قانون المرور الجديد - شنطة الإسعافات والمثلث مجانا

[عصام]

الأهرام 31/3/2009

صرف حقيبة الإسعافات والمثلث العاكس مجانا من مايو المقبل

قرر السيد حبيب العادلي وزير الداخلية صرف حقيبة الإسعافات والمثلث العاكس لمختلف أنواع السيارات مجانا‏,‏ وذلك بعد انتهاء فترة المهلة‏,‏ التي من المقرر أن تنتهي في بداية شهر مايو المقبل‏.‏

قرأت الخبر أمس وعلى الفور قفزت أمامى عدة تساؤلات:

1. حيث إننا نعامل كل تصريحات الحكومة المشابهة على أنها فخ .. إذن أين الفخ فى مثل هذا قرار؟

2. كيف سيتم صرف تلك الأشياء ..؟ فى المرور؟ أثناء التجديد؟ وكيف سيتأكد رجل المرور فى الشارع من أن صاحب السيارة صادق من عدمه كونه لم يجدد تراخيصه بعد وبالتالى لم يتسلمهما؟

3. ألا يمثل التخبط الشديد الذى نتابعه منذ صدور القانون الجديد فيما يخص مسألة الشنطة والمثلث والسير عكس الاتجاه مثال واضح للتخبط التشريعى والقانونى فى مصر بشكل عام؟

4. هل يجب أن ننتظر تغيرات أخرى أو قرارات جديدة قريبا فيما يخص نفس المسألة؟

5. بعد كل التصريحات السابقة فى هذا الشأن وبعد العدد الهائل من الناس الذين سارعوا بتنفيذ القانون واشتروا بالفعل الشنطة والمثلث .. ألم يكن من الأجدى صرف المبالغ التى سوف تخصصها الدولة لهذا الغرض (مجانا) فى أوجه أخرى أحق؟

[فــيــروز]

ما دار بذهنى وقت قراءة هذا الخبر كان هو : ما هو الفارق بين شراء أصحاب السيارات للشنطه و المثلث أو شراء الدوله لهم و منحها مجّانا للمواطنين !!

فى النهايه هناك مجموعه من المستفيدين من بيع هذه الأشياء بأعداد هائله لأصحاب السيارات و الفارق أن الدوله ستشتريها ممّا سيفتح مجالا أوسع للسبّوبه و الفهلوه و الأبواب الخلفيه للتربّح على قفانا بردو .. فالفارق ليس كبيرا كما نتصوّر ما بين شرائنا نحن لهذه الأشياء و شراء الدوله لها لأنّها فى النهايه ستعوّض هذه المبالغ منّا بشكل أو بآخر السؤال هو لماذا الإصرار على حيازة هذه الأشياء رغم عدم جدواها من الأساس !!

[Alshiekh]

جسب ماسمعت فان الحكومة لن تدفع ثمن تلك الاشياء ، بل من سيقوم بذلك شركة دعاية ستستوردها على حسابها ، اسمها ايه ومانوع الدعاية ؟ ماأعرفس

[se_ Elsyed]

مش بالع الموضوع ده من ساعة ما ق{اته لغن الحداية ما بترميش عصافير :lol:

وفعلاً : ما هي آلية صرف الشنطة

يعني هاروح المرور اللي أنا تابع ليه وأقف طوابير وأخد شنطة ؟

ولا هايفرقوها في اشارات المرور ولا إيه بالظبط

ده في ناس عملت فلوس من الشُنط والمثلثات والبراجل المضروبة ... يا نهار أبيض

بس الجُملة التي ألمتني كثيراً يا عصام هي

ألم يكن من الأجدى صرف المبالغ التى سوف تخصصها الدولة لهذا الغرض (مجانا) فى أوجه أخرى أحق؟

والله العظيم الناس صوتها إتنبح ..

يا اخواننا يا متخلفين يا بتوع الشاش الطبي وأدوات تثبيت عضمة الترقوة .. والجفت .. والتنفس الصناعي والشنطة العجيبة والحاجات اللي عايزه كل سواق يبقى معاه دكتوراه فخرية من جامعة أدنبره عشان يبقى مستعد لأي حادث على الطريق .. أو الشخص المصاب هو بنفسه لو عمل حادثة وإتدغدغ يقوم زاحف عالأرض وواصل لحد شنطة العربية ومطلع شنطة العدة ويبتدي يظبط نفسه عشان يرجع زي الأول زي أفلام الخيال العلمي اللي بنشوفها الواحد من دول دراعه يتقطع في خناقة او حادثة يقوم دايس على زرار في شعر صدرة تقوم طالعه له حقنة كبيييييرة زي اللي بيديها زنفل للحمار لما يكون عنده شحار .. ويروح داببها في قفاه تقوم دراعة تنبت وتطلع تاني وتبقى زي الفل ...

يعني نفترض إن في 5 مليون سيارة في مصر ...

فبدل ما تدبسة في شنطة بخمسين جنيه - مثلاً - ومش هايعرف يستخدمها والشمس والحرارة هاتاكل أسلاف أي قطن بفلزين والحركات دي اللي لها تاريخ صلاحية ...

يعني ..... لم بطريقة ظريفة 30 ج سنوياً مثلاً من كل صاحب سيارة ووفر بهم سيارات إسعاف محترمة على الطريق وخليها هيئة مستقلة .. ودعم بهم شرطة أمن الطرق ... وظبط بهم طرق الموت زي طريق المنيا اللي بقى يودى الأخرة ..

وهناك أفكار اخرى تعود بالنفع على كل مستخدمي الطُرق والكباري والانفاق :D

لكن تقول لمين ومين يسمع ..

[محمد عبدالعزيز]

طب حد قرأ الخبر ده؟

http://contactcars.com/News_ViewStory.asp?NewsID=2783

صرف المثلث وشنطة الإسعاف "مجاناً" منحة حكومية أم قرار له تبعات؟

أكد اللواء شريف جمعة مساعد وزير الداخلية للشرطة المتخصصة أن قرار اللواء حبيب العادلي وزير الداخلية بمنح المواطنين "حقيبة الإسعافات الأولية والمثلث العاكس" مجاناً جاء تيسيراً على المواطنين من قائدي السيارات ، ولمواجهة التجار الجشعين.

وكشف اللواء جمعة في تصريحات لصحيفة "الأهرام" يوم الأربعاء عن أن المواطنين سيتسلمون المثلث والحقيبة مجاناً من وحدات المرور التابعين لها اعتباراً من شهر مايو المقبل وذلك عند التقدم للوحدات لإجراء تجديد تراخيص السير للمركبات المملوكة لهم فقط.

وكان وزير الداخلية قد أصدر قراراً بمنح حقيبة الإسعافات الأولية والمثلث العاكس كـ"هدية" لجميع أصحاب السيارات بكافة أنواعها تيسيراً على المواطنين.

وأشار مساعد وزير الداخلية للشرطة المتخصصة إلى أن في حالة الترخيص لأول مرة ينبغي التأكد من تسلم السيارة الجديدة للمثلث وحقيبة الإسعاف ، مؤكداً أن جميع السيارات التي سيتم ترخيصها خلال شهر أبريل الحالي ليست ملتزمة بحيازة الحقيبة والمثلث.

وأكد أن التفتيش على المثلث والحقيبة لن يتم إلا عند الترخيص فقط وليس في الأكمنة أو الطريق العام ، وذلك حرصا على عدم تعطيل إجراءات التأكد من صحة التراخيص.

وطالب اللواء جمعة المواطنين بوضع المثلث العاكس أمام السيارة حال تعطلها في الطريق حرصا على سلامة قائد السيارة وسلامة السيارة نفسها ، ومنعا لوقوع تصادم مع سيارة اخرى ، أو تعرضه لتوقيع عقوبة ضده.

جاء قرار الداخلية المفاجئ ليثير تساؤلات المواطنين بشأنه ، خاصة في ظل التأجيلات المتواصلة لتنفيذ بندي "المثلث وشنطة الإسعاف" في قانون المرور الجديد ، كما أن هذا القرار لم يشر إلى طريقة استخدام شنطة الإسعافات الأولية أو محتوياتها ، أو وضع أصحاب السيارات الذين اشتروا "المثلث والشنطة" بالفعل.

يعنى الكلام اللى بالأحمر ده كلام معقول, ويبقى كده مفيش تفتيش على الشنطة والمثلث إلا فى المرور عند الترخيص فقط.

بس يارب يكون ده آخر كلام ومايرجعوش فى كلامهم تانى

[عصام]

كل ما اروح أرخص يقولوا لى ان الطفاية غير صالحة مع إن تاريخ الصلاحية بيقول غير كدا ..

واضطر اشترى طفاية من عندهم

هل يا ترى كل ما اروح أرخص هايبقى الشنطة والمثلث برضه غير صالحين؟

[Scorpion]

كل ما اروح أرخص يقولوا لى ان الطفاية غير صالحة مع إن تاريخ الصلاحية بيقول غير كدا ..

واضطر اشترى طفاية من عندهم

طب ما تبطل تدخن ؟؟ :rolleyes:

[AmgadGamal]

عارفين إن الشنط و المثلثات كانت بتتباع جوا المرور نفسه!

طب لو الموضوع كده من الأول كان ليه التأجيل كذا مرة؟! و ليه الكلام ده ما إتقلش من الأول؟!

طب و لو أنا لازم أستخدم المثلث لو العربية إتعطلت .. طب ما أنا لازم أجيبه و ما أستناش التجديد...يعنى حأجيبه جأجيبه.

حسبنا الله و نعم الوكيل.

[ahmedmohamed]

مفيش فايدة

جحا مهمل عمل مش حيعجب الناس

يخلى الناس تشترى الشنطة والمثلث ميعجبش

يراضى الناس ويوزعها مجانا برده ميعجبش

[aif]

الموضوع مش طبيعي ..... فيه إنَ

بس لسة مش باينة

....

خودها هدية وهات 100 جنية ... وش عادل امام

تم تعديل 3 أبريل 2009 بواسطة aif

[MoHaMMeD EgYpT]

اعذروني في الكلمة دي لكن هي الحداية بترمي كتاكيت

ما اظنش ان الحكومة بتدي حاجة مجاني اكيد هتكسب شئ من كل الحكاية دي و الله اعلم يا تري هتكسب ايه من وارء ده كله

[Modest]

كل ما اروح أرخص يقولوا لى ان الطفاية غير صالحة مع إن تاريخ الصلاحية بيقول غير كدا ..

واضطر اشترى طفاية من عندهم

هل يا ترى كل ما اروح أرخص هايبقى الشنطة والمثلث برضه غير صالحين؟

كنت عايز أسأل هي الطفاية بكام يا عصام لما تشتريها غصباً و عدواناً من المرور حتى لو سليمة .. يعني أكتر من 50 جنيه؟

أصل لو كده يبقى مالهاش لازمة وجود الطفاية في العربية إلا وقت الترخيص (طبعاً وجودها ضروري لكن أقصد مالهاش لازمة عند الحكومة لإن بعد اللي حصل معايا تأكدت إن الموضوع جباية و ليس حرصاً منهم على حياة السائقين و الركاب)

و اسمعوا الحكاية .. و هأقولها من البداية :ninja:

الطفاية عندي سليمة و لسه بدري على تاريخ إنتهاء صلاحيتها و كمان محفور عليها رقم اللوحة و ماشي في السليم .. و لكن!!!

الصيف اللي فات سألوني في لجنة مرور عن الطفاية و لسه باجيبها من ورا الكرسي بتاعي لقيت أمين الشرطة بيقول لي إتفضل اركن على جنب و هات الرخص :blush2:

ركنت على جنب علشان أنا مؤدب و باسمع الكلام و علشان ماعطلش طابور العربيات الي ورايا و نزلت بالرخص لقيت سعادة البيه الباشا الضابط بيقول لي تدفع الغر امة و لا نسحب الرخص؟

قلت طيب افهم ليه و بعدين ادفع.

قال لي علشان الطفاية لازم تكون تحت كرسيك .. تحت رجلك بالضبط ... قلت له يعني احطها تحت رجلي بغض النظر عن إنها هاتعوقني في السواقة لإنها هاتخبط في رجلي و انا سايق و ده خطر (ماهو مفيش طريقة اربط بيها الطفاية تحت رجلي و كمان قطرها أكبر من إرتفاع الفراغ الموجود تحت الكرسي علشان لو حبيت أحشرها تحت الكرسي ).

قال لي لازم كده علشان تكون في متناول إيديك .. قلت له ماهو الأمين شافها في متناول إيدي و انا باجيبها من ورايا.

قال لي هاتدفع و لا نسحب الرخص؟ .. يعني تأكدت إن الموضوع جباااااية لا أكثر لا اقل .. و لا تقل عن البلطجة.

دفعت الـ50 جنيه زي الشاطر و اخدت الرخص و مشيت.

نفهم من كده إن كل واحد بقى يحط طفايته تحت رجليه و ماتجيبولناش الكلام... و شنطة الاسعافات تستخدمها في علاج رجلك اللي هاتخبط فيها الطفاية طول ما انت سايق.

[بندق أفندى]

واحد قديم لما ذات مرة بأقوله يا عم دى ببلاش؟

قالى وانت مصدق؟؟

قلت امال ايه؟

قاللى مفيش حاجة ببلاش غير العما والطراش .. :blush2:

وهى الحكومة هتوزع كتاكيت؟ :ninja:

[fagrmasr]

الأهرام 31/3/2009

صرف حقيبة الإسعافات والمثلث العاكس مجانا من مايو المقبل

قرر السيد حبيب العادلي وزير الداخلية صرف حقيبة الإسعافات والمثلث العاكس لمختلف أنواع السيارات مجانا‏,‏ وذلك بعد انتهاء فترة المهلة‏,‏ التي من المقرر أن تنتهي في بداية شهر مايو المقبل‏.‏

قرأت الخبر أمس وعلى الفور قفزت أمامى عدة تساؤلات:

1. حيث إننا نعامل كل تصريحات الحكومة المشابهة على أنها فخ .. إذن أين الفخ فى مثل هذا قرار؟

2. كيف سيتم صرف تلك الأشياء ..؟ فى المرور؟ أثناء التجديد؟ وكيف سيتأكد رجل المرور فى الشارع من أن صاحب السيارة صادق من عدمه كونه لم يجدد تراخيصه بعد وبالتالى لم يتسلمهما؟

3. ألا يمثل التخبط الشديد الذى نتابعه منذ صدور القانون الجديد فيما يخص مسألة الشنطة والمثلث والسير عكس الاتجاه مثال واضح للتخبط التشريعى والقانونى فى مصر بشكل عام؟

4. هل يجب أن ننتظر تغيرات أخرى أو قرارات جديدة قريبا فيما يخص نفس المسألة؟

5. بعد كل التصريحات السابقة فى هذا الشأن وبعد العدد الهائل من الناس الذين سارعوا بتنفيذ القانون واشتروا بالفعل الشنطة والمثلث .. ألم يكن من الأجدى صرف المبالغ التى سوف تخصصها الدولة لهذا الغرض (مجانا) فى أوجه أخرى أحق؟

[fagrmasr]

أنا حاسس كده يعنى وربنا يسهل

ان اخرتها هيوزعوا عربية للى عنده شنطة الاسعاف ومثلث

حكومتنا تتوقع منها اى قرار

لكن

الخيبة كلها بتظهر وقت التنفيذ