الإمعة

[Abouhemeed]

بسم الله الرحمن الرحيم

صلوا على المصطفى يا أهل بلدي يا أهل الوفا

انسوا اللي فات و كفاية قر وحسد و مُنــاكفة

قاعدين عنيكم علينا تنقروا و إحنا طالبين الشفا

دا السم تحت اللسان يا ناس و إحنا ناس متكلفة

احنا عارفين اننا محنشاش أولاد ذوات

ولا كنا في يوم أولاد باشوات أو بكوات

اللي فرق بنا و بينكم إننا نعرف التكات

اللي تأكلنا الكتف و تجمع لنا الميزات

في كل مناسبة تلقانا سواء كان فرح أو عزا نسبق

تجري دموعنا على خدنا أو فرحنا في عينا بيطقطق

نقعد ف خدمة جنابه م العشا لحد الفجر ما يشقشق

يلقانا تحت رجليه حتى و لو علينا بشبشبه يطرقع

عيني و ودني على شانه ما أقدرش أقفلها

كل كلمه أسمعها عليه على طول أسجلها

متحبشة متكرمشة على طول لودنه أنقلها

يوضب بها كل أموره و خطته بتفاصيلها

هو بالصدفة إن أبوه يبقى فلان

و أنا يا حسرتي أبويا عم زيدان

و لولا همتي ما كان يلقى له مكان

ولا على كرسيه كان قعد كده بأمان

هو صحيح راجل ما يسواش

لكن خدمته مهياش كده ببلاش

مش قصدنا نقبض منه الكاش

المهم يفضل فاكر ما ينساش

يقابلني بوشه الصبوح الباش

على ايديه أبعد عن الأوباش

أترقى و أعلى من باش لباش

لحد ما من إيده آكل الجولاش

علشانه كل الناس يحبونا

يتقربوا لينا و ليه يوصونا

زينا و بيحاولوا يقلدوا فينا

يعني يا جاره لا تعايرينا

صلوا على المصطفى يا أهل بلدي يا أهل الوفا

انسوا اللي فات و كفاية قر وحسد و مُنــاكفة

قاعدين عنيكم علينا تنقروا و إحنا طالبين الشفا

دا السم تحت اللسان يا ناس و إحنا ناس متكلفة

أبو حميد المصري