هل نحن المصريين شعب متعاونيين مع بعض

[Tarek_ml]

من ذا ينكر بأن شعب مصر من الشعوب القليلة التي تستطيع تحمل طعم الصبر المر في حلقها ومن ذا ينكر بأن الشعب المصري من الشعوب التي واجهت مصاعب لا يحتملها احد غير.قد تكون هذه الصفه العظيمة التي تميز شعب مصر من الصفات التي للأسف زادت احيانا وانقلبت لضدها ولكن هناك قطعا اشياء يكون الصبر عليها هو الحل الوحيد والاصعب والذي لا يطيقه الا شعب قوي مثل الشعب المصري

من ذا ينكر بأن شعب مصر شعب مرح .بجد الشعب المصري لدية قدرة عجيبة علي السخرية حتي في احلك الظروف تجده يضحك وتصدر منه النكات بتركيبات عجيبة حتي وهو يواجه الموت او الظلم او القسوة.

ولكن السؤال هل نحن شعب متعاون مع بعض ؟؟؟؟؟؟؟

مهما قلنا عن عيوب الشعب المصري فلن يجرؤ احد ان يقول بأن الشعب المصري نذل ومتخاذل عن مد يد المساعده من دون ان يطلب منه احد ذلك.

لكن مع بعضنا ..ومش تشاؤم.. الصفه دي في بجد بدات تتلاشي في كتييير من الناس .حتي القريه مش بقت فيها صفات الشهامه والرجوله والحاجات اللي انتوا بتشوفوها في الافلام العربي دي زي الاول بدأت تقل من الظروف اللي الناس بتمر بيها .

[Kareemt]

والله انت دست على جرج كبيييييير وحاسين بيه جدا فى الغربه !!!!!!!!

[masrawwwy]

كفانا ميزة .. قول الصادق المصدوق ..هم خير اجناد الارض

تم تعديل 30 مارس 2009 بواسطة masrawwwy

[جيمي]

لو كان الفقر رجلا لقتلته

ولو كان القهر رجلا ولو كلن الفساد رجلا ولو كان قانون الطوارء رجلا ..........

عاوز ايه من مواطن اتربى فى الظروف دى ..............عاوز ايه من دكتور ولا مهندس بيقبض ملاليم فى الشهر

عاوز ايه من مواطن مضطر يدفع اخوه من الميكروباص كل يوم علشان يلحق يروح الشغل

عاوز ايه من مواطن بدل مايشغل نفسه انو ينمى امكانياته بيشغل نفسه انه يلاقى واسطه علشان يلاقى شغل

عاوز ايه من شباب مسكين علشان يتجوز لازم يبقى مليونير

ايوه لازم نواجه نفسنا....... المصرى اتغير وظهرت جوانا شريحه استحاله كنا نلاقيها قبل كده والله ماكنت حتى بسمع عنها الا فى قصص الاشرار ونهاية الظالم وتمن الخيانه والحاجات دى ....وللاسف برده الشريحه دى بتتسع لدرجة ان فى ناس بقت بتتكلم عنها كانها حاله عامه ........

انا ليه تجارب برده مع مصرين هنا فى الغربه وشوفت بعينى حاجات اخجل من ذكرها ............. مش ناقصين سمعتنا تتلوث اكتر من كده

وانا بدعوكم ترجعو للموضوع ده بيناقش برده الحاله المؤسفه اللى ظهرت وسطينا وغطت على كل الحاجات الحلوه اللى العضو الفاضل طارق بيتكلم عنها......

http://www.egyptiantalks.org/invb/?showtopic=62916

[Kareemt]

انا ليه تجارب برده مع مصرين هنا فى الغربه وشوفت بعينى حاجات اخجل من ذكرها ............. مش ناقصين سمعتنا تتلوث اكتر من كده

كلنا وحياتك

[MoHaMMeD EgYpT]

والله عندك حق بس مش مفروض نعمم لان زي مافي حلو فيه وحش و بصراحة انا شفت ناس كويسة و بتساعد و خصوصا في الغربة و ناس تانية يكفيك شرها

[newcomer]

ولكن السؤال هل نحن شعب متعاون مع بعض ؟؟؟؟؟؟؟

لو سؤال للدردشة....كل واحد هايرد باللى شافه

( و للأسف طبعا .....غالبا هاتبقى الأجابة لأ.....لأن عندنا خبرة عظيمة فى جلد الذات)

لكن لو السؤال بشكل علمى.....

لازم يكون محدد اكتر .....80 مليووووووووووووووووون بنى ادم؟؟؟

حضرتك تقصد مين فيهم ....اللى فى الريف و لا المدن....

اللى بره و لا اللى جوه......

الصغير و لا الكبير.....المتربى و لا ********

المتعلم و لا الجاهل .............

لكن عموما اما هاجاوب حضرتك ....من باب الدردشة :)

اذا كان حضرتك تقصد ال team work فده عايزين فيه شوية مجهود

و بيتهيأ لى المنتخب ...ورانا مثل ...انه ممكن

لو حضرتك تقصد التعاون بشكل عام .....اقدر اجاوب "ايوه ...احنا متعاونين لحد كبير"

عارف حضرتك اشهر مثل على ده

الأختراع المصرى الصرف ...اللى اسمه "الجمعية"

انا اقصد الجمعية اللى مجموعة ناس بيتفقوا يدفعوا مبلغ كل شهر

و بيقبضوا الفلوس المجمعة دى لواحد واحد بالترتيب

و غالبا ...بتكون معموله ....علشان واحد عنده مشكلة مادية

و مش عايز يستلف.....و ده غالبا بيكون أول واحد بياخدها

طيب هاقولك على حاجة تانية لطيفة برضة بتحصل...

لو واحد عربيتة وقعت فى حفرة.........بتحصل :blink:

تلاقى شوية ناس ....ربنا يبارك لهم

اتجمعوا .....و ...واحد اتنين .....تلاتة .....و شالوا العربية

و طلعوك من زنقه ...ما يعلم بيها الا ربنا( اصلها حصلتلى :pasha: )

و بعدين ....يمشوا مش مستنين حتى كلمة شكر

على فكرة .....لو حضرتك بره مصر

ممكن تلاقى على اليوتيوب .....فيديوهات من دى كتير

اللى عايزة اقولة .....ان احنا ناس زى اى ناس

شعب زى اى شعب.......بلاش نبص لنفسنا و احنا واخدين احكام مسبقة

نبص لنفسنا بشوية انصاف ......لا مع .....و لا ضد

و علشان مابقاش باكذب.....انا مع :lol:

تقبل تحياتى

[MoTo]

من خلال تجاربي، فالمصريين -الناضجين منهم- نقدر نقسمهم في الموضوع ده لقسمين

قسم قادر علي الحياة إقتصادياَ و ميسور نسبياَ و قسم بيكافح و مكفي نفسه بالعافية و لكن مش محتاج لحد و مستورة .

مش هنتكلم عن طبقات الغني الفاحش أو الفقر المضقع عشان أكون موضوعي .

القسمين متعاونين جداَ إذا وجدوا أمامهم موقف حياة أو موت .. بمعني ..

إذا حدث حادث علي الطريق الدائري مثلاَ أو المحور في مصر .

بتلاقي الناس ركنت علي جنب علي طول و من وسط الزحام اللي كلم الإسعاف و اللي كلم البوليس

و الطبيب اللي بيظهر يساعد المصابين لحد ما الإسعاف تيجي .. و البسطاء اللي بيساعدوا بحاجات بسيطة

زي إنهم يزيحوا عربيات الحادث من نهر الطريق و يجيبوها علي جنب و يوسعوا الطريق لعربية الإسعاف .

اما في المواقف الحياتية البسيطة فا الموضوع يترتب علي الشخصية نفسها .

يعني إذا طلبت من حد يساعدك في مجال العمل مثلاَ .

الناس من القسم الأول -الميسورين- منهم من سيساعدك بشدة و إنكار للذات و ده ناتج عن ثقته بنفسه .

و منهم اللي هيعمل نفسه مش واخد باله خوفاَ من إنه يساعدك في حاجة تتفوق عليه فيها و تقلل من مركزه .

اما القسم التاني -المكافحين- غالباَ مش بيساعدوك إلا لو جايلهم من طرف حد بيعزوه أوي

و ده بيبقي تقدير للشخص ده مش ليك إنت طبعاَ .. و بيبقي علي طريقة "إنت ضيفنا و لازم نكرمك"

اما لو لا تمثل لهم أهمية فا غالباَ بتبقي مشاغل الحياة عندهم أهم .

نيجي بقي لحاجة مهمة جداَ و هي تعاون المصريين فيما بينهم في حياتهم الإجتماعية

الناس اللي متعرفش بعض و ماشية في الشارع سوا .. ماهو مستوي التعاون بينهم ؟ صفر

بص علي موقف ميكروباص .. محدش بيشوف مين جه الأول و يسيبه يركب .. لأ الميكروباص بييجي كله يهجم

مش مهم مين يقع تحت الرجلين .. مش مهم مين يتفعص ! مش مهم مين تعبان .

بص علي أسلوب قيادة المصريين .. انا و من بعدي الطوفان .. انا أعدي و مش مهم حد تاني يعدي .. أو يعيش !

يعني لو هقود سيارتي بطريقة تحققلي لذة شخصية و لكنها خطر علي حياة الأخرين علي الطريق .. مفيش مشاكل .

بص علي طوابير المصريين .. في الحقيقة مش بتلاقي أي ملمح من ملامح الطابور أصلاَ .. الناس بتعمل نفسها مش واخدة بالها و تخش من الجنب

و واحد مادد إيده لشباك الموظف رغم إن لسة قدامه إتنين تانيين .. و واحد جه دخل في أول الطابور بلطجة علي طول كدة .

بص علي لقاءات التليفزيون للمصريين في الشارع .. تطلب رأي من واحد تلاقي سبعة بيتكلموا في نفس الوقت .

و النتيجة طبعاَ إن ولا صوت فيهم بيوصل .

لذلك فالموضوع يختلف حول هدف التعاون و ماهيته، و شكراَ للموضوع .

[esocial]

:lol:

[بنت بلد]

:lol:

انا عن نفسى هتكلم كونى ربة منزل ففعلا عندك حق احنا ما بقيناش زى زمان

ايام والدتى وجدتىكان الجار بيخاف على جارة كان لو عنده مشكله او هم يؤرقه

لا يبحث فى حل له وحده لكنه كان يشرك جارة فيه لانه بيكون بعد المولى عز وجل خير معين له

وبلاش المشاكل والهموم هنروح بعيد ليه كانت المناسبات واولها شهر رمضان

كان اللى فى بيتتى لازم تشاركنى فى جارتى والعكس ايضا كنت ما اتكسفش انى اطلب

منها بصلايه ولا حبة ملح فى زنقة مطبخ دلوقتى لو طلبت هيسموها استغلال

فى الكلام ده دلوقتى ؟؟؟؟؟؟؟؟؟؟؟؟

انا متهيالى انى ما بشوفش جارتى دلوقتى الا فى المناسبات لو شوفتها كمان

يلا هو ايه ف الدنيا فضل على حاله

موضوعك قيم فعلا اخىطارق لمست نقطه دفينا جوانا كنا ابتدينا ننساها

تقبل مرورى

تحيـــــــــــــــــــاتى

[desert_eagle70]

هضيف وجهة نظرى البسيطة .. اه فى مننا كتير متعاونين مع بعض وخصوصاً وقت الأزمة وهو ده اللى يهمنى .. يعنى ميهمنيش انه يحضر الفرح بس يحضر الجنازة .. ميهمنيش انه يساعدنى فى شغل بس لو مريض هيقف جنبك .. انا عن نفسى شفت ناس بره مصر بجد ونعم التربية والشهامة والرجولة بعيد عن المصالح. يمكن مش عارف اقابلهم وجهاً لوجه دلوقتى بحكم الشغل والمسافة بس كل واحد فيهم ليه موقف محفور فى الذاكرة مش ممكن يتنسى.

من هنا بدعيلهم ربنا يوفقهم بكل موقف ساعدونى فيه وقت الشدة وإحنا خارج مصر.

[SoSo R]

لو تسمحوا لى أضيف وجهة نظرى...

أنا شايفة إن المصريين اللى فى مصر قلبهم على بعض أكتر من المصريين اللى فى الخليج أو أى دولة تانية

أنا نفسى شعرت بدة و المقارنة ما كنتش فى صالح الغربة بالمرة

المصريين للأسف بيفقدوا كل مشاعر المودة و الحب فى الغربة

و الأغلبية بيتجهوا لعقد المقارنات التى لا تنتهى بينهم و بين أى وافد جديد

و يبدأ يتطور الموضوع من حيث المقارنات فى الدخل و ظروف البداية إلى تمنى زوال النعمة و الغضب من أى تحسن ولو كان طفيف فى ظروف الوافد الجديد

و كأن اللى جه على وضع لازم يفضل على حاله طول العمر..مع إن دوام الحال من المحال!!

و أهم حاجة لما واحد ييجى يقولك النصيحة دى لوجه الله و أنا باقولك المعلومات دى عشان أفيدك..... تعرف علطول إن النصيحة مغلوطة كلها معلومات غلط

و إتقالت لغرض سىء فى نفسه

للأسف هو دة الحال فى الغربة دون كذب أو تجمل

ما حدش بيحب الخير لحد

ما حدش عايز يساعد حد

كل واحد باصص لرزق تانى مع إنه كله بتاع ربنا...

و اللى عايز منك خدمة يفضل محافظ على علاقته معاك لحد ما ياخد مصلحته و ما يعرفكش تانى

تحياتى

سوسورانى

[jamalpody]

و اللى عايز منك خدمة يفضل محافظ على علاقته معاك لحد ما ياخد مصلحته و ما يعرفكش تانى

مش عارف حاسس ان الكلام ده مظبوط يا جماعه من خلال تجربة 14 سنه خبرة قصدي غربة :ninja:

[الجدار]

(محاورات المصريين !!) لا حول ولا قوة إلا بالله

[elfakhrany]

أنا فى الغربة وبجد ياجماعة فى ناس كتير كويسة وناس رجالة زى ما فى الوحش والكويس فى كل مكان بس أهم شىء انك تعامل أى شخص وانت نيتك صافية حتى لو طلع مش كويس برضه انت خدت ثواب وابدأ بنفسك واحسن الظن بالأخرين ولا متسمعش كلام اللى يقولك ابعد عن المصريين من غير حتى ماتعرفهم لأأأ أعرفهم الأول وبعدين احكم..... والله الموفق

[Egypt]

اكثرنا من وضع مبررات لما يحدث فى مصر الان

السبب فساد الفئه الحاكمه فى مصر

ولكن للاسف فساد الحكومه ادى الى فساء المجتمع

نعم المجتمع الان فاسد بكل ماتحمله الكلمه من معنى

وماحدش يعمل ابوزيد الهلالى يقول بلاش تعميم

مجتمعنا المصرى فسد ويحتاج الى وقت طويل لاصلاح هذا الفساد

والله معانا

[الجدار]

اكثرنا من وضع مبررات لما يحدث فى مصر الان

السبب فساد الفئه الحاكمه فى مصر

ولكن للاسف فساد الحكومه ادى الى فساء المجتمع

نعم المجتمع الان فاسد بكل ماتحمله الكلمه من معنى

وماحدش يعمل ابوزيد الهلالى يقول بلاش تعميم

مجتمعنا المصرى فسد ويحتاج الى وقت طويل لاصلاح هذا الفساد

والله معانا

حبيبي كل إناء ينضح بما فيه

حتيجي وتقول مجتمع فاسد فالمجتمع كله هنا وناس كلها أفاضل ولو شوية وحشين مش حيبقى الكل وحش

لو سمحت خلي بالك من كلامك