مش كل الكليات تتدخل

[impossible]

بما ان احنا فى اجازة

وباب التعليم الاحوال فية نايمة على الاخر

هحط الموضوع مع انى مكنتش عايزة احطة

بعد لماا خرجت من عنق الزجاجة( ثانوية عامة) ودخلت الزجاجة ونسيونى جوة الزجاجة وقفلوهاااااااا

مكتب التنسيق حدفنى لكلية فى مدينة غير المدينة اللى انا ساكنة فيهاااااااااا

بدات الدراسة (وش متفائل)

اول يوم فى الدراسة ماما وصلتنى ومكنش فى حاجة فى الكلية وروحنا سواااا

تانى يوم كسلت اروح

متخافوش مش هطول عليكو اوى هدخل فى الموضوع اهه

تالت يوم بابا كان عايز يوصلنى بس قلتة لا انا لازم اعتمد بقى على نفسى(وش لبنى عبد العزيز فى فلم انا حرة)

كلام فى سركو كان نفسى اخلص من الخنقة دىبتاعة ايام سانوى ماما توصلنى الدرس واخويا يجبنى من برة وبابا وهوراجع من الشغل يعدى عليا وماماهات زمايلاى واخواتهم بيعملو نبطشيات علينا

المواصلات

نرجع لتالت يوم بابا خدنى يورينى المواصلات بس طلع الكلية مش على الخريطة وملهاااش موصلات غير القطر واغلب مواعيدة مش مناسبة

وطبعااا مستحيل يسيبونى اسوق كل يوم على طريق سريع من غير رخص

بقيت بركب مواصلتين رايح زيهم عودة

خمس ساعات فى اليوم مواصلات برجع البيت راسى عملة زى البيضة الاومليت

السكن

فى اكتشاف علمى مذهل اسمة المدينة الجامعية

الاختراع دة لتعليب السردين يعنى مش واحدة فى الاودة ولا اتنين ولا تلاتة ولا اربعةولا حتى خمسة

بيوت الطالبات شرحة

قعدت يوم فى بيت طالبات قعدت طول اليوم هناك اعيط زى الاطفااال انا عايزة ماما (مش عشان وحشونى لاسمح اللة لا عشان المكان هناك كان فزيع مقرف)

وطول اليوم بردة عمالة اقولها فى التليفون تحولنى اى كلية انا كان اية اللى حدفنى الحدفة السودة دى

كان تقريبااااااا فات من الدراسة 3 اسابيع وانا معرفش اية المواد بس كل يوم اروح واشترى شوية كتب

وامتحانت عملى بدات والدروس كمان وبخلص متاخر مينفعش اسافر

اخدت شقة برة

هبقى احكيلكو عن شقق الايجار دى بعدين

دى مواااااااااااال لوحدة

بس اللى عايزة اعرفة يعنى اللى حظة الاسود (النحس اياااة) يضطرة انة يدخل كلية كدة

يعمل اية يعنى

لا مواصلات مع ان المدينة دى بالعربية ساعة وربع بالكتييير

ولاسكن

ولا اى حاجة

[ragab2]

impossible

موضوع

شيق وواقعى وكلنا أذنا صاغية

أكملى

[فــيــروز]

من طلب العلاااااااااااااا سهر الليالى

فى الحقيقه انا لم ادخل كليه فى الاقاليم وكنت فى جامعة القاهره لكن اعز صديقاتى فى الكليه كانت تعيش فى المدينه الجامعيه وكانت بتعانى بشده من افتقاد الاهل و النصير بالاضافه لصعوبة الدراسه ولكنى كنت لا استطيع ان امنع نفسى من الاعجاب باصرارها و تحملها لهذه الصعاب من اجل تحقيق هدفها ..

شوفى يا بسبوسه .. النجاح بمشقه رغم انه يبدو فى بعض لحظات الياس غير ذى جدوى الا انه بعد انتهاء المشوار بنجاح ان شاء الله بيكون له طعم تانى خالص .. عشان كده هاقول لك معلش .. استحملى شويه و الايام بتمر بسرعه بس النتيجه ان شاء الله هتسعدك .. وفى انتظار باقى الاحداث :)

[crossfield]

الله يسامحك يا امبوسيبل

فكرتينى بأيام سودااااااااااا

أنا كمان كنت فى نفس ظروفك بالظبط

من مدينة جامعية مفيهاش مكان لحد عشان رحت متأخر

لبيوت طالبات الأوضة فيها سبع تمن بنات على الأقل

لعالم ضاربة قاعدة تبدل هدومها مع بعض و تحكى عن البوى فريند اللى مدوخها و لا فى دماغها مذاكرة ولا دياولو

لمعاملة غير آدمية من قبل الموظفات اللى فى الدار نفسها و لا كإنك فى عنبر مساجين

لأكل متعبى فى حاجة كده زى البراميل و اطباق فى الأرض و طوابير بنات واقفة مستنية الأكل و قدام البراميل قاعدين ستات فراشات (بتشديد الراء)يقطعوا اللحمة حتت بإيديهم لطوابير البنات اللى واقفة و أنا بعيد عنك واقفة مكسوووووووووفة فى آخر الطابور و لما ييجى دورى الدادة تقولى بمنتهى البساطة "مش انتى اللى لسة جاية امبارح؟"فأرد عليها و براءة الأطفال فى عينى "أيوه" فتقولى"لأ؛الجداد مالهمش أكل أول اسبوع"....وش واحدة من الصومال.

و اطلع اجرى من الكسوووووووف و الاحرااااااج على أوضتى و أنا عمالة أعيط و اتشحتف زى سعيد صالح فى مدرسة المشاغبين من الاهانة اللى اتعرضتلها على مرأى و مسمع من عشرات الطالبات و يتلموا البنات عليا و يقعدوا يحايلونى و همه فاكرين انى باعيط علشان جعانةو يعزموا عليا بإنى أنصص معاهم فى الأكل

وش واحدة جعانة بس كرامتها وجعاها

و أنا أبصلهم و أعييييييييييط و فجأة أعقد العزم و أقوم ألم شنطى و أطلب أهلى علشان ييجوا ياخدونى و يرسى بى الحال أن استقر عند أحد أقاربى طوال فترة الدراسة....وش واحد بلط

هو ده حال الطلبة المغتربين

يا يبقى ليكى حد من أهلك فى نفس المدينة

يا تستبيعى و تعيشى فى مدينة أو بيت طالبات و انتى و حظك بقى

يا تنتن يا تنتن. :?

[impossible]

د رجب فيروز كروساية

شكرااا لردودكم انا كنت فاكرة الموضوع هيكون سخيف

الحلقة اللى جاية ان شاء اللة مغامراااات البحث عن شقة

وش بيعيط ومقهووووورررررررر بجد مش كل لما الدراسة تقرب مش عارفة هسكن تانى ازاااااااااى

[se_ Elsyed]

الله يسامحكم انتوا الاتنين يا أيمبوسيبل ( صعب قوي الأسم ده بالعربي ) وانتِ كمان يا كروساية ... قريت الموضوع وفطست على نفسي من الضحك خاصة لما تخيلت منظر كروساية وهي واقفة فى الطابور مستنية التعيين ولما جه عليها الدور خدت بومبه، وطبعاً الموظفين بيدخلوا علي المكتب وأنا بأضحك ويقولوا س س أتهطل يا رجاله .

وانا متأكد أن المنتدى هايكون سبب رفدي من الشغل وهارجع مصر أعيط جنب ماما

بس عايزين رأيي فى الموضوع ده من الاخر اللي بعد الأخر ..... أنا ضد شحطت البنات وتغربهم فى مدن جامعية وبيوت طالبات ... إلخ .. لأن معظم النار من مستصغر الشرر ... وهي ليست موضوع عدم ثقة فى البنت ولكنه أسلوب وقائي فلقد أصبحنا فى زمن نخاف أشد الخوف على الولد فما بالنا بالبنت .... وعلى رأي المثل البنت فى الآخر مالهاش غير بيت جوزها ... فليه نتعب نفسنا وقلبنا يأكلنا عليها ونعذبها لمدة أربع سنين غير الدبلره ( لو ريحت سنة يعني ) .. فأنا عن نفسي على جثتي أن أختي أو بنتي تروح كلية فى محافظة تانية أو تقيم فى بيت طالبات .... دي تطير فيها رقاب.

سي السيد أحمد عبد الجواد ( يحي شاهين سابقاً )

[Farah]

.. فأنا عن نفسي على جثتي أن أختي أو بنتي تروح كلية فى محافظة تانية أو تقيم فى بيت طالبات .... دي تطير فيها رقاب. )

وبعدين معاك يا se_ Elsyedانت عارف ان البنات هنا بتسمع كلامك وبتعملك الف حساب وانا واحده منهم ،،،يعني impossible متكملش ولا تعمل ايه؟؟؟؟

[فــيــروز]

يا أيمبوسيبل ( صعب قوي الأسم ده بالعربي )

عشان كده باقول لها يا بسبوسه

[impossible]

انا نصى بيتفق معاك يا س.س

ونصى التانى بيقولى لا

ولا خليهم 3 وهبقى اقول لك نصى التالت بيقول اية بس فى الاخر

أنا ضد شحطت البنات وتغربهم فى مدن جامعية وبيوت طالبات ...

معظم النار من مستصغر الشرر ...

بتفق معاك مليون المية لانى شفت من دا كتييييييروعلى يدى

كان فى واحدة كانت زميلتى فى الفصل كانت ساكنة معايا فى الشقة بس كانت فى كلية تانية كانت قطة مغمضة زى حالاتى شوية شوية ومبقتش تحضر لا محاضرات ولا سكاشن وتخرج وترجع نص الليل وتسافر من ورااااا ماماتهاااا وتبات عند صحابهااااااا وحتى لما اهلها بيعرفو مكنتش بتسمع كلامهم

وافلااام من دى كتير

من طلب العلاااااااااااااا سهر الليالى

ومن سهر الليالى بات للعام التالى

اناقعدت فى بيت طالبات يومين يوم وبعدها بشهر كمان يوم

اليوم اللى قعدت فية رحت الصبح انا وماما دخلت الاودة لقيتهاااا عايزة شهريين عشان تنضف ولقيت بنات فى الاودة

اية دة مين دول دول هتقعدو معايا(وش مستحلف ليطفشهم بالجماجم والهيكل العظمى)

والاودة 3 سراير(مليانة حشرات مستوطنة) و3 كراسى و 3 دواليب

سبتهم ورحت الكلية رجعت لقيتهم نظفو الاودة وعمالين كمان ينضفو سمك ويقشرو توم عشان يتغدوااا كل دة من اول يووووم

حبيت اعمل شاطرة واوريهم ان محدش احسن من حد دخلت عملت كوباية شاى مع انى مبحبوش كنت هعمل حريقة بس واحدة انقذت المطبخ على اخر لحظة

اغلبهم اللى فى المدينة وبيت الطالبات ناس فى العبيطة على الاخر ودماغهم فى البلالة

كل اللى بيعملوه يطبخو ويرغو وينامو وياكلو

وكمان

نصى اللى مش موافق

انى معنى كدة ادخل اى كلية والسلام افضل ادرس اربع خمس سنين حاجة انا مش حاباهاااااا مش عايزاها يبقى اية لازمتة

قلتة احسن

دة بين بيتنا وبين الكلية 90 كيلو بسسسسسسسسسس

(منة للة قاسم امين كان زمانا قاعدين بالابتدائية ومتستتين فى البيت)

وبعدين انا مكنتش ناوية اقعد هناك طول سنين الدراسة

كنت ناوية احول

كلاكيت تانى مرة لو عديت فى امتحانات الدور التانى بالمادة اللى شايلهاااااااا (وش منحوس)هحول برضة

يا تااااااانى قولى ان شاء اللة impossible

تالت وش اللى قلتلكم علية فى الاول فاكرينة

رايح يذاكر ادعو لة

[فــيــروز]

فى الحقيقه رد سى السيد اثار فى نفسى شجون كثيره وماكنتش عاوزه اعلق على رده لانى مثل بسبوسه نص متفق معه ونص لا مش متفق .. ماتزعلش منى يا سي السيد انت مقامك كبير اوى عندى والله بس لا يدرك النار الا من يكابدها :)

المشكله كما قالت بسبوسه ان الانسان لا يستطيع ببساطه لو كان لديه طموح لدراسه معينه ان يضحى بحلمه .. بيكون عنده استعداد ان يفعل المستحيل ليحقق هذا الحلم لانه لو كان من الاصل انسان ليس لديه طموح لم يكن ليسافر و يترك اهله ويتشحطط و يتبهدل من اجل طموحه وماكانش بقى فيه مشكله اساسا .. لكن حيث اننا نتحدث عن ذوى الطموح سواء بنات او اولاد هنا تظهر المشكله او القرار الصعب

زمان كان ممكن فعلا نقول البنت مالهاش غير بيت جوزها لكن دلوقت الوضع اختلف تماما وبقت البنت حتى لو فى بيت زوجها ممكن تطالب -بفتح اللام- فجاه ان تشارك فى الانفاق على البيت او قد تترك زوجها او يتركها او قد يتوفى .. وبالتالى لابد ان تكون مسلحه جيدا بما يؤهلها لمواجهة هذه الظروف وهذا لن يتاتى لها اذا درست اى حاجه والسلام لمجرد يبقى معاها شهاده جامعيه .. انا رايى فى هذه الحاله تقعد فى البيت من الاول احسن و تترك هذا المكان فى الجامعه لغيرها يستفيد بيه احسن .. المشكله اننا حتى الآن فى بعض الاحيان ننظر لشهادة البنت ككماليات او حاجه ترفع بيها قيمتها الاجتماعيه عشان العريس مايحسش انه اتجوز بنت مش اد المقام او يخجل يقول لاصدقائه ان المدام ماعهاش غير الاعداديه مثلا .. هى دى المشكله فى رايى ..

ربنا يوفقك يا بسبوسه وتنجحى وتجيبى حته :)

آه نسيت اقول انا متفقه ليه مع سى السيد :) عشان مفيش حد مايحبش يريح الجمجمه و يكبر النافوخ :)

[Falcon Egypt]

السلام عليكم

و أنا بعيد عنك واقفة مكسوووووووووفة فى آخر الطابور و لما ييجى دورى الدادة تقولى بمنتهى البساطة "مش انتى اللى لسة جاية امبارح؟"فأرد عليها و براءة الأطفال فى عينى "أيوه" فتقولى"لأ؛الجداد مالهمش أكل أول اسبوع"....وش واحدة من الصومال.

و اطلع اجرى من الكسوووووووف و الاحرااااااج على أوضتى و أنا عمالة أعيط و اتشحتف

والله يا كروسفيلد انتى فعلا صعبتى عليا وضايقتينى جدا بهذا الموقف

السخيف. ده تصرف مش مضبوط من قبل الاداره كان ممكن يتم بشكل

اخر ولو بوضع يافطه داخل الميس موضح عليها انه لاتعيين للمستجدات

فى اول اسبوع بدلا من هذا الاحراج.

معلش ياعزيزتى كروسفيلد تعيشى وتاخدى غيرها.

[se_ Elsyed]

بسبوسه ، فرح اليوم ، فيروز ، كروسايه انتوا هاتستفردوا بيه فى التوبيك ده ولا أيه ؟

يا جماعة مش عايزكوا تفهموني غلط وتفتكروا إني ضد أن البنت تتعلم وتاخد شهادات عليا كمان .. لكن الموضوع لازم نحسبه على أساس الأرباح والخساير ( معليش الدراسة بتحكم ) لأن بالتأكيد دلوقت هانلاقي أن معظم الكليات موجودة بمدن مصر المختلفة طبعاً إلا سياسة وإقتصاد وألسن وصحافة وإعلام ... لكن برضوا دول هاتلاقي لهم بديل مثل التجارة والآداب مثلاُ .... وبعدين هي مش يوم ولا يومين البنت هاتتغربهم دول 4 سنين غير التوابع - لا قدر الله - .

وبعدين إذا كانت بسبوسه لسه ماحكتش حاجة والواحد شعره طقطق أومال لما تحكي عن خبايا عالم البنات فى بيوت الطالبات ( أيه ده ينفع أسم فيلم وتخرجه إيناس الدغيدي ) .

وبعدين أن مش عايز برضوا نفتح المجال لحاجات أكبر وأخطر من كده ... يعني النهاردة عاشت فى مدينة تانية علشان تتعلم .. بكره هاتتخرج وتقولك مافيش فرصة عمل فى محل إقامتي يبقى أدور على أكل العيش فى حتة تانية - غربة تاني - أو معليش أنا عايزه أثبت نفسي وأحضر عفاريت قصدي ماجستير وهأسافر بره ..... وهلم جره ....

طب أنتوا يرضيكوا كده ؟

ومش عايز واحده تقولي أن فيه بنت بمية راجل وممكن تحافظ على نفسها ولو كانت فى وسط غابة من الذئاب ... والكلام بتاع لبنى عبد العزيز ده ... مهما كانت البنت أو الست قوية جسمانيًا ضعيفه وساعة الأزمات أو المشاكل لا قدر الله مابتستحملش قلم .....

أعذروني لو كان في كلامي بعض القسوة لكن والله العظيم انا بأتكلم كده علشان أنا حاسس أن أنتوا زي اخواتي البنات ، او حتى اولادي عمر ( سنتين ونص ) وعلي ( 9 أيام ونص )

[Farah]

بسبوسه ، فرح اليوم ، فيروز ، كروسايه  انتوا هاتستفردوا بيه فى التوبيك ده ولا أيه ؟

هو احنا نقدر ياعمنا

علي فكره انا موافقه علي كل ارائك وبقدر الامكان بحاول اعمل مع بنتي معظم ما تقول عليه سواء في هذه المداخله او غيرها ولكن يبدوا ان impossible اختارت هذه الكليه وممكن يكون صعب ان تغير

بس اللى عايزة اعرفة يعنى اللى حظة الاسود (النحس اياااة) يضطرة انة يدخل كلية كدة 

يعمل اية يعنى 

لا مواصلات مع ان المدينة دى بالعربية ساعة وربع بالكتييير 

ولاسكن 

ولا اى حاجة

اكيد فيه بنات زيك كويس حاولي تتعرفي بالبنات دي

اسائلي نفسك انتي عاوزه الكليه دي ضروري لدرجة انك تستحملي كل هذه المتاعب ولا تقدري تغيري لكليه قريبه وتوفري علي نفسك المتاعب

[فــيــروز]

 

بسبوسه ، فرح اليوم ، فيروز ، كروسايه انتوا هاتستفردوا بيه فى التوبيك ده ولا أيه ؟ 

ودى تيجى بردو؟ :) والله يا س.س. انا فعلا باعتز بحضرتك جدا وسعيده اوى بيه وباحس ان كان نفسى يبقى عندى اخ زى حضرتك بيخاف على اخواته حتى لو بدا لهم هذا متعارض مع رغباتهم فى بعض الاوقات .. عشان كده حتى لو اختلفنا فى اى شئ سيظل احترامى و تقديرى لكم موجود دايما ان شاء الله :)

[Lancelot]

بس اللى عايزة اعرفة يعنى اللى حظة الاسود (النحس اياااة) يضطرة انة يدخل كلية كدة 

يعمل اية يعنى 

لا مواصلات مع ان المدينة دى بالعربية ساعة وربع بالكتييير 

ولاسكن 

ولا اى حاجة

أمال أنا أعمل إيه ... أنا كليتي تبعد عن بيتي ساعة و نص بالمواصلات و ممكن ساعتين لو أخدت المترو ... أنا كنت فاكر إني ممكن أستحمل و إني عايز الكلية أوي بهذه الدرجة إني أستحمل كل ده ... لكني دلوقتي رجعت في كلامي "وش عيييييييييييل" و في نفس الوقت مش قادر أحول من القسم بتاعي و أدخل في مبني قريب لنفس الكلية من بيتي ....

في التعليم ... مش لازم لما تعوز حاجة تحصل عليها ...

[se_ Elsyed]

فــيــروز

والله يا س.س. انا فعلا باعتز بحضرتك جدا وسعيده اوى بيه وباحس ان كان نفسى يبقى عندى اخ زى حضرتك بيخاف على اخواته حتى لو بدا لهم هذا متعارض مع رغباتهم فى بعض الاوقات .. عشان كده حتى لو اختلفنا فى اى شئ سيظل احترامى و تقديرى لكم موجود دايما ان شاء الله

الله يكرمك يا ست فيروز هانم ويطعمك ما يحرمك يا رب ( وش واحد شحات )

والله الواحد لما بيقرا الكلام ده الدمعه بتبقى هاتفر من عينه .

ملحوظة : دمعه = دموع .. مش الدمعه بتاعت الصلصة والتقلية .

نداء إلى إمبوسيبل : أنت يا ست بسبوسة هاتعملي زي سكوربيون يقولنا الجزء الأولاني من القصة ويسيبنا متشعلقين ... أوعي تكوني ناوية تنزلي الجزء التاني فى رمضان ؟....

( مش عارف ليه حاسس أن بسبوسه هايبقى ليها مستقبل باهر فى عالم القصص زي الست مؤلفة هاري بوتر ويبقى كده مافيش حد احسن من حد واحنا كمان يبقى عندنا ب ب - بسبوسه بوتر - )

[impossible]

نداء إلى إمبوسيبل : أنت يا ست بسبوسة هاتعملي زي سكوربيون يقولنا الجزء الأولاني من القصة ويسيبنا متشعلقين ... أوعي تكوني ناوية تنزلي الجزء التاني فى رمضان ؟....

معلش يا س.س دة انا كنت عاملة شغل جامد طحن فى الموضوع دة

بس الهارد ضرب

وماما مش راضية تجبلى واحد تانى

قال اية احوش من مصروفى ناقصين ازمة اقتصادية

و السيبر الواحد ميعرفش يكتب فية بمزااااج

( مش عارف ليه حاسس أن بسبوسه هايبقى ليها مستقبل باهر فى عالم القصص زي الست مؤلفة هاري بوتر ويبقى كده مافيش حد احسن من حد واحنا كمان يبقى عندنا ب ب - بسبوسه بوتر - )

اللة يخليك مرسىىىىىىىى

من هنا لاسيوووووووووووط

لا من هنا لابو سمبل مش دة اخر عماار قبل الحدود

انا فعلا كنت بفكر بجدية فى موضوع الكتابة الخيال العبيط

بس طبعاا فى مشكلات كتير

بحاول اتغلب عليها بقراية رواياات

بس ان شاء اللة هخلى بابا يجيب هارد واكمل