أخويا فى المترو

[حسام يوسف]

دة مش عنوان فيلم ولا حاجة عشان أنا عارف س س واستلاماته

دة موقف حصل لأخويا لقيت كاتبه فى مكان تانى

وطبعا بدون استئذان أخدتة

(أخوك الكبير يا ولد-وش سعيد صالح فى العيال كبرت)

اتفضلوا

وقولولى رأيكم ع اللى بيحصلنا معشر الرجالة

بعنوان:الهولو كوست النسائي ...سيداااتي ...سادتي

(يلفت نظري من فترة انتشار ظاهرة غريبة في بلدنا

تطويرا لنظرية الحق المكتسب ...المنتشرة في ناس بلدنا

وهي تعني ببساطة ...انك لو رحت وصلت واحد جارك او صديقك مرة بعربيتك

وقابلته صدفة كام مرة ...واستنيته مرة كمان ....

ففي المرة اللي هتنساه فيها ..او تبقي مستعجل ومترحلوش

هتلاقيه مخاصمك وزعل منك

ان ما اتهمكش انك بتعايره بعربيتك

ده بيحصل كل يوم في حياتنا ...وللاسف انتشر لدرجة انه تحول لقاعدة

لكن الغريب ...والغريب بجد ...اللي بقالي فترة ملاحظه

اذا قررت انك تروح مشوار بعيد ...فهتستخدم المترو

تفاجيء بان عربات السيدات نادرا ما تزدحم في غير ساعات الذروة

ولكن تفاجيء بعدد من الانسات ...او السيدات

يصررن علي الصعود للعربات الغير مخصصة للسيدات

اصارحكم القول اني حاولت اعرف السبب ...ما امكنش

حتي ان جاء اليوم المحتوم ...لاتلقي جزاء تساؤلي وتطفلي علي حديقة الحيوان الكبري التي احيا بها

ففي يوم قررت الذهاب الي المعادي ...فقررت ان اسهل طريق هو المترو

ويا ريتني ما قررت

فما ان تهادي المترو وفتح ابوابه

فوجدت عربة لا يوجد بها الا خمسة انسات ...وشاب

ومن باب الحذر ليس الا ...سالت احداهن

هي دي عربية سيدات؟

فاجابتني وبراءة الاطفال_ المكسلين يفكروا حتي او يشغلوا دماغهم_ في عينيها

هو فيه شباب هنا

فايقنت انها ليست عربة مخصصة للسيدات

طبعا اي حد ذكي هيقول طب ما شفتش اليافطة ...لون العربة ...وما غير ذلك من علامات مباشرة

واجيبكم ان لا

طبعا متاكد انها محصلتش مع حد فيكم

لكن ده اللي حصل ...ليه؟

عشان انا مبخت

المهم ...بعد عدد من المحطات ...ازدحم ركاب العربة ...ونزل الشاب اياه

لم يفيقني من شرودي _في عبارة الجحيم هو نظرات الاخرين_الا سيدة تحمل رضيعا...ولم تقم لها اي من فتيات العربة

وبمنتهي الشهامة ...قدمت لها مجلسي وظللت انا واقفا

والحمد لله ...في خلال محطتين شغر مكان جديد ...فجلست فيه

ولكن لم تكد فرحتي تتم حتي ازدحمت العربة من جديد

وحينها تقدمت الي بعض الانسات الصغيرات ...علي اعتبار اني الشهم بتاع العربية ...اللي لازم يقوم

بيتهيالي واضحة يعني

فلما قررت الا اترك مجلسي ...اعتراضا علي اسلوب الحق المكتسب الاستعماري هذا ...الفيت سيدة عجوز ...تجاور تلك التي تحمل رضيعها ...التي تنعم في مجلسها بعد ان وقفت لها

تخاطبني مشيرة الي باصبع لا يخلو من المهانة ...وهي في سن لا يقل عن الثمانين باي حال

دي عربية شيدات يا اشتااااذ

فجاوبت من فوري ...يا والدتي انا سالت قبل ان اركب ...فاجيبت انها ليست كذلك

وعلي العموم ساغادرها ف المحطة القادمة

فاذ بها تطالبني بسرعة الوقوف حتي تجلس الانسات

علي اعتبار اني من ذلك الجنس الذي لا يجوز له شفقة ولا رحمة

فهو مخلوق من فولاذ ...باخلاق ابليسية ....يستحق عليها الجلد من باب استرداد الحق منه ومن جنسه

ولم تكد تنهي قولتها ...حتي بدات تتعالي همهمات في ظلام الزحام ...انهم رجالة اخر زمن ....وان الدنيا انقلب حالها ...حتي وصلوا الي حالة من العصف الذهني ....بان تفوهوا بكلمات ....يعاقب عليها القانون

نفس منطق الضباع ....اذا ما الفتك شريدة ...تسارعت في تمزيقك ...ولو من بابا التسلية.

ولاني اعلم ...انه لا سبيل للتغلب علي امراة اذا ما تعلق الامر بالكلمات

حاولت ان احافظ علي البقية الباقية من كرامتي ...واتجاهلهم جميعا ...حتي وصل المترو الي المحطة التالية ...فاسرعت بالنزول

وما ان وجدت سيارة للرجال ...حتي شعرت بالسعادة الغامرة ...مرحي يا بني جنسي

كم اشتقت اليكم ...نزاحم بعضنا نعم ...لكننا ابدا لا نقهر احد ...ونتخذ الذرائع والمبررات حتي لا نشعر ولو بوخذ للضمير

لا نسوق كل مبرر ورواية حتي نصبح نحن الضحايا ...رغم الدماء التي تلطخ ايدينا

لا نتشدق بزمن كنا نستعبد فيه ...بل ندعي اننا كنا نستعبد فيه

ونحن كاذبون جاهلون بالتاريخ وبالاخلاق

زمان نطلق عليه انه كان زمان الحرملك والجواري ...وهارون الرشيد

وننسي ان حتي هذا الهارون الرشيد ...كان اسمه معاصرا لمن تسمي بالخيزران

عملية احتيال ونصب للتاريخ ...تماما كمحارق النازي التي يدعيها اليهود

والتي وان حدثت ...فما كانت بمثل تلك الصورة البشعة التي يصورونها لنا

ولا تقل بشاعة عن افعالهم الحاضرة

هولوكوست بمعني الكلمة

المهم...في بضع محطات ...بدا الزحام يهدا ...لاجد لنفسي مكانا للجلوس

فما ان جلست ...حتي صعدت مجموهة من الانسات

الاتي توجهن راسا ...الي مجموعة من الشباب

في خطة مدروسة ...لم ينسوا فيها اظهار طابع المسكنة وانهن الجانب الاضعف

فقام الرجال ....وتمت خطتهم بنجاح

وهكذا توالت قوافل الانسات والسيدات...في اتجاه مباشر علي الرجال

فلم يبقي من جنس الرجال الا العاجز او المسن او المريض

وامتلات العربة شيئا فشيئا بالسيدات

رغم قلة العدد النسبية في عربات السيدات

وما ان حان دوري في ان اقوم لاحداهن ...حتي رفضت باباء

فتكلمت مسنة تشبه بشدة تلك التي قابلتها في عربة السيدات

ما تقوم يا اخي ...هو انت مش شايفها واققفة قدامك

فانطلقت بصوت هاديء واضح في الرد

يا ستي عندها عربة سيدات ...تقدر تروح هناك وتقف او تقعد براحتها

لكنها صعدت تلك العربة بالذات طلبا وتسولا لشهامة الرجال

ومن حقي ان اعطيها او ارفض

ثم هم مش بيطالبوا بحقوقهم حسب زعمهم

ويزاحمونا في المدارس والكليات

بل وفي العمل

رغم انها لا تشارك في مصاريف الحياة

وحتي من هي ليست كذلك فهي الاستثناء الذي يثبت القاعدة

علي العموم

انا سايبهالكم وماااشي

لالمح فجاة علي باب العربة عبارة

ان المقاعد للمسنين واصحاب الاعاقة

فنزلت وانا العن يوم ولدت فيه لم اكن انثي ...او معاق)

[MoHaMMeD EgYpT]

قصة بصراحة جامدة بس ايه يا عم انت زعلان اوي من كل السيدات ليه يعني ؟؟ و عامل كان فيه حرب :lol: يا رجل دي شوية كيد نسا :lol: ان كيدهن عظيم bv:-

[قلب ابيض]

يعنى والله انتو اللى مش عاجبكم العجب

يعنى هى الستات اللى راكبه المترو دى رايحه تعمل شوبنج ولا بتغير جو فتغتت على خلق الله

ماهى ياولداه يا موظفه يا طالبه ومضطره تتزاحم وتزقعشان تروح شغلها او ترجع لبيتها محمله بهموم ومشاكل الشغل والبيت والزوج والعيال عشان تكمل المسيره من طبخ وتدريس لعيالها وارضاء للزوج المصون

براحه شويه يا اسيادنا و"رفقا بالقوارير" والله غلابه ومظلومين طبعا هتقولى انتى ماشوفتيش نظرة عينيهم وشراستها اه عض قلبى ولا تعض رغيفى

يعنى اى واحده من دول بأستسناء القله القليله اللى تتمنى لو يجى اليوم اللى تتستت فيه بمعنى الكلمه مش بس تريقه لاء يعنى تلاقى الراجل اللى يغنيها عن الشغل او بمعنى اصح المرتب اللى بتساعد بيه فى تربيه الاولاد وتظبيط المعيشه حد يكره ؟؟ اكون ملكه متوجه على عرشى ومملكتى بيتى ورعاياى ابنائى

يا ناس والله كله بيرمى على كله

والراجل نفسه اللى بيزاحم الست فى المترو او ان صح القول اللى الست بتزاحمه فى المترو والشغل والشارع اكيد مراته ولا بنته ولا اخته هى واحده منهن

وهو برده يتمنى اليوم اللى يقدر يقولها : كفايه عليك كده يا حبيبتى شغل وشقا ده انتى بقيتى واحد صاحبى مش مراتى

مين ما يتمناش يجى يلاقى بيته نضيف وهادى وزوجه مبتسمه فى انتظاره والسفره ريحتها مفحفحه ومحضره له البيجاما وبالهنا والشفا ياسى السيد

مرغمه اختك لابطله

على وزن مرغم اخاك لا بطل

وفى النهايه مافيش ابطال كلنا مرغمييين ياساده

وان كان على المترو فحكاياته كتيييييييير 00خاصه عربه النساء

ودمتم wst::

[fatfouta]

يا دكتور حسام انا مش هرد فى الموضوع ده عشان مانزعلش مع بعض

عشان انت غالى عليا وكمان من اسوان

وبلاش بقى احسن ابطل افتح السايت بتاعك

فتفوته

[MoHaMMeD EgYpT]

يا دكتور حسام انا مش هرد فى الموضوع ده عشان مانزعلش مع بعض

عشان انت غالى عليا وكمان من اسوان

وبلاش بقى احسن ابطل افتح السايت بتاعك

فتفوته

[أحمد سيف]

والله يا حسام يا أخويا انت لما سألت الستات بيسيبوا العربية المخصصة ليهم وبييجوا يركبوا مع الرجال في عربيتهم ليه ... أنا دماغي راحت اتجاه ثانيه خالص ... الحمد لله انها جت على أد الكراسي

بس نرجع نقول ده سلو بلدنا كلها مش بس الستات ... الشحاته والمسكنه بقت سلوك عام وكله بياخذ حق غيره بالإحراج وتلقيح الحتت ... واللي بيكسب في الآخر هوا اللي عنده أقل قدر من الكرامه وأكبر قدر من الجليطه

[somayasaleh]

ما كنش العشم يا استاذ حسام

حضرتك موافق علي الكلام ده wst::

الستات دول اللي بتتكلموا عنهم يبقوا مين؟؟؟؟؟؟؟؟؟؟؟؟؟؟؟؟؟؟؟؟؟؟؟

أمك....اختك....خالتك.....عمتك

بنتك.....زوجتك

يعني توافق ان واحدة من دول تتبهدل في المترو..... ويتقال عليها الكلام ده

رفقا بالقوارير"

الرسول الكريم صلي الله عليه وسلم في خطبة الوداع اوصي بينا...... انتم بقي مش عجبكم؟؟؟؟؟

وبعدين الستات اللي بتركب المترو دول بيركبوا ليه........ دلع يعني...... بيتفسحوا......خليكم حقانين شوية

لا ننكر يا سادة يا كرام ان الست اليومين دول ....غير زمان..... يعني عليها اعباء اكتر من الرجال بكتييييييييييييييير جدا

كفاية مسؤلية البيت والاولاد والطلبات والدروس والمراجعة مع الاولاد..... ولو كان ابويها عايشين بتكون هي اللي مهتمة بيهم مش الراجل

بمعني.....

الست ده

1- شغالة

2- طباخة

3- سواقه.....توصل الاولاد المدرسه والنادي

4- مدرسة خصوصية...... للاولاد في البيت....( نظرا لسوء التعليم في مصر)

5- دادة تروح معاهم النادي في التدريب في عز البرد والحر وتفضل مستنياهم

6-جليسة ومراعاة كبار السن (الاب والام)....حيث ان اولادهم الرجالة بيطنشوا

7-اخصائية اجتماعية.....للعائلة طبعا ....هي اللي عليا كل الواجبات الاجتماعية من تهنئة بزواج او خطوبة اونجاح...... وكذلك مواساة في مرض او حادث اومت...لا قدر الله....

8-وغير كده وكده....مطالبة انها تكون علي سنجة عشرة ومبتسمة وبشوشة لزوجها في البيت

وبعد كده مستكترين عليها تقعد تريح في المترو بدلكم.....حرام عليكم......

غير كده وكده.......البنية النفسية والجسمانية للست غير الراجل....يعني انتم تستحملوا الوقفة .... احنا لا.......

وشكرا للاخوة الرجال اللي موافقين علي ان الستات دول مفتريات

[SoSo R]

معلهش يا جماعة بالراحة شوية....هو فيه إيه ؟؟؟

إنتوا ما بتصدقوا...عايزين تحسوا إن أنتوا الضحية و بالعافية كمان..

و بعدين خلاص بقى الموضوع إن دة نظام شحاتة و مسكنة...و السيد الفاضل يقول إن دماغه راحت لحاجة تانية؟؟!!!!

حد فيكم عنده أخوات بنات...لو أيوة هتفهموا اللى هاقوله

أول حاجة:لو البنات راكبين فى أى عربية فيها رجالة هتحاول فعلا و بسرعة إنها تلاقى مكان تقعد و لو ممكن تترازل على حد عشان تقعد هتعملها

عارفين ليه؟؟؟

إتقاء للمضايقات اللى ممكن تحصل ودى معروفة و مش محتاجة شرح خصوصا لو الدنيا زحمة

كل الطالبات كانوا بيعانوا منها فى أى وسيلة مواصلات زحمة...لكن الشباب اللى فاهمين الموضوع ماشى إزاى... هم اللى بيعرضوا عليهم مكانهم

تانى حاجة:

هتقول يا دكتور حسام طيب ليه من الأساس ما يركبوش عربياتهم المخصصة ليهم

السبب بسيط جدا

عربية السيدات أول عربية فى المترو لو البنت لسة معدية من البوابة و المترو وصل مش هتلحق توصل للنهاية

فهتكون النتيجة إنها هتنط جوة أول عربية فى وشها و إلا المترو هيفوتها لو فكرت تجرى لحد العربية الأولى

تالت حاجة:

و دى مش إستعطاف منى و لا حاجة بس حقيقة بيوليجية

ساعات كتير قوة إحتمال السيدات بتبقى أقل من الرجال

مش حضرتك صيدلى برضه؟؟؟ فاكر العملى كان عامل إزاى؟؟

لما الواحدة تبقى مخلصة سيكشن عملى 8 ساعات بتبقى عايزة ترمى أى واحد من على كرسيه و تقعد مكانه

معلهش بس دة الأحساس اللى كان بيجينى و خصوصا لو يوم من 8 صباحا لحد 8 مساءا

رابع حاجة:

الستات الكبار دول بيرخموا على الرجالة و الستات عشان تبقى فاهم

يعنى كتير أول ما الواحد يرستأ نفسه فى كرسى و يحمد ربنا إن المشوار هيكمل و هو بيتفرج من الشباك

تلاقى واحدة ما تعرفش نزلت عليك من فين...و معلهش يا بنتى...و اصل ركبى و الخشونة...و ضهرى....و تطلع كل أمراض الدنيا عشان أقوم و أقعدها

و ساعات بيعملوها رجالة كبار فى السن كمان

و ياسلام لو التشجيع الشعبى دخل فى الموضوع...كل الناس اللى بتحقد عليك لحصولك على كرسى وتقعد تهمهم ما تقوم....راجل\ست كبير....و الأستنكار و المظاهرات و الكلام دة كله

تحياتى

سوسورانى

تم تعديل 14 أبريل 2009 بواسطة SoSoRaNy

[somayasaleh]

والله يا حسام يا أخويا انت لما سألت الستات بيسيبوا العربية المخصصة ليهم وبييجوا يركبوا مع الرجال في عربيتهم ليه ... أنا دماغي راحت اتجاه ثانيه خالص ... الحمد لله انها جت على أد الكراسي

بس نرجع نقول ده سلو بلدنا كلها مش بس الستات ... الشحاته والمسكنه بقت سلوك عام وكله بياخذ حق غيره بالإحراج وتلقيح الحتت ... واللي بيكسب في الآخر هوا اللي عنده أقل قدر من الكرامه وأكبر قدر من الجليطه

يعني حضرتك برضه موافق يا استاذ احمد علي كده؟؟؟؟؟

يعني انت شايف ان الست اللي بتركب عربة الرجال علشان انسان شهم يقف لها يبقي كل الصفات البشعة ده......؟

تخيل ان اللي في الموقف ده امك او اختك او زوجتك او بنتك...... كنت تقول عليها كده؟؟؟؟؟؟

[أحمد سيف]

برضه نرجع نقول الحل بسيط ... الستات يركبوا في العربية المخصصه ليهم وبلاش يركبوا في عربيات الرجال

وإذا كان على مترو هايفوت ... أكيد هاييجي غيره وياما ساعات بتضيع في رغي وكلام فاضي ما جتش على العشر دقايق اللي هاتستنى فيهم المترو

إنما لو واحده ركبت عربية رجال وواحد شهم قام لها ما فيش مانع لكن ما يبقاش حق مكتسب يا إما تؤديه يا إما تاخذ نصيبك من التهزيء والمهانة

ومرة ثانيه ... المشكله مش في انهم ستات ... المشكله فعلا إن ده بقى سلوك عام للشعب المصري

وما أخذ بسيف الحياء فهو باطل

[محمد عيسى]

للأسف ردود في غاية الغرابة و ما لقيتش فيها اجابه محدده عن السؤال الأزلي هما بيركبوا عربية الرجالة ليييييييييييييييييييه؟

اللي عايزة تلقح جتتها على انسان شهم تقدر تركب عربية السيدات و تطلع ورقه فلوسكاب او ورقة كلينكس تحطها عالأرض و تقعد عليها و بعدين هما مش دافعين تذاكر درجه اولي تتيح لهم استعمال جميع العربات و الكراسي المتاحة و غير المتاحة

أؤيد أحمد سيف 100% و الرسول صلى الله عليه و سلم بيقول ما أُخذ بسيف الحياء فهو حرام

حكاية تعبانه و مرهقه و البيولوجي دي تنفع في جمعيه خيرية مش في مرفق عام

انما حكاية ترضاها لاختك و الكلام ده فانا لما بركب المترو مع مراتي - او اختي قبل الزواج - باخلي مراتي و ابني في عربية السيدات واركب انا اي عربيه تانيه و بنتقابل في محطة الوصول بمنتهى البساطة لانني معنديش استعداد انني على بال ما اوصل يكون نص ركاب العربيه حفظوا شكل مراتي

و اللي بتقولك العربيات بعيد ماهي اتغير و بقت قريبه و كمان اللي بتعمل كده للسبب ده بتغير في المحطه او المحطات الجايه و ده ما بيحصلش

أنا أرى أن ما يحدث هو من الآخر تحرش بجميع معنى الكلمة و لكن من الطرف المقابل

[SoSo R]

يا أستاذ أحمد

حضرتك مش شايف إنك متحامل شويتين على السيدات

أنت نسيت كمان إن عربة السيدات ليها عدد ساعات معينة و بعدين كله بيبقى ميكس

و بعدين المترو اللى هيجي غيره...مش يمكن هى مخلصة متأخر و ما فيش فرصة إنها تستنى اللى بعده؟؟!!

ليه علطوول بنعلق المشانق

أنا معاك فى نقطة واحدة...هى تفشى الأستهبال فى الجميع

بس بلاش نحددها بالسيدات فقط لا غير

تحياتى

سوسورانى

[SoSo R]

الأخ محمد عيسى

كلمة تلقح دى مش شايف إنها جامدة حبتين؟؟؟

تحرش دى حضرتك بتقصد إيه...بصراحة ما فهمتش

لو البيوليجى مش عاجبك بلاش منه

و حضرتك ما تقومش لما و احدة تيجى تلقح جتتها عليك

الموضوع أبسط من كدة مش محتاج كل الأنفعال دة

و آسفين على الردود اللى قلناها و مالهاش علاقة بالموضوع

خلاص يا جماعة ما تسيبوش مكانكم لحد...سيبوهم يتفلقوا

بس ما تزعلوش نفسكم للدرجة دى!!!

تحياتى

سوسورانى

تم تعديل 14 أبريل 2009 بواسطة SoSoRaNy

[fatfouta]

للاسف يا دكتور مضطرة اقول رايى بقى مادام طلعنا بناقح جتتنا

يا اخ محمد عيسى والله ساعات العربية بتاعة الستات يا سيدى بتبقى زحمة لدرجه ان ماقدرش ادخل حتى من الباب ساعتها بقى مش هلاقى غير العربيات التانية وماتزعلش منى انت واخد الموضوع ليه على اعصابك كده

والله العربيات التانية يا جماعة مش مكتوب عليها للرجال فقط وبالتالى احنا عندنا تو اوبشن وانتوا ليه مضايقين

معلش هنبقى نطالب بكام عربية للرجال فقط

روقوا يا جماعة

فتفوته

[فــيــروز]

من ساعة ما قرأت هذا الموضوع و أنا أسأل نفسى : "حسام" صيدلى يعنى كان علمى أكيد !! و من ثمّ مالوش حجّه فى ألاّ يعرف أنّه كى تكون هناك مساواه نسبيه بين الرجال و النساء فيما يتعلّق بعربات المترو ينبغى تخصيص نصف العربات على الأقل للنساء و بعدها نشوف هل ستظل هناك نساء تركب العربات المختلطه إلاّ اضطرارا وفى ظروف استثنائيه !! يعنى قبل أن تحاسب النساء من واقع حديث المساواه خلّى يبقى فيه مساواه الأوّل و بعدين نتحاسب !!

بجد أنا باستغرب جدّا الطرح المتسائل : أمّا الستّات عندها عربيه فى المترو بيركبوا العربيات التانيه ليه !! و كأن نسبة النساء إلى الرجال فى المجتمع هى واحد إلى عشره -كما هى نسبة عربات النساء لعربات المترو كلّها- عشان يبقى التساؤل له محل من الإعراب من وجهة النظر الإحصائيه على الأقل .. الغريب يا أخى فى موضوع تعدّد الزوجات أن المؤيدين يسوقون فكرة أن عدد النساء فى المجتمع أكبر من عدد الرجال -دون أى سند إحصائى طبعا- ثمّ بعد لحظات يقول لك ليه الستات تركب عربيات الرجّاله ليه -مع أنّها ليست كذلك بالمناسبه .. آه هى مش عربيات للرجّاله عشان تقولوا الستّات بتركبها ليه- و همّا عندهم عربيه للستّات !! بجد بيجيلى تربنه و مش بافهم همّا ماحضروش درس النسبه و التناسب فى أولى إعدادى كى يكون لهم هذا الطرح !! بل إن النساء قد تحتاج لعدد أكبر من العربات لأنّه بيكون بصحبتهم أطفال فى كثير من الأحيان و رغم كده مستكترين عليهم عربيه تقيهم رذالة و سخافة الرجال فى الزحام وفى غيره حتى .. مضطرّه أعمّم ردّا على هذا التعميم الذى أثار استنكارى بشدّه

نزاحم بعضنا نعم ...لكننا ابدا لا نقهر احد ...ونتخذ الذرائع والمبررات حتي لا نشعر ولو بوخذ للضمير

ليه هو حضرتك ماركبتش أتوبيسات قبل كده !! حضرتك ماسمعتش جملة "لو مش عاجبك اركبى تاكس" فى تبرير سافر و سافل للتحرّش بالنساء طالما ركبن الأتوبيس !! و بعدين "خيزران" مين اللىّ حضرتك بتتكلّم عنها ده ذكرك إيّاها كمثال منفرد و متفرّد يؤكّد أنّها الاستثناء الذى يؤكّد قاعدة أن النساء لوقت طويل جدّا كنّ مضطهدات !! لأن لو القاعده أن النساء حققوا كل ما لهم من حقوق ماكنّاش هنلاقى مثل وحيد أو حتى أمثله معدوده لهذا الموقف ..

حضرتك كام مرّه سمعت عن امرأه تحرّشت جنسيا برجل مقابل كام مرّه سمعت عن رجل تحرّش بامرأه !! قبل يعنى أن تسأل لماذا تفضّل النساء -حتى لو كنّ صغار السن- الجلوس فى وسائل المواصلات العامّه !! لا مش زى ما فهمت رغبه فى التباته و الغلاسه ولا ممارسة لنوع من الشحتفه و المسكنه !! ده لأن الرجال -الذين لا يقهرون أحدا- بيقهروهم فى هذه المواصلات بشكل مخزى لا يجهله أحد فى "مصر" المحروسهومن ثمّ ربّما تكون السيده التى تحمل رضيعا فى عربة السيدات غير منزعجه من وقوفها لأنّها فى النهايه تقف وسط سيدات مثلها بينما الفتيات مهما صغر سنّهم فى العربات المختلطه ينتظرن أى فرصه للجلوس حتى تقلّ فرصة التحرّش بهن فى الزحام .. ده حتى دلوقت التحرّش بقى هوم دليفرى و مش مستنّى زحام !!

بشكل عام بقى أو كتعليق عام على فكرة الموضوع التى هى -بالنسبة لى- أبعد من مجرّد كرسى فى المترو ..

فيه أمور كثيره فى مجتمعنا نحب أن نخضعها لحسابات "الجنتله" و "الرجوله" و "الجدعنه" بينما الحق و العدل بيقول أنّها لا يجب أن تكون

كذلك .. فى المواصلات العامّه قد يركب معاق ف "يتخيّل" أحدهم أن وقوفه له هو من قبيل هذه الصفات جنتله/رجوله/الجدعنه بينما الحقيقه أن من "حق" هذا المواطن أن يجد مكانا للجلوس فيه حتى لو وقف الأصحّاء ..

يعنى حين ذهبنا لزيارة "يورو ديزنى" ظلّت المقاعد المخصّصه للمعاقين خاليه رغم عدم دخول أىّ منهم و حين طلبت من المسئول أن نجلس فيها طالما هى خاليه كان ردّه : لو دخل شخص معاق مش هاسيبه ينتظر حتى تخلى أنت مكانه !!

بينما مقاعد المعاقين و كبار السن فى أتوبيساتنا قد يجلس عليها الأصحّاء حتى مع وجود معاقين أحق منهم -بالقانون قبل أن يكون بالإنسانيه التى يحلو للبعض المنّ بها- بالجلوس .. دى حقوق .. حقووووق .. لكن من قلّة عهدنا -أو بالأحرى انعدام عهدنا باستخدامات هذه الكلمه- ننساها .. هناك حقوق لكل فرد فى أى مجتمع لا تصحّ أن تُترَك للحسابات الشخصيه أو للذوق الفردى و الحاله المزاجيه للشخص التى تجعله يمارس الجنتله أحيانا و يمارس التجاهل أحيان أخرى ..

و من ضمن هذه الحقوق أن تجد المرأه -و الرجل طبعا- مكانا لائقا فى وسائل المواصلات دون الاحتياج للغلاسه او التباته على أحد و من حقّها لو لم تجلس أن تقف دون أن يتحرّش بها أحد ولا أن يجد من يدافع عن هذا التحرّش بمنطق "لو مش عاجبك اركبى تاكس" ..

من حقّك أن تجد لابنك مكانا لائقا فى المدرسه دون أن يمارس أحدهم أى نوع من "الجنتله" كى يحقق لك هذا الهدف .. تقدر تتخيّل موظّف بيقول لك : مفيش مكان لابنك فى المدارس بس جدعنه منّى هادبّر له مكان !! :rolleyes:

من حق أمّى أن تسير فى الشارع فيكون هناك أمن و شرطه و نجده و كل وسائل الإنقاذ لا أن يُترَك الأمر ل "شهامة" أولاد البلد إن تعرّضت لمكروه !!

من حقّى أن أجد مكانا محترما لعلاجى دون أن أضطر للشحتفه أو المسكنه كى يخلوا لى سريرا فى مستشفى .. بالمناسبه عمرك سمعت عن عربية سيدات فى المترو فى أى دوله محترمه (كندا مثلا) !! مبلغ علمى أن هذا الاختراع قاصر علينا لأسباب معروفه للجميع .. لكن المشكله أن البعض ينسى أصل المشكله و ينسى أن مثل هذه الأوضاع اضطراريه فى دوله لا تحترم أبسط حقوق مواطنيها و تلقى على كواهلهم مسئولية الوصول للحد الأدنى من هذه الحقوق ولو بممارسة البعض للشحتفه و ممارسة البعض الآخر للجنتله ..

تم تعديل 14 أبريل 2009 بواسطة فــيــروز

[Amr Radwan]

المترو ... الاتوبيس .. القطار .. اي وسيلة مواصلات في اي مدينة في مصر بيكون فيها ناس عاوزة تقضي مصالحها .. يعني مش ناس رايحة تهزر او تغتت علي خلق الله .. و حتي اذا كان فيه من العينات دي بتكون نسبة قليلة جدا .. و بتكون من الجنسين .. يعني مش من الستات بس .. و سهل جدا جدا انك تعرفهم من خلال نظراتهم و حركاتهم .. و الشعب المصري ما شاء الله لما بيشوف الاشكال دي بيتصرف معاهم بالتصرف اللائق اللي يناسبهم .. ممكن ينضربوا و يتهانوا و يتسلموا في النهاية للشرطة ..

نرجع لموضوعنا ..

فيه ستات بتكون ملتزمة بعربات السيدات و البعض التاني مش فارقة .. اهو مترو و خلاص .. و المهم نوصل ..

و فيه ستات تضعهم الظروف انهم يكونو في العربات المشتركة .. و اكرر "المشتركة" و لم الاحظ ان هناك عربات مكتوب عليها للرجال فقط و الاخري للسيدات فقط .. ما شاهدته هو للسيدات فقط و الاخري لم يتم ووضع اي لافتات عليها .. و لذلك فهي "مشتركة"

الظروف دي ممكن تكون ان واحدة مع جوزها و اولادها .. و مش عارفة المحطة اللي هتنزل فيها .. اية المشكلة انها تركب في العربيات "المشتركة" مع جوزها و اولادها ؟؟؟؟!؟!؟

اية المشكلة ان واحدة مسنة مش عندها الصحة اللي تمشي علي رصيف المترو عشان توصل لاول عربيتين اللي فيهم السيدات فقط ؟؟

اية المشكلة طول ما فيه شهامة و جدعنة و احترام الشباب المصري ..

و بعدين علي فكرة .. الستات اللي بنتكلم عليهم دول هما .. اخت و ام و زوجة و ابنة و خالة و "جدة" ..

تحياتي للجميع ..

[fatfouta]

المترو ... الاتوبيس .. القطار .. اي وسيلة مواصلات في اي مدينة في مصر بيكون فيها ناس عاوزة تقضي مصالحها .. يعني مش ناس رايحة تهزر او تغتت علي خلق الله .. و حتي اذا كان فيه من العينات دي بتكون نسبة قليلة جدا .. و بتكون من الجنسين .. يعني مش من الستات بس .. و سهل جدا جدا انك تعرفهم من خلال نظراتهم و حركاتهم .. و الشعب المصري ما شاء الله لما بيشوف الاشكال دي بيتصرف معاهم بالتصرف اللائق اللي يناسبهم .. ممكن ينضربوا و يتهانوا و يتسلموا في النهاية للشرطة ..

نرجع لموضوعنا ..

فيه ستات بتكون ملتزمة بعربات السيدات و البعض التاني مش فارقة .. اهو مترو و خلاص .. و المهم نوصل ..

و فيه ستات تضعهم الظروف انهم يكونو في العربات المشتركة .. و اكرر "المشتركة" و لم الاحظ ان هناك عربات مكتوب عليها للرجال فقط و الاخري للسيدات فقط .. ما شاهدته هو للسيدات فقط و الاخري لم يتم ووضع اي لافتات عليها .. و لذلك فهي "مشتركة"

الظروف دي ممكن تكون ان واحدة مع جوزها و اولادها .. و مش عارفة المحطة اللي هتنزل فيها .. اية المشكلة انها تركب في العربيات "المشتركة" مع جوزها و اولادها ؟؟؟؟!؟!؟

اية المشكلة ان واحدة مسنة مش عندها الصحة اللي تمشي علي رصيف المترو عشان توصل لاول عربيتين اللي فيهم السيدات فقط ؟؟

اية المشكلة طول ما فيه شهامة و جدعنة و احترام الشباب المصري ..

و بعدين علي فكرة .. الستات اللي بنتكلم عليهم دول هما .. اخت و ام و زوجة و ابنة و خالة و "جدة" ..

تحياتي للجميع ..

يا سلام يا عمر مش عارفة اقولك ايه والله دايما كده ناصفنا

ياللا تستاهل دول :rolleyes: :)

[أحمد سيف]

دائما وأبدا نحاول الالتفاف حول المشكلات بدل معالجتها ... ونختلق لأنفسنا الأعذار والحجج لكي نتجنب مواجهة جوهر المشكلة

هذا صفة مصرية أصيلة لم نخترعها ولكننا ورثناها من الأجداد

إذا كانت أعداد عربات المترو المخصصة للنساء قليلة أو أوقاتها غير كافية فإن المنطق يقتضي أن نطالب بزيادتها ... والضغط في سبيل ذلك

وإذا كان هناك تحرش في المواصلات العامة فإن الواجب هو التصدي للمتحرش وتصعيد المشكلة ليلقى جزاءه ويكون عبره لغيره ... ولدينا من ومواد القانون ما يكفي لذلك

كم فتاه أو سيدة توجهت بطلب الى وزير المواصلات لتعديل أوضاع المترو أو واجهت متحرشا بصفعة على وجهه بدل أن تصب جام غضبها على شخص برئ لم يتنازل لها عن مقعده

من حق أي مواطن أن يجد كرسي في المواصلات العامة ومن حق أي مواطن أن يستخدم المواصلات العامة دون تحرش أو تهديد

ولكن لكي نحصل على هذه الحقوق فلابد نطالب بها وندافع عنها في وجه من يسعون لسلبنا اياها ... لا أن نسعى لانتزاعها من الأشخاص المحترمين لأننا نخشى مواجهة غيرهم

أتمنى أن تكون الفكرة قد وصلت

[حسام يوسف]

بسم الله الرحمن الرحيم

والله أنا سعدت جدا بحالة الجدل دي على موضوعنا

هوة بس فيه كام نقطة أحب أأكد عليهم

أولا انا وأخويا مش ضد الستات ولا حاجة

زي ما تفضلتوا جميعا الست هية الأخت والزوجة والأم والابنة

وزي ما برضة الراجل المتهم دايما بتهم جاهزة انه وحش وبيتحرش بالستات

هوة الأب والأخ والزوج والابن

ثانيا

هدف الكاتب اللى هوة أخويا وأنا متفق معاه تماما

اننا ضد مبدأ

الحق المكتسب الست تركب عربية المترو المخصصة للستات

أوكية

الست تركب عربية مشتركة

أوكية

مفيش مشكلة

انما ان التارجت يبقى ان الست من دول تركب عربية مشتركة والخطوة اللى بعدها المسكنة عشان تقعد هية

ويقف الرجل

لأ

لأ

لأ

لأ

لأ

ده تسول بالارهاب

والراجل لازم يقوم للهانم

والا يبقى معندوش ذوق

أو معندوش رحمة

ومعندكوش أخوات بنات

والكلمات اللى زهقنا منها دي

لأ

انا مرضاش لأختى أو أمى أو مراتى انها تقعد

وتوقف راجل

يعنى ترتاح

عن طريق ان حد تانى يتعب ويعانى

دي اسمها أنانية

وتسول مقنع

وارهاب كمان

وعمموا بقى مبدأ المترو ع الحياة العامة

لأ يا ستات

كفاية بقى

وبخصوص الأخت الفاضلة فيروز

بعيدا عن العلمى والصيدلة ومكتب التنسيق ده :rolleyes:

العربيات المخصصة للسيدات مش واحد لعشرة

أعتقد انها اربعة

اتنين بقالهم فترة مخصصيين للستات

ودلوقتى اضافوا كمان اتنين ليهم

من أصل 10 عربات فى كل مترو

ده طبعا بالاضافة للعربيات المشتركة

وكمان أنا مش ضد ركوب السيدات العربات المشتركة

لكن مرة تانية وتالتة

أنا ضد التسول

تم تعديل 14 أبريل 2009 بواسطة حسام يوسف

[فــيــروز]

أنا شخصيا ليس لدىّ معلومه عن أن عدد العربيات المخصصه للسيدات فى المترو أربعه و أترك تأكيد هذا لركّابه الدائمين .. :rolleyes:

الرجل ليس متّهما بتهم جاهزه من ضمنها التحرّش جورا و ظلما .. هناك إحصائيات من داخل و خارج البلد بتتكلّم عن نسبة التحرّش المرتفعه جدّا التى تتعرّض لها النساء من مختلف الطبقات و الأعمار ..

محدّش يقدر يجبر حد يقوم من على مقعده لإجلاسه .. حقيقة محدّش و تستطيع أن تقولها لأى امرأه بكل بساطه -زى ما عملت فعلا- : مش هاقوم من على مقعدى ..

والحقيقه إن اللىّ كنت عاوزه أقوله من مداخلتى اللىّ فاتت أن النساء لو تحققت لهن المساواه المزعومه التى يواجهن اللوم عليها و لو تحققت لهن الحقوق -اللىّ من حق كل مواطن فى اى بلد محترمه- مش هيبقوا بحاجه لشهامة أى شهم أو جنتلة أى جنتل .. يعنى همّا مش غاويين "يلقّحوا" جتتهم على الرجال و يبتزوهم غلاسه أو غتاته أو لغرض فى نفس "يعقوبه" .. و بصفتى من النساء باقول لك يا "حسام" وفّر شهامتك وماتقومش من على كرسيك لأنّه ليس المطلوب أن نعيش حياتنا بحسابات شهامة الجدعان و مرجلتهم أو حسب حالتهم المزاجيه التى ستحدد إمتى يحب يبقى شهم و إمتى مايحبّش !! بس ماتنساش تطبّق نفس الشئ بالنسبه للعجائز و ذوى الاحتياجات الخاصّه لأن بردو مش ذنبك إن مالهمش مكان فى الأتوبيس و عليهم أن يطالبوا بحقوقهم ولو وجدوا من يجلس على مقاعدهم فى الأتوبيس أن يلطشوه بالقلم أو يرفسوه شلّوت عشان يسترجعوا حقوقهم السليبه ..

و لو إن يعنى لو كان الموضوع ببساطة "طالبوا بحقوقكم و اسعوا لنيلها بالقانون" ماكنتش حضرتك و ناس كتير فى المنتدى فكّرتم فى الهجره طالما أن أخذ أبسط الحقوق قابل للنيل و التحقق بمجرّد الطلب !! هو انت عاوز تهاجر ليه يا "حسام" إلى بلد ربّما يكون صوت حقوق المرأه فيها و المدافعات عن هذه الحقوق أعلى و أشرس بكثير ممّا يحدث فى "مصر" !! ابقى خلّى بالك بقى ..