انا اتنصب عليا يا جدعان

[ابو محمد المصري]

امبارح وانا قاعد اضرب اخماس في اسداس واحنا اخر الشهر والحاله مقشفره علي الاخر وناشفه نشفان ريق واحد في الصحرا بقاله يومين رن حرس التليفون وجت لي رساله من شركه (مبروك ) ونصها مبروك انت ربحت شيك رقم 586454 الرجاء الاتصال علي 00359881540038 لقيت الدنيا لفت بيا وريقي بقي عامل زي بحيره قارون لما فاضت وغرقت ال8 قري اللي حواليها وطبعا النصاب لازمه طماع وانا كنت ابو الطمع كله المهم مطولش عليكم رحت فارد دراعاتي الاتنين ومتصل رد علي صوت اخر حنيه والبدايه كانت اخر تنويم اسمك طلع من بحث عشوائي وحظك من السما وعايزين شويه بيانات طبعا بؤبؤ عيني بقي وسع فنجان الشاي ورديت زي الحلاوه وبعد كده عندك حساب مصرفي رديت لا هو انا لاقي اكل طيب اقرب بنك لحضرتك ايه رديت البنك السعودي الامريكي رد علي الصوت الحنين هل تحمل جواز امريكي او جرين كارت قلت لا طبعا رد الصوت ابو الحنيه طيب عايزين اسم اتنين من معارفك يكون ليهم في التجاره قلت والله مفيش المهم كلمه من هنا ورد اخر ادب مني طبعا تم انهاء المكالمه ولقيت المكلمه استمرت حوالي 5 دقايق خسر فيهم البيه الطماع اللي هو انا 25 ريال يعني لاطلت بلح الشام ولا عنب اليمن وخسرت فلوسي زي الباشا وعليه قلت احذر اخوانا من النصابين الجدد والقانون لايحمي الطماعين بش عايز اقول النص الحقيقي عشان هو عيب قوي في حقي والمعني في بطن الشاعر

خت حته قفا لسه مسمع لغايه دلوقتي ومن قوه القفا الدنيا كلها نور وعامله زي فلاش الكاميرا

[وهيج الجبيل]

تعيش وتاخد غيرها يابرنس ربنا يعوض عليك فى ال 25 ريال

انا اعرف واحد اتخصم منة 45 ريال طبعا انت ارحم شوى

[ابو محمد المصري]

اللي حارق دمي ورافع ضغطي ال25 ريال حاسس انهم طالعين بالدم

انا عارف ان ورا كل نصاب طماع وانا كنت لقمه بالبغاشه واستاهل اللي يجري لي امال اللي حط كام الف او مليون مع بتوع توظيف الاموال بتبقي حالته ايه عموما الظاهر دعوتي عليهم هتستجاب المطره غرقت الدنيا وان شاء الله يغرقوا معاها هما وال25 ريال

[se_ Elsyed]

مواضيع واضحه ومتكررة وعامله زي الحدوتة بتاعت كل يوم ... وناس عماله تحذر " حاسب لا تتعك .. حاسب لا يتنصب عليك "

ومع ذلك كل يقع ناس في الفخ

ما سألتش نفسك يار يس .. تكسب ليه وعشان إيه وإزاي ؟

وحتى لو كان فيها تحويل ملايين الزلاليط ( عُمله بولندا إسمها الزلوط البولندي .. وممكن يكون الناس دول من بولندا :blush2: :blush2: ) فيا ترى يا هل ترى ما سمعتش عنا حاجه إسمها غسيل الأموال وإن لو جدلاً إفترضنا إن الناس دي يشعروا أن الفلوس وراها حاجه وعايزين يتخلصوا منها .. فيا ترى يا هل ترى ما حسبتش إن ممكن فجاة يتقبض عليك وتتسأل : من إين لك هذا ؟ وعلى ما تجاوب تكون إترزعت لك حكم معتبر ؟ لإن العملية دي بالذات عليها قيود والدول كلها بتتعاون لمنع غسيل الأموال اللي يعتب رالمصدر الأول لتمويل الإرهاب ..

وما سمعتش عن إن ويسترن يونيون عندها قاعدة بيانات وأي حد بتشُك فيه بيحول أو بيتلقى أموال أوتوماتيك بيتبلغ عنه لماما أمريكا عشان يتظبط ؟

وهل تعلم إن المؤامرة التي دبرتها ليبيا منذ عدة سنوات لإغيتال يالملك عبد الله - كان ولي عهد ساعتها - اللي إكتشفها موظف بفرع صغير في بنك الراجحي بمكه لما لقى واحد ليبي جاي يعمل عُمرة ومتحول له مليون دولار وصاحبنا إتعكش وقر بكل حاجه ؟

إذا ً نحن ناس مثقفة وعيب يحصل فينا كده ..

اتفهم إن الواحد يتنصب عليه في شقة أو في أرض إشتراها أو سيارة أو تجارة بشكل عام .. وكلها حاجات عادي ممكن يحصل فيها نصب ..

إنما فلوس من غير تعب ؟!!!!!

وإيميلات طول اليوم عماله تيجي من عيال أفارقة نصابين مغفلين عن إنه إبن وزير وحصل شقلباظات في بلدهم وأبوح عنده ملايين وعايز واحد مغفل تاني يحول له الفلوس اللي بالكوم دي ومن فضلك اعمل معروف إبعت رقم حسابك في بنك ناصر .. ولما تبعت رقم حسابك يقولك : قشطة .. كده بس البنك هنا محتاج شوية فكة رسوم التحويل .. حاجه قد 100 أو 500 دولار .. ودي ملايين يا معلم .. وهوووب لما الواحد يحول لهم الفلوس .. فص ملح وداب

[ابو محمد المصري]

والله عارف كل ده ولكن معرفش ليه الطمع غطي علي كل تفكيري

انا معترف اني اخطأت ومعترف اني انضحك عليا ومعترف اني طمعت

بس عايزين الصراحه حسبي الله ونعم الوكيل فال25 ريال حارقين دمي وبقيت زي بتوع البوشي والريان وكل ضحايا توظيف الاموال ربنا كرمني وقدرت اهرب من كل دول لكن برضه بقيت ضحيه

[شاب مصري]

لقد فقعنا في الوخ :blush2:

[قلب ابيض]

لقد فقعنا في الوخ :lol:

هههههههههههههههههههههههههههههههههه

ههههههههههههههههههههههههههههههه

حلـــــــــــــــــــــــــــــــــــوه يا ابو محمد تعيش وتاخد غيرها

وحلوه يا شاب يامصرى لقد فقعنا بالوخ ههههههههه

خدوا دى بقى انا كمان فقعت بالوخ :lol:

اسمعوا:

بما انى امرأه نتويه على قدى " نسبه الى استخدامى النت فى كافه شئونى " وبما انى صاحبه اكونت على الفيس بوك كحب استطلاع ومراقبة ابنائى عن قرب

لاقيت جروب ما بينادى لكل عملاء فودافون انه هناك شفره خاصه بفك مش عارفه ايه اللى هو بيخللى العميل يتكلم او يتحول له رصيد مفتوح ببلاش وطبعا اللى كاتب الموضوع ده حاطط فك الشفره ؟؟؟؟ :lol:

هااااااااااااااااااااااااااا؟ بتفكروا فى ايه دلوقتى ؟؟؟؟

أييييييييييييون هو ده اللى حصل :blush2:

تك تك تك ابعت يا أبو الآطماع واذا بى يا ساده يا كرام توصلنى مسج انه تم تحويل رصسدى كله للرقم اللى بعته " صاحب الشفره "

لوووووووووووووووووووووووووووووووول "على رأى ولادى "

واللى جه عليه بالضحك000000 بس وحياتكم اتصلت بالشركه وقلت لهم انى طمعت وخدت جزائى قالوا لى ده مش اول بلاغ وجارى تتبع اللى بيعمل كده

بس القانون لايحمى 0000مين؟؟؟ ايوه الطيبين

واعيش وماخدش غيرها :blush2:

[ابو محمد المصري]

والله العظيم اختي الفاضله قلب ابيض ياريت نعيش كلنا ومنخدش غيرها

اللي حارق دمي انا كنت عامل ابو علي وعمال نازل تريقه في كل واحد حد يتنصب عليه واقول احسن عشان البيه طماع والقانون لايحمي المفتحين طلعت مفتح قوي زيهم وطماع اكتر منهم

واحب اسمع اغنيه

واهي غلطه ومش هتعود

ولو ان النصاب موجود

[ابو محمد المصري]

اشكركم من كل قلبي المجروح الحزين

كرهت التليفون وكرهت صوت الرنين

كلامي كله جروح واهات وانين

ال25 ريال راحوا ومش راجعين

اتحط اسمي ويا الضحايا الطماعين

هبدوا فلوسي بصوت كله رقه وحنين

وبقيت ولا اجدع شاعر من بتوع الجرانين

باتغزل في القرشنات اللي راحت للنصابين

واااااااااااااااااااااااااااااااااااااااااااااه يا فلوسي

[قلب ابيض]

اشكركم من كل قلبي المجروح الحزين

كرهت التليفون وكرهت صوت الرنين

كلامي كله جروح واهات وانين

ال25 ريال راحوا ومش راجعين

اتحط اسمي ويا الضحايا الطماعين

هبدوا فلوسي بصوت كله رقه وحنين

وبقيت ولا اجدع شاعر من بتوع الجرانين

باتغزل في القرشنات اللي راحت للنصابين

واااااااااااااااااااااااااااااااااااااااااااااه يا فلوسي

على ايه بتنوح يا ابو محمد يامصرى

هى الدنيا كده لازم تاخد وتدى

ربك وخلقك 00ياتهد ياتبنى

بس نعمل ايه فى الطمع يابنى

كان نفسك تزود رصيدك عشان تختصر وتجرى

تعيش وتاخد غيرها 00واديله ادى

وعجبى :rolleyes: wst:: :lol:

[قلب ابيض]

على فكره هى جت معايا كده

والقافيه تحكم

وبالمناسبه احب اسمع واهديك أغنية انا اللى استاهل كل اللى يجرالى

تم تعديل 29 مارس 2009 بواسطة قلب ابيض

[شاب مصري]

اشكركم من كل قلبي المجروح الحزين

كرهت التليفون وكرهت صوت الرنين

كلامي كله جروح واهات وانين

ال25 ريال راحوا ومش راجعين

اتحط اسمي ويا الضحايا الطماعين

هبدوا فلوسي بصوت كله رقه وحنين

وبقيت ولا اجدع شاعر من بتوع الجرانين

باتغزل في القرشنات اللي راحت للنصابين

واااااااااااااااااااااااااااااااااااااااااااااه يا فلوسي

ايه المواهب دي

بس يا أبومحمد كشكشها متعرضهاش .. يا عمي خلي مبدئك في داهية الفلوس .. حب الفلوس اللي زيادة عن الحد بيعمل تعب نفسي صدقني

على فكرة .. انا اللي اتصلت بيك .. وشكرا على الـ25 ريال

على ايه بتنوح يا ابو محمد يامصرى

هى الدنيا كده لازم تاخد وتدى

ربك وخلقك 00ياتهد ياتبنى

بس نعمل ايه فى الطمع يابنى

كان نفسك تزود رصيدك عشان تختصر وتجرى

تعيش وتاخد غيرها 00واديله ادى

وعجبى :lol: :lol:

كلام في سرك انا اللي ورا النصباية دي :lol:

انا مسرّح كام واد تبعي في المواقع بتاعة الأخبار يكتبوا تعليقات على الخبر فيها النصباية الصغنونة دي .. وعلى الفيس بوك

جات في حضرتك بقى لا مؤاخزة

بس معلش الشباب لبعضيها والمليان يكب على الفاضي :lol:

ميرسي جدا يا فندم على الرصيد .. الحقيقة رصيد حضرتك فك زنقتي المادية .. ربنا يكرمك :lol:

تم تعديل 1 أبريل 2009 بواسطة عادل أبوزيد

[hazemtara]

الموضوع دة له أشكال كتيرة جداً اليومين دول وأخطرهم الرسائل الى بتيجى على الإيميل وتلاقى فيها قصة ولا أغرب من كدة خذ عندك مثلاً الى حصل معاية بس أنا ما خسرتش ولا قرش وللة الحمد.

واحد يُعد يحكى لك حكاية طويلة عريضة انك البنك فى بوركينافاسو أو جنوب أفريقيا إختارك انت دون عن الدنيا كلها علشان تفك وديعة رجل متوفى ورصيدة 10000000 شوية اصفار كتيرة طبعاص $ واانة إختارك لأنة واثق فيك وعارفك وهيكون لك نسبة 50% من المبلغ .

للأسف كتير من السعودين هنا وقعوا فى الفخ وإتنصب عليهم لدرجة انة الصحف هنا حذرت من دة رسمى .

أنا بريدى لا يكاد يخلو من هذة الرسائل كل يوم.

من القصص الظريفة الى حصلت معاية بردة ودة للتوعية وبس،، يجيك على الإيميل رسالة ولا أحلى من كدة بني أمورهة تبعت لك تقول لك أنا من جنوب السودان وتم تهجيرى لأفريقيا الوسطى بسبب الحرب وأبويا قتل وأخوية وأهلى كلهم.

وتبعت لك صور لبنت موزة وأبوها وأسرتها ، وتطلب منك أنك تساعدها بأى طريقة.

يعنى إبعت فلوس أو أى مساعدة أو خدنى برة لو ساكن فى أمريكا ولا إنجلترا وممكن أجى أعيش معاك لو عاوز يعنى جيرل فريند، طبعاً العبد لله مُدرب كويس على القصص دى بفضل أرد أخذ وأدى فى الكلام لما أعرف الفولة ولا فيها ،

بس والله أخر واحدة بعتت لى صور جميلة جداص معرفش دى لمين هى صادقة ولا إية ولا دة واحد راجل وبشتغلنى ودة أغلب الظن .

الطرقة التالتة عن طريق رسائل الجوال أنة تجيلك رسالة كدة على الجوال وتطلب منك الإتصال أو تسيب بياناتك وهكذا لأنك طبعاً كسبت مليون زورار أمريكى$. :blink:

المصيبة انة المُغفلين كتير بكل أسف.

[elfakhrany]

الدنيا دول يوم لك ويوم عليك .. الحياة تجارب والأنسان مبيتعلمش ببلاش... استفيد من تجارب الأخرين .. فكر بعقلك قبل أى قرار ..

[عادل أبوزيد]

محاورات المصريين تهيب بالجميع بذل الجهد للتحقق من مصداقية الإعلانات و التحلى بالحرص عند التعامل مع أى أشخاص على الإنترنت حيث أن فرص الإحتيال كثيرة على الإنترنت.

إذا تعرضت للإحتيال ندعوك لمخاطبة مركز مكافحة جرائم الإنترنت http://www.ic3.gov/complaint/default.aspx

يرى البعض أن تكرار التحذير شئ ممل و لكن من الجانب الآخر تزايد و تكرار الرسائل الإليكترونية يؤكد أنها مسألة مربحة للنصابين ، كما أن الأخبار التى نقرأها هنا فى مصر فى الصحف اليومية تجعلنا نشعر بإستغراب شديد من أن ناس من رجال الأعمال الناجحين و يقعون ضحايا عمليات نصب فى نظرنا ساذجة.

رجاء كل من يتلقى رسالة من هذا القبيل أن يقوم بالإبلاغ فى مركز مكافحة جرائم الإنترنت حيث يأخذون إجراءات تقنية و قانونية على مستوى عالمى لوضع حد لجرائم الإنترنت.

[ابو حودة]

انا بقى اتعلمت الدرس وقلت للي اتصل بيا ابعت الفلوس بعد ما تخصم الرسوم المقررة

انا كل يوم يجيلي ميل زي كده تقولش مفيش حد بيكسب في الدنيا الا الميل بتاعي

كما جالي ميل من موقع توظيف ان فيه شركات شافت السي في بتاعتي اللي انا حاططها على الموقع بتاعهم ومهتمين انهم يكملوا الاجراءات وعلشان ده يحصل لازم ابعت لهم 74 دولار قلت لهم اخصموها من اول مرتب

على فكرة قصة المبلغ اللي بيتخصم من الموبايل في مصر دايما ينزل اعلانه على موقع مصراوي وفيه تحذير كتير منه

[engineeer]

سؤال فقط للافاضل مشرفي المنتدي ...لاحظت وجود موضوعات قديمة جدا واخر الردود عليها تعود الي اعوام مضت بما يعني فقدانها لاهميتها مع تقدم الوقت فلماذا الاحتفاظ بها و لماذا لا يتم حذفها مادامت الردودو عليها توقفت من اعوام ؟؟؟ وجود مثل هذه المواضيع الميته تعطي انطباع بان المنتدي خامل و ساكن جدا وشكرا

[متعب]

شكرا على التنبيه

عموما فى صحتك