طنطا ...

[ابو خليل]

( الكلام ده ..

مش عارف ..

شعر ولا نثر ولا قصة ولا خواطر ..

كل اللي اقدر اقوله .. انه شوق لبلدي .. مرضيتش يكون فيه اي تصنع .. كل اللي في قلبي كتبته في ورق .. وفيها اسماء اماكن في بلدي ميعرفهاش الا اللي عاش فيها ..

ومكانش يهمني لا وزن ولا قافية .. ولا اي شيء ..

بس كنت بطلع شحنة شوق .. ... قلبي مغمور فيها )

--------------

(موال)

يا حزن قلبي عليك يا قلبي يا متغرب

مسافر بين البلاد وأمتى لبلدك تقرب ؟

يا حزن قلبي عليك يا قلبي يا مجروح

شايل جبال الهموم لا يتشكي ولا بتنوح

يا حزن قلبي عليك يا قلبي يا حزين

رحال بين الدروب ما تقول لي رايح فين ؟

------------------

سألوني : ايه بلدك ؟

قلت : طنطا .. دي بلدي

سألوني : ودي تبقي فين ؟

قلت لهم : جوه قلبي ...

-------

كل يوم الطير بيرجع عشه بعد الغياب ..

كل يوم الشمس بترحل وقت الغروب ..

كل يوم ألف غريب بيرجعوا لحضن الاحباب ...

الا انا ..

كل يوم اودع ناس راجعين بلادهم

او اقابل ناس .. جايين من بلادي ..

وانا مكاني ..

---------------------

خايف في يوم يا بلدي تنسيني

وانا اللي عمري ما نسيتك طول السنين !

خايف في يوم ارجع لك ..القاكي بتنكريني

وتسأليني : هو انت مين ؟!!

خايف في يوم ارجع الاقي كل شيء اتغير ..

الشوارع .. الناس ... حتي بيتنا!

خايف احس اني غريب في بلدي ..

وسط اهلي .. ما بين ولاد حارتنا !

خايف اتوه في الدورب التي اتربيت فيها !!

خايف اكون نسيت الاسامي والأماكن ..

خايف نكون احنا الاثنين اتغيرنا ..

انا وانت !!!

وبقينا اغراب عن بعضنا ...

-------------------

انا لسه فاكر ..

وعمري ما هيكون ناكر ..

شارع البحر

شارع النحاس

سيجر .. نفيا ..

اغلي الحبايب ..اعز الناس ..

عمري ما هانساهم ..

بس يا تري هما فاكريني !!

الشوق لبلدي بيقتلني ...

شارع الجلاء ..

والمنشاوي .. شارع سعيد ...

كل احبابي هناك

وانا هنا في الغربة .. وحيد

انا لسه فاكر ..

ميدان السيد ..

علي قهوة الأحمدية ..

كل الاصحاب

سيد وسامي

اسامة وهاني ..

نشرب عناب ..

نحكي ونقول

والوقت يطول ..

نلعب طاولة . ..

نتكلم عن حال الدولة .. ..

قعدة صفا وصحبة هنية

مدحت هاجر فرنسا ..

و هاني في وسط التلج في هولاندا ..

واشرف زمانه في ايطاليا ..

وسيد في الامارات

قد ايه فرقتنا السنين ..

و قد ايه بيقتلني الحنين ...

---------

وايه اخرة الغربه يا هيما !!

شوية فلوس و بس .

عمرك عمال بيجري ..

وحبايبك بيعدوا عنك

من غير ما تحس !

--------------------

وكنت يوم ما احس بالتعب

الحل عندي كان ... سهل جداااااااا..

ربع ساعة وهاكون في الجنة ..

بس تليفون صغير :

الو . حازم جايلك بكرة ..

.. وثاني يوم اكون في موقف الجلاء ..

راكب ميكروباس السنطة ..

وهناك ..

نقعد علي المسطبة ..

في غيط العنب ..

جنب الساقية ..

معانا الشاي والراديو ..

وتكعبية العنب فوقينا...

و نقعد نحكي ونتكلم

ويفوت الوقت يجري ..

اجي اقوم ،حازم يقول لي : بدري!!

حازم ومدحت و ابراهيم ..

زيادة و طارق و محمد ..

قد ايه فرقتنا السنين ..

و قد ايه بيقتلني الحنين ...

-------------------

كل يوم يوصلني من طنطا :

رسالة او مكالمة او بريد ..

ما فيهومش غير كلام عتاب .. ..

(محدش فينا وحشك . ؟

كل شهر نقول هارجع ؟

ويفوت الشهر وكمان شهر ..

ونلاقي عالباب شنطة

فيها هدايا للجميع ..

و جواب اعتذار :

اسف .. ما اقدرتش اجي

بس اكيد هاجي الشهر الجاي .... الامضاء/ابراهيم !!

يعني مفيش حد فينا وحشك ؟؟

ايه اللي قسا قلبك ؟؟

واسمع كلامك .. وانا بتقطع ..

انا نفسي والله يا حبايبي ارجع ..

بس اعمل ايه ؟؟!!!

---------------

بيني و بينك يا حبيبتي بلاد

وإيه يا حبيبتي أوجع من البعاد

بيني وبينك يا حبيبتي حدود

لكن ما بيننا يا حبيبتي عهود

بيني وبينك مسافات تحير

لكن ما بينا حب أقوى و أكبر

طنطا .. طنطا ... طنطا ...

[daktara]

شى لله ياسيد يا بدوى

[se_ Elsyed]

برافو عليك يابو خليل ... خواطر جميلة جداً لا تعبر عن طنطا فقط ولكنها تعبر عن كل مكان فى مصر سواء ريف او حضر ....

ربنا يهون علينا غربتنا ونرجع لبلدنا اللي تحترم أدميتنا ، إن شالله نأكل عيش وملح وتكون الحصيرة نومتنا .

[ابو خليل]

راجع لك يا طنطا

[ragab2]

طلعت

طنطاوى متعصب

وأصيل