عدنا للبيت الكبير

[Facts researcher]

السلام عليكم جميعاً ورحمته و بركاته

هذا إستئذان بالعودة لهذا البيت الكبير و العامر بأهله إنشاء الله من أهل مصر الكنانة المحروسة بإذن ربها و هذا البلد الطيب أهله و القائمين على هذا المنتدى الرائع من د/عادل أبوزيد و أسرة أبوزيد و شريف عبد الوهاب و حبيبي سي السيد (والآخرين الذين لاأعرفهم بعد) و الذي لم أكتب في غيره من المنتديات، لمن لا يعرفني غبت عن هذا المكان حوالي خمس سنوات و أنا عدت إلى بلدي الغالي الحبيب مصر منذ يناير 2006 بعد دراسة و عمل بالخارج و أحمد الله كثيراً على هذه العودة للعمل في بلدي و خدمتها. دفعني للعودة للمنتدى الشعور بالمسؤولية و الواجب تجاه هذا الوطن الغالي لتبادل الآراء و التي يجب أن تصب في مصلحة هذا الوطن لأننا (لانملك) غير ذلك و (لايجوز) غير ذللك أبداً.

وفي النهاية إني لأرجو أن يتقبلني الأخوة القائمين على هذا المنتدى و أن يعفو و يصفح عني كل من شعر مني بأي خطأ إرتكبته أو زلة وقعت فيها. و تقبلوا تحياتي لكم أجمعين.

(الباحث)

[Salwa]

الابن الغالى ايمن؟؟

الف الف حمدلله على السلامة ..

نورت بيتك ..

عودة دائمة ان شاء الله ...

هل تصدقنى لو قلت لك انى كنت افكر فى كل الاعضاء القدامى وتساءلت ؟؟ ياترى اين هى اراضيك ياايمن؟؟

فى بلجيكا؟؟ فى الكويت ؟؟ والا فى سويسرا ؟؟ والا كندا...(( كما فعل لانسلوت )).

مليون اهلا ومليون مرحبا ..

[se_ Elsyed]

أخي العزيز أيمن

حمد الله عالسلامه

كتبت لك رد مطول أول أمس .. وجيت أدور عليه .. شكله ما انبعتش ...

حمد الله عالسلامه

إحكي لنا بقى إتجوزت ولا لأ ..

وشغال فين دلوقت ...

[الباشمهندس ياسر]

حمدا لله ع السلامة يا استاذنا

انا قريت لحضرتك قبل كده و نزلت تساؤل عن غيابكم

و الحمد لله بداتم ترجعوا واحد وراء التانى

و بدات بلانسلوت و ادى حضرتك وعقبال الباقى

شعنونة و كليو و الناس الجميلة اللى كانت بتكتب هنا

مرة تانية

نورت مكانك

[لولا]

فعلا كما قال ياسر .. قرأنا لكم وتساءلنا عنكم .. وافتقدناكم رغم اننا لم نكن وقت وجودكم

سعيدة جدا ان ارى اسمك يضيء المحاورات من جديد .. ومع كل اطلالة لأحد افراد الكوكبة الرائعة التى

اضاءت المحاورات ومازالت بما تركته من مشاركات اشعر بفرح حقيقى ,, اتمنا حقا ان نجتمع كلنا هنا

دون ان يرحل احد .. ان يكون هنا فعلا وكما قلت البيت الكبير .. الكبير بوجودنا معا ...

الف حمدالله على سلامتك ..

على فكره ممكن حضرتك متعرفناش .. عشان يمكن احنا جداد .. لكن الناس اللى زى حضرتك وزى صفاء ولانسلوت وكليو وناس كتير

كلنا نعرفهم .. كلنا اكيد قرينا ليهم حاجه .. عرفناهم من خلالها .. وافتقدناهم لما التفتنا لقيناهم مش موجودين .

اتمنى العودة تكون نهائيه .. ميجيش بعدها غياب ... لأن هنا فعلا .. البيت الكبييييييييييييييييير .

منور المحاورات .. بيتنا كلنا :P

لولا

[Folana]

السلام عليكم ورحمة الله....

والله يا أخى الفاضل إن كلماتك تصل الى القلب بسهولة وتجعلنا جميعا نشعر وكأننا نعرفك منذ زمن بعيد...وكأنك أحد أفراد العائلة ليس على مستوى البيت الكبير فقط...ولكن على المستوى الشخصى ايضا...

مرحبا بعودتك بين أهلك وناسك يا أستاذ أيمن...

ونتمنى أن نقرأ لك مرة أخرى ..وألا تحرمنا من وجودك بيننا....

ونورت البيت الكبير وازداد دفء وحميمية برجوعك اليه....

:P

[Alshiekh]

حمدا لله على سلامة رجوعك لمصر اولا ، وربنا يوفقك وتكون يد بناء فى هذا الوطن ، ومرحبا بعودتك للمحاورات ونتمنى ان تجد من الوقت مايكفى للمشاركة فى المحاورات

نورتنا وشرفتنا وماتحرمناش من قلمك ومشاركاتك.

[Sherief AbdelWahab]

حمد الله ع السلامة ، بيتك ومطرحك وأهلك وناسك... :P

خلص الكلام

[aif]

نورت بلدك .... كلامك رجعني للماضي من 14 سنة لما رجعت من الغربة .... كنت حاسس بنفس احساسك

والحمد لله .... كان قرار صائب ولم اندم عليه

ربنا يوفقك في مصر والحمد لله على السلامة

[عادل أبوزيد]

السلام عليكم جميعاً ورحمته و بركاته

هذا إستئذان بالعودة لهذا البيت الكبير و العامر بأهله إنشاء الله من أهل مصر الكنانة المحروسة بإذن ربها و هذا البلد الطيب أهله و القائمين على هذا المنتدى الرائع من د/عادل أبوزيد و أسرة أبوزيد و شريف عبد الوهاب و حبيبي سي السيد (والآخرين الذين لاأعرفهم بعد) و الذي لم أكتب في غيره من المنتديات، لمن لا يعرفني غبت عن هذا المكان حوالي خمس سنوات و أنا عدت إلى بلدي الغالي الحبيب مصر منذ يناير 2006 بعد دراسة و عمل بالخارج و أحمد الله كثيراً على هذه العودة للعمل في بلدي و خدمتها. دفعني للعودة للمنتدى الشعور بالمسؤولية و الواجب تجاه هذا الوطن الغالي لتبادل الآراء و التي يجب أن تصب في مصلحة هذا الوطن لأننا (لانملك) غير ذلك و (لايجوز) غير ذللك أبداً.

وفي النهاية إني لأرجو أن يتقبلني الأخوة القائمين على هذا المنتدى و أن يعفو و يصفح عني كل من شعر مني بأي خطأ إرتكبته أو زلة وقعت فيها. و تقبلوا تحياتي لكم أجمعين.

(الباحث)

الفاضل أيمن .... أنت "صاحب بيت" بل أنت و جيلك أصحاب البلد و ليس محاورات المصريين فقط

ما سبق كان إستهلالا لابد منه

تغيبت عنا خمس سنوات و هى فترة طويلة و بالتأكيد رأيت الكثير و سمعت الكثير و تعلمت الكثير و من حقنا عليك أن نسمع منك و بالتأكيد أيضا كلنا سنستفيد منك سواء كنا فى أواخر العمر أو فى مطلع الشباب.

ربما تجد عندك الكثير لتكتبه و ربما محاولتك للإتقان قد تدفعك للتأجيل و لكن عليك أن تبدأ - و بعدها ستنطلق - و الأمر الذى لايدرك كله لا يترك كله.

[عصام]

أخى العزيز

مجرد قراءة إسمك ثانية على صفحات الموقع أعادنى إلى جو المحاورات من 5 سنوات تقريبا .. وذكرنى بآخرين

1000 حمد لله على السلامة .. :)

[أسد]

هذا بكل تأكيد خبر سار ..

وعودتك لبيتك أمر مفرح .. وتشعرنا بأننا لا نضيع وقتنا هنا ..

بل أننا نعمل في محاورات المصريين عملاً جيداً ومحترماً .. يجذب أليه خيرة المصريين

[بنت شعنونة]

مش مممممممممممممكن

فاكتس

ازييييييييييييييييك

حمداله ع السلامة وفرحت بيك جدا جدا جداااااااااااااااااااااااااااااااااا :lol:

يارب يكون كله تمام :rolleyes:

[khedr]

حمد الله علي سلاااامتك اخي الكريم

...........

...............

وانا كماااان جيت بس بسرعه

وراااايا....... وراااايا ايه!!!!!!!

دنيا بتجري وراااائي

حتي تسقطني من علي

..........................؟؟؟

[se_ Elsyed]

انا دمي فار

واي حد هايرجع من الغربة ويقول انا رجعت ونرد عليه ونعمل له فرح بمية لمبة وبعدين يختفي وما نشوفوش الا بعد 5 سنين تاني ....

بصراحة هابطحه

واول واحد هايتطبح :

1- صفاء ...... دخلت عملت هوليله وانا رجعت ويا لهوي يا سي السيد والسوارس خبطتني ... ومافيش يومين واختفت

2- شعنونة ........ قولنا هاترجع مُحمله بحكايات وذكريات عن الشعنونة الصغيرة وعن الكفاح المُسلح ... وادي وش الضيف

3- فاكت ريسيرشر ... ده بطحه مضمون

4- خضر .. العطار .... انضم لقائمة المبطوحين ... يالله يا خضر عايزها كام غرزة

[بنت شعنونة]

سي السيد؟ :wub:

انت عارف انت اول مرة تكلمني من يجي سنة واكتر؟؟

من قلبك الكلمتين دول عشان ها يفرقوا معايا جااااااامد والله :rolleyes:

انما لو ترحيب كدا وبتاع

يفتح الله يا عم :lol:

[Facts researcher]

أوﻻً أشكر كل من رحب بي. وأعد مشرفي هذا المنتدى الغالي أن أكون على قدر المسؤولية و أن تكون كل مشاركاتي في سبيل تحقيق رفعة و سمو هذا الوطن الغالي.

وللرد على تساؤﻻت الأحباب:

يا سي سيد أن لسه متجوزتش (مش كده أحسن برضه!)، يا عم سي سيد بنات الأيام دي متعبين جدااااا!!! فاكر موضوع البيانو :rolleyes:

أنا بشتغل في شركة متخصصة في هندسة الإتصالات. و مبسوط جداً إني رجعت بلدي اللي بحبها و بعشقها و أفديها بما أملك. و أدعو كل مغترب إنه يرجع مصر و ميستحلاش الغربة وبصراحة كل اللي بيقول إن مصر مفهاش نهضة إقتصادية أقول له إسمحلي إنت يا إما كسول أو مش شايف حوليك. للأسف الكل بيبص تحت رجله و مش عاوز يتعب. الشباب اللي بيرفض فرص عمل في المناطق الإستثمارية في وجه قبلي أو في مناطق الإستثمارية في مدن القناة أو المدن الجديدة عشان بعيد (مش عشان المرتب) ويروح يتغرب بره مصر وتلاقي مرتبه بعد إستقطاع كل المصاريف (سكن، سيارة، أكل، ... إلخ) يصفصف نفس اللي هيخدو في مصر و خصوصا الشركات في المناطق الإستثمارية و المدن الجديدة في مصر بتدي سكن و وجبات و بدل إنتقال، يعني كل المصاريف اللي بتتصرف سيتم توفيرها و زيادة لأن مصر أرخص من غيرها. أنا مع السفر للخارج عندما يكون لهدف سامي (دراسة و إكتساب خبرات راقية في أماكن العمل المرموقة بالمعايير العالمية). وبالمناسبة مثل هذه اﻷهداف تستطيع أن تجدها في مصر اﻵن بقدر أفضل من اﻷول (أنا خريج١٩٩٦) بس لازم ترتقي بمستواك العلمي، وده كلام واحد عاش في الغرب زي حلاتي و لم تستهويني الحياة هناك على الرغم و يعلم الله أني كنت أعمل في أفضل الأماكن لكن كان هدفي إن بلدي أولى و نقل خبراتي المكتسبة لأولاد بلدي أولى.

الغالية السيدة الفاضلة سلوى ، و الله العظيم أنا مبسوط إنك أول إنسانة ترحب بيه.

شعنووووونة ، إزيييييييك؟ يارب دايماً تكوني بخير.

اﻷستاذ عادل أبو زيد: باكورة أعمالي هو موضوع الدبلوماسية في الإسلام، و إن شاء الله هيكون فيه أكثر من كده.

اﻹخوة جميعاً، تشرفت بمعرفتكم جميعاً و أنا نفسي أشوفكم كلكم في لقاء يجمعنا كلنا.

-

[se_ Elsyed]

سي السيد؟ :lol:

انت عارف انت اول مرة تكلمني من يجي سنة واكتر؟؟

من قلبك الكلمتين دول عشان ها يفرقوا معايا جااااااامد والله :rolleyes:

انما لو ترحيب كدا وبتاع

يفتح الله يا عم :happy:

طب إن شالله اعدم نتنياهو ومعاه تسيبي ليفني .. لو جبتي سكينه وفتحتي قلبي هاتلاقي بُطين أيمن وبطين أيسر وأورطى .. جنب دول كلهم هاتلاقي في جُمله ناقصة كلمتين .. أهم الكلمتين دول هما اللي قلتهم لك ..

يا شعنونة الحياة ما تستاهلش ... وإنتي عارفه إنك أختنا الصغيرة الشعنونة ( والله يا ستي كل ما أقرأ حروفك أفتكر أختي الصغيرة أُم سلمى - هي عايشة في أوروبا حالياً مع زوجها وأولادها - كانت شعنونة كده برضوا .. بس مش عارف قلقان على حالتها دلوقت .. بقى لها كام سنة لبست نضارة .. وزادت لها ييجي 20 كج وعمال أذلها بيهم وهي تقولي ده عز يابني ... وبقت تتكلم كلام كله حكم وبتفكرني بأبله فضيلة ... تفتكري دي حالة صحية ونفسية جيدة :wub: ؟ )

ولا أدعي إني لا أحمل لأحد ضغينة .... لكنها الحقيقة ويعلم الله ...

بس أنا متغاظ منك بجد ... كل مرة تيجي وتقولي أنا جيت نورت البيت .. وبعدها تغتسي ييجي سنة تاني ... أنا عن نفسي زهقت ..

وعندي ليكي فكرة ...

إنتي قبل ما ترجعي تكوني مكونة نفسك .. وعامله لك ييجي 50 موضوع ... ويوم ما تدخلي تقومي مدرمغه المنتدى مواضيع من الحاجت التقيلة بتاعت الخضار والدي جي والرسم بالدوكو على الأطباق الميلامين ... بحيث لو أختفيتي نكون إحنا لسه ما خلصناش قراية المواضيع دي ..

deal ?

---------------

أما أنت أيها الفاكت ريسيرشر

فألف حمد الله عالسلامة مرة أخرى ..

وأرجو أن تحكي لشباب مصر أين كنت وما هس الجهة المرموقة التي كنت تعمل بها ويتمناها أي شخص ومع كده رجعت وفضلت تُفيد بلدك ... لعلها تكون تجربة ومثال جيد للجميع ..

[الباشمهندس ياسر]

ده حمدا لله ع سلامتكم كلكم

ايه يا جماعه ... هو فيه

يا اخوانا حد يكلم الاستاذ عادل

ينش الذيب اللى مربوط على باب المحاورات و مخوف الناس اللى واحشينا

[khedr]

ياسااااااااااااااااااااتر...... بطح وغرز من سي السيد

لأ...... بقي نقعد ونستكن....... ولو ان بيقولوا بطح الحبيب زي.....

بس المشكله الاكتاف معتدش تتحمل ياخويا سي السيد

والزمن بيتغير كل يوم

لأ... كل فيمتو ثانيه اسرع من الفيمتو اللي قبلها

والواحد حاسس انه علي جنب الصيف

وخاااايف يحط رجله

العربيات والموتوسيكلات

والتوك..... توك..... وماادراك ما التوك توك

ربنا يسهل

وتروح منا العقده

خاااااااااااااااااااااااااااااايف ومرعوب من التوك توك

دعواااااتكم