انا و بنتي ............عاوزة حد يشوفلي حل

[pink rose]

السلام عليكم

عندي استفسار و عاوزة حد يساعدني

عندي بنوتة عسولة كده عمرها 3 و نص لسا ما دخلتش المدرسة

حياتنا انا و هي عادية اللي بيحصل بين كل ام مع ولادها مش عاوزين ياكلوا و تفضل الام تتحايل شوية و تزعق شوية و هكذا في كل حاجه

المهم بقى و المشكلة في بنتي انها اول ما باباها يجي بتتحول لواحدة تانية خالص واحدة عاوزاه يكلمها هي بس و بتقلب نفسها بقى هي انا و انا هي

فاهمين يعني هي ريم و انا اللي مريم بنتها و رايجة جاية بقى تتدلع على باباها و تقوله انا اللي مراتك و هي بنتك ما تكلمهاش كلمني انا

يالا يا روح قلبي نخرج انا و انت و نسيبها هي هنا عشان مش بتسمع كلامي خالص(الكلام دا عليا انا طبعا)

احنا كده كل يوم بقى تتقمص شخصيتي انا و مش عاوزاه يكلمني او يقعد جنبي لدرجة انها ساعات مش بتبقى عاوزة تنام في اوضتها و عاوزة تنام في النص بيني و بينه

انا بصراحة مش عارفه دا عادي انا دايما اعرف ان البنت بتحب باباها و بس مش عارفه تحبه لدرجة انها عاوزة تلغيني من الوجود معاهم

انا خايفة انها تكون بتكرهني لاني طبعا انا اللي قدامها طول الوقت انا اللي باقول على الغلط لأ و بازعق

حد يساعدني انا و يقولي اللي بيحصل دا طبيعي و لا الموضوع محتاج حل تاني

[شاب مصري]

ربنا يخليهالكم وتفرحوا بيها

أنا شايف ان مفيش مشكلة .. متكبريش الموضوع دي طفلة

هي متقصدش الكلام الكبير اللي حضرتك فهمتيه من تصرفها .

[icehearted girl]

بصي يا ريمو تعلق البنت بوالدها دا شئ طبيعي جدا ومنطقي

انما اللي زيادة عن اللزوم شوية هو رغبتها الغاء شخصيتك من حياته

وبكدا الحل هيكون بين ايدين زوجك

انه يحاول يعدل الصورة دي خلال حديثه معاها

[ghnammar]

الاخت العزيزه السلام عليكم لاتقلقى من هذا فانا هندى ابنى له هذا التصرف حتى انه داءءما يقول لمامته ان بابا هييتزوج وهنرميكى فى الشارع فلا تقلقى من هذا وتمتعى بطفولتها وحياتك

[pink rose]

متشكرة جدا لردودكم

انا بس خايفة يكون تقمصها لشخصيتي دا نابع من انها تكون كراهاني او انها تكون بتعمل اسقاط للي باعمله معاها

يعني انا طول اليوم بس يا مريم عيب يا مريم غلط يا مريم كلي يا مريم و حوارات كتير مش بتنتهي انا خايفة تكون بتكرهني لاني دايما في نظرها امنا الغولة اللي مش مخلياها تاخد راحتها و طبعا باباها طول اليوم في الشغل الشوية اللي بيجيهم دلع في دلع

يمكن عشان كده هي عاوزة تبعدني عنهم بس هي مزوداها في جوار انها مراته و هو جوزها

يعني هاديكم امثلة

شافت شريط الفرح بتاعنا و من يومها لازم كل يوم ترقص معاه سلو الاول افتكرنا انها لقيتها حاجه جديدة لكن كل يوم تعالى نرقص سوا او تعال ارقص معايا زي ريم

امبارح مثلا باباها جابلي ورد طبعا اتصادر فورا و دا بتاعي انا جوزي جابهولي انتي مش مراته انتي بنته و اخدت الورد مني

انا ببقى مستغربة من رد فعلها السريع ضدي

و زي ما قولتي يا ايس فعلا باباها بيكلمها دي مامي حيبيتك لازم تخرج معانا انتي بنتي حبيبتي و هي مراتي حبيبتي طبعا و لا حياة لمن تنادي لا باقولك هي بنتك و انا اللي مراتك انت عاوزني ازعل منك و لا ايه في حد يقول لمراته انها مش مراته و بتتكلم بجد و ممكن تتقمص و تعيط لما يقولها انتي بنتي

[icehearted girl]

هم يضحك وهم يبكي

ربنا يخليهالك يارب :wub:

[pink rose]

الاخت العزيزه السلام عليكم لاتقلقى من هذا فانا هندى ابنى له هذا التصرف حتى انه داءءما يقول لمامته ان بابا هييتزوج وهنرميكى فى الشارع فلا تقلقى من هذا وتمتعى بطفولتها وحياتك

ربنا يخليهولك زي العسل ما شاء الله :wub: mfb:

هما فعلا ليهم كلام مش ممكن يهلك من الضحك

انا باضحك و الله لما تعمل حاجات كده بس خايفة انها تكون حاجه زيادة و انا اطنش و ما اعرفش اتصرف بعد كده

[Alshiekh]

السلام عليكم

عندي استفسار و عاوزة حد يساعدني

رايى ان تشتركى معها فى التمثيلية ، او اللعبة وكما فى اى لعبة بعد انتهاء اللعب ، ترجعى لدور الماما تانى بشرط انك تقولى لها مثلا ، يلا يامريم خلصنا لعب ، يلا عشان العشا مثلا او الغذا او اى حاجة ثانية علشانلاتستمر فى تقمص الدور.

وثقى ان كل العيال وبالذات البنات بيعملوا كده يمكن مش بنفس الطريقة ، لكن بيعملوا كده مع عروستهم ، تلاقى البنت عاملة انها ماما لعروستها ، ولما تكبر شوية تعمل مدرسة لشوية العرايس اللى عندها او مع صوحيباتها لو كانت فى وسط عائلة كبيرة .

ارى ان لاتأخذى الموضوع على انه مرضى فقط حاولى دائما ات تعيديها لحالة الواقع ، ويمكنك ان تمارسى معها التمثيلية فى غياب الوالد حتى تتعود على انها لعبة.

[ايناس احمد]

بصى ياريم متقلقيش ياحبيبتى كل صحباتى اللى عندهم بنات تقريبا نفس الشكوى

بس يمكن مريومة ربنا يخليها لكم مزوداها شوية حاولو تطنشوها متديش للموضوع اهمية قدامها وتبينى انك متضايقة لان الاطفال انتى عارفاهم عنديين

لو عيطت ذى مابتقولى خلى باباها يطنشها شوية ويقولها انتى بنتى حبيبتى ويحسسها انة بيحبها اكتر لما تقوم بدور البنت

ربنا يبارك لكم فيها

[se_ Elsyed]

الاخت العزيزه السلام عليكم لاتقلقى من هذا فانا هندى ابنى له هذا التصرف حتى انه داءءما يقول لمامته ان بابا هييتزوج وهنرميكى فى الشارع فلا تقلقى من هذا وتمتعى بطفولتها وحياتك

يا عم لخبطتني ..

انا قولت هندي وجه بالغلط هنا ؟

ولا هندي وبيعرف عربي ؟

ولا هندي ومتقمص شخصية مصرية ؟

وللمرة الثالثة اقرأ الموضوع واعمل توافيق وتباديل في الحروف فأكتشفت انها " انا عندي " مش انا في نفر هندي صديج "

يعني حرف واحد منحك جنسية اخرى

على فكرة

لو كنت كتبتها بالكاف كان زمانها بقت " انا كندي " وولا ابليكيشن ولا فايل نمبر ولا كشف طبي ولا لاندنج ولا هاتحتاج نافيجيتور من بتاع عمنا الشامي ربنا يرجعه بالسلامه من فتوحاته الكندية ويأسر لنا سبايا من هناك

[se_ Elsyed]

الموضوع بسيط جداً حضرتك وتفسيره ان البنت زهقانه منك طول اليوم لإنك معاها ... وبالتالي بتحب تغير وتتعلق بوالدها لما يرجع من الشغل ... لكن ممكن انتم الاثنين تصلحوا الوضع ده وتشعروها بحب متساوي منكما عشان مما تشعرش هي بالفرق ولا يحاول طرف استقطاب البنت تجاهه لإن هذا خطأ .

وأدعي لي ربنا يرزقني ببنت

( ابو ريم راح فين عشان ينزل لنا شوية حركات من اللي عنده )

ساعتها هاقعد اعض فيها طول اليوم وازبل الخناشير اللي عندي دول واديهم بالشلوت

[aif]

الغيرة دي شيء طبيعي

واحدة صديقة زوجتي عندها بنت 4سنوات ونص

كانت امها بتنام معاها هي واخوها ...وبعدين اما كبرو شوية كانت عاوزاها تتعود على انها تنام لوحدها وامها تنام في غرفتها مع الاب

في اول ليلة .... الام سمعت صوت غريب خارج الغرفة في عز الليل ... خرجت لقت البنت نايمة جنب باب غرفت الام والاب وبتبكي في صمت ..... طبعا الام كانت في منتهى الالم .... وبمحاولة اقناعها ان بابا بينام لوحده ولازم ماما تنام معاه .... اجابت البنت ... طيب انا ح انام مع بابا وانتي نامي مع اخويا

اعتقد ان الغيرة دي في هذا السن شيء طبيعي جدا

[الباشمهندس ياسر]

اخاف ليكون غيرة البنت من حضرتك زيادة عن الحد

عموما لما ربنا يكرمك و تخاويها ... اكيد الموضوع هيفرق

عمنا س س

و بعدين معاك بقى

مش خايف ليقولوا بيشجع التعدد و الغزو و الجهاد و الحركات دى

عمنا الشامي ربنا يرجعه بالسلامه من فتوحاته الكندية ويأسر لنا سبايا من هناك

[احمد عبده]

ربنا يبارك لك فيها مدام ريم

لو فكرنا من وجهة نظرها هي ( تقمصنا شخصيتها)

هيبقي في سؤال مهم هو لو مريم عايزه تستحوذ علي حب باباها هتاخد دور الزوجة ولا دور البنت الدلوعة ( حبيبة باباها)

يعني عادي فعلا انها تغير منك او تزهق من كلي واشربي لكن ايه سبب التبديل ما المفروض ان البنت محبوبة ومتدلعة اكتر من الزوجة

لعب و حلويات وشيل وعرايس

وبيتهيألي هي دي المشكلة

لو شوية اهتمام ودلع زيادة من باباها

شيكولاتة وحلويات ودلع هتلاقي انها بتحب تكون بنته اكتر من مراته

ولو مثلت دورك يبقي يطلب منها اي حاجة من واجبتك المنزلية ( حاجة سهلة بس بايخة ياحبذا الكنس)

فترة قصيرة و تحب دور الابنة اكتر

وماتدهوش لها بسهولة قوليلها لا احنا خلاص اتفقنا اني انا الصغيرة

وضمان التوكيل بتاع البنوتات الصغيرين لمدة 5 سنين

[newcomer]

ربنا يخليلك مريومة يا رب

شوفى يا ريمو هانم أنا عندى شوية ملاحظات .....استحملينى شوية....

انا لاحظت من كلام حضرتك ....انها ساعات بتندهلك بأسمك....

و انها لما بتعمل حاجة بتضحك....ساعات مابتقدريش تتحكمى فى انفعالاتك

و بتضحكى......

طيب .....خلينا نفكر سوا....

* مفيش طفل هايكره أمه علشان بتقوله اعمل و ماتعملش...

* تعلق البنات بباباهم و غيريتهم من مامتهم( ان جاز التعبير)

ما بتبقاش فى سن 3 سنين ابدا.....لسه شويه...

* الأطفال من الذكاء و نقاء الذهن.....انه يشوف رد فعل الاب

و الام و القريبين منه .....ويبنى عليه تصرفاته

يعنى مريومه اكيد.....انتوا ضحكتوا ليها لما ابتدت فى التمثيلية دى

و ممكن طبعا حكيتى لحد فى التليفون.....او بالرمز ....او و حضرتك

فاكراها مش واخده بالها و بتلعب.....

هى بشكل ما حسيت ان اللعبة دى بتجبلها اهتمام أو بتشوف ابتسامتكم

على اللى هيه بتعمله

......لو حنفكر سوا فى الحل......اول حاجة لازم تحسيسيها بانك مامتها

يعنى لازم تندهلك بماما .....و باباها و الناس اللى حواليكى

يبتدوا يشتركوا معاكى " روحى أسألى مامى الأول"

قولى لمامى اتفضلى حضرتك"....."قولى لمامى من فضلك الأول...."

بعدين ......القصص بقى.....ليها مفعول قوى جدا

الولد الشاطر اللى مامته بتقوله.....و بتعمله.....و هو يقولها حااااااااااضر يا مامى

العصفورة اللى مامتها. راحت فين و عملت ايه............. ألفى زى مانتى عايزه......

بعدين نيجى للعرايس و التمثليات مع العرايس.....يا سلام ....شغل زى الفل

ممكن برضه الصور .....دى البطة الكبيرة ....و دى بنتها......دى العصفورة.....و دى....

صور ام حامل من على النت ....او أى واحده ماشيه فى الشارع حامل

فهميها بشكل بسيط ......ان دى ام و فى بطنها بيبى ....بتحبه اوى

و عايزاه يبقى جميل و بيسمع الكلام.......و يحبها....

لما تيجى تلعب اللعبة دى مع باباها يعمل نفسه مش سامع

و من غير اى رد فعل على وشه او على وش حضرتك

اتكلموا فى حاجة تانية خالص ...... اى موضوع عادى.....

ماتحاولوش تكافئوها بتعالى نجيب شوكلاتة..... و لا تعالى نشترى لعبة

و برضة ما تستفزوهاش بكلام او مواضيع تحس انها مش فهماه

يعنى ياه.....شوفت انت نسيت تصلح ال....أو على فكرة ....البرنامج بتاعك

غيروا ميعاده......او ده فيه جيران جداد هايجوا فى الشارع اللى ماحدش عارفة...

كده يعنى.....شويه .....شويه.....هى هاتنسى اللعبة دى

و حاولى تشوفى لها حضانة كويسة .....و خليها تختلط بالأطفال

و تعيش زيهم.....

انا طولت أوى.......بس حابه افكر معاكى فى حل

[doha]

اطمني بنتي عمرها اربع سنين ونصف وبتعمل الي قلتي عليه بالكربون ومن لما كانت اصغر من بنتك كمان..

تعودت على منعها لي اني افتح اي موضوع مع والدها وهي موجوده لانها فورا هتقاطعني وتطلب مني اسكت وتقول لوالدها بكل صراحه كلمني انا متكلمهاش هي ولو مسمعناش كلامها واستمرينا في الحوار ( تنقمص ) وتدخل غرفتها .. عادي جدا .

للتغلب على الحكاية دي بهاودها واسكت لما تقطاعنا بس مبحاولش اني افتح حوارات طويلة قدامها عشان مديلهاش فرصة تعترض او بمعنى ادق مديلهاش فرصة تثبت انها الاقوى لانها للاسف متدلعه شويه ..

بالنسبة للنوم في النص فده كان الامر الطبيعي والمسلم بيه لغايه من فترة قريبة جدا .. عملت لها اوضة من زمان وحطيت لها فيها سريرها والعابها وكل شيء بتحبه وسبتها براحتها خالص لغايه ماجاء يوم بقت بتنام هي فيها من نفسها بدون مااغصبها على كده .. طبعا الاوضة موجوده من يوم ماتولدت لكن مستخدمتهاش في النوم غير من قريب جدا زي ماقلت لك .. اهم حاجه انتي متضغطيش عليها وسيبيها هي مع مشاهدة الكرتون هتتبرمج على ان كل واحد له غرفة مستقلة ومحدش بينام مع اهله غير النونات الصغيرين اوي ..

بالنسبة بقى لحكاية تقمصها شخصيتك فاعتقد ان ده على عكس ماانتي فاهمه حبا فيك مش كره .. بنتي عقدتني بموضوع تقمص الشخصيات كل كام اسبوع لها شخصية تصر اننا نناديها بيها .. بتتفرج على الكرتون وتدمن الفرجه على مسلسل معين وتعيد وتزيد فيه على الكمبيوتر وتحرص على متابعه حلقاته على التلفزيون لغايه مايجي يوم وتقول انا فلان او فلانه باسم الكرتون ده وتزعل لو ناديتها باسمها وتقول لاه انا مش كذا انا فلان الكرتون وهكذا .. واحيانا لو الكرتون الي بتحبه فيه اكتر من شخصيه فبتطلق علي اسم احدى الشخصيات ووالدها شخصيه ثانيه وجدها و جدتها ثالثه وهكذا .

وبتجد متعه في انها تتقمص الشخصيات دي وبتطلب مني اجيب لها صور تلوين من النت للشخصيه الي بتحبها وبتقتني العابها الي شكلها ولو لها لبس مميز بتطلبه مني وهكذا .. فترة بتاخذها بعدين ترجع لشخصيتها بعدين ترجع تتقمص شخصية جديده وهكذا ..

طبعا انا قلقت من ناحية موضوع تقمص الشخصيات الي معاها بقاله يمكن سنه ونص تقريبا بس براقبها من بعيد لبعيد واعتقد للآن الامر تحت السيطرة .

الخلاصة بنتك عاديه جدا في سنها الي بتعمله ده بس يمكن هي زي بنتي وحيده ملهاش اخوات ومفيش حواليها اطفال كتير تختلط بيهم باستمرار زي حضانة واو ماشابه عشان كده مطلعه عينكم شويه زي الي عندي ..

[esocial]

ماشاء الله ربنا يخليهالكم هى باين عليها زكيه لكن انا شايف انك لازم تغيرى اسلوبك معاها وتعامليها على انها أكبر من سنها شوية وتدلعيها وتديها اهتمام زيادة وتخديها بسياسة لأنها بتاخد تصرفاتك على اساس انك عايزة تتحكمى فيها فحاولى تدلعيها زى ابوها ما بيدلعها او انكم تكونوا زى بعض معتدلين معها فى التعامل .

[بركة]

بصي يا ستي الحل بمنتهى البساطة إن بنتك ليس لها عالمها الخاص بيها إنت وبباها كل دنيتها

بنتي أنا كمان إختلفت تماما لما راحت الحضانه استوعبت انها طفلة زي باقي الاطفال ونسيت الحاجات الغريبة

اللي كانت بتعملها يعني حالها اتقلب 180 درجة .........

واضح انها أول طفلة أنا بسمي الطفل الاول حقل تجارب أبوين جديدين عديمي الخبرة

هوني على نفسك هي شايفاكي قدامها طول الوقت وما اكتسبتش حاجة تعملها وتحبها فمافيش قدامها غير

السيناريو اليومي بتاعك معاها ولقت اللعبة حلوة وبتبسطكوا فقالت طول ما أنا مبسوطة وهم مبسوطين

يبقى ألعب بقى........ bv:-

[عنبو]

اولا السلام عليكم ورحمة الله وبركاته

ربنا يارب يارب يخليهالك ويفرحك بيها مش تقلقلى

انا شايف ان الحل كله فى ايد بابابها يعنى هو ممكن يقلها انى دى مامتك وهى اللى جابتك وهى بتحبه يبقى اكيد هتعرف فضلك عليها يعنى انا كان ليا ابن خالتى لسه عيل صغير ولوه اخ برضه فى عمر بنتك الواحد الكبير اللى عنده 6 سنين كان بيكره اخوه وهما الاتنين بيحبونى انا استغليت ده وخليتهم يحبوا بعض ويخافوا على بعض يعنى انتى اتفقى مه باباها واحده واحده هتلاقيها بقت تحبك وممكن تنسى بابها وبعدين ابقوا ارجعوا اعملوا نفس القصه دى

بجد الموضوع مع باباها اقولى له وان شاء تكبر وتفرحوا بيها بس مش تنسى تبقى تعزمنى على الفرح ؟؟ انا بتكلم عن تجربه لازم نفهم الاطفال ازاى بيفكروا وازى نقدر نغرس جواهم اللى احنا عاوزينه