تحياتى من كيبيك سيتى

[ايناس احمد]

انتى فيييييييييييييييييييييين يادعاء الواد ياسين شغلك ولا اية يارب تكونو بخير

بس مين جارك الجديد دا يادعاء هو الدكتور أيمن كامل سافر ولا اية ياجماعة مش هو اللى علية الدور فى السفر ان شاء اللة

مستنينيك يادعاء

[hamoudi]

انتى فيييييييييييييييييييييين يادعاء الواد ياسين شغلك ولا اية يارب تكونو بخير

بس مين جارك الجديد دا يادعاء هو الدكتور أيمن كامل سافر ولا اية ياجماعة مش هو اللى علية الدور فى السفر ان شاء اللة

مستنينيك يادعاء

الدكتور ايمن اصلا سافر من  3 ايام ونز ل على كيبك سيتي  الى شكلها بعد  كدة هاتبقى قبلة اعضاء المنتدى سواء اللاندينج او للعمل او للدراسة واول واحد اخترعها كان جادوللي الله يمسيه بالخير

[ايناس احمد]

الحمد لله ان الدكتور أيمن سافر بالسلامة ويارب نسمع عنة كل خير ان شاء الله

ويارب كيبيك ستى يكون وشها حلو علية شكرا يااستاذ حمودى

[دعاء]

:unsure:

اخوانى واخواتى الافاضل وحشتونى جدا جدا

وانا اسفة على التاخير بس انتم عارفين ان الويك اند هنا السبت والاحد والعيال ما صدقوا احتلوا الكمبيوتر ومش عارفة اجى ناحيته منهم

احب فى الاول اشكر كل اللى دخل موضوعى واضاف اليه مشاركة وكمان عايزة ااكد انى ان شاء الله مش هانسى اى سؤال بس ارجوكم رجاء خاص ان تدعونى اكمل سياق الاحداث علشان ماتلخبطش وانسى حاجة مهمة كنت عايزة اقولها وصدقونى مقدرة كويس جدا كل سؤال وقد ايه بتكون اللهفة فى انتظار الاجابة لانى كنت فى نفس الوضع ده من فترة قصيرة جدا وكنت بتمنى حرف مش كلمة بس تفيد فى موضوعنا

فان شاء الله اكمل حسب ترتيب الاحداث وبعد كده اجاوب على كل سؤال على حسب خبرتى الخاصة لانى مش هاقدر افتى فى حاجة انا مش عارفاها خلاص اتفقنا ؟

هانكمل النهاردة رحلة الطيران التانية من اثينا الى مطار مونتريال

كان ميعاد الطائرة الساعة تسعة الا خمسة وبداوا المسافرين يعملوا طابور من الساعة 8 واستغربت ليه بدرى كده ؟؟!!

المهم وقفنا فى الطابور وبعد كده عرفت ليه واقفين بدرى بل اكتشفت ان الطابور بدا من سبعة وتلت كمان اتاريهم عمالين يفتشوا فى الناس تفتيش غريب جدا!!!!!

احنا كل واحد مننا انا وجوزى والبنتين الكبار كان معانا هاندباج طبعا الشنط دخلت جهاز التفتيش وكمان طلبوا نقلع الجواكت بتاعتنا كلنا وتدخل هى كمان الجهاز وبعد ماعدينا احنا كمان من بوابة التفتيش طلبوا من جوزى انه يقلع حزام البنطلون ويفضى جيوبه كلها !!! وبعد ده كله مسكوا شنطة شنطة ( الهاندباجات طبعا ) وفلوها مش فتشوها بس وطلعوا من شنطتى انبوبة معجون اسنان مستعملة لزوم الصبح فى المطار استخدمتها انا والبنات ورماها وقالى ممنوع وكمان كريم للشعر وزجاجة كلونيا فيها نصها كل ده رماه وقالى ممنوع يطلع على الطيارة ( بصراحة كان التفتيش مستفز جدا ) واخيرا ادونا حاجتنا وقعدنا نقفل الشنط والبس العيال تانى وكل واحد يشيل حاجته لما خلاص لحقنا الطيارة بالعافية كنا عمالين نجرى ونجر العيال معانا وهما بيستعجلونا

واخيرا ركبنا الطيارة

كانت على عكس الطيارة الاولى تماما كبيرة جدا ( نظام كرسيين جنب الشباك و4 كراسى فى النص ) وكمان كانت مجهزة بشاشة فى ضهر كل كرسى ولما كل واحد قعد فى كرسيه بداوا المضيفين ( 2 رجالة - 2 بنات ) يوزعوا على كل واحد مخدة وبطانية وسماعة هيدفون

وبدا مسلسل الحرك والفرك والعياط والزهق من العيال فمافيش داعى اطول فى الموضوع ده

كان فيه وجبتين ومع كل وجبة مشروب ساخن ومشروب بارد

المضيفين كانوا مش لطاف بالمرة ولا متعاونين على عكس الطيارة الاولى برضه وكانوا مكشرين دايما على عكس المعتاد

فى النصف التانى من الرحلة ( يعنى بعد مرور حوالى 4 او 5 ساعات ) وزعوا علينا ورقة زى البروشور كده والمفروض نكتب فيها اسماء المسافرين من العائلة وتواريخ ميلادهم وكمان معاك ايه داخل بيه كندا من محتويات الشنط

كانت الورقة دى مكتوبة بالانجليزى والفرنساوى

ومكانش فيها مكان غير لاربع اشخاص بس فكتبت فيها على قد الامكنة المتاحة وماكتبتش ( مى ولا ياسين ) ولما حاولت اسال المضيف قالى ماعرفش زى اى سؤال سالته قبل كده ( الاجابة النموذجية ماعرفش )

اما فى خانة المنقولات اللى معانا فكتبت فيها ملابس فقط لانى ماكنتش عارفة اكتب ايه تانى ( حلل واطباق يعنى !!؟؟ )

المهم

انتهت الرحلة ووصلنا الحمد لله مطار مونتريال فى سلام وبعد ماكنت انا وجوزى كمان انتهينا :rolleyes:

وبعد مادخلنا المطار ( المرة دى من الطائرة الى المطار من خلال تيوب ) بعض المضيفين واقفين يشاوروا على المكان اللى المفروض نروحه وكان فى كذا مكتب زجاج زى بتوع البنك كده روحنا لمكتب فاضى فيهم الموظفة شافت الباسبورات والورقة اللى وزعوها علينا فى الطيارة ودخلت بيانات على الكمبيوتر وبعد كده قالت لنا ندخل على مكتب الهجرة

دخلنا المكتب وقابلنا موظف من اصول شرق اسيوية وشاف الباسبورات والورقة وفجاة اتنفض وكشر وقعد يتكلم بنرفزة ازاى انتو 6 اشخاص وكاتبين 4 بس وازاى الموظفة الاولانية ماخدتش بالها من الموضوع ده وراح قايم منطور وراح لها وقالى تعالى معايا وقعد يزعق لها وبعدين كملت البيانات منى ورجعنا مكتبه تانى

طلب الباسبورات وقعد يسالنى انتى بتشتغلى ايه ؟ وجوزك بيشتغل ايه ؟ وبيتاكد من تواريخ ميلاد الاولاد واسماؤهم وبعدين طلب العنوان اللى هانستقر فيه وقال لنا استريحوا ربع ساعة وبعدين اناديلكم

وبعد كده ادالنا اوراق اللاندينج وقالنا ان الاوراق دى مهمة جدا وهاتستخدموها فى استخراج اوراقكم الرسمية بعد كده وكمان ادالنا ظرفين للمنحة الحكومية للاطفال ( المفروض ظرف خاص بكيبيك وظرف خاص بالفيدرال ) وبعد ما روحنا وفتحناهم بعدين لاقيناهم الاتنين للفيدرال بس ( ودى اخرة النرفزة بتخلى الواحد يتلخبط ويغلط )

المهم قالنا روحوا على مكتب الهجرة الخاص بكيبيك ولما دخلنا المكتب قابلتنا سيدة كبيرة فى السن بس سكرة والله

كانت بتتكلم بالراحة وبهدوء شديد ورحبت بينا جامد وكانت سعيدة باللاطفال واديتنا الكتيبات اللى فيها معلومات عن كل حاجة فى كيبيك واكدت علينا تانى فى المحافظة على اوراق اللاندينج وقالت ان الوراق دى هاتطلب مننا لما الاولاد يدخلوا الجامعة فى كندا واديتنا عنوان لمكتب الهجرة القريب مننا فى كيبيك سيتى علشان نروح لهم يطلعولنا الكروت المهمة ( التامين الاجتماعى والتامين الصحى )

وبعد ماخلصنا معاها روحنا علشان نستلم الشنط من على السير وفعلا استلمناها وروحنا بعد كده على اخر خطوة وهى اللى كان بيسال عليها الاستاذ ibra

مكاتب مفتوحة زى الكاونتر كده وقابلنا شاب وشاب الباسبورات واوراق اللاندينج وسالنا

هوا : معاكوا ايه

احنا : معانا ملابس

هو : تقريبا بكام دولار ؟

احنا : حوالى كذا

هوا : معاكم اى شئ ثمين او اجهزة ثمينة او اى شئ ذا قيمة عالية ؟

احنا : انا معايا جزء من ذهبى

هو : مستعمل ولا جديد ؟

احنا : مستعمل

هو : معاكوا موبيلات ؟

احنا : ايوة

هو : مستعملة ولا جديدة ؟

احنا : مستعملة

هو : فى حاجة فى بلدكم عايزين تجيبوها كندا بعد كده ( عفش او اجهزة او اى شئ ) ؟

احنا : لأ مافيش

هو : شكرا وراح مدينا ورقة بكدة

وبس خلاص وقالنا اتفضلوا

ودى كانت اخر خطوة فى المطار وطلعنا بعد كده علشان نحجز تذاكر الاتوبيس من مطار مونتريال وحتى كيبيك سيتى ودى رحلة تانية اخدت لها حوالى 4 ساعات

خط سير الاتوبيس ( مطار مونتريال - المحطة الرئيسية فى مونتريال نفسها - وهناك قعد نص ساعة يحمل - اتحرك الساعة 6 من مونتريال - ووصل كيبيك سيتى حوالى 9 الا ربع )

ارجوا ان اكون عوضتكم عن الويك ان اللى فات

وشكرا على حسن استماعكم

[دعاء]

تسجيل متابعة يا أفندم :rolleyes:

- أدوات المائدة و الأطباق ....إلخ بتعمل وزن جامد علي الفاضي .... أي محل من بتوع الDollar Store زاي Dollarama مثلا ... الحاجات ديه و بقية الرفايع و الخردوات اللي بتاخد مكان و وزن حيبقوا موجودين و الموضوع كله مش حيتكلف أكتر من ١٠ ١٥ دولار للفرد بالكتير قوي ..... صحيح لو الأسرة كبيرة شوية حندخل في ٥٠ ٦٠ دولار بس حنوفر مكان و وزن و ممكن ناخد حاجات تانية بدلهم

تحياتي و دعواتي بالتوفيق يا سيدتي الفاضلة

:unsure:

كلام حضرتك سليم يا دكتور بس انا بقول جيبت بس على قد اول اسبوع على بال ما نقف على رجلينا ونعرف الاماكن اللى ممكن نشترى منها لان ماكانش ينفع ماجيبش خالص امال كنا هاناكل ونشرب ازاى فى اول ايام دى ؟؟

وفعلا انا كملت احتياجاتى ومازلت بكملها من المحلات دى

ودى معلومة لستات البيوت اللى هايسافروا ومعاهم اسرة هاتوا ادوات مطبخ بس على قد اول اسبوع لحد ماتعرفوا هاتشتروا منين ( يعنى كل واحد طبق ومعلقة وشوكة وكباية بس )

[دعاء]

:rolleyes:

اشكر كل الاخوة والاخوات الافاضل

سمية صالح - منى عبدون - احمد صالح - supersuper - بنت مصر - مجبورة ان شاء الله - hamoudi - الطنطاوية - عمر عزيز - ايناس احمد

بجد متابعتكم لى تشرفنى واتمنى اكون باضيف اى معلومة تكون مهمة لاى حد فيكم

واحب اطمنكم ان الحمد لله الدكتور ايمن كامل وصل بالسلامة يوم الخميس اللى فات بس اتاخر شوية الظاهر اخد الاتوبيس اللى بييجى كيبيك سيتى فى ميعاد بعد اللى احنا جينا فيه وبصراحة انا لسة ماشوفتوش بس جوزى شافه فى المسجد فى صلاة الجمعة

باشكركم مرة تانية على حسن استماعكم

:unsure:

[دعاء]

يبدو ان الاخت دعاء لم تنتبه الى الموضوع الذي طرحته

وسؤالي لحضرتك هو عن موضوع البيانات التي قدمتيها للجمارك ؟؟؟

ما الذي يجب علينا ان نكتبه في هذه البيانات لكي نستفيد منه في المستقبل؟؟؟؟

اقصد بذلك من اساس منزل او كل مايخص البيت بشكل عام,

ذلك ان ميزة الاستفادة من هذه الخاصية وبدون دفع رسوم, هي لمرة واحدة فقط ؟؟؟

الرجاء الى كل من حصلت له هذه التجربة اضافة الى الاخت دعاء ان يشرحها لنا مع شوية

تفاصيل لما للموضوع من اهمية؟؟؟ولكم جزيل الشكر زيارك الله فيكم.

ومالو يااستاذ الشامي؟؟؟؟؟الاخت ام ياسين لسا خبرتها في هذا المجال فرش؟؟؟؟؟

ممكن يكون هناك اي شيء جديد او اي معلومة قد تفيد الجميع؟؟؟؟؟

على كل الاحوال ....الف شكر .

اولا باشكر الدكتور الشامى شكر خاص على رده على الاستاذ ibra

ثانيا دى كل تجربتى بخصوص المنقولات على الرغم انى قبل ما اسافر طبعت النسخة اللى المطلوب تتملى من على النت بس بصراحة ماعرفتش اكتب فيها ايه غير الملابس وادوات المطبخ وده بخصوص الحاجة اللى احنا جايبينها معانا

اما بالنسبة للحاجات اللى محتمل تيجى بعد كده من مصر فالفكرة دى مش موجودة اصلا لاننا لا نفكر اننا نجيب حاجة من مصر ومش شايفين ليها لازمة وطبعا كل واحد على حسب ظروفه

ومن الاخر احنا ماحتجناش نملا حاجة لان كان عبارة عن سؤال وجواب الموظف هو اللى بيملا الورق الخاص بيه وفى الاخر ادالنا نسخة منها ( هى ورقة واحدة عاملة زى الكربون كده )

دى كل تجربتى يا استاذ ibra بخصوص هذا الموضوع

[مجبورة ان شاء الله]

حمد الله على السلامة مرة اخرى ومزيد من اتفاصيل حتى اخر لحظة لى نتمكن من توجيه الاسئلة واستحملة بقا اسئلة وكلاء النيابة بتوع مصر تحياتى لك وللاسرة

[ايناس احمد]

شكرا يادعاء على الحلقة الجميلة دى

وسلامنا للدكتور أيمن لما تشوفوة وربنا يوفقكو جميعا ويسهل لكو أموركو

[Nassarlink]

الف شكر يا مدام دعاء

ورحله موفقه انشاء الله

اعتقد ان من الافضل ان مسالش دلوقتي لحد متخلصي باقي التفاصيل بتاعت الرحله

علشان متنسيش حاجه

وبعدين اسال علي مهلي

وانشاء الله نلاقي عندك الاجابه

تمنياتنا ليكي و لزوج حضرتك بالتوفيق وسلامنا للدكتور ايمن

وياريت تبلغوه يكون معانا اون لاين علشان واحشنا جدا

[Queen]

السلام عليكم،

حلوة كلمة حرك و فرك ديه ، انا كنت بافتكر ان ديه كلمة بتاعتي انا و ابني وبنتي بس.

[bent misr]

انت جميله جميله جميله جدا يا دعاء :hi:

شكرا على اهتمامك بينا و معلوماتك القيمه الي

بنستفيد جدا منها أثناء سردك للاحداث

انتي كده بتحسسينا اننا سافرنا بجد و أكيد كل

حاجه بتكتبيها هنستفيد منها اذا كان لنا نصيب و سافرنا

و ماتلخبطيش نفسك احنا معاكي خطوه بخطوه ان شاء الله

[منى عبدون]

بصراحة يا دعاء انا مش عارفة اشكرك ازاى على المعلومات القيمة دى لانى استفدت منها جدا لان كل حاجة بتبقى مسئوليتك انتى خاصة تحضير الشنط وعندى استفسار بعد اذنك بالنسبة للبس الاولاد هل الجواكت اللى عندنا فى مصر تنفع هناك وهل اخدتى بطاطين معاكى لانى سمعت ان كل اللى بيسافروا بياخدوا معاهم بطاطين ارجوا ان تردى عليا وفى انتظار سرد باقى التفاصيل وشكرا

[د هشام ابراهيم]

كلام حضرتك سليم يا دكتور بس انا بقول جيبت بس على قد اول اسبوع على بال ما نقف على رجلينا ونعرف الاماكن اللى ممكن نشترى منها لان ماكانش ينفع ماجيبش خالص امال كنا هاناكل ونشرب ازاى فى اول ايام دى ؟؟

وفعلا انا كملت احتياجاتى ومازلت بكملها من المحلات دى

ودى معلومة لستات البيوت اللى هايسافروا ومعاهم اسرة هاتوا ادوات مطبخ بس على قد اول اسبوع لحد ماتعرفوا هاتشتروا منين ( يعنى كل واحد طبق ومعلقة وشوكة وكباية بس )

يا أفندم ألف حمد الله علي سلامة حضرتك و الأسرة الكريمة ... و هو ده المهم ..... مدرك تماما حيرة الواحد و هو بيفكر ياخد إيه و يضحي بايه و هو بيقفل الشنط

تخيلي حضرتك احنا اضطرينا نضحي بحاجات كتير علشان كان معانا كمية كتب لا بأس بها أول طلعة لكندا ....طب و غير طب ....و في الأخر دفعنا وزن زيادة برضه ....(الحقيقة إن تقريبا مفيش مرة سافرنا من أو إلي كندا إلا و دفعنا وزن زيادة مش بس أول مرة )

حضرتك خدتي وقتك تماما و احنا في انتظار المزيد من المشاركات .... جزاك الله كل خير wst::

[حسام يوسف]

تسجيل متابعة لتوبيك جميل يا مدام دعاء

وربنا ييسرلكم كل صعب يارب

[om reham]

تسجيل متابعه واستمتاع بالمعلومات القيمه اتمنا لك ولكل الاسره التوفق :lol:

[ibra]

الاخت الفاضلة دعاء ...الف الف شكر ليك ياست الذوق وربنا يجعل لكم في كل خطوة سلام

ونحن من المتابعين بشوق لكل حرف وكل كلمة تسرديها في هذا المنتدى الرائع...

بالتوفيق انشاء الله]

[دعاء]

:wub:

اخوانى واخواتى الكرام

يبدو ان كلمات الشكر والعرفان لم تعد تكفى امام هذا الوابل من الكلمات الرقيقة المفعمة بالتشجيع والاحترام لشخصى الضعيف من قبلكم ولكنى للاسف لا اجد غيرها للتعبير عن امتنانى لكل من يدخل موضوعى ويضيف مداخلة تشجيع او سلام او حتى استفسار او حتى متابعة بدون تعليق

فشكرا جزيلا لكم وبارك الله فيكم جميعا ويارب اكون فعلا عند حسن ظنكم بى

الحقيقة الحلقة اللى فاتت سقطت منى بعض المعلومات البسيطة وهى كالتالى :

كان من المقرر ان تصل الطائرة مطار مونتريال الساعة واحدة وربع ظهرا لكن فى الحقيقة نزلت ( زى ماذكرت الشاشة على الطائرة ) الساعة 12 ونص ظهرا

وطبعا فرحنا جدا علشان قولنا هانلحق اتوبيس الساعة 2 الظهر اللى هايوصلنا لكيبيك سيتى

ولكن بعد ما نزلنا المطار اكتشفنا ان الساعة فى مونتريال زادت ساعة ( التوقيت الصيفى فى كندا ) وده طبعا غير الخطط خالص

فاذا قولنا ان احنا فعلا هبطنا بالطائرة الساعة واحدة ونص فاحنا خلصنا اجراءاتنا على الساعة 4 عصرا

وبكده ركنا اتوبيس الساعة 5 ووصلنا كيبيك سيتى حوالى الساعة 9 الا ربع مساءا

والاتوبيسات بتاعة كيبيك سيتى مواعيدها كالتالى ( 2 - 5 - 8 ونص مساءا ) ( حوالى 64 دولار الفرد ) والرحلة من مطار مونتريال الى كيبيك سيتى حوالى 4 ساعات

مش عارفة اذا كانت معلومات مهمة ولا ايه بس قولت اضيفها للمعرفة العامة

شكرا جزيلا على حسن الاستماع

( استاذ نصار انا مش ناسية سؤالك ان شاء الله اجاوب عليه قريب )

:D

[astrophy]

:wub:

اخوانى واخواتى الكرام

يبدو ان كلمات الشكر والعرفان لم تعد تكفى امام هذا الوابل من الكلمات الرقيقة المفعمة بالتشجيع والاحترام لشخصى الضعيف من قبلكم ولكنى للاسف لا اجد غيرها للتعبير عن امتنانى لكل من يدخل موضوعى ويضيف مداخلة تشجيع او سلام او حتى استفسار او حتى متابعة بدون تعليق

فشكرا جزيلا لكم وبارك الله فيكم جميعا ويارب اكون فعلا عند حسن ظنكم بى

الحقيقة الحلقة اللى فاتت سقطت منى بعض المعلومات البسيطة وهى كالتالى :

كان من المقرر ان تصل الطائرة مطار مونتريال الساعة واحدة وربع ظهرا لكن فى الحقيقة نزلت ( زى ماذكرت الشاشة على الطائرة ) الساعة 12 ونص ظهرا

وطبعا فرحنا جدا علشان قولنا هانلحق اتوبيس الساعة 2 الظهر اللى هايوصلنا لكيبيك سيتى

ولكن بعد ما نزلنا المطار اكتشفنا ان الساعة فى مونتريال زادت ساعة ( التوقيت الصيفى فى كندا ) وده طبعا غير الخطط خالص

فاذا قولنا ان احنا فعلا هبطنا بالطائرة الساعة واحدة ونص فاحنا خلصنا اجراءاتنا على الساعة 4 عصرا

وبكده ركنا اتوبيس الساعة 5 ووصلنا كيبيك سيتى حوالى الساعة 9 الا ربع مساءا

والاتوبيسات بتاعة كيبيك سيتى مواعيدها كالتالى ( 2 - 5 - 8 ونص مساءا ) ( حوالى 64 دولار الفرد ) والرحلة من مطار مونتريال الى كيبيك سيتى حوالى 4 ساعات

مش عارفة اذا كانت معلومات مهمة ولا ايه بس قولت اضيفها للمعرفة العامة

شكرا جزيلا على حسن الاستماع

( استاذ نصار انا مش ناسية سؤالك ان شاء الله اجاوب عليه قريب )

:D

والله يمدام دعاء الواحد مش لاقى كلام يشكرك بيه على الاهتمام بسرد كل التفاصيل دى لانها مهمه جدا بذات لناس الى قريب هيسافروا وان عندى اسئلة كتير جدا ليكى بسى مش هسال الالما تخلصى سرد وقائع الرحلة كلها علشان مش نعطلك فى تسلسل الاحداث وبردوا اخوانا واخواتنا ياريت محدش يسال الا لما مدام دعاء تنتهى من سرد كل التفاصيل بتاعت الرحلة والحاجات المهمه وبعدين بقا يبدا طوفات الاسئلة وربنا يعنها على اسئسلتنا وربنا يبارك لها

[دعاء]

بصراحة يا دعاء انا مش عارفة اشكرك ازاى على المعلومات القيمة دى لانى استفدت منها جدا لان كل حاجة بتبقى مسئوليتك انتى خاصة تحضير الشنط وعندى استفسار بعد اذنك بالنسبة للبس الاولاد هل الجواكت اللى عندنا فى مصر تنفع هناك وهل اخدتى بطاطين معاكى لانى سمعت ان كل اللى بيسافروا بياخدوا معاهم بطاطين ارجوا ان تردى عليا وفى انتظار سرد باقى التفاصيل وشكرا

العفو يا منى وشكرا على متابعتك وربنا معاكم وتخلصوا اجراءاتكم على خير

بصى بالنسبة للجواكت اذا كونتى هاتيجى فى وقت شتاء فهاتى اتقل حاجة عندك للولاد لزوم السفر والوصول ( وطبعا تتقلى فى الهدوم تحت الجواكت وماتنسيش الآيس كابات والجوانتيات ) اما اذا كنتى هاتيجى فى الصيف فافضل انك تجيبى من هنا علشان بتبقى فيه عروض حلوة واسعارها معقولة ومش هاتبقى مضطرة تجيبى من مصر لانه مش بجودة اللى هنا من ناحية الملائمة للجو طبعا

ام بالنسبة للبطاطين انا جيبت معايا عدد 2 كوفرتة وعدد 2 بطانية خفيفة وطبعا ده علشان الوزن

لكن لما جيت هنا ماحتجتش زيادة علشان التدفئة جو ة البيت بتكون كويسة جدا وممكن الكبار مايحتاجوش غير غطا خفيف جدا

لكن الحقيقة لسة ماعرفش نظام الاغطية هنا ايه واسعارها كام علشان زى ماقولت لك ماحتجتش زيادة عن اللى جيبته معايا من مصر

بالتوفيق