تُهامي في الصف الأمامي

[se_ Elsyed]

كما عودناكم دائماً على كل ما هو جديد وفريد ووحيد .,, وظريف وطريف وخفيف .... وعشان ما حدش يقول اننا بنفرق بين ولادنا وعندنا خيار وفقوس .. .. فمثلما نفحنا بنتنا لولا قصة عاطفية ومغامراتية عن ملابسات اختيارها كمشرفة بالمحاورات المصرية وأصبحت من ساعتها نجمة سنيمائية ..

هانحن ذا ننقل لكم من رواء الكواليس عملية اختيار الدكتور تهامي لباب الهجرة الكندية

عمت حالة الغضب في اوساط المشرفين بعدما تلقوا اشعاراً بإجتماعاً أخر هام وضروري مع الادفايزر .

عصام : ايه ده بقى ؟ احنا ما اتفقناش على كده .. كل يوم سايبين اشغالنا وقافلين محلاتنا عشان الاجتماعات دي ؟ يا جدعان ده انا قافل الورشة عالزباين وزمانهم حمضوا

ابو محمد : تحلى بالصبر يا اخ عصام ... ما هو اجتماعين في خلال اسبوع واحد مش شيء طبيعي بالمرة وبالتأكيد في أشياء مهمة وخطيرة تعترض مسيرة المحاورات ويريد الأدفايزر أن يُشركنا معه في إتخاذ قرارات هامة ..

سلوى : على العموم .. قال يا خبر بفلوس .. بكره يبقى في اوكازيون وينزل عليه ديسكونت ونعرف باقي الاخبار

لولا : الله .. انا حظي حلو قوي .. بقى تعيين واجتماع في نفس ذات الاسبوع ,, واشوف فيهم الادفايزر بيه مرتين ... كتير كتير كتير ؟

س س : انا قلبي ميتوغوش .. والفار ابتدي يجري في عبي وحاسس ان في قطط بتجري وراه كمان

اسد : طب يا جماعة ... مش عايزين نتأخر على الاجتماع .. ممكن تتفضلوا على غرفة الملابس وكل واحد يلبس الافارول بتاعه والطاقية المخططة واتفضلوا عالميكروباص عشان نلحق

ويبداً الاجتماع في الموعد المحدد

الادفايزر : بسم الله ... وبسم الشعب نفتتح الجلسة ... طبعاً انتو مندهشين انا ليه اجتمعت بيكو مرتين في خلال اسبوع واحد ... هذا كان استهلالاً لابد منه .....

ابو محمد : خير يا ادفايزر باشا .. بإذن الله خير

ادفايزر : انتو عارفين وحسين طبعاً ان البلد بتمر بحالة حراك سياسي .. والحراك ده لازم له ناس تحركه ... من هنا بقى ينطلق خوفي وخشيتي ..

سلوى : ممكن توضح يا ادفايزر باشا

ادفايزر : انا ملاحظ يا جماعة ان موضوع الهجرة انتشر انتشار النار في الهشيم .. ده انا خايف امشي بعربيتي في مره في صلاح سالم مالاقيش ولا واحد مصري

س س : طب والعمل يا رياسه ؟

ادفايزر : ما هو عشان كده انا جبتكم النهاردة .. أنا حاسس إن باب كندا عامل لنا مشاكل وقلق .. وبيفتن الشباب الصغير عشان يسيبوا البلد ويهجوا ..

س س : بسيطة يا باشا .. طلبك موجود وبحركة واحده ممكن نسد الباب ونستريح عشان ما يجيلناش منه الريح ..

أبو محمد : إزاي يا فالح ؟

س س : بسيطة .. إحنا نستلفوا أنبوبتين غاز من المطبخ بتاع بندق ... وأجي أنا من تحت عقب الباب وأقوم منفد الخراطيم .. وأقوم فاتح الأنبوبتين عالأخر وفي نفس الوقت ممسمر الباب عشان ما حدش يعرف يخرج .. وبكده ممكن نقول إن الناس اللي جوه ماتت بإسفكسيا الخنق أثناء إشعالهم النار للتدفئة حيث إن درجة الحرارة في الباب بتبقى 25 تحت الصف وكدهوت .. وبكده ولا المعمل الجنائي ولا إلإف بي أيه هايفقسوا العملية ..

محمد : يا عم إركن على جنب .. طب ماهم ممكن لما يشموا ريحة الغاز يروحوا فاتحين الشبابيك يا فالح .. أو يتصلوا بالسيفيل ديفينس ييجي ينقذهم .

س س : آه صح .. فاتت عليه إزاي دي ؟

عصام : وسع يا عم إنت وهو .. لا تقولي غاز ولا صرف صحي ... أنا لقيت الحل .

أدفايزر : بارك الله فيك يا أخ عصام .. هاتهي من فضلك ..

عصام : إحنا نبلغ عنهم .. مكالمة من مجهول لبتوع أمن الدولة .. نقول عليهم إن الجماعة دول من أقباط المهجر وعايزين يقلبوا نظام الحكم وكده .

محمد : يا سلاممممممممممم .. والنبي تقعد ساكت ... أقباط مهجر إيه يابني وفيهم محمد تهامي ومحمد الشامي ؟

عصام : طيب نقول عليهم إنهم من مسلمين المهجر

أبو محمد : اللي هما مالهم يعني ؟ يعني نبلغ نقول إيه ؟

عصام : اهو أي حاجه يابو محمد والسلام ما تعقدوهاش في وشي أنا ما صدقت ربنا فتح عليه بفكرتين هاتيجوا تقفلوها

فلانه : رويداً رويداً يا أخ عصام ... ربنا هايجيب الفرج ما تشغلش بالك إنت إحنا محتاجين مخك في حاجات تانية أهم .

لولا : الله .. العملية سخنت قوي وأنا مستمتعه بصراحة بحالة الحوار الشفافة دي ..

أدفايزر : بمناسبة الشفافية ... عايز اخد رأيكم في ترشيخ الفاضل تهامي مشرفاً لباب كندا .. عشان يسيطر على المسائل شويه .. بس عايز شوية معلومات عنه .. يعني ايه رايكم في شفافيته ؟

س س : والله يا بيه هو دايماً بيلبس كاجوال وجينز .. وبالتالي صعب نحكم على شفافيته ..

فلانه : حضرتك بس انا ملاحظه ان اللغة العربية عنده عايزا لها عمره لإن عنده 22 حرف ضاربين وبييجوا مكان بعض ... وحرف القاف مش موجود في قاموسه أساساً

ادفايزر : دي مافيش مشكلة فيها .. ممكن نديله دورات مكثفة في اللغة العربية .. او نجيب له الدكتور " حتى " المتخصص في قواعد اللغة العربية ويقعد معاه شهر او اتنين ويبقى بربنط بعدها ....... طب ايه رأيكم في نزاهته ؟

لولا : انا رأيي ..

فولانه مقاطعةً : رأيك ؟!!!!! رأيك ايه يا أم رأي ... بقى انتي ما بقالكيش يومين ونص في الاشراف وبقى لك رأي ؟ طب ده انا قعدت سنتين قاعدة ساكته في الاجتماعات لحد ما بقى لي رأي

لولا : لو سمحت يا آبيه ادفايزر ... مدام فولانه هانم قارشه ملحتي من ساعة ما الرووس اتساوت وبقيت زرقا زيها وعشان أنا حلوه وصغيرة كمان .. فمن فضلك حوشها عني ... سِم كده

ادفايزر : يا افاضل .. من فضلكم نحووا تلك المهاترات جانباً ودعونا نركز في جدول الاعمال .. احنا بإختصار عايزين نزرع الفاضل تهامي في وسط مجتمع المهاجرين الجدد عشان يجيب لنا اخبارهم ونعرف نضعهم تحت السيطرة ... حد يعرف هو فين دلوقت ؟

اسد : ايوه .. احنا حطين جهاز تعقب في جيب بنطلونه والجهاز بيشير دلوقت انه في الجامعة الكندية اللي في الشروق .. بيٌلقي محاضرة بعنوان " نحو مجتمع كندي افضل ... فكر جديد ومستقبل واعد والزرق على الله "

ادفايزر : طب ممكن اتنين افاضل يروحوا يستدعوه للاجتماع ؟

لولا : بليز يا مستر ادفايزر .. بلاش تبعت الفاضل س س ولا الفاضل عصام ..لإن اسلوبهم مش مريح .. ده انا من ساعاتها مش قادرة اتلم على اعصابي من الخضة اللي خضوهالي

ادفايزر : اذاً فليذهب اثنان من خيرة مثقفي المحاورات ليحضراه فوراً ... وليكن الفاضل اسد والفاضل ابو محمد

وبالفعل يتوجه الاثنان الى مدينة الشروق ويتسللا الى كواليس المحاضرة ويتقابلا مع تهامي ..

اسد : مساء الخير .. انت الدكتور تهامي ياسين التهامي ؟

تهامي : ييس اي ام

ابو محمد : سيجارة يا دوك ؟

تهامي : ثانكس .. ما بأغيرش .. انا باشرب غوليون ..

اسد : ده اللي انا كنت عامل حسابه ,,, بانجو ؟ بتشرب بانجو يا تهامي ؟

تهامي : بانجو ؟!!!! آه بأشرب بانجو .. اتس نوت يور بيزنس ... وبعدين انتو مين بيزيكلي ؟

ابو محمد : معاك القوات الخاصة لمنتدى محاورات المصريين ..

تهامي : سووووو .. وات ؟ ... انا عايز اتصل بسفير اسبانيا ... انا مواطن كندي ومعايا بزابورت كندي ولي كامل حقوق المواطن الكندي المتقفل في كندا وأي حد هايمد إيه عليه هاصوت والم عليكو أمة لا إله إلا الله الكنديين ..

ابو محمد : لا دعي للإنزعاج يا اخ تهامي .. احنا عايزينك في كلمتين مع باقي الاخوة المشرفين وهانرجعك تاني ...

ثُم يُخرج اسد زجاجة مخدر ليرش بها على وجه تهامي ..

تهامي : ايه ده ؟ بيرفيوم ؟ لأ ميرسي انا ما بأغيرش الافتر شيف بتاعي ..

ولم يستكمل الجُملة وذهب في ثبات عميق ... ثم افاق ليجد نفسه في غرفة الاجتماعات ..

تهامي : انا عايز أعرف ايه اللي بيحصل بالظبط ... أنا مش هاسكت وهاعمل إيسكليشن للموضوع لأعلى مستويات ...

أدفايزر : إهدأ يا فاضل تهامي ... أنت في حضرت الأدفايزر يا إبني فلا داعي للقلق .

تهامي : يا مستر أدفايزر دول جابوني هنا ولا كإني كريمينال ومرتكب كرايم ..

س س : بيس يابو تهامي ... والله وباضت لك في القفص وهاتبقى مخبر .. قصدي مُشرف .

أدفايزر : من فضلك يا أخ س س .. ما تحرقلناش المفاجأة .. قول لي يا تهامي : إيه رأيك في مصر ؟

تهامي : نوت باد .. حلوه يعني ... مالها وفي إيه بالظبط ..

أدفايزر : أنا هادخل في الموضوع على طول .. إحنا شايفين إنك شاب كويس يا تهامي .. بس ظروفك الصعبة هي اللي خلتك تبيع بلدك وتاخد جنسية بلد تانية .. والحمد لله إن إحنا لحقناك في الأول قبل ما تقع في بئر الخيانة وتصعد إلى الهاوية وتعيش في دور إعدام ميت ..

تهامي : إيه أفلام الجاسوسية دي كلها ؟ أنا مش فاهم حاجه !!!!!!!!!!

أدفايزر : مش عيب إن يبقى معاك باسبورتاني ... ومش عيب إنك تدور على فرصة عمل في بلد تانية .. لكن العيب إنك تكون مٌبشر لدولة غير دولتك وتشجع الشباب الصغير على الهجرة غير الشرعية بمراكب صيد لكندا وبعدين المركب تتخرم ويقعوا ويموتوا ..

تهامي : يا نهار فيري بلاك .. ده حضرتك ناقص تقول لي إني مسئول عن جرايم الحرب في دارفور وإن إسمي تهامي البشير الترابي سوار الذهب

أدفايزر : إسمع يا تهامي .. إحنا ممكن نخليك شاهد ملك .. وممكن كمان نقول في التحقيقات إن إنت اللي جيت وعرضت تشتغل معانا " دبل إيجينت " يعين

تهامي : أعدم نظري .. برضوا مش فاهم حاجه .. أنا عايز أمشي .. او على الأقل اورح الحمام ..

س س هامساً في ودن عصام اللي في النص : قشطة ... الأدفايزر دخل عليه دخله صح وعملوا فرشه نفسية هاتخليه ينهار ويعترف دلوقت ..

أدفايزر : إحنا محتاجينك معانا في باب كندا يا تهامي .. ده بصريح العبارة يعني ... وعايزينك تبقى عنينا اللي بنشوف بيها من خرم الباب .. ومناخيرنا اللي بنشم بها من ورا الباب وإيدنا اللي بنبطش بها لأي حد يقرب بها من الباب .. ورجلنا اللي بنشلت بها لأي حد بنضربه ونطرده بره الباب ..

تهامي : ضرب وشلاليت ومناخير ... يا باشا خلي حضرتك ستريت فوروارد وإدخل في الموضوع .

أدفايزر : مبروك يا تهامي .. إنت أتعينت مشرف لباب كندا ..

س س : حد يسمعنا زغروطة يا ناس ..

وهنا تُطلق لولا وفلانه سيل من الزغاريط ويقف س س لُيحيي جموع الحاضرين وينثر 100 ج إرباع على رأس تهامي نقطة بمناسبة تعيينه ..

تهامي : بسسسسسسسسسسسسسسسسسس .. إيه الفرح اللوكال ده ؟ يعني تعينوني من غير إرادتي ومن غير موافقتي وكإني خيال مآته .. انا أسف .. اي دونت اجري ..

أدفايزر : إزاي يعني ..

تهامي : يعني عايز شوية معلومات عن طبيعة عملي هايبقى إيه بالظبط ..

س س : بسيطة يابو تهامي .. إحنا عايزين تقارير أول باول منك عن مين قدم أبلكيشن .. مين خد فايل نمبر ... مين عمل تحاليل طبية وطلع صاغ سليم .. مين عمل لاندنج .. مين إشترى نافيجيتور جديد .. واخد لي بالك إنت ؟

تهامي : آه .. أبقى سباي لكم يعني ؟

ادفايزر : هو مش بالظبط كده .. لكنك بتساعد مصر يا تهامي ..

تهامي : اسف مرة تانية .. مش أنا .. اي ام توتالي نوت اكسيبتنج ذت أوفر ..

أدفايزر : حقك .. حقك تماماً ويكفله لك القانون والدستور .. وفي ناس قبلك رفضوا التعاون معنا .. وده حقهم ,,, لكن أحب أعرفك إنك عرفت معلومات دقيقة عننا أكتر من اللازم

تهامي : معلومات دقيقة إزاي وأنا ما بقاليش هنا غير دقيقة ؟

أدفايزر : يكفي إنك شوفت أشكالنا الحقيقية ...

لولا : وافق يا تهامي .. إسألني أنا ... وافق عشان خاطر أختك لولا يا تهامي ما تضيعش نفسك ..

تهامي : نوووووووووووو ... نيفر .... إيفر .. بوبي الحبوب ..

عصام : يابني وافق ... وبُص لأختك لولا .. اللهم صل عالنبي من إسبوع واحد إشراف حجزت شالية في بورتو مارينا ودفعت القسط الأولاني لعربية 128 وبقى لها حساب جاري في بنك ناصر ..

تهامي : مش انا اللي تشتروني بفلوسكم .. ومش انا اللي أتهدد

أدفايزر : براحتك .. براحتك عالأخر ..رفضك ده بيفكرني بالعضو الفاضل " بيسو " الله يرحمه ... وصله للباب يا س س ..

س س : يا نهار إسود ... بيسو لأ .. بيسو لأ .. وافق والنبي يا تهامي بدل ما تبقى بيسو ..

تهامي : أنا ما بأتهددش وماشي إيميداتلي .. ومش هاخاف من بيسو ولا أبو رجل مسلوخه .. مين بيسو ده ؟

س س : بصراحة يا تهامي ياخويا أنا ما أوعاش عليه .. لكن أنا سمعت من الأشاكيف اللي قبلي إن بيسو كان سوبر ممبار .. وكان شُعلة نشاط .. فتم ترشيحة مشرفاً لباب موضوعات خفيفة .. لكنه رفض بحجة إنه عايز يبقى حر ومش عايز اي سلطة على قلمه .. ويا كبد أمه من ساعة ما خرج من أوضة الإجتماعات وحالة إتقلب ... إنت بتسهر ساعات في الحُسين ؟

تهامي : ييس .. صمتايمز لما بيبقى معايا جروب سياحي كندي بنروح نضرب شيشة وسحلب عالفيشاوي .. وفول وطعمية من عند الجحش ...

س س : طب وإنت في الميدان .. مالحظتش واحد لابس جاكيت بدلة بتاعت ظابط على منطلون بيجاما وشبشب ومعلق غطيان كازوزوة على كتفه كإنه لوا أركان حرب ...

تهامي : أيوه ده بسيوني العبيط اللي عامل نفسه بينظم المرور .. كل الناس عارفاه ..

س س : أهو هو ده بيسو اللي كان معانا هنا وخرج على الحالة دي من هنا .

تهامي : طب بالنسبة يا أدفايزر بيه أنا هابقى مُشرف على باب كندا بس ؟ ولا ممكن نستحدث أبواب أخرى للهجرة إلى ساوث كارولينا مثلاً ؟ أنا سمعت إن عليها طلب جامد قوي .. وإذا كان كده ممكن ابدأ الشغل من إمتى حضرتك ؟

أدفايزر : welcome on board Mr. Ashkeef

تمت

[HDarwish]

:closedeyes:

[osmel33]

دى كانت قصة تهامي فى المصيدة والله كان بدرى عليك يا حاج تهامي

كنت راجل زوء زوء زوء

[شاب مصري]

:closedeyes:

[MoHaMMeD EgYpT]

:closedeyes:

[Alrefaey]

ههه :P ملكش حل يا ابو الاسياد

[moheltohamy]

إيه دااااه... دانتا عملتها بجد؟!

لأ تحفة... تسلم إيدك يا سي السيد :sad:

تعرف أحلى حاجة عاجباني في السياق الدرامي إيه؟

إنك محلل شخصية كل واحد فيهم ، وبتتكلّم بأسلوبه. بجد حسيت بشخصية كل واحد كما أراها في السندرة اللي جوّه ;)

بس فين مدام سلوى؟! ولاّ خفت تقلّد شخصيتها؟ :P

[غريب الخبر]

:)

فعلا الرجل المناسب فى المكان المناسب

[waloaa]

س س : بسيطة .. إحنا نستلفوا أنبوبتين غاز من المطبخ بتاع بندق ... وأجي أنا من تحت عقب الباب وأقوم منفد الخراطيم .. وأقوم فاتح الأنبوبتين عالأخر وفي نفس الوقت ممسمر الباب عشان ما حدش يعرف يخرج .. وبكده ممكن نقول إن الناس اللي جوه ماتت بإسفكسيا الخنق أثناء إشعالهم النار للتدفئة حيث إن درجة الحرارة في الباب بتبقى 25 تحت الصف وكدهوت .. وبكده ولا المعمل الجنائي ولا إلإف بي أيه هايفقسوا العملية ..

وانا بقول ايه حكاية ريحة الغاز دي اللى كل ما ادخل باب كندا بشمها......

بس حضرتك يا سين سين باين عليك مش موهوب بخفة الدم بس .....لأ يظهر كمان بالتفكير الابداعي الخلاق :)

بجد حسيت بشخصية كل واحد كما أراها في السندرة اللي جوّه

ايه يا ترى حكاية السندرة دي يا دكتور تهامي؟؟!!

حضرتك حسستني انك بتشوف "صندوق الدنيا"

[لولا]

انا جيييييييييييييييييييييييييييييييييييييييت :unsure:

شفت امبارح اعلانات الفيلم بس كنت تعباته موووووووووووووووووووووووووووووووووووت فقلت لازم ادخل وانا فايقه عشان ادى الفيلم حقه :wub:

سي السيد انت ملكش حل بصراحه .............. عندك قدرة صاروخية على اختطاف الضحكة اللى من القلب ...

شخصية تهامى طالعه تووووووووووووووووووووووووووووووووووووووووحفه وقليطه حتى النخاع :lol: :D

بقى شربته غليون يا راجل ؟؟ :happy:

واسد خلاه بيلقى محاضره فى الجامعه عن الهجره ... وقاعد مع جروب سياحى كندى فى الحسين mf(

تهامى يا اخويا .......................... برحب بيك فى مغارة الأشاكيف .. اتمنى ابو محمد واسد ميكونوش عملو معاك زى س س وعصام ما عملو معايا

وجابونى بتوكتوك mfb:

لولا

[moheltohamy]

تهامى يا اخويا .......................... برحب بيك فى مغارة الأشاكيف .. اتمنى ابو محمد واسد ميكونوش عملو معاك زى س س وعصام ما عملو معايا

وجابونى بتوكتوك

لولا

وانا اعرف منين يا لولا يا أختي؟!

مانا كنت نايم ومتبنّج... إنتي مش واخدة بالك ولاّ إيه؟! :lol:

[لولا]

تهامى يا اخويا .......................... برحب بيك فى مغارة الأشاكيف .. اتمنى ابو محمد واسد ميكونوش عملو معاك زى س س وعصام ما عملو معايا

وجابونى بتوكتوك mfb:

لولا

وانا اعرف منين يا لولا يا أختي؟!

مانا كنت نايم ومتبنّج... إنتي مش واخدة بالك ولاّ إيه؟! mfb:

:lol: :blink:

[se_ Elsyed]

الحمد لله إن الكصة عجبتكو ...

وأرجو من النجمين لولا وتُهامي إنهم ما يتكبروش ولا يتنططوش علينا بعد ما يبقوا مشهورين .. لعني لما أقابل حد فيهم في لاشارع وأقوله إديني كرت ادخل إبني به الحربية ما يقوليش كاني واني ودكان الزلاباني .. أو يشوح بإيده ويقولي إبعد عشان ما توسخليش البدلة .. أو يمشي ومعاه بودي جاردات يضربونا لو بصينا ناحيته ..

ربنا يكفيكم شر الشهرة .. إسألوني أنا

[لولا]

الحمد لله إن الكصة عجبتكو ...

وأرجو من النجمين لولا وتُهامي إنهم ما يتكبروش ولا يتنططوش علينا بعد ما يبقوا مشهورين .. لعني لما أقابل حد فيهم في لاشارع وأقوله إديني كرت ادخل إبني به الحربية ما يقوليش كاني واني ودكان الزلاباني .. أو يشوح بإيده ويقولي إبعد عشان ما توسخليش البدلة .. أو يمشي ومعاه بودي جاردات يضربونا لو بصينا ناحيته ..

ربنا يكفيكم شر الشهرة .. إسألوني أنا

شهرة .. نجوم :lol:

نتنطط .. نتكبر :lol:

كروت .. واسطه wst::

تهاااااااااااااااااااااااااااااااااااااااامى .. مين الراجل دا اللى اسمه س س ؟ تعرفه ؟ wst:: md2:

[moheltohamy]

س س ؟ هممممم... س س ؟

هوّه أنا باشبّه عليه يا لولا يا أختي... تقريباً شبه واحد كنت اعرفه أيام الشرّابيّة لما كنت مستوظف ع الدرجة السابعة!

خلاص يا شيخة... الله لا يعيدها أيّام... كنا ملطشة ، وبنسف تراب الأرض! :unsure:

كلمة في سرك :sad: ... اقلبي الصفحة دي :blink:

تعالي نمشي من هنا ، وبصي أدّامك... ولا كأنك واخدة بالك :ninja:

[بندق أفندى]

سؤالى بس .. الأنبوتين دول سلف ولا هتسرقهم؟

[عبقرينو]

ربنا يخليك لينا

وما يحرمناش من ابداعاتك

(وش واحد فطسان من الضحك)

[لولا]

س س ؟ هممممم... س س ؟

هوّه أنا باشبّه عليه يا لولا يا أختي... تقريباً شبه واحد كنت اعرفه أيام الشرّابيّة لما كنت مستوظف ع الدرجة السابعة!

خلاص يا شيخة... الله لا يعيدها أيّام... كنا ملطشة ، وبنسف تراب الأرض!

كلمة في سرك ... اقلبي الصفحة دي

تعالي نمشي من هنا ، وبصي أدّامك... ولا كأنك واخدة بالك :lol:

نمشي من هنا .. :o

ازاى ؟؟

ازاى يا تهامى تقول كده ؟ :lol:

يا تهامى .. انتا نجم ساطع حاليا اى نعم بس دا من فضل الله ثم سين سين علينا اللى لمعنا وكبرنا :lol:

طب هات العربيه اللكزس اللى اشترتها من عقد فيلم "تهامى فى الخط الأمامى " اللى كتبهولك الراجل الغلبان اللى

انتا بتنكر معرفتك بيه دلوقت بعد ماعليت وقبيت على وش الدنيا :lol:

سين سين اخويا الكبير .. شفت الفرق .. شفت تهامى انكر معرفته بيك ازاى :lol:

انا لايمكن انسي فضلك عليا يا ابيه ابدا ابدا مهما عليت :lol:

ابنة المحاورات البارة ابنتكم الوفيه دائما وابدا لولا :lol:

[alsaher]

س س

دمت سعيدا ومبتسما

بقدر ما ترسم البسمة على الوجوه

بس أنا في سؤال عمال بيزن في دماغي من زمان

هو ليه الكل بيقول لحضرتك س س ؟؟

مع إن إسمك مش كده

تحياتي

[moheltohamy]

بس أنا في سؤال عمال بيزن في دماغي من زمان

هو ليه الكل بيقول لحضرتك س س ؟؟

مع إن إسمك مش كده

وهوّه فين الظابط؟ (وش عم أيّوب) :unsure:

يعني هوّه كان اسمه سي السيد يا عم الساهر؟! :closedeyes:

س س أكيد دلع سي السيد... مش محتاجة تصبر ع السؤال ، وتسيبه يزن في دماغك كل ده! :happy: