ايهما افضل الامارات ام السعوديه ام مصر

[aif]

السلام عليكم

اخي احمد

انا شايف انك متخرج بقالك حوالي سنة ونص فقط

وبرغم كدة اشتغلت ... قد تكون الوظيفة مش مجزية .... لكنك بدأت و خدت مجال كويس ... الموارد البشرية مجال عمل ممتاز ... ودي خطوة جيدة

وانت لسة في بداية طريقك وحياتك

رأيي الشخصي .... ابقى في مصر ... انت لسة ما كافحتش في مصر عشان تيأس وتسافر

انا ليا رأي في مسألة الغربة والسفر ودايما بأقوله لما حد يسألني

...الرأي بإختصار : اللي يقدر يعيش في بلده .... يبقى بلاش يتغرب ..... وانا شايف انك لسة تعتبر بلا تجربة طويلة في مصر

الواسطة موجودة في كل مكان على وجه البسيطة

لكن

الواسطة بتزكي واحد عن واحد تاني .... لكن حتى لو عندك واسطة لازم يكون عندك خبرة وكفاءة ... مش مجرد ان اي حد عنده واسطة يبقى ح يشتغل بدون كفاءة ....إلا بعض .... واؤكد بعض الوسايط السوبر .... زي ابناء الوزراء القضاة والمسؤلين الكبار .. ودي شريحة صغيرة نسبيا

نصيحتي لك

استمر في مصر واصبر وابجث عن وظائف افضل وحاول الاهتمام بمهنتك في نفس الوقت ... انت محامي يعني ممكن يكون لك شغل تاني جنب وظيفتك ... وشغلك مع الوقت ح يعمللك دائرة اتصالات ومعارف ح يبقو رأسمالك بعد كدة في عملك .... لكن انك تسافر تشتغل امن في الامارات .... طب وبعدين .... ح تعمل ايه بعد كدة .... ح تفضل في الوظيفة دي و ح تخسر خبرتك ومجال عملك و تبقى عايش هناك لمجرد انك تعيش وتصرف على اسرتك

انا كل اقاربي المسافرين عندهم مشكلة واحدة دلوقت ... بعد ما اولادهم كبرو وهما كمان كبرو

ازاي ينزلو مصر .... ح يشتغل ايه

ح يعيش ازاي

اولاده ح يتأقلمو ازاي

ازاي ح يعيش في مستوي مش متعود علية

ازاي ممكن يعمل اي تجارة او بزنس وهو منعدم العلاقات في بلدة بعد ما شبابة راح هنااااك

ومعظمهم بيبقو خايفين من مصر ومرعوبين من العيشة فيها ....لأنهم يعرفوها بالسمع وبرامج البيت بيتك والعاشرة مساء و ما شابهها لكنه مضطر ينهي غربته ويعرجع مصر

معادلة صعبة ومعقدة

من الآخر كل شيء له ثمن

والغربة لها ثمن

حرام تتغرب .... ببلاش

[الباحث عن الرزق]

شكرا للاخ الفاضل

وانت بجد كلامك معقول وكمان انا مقتنع بيه بس هى المشكله ان المجال مش مفتوح فى مصر يعنى ان الواحد كمان يحصل على وظيفه حتى لو فى القطاع الخاص دى مشكله ولو وجدها كمان صعب انو يعمل اى حاجه فى حياته وحضرتك وجهة نظرك صحيحه وده انا مجربه فى اخوى 35 سنه وبقالو عشر سنين فى السعوديه وهو وجهه نظره زى جضرتك

بس انا ظروفى وظروف المعيشه فى مصر بقيه لا تحتمل ابدا وهى دى المشكله سنتين انا حتى ما ستفتش منها الا خبره فقط يعنى ماديا ابدا

وانا مشكلتى فى كده وانا مش عايز اقول العيب فيا ولا فى مصر ولا ولا

[أحمد سيف]

نصيحة أخويه

رغم ان الكفيل السعودى صديق له وللعائله وسبق انه جاء مصر اكثر من مره هو واسرته وكان بينزل فى شقتى كمان

انسى الكلام ده خالص ... اللي بينك وبين الكفيل هوا العقد وبس ... وهوا هايتعامل معاك على الأساس ده لما توصل هناك ... فماتسيبش شغلك وبلدك وتسافر إلا على حاجه مضمونه ومحترمه

انت دلوقتي جنب اهلك وشغال في شركة أجنبية و ليك برستيج وبتاخذ خبره وبتعمل علاقات وممكن في لحظه تلاقي شغل أحسن في مكان ثاني ... في الخليج بالوضع اللي انت بتقول عليه هاتخسر كل ده ومش هاتعرف تحوش فلوس ... أنا أخويا كان مدير موارد بشريه في الخليج ساب شغله ورجع مصر وبياخذ مرتب أعلى من اللي كان بياخذه هناك ... حاول انت بس تصبر لحد ما تاخذ دبلومه من الجامعة الأمريكية ولا خبره كام سنه وانت مرتبك ممكن يتضاعف عدة مرات

أنا والله شايف إن واحد بمؤهلاتك وخبراتك حرام يشتغل ضابط أمن (غفير يعني) ب 2000 درهم و 1000 درهم إضافي (مش فاهم يعني ايه ... بس مش مشكله)

أنا في الإمارات وعندنا حراس أمن مصريين كثير في المكان اللي أنا شغال فيه وباشوف البهدلة اللي هما عايشين فيها ولما قلت مره لواحد إماراتي زميلي إنه معاهم مؤهلات عليا ما كانش مصدّق وقالي ايه اللي يخلي واحد مؤهل عالي يشتغل حاجه زي دي.

أصبر يا أخي الكريم واتعب في بلدك وإن شاء الله ربنا هايكرمك في حاجه أحسن بكثير سواء في مصر أو بره.

[الباحث عن الرزق]

شكرا جزيلا اخى

على النصيحه الغاليه هذه وانت تنصح انى ادور على فرصه افضل حاليا لاى بلد عربى حتى لو مش فى مجالى

ولا مصر افضل علما بأن الكفيل السعودى حيحولى كفاله يعنى انا مش حشتغل عنده

[أحمد سيف]

شكرا جزيلا اخى

على النصيحه الغاليه هذه وانت تنصح انى ادور على فرصه افضل حاليا لاى بلد عربى حتى لو مش فى مجالى

ولا مصر افضل علما بأن الكفيل السعودى حيحولى كفاله يعنى انا مش حشتغل عنده

حكاية إن الكفيل السعودي هايحولك الكفالة دي حاجه في علم الغيب ... يعني ممكن ببساطه جدا لما توصل هناك يقولك مش ها أحول إلا لما تدفعلي مبلغ وقدره أو يفضل ماسك الكفاله ويقولك انزل شوفلك اي شغلانه غير قانونية وادفعلي كل شهر مبلغ معين ولو حاولت تشتكيه هايبلغ عنك هروب وتدخل في متاهه.

ما تروحش السعودية أو أي دوله خليجية إلا على شغل مضمون ... الأفضل طبعا يكون في مجالك بس مش مشكله لو اشتغلت في مجال ثاني له مستقبل (يعني مش حارس أمن) ... وابعد عن حكاية الكفيل الفردي لإنها نوع من الاستعباد المقنن. والأفضل إنك تفضل في مصر طالما بيتشتغل في مكان بيديك خبره ومعارف، بس لو كنت مصمم تروح السعودية خلي أخوك يعملك تأشيرة زياره وانزل هناك شوف الوضع ايه ولو لقيت شغل كويس خلي الكفيل ييجي يتعاقد معاك في مصر بالشروط المناسبه ليك، إنما ما تحطش نفسك تحت رحمة الكفيل من البدايه وتعشم نفسك إنك هاتلاقي الخير. الكلام ده ما بيحصلش.

تمنياتي لك بالتوفيق.

تم تعديل 27 مارس 2009 بواسطة أحمد سيف

[aif]

بس انا ظروفى وظروف المعيشه فى مصر بقيه لا تحتمل ابدا وهى دى المشكله سنتين انا حتى ما ستفتش منها الا خبره فقط يعنى ماديا ابدا

وانا مشكلتى فى كده وانا مش عايز اقول العيب فيا ولا فى مصر ولا ولا

ده الطبيعي .... اول سنوات شغلك مش ح تستفاد الا الخبرة في العمل والخبرة في الحياة والتعامل مع البشر

انا في بداية حياتي قعدت حوالي 4 سنوات باتمرن في مكتب محاسبة .... بدأت ب 80 جنيه .... وانتهيت ب 120 جنية في الشهر ... والعمل فترتين

يعني كان اهلي بيصرفو عليا عشان اقدر اكمل حق المواصلات

...

الصبر جميل

طالما انت حطيت رجلك على اول الطريق يبقى انت ماشي صح .... ممكن يكون ببطأ لكن في التجاه الصحيح

اسأل اخوك .... لو لقى فرصة محترمة انه ينزل مصر حيوافق ولا ح يرفض

بص لما هو ابعد من السنتين القادمين

بص لما تكون في عمر اخوك

ممكن تكون في نفس موقفه

وممكن تكون بقالك 12 سنة بتشتغل في مصر وعندك خبرة محترمة وعلاقات جيدة في مجالك وعايش في بلدك وسط اهلك وماحدش يقدر يقولك اتفضل اطلع بره البلد .... تفضل اية ؟؟؟؟؟؟

تم تعديل 27 مارس 2009 بواسطة aif

[الباحث عن الرزق]

وهل الزياره سهل انها تتعمل ولا زى نقل الكفاله يعنى ممكن تكون فى السعوديه معقده زى باقى اجراءتهم ولا من السهل انها تتعمل لانى مش عايز اتقل على اخوى ولو فى حاجه ممكن اعمها من مصر

[أحمد سيف]

والله ما عنديش معلومات عن تأشيرة الزياره للسعودية بس اللي اعرفه انها بتعتمد على أخوك بيشتغل فين وأيه ... ممكن تدخل على موقع وزارة الخارجية السعودية وتشوف أنواع التأشيرات وشروطها ... أو حد من اخوانا المقيمين في السعودية يساعدك

لكن مهما كانت الإجراءات صعبة ومعقده فهي أحسن من إنك تروح هناك من غير عقد عمل وتضع نفسك تحت رحمة كفيل سعودي.

قلّب شويه في باب المغتربين المصريين واقرأ حكايات اللي راحوا السعودية على ما يسمى "فيزا حره" - والأصح تسميتها "فيزا العبوديه"

[darroosh]

عليك تزود علمك ومهاراتك وتبقى شديد التعمق العلمي والعملي ف مجالك .......

ووقتها مهما كان مجالك ومهما كان مكانك هتتقدر كويس وهتشتغل كويس وهتعيش كويس ...

[الباحث عن الرزق]

اخوانى لم اقفل باب المناقشه

فياريت من لديه نصيحه او تجربه لا يبخل بها

ليس من اجلى فقط ولكن من اجل كل من يقراء تلك المناقشه

[محمد عيسى]

وانا باطمع فى عيشه افضل

انت كده رديت على نفسك

اذا كان هدفك عيشه افضل .. فالحاجات اللي بتقول عليها لحد دلوقتي مش كده

عايز رأيي و انا يمكن اكبر منك بعشر سنين .. طور نفسك في مصر علمياً و وظيفياً .. و اصبر شويه .. و ان شاء الله تنول

تم تعديل 27 مارس 2009 بواسطة محمد عيسى

[MoHaMMeD EgYpT]

بخصوص مصر مرتب 600 جنيه و الله فعلا ما يكفيش لكن هتعمل ايه ما باليد حيلة و بدام الشغل في الخليج مش مضمون يبقي احسن لك تفضل في مصر لان صعب تجي تشتغل حارس امن و مع حضرتك مؤاهلات و المصيبة لو حضرتك اشتغلت حارس امن هتعمل ايه يعني يدوبك برضه هتعيش اليوم بيومه و مش هتقدر تحوش فلوس و هتبقي اعذرني في الكلمة دي لكن هتبقي في وضع مش تمام تخيل حارس امن انا عن نفسي ما اعرفش الاحوال في الامارات او السعودية لكن السعودية كل يوم بقراء ان بيحصل فيها مصايب اما الامارات بيقولوا الحياة نار هناك و انا عن نفسي في الكويت انا لسا طالب و جاي علي كفالة والدتي هنا لانها بتشتغل مدرسة تبع وزارة التربية و التعليم الكويتية يعني تبع الحكومة انا بصراحة ما اعرفش باقي احوال الخليج لكن الكويت تقدر تقول بلد معقولة لو انت لوحدك لكن المصيبة الشغل فين لازم هنا تشتري اقامة عمل و بعد كده تحولها و تشتغل في اي حتة مثلا في مطعم او محل موبيلات او محلات او اي حتة و المراتبات هنا بتبقي في حدود 100 - 150 دينار و اكتر بس انت في الاول مش هتلاقي اكتر من المرتبات دي و ساعات بتبقي بالسكن و ساعات ممكن تسكن مع ناس و بتدفع في حدود مثلا 25 دينار و الاكل قول برده 25 دينار يبقي هتقدر تحوش لك في حدود 50 - 100 دينار يعني بالمصري في 1000 - 2000 جنيه و يمكن اقل الله اعلم و هتشتغل مثلا في مطعم او جمعية تعاونية او سوبر ماركت او قهوة او اي حتة تانية بس بصراحة هيبقي شغل مش تمام في الاول بس بصراحة اهوه شغل انظف من حارس امن و الكويت بلد معقولة يعني انا بصراحة ما سمعتش عن مشاكل مع الكفيل هنا في الكويت

انا والله مش عارف انصحك و اقولك ايه لكن اهوه ده حال الدنيا و اذا كان ولا بد تسافر جرب اماكن تانية هو مافيش غير الخليج ماهو فيه اوروبا مثلا لكن ازاي بصراحة ما اعرفش لكن جرب تتدور علي اماكن تانية للسفر مش شرط الخليج بس برده الخليج بصراحة الفلوس فيه كويسة لكن مهما قاعدت و تعبت هنا مش هتاخد اي جنسية خليجية لكن اهوه بتلاقي ناس بتتكلم عربي لكن برده اوروبا هتشتغل نفس الشغل ده و في الاخر هتاخد جنسية اوروبية و بعد كده اهوه وضعك هيتحسن شوية لكن بصراحة انا مش عارف انصح حضرتك و اقولك ايه لان بجد ظروف حضرتك صعبة لكن حاول تضبط نفسك في الكمبيوتر و الانجليزي يعني انا مثلا لو كنت معايا اقامة ينفع اشتغل بيها كان زماني بشتغل في محلات كمبيوتر او حاجة تبع الكمبيوتر معا اني مش معايا شهادات لكني بجد حريف كمبيوتر و انجليزي و اهوه فعلا فادوني فحضرتك كمان حاول تضبط نفسك في الكمبيوتر و الانجليزي . و الكمبيوتر مثلا انا مش متاكد لكن بيقولوا ان تخصص الشبكات ده مطلوب جدا و تخصصات تانية فحاول حضرتك تضبط نفسك في الكمبيوتر و ان شاء الله هتلاقي حل لمشلتك العويصة دي والله انا ابتديت اخاف علي مستقبلي من دلوقتي حضرتك تعرف انا عندي كام 17 سنة والله ربنا يكون في عونك بصراحة انا عارف احوال مصر انا اخر مرة كنت فيها من سنتين والله انا خالي جالنا مرتين في خلال السنتين دول و حكالنا ان الاحوال و الاسعار بقت نار و كل حاجة بقت مضروبة بجد والله ربنا يكون في عونك بس حاول حضرتك ما تحبس نفسك في قفص الخليج يعني في مناطق تانية كتير و اتعب و دور و ان شاء الله اخرة تعبك خير بس برده الخليج ارحم من فقر مصر يعني في الخليج حتي لو عايش اليوم بيومه برده هتحس بفرق يعني اكل نظيف و الناس حوليك بتصلي و حاجات كتيرة مختلفة عن مصر لكن يمكن يكون فيه خليجين معاملتهم زيالة مع المصريين لكن مش كلهم و انا عاشرتهم تقريبا سنيتن و لو انت محترم و كويس معاهم هتاخد عنيهم اما لو انت مصلحجي زي ما بيقولوا يبقي استحمل اللي هتشوفه منهم لكن زي ما قولت مش كلهم كويسين فيه ناس معاملتهم زبالة مع المصريين

[MoHaMMeD EgYpT]

وانا باطمع فى عيشه افضل

انت كده رديت على نفسك

اذا كان هدفك عيشه افضل .. فالحاجات اللي بتقول عليها لحد دلوقتي مش كده

عايز رأيي و انا يمكن اكبر منك بعشر سنين .. طور نفسك في مصر علمياً و وظيفياً .. و اصبر شويه .. و ان شاء الله تنول

تمام لازم يطور نفسه علميا و وظيفيا لكن مش شرط في مصر

[الباحث عن الرزق]

شكرا جزيلا

ولكن انتو بتسألو وتجابو على نفسكو

يعنى ال600 متنفعش تعيش بيها فى مصر حياه كريمه وفى نفس الوقت اطور نفسى ازاى مش عارف وانت متخيل ان ضغط الحياه فى مصر يخلى الواحد يطور نفسوا

دا انا يا محترم كنت مقدم على دبلومه قانون عمل عشان اطور نفسى فى شغلى وللاسف ممتحنتش

ولو شأت الظروف ان امتحنها كان زمانى بحضر الماجشتير

وواحد تأنى بيقول ان الحياه فى الخليج ارحم

بس اقعد فى مصر ؟

انا بجد عايز افاده

[MoHaMMeD EgYpT]

شكرا جزيلا

ولكن انتو بتسألو وتجابو على نفسكو

يعنى ال600 متنفعش تعيش بيها فى مصر حياه كريمه وفى نفس الوقت اطور نفسى ازاى مش عارف وانت متخيل ان ضغط الحياه فى مصر يخلى الواحد يطور نفسوا

دا انا يا محترم كنت مقدم على دبلومه قانون عمل عشان اطور نفسى فى شغلى وللاسف ممتحنتش

ولو شأت الظروف ان امتحنها كان زمانى بحضر الماجشتير

وواحد تأنى بيقول ان الحياه فى الخليج ارحم

بس اقعد فى مصر ؟

انا بجد عايز افاده

والله انا مش عارف اقولك ايه انا حكيت لك علي ظروف الكويت اللي انا فيها و بصراحة مش عارف اقولك لك ايه اكتر من كده ده مستقبلك و حضرتك ادري بيه من اي حد بصراحة جو مصر ما يخليش الواحد يطور نفسه لكن ما باليد حلية هي دي الحياة هتعمل ايه يعني

تم تعديل 27 مارس 2009 بواسطة MoHaMMeD EgYpT

[الباحث عن الرزق]

اخوانى انا موضوعى موضوع مصير يا جماعه ايه الحل المارات (امن )مش ينفع

السعوديه حالها زى الزفت

مصر اه اه اه

وخبرتى مش كفايه اى اعيش فى الخليج

وانا فى نفس الوقت انسان يعنى مش عشان ابهدل نفسى

ولكن الحياه فى مصر ولا انا ممكن اعيش عيشه كريمه يعنى اليوم بيومه وانا مش مجوز انا بفكر بعد الجواز

ممكن يحصل ايه والخليج نفس الحكايه طيب ايه السبب

مستوى مؤهلى ؟

خبرتى ؟

مهنتى ؟

سنى ؟

ولا ايه.............................................................................

................. ايه السبب وايه الحل

[الباحث عن الرزق]

والله انا على قد ما مضايق على الى انا فيه ولكن سعيد جدا على سعه صدوركم

وادعو من الله ان يجعله فى ميزان حسناتكم

[MoHaMMeD EgYpT]

اخوانى انا موضوعى موضوع مصير يا جماعه ايه الحل المارات (امن )مش ينفع

السعوديه حالها زى الزفت

مصر اه اه اه

وخبرتى مش كفايه اى اعيش فى الخليج

وانا فى نفس الوقت انسان يعنى مش عشان ابهدل نفسى

ولكن الحياه فى مصر ولا انا ممكن اعيش عيشه كريمه يعنى اليوم بيومه وانا مش مجوز انا بفكر بعد الجواز

ممكن يحصل ايه والخليج نفس الحكايه طيب ايه السبب

مستوى مؤهلى ؟

خبرتى ؟

مهنتى ؟

سنى ؟

ولا ايه.............................................................................

................. ايه السبب وايه الحل

والله مش عارف اقول لحضرتك ايه ؟؟ حضرتك بتسال عن السبب السبب انك مصري و حكومتك بتهينك قبل الغريب ما يهينك

و الحل ؟؟

الله اعلم

انا عارف انه ده مصير و علشان كده مش قادر اقول كلمة خايف اقولك روح الخليج في الاخر تندم و برده خايف اقولك تفضل في مصر برده تندم

في انتظار باقي ردود الاعضاء و ان شاء الله حد يقدر يفيدك

[الباحث عن الرزق]

اتمنى من الله الافاده

ثم اعضاء هذا المنتدى الاكثر من رائع

[MoHaMMeD EgYpT]

اتمنى من الله الافاده

ثم اعضاء هذا المنتدى الاكثر من رائع

استخر ربنا و صلي و اللي فيه الخير ان شاء الله ربنا هيقدمهولك و الحكاية دي ارزاق و محدش عارف رزقه فين