تحياتى من كيبيك سيتى

[ايناس احمد]

متابعين يادعاء كويس جدا بداية موفقة

بس ياريت ترجعى لورا شوية

خدتى اية فى الشنط غير اللبس معلشى غلاسة بقى تقولى اية بس عايزين نعرف اية اللى ناخدة غير اللبس وقوليلنا اية اللى نسيتية وبعد ماوصلتى هناك احتجتية وقولتى ياريتنى جبتة ومتخافيش اول حد فينا حيسافر حيجبهولك معاة00000000 اتفقنا

[somayasaleh]

حمد لله علي السلامة يا ام ياسين

وحشتينا اليومين اللي فاتوا دول......

بداية موفقة باذن الله.....وربنا ييسر لكم باقي الامور ان شاء الله

متابعة،،،،في الصف الاول

[دعاء]

اعذرونى اخوتى الكرام لقطع سير الاحداث وذلك لتقديم حلقة خاصة عن الشنط ( وآآآآه من الشنط ) بناء على رغبة الاخت الفاضلة ايناس احمد

سوف اسرد المحتويات فى نقاط محددة كالاتى :

- ملابس صيفية وشتوية ( للخروج والبيت ) لكل فرد ويفضل ماتشتريش من مصر الا اذا كانت الفترة اللى جايين فيها ( صيف او شتاء ) مافيش ما يناسب لها خالص من اللى عندكم ( وهذا ما لا اعتقده طبعا )

- الاحذية ( اختيار فقط الاجود والاحدث من الموجود عندكم ) لكل فرد

- مفارش للسراير وفوط واكياس المخدات المستطيلة العريضة فقط اما المخدات الطويلة اللى بطول السرير دى مش موجودة هنا

- بعض الالعاب الخاصة بكل طفل والتى يفضلها بشدة ( وياريت مش كتير علشان هنا الالعاب تبهر الكبير قبل الصغير ) اما الاسعار فهناك تفاوت كبير بين الرخيص جدا الى المتوسط الى الغالى وكله موجود

- بعض الكتب الخاصة الهامة لينا والمصاحف وجبت كتب للغة العربية والدين علشان البنات وكمان قصص باللغة العربية ليهم

- سجاجيد صلاة وسبح

- للسيدات المحجبات ( اسدال للصلاه فى البيت واسدال للخروج ) ايشاربات ودبابيس للحجاب وشرابات محجبات

- بعض ادوات المطبخ والتى ستستعمل للفترة الاولى ( انا جبت عدد طبق لكل فرد من كل نوع - غويط - مسلطح ) - المعالق وادوات السفرة على قد كل فرد 3 حلل مثلا - كبايات - مجات ( كله على القد جدا فترة اسبوعين لشهر لحد ما تقدروا تنزلوا وتشتروا )

- مجموعة كبيرة من الادوية العامة وخاصة المناسبة للطوارئ للاطفال من ( خافض حرارة - مضاد حيوى - مراهم - قطرة للعين - ادوية للمعدة - للصداع - مسكنات للالم ........ )

- ادوات للخياطة - شامبو - معجون اسنان وفرش وتوك للشعر

ده اللى انا فاكراه دلوقتى واذا افتكرت حاجة تانية هابقى اقولها بعدين

المهم ماتجيبوش اى شئ يعمل بالكهرباء خالص لن يصلح هنا لاختلاف الفولت عن مصر

وشكرا على حسن الاستماع

:lol:

[دعاء]

آه انا نسيت اكتب ايه اللى انا نسيته فى المعظم حاجات مش مهمة وممكن الاستغناء عنها زى جزء من لعبة للبنات جيبت جزء ونسيت جزء زى كده يعنى

بس فى حاجة نسيتها خالص وهى كل احذية جوزى لم احضر له اى شئ يلبس فى القدم غير الشرابات ودخل كندا بالكوتشى اللى كان لابسه بس !!!! :lol:

[mahros]

- سجاجيد صلاة وسبح

الحمد حضرتك لم تنسي السبح وسجاجيد الصلاة لان هذه الاشياء الضرورية لكل مسلم ومسلمة غير موجودة بكثرة في مدينة كيبيك..ولكن الحمد لله المصحف الشريف متوفر ويمكن لاى مسلم استعارته من المسجد الموجود بمدينة sainte foy والحمد لله شيخ المسجد عندما كنت هناك كان مصري و يحب مساعدة المسلمين في كافة نواحى الحياة..امنياتي لكم بالتوفيق .

[mahros]

بس فى حاجة نسيتها خالص وهى كل احذية جوزى لم احضر له اى شئ يلبس فى القدم غير الشرابات ودخل كندا بالكوتشى اللى كان لابسه بس !!!! :lol:

هذا ماحدث لي عندما كنت في زيارة مدينة كيبيك عام 2007 ولكن كانت احذية زوجتي في مطار هيثرو..ولكن عندما وصلنا بحمد الله ذهبنا الي احدى محلات zellers في sainte foy واشترينا بعض الاحذية وكان من حسن حظنا تخفيضات كبيرة علي كل المعروضات..بالتوفيق وربنا معاكم.

[newcomer]

ماكانش ينفع غير انه يكون فيه حد هناك يقدر ياجر لنا شقة ونبعث له الفلوس وكان فيه كام واحد فى مونتريال معارف واحد صاحب جوزى لكن للاسف كله تملص مننا لان عددنا كبير

وطبعا وصلنا لدرجة من الاكتئاب كبيرة جدا

اثرت فيا الحكاية دى......

بس الحمد لله ان لسة الدنيا بخير

و ربنا بعتلكم الاستاذ الفاضل اللى كان هايعزل

ربنا يوقف لكم ولاد الحلال دايما

تم تعديل 25 مارس 2009 بواسطة newcomer

[ايناس احمد]

الف الف شكر ليكى يادعاء على استجابتك السريعة دى ودا مش جديد عليكى وربنا يجازيكى خير ويجعلة فى ميزان حسناتك ويوفقكم لما فية الخير

واللة استفدنا من الحلقة دى يادعاء استمرى ومتابعين معاكى

[hamoudi]

متابعين يادعاء كويس جدا بداية موفقة

بس ياريت ترجعى لورا شوية

خدتى اية فى الشنط غير اللبس معلشى غلاسة بقى تقولى اية بس عايزين نعرف اية اللى ناخدة غير اللبس وقوليلنا اية اللى نسيتية وبعد ماوصلتى هناك احتجتية وقولتى ياريتنى جبتة ومتخافيش اول حد فينا حيسافر حيجبهولك معاة00000000 اتفقنا

ده على فكرة مش مطلب مدام ايناس لوحدها ده مطلب المدام عندي كمان بس هانزود حاجات بعد مارحتى قلتي يارتني ماكنت جبتها 

والاطفال الى فى مدراس هاتعملوا معاهم اية ؟

ايه رايك فى الخدمة فى الخطوط اليونانية؟

[ibra]

الاخت دعاء ....

اشكرك جدا على مساهماتك الرائعة والتي تفيد الجميع وانت من الاخوات التي

تبذل كل جهد في ايصال الفكرة الصحيحة والاكثر واقعية....جزاك الله كل خير ....

اما عني انا وعائلتي فنحن في انتظار اصدار الفيزبعد ان اجرينا كل الفحوصات الطبية وقد

قررنا ان نذهب الى مونتريال وذلك لوجود بعض الاصدقاء المقربين لنا.... وبعد وصولنا انشاء الله

وحسب الواقع ومجريات الامور سوف نقرر بشكل نهائي مكان الاستقرار....

وسؤالي لحضرتك هو عن موضوع البيانات التي قدمتيها للجمارك ؟؟؟

ما الذي يجب علينا ان نكتبه في هذه البيانات لكي نستفيد منه في المستقبل؟؟؟؟

اقصد بذلك من اساس منزل او كل مايخص البيت بشكل عام,

ذلك ان ميزة الاستفادة من هذه الخاصية وبدون دفع رسوم, هي لمرة واحدة فقط ؟؟؟

اكرر اعتذاري على كتر الغلبة؟؟؟؟؟

لك كل الشكر والتوفيق انشاء الله.

[nona alawaal]

حمد لله على سلامتك و العائلة الكريمة و اسفة لتأخرى

و ان شاء الله موفقين فى حياتكم الجديدة هناك

تحياتى :lol:

[حسام يوسف]

اية الأخبار الحلوة دي؟

مدام دعاء سفيرتنا الان فى الكيبيك سيتي؟

والله العظيم فرحت جدا جدا بالتوبيك

وفرحت بوصول حضرتك والعائلة بالسلامة

مع خالص تحياتى وأمنياتى يا سفيرتنا بالكيبيك سيتي

[دعاء]

:lol:

اخوتى الافاضل نرجع لسياق الاحداث ونحكى عن رحلة الطيران

وصلنا البوابة اللى هاندخل منها على اول طيارة وانتظرنا شوية كان لسة فاضل حوالى ساعة الا ربع على ميعاد الاقلاع وده لاننا وصلنا المطار بدرى شوية علشان كان حجز الكراسى فى الطائرة الاولى يجب ان يتم من المطار اما الطائرة الثانية فتم حجز الكراسى مسبقا ( قبل يوم السفر )

وقبل الميعاد بحوالى من تلت الى نصف ساعة بدانا نقف طوابير لدخول الطائرة وتفتيش الهاندباجات وكان مع كل بنت من بناتى زجاجة مياه صغيرة فى الشنطة بتاعتها رموهم كلهم ودخلت الشنط فى الجهاز الخاص بالتفتيش وبعد كده دخلنا الطائرة فى سلام

الطائرة كانت صغيرة وضيقة ( ايرباص ) 3 كراسى على اليمين و3 على الشمال وممر ضيق فى المنتصف

وتقريبا المسافرين كلهم كانهم جروب سياحى كبار السن واحنا الوحيدين اسرة ومعاها اطفال وحسيت ان الكل بيبصلى باستغراب واول ما وصلنا الكراسى ياسين بدا فى سيمفونية الصراخ ومش عايز يسكت عملت كل المحاولات اللى اقدر عليها ومافيش فايدة ومالاقيتش غير انى اديله دواء مسكن للالم علشان يهدى شوية وتم الاقلاع فى سلام وطاقم المضيفات كانوا لطاف جدا وذوق جدا وفرحانين قوى بالعيال وكانت تجربة مثيرة للبنات ( ربط الاحزمة والاقلاع )

وخلال ساعة ونصف ياسين عامل قلق فى الطيارة لدرجة انى ماقدرتش اكل وجبتى وسيبتها لكن الحمد لله نام اخر نص ساعة وبدانا ربط الاحزمة من جديد علشان الهبوط وهنا اعترضت ( مى ) جدا جدا ( 3 سنوات ) علشان مش عايزة تتقيد فى الكرسى وبدات السينفونية بتاعتها لحد ما لمسنا الارض وانا طبعا وشى فى الارض من الناس اللى حوالينا

وبعد مانزلنا ( نزلنا من الطائرة على اتوبيس لحد باب المطار ) ودخلنا المطار فضلت اعتذر عن الازعاج لكل جروب الاقيه من المسافرين معانا وبصراحة كانوا ذوق وكله قال مافيش مشكلة وبقوا يقولوا لجوزى ( nice family ) ( واكيد كان قصدهم ايه الجيش ده كله صدعتونا حرام عليكو :lol: )

وبعد كده دخلنا على قاعة الانتظار للطائرة التانية وطبعا البنات كلهم ناموا وفضل ياسين من ايدى لايد باباه وقولنا معلش ممكن ننام فى الطيارة التانية ( 10 ساعات )

ملخص :

الطائرة الاولى كانت متواضعة فى الشكل لكن طاقم الضيافة كان متعاون جدا وودود جدا والخدمة جيدة

قريبا :

تفاصيل رحلة الطائرة الثانية الى مطار مونتريال

اشكركم على حسن المتابعة والاستماع

:lol:

[دعاء]

:aslam:

شكرا لكل الافاضل

الاستاذ محروس :

شكرا على معلوماتك وفعلا شيخ الجامع مصرى ومتعاون جدا والحمدلله

اختى newcomer

شكرا لتاثرك ولكن الدنيا كده وكل شئ نصيب والحمدلله كل شئ ماشى كويس الى الان

استاذ hamoudi

كل حاجة جبتها كانت مهمة ولحد دلوقتى ماندمتش على انى جبت حاجة وماستخدمتهاش وباقى التفاصيل هاتعرفها ان شاء الله مع سياق الاحداث

استاذ ibra

الف مبروك على المديكال وان شاء الله نبارك لك على الفيزا قريب وفعلا بصراحة مهم انك تنزل على مدينة فيها حد تعرفه لان ده بيسهل الخطوات الاولى الى حد كبير وبالتوفيق ان شاء الله

مدام نونا

شكرا لتهنئتك دخولك موضوعى يشرفنى

استاذ حسام

يااااااه سفيرة مرة واحدة ربنا يجبر بخاطرك واكون عند حسن ظن الجميع

شكرا ليك اخى الكريم وعقبالك

جزيل الشكر لكم جميعا

:waf:

[أبو نور]

بسم الله ما شاء الله

أختنا دعاء داخلة بقوة

كده فيه منافسة قوية لأساتذتنا الكبار !!!!!!!!!!

ربنا يطمنا عليكم ويوفقكم

:aslam: :waf:

[ايهاب سالم]

سؤال منطقي تاني يا مدام دعاء لو سمحتي

ليه كيبيك ? و ليه نتعلم فرنساوي ?

طب ما باقي كندا مفتوحه قدامكم و بتتكلم انجليزي وبرضه موجود مدن و بلدات صغيره تكون تكلفة المعيشه بها منخفضه

اظنك سمعتي الكلام الكتير عن عنصرية الكيبيكيين

هل سمعتي عن اخونا اينشتين و تجربته مع كيبيك .... هو حاليا موجود في تورونتو

مش قصدي اضايقك لكن ممكن التغيير حاليا يكون اسهل بدل ما تضيعي شهور او سنيين

[Nassarlink]

بس فى حاجة نسيتها خالص وهى كل احذية جوزى لم احضر له اى شئ يلبس فى القدم غير الشرابات ودخل كندا بالكوتشى اللى كان لابسه بس !!!! :aslam: :waf:

بدايه موفقه للزوج

الظاهر الموضوع ده بتاع - آه نسيت الاحذيه بتاعتك يا حبيبي معلش انا آسفه-الستات متفقين عليه لانها حصلت معايا قبل كده بس الحمد لله مش في بلاد الثلج لكن في بلاد الحر

[Nassarlink]

سؤال منطقي تاني يا مدام دعاء لو سمحتي

ليه كيبيك ? و ليه نتعلم فرنساوي ?

طب ما باقي كندا مفتوحه قدامكم و بتتكلم انجليزي وبرضه موجود مدن و بلدات صغيره تكون تكلفة المعيشه بها منخفضه

اظنك سمعتي الكلام الكتير عن عنصرية الكيبيكيين

هل سمعتي عن اخونا اينشتين و تجربته مع كيبيك .... هو حاليا موجود في تورونتو

مش قصدي اضايقك لكن ممكن التغيير حاليا يكون اسهل بدل ما تضيعي شهور او سنيين

سؤالك ده يا بشمهندس مهم جدا

لكن الاهم ان شاء الله هتكون اجابه مدام دعاء

هي الي هتعرفنا الاسباب الحقيقيه

[ايناس احمد]

صورة مين الامور ولا الامورة دى يااستاذ ايهاب ربنا يخليها لكم

متابعين يادعاء بس نسيتى تقوللنا مأخدتيش حاجة اكل معاكى خالص ولا بيدققو فى المطار

الرحلة الاولى كانت 3 ساعات وكانت معاناه مع ياسين أمال عملتى اية فى العشر ساعات قلبى معاكى

[ايهاب سالم]

صورة مين الامور ولا الامورة دى يااستاذ ايهاب ربنا يخليها لكم

الاموره دي اللي ربنا يخليهالنا يبقى ابني كريم

بس طبعا دي صورته من 5 سنيين

بنتي يا ستي بتلعب و بتغير الصور بمزاجها بعد ما علمتهالها مره

و يا ريتني ما عملت :waf:

بصراحه مش قادر ازعلها و امنعها .... خليها تلعب

على فكره انا اصغر اخواتي اسمها ايناس

باي ذا واي يعني :aslam:

معذره لمدام دعاء على الخروج عن الموضوع

تم تعديل 26 مارس 2009 بواسطة ايهاب سالم