادة فيه شوية مقومات لبناء أى مشروع وبقول أهو بناء أى مشروع مش نجاح

أى مشروع لأن ده له حسبة تانية

مقومات بناء أى مشروع وده فى علم الإدارة هما خمس حاجات

Scope أيه هو المجال اللى انت عايز تشتغل فيه ؟

Quality أيه معايير الجودة فى المنتج اللى هاتتبعها ؟

Cost تكلفة المشروع

Time هى المدة الزمنية لتنفيذ المشروع

Resource موارد المشروع من أيدى عاملة ومكن ودى ممكن دمجها مع التكلفة

وعلى فكرة العناصر لو كان المشروع إنتاجي أو خدمي

يعنى الموضوع ومافيه أنت عايز تعمل مشروع فى أيه ؟ وعلى فكرة ماتسمعش اللى يقولك أشتغل فى حاجة بتفهم فيها الكلام ده

مش صح

ليه بقى لأن الحاجة اللى بتفهم فيها لو فتحت مشروع فيها يبقى ساعدك هاتشتغل موظف عند سعادتك وده اللى لازم تفصل فيه

أنت بتاع بيزنس ولا مهنى "على حسب مهنتك" ولو اشتغلت فى حاجة بتفهم فيها وهى دى مهنتك لازم تفصل بين عملك المهنى

وكونك مدير أعمال ومشاريع

تانى حاجة الجودة يعنى كواليتى يا فندم كواليتى ... أنت أولاً بتقدم المنتج بتاعك لمين يعنى لأى نوعية من البشر لأن خلى بالك

الموضوع ده يفرق كتير لأن نوعية معينة من العملاء يعنى بتحتاج نوعية معينة من الجودة وده اللى لازم تكون محدده يعنى أيه معايير

الجودة اللى هاتشتغل بيها

تالت حاجة معاك كام يا ريس ؟ شوف كده وقولى.... المعيار ده لازم يتاخد فى الحسبان جامد جداً لأن ببساطة لازم يكون رأس المال

مناسب للمشروع اللى انت اخترته

رابع حاجة المدة الزمنية لإتمام أول أعمال هاتاخد وقت قد أيه علشان تطلع منتج ؟ وده طبعاً مختلف عن المشاريع الخدمية لأنها

بتبدأ من العميل ومش العكس

خامس حاجة ممكن تتحط زى التكلفة ومين الكوادر البشرية اللى ممكن تعتمد عليها فى بناء المشروع ده

أنا بس هاضيف حاجة دى من عندى هو سؤال أنت عايز أيه من المشروع ده ؟ والسؤال ده ليه ؟ لأن فيه مشروع بيتبنى عشان

يستمر ويدر دخل على طول وفيه مشروع محدد المدة ومحدد التارجيت بتاعته وبمجرد تحقيق الهدف خلاص بيتقفل

وفيه نوع من المشاريع والنوع ده الجماعة الأمريكان شاطرين فيه أنه بيعمل مشروع عشان يبيعه ... ماتستغربش أيوه علشان يبيعه

يعنى مثلاً فى مجال صناعة البرمجيات تيجى شركة صغيرة غتيتة كده وتفتح وتاخد زباين كبار من السوق تقوم مايكروسوفت متغاظة

تروح أيه عارضة أنها تشترى الشركة وتاخد الجمل بما حمل واللى انت دفعته جنيهات جنيهات فى الأول هاتاخده دولارات دولارات فى

الآخر زى كده الحوارات اللى دايرة فعلياً بين مايكروسوفت وياهووووو

وأستنوني فى الحلقة الجاية

[وليد صفوت]

السلام عليكم،..

اونكل س س، أنا فعلا ببعمل دراسة جادة للموضوع ده و ان شاء الله تُكلل بالنجاح، و بالنسبة للإعلانات انا شغال فى اعلان زيت قلية :lol: ، ممكن تاخد دور فى مشهد بتاع واحد بيطش البطاطس المحمرة فى الزيت :lol:

استاذنا الفاضل Osmel،..

شكرا جزيلا على الافادة، و لى فقط تعليق على هذة النقطة:

------------

وعلى فكرة ماتسمعش اللى يقولك أشتغل فى حاجة بتفهم فيها الكلام ده مش صح. ليه بقى لأن الحاجة اللى بتفهم فيها لو فتحت مشروع فيها يبقى ساعدك هاتشتغل موظف عند سعادتك وده اللى لازم تفصل فيه أنت بتاع بيزنس ولا مهنى "على حسب مهنتك" ولو اشتغلت فى حاجة بتفهم فيها وهى دى مهنتك لازم تفصل بين عملك المهنى وكونك مدير أعمال ومشاريع

------------

انا رأيى هو العكس تماماً، لأن الخبرة فى المجال المراد الاستثمار فيه افضل بكثير من الاستثمار فى مجال لا افقه فيه شيئاً، و من ناحية الفصل بين العمل و بين الادارة فهذة نقطة بسيطة طالما لن يكون المدير هو الخبرة الوحيدة فى المكان، بل هو يستعين بخبرات اخرى و يكتفى هو بدور محدود كعامل فى المشروع و دور كبير كمشرف و ايضاً كمراقب للجودة، و كلما كبرت الشركة... تبدا مسؤوليات المدير تزداد و بالتالى لن يجد الوقت ليشارك باعماله الشخصية فى المشروع فيعوض ذلك بالاستعانة بخبرات اخرى تعوض هذا النقص و يستعين ايضاً بمراقب للجودة و يكتفى دوره تدريجياً فى الادارة العامة للمشروع...

ما اقصده ان كل شيئ ياتى بالتدريج، فليس المطلوب منى ان اكتفى بالادارة من اول يوم، بل يجب ان اعمل بنفسى...

أنا اذكر رجل الدعاية الاول فى مصر طارق نور بدا حياته كموظف عادى و تدريجيا سافر للدراسة و عاد الى مصر باسلوب الاعلانات الكرتونية (و كانت جديدة على مصر وقتها) و كان يشارك فى تصميم الاعلان بنفسه، او كما نقول Creative ثم و مع نمو الشركة اكتفى بالادارة...

شكراً مرة اخرى على اثراء الموضوع و فى انتظار باقى المشاركات،..

تحياتى..

تم تعديل 26 مارس 2009 بواسطة وليد صفوت

[osmel33]

انا رأيى هو العكس تماماً، لأن الخبرة فى المجال المراد الاستثمار فيه افضل بكثير من الاستثمار فى مجال لا افقه فيه شيئاً، و من ناحية الفصل بين العمل و بين الادارة فهذة نقطة بسيطة طالما لن يكون المدير هو الخبرة الوحيدة فى المكان، بل هو يستعين بخبرات اخرى و يكتفى هو بدور محدود كعامل فى المشروع و دور كبير كمشرف و ايضاً كمراقب للجودة، و كلما كبرت الشركة... تبدا مسؤوليات المدير تزداد و بالتالى لن يجد الوقت ليشارك باعماله الشخصية فى المشروع فيعوض ذلك بالاستعانة بخبرات اخرى تعوض هذا النقص و يستعين ايضاً بمراقب للجودة و يكتفى دوره تدريجياً فى الادارة العامة للمشروع...

الأخ الفاضل وليد مسألة أنك تبقى خبرة فى المجال اللى انت بتتكلم فيه مش مشكلة خالص لأن الهدف من أى مشروع هو أكيد المكسب المالي فيبقى مسألة فهمك لفنياته هاتكون مش مشكلة وممكن تستعين فى الأول بحد يساعدك المهم تفصل بين الإدارة الفنية والشغل الفنى عن إدارة الشركة للربح

وهنا نيجي لمربط الفرس ودى نتيجة خبرتى الشخصية أنا باشتغل فى مجال صناعة البرمجيات من حوالى 19 سنة المهم أنا من كام سنة كده تقريباً من حوالى 8 سنوات قولت مابدهاش بقى افتح شركة لحسابي وابتدى الشغل اللى ماباقدرش عليه كفرى لانسر لأن فيه بعض الجهات بتطلب ان اللى يعملها الشغل يكون شركة المهم دخلت معمعة انشاء الشركة وبرأس مال محترم وكنت باشتغل مع المعونة الأمريكية بيرسونالى بشخصي يعنى فالبتالى ماعنديش مشكلة في ان يدخل فى الأول فلوس ولا لأ دخلت مناقصات كسبت وخسرت برضه المهم اكتشفت انه زى مانا قولت فى مداخلتى السابقة ان انشاء شركة ليها مقومات النجاح حاجة وان الشركة دى تنجح حاجة تانية المهم لقيت انى علشان أكسب كويس من المناقصات لازم يكون فيه شغل من تحت الترابيزة ومع جهات كبيرة كمان يبقى الموضوع مش موضوع بيزنس وكفاءة وكلام من ده طبعاً كان موضوع متعب جداً قولت ماشي اطلع اسوق شغلى فى الخليج ونجحت فى ديل واحدة فى أبوظبي خاصة بمشروع elearning وعنها يا ريس الموضوع نام نومة وما قامش منها تاني روحت واخد حالى ومالى وعلى الخليج يا ريس وخليك كده احسن وبصراحة أنا جالى عروض كتير من خليجيين علشان يعملوا معايا مشروع سواء فى الدوحة أو دبي وأنا بصراحة اللى رافض لأنى باختصار حتى ان شاء الله ماطولش في موضوع الخليج ده ونشوفلنا هجرة مع الأخوة المهاجرين

وعلشان كده انا فعلاً بافكر انى لو في يوم من الأيام فتحت مشروع أولاً يبقى بعيد عن مجالي لأن المجال ده مكلف جداً وعايز فلوس كتير وهايكون غالباً مشروع من النوع الأول بتاع الناس عايزة أيه ؟ يعنى من الآخر كافيتيريا مافيش مانع فول وطعمية وطبعاً مافيش احلى من موضوع الأكل ده لا تقولى بقى بيزنس ولا دياوله والناس بتوع الأكل دول بيكسبوا مكاسب وعلى فكرة انا مش باقول الكلام ده اعتباطاً لأ فيه الجماعة بتوع محلات الشبراوي فى مصر اعرفهم وحاكولي على كل الفيلم من أوله لآخره وطبعاً لقيته مربح جداً

المهم خلاصة كلامي أن الواحد يكون بتاع مال وبس وأهم حاجة يدور على المكسب لكن لو فكرت كراجل فني هاتضيع فى متاهة انك عايز تعمل اللى ماتعاملش وهى دى كانت أحد وأهم أخطائي

[الباشمهندس ياسر]

من خلال التجربة

انسى انك تعمل شركة باداره ذذاتية ابتداءا

انما ينفع ف النهاية خالص انها تدور نفسها بنفسها

و تحياتى الحارة لكل من ساهم ف هذا الموضوع

[elfakhrany]

ياباشمهندس ياسر من وجهة نظرى فعلا ان الصناعة فكرة ممتازة وخصوصا توافر الفنيين المهرة فى مصر وانخفاض تكاليف الأيدى العاملة و أنا شفت واحد فتح

مصنع صغير عبارة عن ماكينة تكسير الحجر الجيرى ويستخرج منه بودرة السبيداك اللى بيستخدم كبطانة فى المبانى قبل الدهان ومشى معاه الحال وتوسع وجاب

سيارة واتنين وبدأ يوزع فى جميع المحافظات ,,, شكرا