مشكله محيرانى واتمنى الرد

[شروق وغروب]

السلام عليكم

انا كتبت موضوع من قبل

وقولت فيه انى جيت زيار ه لزوجى وانه يجددها

وكان هدفنا من التجديد انى اخد وقت عقبال ما يحاول يتصرف ويحولها او يعمل اقامه ليا

لانه جاى بتاشيره عامل وطبعا صعب عليه انه يعمل استقدام بسهوله

وفى الفتره دى ناس طلبت مننا 17 الف ريال عشان الاقامه وطلعت مش مضمونه

المشكله ان فى وسط ده كله الزياره انتهت من حوالى اسبوع وجوزى رغم انه له هنا 19 سنه فى السعوديه

وعارف انى كده لما انزل هو كمان ممكن يترحل معايا بس الحكايه مفرقتش معاه

لكن سمعنا ان فى سجن 6 شهور للزوج اللى زياره مراته انتهت

غير غرامه 10 الاف ريال

فهل ده فعلا اتطبق

وفى حاله تسديده للغرامه فى وقت نزولى هل برده هو معرض للسجن

واسفه للاطاله بس منتظره منكم النصيحه

وياريت لو حد صادف امامه حاله زيي ونزلت مصر يقولى فعلا ده بيحصل

وهل ترحيل الزوجه بمشكله لها

يعنى فى اهانه او معامله سيئه ؟

[الطير السافر]

السلام عليكم

انا اللى اعرفه ان الموضوع ده اتطبق بجد انا كانت مراتى فى الاول معايا على فيزا زيارة بس اللى اقدر اقولهولك ان سمعت ان الغرامة عشرة الاف ريال وترحيل بس انا من رايى لو حضرتك فى الرياض تروحوا ادارة الترحيلات اللى فى شارع الخزان وتحاولى تشوفوا حل من المكاتبت اللى فى وش الادارة بيبقى عندهم معارف من الداخل

انا اعرف برضة ناس راحت كتبت خطاب للامير احمد بن عبد العزيز اللى هو نائب وزير الداخلية بس ممكن ياخد اسبوعين ولا اكتر وبيرد عليكوا وانا اعرف ناس حولت فيزتهم الى اقامة بالطريقة ديه

[زعلان]

لا انصح بالذهاب الى مكتب الترحيلات ممكن تشوفوا معقب يحل الموضوع ويمدد التأشيرة او تحجزي تذكرة وتسافري وترجعي بعدين بدل ما يطلع الي في الترحيات متخلف ويبهدلكم

[شروق وغروب]

اشكرك اخى الطير المسافر على الرد

بس انا فعلا اخاف جوزى يروح مكتب الترحيلات ويعملوا مشكله معاه

وبدل ما احلها اخليها اسوأ

انا فعلا اللى مضايقنى اكتر من الغرامه هو السجن 6 شهور

ونفسى اعرف ده صح والا لا

وبخصوص رد حضرتك اخى زعلان

فااحنا كنا كلمنا معقب يمد التاشيره تانى بس عرفنا انى ماليش تمديد تانى

خصوصا انى اخدت 9 شهور

والمشكله انى حتى دلوقتى اهو فات عليا اسبوع هيتطبق عليا الغرامه يعنى برده مقدرش انزل

جوزى باع القضيه والبلد لما عرف انه هيترحل من البلد معايا

واتفق انه يحاول يجمع فلوسه اللى عند الناس لانه شغال حر

وغلب فلوسه بالخارج فاتفاقى معاه اننا منقعدش اكتر من 6 شهور كمان

بس سمعنا لحكايه الغرامه عرفنا منه اللى هنقدر نحصله من الناس هندفعه فى الغرامه

ورضينا وقولنا يمكن ربنا يعوضنا فى الفتره دى بشغله كويسه اهو مننزلش فاضيين لمصر

لكن بجد حكايه السجن دى

انبت ضميرى جدا انى قعدت وعرضته لكده

[doha]

بصي بما اني لسه راجعة مصر من يومين لنفس السبب وهو انتهاء تمديد الزيارة بتاعتي ..

قبل ماارجع اتصلت بالجوازات وسألتهم وردت علي وحده ( معرفش ايه وداها بس الظاهر عندهم موظفات ستات ) المهم هي قالت لي ان لو انتهت تاشيرتي لي اسبوعين بعدها اسافر فيهم بدون غرامة .. يعني انتي الحقي انزلي مصر فورا وباسرع مايمكن قبل مايمر الاسبوعين .. وبالمناسبة التذاكر دلوقت رخيصة اوي عشان دي فترة ميتة من السنة يعني افضل لك وافر ترجعي دلوقت ..

ثاني حاجه سمعت من وحده طبيبة زميلة لوالدتي حذرتني من اني اتخلف عن العوده وقالت بان وحده ممرضة جابت والدتها زيارة وتخلفت وانحكم عليها بالسجن ست شهور وغرامة عشر الاف ريال وان جابوا وسايط الدنيا وشالوا من عليها السجن لكن دفعت الغرامة .. انا مشفتش الست دي ولا اعرفها لكن سمعت ونقلت لك الي سمعته ..

برضه سألت موظف الجوازات وانا بختم خروج من المطار ان كان في امكانية اقدر ارجع تاني ولا عشان اخذت خروج نهائي يبقى خلاص مينفعش قالي لاه طالما انتي قاعده نظامي وخرجتي في وقتك قبل ماتنتهي تاشيرتك خلاص ملناش عندك حاجه وتيجي في اي وقت ..

الخلاصة الحقي باسرع مايمكن ارجعي مصر سواء انك تقدري تيجي السعوديه تاني او متجيش ومظنش على زوجك اي مسؤلية لو رجعتي في خلال الاسبوعين الي بعد انتهاء التاشيرة

بخصوص قلب التاشيرة لاقامة فانا سألت احد المكاتب الي قدام الجوازات الي بنجدد منها في الخزان وقالي بان بعض الناس بتقدر تقلب التاشيرة اقامه عن طريق تقديم طلب لمكتب الامير احمد وان في ناس فعلا جابت موافقة .. بس عن نفسي معرفش حد عملها فعلا بس الي فهمته انها حاجه صعبه لكن في ناس لو شرحت ظروفها بيتوافق لها يعني في استثناءات لكن الاصل ان لايجوز .

على كل حال خذي دي ارقام الجوازات اتصلي بيهم بنفسك واسألي ومتقوليش بياناتك يعني متقوليش انا مين ولا اسمي ايه بس قولي انا بسأل لو انتهت تاشيرتي واخر تمديد هل لازم اسافر فورا ولا لي فترة اسافر فيها واعرفي بنفسك عشان تطمئني اكتر ..

4771100

المديرية العامه الجوازات

جوازات الرياض

4057000

ادارة الوافدين في نهاية شارع الخزان من جهة الشميسي المبنى على يدي اليمين

قسم تجديد الزيارات

4418558

504 تحويله

[شروق وغروب]

اختى طيب انا كان اخر تمديد ليا يوم 29 وعليه ختم مغادره

هينفع بعد الختم ده عادى انى انزل

والا الختم ده هيسبب مشكله

[خالد شحاته]

السلام عليكم

اختي الفاضله عادي تسافري الان بدون اي مشاكل

لو تاخرتي لكثر من كدا خالي جوزك مش يروح الترحيلات ولا شي المهم يكون يعرف حد في مطار الرياض يطلعك من غير مايجدد بمبلغ

لانها حصلت كتير جدا الاسبوع ده لانا س كسرت التاشيره اكتر من سنه انما انتي بتقولي يوم 29 يعني يومين مش اسبوع اطلعي علي المطار من غير التريلات احسن وربنا يسهل لكي

تم تعديل 27 مارس 2009 بواسطة خالد شحاته

[se_ Elsyed]

مافش سجن بإذن الله

بس زوجك هايترحل ويسدد قبلها 10 الاف ريال

بس برضوا خلي حد غير جوزك يروح يسأل اي ظابط في الجوازات عن موضوع المهلة الاسبوعين اللي بعد انتهاء التأشيرة

ومن ناحيتي هاسألك نقيب صديقي هناك عن الخبر اليقين

لكن الحالتين اللي شوفتهم قدامي كانت زوجاتهم اتخلفوا من فترة طويلة ووقفوا هما الاتنين على دماغهم وجابوا وسايط من طوب الارض

والحمد لله المشكلة اتحلت من حوالي شهرين تلاته ودفع كل واحد حوالي 20 الف لحد ما حلوا المشكلة

تخيلي بقى ان واحد منهم كان جايب مراته استقدام وجه يضيفها لقى عليه الحكم ده لما كانت زيارة

بس زوجك غلطان غلط كبير عشان يبهدلك كده ويبهدل نفسه

على العموم لازم بكره يستفسر عن الموضوع ده بسرعة

وربنا يقدم ما فيه الخير

[شروق وغروب]

خلاص ان شاء الله هخلى جوزى يشوف حكايه الحجز دى ويشوف لو يقدر يوصل لحد يعرف

حد فى المطار

وربنا يستر لانى فعلا قلقانه جدا على موضوع معاقبه الزوج

وتسلم اخى على التعليق والرد

[شروق وغروب]

اخى الفاضل سى السيد

يعنى تفتكر هيقع الغرامه رغم انه مفاتش اسبوع عن انتهاء التمديد

وياريت حضرتك تبقى تقولى هتوصل لايه بعد سؤالك لصديقك

وان شاء الله جوزى بكره هيحاول برده يشوف من عنده ويشوف لو حتى انى انزل خلال اليومين دول

بس ميكونش فى اى ضرر عليه

[جحا]

انا عندي حل ان شاء الله يكون كويس

هابعت لحضرتك علي الخاص

[doha]

على فكره انا برضه انختم على جوازي خروج نهائي اتصلت بالجوازات بعد كده عشان استفسر من نقطه مهمه جدا وهي لو خرجت اقدر ارجع زياره تاني ولا ممكن يكون في معاكسه او قانون يشترط مرور فترة معينه قبل مارجع تاني

رد علي ظابط الجوازات وقالي ( انتي بصمتي ؟ ) قلت له مش فاكره بس اظن لما دخلت المطار اول مرة وانا جايه بصمت في جهاز كده فقالي لاه لما ختموا لك مغادرة نهائيه بصموك على شيء ؟ قلت له لاه اصلا مكنتش موجوده ووالدتي بتجدد لي التاشيرة قالي خلاص يبقى روحي وارجعي عادي

تقريبا الي بيعمل عمله سوده بس بيبصموه وهو خارج عشان يضمنوا ميشوفوش وشه تاني فالحل في الحاله دي يدخل البلد بقفاه .. وفيما عدا ذلك تروحي وتيجي عادي ..

انا شايفه انك مكبرة الموضوع وهو ابسط من كده بكتير .. انتي دلوقت النهرده ان شاء الله هتتصلي بالجوازات بالارقام الي اديتها لك وباذن الله هيطمنوك بس برضه اسألي في نقطه مهمه جدا لان لما كلمت بتاع الجوازات قالي كلمه مفهمتهاش اوي قالي آآه انتي جددتي من الترحيل مش من عندنا في الجوازات .. مش فاهمه بصراحه ايه النقطه دي بس شكلهم جهتين كده ووحده منهم متشدده والتانيه سهله .. المهم انتي اسألي في ادارة تمديد الزيارات وارجعي اتصلي تاني بالمديريه العامه للجوازات واسألي برضه عشان تجيبي الخبر اليقين من جهتين ..

وبكده هيكون اقصى مافيها ان هتتكلفي ثمن التذكرة الي هترجعي بيها وعليها خمسمية جنيه تكاليف اصدار تاشيرة جديده وخلصنا .. وكده تقدري تقضي السنة كلها مع زوجك يعني تنزلي مصر كل تسع شهور وترجعي بعد اسبوع ولا اثنين ولو مصر وحشاكي اوي ارجعي السعوديه بعد شهر .. وبناقص تكلفة تذكرة واعتبري ان وجودكم في السعوديه مش للتحويش بقدر ماهو عشان تبقوا في مكان واحد لنفسكم مش عشان عيال ولا فلوس .. سيبيها على ربنا وهي تعب سنه ولا اثنين بعد كده هتنحل من عنده ..

[se_ Elsyed]

على فكره انا برضه انختم على جوازي خروج نهائي اتصلت بالجوازات بعد كده عشان استفسر من نقطه مهمه جدا وهي لو خرجت اقدر ارجع زياره تاني ولا ممكن يكون في معاكسه او قانون يشترط مرور فترة معينه قبل مارجع تاني

مافيش علاقة بين ختم النهائي في الزيارة وبين المنجيء مرة أخرى زيارة أو إقامة

والواحد إن شالله أخد 100 ختم أحمر على جوازه .. ممكن ييجي تاني عادي ...

[elfakhrany]

أختى شروق وغروب

ياريت تاخدى خطوة فعلية حيث ان التأخير ليس من صالحك بالاضافة الى قطع رزق زوجك وأتمنى التوفيق للجميع

[se_ Elsyed]

بالاضافة الى قطع رزق زوجك وأتمنى التوفيق للجميع

أنا أعلم أنك لم تقصد المعنى الحرفي للجُملة ..

لكن ما فيش عبد بيقطع رزق عبد أخر .. أو عبد بيقطع رزق نفسه .. لإن الرزاق هو الله ... وربما موقف ننظر له إنه قطع رزق يبقى فيه خير لنا .. وعسى أن تكرهوا شيئاً وهو خير لكم ..

أتذكر تماماً الدكتوران مجدي يعقوب وأحمد زويل عندما صادفا روتين وعدم تقدير لا مثيل له وقيل لهما " إنت افشل واحد في الدنيا " فهاجرا وأصبحا أشهر من النار على العلم ...

[شروق وغروب]

خلاص الحمدلله المشكله اتحلت

وزوجى راح الجوازت وكلم واحد وقاله انها تنتهى يوم 29 لكن ليا 4 ايام للمغادره

واليوم الرابع

وفعلا راح دفع فى مكتب 300 ريال وجددها اسبوع

تنتهى يوم 8 هجرى وحجزت على يوم الجمعه السفر

الحمدلله رب العالمين

بجد اشكركم بجد

لانكم جميعا كنتم سبب انى انزل بعد ماكنا خلاص قولنا عوضنا على الله

لكن انتم شجعتونا جزاكم الله كل خير

[محمد افندى]

الف الف مبروك والحمد لله ان ربنا اكرمك واتحلت المشكلة على بركة الله سافرى الى مصر وتروحى وتيجى بالسلامة ان شاء الله وان شاء الله موفقه فى مصر بس بردة خلى زوجك الكريم يلم فلوسة اللى برة بقدر المستطاع عشان فى اى وقت عاوز يفل على رأى اخوانا السعوديين يفل وبالتوفيق

[doha]

شفتي بقى ازاي ان الي تخاف منه ميجيش احسن منه

الحمد لله ان الحل طلع بسيط وميسور وان المشكلة الي كنتي فيها هي الي كانت مغطية عنك قد ايه حلها سهل بس بشويه هدوء وتركيز . .

بقولك كده عشان تدوري في اي مشكلة تانيه في حياتك ومضايقاكي وشايفه ان ملهاش حل او طريقها مسدود . . هتلاقيها برضه دائما نفس الحكايه الحل موجود بس ( الربكه ) هي الي مش مخليانا نعرف نفكر. .

مبروك على انتهاء الازمه وياريت متنسيش تطمنينا عليك وعلى اخبارك لما ترجعي مصر باذن الله ..

[زعلان]

الف مبروك وشكرا انك طمنتينا

[شروق وغروب]

تسلم محمد افندى وزعلان على المرور

وجزاكم الله كل خير للاطمئنان عليا

وتسلمى اختى على تواجدك معايا ونصيحتك الدائمه ليا

وجزاكى الله كل خير

واكيد اول ما انزل مصر هوصل دى اس ال عشان اعرف اكلمكم

وبجد جزاكم الله كل خير على النصيحه