عينة من عشوائية محمود معروف

[Guest Mohd Gramoun]

بدون مجاملة

عبد ربوووه.. شفيق يا راجل!!

محمود معروف

"الواد عبد ربوووه" بتاع الاسماعيلي.. قريب "شفيق يا راجل" بتاع "عش المجانين" جنن جمهور الأهلي وخلاهم بيضربوا أخماسا في أسداس وكف علي كف.

من ليلة أول امبارح ومش عايزين يصدقوا أن الأهلي بطل السوبر والمارلبورو والسجاير اللف والبانجو انهزم يا رجالة في يوم "منيل" بستين نيلة.. ده حتي كأس السوبر لسه ما دخلش النادي الأهلي.. الناس لسه فرحانة بيه وبيلفوا الشوارع والحواري وبيشربوا فيه الشربات والحاجة الساقعة الله ينكد عليك يا ابن "عب ربو" زي ما نكدت ع الناس المبسوطة!!

الواد ابن عب ربو ضرب كرسي أصفر في الكلوب الأحمر وقلبها ضلمة وخلي أربع خمس آلاف أهلاوي راجعين من الاسماعيلية من غير أكل ولا شرب وحتي المانجة الاسماعيلاوي رموها من شبابيك الأتوبيسات والعربيات وحلفوا ميت يمين ما يأكلوا أي حاجة صفرا بعد كده لكن ممكن يشربوا حاجة أصفرة علشان ينسوا!!

http://www.algomhuria.net.eg/algomhuria/to...al/detail01.asp

ربنا يهديه و يرجع له عقله.....

[se_ Elsyed]

محمود معروف يا سيدي من نفس مدرسة سمير رجب .. منافق .. حقود كاره للجميع حتى أعتقد انه يكره نفسه .. متسلق ومن اجل ذلك وصل مجلس الشعب ..... وللآسف هذه النوعية من البشر هي التى تجده تطفو على سطح المجتمع وتجد لها وجود فى كل مكان صحافة ، إعلام ، رياضة برامج تليفزيونية لدرجة فى بعض الأحيان أخشى بان أفتح حنفية الميه الأقيهم نازلين منها .

[Farida]

يا عم مجرامون (اموت و اعرف يعنى ايه ؟؟؟؟؟)

اسمح لى حضرتك اهلاوى صميم و محمود معروف زملكاوى صميم يعنى ما تحكمش عليه علشان انت مش محايد و لو عايز عينه من كتابات نقاد اهلاويه املالك شوله لو عايز ......

[Guest Mohd Gramoun]

يا عم مجرامون (اموت و اعرف يعنى ايه ؟؟؟؟؟)

اسمح لى حضرتك اهلاوى صميم و محمود معروف زملكاوى صميم يعنى ما تحكمش عليه علشان انت مش محايد و لو عايز عينه من كتابات نقاد اهلاويه املالك شوله لو عايز ......

يا عمتي و ستي فريدة ...صحيح أنا أهلاوي ...بس موش متعصب و إذا كان محمود معروف زملكاوي متعصب فيجب عليه ان يراعي الا يظهر تعصبه في جريدة عامة و ليست خاصة بنادي ما.. لذا ينبغي مراعاة الحيادية... ثم الموضوع ليس تحيز او تعصب......كل ما أردت قوله بكلمة عشوائية هي التدني و الإنحدار في اختيار الفاظ المقال حتي اصبح أقرب للهجة الحواري و الشوارع الخلفية منه إلي المقال.

و دعواتك ان ربنا يهديه و يكمله بعقله

والله انا نفسي اغير الأسم مجرامون و ابدله بالحقيقي و هو محمد فريد ناصر السحيمي عشان واضح انه مسبب لي مشاكل في المنتدي و لو عندك طريقه لتغييره قولي لي و لك الشكر مقدما.

[Sherief AbdelWahab]

سمعت ان روزا كانت من شهرين عاملة ملف عن محمود معروف تحت عنوان:نائب شتام جديد يحال إلى لجنة القيم...الكلام دة صحيح؟

خلص الكلام

[Lancelot]

يا عم مجرامون (اموت و اعرف يعنى ايه ؟؟؟؟؟)

اسمح لى حضرتك اهلاوى صميم و محمود معروف زملكاوى صميم يعنى ما تحكمش عليه علشان انت مش محايد و لو عايز عينه من كتابات نقاد اهلاويه املالك شوله لو عايز ......

لا يا سيدتي .... معلهش لكن الموضوع ملوش دعوة بكونه أهلاوي و لا زملكاوي .... الراجل ده مش معقول .... أنا صعقت لما عرفت إنه في مجلس الشعب ....

[Guest Mohd Gramoun]

عضو في مجلس الشعب؟؟؟؟!!!

لن أستغرب إذا كان حزب وطني..... ولكن عن إية دائرة تم إنتخابه؟

[se_ Elsyed]

عضو في مجلس الشعب؟؟؟؟!!!

لن أستغرب إذا كان حزب وطني..... ولكن عن إية دائرة تم إنتخابه؟

دايرة " طوخ " قليوبية

س س مخبر سري

[Guest Mohd Gramoun]

بسم الله الرحمن الرحيم...

طوخ..... يعني قليوبي ...بلدياتنا.....و افضيحتاه.....

ياريتني ما كنت سألت!!!!

[Sherief AbdelWahab]

العزيزة فريدة ، عود أحمد و إن كانت التهنئة عليه متأخرة للغاية...و إن كنت تعتبين علينا انتقادنا لمعروف بحجة أنه زمالكاوي...واضح أنك ما تعرفيش معروف يا راجل!

معروف يا راجل هو أحد مساعدي سفيه يا راجل ، و نائب رئيس تحرير الجمهورية الشهيرة بجمهورية الجمهورية، ليس ذلك فحسب ، بل هو عضو في مجلسي الشعب و إدارة نادي الزمالك، و يستغل عمله الصحفي و جيشه من الصحفيين في خدمة مصالحه الشخصية داخل النادي على أفضل ما يكون ، خاصة في جولاته مع المرتضى المنصور ، طبعا عارفة مرتضى ياراجل ، التي سكتت عليه أقلام قلاضيش الصحافة إلى أن سبهم و تحدث عن انحرافات اللاعبين ، و كان ما اعتبرته جموع الصحفيين سبا و خاصة صحيفة صوت الطرق الصوفية الشهيرة بصوت الأمة سابقا شرارة الحرب بينها و بين المرتضى المنصور، فصعدت الأمر للحليف السابق لعادل حمودة نقيب الصحفيين السابق إبراهيم نافع ، الذي استصدر قرارا غريبا بمنع ذكر اسم مرتضى منصور في وسائل الإعلام!...

نعود لمعروف يا راجل، الأشهر من النار على العلم ، و الذي نشرت روزا اليوسف أنه أحيل للجنة القيم في البرلمان الموقر، و نذكر بأنه صاحب نفوذ قوي في وسائل الإعلام الأخرى ، يقدم الفقرة الرياضية في أخبار التاسعة كل سبت تقريبا ، وله برنامج في القناة الثالثة ، و كان له آخر يروي فيه بعض الحكايات الفنية على غرار المرحوم عبد الله أحمد عبد الله!!!، و هناك معلومة لست متأكدا من صحتها أن مذيعة بالشرق الأوسط اسمها ليلى معروف هي شقيقته...

خلص الكلام

[Farida]

الأستاذ شريف :

شكرا على كلمتك الرقيقه اما بخصوص محمود معروف انا ما عرفوش شخصيا لكن ما اعرفه انه خرج من مجلس ادارة الزمالك الحالى و انه ناقد رياضى فاهم و ان فيه نقاد رياضيين كتييييييير قوى اهلاويه كلامهم زى السم و عناوين مقالاتهم مليئه بالكلام السخيف و الصيد فى الميه العكره يعنى قصدى النقاد كلهم عايزين وقفه...لكن انا لم اقيمه من ناحيه عضويته لمجلس الشعب لإن الصراحه كلهم عايزين الحرق

[Spider]

الأستاذ الكبير المعروف من شهر تقريبا ذهب الى المطار لأستقبال أحد الضيوف(اعتقد الضيوف الشخصيين له) وأراد أنتظاره فى قاعة كبار الزوار(كان اللى جاى رئيس موزمبيق) لحد كده تمام

العاملون بالمطار منعوه من دخولها أو أستقبال ضيفه فيها لأنه لم يقم بالأبلاغ المسبق عن هذا وأعتقد أن هذا fair enough لأن هو ده نظام الناس هناك. ولكن النظام لم يعجب أستاذنا المحترم وصعبة عليه نفسه ونزل شتائم وردح للموظف المسئول بحجة أنت متعرفش بتكلم مين وأن عليه الحصانة فكيف يجرؤ الموظف على منعه!!!

وأنا عجبنى موقف الموظف لأنه بالفعل منعه من دخول القاعة ووصل ما حدث الى وزير الطيران وعلم بأمر الشتائم والتهديد بالحصانة فأصر على رفع قضية ضد معروف وقال أن الحصانة تجعل صاحبها أكثر حرصا على تطبيق القانون وليس كسره .ولا أعلم ما مصير هذه القضية لكن متهيألى فى بلد ذى مصر فأن قضايا من هذا النوع لا تفرق كثيرا مع أصحاب الحصانة! واللى يعيش اليومين دول ياما يشوف! وعجبى!