تحياتى من كيبيك سيتى

[bermawy]

السلام عليكم ورحمة الله وبركاته

ربنا يبارك في حضرتك يااستاذ عز الدين ومدام دعاء وجزاكم الله كل خير

[medopharm]

سلاح التلمبذ

الدرس الاول

تحضيرات ما قبل السفر

( اين ؟ - متى ؟ - ماذا سوف اخذ معى ؟ - اى شركة طيران ؟ - المطار ؟ )

اجابة اين :

ليس من السهل اختيار المكان لان لكل مكان سلبياته واجابياته ولكن يفضل قبل اختيار المكان معرفة بعض النقاط :

1- ايجار الشقة : اغلبية كندا بتاجر ( 9.99 % ) اول الشهر ( ماينفعش تاجر من منتصف الشهر )

2- واغلبية كندا بتاجر فى اول شهر ( 7 ) والبحث بيكون قبلها ب ثلاثة اشهر على الاقل

3- فلوس الفيدرال للاطفال بتيجى بعد شهرين من الوصول ( كل يوم 20 فى الشهر )

4- فلوس اعانة الاطفال من كيبيك يوم واحد فى الشهر كل 3 شهور ( شهر يناير – ابريل – يوليو – اكتوبر فقط )

5- فلوس المساعدة الاجتماعية من الفرنكوفون بتقدم عليها بعد 3 شهور من الوصول

- هل لك معرفة باحد فى هذه المدينة لمساعدتك من لحظة وصولك ام لا

- لو معاك لغة جيدة من الممكن ان تجد شغل مباشرة ( الكاجوال ) فى المدن الكبرى

- لو جاى بغرض الدراسة اولا اذا تبحث عن مكان قريب من الجامعة مش لازم يكون فى قلب المدينة ومش لازم مدينة كبيرة اصلا

( الدرس الثانى سيكون الميزانية )

- اذا بعد تحديد المدينة مشكلة ايجار الشقة طبعا لو ليك حد هايسهل عليك البحث وممكن يكون ضامن ليك عند صاحب الشقة اما اذا لم يكن لك احد فطبعا هاتنزل فى شقة مفروشة او فندق وان كانت الشقة المفروشة افضل وارخص لمدة شهر مثلا ثم تتجه مباشرة الى احد مكاتب مساعدة المهاجرين وهم هايساعدوك ويبحثوا لك عن شقة وهاساعدوك ايضا فى موضوع الضامن

- متوسط الاسعار تقدر تاخدها من موقعين لاعلانات الايجار وهما : KIJIJI – LES PAC

- قانونا لكل فردين حجرة نوم

- المطبخ فى الغالب هو مطبخ + سفرة

- اى اربعة حيطان تعتبر غرفة فيما عدا الحمام ( نصف )

- الشقة انت اللى بتفرشها اما المطبخ بيكون جاهز

- مافيش مشكلة من درجة الحرارة داخل المنزل

- بخصوص المية السخنة فيه سخان مركزى للعمارة

- كل غرفتين متتاليتين بينهم مسافة لعمل دواليب تخزين فيهما

- يوجد غالبا مخرجين بسلالم للشقة واحد من ناحية الباب الرئيسى للشقة وواحد من المطبخ يمكن علشان حالة الحريق ا وفى ايام الثلج تدخل من اقرب باب ليك

ويفضل عند اخذ قرار الشقة الانتباه لهذه النقاط :

1- القرب من المواصلات العامة

2- القرب من اماكن الدراسة

3- القرب من المحلات

4- القرب من المتنزهات

5- القرب من المراكز الاجتماعية

6- القرب من العيادات الطبية

7- القرب من دور العبادة

8- هل الشقة فى منطقة هادئة

9- هل هناك مكان للسيارة

10- هل المنطقة امنة

11- هل هناك تكاليف مثل ( الكهرباء – التدفئة – المياه الساخنة )

يجب ملاحظة ان زيادة الايجار تتم كل اول شهر يوليو

ملحوظة : لم يحالفنى الحظ بمقابلة اى نملة حتى الان و قد تشرفت بمقابلة 4 ذبابات منذ وصولى

اجابة متى :

طبعا لو الشقة محجوزة تسافر فى اقرب يوم بعد ما تاخذ التاشيرة انت والاسرة مش مهم صيف او شتاء ( من المسلم به )

البنود المؤثرة فى اختيار وقت السفر :

1- بما ان عندك سنة من تاريخ الكشف الطبى ممكن تيجى لوحدك الاول خاصة لو فى الشتاء تظبط امورك وبعدين الاسرة تيجى ابتداء من الربيع ويفضل ابتداء من يوم 3 يوليو علشان بداية عقد الشقة ( يوم واحد واتنين البلد كلها مشغولة فى نقل العفش وفرش الشقة )

2- لو التاشيرة وصلت فى الصيف كل الاسرة تيجى وماحدش يتحرم من يوم واحد جميل فى هذه البلد

3- اذا كانت الاوضاع الداخلية او الخرجية فى البلد غير مطمئنة السفر بيكون فى اقرب يوم بعد التاشيرة مش مهم صيف او شتاء

4- دخولك تحت مظلة التامين الصحى بعد ثلاثة اشهر ولكن كسر الشهر يعتبر شهر ( لقد وصلنا منتصف شهر مارس ودخلنا فى نظام التامين الصحى من اول شهر يونيو )

5- امتحان رخصة القيادة العملى يفضل فى ايام غير ثلجية ( السيارات هنا رخيصة وعملية جدا ) ( من حقك القيادة بالرخصة المصرية المترجمة بترجمة معتمدة لمدة ثلاثة اشهر من وصولك )

6- مواعيد كورس اللغة فى المكان اللى هاتدرس فيه

7- مواعيد الدراسة الاكاديمية لو لغتك كويسة

( معلومة ) : مواعيد الدراسة فى المدارس من 1 سبتمبر وحتى اخر شهر يونيو

لو قريب من شهر رمضان خلصه فى مصر احسن

التلج اختفى مع نهاية شهر ابريل ( لا يوجد علاقة بين وجود الثلج وشعورك بدجة الحرارة سواء داخل المنزل او خارجه )

** ملحوظة : كل جنيه بتصرفه فى مصر بعد الحصول على التاشيرة يعتبر خسارة مادية

للقدرة على استيعاب المعلومات قررنا ان نكمل الجزء الثانى من الدرس غدا

و سوف نكون مستعدين للاسئلة بعد نهاية الدرس الاول

:lol:

ماشاء الله

ربنا يوفقكم ويبارك لكم ان شا ءالله

متااااااااااااااااااابعه

[precanadian]

:aslam:

سلاح التلمبذ

الدرس الاول

تحضيرات ما قبل السفر

( اين ؟ - متى ؟ - ماذا سوف اخذ معى ؟ - اى شركة طيران ؟ - المطار ؟ )

** ملحوظة : كل جنيه بتصرفه فى مصر بعد الحصول على التاشيرة يعتبر خسارة مادية

للقدرة على استيعاب المعلومات قررنا ان نكمل الجزء الثانى من الدرس غدا

و سوف نكون مستعدين للاسئلة بعد نهاية الدرس الاول

:waf:

تحياتي وتقديري لك يا استاذ عزالدين .

كل حرف قيمه وخبره لنا لا تقدر.

ربنا يكملها عليكم بكل خير بفضل من عنده ويسترها معاكم ويحرسكم.

متابعين مع حضرتك باقي الدروس

:lol: :) :)

[abuzyaad]

5- فلوس المساعدة الاجتماعية من الفرنكوفون بتقدم عليها بعد 3 شهور من الوصول. يعني ايه المساعدة الاجتماعية وايه شروطها وهي كام يعني باختصار تفاصيل النقطة دي. اي مكان يكون فيه الشقق ارخص البرتا ولا انتاريو ولا فانكوفر؟ لو حسبتي لينا متوسط المصروف الشهري بتاعكم او بشكل عام تعملي معروف احسن الواحد خايف من الحكاية دي؟ ربنا يجعلها هجرة الى الخير لكم ان شاء الله

[منى عبدون]

ربنا يكرمك يا دعاء على المجهود الرائع

[د هشام ابراهيم]

نصايح ذهبية و مجهود يستحق الأحترام

تحياتي لعز باشا و دعاء باشا .....ربنا يصلح لكما الأمر كله :)

[أختكم المصرية]

معلومات مهمة وقيمة فعلا و مجهود رائع

شكرا استاذ عز الدين و شكرا مدام دعاء و ربنا يوفكم و كل كلمة و حرف تكتب فى ميزان حسانتكوا ان شاء الله

و احنا متابعين و سلامنا للبنوتات و سلام خاص لياسين :) mfb: rs:

[دعاء]

:)

الدرس الاول

الجزء ( 2)

اجابة ماذا سوف اخذ معى : ( الغريب اعمى ولو كان بصير )

- يجب مسبقا معرفة الوزن المسموح لك للشنط على الطائرة واخذه كاملا بلا زيادة

- يجب وجود شنطة خاصة بالاوراق الهامة وتحتوى على كل الاوراق الرسمية الخاصة بكل فرد من افراد الاسرة مثل : ( شهادات الميلاد - والدراسة - ووثيقة الزواج وكل ما قدمته مع طلب الهجرة واستلمته مع التاشيرة ) وكل ده اصول اذا امكن مع ترجمتها

- من المؤكد اى جهاز كهربى لا يعمل هنا ( التيار الكهربى 110 فولت ) ( الموبايل ممكن اخذه لان الشاحن بيشتغل على اى فولت )

- الماكولات المحفوظة مثل الجبنة البيضاء والجبنة النستو يفضل الاكثار منها من اجل الايام الاولى ( اول مرة دخولك كندا الشنط لا يتم تفتيشها )

- اقل سعر لعلبة السجائر 5 دولار

- اسعار الملابس والاحذية هنا زى مصر تقريبا خاصة فى العروض الاسبوعية اما فى نهاية كل موسم ( صيفا او شتاءا ) بيكون هناك عروض انتحارية ( من نصف شهر 2 الى نصف شهر 3 بالنسبة لموسم الشتاء )

- طبعا لو عندك لبس احضره معك وماتقولش هاشترى من كندا احسن. انت مش جاى سياحة

- احضار ملايات للسراير واكياس المخدات وكوفرتات ولو امكن البطاطين الخفيفة فقط

- سجادات الصلاة والمصاحف والسبح والبخور من مصر

- ادوات المطبخ هنا اغلى من مصر ( الحلل والصوانى ) الجديد منها وليس المستعمل ( المستعمل رخيص جدا )

- منبه – مادليات للمفاتيح - محافظ جلد كبيرة - بطاريات صغيرة للاضاءة

- اسعار البامبرز هنا زى مصر

- ادوات الخياطة

- الاحذية الجيدة فقط لكل فرد من افراد الاسرة بدون شراء جديد

- الادوات المكتبية زى مصر فى الاسعار ( التنوع والجودة هنا افضل طبعا )

- عدد 2 كيبورد عربى للكمبيوتر + فلاشة مش اقل من 4 جيجا ( وخزن عليها معلوماتك المهمة من الكمبيوتر بتاع مصر )

- بعض القصص المفضلة للاطفال باللغة العربية

- الاعشاب والشاى من مصر ارخص

- اسعار لعب الاطفال زى مصر ولكن الجودة والتنوع موجودين بكثرة هنا ( المستعمل رخيص جدا وبحالة جيدة )

- الادوية خاصة لو مش هاتشترك فى التامين الصحى فى اول ثلاثة اشهر ( انا لم اشترك فى اى نظام والحمد لله ربنا عدى الفترة على خير ) بس طبعا كنت شارى ادوية ب 1250 جنيه ( ادوية كحة – خافض للحرارة – مراهم – مضاد حيوى متنوع - اقراص لتقوية جهاز المناعة للكبار والاطفال ( bronocho-vaxom )( هنا لو هاشترك فى نظام التامين الصحى الخاص من 300 الى 500 دولار شهريا ) كشف الدكتور من 70 الى 100 دولار

- اشترى لبان وملبس كتير ( خد شوية فى الطيارة )

- للسيدات ادوات الماكياج هنا غالية قوى

- فى المدن الصغيرة لا يوجد ملابس للمحجبات ( ملابس فضفاضة وطويلة – ايشاربات – شرابات ثقيلة )

- للبنات الصغيرات احضار اسدالات للصلاة او خمار صغير لكل بنت من اجل دروس القران فى المسجد

- يفضل شنطة الاوراق يكون ليها حزام علشان تحطها فى رقبتك

- يجب وزن الشنط جيدا وتحضيرها قبل السفر بمدة لان الوقت قبل السفر بيمر بسرعة جدا ( اسبوع غير كافى للتحضير )

ملحوظة :

الجاذبية الارضية عندنا فى البيت غير اللى فى المطار – كل شنطة وزنتها فى البيت بميزانين مختلفين طلعت زيادة فى المطار ب2 او 3 كيلو

- لا تنسى الدعوات من مصر ( خاصة من الام )

اجابة : اى شركة طيران :

- لو فى الصيف بلا شك مصر للطيران ارخص سعرا + خط واحد مباشر من غير ترانزيت + الوزن الرسمى المسموح به 30 كيلو + سماح بزيادة عن الوزن بقليل

- مصر للطيران من شهر 6 الى شهر 9 ولكن يجب الحجز قبلها بفترة كبيرة جدا ويفضل بعد الكشف الطبى ومعرفة نتيجته مسبقا من محمد كندا ( سكرتير الدكتور ) واعطاؤه فى جيبه 100 جنيه

- اما بقية اشهر السنة غالبا بيكون فيه عرض بالاشتراك ما بين ( اير كندا ) و ( ايجيبت اير ) ذهاب وعودة تذكرة سنوية ترانزيت فى باريس او لندن او فرانكفورت وهذا العرض ارخص من تذكرة ذهاب فقط وقليل من مكاتب الطيران الذين يعرفون هذا العرض حتى ( اكسبيديا ) لا يظهر عندها هذا العرض

- اير كندا هى المسئولة عن الرحلة من اولها الى اخرها .

- طيران الاوليمبيك هو ارخص شركة وان واى ولكن الخدمة فيها عادية جدا ويوجد سماح للشنط بازيد من 23 كيلو بقليل ( كل شركات الطيران غير مصر للطيران 23 كيلو فقط واى زيادة ولو كيلو هاتدفع مبالغ كثيرة والمبالغ المدفوعة بتكون بمعدل تزايدى وليس معدل ثابت بمعنى سعر اول كيلو غير تانى كيلو وهكذا ...

- يوجد طيران من الاردن مباشرة الى كندا طول السنة

- يفضل التنويه على الوجبات الحلال عند حجز التذاكر ( بيكون من الشركة الاصلية وليس من مكتب حجز التذاكر )

- لا يوجد تدخين على اى طائرة

المطار :

- خد معاك كاميرا فى ايدك وسجل لحظات الرحلة ( الولادة الجديدة )

- يجب الذهاب الى المطار مبكرا قبل ميعاد السفر ب 3 ساعات على الاقل

- من الممنوعات فى الهاند باج : ( المقصات بانواعها – زجاجات المياه – زجاجات الروائح والبرفانات – معجون الاسنان – اى كريمات سواء للبشرة او الشعر )

- اذا لم تكن قد حجزت الكراسى من مكتب الطيران فيجب التاكيد على الذهاب الى المطار مبكرا جدا لكى تحجز كراسى متجاورة وخاصة لو الاسرة كبيرة على الطائرتين سويا اذا كان فيه ترانزيت

- سواء طيران مباشر او ترانزيت من السهل ان تكلم العائلة من اى مطار وصول بشراءك كارت تليفون

- كل ما يجيلك فرصة انك تنام فى الطائرة نام ماتقولش الفيلم ده حلو هاكمله

- اللى معاه طفل رضيع يفضل يكون فى شنطة مامته اى شئ مهدئ مثل ( ماء غريب او بيبى كالم ) مع ادوات الغيار

- سوف تتسلم فى الطائرة ورقة بيانات باللغتين ( الانجليزية والفرنسية ) وخانة الاطفال لا تتسع سوى لطفلين فقط اذا كنت تملا النسخة الانجليزية فاكمل بقية الاطفال فى النسخة الفرنسية والعكس صحيح

- لقد اخذنا وقت من باب الطائرة الى باب المطار حوالى ساعة ونصف ( يمكن علشان عددنا كبير )

- لم يؤخذ لنا صور فى المطار ولم يطلب منا صور من اجل كارت ( البى ار ) ونفس الشئ حصل مع الدكتور ايمن كامل بعدنا وجائت الكروت على البيت فيها الصور اللى كنا مقدمنها من مصر

- موظف مكتب الهجرة فى المطار لا يعلم اى شئ عن الدوسيه اللى موجود فى السفارة الكندية فى مصر هو بيهمه التاشيرة الموجودة على جواز السفر و البيانات التى مليناها فى ورقة البيانات على الطائرة لذا يجب التاكد من كل معلومة بيسجلها عنده جيدا لان تعديل اى معلومة خاطئة بتاخد شهور وممكن سنة ( لا تنسى حالة الارهاق التى سوف تكون عليها اثناء وجودك فى المطار بعد هذه الرحلة الطويلة الشاقة وعدم النوم من الليلة اللى قبلها ) لذا يجب التركيز مع هذا الموظف خاصة وابقى نام بعد كدا براحتك حتى ولو فى الشارع بعد ما تخلص الاجراءات

- اذا كنت عارف العنوان اللى انت نازل عليه يجب كتابته مفصلا واعطاؤه لموظف الهجرة ولا تنسى رقم الشقة والكود البريدى

- المعاملة فى مطار القاهرة جيدة جدا ولكن نظرات الموظفين والداخلية فيها حسد

- المعاملة فى مطار كندا جيدة وبعد الانتهاء من موظف الهجرة المعاملة بالكامل فى المطار ممتازة

** اسئلة على الدرس الاول :

اختار ما بين الاقواس :

1- حجز الشقة بيكون :( أ - مع صاحب العمارة مباشرة – ب - مع وجود ضامن – ج - مع وجود كيلو جبنة رومى )

2- يمكن القيادة فى كندا برخصة مصرية من لحظة وصولك لمدة ( أ - شهرين – ب- 3 شهور – ج- 5 شهور )

3- سوف تاخذ معك اثناء السفر : ( أ- الكاميرا – ب- حماتك - ج- مجفف الشعر )

4- الوزن المسموح به على طائرة مصر للطيران : ( أ- 23 كيلو – ب- 30 جرام – ج- 30 كيلو )

5- يمكن الصعود على الطائرة باصطحاب عدد ( أ- 1 مقص – ب- 2 مقص – ج- 3 مقص )

انتهى الدرس الاول

:D

[ahmed_saleh]

:D

اختار ما بين الاقواس :

1- حجز الشقة بيكون :( أ - مع صاحب العمارة مباشرة – ب - مع وجود ضامن – ج - مع وجود كيلو جبنة رومى )

2- يمكن القيادة فى كندا برخصة مصرية من لحظة وصولك لمدة ( أ - شهرين – ب- 3 شهور – ج- 5 شهور )

3- سوف تاخذ معك اثناء السفر : ( أ- الكاميرا – ب- حماتك - ج- مجفف الشعر )

4- الوزن المسموح به على طائرة مصر للطيران : ( أ- 23 كيلو – ب- 30 جرام – ج- 30 كيلو )

5- يمكن الصعود على الطائرة باصطحاب عدد ( أ- 1 مقص – ب- 2 مقص – ج- 3 مقص )

انتهى الدرس الاول

حقيقي يا استاذ عز الدين انا موت على نفسي من الضحك و قد ايه كمية المعلومات المفيدة اللي حضراتكم بتقولوها جزاكم الله خير ... بس خلليني اجاوب على الاسئلة و كل واحد حسب ظروفه بقى :-

1- حجز الشقة بيكون :( ج - مع وجود كيلو جبنة رومى ) او كيلو الا ربع i*: i*:

2- يمكن القيادة فى كندا برخصة مصرية من لحظة وصولك لمدة ( لا يوجد خيارات) الرخصة المصرية تسوق بيها او فيها

3- سوف تاخذ معك اثناء السفر : ( ب- حماتك ) يعني مفيش فايدة ورانا ورانا

4- الوزن المسموح به على طائرة مصر للطيران : ( ب- 30 جرام ) و في قول آخر 40 كيلو بشرط انك تزود من الجبنة الرومي عشان تمشي حالك

5- يمكن الصعود على الطائرة باصطحاب عدد ( أ- 1 مقص ) او سكين صغير للدفاع عن النفس prt:

اشكركم على وقتكم الغالي و متابعين معكم :)

[الأهلاوي الأصيل]

أستاذ عز الدي

مدام دعاء...ألف شكر ليكم

وربنا يجعل كل هذا المجهود وكل المعلومات دي في ميزان حسناتكم

الحقيقة معلومات رائعة وأدق ادق التفاصيل

ودي فعلاً الحاجة اللي كلنا محتاجينها

ألف شكر

[Nassarlink]

ايه ده

انت فين من زمان يا استاذ عز الدين

كنت مستخبي مننا فين

ده حمدي مصطفي بتاع مؤسسه سلاح التلميذ لو شاف الاجزاء دي هينزلها عنده في الملحق

وهيبيعها بضعف ثمن الكتاب الاصلي

انا بطلب منك الاحتفاض بحق التاليف

و بإسم كل المستفيدين من مداخلاتك دي

بقدم خالص الشكر والاحترام

نصار

[Nassarlink]

5- يمكن الصعود على الطائرة باصطحاب عدد ( أ- 1 مقص ) او سكين صغير للدفاع عن النفس :D

يا حماده الاجابه دي صح لو انت هتعمل لاندج في مطار شيكاغو

او لو عندك راندفو مع مستر اكس :)

تم تعديل 15 يونيو 2009 بواسطة Nassarlink

[Nassarlink]

2- واغلبية كندا بتاجر فى اول شهر ( 7 ) والبحث بيكون قبلها ب ثلاثة اشهر على الاقل

طب الي يوصل مثلا علي شهر اكتوبر

يكون نظام التاجير ازاي

- لو معاك لغة جيدة من الممكن ان تجد شغل مباشرة ( الكاجوال ) فى المدن الكبرى

- لو جاى بغرض الدراسة اولا اذا تبحث عن مكان قريب من الجامعة مش لازم يكون فى قلب المدينة ومش لازم مدينة كبيرة اصلا

حضرتك تقصد المدن الكبري زي مونتريال وتورونتو بس

يعني مدينه كيبيك متعتبرش من المدن الكبري

1- القرب من المواصلات العامة

2- القرب من اماكن الدراسة

3- القرب من المحلات

4- القرب من المتنزهات

5- القرب من المراكز الاجتماعية

6- القرب من العيادات الطبية

7- القرب من دور العبادة

8- هل الشقة فى منطقة هادئة

9- هل هناك مكان للسيارة

10- هل المنطقة امنة

11- هل هناك تكاليف مثل ( الكهرباء – التدفئة – المياه الساخنة )

مواصفات الشقه دي

تكون في احي من وجهة نظرك

علشان وانا بدور علي النت ابقي عارف تقريبا موقع الشقه كويس ولا لا

ملحوظة : لم يحالفنى الحظ بمقابلة اى نملة حتى الان و قد تشرفت بمقابلة 4 ذبابات منذ وصولى

طب ممكن اصتحب معايا كام نمله وانا جاي

علشان محسش بالغربه

وعشره خماشر دبانه في ازازه عصير مستعمله مثلا

ولا ده بخالف القوانين

اصل انا طول عمري راجل بحب احترام القانون آه

[poulaemad]

تسجيل متابعه وربنا معاكم

[أم موني]

بارك الله لكم و لأولادكم في الإقامة ببلدكم الجديد

وشكرا لهذه الجهود العظيمة

كلنا آذان صاغية و قلوب متلهفة :sad: :unsure:

[أبو عبده]

السلام عليكم

الف شكر للاستاذ عز الدين و مدام دعاء

في الحقيقة الوصف الحياتي و كمان الخطوات و التحذيرات

قمة في التفصيل و الجاهز كمان

مش لاقي كلام حلو اقوله بجد كأننا عايشين في سلاح التلميذ

و الأسئلة صعبة جوي يا إستاذ عز مفيش اختيارات لييه

الله يوفقكم الله يجازيكم به خيرا اللهم آمين

[el faid]

مجهود رائع .

وسرد جميل للوقائع تتخلله خفة دم مصرية :unsure:

الله يبارك لكم في أولادكم .

تسجيل متابعة واعجاب وتشجيع :sad:

[Dr Ayman Kamel]

السلام عليكم ورحمة الله وبركاته

كيف حالكم اخوانى واخواتى فى الله

انا حبيت اشارك فقط بالشكر لهذه المعلومات القيمة والقوية وفعلا مجهود رائع واحب ان انوه انه حالفنى الحظ ان اقابل الاستاذ عز عن قرب ولن اقول الا شى واحد عن هذا الرجل انه من الاشخاص التى تثق فى رايها وخدوم لاقصى درجة وتحيه احترام لهذه العائلة الجميلة

[mohamedadel]

ماشاء الله ولا قوة إلا بالله ..

مجهود أكثر من رائع ... من الأستاذ عز و الأستاذه دعاء

تسجيل متابعه .. للمعلومات الرائعة ..

وبالتوفيق والنجاح في حياتكم الجديده بإذن الله

[Nassarlink]

السلام عليكم ورحمة الله وبركاته

كيف حالكم اخوانى واخواتى فى الله

انا حبيت اشارك فقط بالشكر لهذه المعلومات القيمة والقوية وفعلا مجهود رائع واحب ان انوه انه حالفنى الحظ ان اقابل الاستاذ عز عن قرب ولن اقول الا شى واحد عن هذا الرجل انه من الاشخاص التى تثق فى رايها وخدوم لاقصى درجة وتحيه احترام لهذه العائلة الجميلة

واحشنا والله كتير يا د ايمن

انت فين من زمان

يارب تكون صحتك واحوالك تمام

و علي قد ما احنا فرحانين ب الاستاذ الفاضل عزالدين

علي قد ما احنا بنلومه علي عدم الظهور عي الساحه المحاوراتيه من زمان

لكن طبعا يشفعله حاجتين

اولا : قراره بالمشاركه

وثانيا : ثناء حضرتك عليه

يارب يجعل ايامكم سعاده وتوفيق

نصار

تم تعديل 16 يونيو 2009 بواسطة Nassarlink