سنة أولى ارتباط

[crossfield]

الفترة الأولى من أى ارتباط(خطوبة أو زواج) بيبقى ليها طبيعة خاصة بمعنى ان كل واحد لسه بيستكشف و بحذر الطرف التانى و ممكن حد من الطرفين يبقى متحفظ شويتين بحكم ان العلاقة لسة جديدة فيفضل انه ميتكلمش فى تفاصيل حياته الشخصية(خلافات عائلية أو ما شابه)؛أنا شايفة ان كده أحسن لأن مش معنى اتنين ارتبطوا ان كل واحد لازم يعرف كل كبيرة و صغيرة عن الطرف التانى؛بمعنى ان برضو بيبقى فيه شوية خصوصية لحد ما يحصل و يتجوزوا وساعتها ممكن الواحد يتفك شوية و يتكلم بقى فى أوضاع عائلية مكنش حقه قبل كده انه يتكلم فيها و لو انى شايفة انه كل ما لا يخصنى أنا بشكل محدد و شخصى و مباشر مش من حق الطرف التانى انه يعرفه؛و الا ايه؟؟؟؟؟

-من ناحية تانية ممكن تحصل صدامات او

مشاكل أوسوء تفاهمنتيجة ان الطرفين لسه بيستكشفوا بعض زى ما قلت

الىآخر هذه الأسباب المنطقية المعروفة للكل .طبعاً لازم تحصل مشاكل

طيب ايه الحل؟ ازاى نتفاداها أصلاً؟

بما ان أغلبية أعضاء المنتدى "الناشطين يعنى" متزوجين ؛يا ريت تفيدونى أنا و الغلابة اللى زيى .فترة الخطوبة دى كان شكلها ايه؟

وش واحدة لسه مخطوبة جديد لانج وحاطة ايدها على راسها و عمالة تعدد و تقول"أنا اللى جبت ده كله لنفسى"

يا خوفى لأدوبهم اتنين . :lol:

[Farida]

الف مبروك يا كروس و ربنا يتمم بخير انا عندى بقه شويه نصايح خدى عندك :

1- أولا لازم تعرفى ان الزواج مهم لكل رجل و امرأه و العلاقه الناجحه بينهم هى التى تقوم على احترام كل منهم للأخر فأهم حاجه تحافظى على احترامك له و على احترامه لكى يعنى تعرفيه انك عارفه حقوقك كويس و توضحى له ما تتقبليه و ما لا تتقبليه من الول و تحاولى تعرفى منه ايه اللى بيضايقه

2- فترة الخطوبه فترة جميله و ياريت ما تقضيهاش كلها خروجات و فسح بس أهم حاجه انك تتعرفى فيها على زوج المستقبل و عيلته و تتحاولى تتاقلمى معه فما فيش مانع من شوية اختبارات على خفيف يعنى شوفيه مثلا بخيل و لا حريص و لا كريم لما بيجى لك زيارة بيجيب معاه ايه بالضبط و لو عزمك بره حا يعزمك فين و هكذا يعنى

3- لما تقلقى من تفكيره فى بعض الأمور مثل موافقته على عملك او طريقه تربيه الولاد و درجه تدينه و درجة تزمته و درجه ثقافته و غيره خدى رايه فيها على انها حصلت لناس قرايبك و اعرفى هو بيفكر ازاى و حاولى تقربى من وجهات النظر بينكم يعنى ما ترفضيش كل حاجه و فى نفس الوقت ما تقبليش كل حاجه

4- لا يوجد انسان كامل و فيه كلمه جميله سمعتها زمان و هى ان من لم تتزوج هى امرأه قد بالغت فى تقدير نفسها فاعلمى انك ايضا لست كامله و بالتالى بلاش رفض التصرفات و لكن احاول اشوف انا اقدر اتحمل ايه و ما اتحملش ايه و اللى ما اقدرش اتحمله اوضحه للطرف التانى دوغرى كده

5- اهم ميزة فى اى رجل هى قدرته على تحمل المسئوليه و شعورك معه بالامان مش مهم الشكل قوى و مش مهم درجه الثقافه العامه قوى لأن الراجل دلوقتى بيبقى مشغول بلقمه العيش اكتر من اى حاجه فى الزمن الصعب ده بس اهم حاجه انه يحترم ثقافتك و مش عيب ان يكون فيه اختلافات بين الأزواج فده يثرى الحوار بينهم يعنى مش لازم الإهتمامات تبقى واحده لكن مهم كل واحد يحترم اهتمامات الأخر و يبقى فيه كلام و مناقشات

6- اعرفى انك بتتزوجى عائله يعنى لازم تتعرفى كويس على جدود و اعمام و عمات ولادك فلازم تقربى من عائلته و تتعرفى على التعاملات بينهم و بين بعض و لو ليكى ملاحظات قوليها و خدى رايه فيها ما تكتميش حاجه جواكى و نفس الكلام يحصل لعائلتك يعنى قربيه منهم و حاولى تتعرفى على اصدقائه من بعيد و افتحى مجالات حوار معاه و شويه شويه خليكى انت صديقته الوحيده يعنى فى الخباثه كده طلعى القطط الفاطسه فى اصحابه اللى مش نازلين لك من زور

7- حاولوا تتفقوا على كل الأمور الماديه من اولها من شبكه و مهر و لو فيه قايمه و لا لأ و لو فيه فرح و لا لأ احسن الخلافات فى الأخر و المفاجات بتبقى وحشه قوى

و اولا و اخيرا صلى دايما صلاة استخارة و ادعى الدعاء ده " ربنا هب لنا من ازواجنا و ذرياتنا قرة اعين و اجعلنا للمتقين اماما "

و كفايه عليكى كده انا طولت قوى

[فــيــروز]

مبروك يا كروسايه الف مبروك معلش مش عندى خبرات مفيده لكى بس قلت آجى ابارك و اهنى يا زينب يا بنت خالتى

[Lighthouse]

مليون مبروك

وربنا يوفقك وتعيشي في سعادة وسرور

وعقبال الجميع يارب

[DARWEEN]

ولولولولولولولولوليييييييييييييييييييييييي

دا الراجل الطورطاتي أتهرى شغل النهارده

أحمدك يارب أدي واحده خلصنا منها

وعقبالك ياللي في بالي ...( وأنتي عارفه نفسك )

مليون مبروك ياكروسايه وربنا يتمم لك بكل خير ويجعله لك خير زوج الذي يتقي الله فيكي ويرزقك بالذريه الصالحه

فتحي لي ودانك بقى وأسمعي ...

فترة الخطوبه أحلى فترات العمر فعلا وممكن تستمر معاكي باقي عمرك المديد بأذن الله ... بس المهم

1) فترة الخطوبه هي فترة تعارف بين أتنين قرروا يكملوا الحياه مع بعض بس الناس بتتعرف على بعض واحده واحده يعني بالراحه وبهدوء كل واحد منكم حيعرف التاني مفيش داعي للأستعجال

2) زي ماست العاقلين فريده قالتلك مهم جدا تعرفي العيله كويس ... تعرفيهم وتحبيهم وتخليهم يحبوكي

3) لازم ولابد وحتما حيكون فيه أختلاف ولو بسيط في الطباع والعادات بس الشطاره في أمتصاص هذه الخلافات (إذا لم تكن أخلاقيه أو جوهريه أو خطيره ) ولازم تطوعي الخلافات ماتخليهاش هي محور علاقتكم

4) مع الوقت وصدقيني حتلاقي أنكم أقرب لبعض من أهلكم أنتم الأتنين

وربنا يارب يوفقك ويكرمك بحياه سعيده

وأحب أسمع رأي سعادتك في حنفي بعد كده ... ناس مابتجيش الا بالعين الحمرا

(وش واحد شمتان )

[se_ Elsyed]

 

وش واحدة لسه مخطوبة جديد لانج وحاطة ايدها على راسها و عمالة تعدد و تقول"أنا اللى جبت ده كله لنفسى"

يا خوفى لأدوبهم اتنين . :lol:

أنا بقى مش هأشارك فى الموضوع ده وهأعمل إضراب وإعتصام قدام باب شئون المحاورات لأنك خبيتي علينا أخبار حلوه زي دي ... وأنا حاسس كده ان فيه زمايل لنا فى المنتدى بيتعامول معانا بمبدأ " في أحزانكم مدعية وفي أفراحكم منسية " لذلك فالإضراب هايستمر 5 أيام بدون أكل ( حواوشي ) .

[Farah]

الف مبروك وربنا يبارك في هذا الزواج

الحقيقه الاخت Farida قالت كل مايمكن ان يقال بعقل وحكمه وخبره

ولكني حبيت ان ابارك واشارك

و لو انى شايفة انه كل ما لا يخصنى أنا بشكل محدد و شخصى و مباشر مش من حق الطرف التانى انه يعرفه؛و الا ايه؟؟؟؟؟

:lol:

الزواج ليس شخص لشخص ولكنه عائله لعائله عن طريق شخصين

فترة الخطوبه للتعارف وانا اراي ان مفيش احسن من الصراحه

في بداية معرفتي بزوجي انا صريحه جدا كل حاجه بقولها عمري ما تكسفت من حاجه عن اهلي او عن حاجه موجوده بي كتاب مفتوح لدرجة ان انا باتمتع بالصراحه عمري ما اتكسفت من شي

علي العكس كان زوجي كتوم جدا ولذالك قابلتنى بعض المتاعب

في البدايه ومعي الاستمرار زوجي الان معي اكثر صراحه مني

اجمل شي في الوجود واجمل من الحب نفسه ان يكون شريك حياتك هو صديقك الاول وانتي صديقته

بتاخذ وقت ولكن اذا وضعت في الحسبان سوف تتم هذه الصداقه

وتاتي من الاستماع بانتباه وعدم السرعه في الرد ؛؛التماس الاعذار للطرف الاخر؛؛في هذه الفتره الطرف الاخر لايفكر بنفس الاسلوب ولكن مع شي من التغير سوف يتفاهم ذو الافكار المختلفه

لاتتوقعي انك سوف تغيره بعد الزواج فلم تسطيعي ان تغيري افكاره او يغير افكارك في يوم وليله ولكن مع العشره والتفاهم يتنازل الطرفين عن بعض من الطباع التي تضايق الاخر ؛؛ولذلك الفتي نظره ان اخطآ بس متقافيش علي الغلطه ؛؛عدي الحاجات البسيطه ؛؛

اخذفي كلمة انا حتغير لو هو اتغير ؛؛

افهمي ظروفه الماديه

وشركيه في افكاره وفي حياته و اللي تقدري عليه بس لاتخنقيه بحجة المشاركه ؛؛لا تكوني سلبيه في الرد (يعني اعمل اللي انت عاوزه) قولي رآيك وتذكري ان رائيك ليس بالضروره ان يكون صح كل مره ؛؛

عندما يكون عنده نقد علي احد افراد عائلتك لا تدافعي علي الصح والغلط ؛؛؛اسمعي واذا كان صح لا تدافعي فاعلى الاقل اسكتي

هذه النقطه كانت تسبب لي بعض من المشاكل اول ما تيجى سيرة اهلي اكون متحفزه جاهزه علي الرد مش مهم هو صح او غلط

ولكن الحمد لله اسيقظت مبكرا الى هذا العيب والان نناقش اي نقد في العائلتين بروح رياضيه وده بيسهل كثير في التعامل

ده كل اللي انا فكاره بالاضافه للي قاله DARWEEN و Farida

ويارب يوفقك

[بنت شعنونة]

مبرووووووووووووووووووووووووووك يا فندددددددمة

لولولولولولوولوللللللللللليييييييي

عم دارويين

وسي السيد

وخطووووووووبة

احمممممددددددك ياااااااارب

مبرووووووووووووووووك الفين مبرووووووك

فين العزومة والشربااااااات يا امييييييي

اتاااااااريكي مختفية

ماشي يا عمممممم

من لقى احبابة نسى اصحااااااااااابة

ماشي ماششششششششي

"وش واحدا عاملة مفروسة وازازة الشربات ورا ضهرها ليها لوحدهااااااا"

[Lancelot]

ألف ألف ألف مليون مليار مبروووووووووووك يا كروساية ....

و ربنا يتمم بخير (مش بيقولوا كده برضه) ...

و بالنسبة للإفادة .... فأنا بكل فخر أفهم في الإرتباط أكتر شوية مما تفهمي أنتي في الهيروغليفية ... فأي سؤال أو أي حاجة أنا مش موجوووووووووود خالص .... "وش واحد هيخرج بره الموضوع" ...

[impossible]

مبروك والف مليون مبروك وعقبال البكارى

لووووووووووووى

استشارة كدة مجانى فى النص

وعدم السرعه في الرد

فيا خصلة طفولى اووووووووى ونفسى اابطلهاااااا اللماظة

لسانى اااااااااد كدة (بس مع الاصحاب اوى بس)غير كدة انا خجولة وبتكسف اتكلم

[crossfield]

ربنا يبارك فيكم كلكم يا رب

فريدة و أبو الدراوين و فرح اليوم متشكرة جداً لاهتمامكم و نصايحكم

أبو السيييييييييييييييد

ازاى فى الفرح منسية؟ما أنا أول ما دخلت المنتدى أهو جيت و قلت و حكيت.بس بصراحة اتكسفت أقولها كده على الملأ فى موضوع خاص ؛يعنى انت عايز الناس يقولوا عليا ايه؟ ما صدقت؟ :lol: ثم زى ما قلت قبل كده الموضوع جديد لانج.

وعموماً أنا لا شوفت منك لا حواوشى و لا غيره

و مع ذلك أنا هاطلع جدعة برضو و آآآآآآآآآآدى الشربات و الله يا شيخ ما أنت كاسف ايدى ...لااااااااااا زم تشرب :lol:

بس بجد بلاش اضراب دلوقتى لاحسن أخوكو مزنووووووووووق.

فيروز و" نوارة البيت" و شعنونة

عقبالكم جميعاً يا رب و حقك فى الشربات محفوظ ياللى فى بالى ؛ما تخافيش مفيش سوبيا :lol:

لانس

أمشى فى جوازتك يا رب :lol:

وش واحدة هتطق مووت من لانس بعد ما استغل فرصة غيابها و بقى فى المودراشين تيم :mad:

[Lancelot]

لانس 

أمشى فى جوازتك يا رب

وش واحدة هتطق مووت من لانس بعد ما استغل فرصة غيابها و بقى فى المودراشين تيم

ربنا يخليك يا رب ... بس ما تعرفيش عروسة كويسة ... بس تكون باربي .... شقراء و عينيها خضرا ... و بنت ناس و معاها فلوس ... و أهم حاجة ترضي بيا .... "وش واحد بينقل إعلان جواز من الجرنال"

عقلي الباطن (مع الإعتذار لحشيش) :

مش عجباني "أمشي في جوازتك" دي ... كروس رجعت و هتتعبني تاني و تعملي مشاكل .... عدي لها المرة دي ... أهي لسه مخطوبة ... و هي أول واحدة قالت لي "عقبال ما نشوفك في الموديريشن" ...

[se_ Elsyed]

هأنذا أعود بعد فترة إعتصام وإضراب عن هذا الموضوع لمدة 5 أيام .

شوفي يا كروساية يا بنتي ، لن أستطيع أن أضيف أكثر من الكلام الدرر الذي قاله أخواننا خاصة فريده ودراوين وفرح اليوم

ولكن أحب أضيف نصيحة صغيرة وهي أن في فترة الخطبة لابد للطرفين ان يكونا صادقين مع انفسهم وجادين فى هذا الموضوع بمعنى أن الواحد ما يبصش للخطوبة على انها تجربة واهو لو نفعت نكمل الجواز ولو لأ يبقى ماحصلش حاجة .... لأن فى موضوع زي كده الواحد لازم يتوكل على الله وتكون نيته خير وبالتأكيد سوف يجد الأمور تمشي بسهولة ، ولابد أن تتوافر حسن النية لكلا الأطراف .. يعني بالبلدي مش علشان الطرف التاني أنا لسه ماعرفوش يبقى لازم أخد احتياطاتي منه وأكتفه وأثقل كاهله بأعباء لا طاقة له بها زي قائمة العفش والمهر والمؤخر المبالغ فيه فكل هذا لابد أن يكون فى حدود المعقول ...

لأن للأسف فيه ناس كتير بتعمل كده وحجتها انها بتأمن مستقبل البنت ... فهل بالله عليكم يتم تأمين المستقبل بالمسائل المادية .

وقبل كل شيء يا كروساية يابنتي تذكري دائماً " لا خاب من أستشار ولا ضل من أستخار "

س س مأذون منطقة مصر الجديدة والكيت كات .

[crossfield]

عقلي الباطن (مع الإعتذار لحشيش) :

و هي أول واحدة قالت لي "عقبال ما نشوفك في الموديريشن" ...

كويس انك لسه فاكر

وش واحدة رخمةةةةةةةةةةةةةةةةةةةةةة

أبو السيييييييد

أنا مش قصدى ماديات خاااااالص

أنا قصدى يعنى لو النية كويسة و خالصة لوجه الله الواحد ازاى يتجنب المشاكل اللى بتحصل فى الفترة الأولى دى نتيجة "الهنطشة"؛من "هنطش" أى "لخبط" أو "عك".

وش واحدة سوابق.

يا ريت تدلى بدلوك بالمعنى ده.

ايه اللى يتقال و ايه اللى ميتقالش؟

هل كل ما يخص الأهل مثلاً المفروض انه يتحكى؟و الا برضو فيه خصوصية؟ كده يعنى.

[optimistic]

الف مبروك يا ست البنات

و لو انها متأخرة

و ربنا يسعدك

نصيحتي المتواضعة

أحبيه و اكرمي أهله و اشعريه انه اهم ما في حياتك

و تعلمي متى تتكلمين و متى تصمتين

وربنا يوفق

[se_ Elsyed]

كروساية كتبت

ازاى يتجنب المشاكل اللى بتحصل فى الفترة الأولى دى نتيجة "الهنطشة"؛من "هنطش" أى "لخبط" أو "عك".

يا عزيزتي كروساية كلنا بشر وكلنا خطائون بمعنى أنك لن تجدي إنساناً كاملاً كذلك انت من هؤلاء البشر .... يعني الواحد يرتبط بالتاني وهو عارف أنه له مميزات وله عيوب .....وما اعتقدتش أن واحد لسه في فترة الخطوبة وتلاقيه يتعمد أنه يلخبط او يعك ، وما قد تعتبريه عكاً ممكن يكون عفوي منه او غير مقصود ، فأهم حاجة انك ماتحاوليش تألفي سيناريوهات وتعطي الأمور أكثر من حجمها أو بمعنى أخر تُحملي الأمور أكثر مما تحتمل ...

على سبيل المثال مثلاً فرضنا أتصل مره بيكي بالتليفون وبعد ماخلصتوا كلام نسي يقولك سلميلي على ماما ... ماتجيش أنت تقعدي مع نفسك وتقولي آه ده ماقلش سلمي على ماما يبقى أكيد بيكرهها .. آيوه آيوه ده هايشتغلي فى فيلم الحموات الفاتنات .. كده يعني ..

هل كل ما يخص الأهل مثلاً المفروض انه يتحكى؟و الا برضو فيه خصوصية؟ كده يعنى.

لأ طبعاً يعني مثلا ً أبن خالتي طلق مراته من سنتين علشان خلافات معينه ... أمسك أنا ودن الراجل وأقعد احكيله على حاجات ضررها أكتر من نفعها وهو نفسه لا ناقة ولا جمل له فى الموضوع ... فبالتأكيد فيه خصوصيات وهناك حدود للكلام ...

وكما ناديت من قبل ونصحت أبنتنا الغالية شعنونة أن الذكاء الأجتماعي مطلوب .. بمعنى وزن الأمور وأعرف أمتى أسكت وأمتى اتكلم ولما اتكلم أتكلم في أيه .....

مثال تاني .. مثل أي أسرة فى الدنيا بابا كان بيمر بأزمة مالية من عدة سنوات وأستلفنا من ناس كتير وبيعنا العربية وكانت حالتنا وحشه ... أجي انا أقول لخطيبي أسكت يا عويس مش أحنا من كام سنة حصلنا كذا وكذا .. بس أحنا الحمد لله فله دلوقتي وعال العال ..... الراجل طبعاً هايكش والهلاوس هاتلعب فى مخه ... وده ليه علشان حكاوي القهاوي وحاجات مالهاش لازمه ... صح ولا لأ ؟

[crossfield]

مبروك والف مليون مبروك وعقبال البكارى

لووووووووووووى

استشارة كدة مجانى فى النص

وعدم السرعه في الرد

فيا خصلة طفولى اووووووووى ونفسى اابطلهاااااا اللماظة

لسانى اااااااااد كدة (بس مع الاصحاب اوى بس)غير كدة انا خجولة وبتكسف اتكلم

الله يبارك فيكى يا امبوسيبول و عقبالك يا رب.

نصيحتى ليكى ؛عليكى بسد الحنك(وش واح حلوانى)

السكوووووووووت فعلاً من ذهب و كله هييجى بالتمرين.

أخ متفائل:

ربنا يبارك فيك يا رب و عقبالك (و الا عقبال أنجالك؟)

و فعلاً العلاقة بالأهل مهمة جداً علشان العلاقة تبقى ناجحة و الحمد لله مفيش مشاكل فى النقطة دى.

أبو السيد :

متشكر يا زعيم يا صاحى انت يا مخربش ...حولللللللللللللللللللل(وش مرسى الزناتى).

[impossible]

نصيحتى ليكى ؛عليكى بسد الحنك(وش واح حلوانى)  

السكوووووووووت فعلاً من ذهب و كله هييجى بالتمرين

ايدى على كتفك

قوليلى الوصفة ياختى

وانا اجدع واحدة اخلى الطبيخ يشيط (وش مكااار)

[linux]

الف مبروك و ربنا يتمم بخير أن شاء الله ...

طب ها نقابل العريس أمتى؟

أن عندي دايما نصيحة واحدة في الحالات دى: الصراحة ... أبنوا كل حاجة على الصراحة و الأحترام المتبادل.

[Salwa]

انا اول مرة اشوف الموضوع ده ؟؟؟

مبروك ياكروس ياحبيبتى ...الف مبروك وربنا يتمم بخير ...وعقبال كل البنات ..

ورغم اننا سبق لنا واتكلمنا عن الموضوع ده ...والاخوة اعطوكى نصائح

جميلة .....انا بقولك ....

اوعى تنسى ابدا ...ان فترة الخطبة هى فترة اختبار .....يعنى مفيهاش غش ..

ومن ناحية انك تحكى له تاريخ العائلة ......فخير الامور ماقل ودل ....وبس ممكن يعرف اخبار سطحية ...

ودائما لازم تعرفى ......انك فى فترة الخطبة .....معاه ...

لكنك لست ممتزجة به ..

بيتهيألى معرفتش اوضح قصدى ؟؟؟

اكتبلك قصة قصيرة اشرح لك احسن ؟؟؟

يعنى هو طبعا اكيد عارف والدك وعارفكم ....وبناء على هذا قرر الارتباط بك ....طبعا بعد ما عجبتيه ....

مفيش داعى بقى لوجع الدماغ باخبار وحكاوى عن كل القبيلة ...وفعلا فترة الخطبة من احلى ايام حياتك .....ده لو عشتيها .....بعين مفتحة وعين مغمضة .....ماهو لازم كدة ....

وعلى رأى المثل ......فى النواحى المادية لازم كله يبقى واضح من الاول ...واللى اوله شرط آخره نور ......صح...؟

واهم حاجة يكون انسان كريم ويراعى الله فى كل شىء .....

وربنا يوفقك ياكروس ...وقولى لنا الفرح امتى ؟؟

سلامى.