# تعمل إيه لو جابوا واحد مطلعش من البيضة وعملوه مدير عليك ؟ #

[Abu Reem]

سؤال بريء

إيه أحوال الشغل اليومين دول

يكون شعورك إيهلو جابوا واحد مطلعش م البيضة وعملوه مدير عليك؟

لو واحد زميلك حالته زي ماانت شايف كدهأخد كل الترقيات ويا بخت من كان المدير خاله!

وزميل تاني واخد راحته ع الأخر!ربنا يسهل لعبيده!

وده بقى فاكر نفسه رشدي أباظةمحطم قلوب العذارى!

وواحد تاني عمال يقـرع على كل اللي حواليه بحواديت جدو الباشا (الواقع بيقول إن المرحوم كان محولجي سكة حديد)

وده بقى زي البصل..محشور في كل أكله!

شكله يخدع صحيحده بقى الثعلب المكاراللي بينقل للمدير الأخبار!

وده شعاره في الحياة :النبي قبل الهدية!

ده كل الحوافز والسفرياتجايه لهجايه له!

ده مش عارف يقف على رجليه صحيحبس مسنود قوي!

[Abu Reem]

والهانم دي طول الوقت في أجازة وانتي تشيلي شغلها بقى!

أه... المصريين شعارهم في العمل:

المليان يكب ع الفاضي!

وده مولود في بقه معلقة دهب

وبيشتغل بس في أوقات الفراغ

أما انت يا مسكين

يرمولك أي فتافيت تفرح بيها زي العبيط!

تعمل إيه حذر فزر ؟؟

تدعي عليهم ليل نهار زي الولايا؟

والا تشد فى شعرك؟

أو توريهم العين الحمرا؟

أو تنهي حياتك نهاية مأساوية؟

تعض صوابع الندم إنك مفكرتش تهاجر من زمان؟

ولا تتجوز واحدة غنية تصرف عليك

وتسيبك م الشغل خالص!؟

تعمل ودن من طين وودن من عجين

وتكبر دماغك ؟

[MoHaMMeD EgYpT]

:unsure: :sad: :ninja:

لا تعليق :blink:

لو المدير كان لسا ما طلعش من البيضة هسلق البيضة علشان اخليه يطلع mfb: ده مجرد هزار لاني لسا الحمد لله مدير جمهورية نفسي :sad:

و بجد موضوع جامد و مضحك و بجد مش قادر ابطل ضحك

شكرا ليك يا ابو ريم يا جامد :wub:

تم تعديل 26 مارس 2009 بواسطة MoHaMMeD EgYpT

[Abu Reem]

أو تعمل فيهم عملة كان نفسك تعملها من زمان!!

اشمعنى هما

كل واحد يعمل عملة سودة

وتيجي على دماغك!

شعر راسك بيقف م البلاوي اللي بتشوفها !

ومهما اشتغلت

ولو وقفت على شعر راسك حتى

برضه مش عاجب!

تاخد جرعة شجاعة وتروح للمدير تقوله:

يا راجل يا عجوز

مناخيرك قد الكوز؟

مش مهم إنك تكون من خيار الناس في الزمن الاغبر ده

مش مهم انت موهوب ولا لأ

ولا إنك تبقى دكتور كبير

لازم يكون معاك العصاية السحرية اللي بتفتح باب مغارة علي بابا

إيه هي العصاية السحرية

( واسطــة )

التفسير في القاموس المعاصر

و : وسيلة مناسبة للوصول للغاية(هدية – نقدية الخ)

ا : إمكانية الوصول إلى علي بابا (خارطة الطريق يعني)

س : سبوبة حلوة للأربعين حرامي وإلا مش حتوصل لعلي بابا

ط : طلبك مجاب إن شاء الله

هـ : هـبرة كبيرة تعوض الشقا اللي شفته لحد ما دخلت المغارة!!

انتقل إلى رحمة الله بالقاهرة

المرحوم اللي اسمه

الضمير

قريب ونسيب الذمة والأمانة والأخلاق

وشيعت الجنازة من جميع الجوامع والكنائس

المصاب فادح

ولا عزاء للشرفاء

تلغرافيا: مغارة علي بابا!

وفروعها بالقاهرة وجميع المحافظات

[osmel33]

الموضوع ده جد يا ابو ريم ؟

[محمد عبدالعزيز]

باين عليك موجوع جامد قوى يا أبوريم من الموضوع ده.

بعيداً عن إجابتى عن السؤال الصور والتعليقات بتاعتك عليها جامدة جداً.

إجابة السؤال بقى بتختلف حسب شخصية الإنسان اللى اتعرض للموقف ده.

فى اللى مش شايف غير المكان اللى هو شغال فيه وبيضطر يقبل بأى وضع أياً كان عشان يضمن مرتبه.

وفى اللى ممكن يعمل زى الناس :lol: , مش يعمل زى الناس اللى فى الصور بتاعتك طبعاً, إنما يمشى فى سكة الوسايط ومسح الجوخ للمديرين والكبار عشان ينول الرضا.

وفى اللى واثق من نفسه ومن قدراته وممكن يعافر ويشاكس ويشاغب عشان ياخد حقه.

وفى اللى واثق من نفسه ومن قدراته برضه بس حب يريح دماغه ويشوف مكان تانى.

أنا عنى نفسى اختار الاختيار الأخير فى حالة إن الاختيار التالت ماجابش نتيجة, والأرزاق على الله.

[Abu Reem]

الحمد لله الموضوع ده بعيد عني ، ولكن أقصد به طبعا وضع العديد مننا بصفة عامة خاصة أننا نعمل في دول غير بلدنا

ولا أتكلم بصفة شخصية ، وإن كنت مريت بهذا الوضع فيما سبق ولكن ليس من ناحية ( سن ) المدير الخليجي ، ولكن مؤهلاته ، ( كان واحد بثانوية عامة) ووصل لأعلى المناصب لأنه كان ,,,,, سائق الرئيس !!!!!!

[الباشمهندس ياسر]

اشترى دمااااااااااااااغك

اعمل اللى عليك بما يرضى الله و حلل مرتبك

و اللى يرشك بالمايه رشه بالنار

و حبايب على كده

[osmel33]

و اللى يرشك بالمايه رشه بالنار

انت جاى تهدى النفوس والا أيه يا حاظابط ؟ الموضوع ده مش فى الخليج يعنى هنا مافيش مشكلة تبقى راجل

جامعى قد الدنيا ويبقى مديرك معاه اعدادية عامة ماتاخودهاش على صدرك

قول الحق يا ابو ريم احنا ستر وغطا على بعض حصل الموضوع ده معاك ؟ ده المفروض انكم جهة دبلوماسية

يعنى اقلها اقلها الواحد فيهم يكون ساقط سنوية ولاشهرية ولا أى حاجة من ريحة الحبايب :lol:

تم تعديل 26 مارس 2009 بواسطة osmel33

[Abu Reem]

احنا ستر وغطا على بعض حصل الموضوع ده معاك ؟ ده المفروض انكم جهة دبلوماسية

يعنى اقلها اقلها الواحد فيهم يكون ساقط سنوية ولاشهرية ولا أى حاجة من ريحة الحبايب

لا محصلش معايا الحمد لله ، بس بأشوفوه كثير أمامي ، وخصوصا ، الناس إللي لا يداوموا أكثر من شهر ( متفرق ) في السنة ، وما شاء الله ولا حد بيقول لهم أنتوا فين،، وده زي ما انت قلت ، وضع عادي في الخليج ، لأن في النهاية راتب الوظيفة عندهم مدفوع اجباري ،،، وربنا يبارك لهم ويزيدهم ،،،

أنا مش بأحسد والله :lol: ،،، همه بصراحة ، برده عندهم مشاكل وهموم ، ولكن من نوع تاني مش زي مشاكلنا ،،

وبلاش أسئلة خبيثة بقى ؟؟؟ :lol:

[osmel33]

أنت عارف يا ابو ريم ان الجماعة هايزيدوا فى الحكومة من أول الشهر اللى جاي ؟

يا عينى علينا احنا اللى عمالين نتفرج وأقلها اللى معاه نحو أمية خمسة باكو

انا مش باحسد برضه :lol:

[الباشمهندس ياسر]

و اللى يرشك بالمايه رشه بالنار

انت جاى تهدى النفوس والا أيه يا حاظابط ؟ الموضوع ده مش فى الخليج يعنى هنا مافيش مشكلة تبقى راجل

جامعى قد الدنيا ويبقى مديرك معاه اعدادية عامة ماتاخودهاش على صدرك

يعنى لو حد غلط عليك يا عمنا هتسكت

اكيد مش هتسكت

هو ده قصدى مش اكتر

[Abu Reem]

يعنى لو حد غلط عليك يا عمنا هتسكت

اكيد مش هتسكت

هو ده قصدى مش اكتر

برافو عليك ، همه دول المصريين الجدعان

[osmel33]

يعنى لو حد غلط عليك يا عمنا هتسكت

اكيد مش هتسكت

هو ده قصدى مش اكتر

برافو عليك ، همه دول المصريين الجدعان

طبعاً انا موافقكم على حركات الحمشنة اللى انتوا بتتكلموا عليها بس على فكرة

قلة بس اللى بتعمل اللى انتوا بتقولوا عليه ده يعنى انا باحب لما اروح اشتغل

فى مكان انى احط بمناسبة ومن غير مناسبة الخطوط الحمرا اللى احب الشخص

اللى قدامي ما يتجاوزهاش ويبقى عارف انه لو تجاوزها مرة واحدة بس بالسلامة يا قلبي

هو مش بالسلامة قوى يعنى من الآخر بالجز.............................ة

بس اللى الواحد بيشوفه حواليه غير كده خالص وكله ماشي على قولة سيد درويش

لما قال عشان تعلى تعلى تعلى .... لازم تطاطى تطاطى تطاطى

هو بس المطاطية دى تختلف على حسب وضع الشخص بس للأسف الشديد

لقيت اللى بيطاطو لغاية كسر الضهر هما الناس اللى بنقول عليهم خبرا ومديرين

وكلام كبير

ولو عايزين وقائع انا عندى وقائع ما يعلم بيها الا ربنا للى بيحصل من أرض الواقع

تم تعديل 27 مارس 2009 بواسطة osmel33

[هبهوبه]

تسلم إيديك يا أبو ريم

موضوع لذيذ جدا وهادف

والألذ بقا صور البيبيهات عسولة خالص

أما بالنسبة لصلب الموضوع إذا كان مديرى أقل منى خبرة

وأقل منى فى المؤهل فلابد ان أضعه بين حين وآخر فى موقف مؤسف

يعنى بخبرتى الأكبر منه مؤهلى سأوضح له بالمواقف إنى أستحق عنه هذا المركز

وأعقده فى شغلة وبالتالى أعقده فى عيشته لحد مايقول حقى برقبتى ههههههههههه

[dongol]

ولو عايزين وقائع انا عندى وقائع ما يعلم بيها الا ربنا للى بيحصل من أرض الواقع

يا ريت حضرتك تحكيلنا علشان تزيد خبرتنا في التعامل مع هذه الامور

[بندق أفندى]

تجربتى المرير ةلعشر سنوات .. رئيس فى العمل يبتدى صاحبك وانت اللى جاى عليه أصلا .. ويقتنع تماما بقدراتك .. ويستفيد منك فى كل حاجة حتى فى الحياة العامة .. فى اللبس .. فى الأكل .. فى التسوق .. فى التعامل مع الناس .. يتعلم منك كمبيوتر .. وفجأة يقلب عليك .. عشان فيه مصرى زميلك يفترى عليك .. وهو أصلا محذرك منه وبيقولك ده كذاب لا يمكن يقول كلمة صدق ومع ذلك يصدقه ..

المدير الكبير هو اللى بيوزن القصة عشان انت تعاملك معاه فعليا مباشر .. تقدم استقالتك فى توقيت جالك فيه عرض كويس .. يقوم المدير الكبير يرفع راتبك يخليه زي اللى هو مفترض رئيسك .. عشان محتاجينك .. يموت كمدا وحزنا .. يمشى المدير الكبير يجيلك مدير من بتوع البيضة .. أو قرار فعلى انه ينهى خدماتك .. ويكون سعيد أوى .. ويتغم لما يكتشف انه لو صبر نص ساعة كنت قدمت استقالتك .. ههههههه .. وما تنتهيش الحكاية .. وتوصله أخبارك ويغتم أكتر ..

أصلا أسوأ حاجة فى الدنيا انه يتغم غيرك من خير يصيبك

طبعا هناك مجلدات من التفاصيل وراء هذه القصة

[د محمد الناعم]

اعمل اللى عليك و قوم بشغلك باحترافيه

و انت وقتها حتلاقى كل الاحجام بتصغر حواليك

و صدقنى حجم كل انسان بيتعرف و مافيش حاجه بتستخبى كتير

بس انا كان ليا سؤال

هيه البيضه اللى قصد حضرتك عليها اللى صاحبنا يعنى ماطلعش منها

بيضة الخبره

ولا بيضة السن

اصل البيض كتير زى مانت عارف

عموما لو خبره فدى سهله و لو انت محترف و خبره عنه حتمسحه باحترافيه

و لو بيضه السن او العمر يعنى هيه اللى لسه ما طلعش منها

فانا شخصيا لا اعترف بعامل السن للحصول على ترقى فى عملك

و البقاء للافضل مش للاكبر

تحياتى

تم تعديل 29 مارس 2009 بواسطة د محمد الناعم

[osmel33]

هيه البيضه اللى قصد حضرتك عليها اللى صاحبنا يعنى ماطلعش منها

بيضة الخبره

ولا بيضة السن

اصل البيض كتير زى مانت عارف

تحياتى

بيضة خبرة أيه بس يا دكترة ؟ :rolleyes: دى بطن أمه من الآخر

[Scorpion]

تعمل إيه لو جابوا واحد مطلعش من البيضة وعملوه مدير عليك ؟

اللي جابوه بقي هما هما اللي انت بتشتغل لحسابهم .. و بتاخد مرتبك منهم ....

يبقي حضرتك تحط الوش الأبلاكاش و تشوف "الكتكوت" عايز ايه و اعمله بس بطريقتك انت ...

في النهاية دي مسئوليته و مسئولية اللي شغله .... و علي نفسها جنت براقش

اسألني انا يا ما عدي علينا بيض و كتاكيت .. لكن في النهاية العشة احنا اللي بنْمَّشيها ....

:rolleyes: