تشغيل رحلات «القاهرة» و«الرياض» بين ضباء وسفاجا ( خبر حلو )

[الحر الأشقر]

خبر قريته النهارده في الشغل و البحر بقى أوفر يا رجاله

أكد رئيس المؤسسة العامة للموانئ الدكتور خالد بن احمد بوبشيت أن رحلات السفينتين «الرياض» و«القاهرة» ستبدأ رسميا على خط ميناءي ضباء وسفاجا اعتبارا من منتصف ربيع الآخر، وأوضح بعد وصول السفينة "القاهرة" مساء الخميس الماضي إلى ميناء ضباء في رحلة تجريبية أن التشغيل سيبدأ بعد استكمال متطلبات بدء التشغيل. يذكر أن السفينة من نوع كاتاماران ثنائية البدن مصنعة من الألمنيوم وبمحركات من أحدث التصميمات المتوافقة مع الاعتبارات البيئية، وتتميز بسرعتها العالية حيث تصل إلى 45 عقدة في الساعة ما يجعل زمن الرحلة بين الميناءين يصل إلى الساعتين والربع، وتبلغ حمولتها 1200 راكب و175 سيارة. وروعي في بناء السفينتين أحدث وأدق المواصفات العالمية الخاصة بمعايير السلامة والأمان وراحة الركاب، وتعتبران من أحدث السفن من ناحية السلامة والتجهيزات الملاحية المتقدمة، وزودت كل سفينة بنظام متقدم للتحكم يقلل من الاهتزاز أثناء الإبحار، وبكامل التجهيزات الخدمية وخاصة لكبار السن ولذوي الاحتياجات الخاصة. وأضاف بوبشيت أن تدشين عمل هاتين السفينتين يمثل نقلة نوعية وتأسيسا لمرحلة جديدة في النقل البحري للركاب بين البلدين، وتجسيدا للاهتمام والرعاية للتواصل الأخوي بين الشعبين الشقيقين، حيث يتوقع أن تسهما في نقل حوالي المليون راكب سنويا بين البلدين.

[se_ Elsyed]

بس نصيحة

أي حد مش نازل بعربيته يبقى افضل له ينزل طيران عن طريق سما أو ناس تقريباً نفس أسعار البري ومافيش توفير جامد حتى لو عدد أفراد الأسرة كبير .. بالإضافة إلى إن البري مضيعة في الوقت والمجهود .. يكفي إن المسافة البري بين الرياض والقاهرة مثلاً تستغرق 52 ساعة رايح وزيهم جاي !!!!!!!!!!!!!

حد هايقول لي طب لو واحد معاه وزن ؟

الشحن من الرياض لأي مكان في بر مصر ( أعتقد ما اعدا الصعيد ) يعني وجه بحري أو القاهرة .. الكيلو بيتكلف ( 2 ريال ) from door to door ... يعني كلام فارغ ولا يُذكر ..

وأعيد وأقول : البري بهدله ... وكله قندله ..

[لخبطه]

الطيران جميل بس بردو الخبر ممتاز ونعمه من ربنا مش دايما بيكون الطيران سهل وجاهز ومناسب

شكرا الحر على الخبر الجميل

[Virus]

يا عم س س..وهو فيه أحلى من البري وتأمل البحر والمرمطة في سفاجة والغردقة من العساكر والموظفين.. :sad: ومن اللي مايسواش ومن اللي مايسواش برضو

دي رحلة كلها عظات وعبر وبتعلم الواحد قد إيه هو في نعمة إنه مغترب!!

عشان كده الخبر ده أنا سعيد بيه...وهاديها طلعة كمان بري السنة دي عشان أدشن الباخرة الجديدة وأدعي لخادم الحرمين

واعيد وأقول..البري..تأديب وتهذيب وإصلاح :sad: ولياليه كلها ملاح wst:: :) وعبر حتى الصباح

تم تعديل 23 مارس 2009 بواسطة Virus

[elfakhrany]

يا عم س س..وهو فيه أحلى من البري وتأمل البحر والمرمطة في سفاجة والغردقة من العساكر والموظفين.. :sad: ومن اللي مايسواش ومن اللي مايسواش برضو

دي رحلة كلها عظات وعبر وبتعلم الواحد قد إيه هو في نعمة إنه مسافر!!

عشان كده الخبر ده أنا سعيد بيه...وهاديها طلعة كمان بري السنة دي عشان أدشن الباخرة الجديدة وأدعي لخادم الحرمين

واعيد وأقول..البري..تأديب وتهذيب وإصلاح :sad: ولياليه كلها ملاح wst:: :) وعبر حتى الصباح

كلام جميل كلام معقول ماقدرش أقول حاجة عنه

[mokhtarelmalahy]

بجد ميزه البرى الوحيده هو استعمال العربيه فى مصر لان الايجار فى مصر شروطه صعبه وغالى وممكن مايبقاش متعب للى فى السعوديه خصوصا فى المنطقه الغربيه او الشماليه زى جده او مكه او تبوك انما للى جاى من الامارات وقطر ده هو العذاب بعينه ولازم كمان عربيه 4*4 عشان تستحمل الطريق

[محسن ممتاز]

ان شاء الله هاكون من اول المسافرين على متن احدى السفينتين واجرب البري بعيداً عن نويبع الاردن . بس الاخ متأكد ان ممدوح اسماعيل وشركاه ملهمش في السفينتين . :blink:

[aboalarabi]

السلام عليكم يا اخوة

انا نازل السنادي بري من طريق ضبا انشاء الله

فلو حد عنده فكرة عن اسعار تذاكر السفر يبقى جزاه الله خير

تحياتي لجميع المغتربية المصريين

[egyptian dentist]

طيب ممكن حد يقولينا هو التذكره على السفينة دي بكام و هتنزل فين و تطلع منين؟؟ و تكلفة نزول عربية و أخذ نمر الجمرك بكام؟؟و اذا انا كنت عايش في الباحة يبقى اروح فين و ابدأ رحلتي منين بالظبط؟؟؟؟

حاجه تانيه ممكن حد يقولي على شركة شحن في الباحة أو في الطائف أو في جدة ويكون مجربها قبل كده ( يعني تبقى مصدر ثقة) والاسعار عمله ازاي و الجمرك أخباره ايه؟؟؟؟؟؟

[abohaya]

تحية لكل الاعضاء و هذة اول مشاركة لى وانا مقيم فى المدينة المنورة ومستعد لاى مساعدة او استفسار عن المدينة المنورة بقدر الاستطاعة ونصيحة لكل شخص ناوى ينزل برى اقولة ما تعملهاش الا لو مضطر قوى قوى بالرغم من ان مشوارى من المدينة الى ضباء لايتعدى 6 ساعات وبعد تجربتين للنزول البرى قررت بعدها التوبة النصوحة والا افعلها مرة ثالثة ابدا و يمكن فى ناس عندها القدرة على تحمل العصابات المنظمة فى الغردقة او سفاجا (انا جربت الغردقة بس) وعصابات المرور فى مصر من ظباط و امناء و عساكر الى بينتظروا شهرين الصيف بفارغ الصبر لان دة موسم بينتظروة لنهب كل من يفكر فى تعليق النمرة الصفرا المسماة جمرك وبعد وجود شركات الطيران الجديدة اصبحت الاسعار تقريبا زى البرى وارحم للواحد يستحمل شوية النصابين بتوع تأجير السيارات (ياريت لو حد يعرف واحد كويس بيأجر سيارات وثقة من القاهرة او الزقازيق يقولى)

[Amr Radwan]

يا جماعة .. انتو رايحين بعيد ليه ؟؟

تذاكر الطيران رايح جاي في الخطوط السعودية ب 1250 ريال للراكب الواحد و اكرر الخطوط السعودية .. مش سما و لا ناس

رااااااااااااااايح جااااااااااااااااااي

اسالو عليها في اي شركة طيران .. بس اتمني تلحقوا اماكن لان العرض ده من مده

و للعلم انا حجزت فعلا عليه من حوالي شهر و نصف تقريبا عشان انزل في شهر 6 اللي جاي :closedeyes: