ماهو الشىء اللى مش عاجبك فى مصر واذاي نغيره

[عنبو]

اولا السلام عليكم ورحمة الله وبركاته

انا عندى فكره ايه رايكم لما نكتب عن الاشياء اللى مش عجابنا فى مصر ولو حد عنده فكره نغيرها ازاى او لو كان مسؤال كان هيعمل ايه ياريت يقولنا ونناقش بعض فيها ؟؟؟

[عنبو]

متيجوا نبدا باهم حاجه وهى التعليم تعالوا نتكلم ونتتناقش عن التعليم الثانوى اللى هما عاوزين يطبقوه

[dawn walker]

نسبة الامية المرتفعة ...

[Abu Reem]

- الفســـــاد -

ومن أهم نتائجه ضعف المستوى المعيشي ،

مما يسهل ( أكل مال الحرام ) عن طريق الرشاوي ، وسرقة المال العام والخاص بكل الطرق لانعدام الضمير _

[عنبو]

ماشى ياجماعه كلامكم زى العسل بس عاوزين نكمل الحوار يعنى لو حضرتك كنت مسؤل كنت هتعمل ايه وانت دلوقتى ممكن تعمل ايه ؟؟

ده اللى انا اقصده ؟؟

[osmel33]

- الفســـــاد -

ومن أهم نتائجه ضعف المستوى المعيشي ،

مما يسهل ( أكل مال الحرام ) عن طريق الرشاوي ، وسرقة المال العام والخاص بكل الطرق لانعدام الضمير _

أنا موافق أبو ريم

الفساد مشكلة مصر الأساسية الفساد كل مشاكلنا فى تعليم وصحة واقتصاد وسياسة على رأسهم

السبب الأساسي فيها الفساد

والله أنا قولتها مرة لواحد معرفة أن الفساد فى مصر أكاد اشم ريحته

[dawn walker]

بالنسبة مثلا للامية

اصدر قرار اجرم فيه التسرب من التعليم .. واجيش الاعلام الوطنى لطرح المسألة بجدية ..واعتبر خفض نسبة الامية مسالة امن قومى ...واخلق حالة من التنافس بين المحافظات التى تقل فيه النسبة ...واعاقب المحافظات التى تفشل فى ذلك ...عن طريق تقليل الدعم الحكومى لها اذا فشلت فى تقليص نسبة الامية

يجب ان يتذكر الناس عن جيش حرب 67

ان معظم افراده كانوا من الاميين

[عنبو]

طيب لو حبينا نعمل نهضه فى التعليم نعمل ايه ؟؟ يعنى ايه هى المقترحات علشان مثلا نعمل نهضه فى التعليم الثانوى او اى مرحله والجامعى كمان علشان نخرج خريج يكون جاهز للشغل مباشرة

[ذهبية]

علشان نعمل نهضة فى التعليم اعتقد اننا لازم نغير فكرنا الاول

يعنى الطفل و هو ضغير لو جيت سالتة عايز تطلع اية يقولك لا مهندس لا دكتور لا ضابط تراث بناخدة من جيل الى جيل امتى المفاهيم دى هتتغير لو الناس كلها طلعت مهندس و دكتور فين باقى المهن

و بترسو فى الاخر انة بيقعد على مكتب حكومى يشرب الشاى و يروح بيتة بعد ما يكون دفع رشاوى الدنيا علشان يجيب الوظيفة دى اصلا يبقى هنتقدم ازاى

اولا ثلاث اربع المناهج اللى بيتعملها التلميذ فى المدرسة مجرد حشو ولا تصلح فى الحياة العملية

اول شىء هاعملة لو انا مسئولة انى هالغى المواد اللى مالها لزمة ومش هتفيد فى الحياة الواقعية هازود الجانب العملى فى المدرسة زى الهوايات و تعليم الحرف مثل السباكة و الميكانيكا و الكمبوتر والخياطة و غيرة

المصانع محتاجة عمالة مهرة متعلمين المشاريع التجارية قايمة على المهارة مع الخبرة لية ما يتاسس التلميذ فى دة من الاول حسب سوق العمل و احتياجاتة

لابد من يكون جانب عملى يقوم التلميذ نفسة بالوصول للمعلومة مش هيكون حشو كتب و حفظ و بس يعنى اخدة المصانع يشوف المكن امام عينة هادخلة المعامل يمسك المواد و يجرب بنفسة و يشوفامام عينة

هاهتم بالتعليم فى المرحلة الابتدائى لانة الاساس هاقلل كميات الكتب و المنهج و هاترك مساحة ان الاطفال تلعب لازم يعيشوا سنهم الان اطفالى ماعندهم وقت يعيشوا مرحلة الطفولة من كمية المنهج و الواجبات و ف الاخر يجى واحد جهبز يحد امتحان خارج المنهج تماما المدرسين نفسهم مش عارفين يحلوة

لية علشان اية ؟؟؟ دول مجرد اطفال لية تحطم نفسيتهم فى السن دة حرام الل بنشوفة فى تعليمنا بجد

لازم اشرك اولياء الامور فى اى قرار هاخدة و يكون لهم الكلمة العليا لان دول اولادهم مش هاخليهم مجرد مستمعين هاعمل استفتاء و اسمع اراء انزل بنفسى الفصول و اسال اولياء الامور اعمل جولة ميدانية

بين المدرسين و الطلاب استمع و اشوف بعينى و بعدها اقرر اية اللى مناسب حسب مجتمعنا و طروفة

[عنبو]

السلام عليكم ورحمة الله وبركاته

شكرا جدا لاخت ذهبيه بجد اارء ممتازه

وانا مع الراى ده وانا بجد نفسى يكون عندنا جدوله يعنى ايه ؟

ممكن نحسب احنا عاوزين كام مهندس وكام دكتور وكام مدرس وكام ....الخ وبعد ذالك نطلع دكتور بجد ونطلع مهندس بجد ونطلع ... الخ وعاوزين كام سباك وكام ميكانيكى ويبقى كله على اساس علمى ونعمل توازن بين جميع المهن يعنى تقريبا يكون الرواتب واحده هتلاقى مافيش اى مشكله يعنى اللى هيشتغل ميكانيكى مش هيزعل لان نظرة الناس له هتتغير وخصوصا لما يبقى مترتبله انه يطلع ميكانيكى او سباك يعنى يكون كل شىء مدروس بدقه عاليه

نيجى بقى لمعامل الابحاث ممكن نستفيد من فكرة الهند عملوا ايه لم يهتموا بالعدد واهتموا بالجوده يعنى ايه ؟ يعنى بدل لما يعملوا خمسين معمل نص نص لا عملوا معلمين تمام على احدث حاجه وبالتالى اشتغلوا صح وصرفوا على العلماء اللى عندهم وانتوا عارفين ان الهند دلوقتى الدوله الاولى فى الكمبيوتر

[pink rose]

في مبدأ بيقول عشان تكون المخرجات سليمة لازم المدخلات تكون مظبوطة

بمعني عشان تطلع طالب فاهم و واعي باللي حواليه و متماشي مع العصر لازم تديله من الاول المواد اللي توصله لكده

لكن احنا عندنا هات يا عم العيال دول جرب عليهم كل يوم نظام جديد و ما حدش بيلحق يعرف النظام اللي اتطبق دا طلع نتيجة شكلها ايه

لازم يكون في مبدأ و منهج واضح و ثابت في العملية التعليمية

لازم القائمين على التعليم يكون ليهم هدف محدد من التعليم دا مش مجرد انهم عاوزين يخرجوا ناس تعرف تقرا و تكتب

انا لو المسؤولة عن التعليم لازم احدد انا عاوزة ايه من الخريجين دول عاوزة اقوم بنهضة في البلد لان التعليم هو الاساس

انا مش عاوزة املى البلد دكاترة او مهندسين و في الاخر كله يطلع يقعد على القهاوي

1: المناهج كلها تتغير في مواد مملة و كئيبة و مالهاش لازمة و مش هاتفيد الطالب في حاجة و لا هاتفيد البلد بعد كده لانها مجرد حشووووووووووو دماغ كمان لازم الاهتمام باللغات يعني الطالب على الاقل لما يتخرج من الثانوي يكون عنده لغتين غير اللغة العربية بنفس الاجادة و كمان الكومبيوتر لازم الطالب يطلع من المرحلة الثانوية معاه icdl على الاقل

2: الاعتماد على الفهم و عمل ابحاث و تجارب فعلية يقوم بيها الطالب

3: تعاون المدرسة مع البيت في تقييم موهبة الطالب و البدء في تنميتها

4: هالغي تماما موضوع ان المجموع هو اللي يتحكم في دخول الكليات و ما فيش حاجه اسمها تنسيق يعني لازم الدراسة تكون برغبة الطالب

5: اقامة دورات تدريبية للمعلمين و كمان اختبارات نفسية و على اساسها نقول دا يبقى مدرس او لأ لان مش اي حد يتخرج من كلية تربية يصلح انه يكون مدرس

6: رواتب السادة المدرسين تكون اعلى الرواتب في مصر كلها منعا بقى للدروس الخصوصية و الرشاوي و الذي منه

7: الاهتمام بمباني المدارس و عمل ترميمات دورية ليها عشان الطالب يحس انه في مدرسة مش في كوم زبالة

8: الاهتمام بالمعامل و المكتبات و الملاعب و كل ما يخص الهوايات

9 : و دي اهم نقطة المعاملة الآدمية للطلاب في المدارس

النقاط اللي ذكرتها دي جزء من كل يعني لسا في حاجات كتير لازم نفكر فيها و نعملها عشان حال التعليم يتعدل في مصر

[herohero]

انا مقتنع ان احنا سبب مشكلة بلدنا يعني لو نقدر نغير الشعب لان مهما ماهنعمل مش هنعرف نصلح للاسف وصلنا لمرحله اداره الفساد مش فساد الاداره وبالتالي لو عملنا ايه برده البلد مش هتتعدل احنا اتاسسنا غلط البذره اترمت غلط لان تعليمنا محتاج تغيير عندنا شويه موروث شعبي يودي ف داهيه شويه افكار مصريه كارثيه انا بتهيئلي بالفهلوة والكسب السريع وشويه الميادئ اللي بقى عندنا لو جمعونا وحطونا ف قارة لوحدنا هنبوظها العيب فينا لازم نصلح نفسنا ونعاجل مشاكلنا او نستورد شعب بحكومه تانيه لان خلاص انا شايف ان البلد لازم تتهد وتتبني من الاول يمكن موضوع الحرايق الحالي شيئ رغم قساوته لكنه بيعمل البلد من الاول

وصدقني الحرايق الكتير ده بتفكرني بحريق القاهرة ويارب يكون فيه تغيير ولا ثورة احسن خلاص الواحد فاض بيه يا دجماعه البلد شاخت بقت عجوزة قوي ارحمونا ربنا يرحمكم خلاص زهقنا عاوزين تغيير دماء هو ده اللي محتاجينه غيروا الوشوش وش واحد من اول فتحت عيني ع الدنيا وانا شايفه حرام زهقت ده بيطلع لي ف النوم

[عنبو]

طيب حضرتك كلامك زى العسل بس هاجى و قولك ان مافيش فلوس علشان نعمل ده كله يبقى نعمل ايه ؟؟

ثانيا بالنسبه لدخول الطالب الكليات حضرتك بتقولى هنغلى التنسيق طيب ازاى هندخل الطالب طب ولا هندسه ولا تربيه ولا تجاره ولا الخ مهو احنا لو سيبنها مفتوحه هتلاقى كله دخل طب وهندسه الا اذا عملنا التعليم مش مجانى يعنى بفلوس ؟؟ وساعتها هيتحكم فى دخول الطلاب الفلوس الى معاه يدخل واللى مش معاه ميلزموش

طيب ايه رايك لو نعمل مناهج واللى ينجح فى المناهج دى يبقى هو ده فعلا اللى يستاهل يدخل التخصص اللى هو نجح فيه ويكون المناهج دى فعلا بتقيس قدرات الطالب بجد ؟؟؟ مش حشو دماغ ؟

[عنبو]

بالنسبه للاخ herohero اول انا عاز حضرتك على شعورك بس بجد احنا وصلنا لمرحله صعبه بس احب اقول لحضرتك لما انت تمل وانا امل وازهق امال البلد دى هتتغير ازاى يعنى انت ولا انا ولا اى حد بينتقد البلد احنا عملنا ايه علشان نتغير ولا اللى حوالينا يتغيروا لازم منملش وان شاء الله اللى جاى احسن بس احنا نؤمن بكده والناس يحس ان فيه خير هتلاقى الكل طلع الخير اللى جواه انا اعرف ناس طيبه بس بيخافوا يطلعوا الطيبه اللى جواهم لانهم حاسوا ان مافيش حد طيب فى الزمن ده ؟؟ ياريت تكون الفكره وصلت

[pink rose]

ما هو دا المقصود بتغيير المناهج

يعني ان يبقى لكلية طب مواد معينة اللي يجتاز الاختبار بتاعها اهلا بيه في كلية الطب و هكذا مع باقي الكليات

لكن تخيل ان طالبة تبقى جايبة 98% و طالع عينها طول السنة و في الاخر عشان المجموع تدخل طب بيطري او علوم و هي كانت امنية حياتها تدخل طب بشري

اختي انا كان نفسها تدخل فنون جميلة و عشان نص درجة ما تدخلش

حرام دا و لا حلال

هو دا اللي بيخلي الناس ما عندهاش ضمير لما تشتغل بعد كده

لان ميوله و رغبته خلاص اتكبتت للابد و مستقبله اتحول من اللي بيحلم بيه لحاجة تانية خالص

تفتكر لما يتخرج بقى من الكلية اللي اختارهاله التنسيق و المجموع و يشتغل هايشتغل بمضمير حي و يبقى سعيد باللي بيعمله و يحاول يطور نفسه فيه استحالة هايقول في نفسه ما خلااااااااااااااااااااااص كده كده راحت اعمل ليه و اتعب ليه

[احمد هادي]

نظام الحكم

وياريت حد يقولي نغيره ازاي :unsure: ::

[عنبو]

حضرتك مفهمتيش اقصدى انا اقصدى نضع مناهج جديده فعلا بجد نختار منها الى بجد هيطلع يضيف للطب هيطلع يضيف للتجاره لاى مجال مش يبقى الموضوع اكل عيش وخلاص يعنى لو واحد مثلا مجبش مجموع كلية الطب يبقى ده مش اللى احنا عاوزينه يدرس طب لان على حسب المناهج ده مش هيسلك فى الطب او هيكون دكتور مش شاطر لكن ناخد التانى اللى نجح ونصرف عليه علشان يطلع بجد دكتور ناجح طيب والاول اللى كان نفسه يدخل كلية طب ممكن يدخل بس يتعلم على حسابه دى الفكره نعمل حاجه قليله بس تكون على درجه عاليه وبعدين لما نعمل كده مش هتبقى فارقه بين كل الكليات لان الخريج اللى هيتخرج بجد هيكون موهوب فوق انه متعلم ده الفكره الراجل المناسب فى المكان المناسب لكن لو اقلنا كل واحد عاوز يدخل يدخل يبقى مصر كلها هتبقى دكاتره ومهندسين اكنر من الموجود

[Egypt]

اغير المجتمع باسره

لكن كيف

[عنبو]

وحضرتك بقى ياستاذ egypet عاوز تغير المجتمع ليه ؟؟؟

مهو الرسول قدوتنا ولما بعث الرسول صلى الله عليه وسلم كانوا الناس كلهم كفار وفيه فسق وفجور وزنا ولا ولا..... الخ

هل الرسول دعى ربنا ان يغير هؤلاء القوم ويجيبله ناس اخرين ؟؟

مافيش حد بيتولد وحش لكن الظروف هى اللى بتعمل الحلو و الوحش يعنى الناس مهما كانت وحشه اكيد جواه شىء حلو

[حسام يوسف]

مش عارف الموضوع طموح

ولا حالم

ربنا يديكوا الصحة وطولة العمر :lol: