احلى خبر ..

[فــيــروز]

عندما تسلمت الجريده اليوميه من البائع اليوم لم ادر ما سر ابتسامته العريضه حتى قرات هذا الخبر الذى اعاد الى و اليه البسمه ..

تفتكروا ايه هو الخبر اللى ممكن نقراه فى الجرنال و يعيد الينا البسمه و السعاده !! يا ريت كل واحد يكتب الخبر اللى مستنيه .. مانشيت و تفاصيل ويا سلام لو صور كمان .. و ممكن نبقى نختار بعد كده اكثر خبر كتب و اعد باتقان فى استفتاء بسيط .. ايه رايكم؟ اقرا الحادثه ..

[Lighthouse]

موضوع جميل وفكرته هايلة

بس الصراحة الخبر اللى انا مستنياه واللى الجميع اكيد زيي مستنيينه ماينفعش اقوله هنا

لكن ح اجيب خبر وارجع

طبعا بعنوان وكله صح ؟؟

[سقراط المصري]

إيه الخبر اللي ممكن يجعلك مبتسم عزيزي الفيلسوف (متحطوش في دماغكم انا بكلم نفسي).

هو بصراحه ( بدأت أستخدم إفتتاحية يستخدمها الكذابين ) هو مش خبر معين اللي ممكن يبسطني حتى لو كان إقالة الوزاره او تغييرها او حل مجلس الشعب او حتى وفاة مبارك . كل هذه الأخبار لاتجعلني مبتسم . ويدخل فيها أيضا خبر إلغاء قانون الطوارىء. ليه يا فيلسوف ، اقولكم ليه ، لانها اخبار تندرج تحت احداث جاريه او وقتيه وليست جذريه لمصر.

شالو (ألدو او حطوا فريد) مش هتفرق كتير . وزاره مشت وجات غيرها برضه مش هتفرق كتير لان السياسه واحده.

هو فيه خبر واحد بس ممكن يخليني ابتسم بجد وهو:

خرجت مظاهرات جماعية في انحاء مختلفة من مصر تطالب بالإصلاح والديمقراطيه الحقيقيه للوطن.

تفاصيل الخبر:

في أنحاء متفرقة بالجمهورية ، خرجت جموع غفيره من المواطنين اليوم تطالب إقالة الحكومه فورا وتنازل الرئيس عن السلطه . وقد قاد هذه الحملة مواطنون عادييون وليس بينهم جماعات حزبيه او سياسية او إسلاميه ، بل إنطلقت هذه المظاهرات تحت وطىء تردي الاوضاع الإقتصاديه وتفشي الفساد في البلاد .

هذا وقد ذكر شهود العيان ان المظاهرات كانت سلميه ولم يحدث فيها اي شكل من انواع التخريب للبلد ، كما لم تسجل حالة سرقه او نهب اثناء المظاهرات.

وقد فشلت قوات الشرطة وكذلك قوات الجيش لصد وقمع هذه المظاهرات نظراً لان أعداد الجماهير الغفيره كانت بالملايين وتمثل كل طوائف الشعب .

وقد تناقلت وكلات الانباء العالميه خبر المظاهرات ، كما إمتلأت القاهرة والمحافظات بالمراسلين الأجانب لتسجيل هذا الحدث الفريد بمصر والذي لم يكن متوقعاً من المواطنين ، الأمر الذي سبب حرجاً شديداً لأجهزة المخابرات الأجنبية لعدم توقعها لمثل هذا الحدث الفريد.

واشارت إذاعة البي بي سي انه لم يحدث اي هجوم على السفارات الأجنبيه بمصر وان المظاهرات قد تم الإعداد لها بمستوى عالي من التنظيم والحنكه ، الأمر الذي جعل المراسلين الاجانب في حيرة من أمرهم على قدرة المصريين على تنظيم أنفسم وعدم الإنقسام عليها.

هذا وقد لاذت الحاشية الحاكمة وأعضاء المجالس المحليه والشعبيه بمبنى مجلس الشعب طلباً للحمايه.

هذه كانت أخر الانباء قبل مثول الصحيفة للطبع بدقائق، وسنوافيكم بأحدث التطورات الجارية ورددود الأفعال العربيه والأجنبية.

..........................................................

هذا هو الخبر الذي ممكن ان يجعلني مبتسما عند شراء الصحف ، لأني ببساطه شديده لا أصدق 95% من اخبار الصحف ، اما ال5% الباقية واللي هتسألوني عنها فانا اصدقها تماما لانها ببساطه تشتمل على صفحة الوفيات بجرائدنا الموقرة.

................................................

الفيلسوف المصري

[فــيــروز]

ممتاز .. الصراحه انا من اتقان الصياغه قربت اصدق فعلا ان الخبر حقيقى و بدات اتخيله .. حقيقى جميل .. اما اروح انقش لى خبر انا كمان قبل مثول الجريده للطبع

[سقراط المصري]

شكراً لك يا فيروز على مجاملتك الرقيقه.

سقراط المصري

[سقراط المصري]

فيروز فين الخبر بتاعك

يعني نطبع الجريده ولا نستنى شويه.

[فــيــروز]

الخبر ده كان فحوى قصه كنت بدات فى كتابتها لكنى غيرت فيه لدواعى امنيه و خليته على مستوى اقل .. اما تقروه هتفهموا قصدى ايه :)

فى حادث غريب اعتدى مجموعه من المواطنين بالامس على مواطن باحد اسواق القاهره .. وكان المواطن الذى يشبه الى حد كبير السيد رئيس الوزراء مارا بالسوق مع بعض اصدقائه حين ترامى الى سمعهم نقاش دائر بين مجموعه من تجار السوق فاقتربوا منهم لاستطلاع الامر فوجدو التجار يتبادلون النكات الساخره حول سياسة الحكومه .. فما كان من المواطن الا ان نصحهم بالحسنى ان يكفوا عما يفعلوه لتعارضه مع الدور الوطنى الذى يقوم به رئيس الوزراء لاصلاح البلاد ورفع مستوى حياة العباد .. فما كان من التجار الا ان انفجروا ضاحكين فى سخريه واطلقوا المزيد من النكات حتى اشتبه المواطن فى تعاطيهم للمخدرات فما كان منه الا ان ادعى انه رئيس الوزراء بالفعل وانه قد قرر النزول للاسواق للوقوف بنفسه على الاحوال الاقتصاديه للبلد قبل رفع تقريره للسيد الرئيس مما اثار غضب التجار الذين انهالوا عليه وعلى من معه بالضرب وكادوا يفتكون بهم لولا اظهار هؤلاء الاصدقاء لاسلحه ناريه كانت بحوزتهم !!

وقد احيل التجار الى مباحث امن الدوله بينما حول المواطن المذكور الى احدى المستشفيات الحكوميه الا انه ما لبث ان اختفى منها !! ولا يعلم احد الى اين اتجه ولا يزال الامر يكتنفه الغموض ..

سقراط .. امانه عليك لو اختفيت من المنتدى ابقى ابعت لامى قول لها ماتقلقش

[سقراط المصري]

الصحفية فيروز

روحي وانت مطمئنه ، العيش والحلاوه على حساب الجريده.

(شكل رئيس التحرير مستخبي تحت المكتب)

سقراط

[فــيــروز]

روحي وانت مطمئنه ، العيش والحلاوه على حساب الجريده.

طيب و كارت الموبيل؟ و اشتراك مجلة ميكى؟ ولازم تتاكدوا انهم بيوصلوا الاعداد لسجن القناطر ..

[سقراط المصري]

فيروز كتبت:

طيب و كارت الموبيل؟ و اشتراك مجلة ميكى؟ ولازم تتاكدوا انهم بيوصلوا الاعداد لسجن القناطر .. 

لا ماتقلقيش خالص من النواحي دي ، انا هقولك بقى الجريده هتعملك إيه ، اولاً هيكون في زنزانتك تليفون دولي وخط انترنت كمان ، وإلا هنزلهم شوية مقالات عن حقوق الإنسان والحيوان أحياناً ، وكمان هنجبلك مجلة تان تان وكل مجلات الأطفال الحلوه ماتخفيش ، يافيروز يا بنتي دخولك السجن هنعمله عيد قومي للمجله وهنستغله أحسن إستغلال ، وهنصورك كام صوره وانت الكلابشات في إيدك ونعرضهم تحت عنوان :

صحفيه صادقه أظهرت الحقيقه وكان جزائها السجن

واكيد الناس هتتعاطف معانا ، وطبعاً محسوبك لازم يستفيد من التعاطف ده ، فعلى طول هنحول سبقك الصحفي لبروتوكول يتضمن مباديء فكرة حزب جديد ، وطبعاً سجنك وتعاطف الشعب ، مع شوية مقالات تنزلهم الجريده عن الأنحرافات ، وخدي بالك المقالات دي هتكون نظام قص ولزق من شئون المحاورات ومن تحت هنخترع اسماء صحفيين كتبوا هذه المقالات ، طبعاً ده ممكن يزود فرص قبول الحزب.

وتقوليلي متنساش خط الموبيل ، دا انت طيبه قوي ، دا انا هخليك رئيسة حزب جديد.بس ابقى افتكرينا لما توصلي وتكبري كده .

( وش عبده مشتاق ، وفي الخلفيه على الحائط نجمة داود)

تحياتي ياريسه

سقراط

[فــيــروز]

خلاص عالبركه .. وعلى راى محمود عبد العزيز فى فيلم الكيف "ده فى الاوكيه" .. الخبر يعنى خلاص خد موافقه و تاشيره كمان وهادخل السجن بصدر منشرح ..

شوف لنا بقى خبر يدخلنا الوزراه

[se_ Elsyed]

أقرأ الخبر .. إقرأ الخبر ... الست اللي كلت دراع جوزها ... ومعانا كمان اخبار حلوه ... هايبنوا عاصمة جديدة لمصر بدل علبة السردين اللي أسمها القاهرة ... وهاينقلوا كل الوزارات والدوائر الحكومية فيها يا جدع .....

أيوه معانا مجلة البعكوكة .... أنا بتاع البعكوكة .

هذا وقد صرح سيادة الدكتور المحافظ الحلو رئيس الوزاراء / عاصف عبيد بإنه سوف يضرب بأيد الهون كل من تسول له نفسه لترويج هذه الإشاعات المغرضة وإن القاهرة الفاطمية هاتفضل عاصمة مصر المحروسة واللي مش عاجبه يشرب من مية الحنفية اللي كلها شوائب وتلوث.

" والأن نعيش مع إعلان شاكيرا بتاع البيبس "

[سقراط المصري]

سي السيد كتب:

" والأن نعيش مع إعلان شاكيرا بتاع البيبس "

والنبي ياعم يا بتاع البعكوكه ، ماعندكش حتة جبنه قديمة حادقه ربنا يخليك أصل انا نفسي فيها من زمااااااااااااااان (مقتبس من شعنونه).

سقراط