صرصار فوبيا

[عادل أبوزيد]

فى الشهر المنصرم قضيت فترة فى الساحل الشمالى و حقيقة كنت فى أمس الحاجة إليها.

و الساحل الشمالى عبارة عن العديد من التجمعات التى يطلق عليه قرى ساحلية و الصيف فيها يذكرنى بصيف الأيام الخوالى حيث يتناثر الأقارب بين بلاجات الإسكندرية و يتجمعون فى بيت احد أفراد الأسرة للسمر فى الأمسيات الصيفية.

المهم فى أحدى الليالى كنت و زوجتى و بعض الأقارب فى زيارة بعض الأقارب و الجلسة مسائية و بعد الشاى و التين و الكيك و الذى منه لإذا بقريبتنا هذه تصرخ و تستمر فى الصراخ و تنادى بناتها و بعد تهدئتها و جدناها ما زالت ترتجف و غمرها العرق البارد و زادت ضربات قلبها ....... !!!!

و عرفنا الحقيقة أن قريبتنا هذه مصابة بالخوف الشديد من الصراصير و أن هذه الأعراض تنتابها فى كل مرة ترى فيها صرصارا و يبدو أنها تخجل من أن يعرف الآخرون هذا الخوف بل أن الأسرة نفسها تأخذ هذا الأمر كنوع من قصص التسلية .

أتصور أنا أن تلك حالة مرضية فعلا !!

أرجو النصيحة هل تعرض نفسها على طبيب طبيب نفسى مثلا؟

أنتم تعرفون أن مجرد ذكر العرض على طبيب نفسى تؤدى الى الهلع

أريد النصيحة و هل هناك علاج ناجح لذلك الأمر و ما هى كيفية العلاج

و أخيرا هل كلمة "صرصار فوبيا " كعنوان للموضوع صحيحة ؟

[فــيــروز]

و أخيرا هل كلمة "صرصار فوبيا " كعنوان للموضوع صحيحة ؟

ليه لا :) اذا كانت الفوبيا هى الخوف المرضى من بعض الاشياء يعنى هناك من لديهم صرصار فوبيا ومن لديهم برص فوبيا زيى وهناك عرسه فوبيا .. لكن ما طرا على ذهنى الآن هو لماذا يكون لدينا فوبيا من الصرصار ولا يكون هناك فوبيا من الذباب مثلا او الناموس رغم ان كلها حشرات ضاره !! هل لان هناك تعايش بيننا وبين الذباب و الناموس بينما الصرصار بنقابله صدف !! لا صحيح اذا كنا بنقرف من الصرصار لانه حشره مقرفه -هو فعلا مقرف اوى :( استغفر الله العظيم- طيب ليه مش بنحس بنفس الهلع من الذباب و الناموس؟

اعتقد ان امر العرض على طبيب نفسى يبت فيه طبيب نفسى .. اعتقد ممكن دكتور ابو حلاوه يفيدنا فى الموضوع ده يعنى متى يتحول هذا الخوف العادى الى خوف مرضى يستوجب العلاج .. مع تحيات بايجون :)

[سقراط المصري]

هستأذن الأخ أبو حلاوه واجاوب على الموضوع

وطبعاً للأخ الفاضل ابو حلاوه كامل الحرية ان يقيم ويعدل تعليقي .

.......

الأخ الفضل عادل ابوزيد

العنوان الصحيح للموضوع هو فوبيا الصراصير وليس العكس.

ماذكرته حضرتك من أعراض هي أعراض الفوبيا فعلاً.

........

اسباب حدوث الفوبيا بصفه عامه هي مواقف تعلم خاطئه ، بمعنى ان قد يحدث ان يتعرض الفرد لخبرة ما سيئة وهذه الخبرة حدثت او اقترنت بموضوع معين (الصرصار مثلا هنا) فيقوم الفرد بالربط بين الحدثين معا ، بحيث ان ظهور احدهما يؤدي الى ظهور اعراض إضطرابيه للخبره كلها بصفة عامه ، ثم ينسى الفرد هذا الارتباط بين الموضوع والخبره السيئه ، ليستمر الموضوع بمفرده في إحداث الأعراض المرضيه.

...........................

الفرق بين الخوف والفوبيا

الخوف هو خوف من موضوعات تسبب وتستدعي فعلاً الخوف .

فمثلاً انا إذا رأيت أسداً وخفت فهذا طبيعي لان المثير هنا وهو الأسد من شأنه ان يهدد حياتي ويسبب الخوف.

اما الفوبيا فهو الخوف من موضوعات لاتستدعي او لا تسبب تهديدا للفرد.

مثال على ذلك الصراصير ، العناكب غير السامه ، الذباب.

........................

ومن أشهر انواع الفوبيا :

الخوف من الاماكن المرتفعه.

الخوف من الاماكن المغلقه او الضيقه مثل الأسانسير....وهكذا

......................

علاج الفوبيا

يوجد طريقتين متناقضتين لعلاج الفوبيا وهما:

1- طريقة الغمر

بمعنى ان تضع الشخص الخائف من الصراصير مع عدد من الصراصير في حجره بمفرده. طبعا هيصرخ ويتشنج ، بس بعد ذلك سيغلب على مخاوفه وتصبح شيىء عادي.

مميزاتها انها سريعه

عيوبها انها لاتصلح مع من يعانون القلب او اعراض من شانها ان تسبب ألما جسديا ، بمعنى ان اسلوب الغمر قد يحدث فيه افرازات عرق وزيادة ضربات القلب قد تكون مميته احيانا في حالة اذا كان الشخص مريض بأحد الامراض الجسديه مثل الفلب.

2- طريقة التدريجيه

اي تبدأ بتقديم مثير الخوف على مراحل وفي عده جلسات

منها تقديم مجرد صوره للصرصار في كتاب، وبعد ان يعتادها المريض في الجلسه الثانيه يكون مثلا الصرصار على بعد 10 متر منه

والجلسه الثالثه على بعد مترين وهكذا

مع تهدئه المريض دائما وتفهم مخاوفه.

مميزاتها تنفع مع ضعاف القلب

عيوبها - من وجهة نظري- انها قد تحتاج لعدد من الجلسات.

............................................

ارجو ان اكون وضحت للأخ عادل نبذه عن الفوبيا

وشكرا

سقراط المصري

[ragab2]

فى

زيارتى لشقتى فى الاسكندرية المغلقة طول العام

وجدتها تحولت الى مزرعة أو نادى للصراصير فقمت فورا بشراء علب المبيدات الحشرية واستهلكت العشرات منها وكان أشهرها هو نوع كيروكس kirox وكان مهلكا من أول رشة بشرط لبس كمامة للحماية من أبخرته وبالرغم من ذلك كان تكاثر الصراصير اسرع من الكيروكس

فلجأت للمراجع أبحث عن حكاية الصراصير ودورة حياتها وطريقة مقاومتها والقضاء عليها وأنواعها وخاصة النوع الصغير منها الذى يتكاثر بسرعة فائقة والذى ظهر جديدا فى مصر ويختلف عن الصرصار الألمانى الكبير المعروف فى مصر من زمن بعيد وخاصة أنى أتقذذ وأصاب بالقرف منها

وتوصلت لابادتهم بعجينة من حمض البوريك boric acid التى تترك فى الأركان تحت الأحواض ودواليب المطبخ وتتغذى عليها الصراصير فتعمل على اذابة الطبقة الكيراتينية حول مفاصل الصرصار وداخل أحشائه فتشل حركته وتهلكه وتقضى علي الصراصير فى زمن قياسى ومتوفرة فى غالبية الصيدليات ومجهزة للاستعمال بشرط سد جميع الشقوق التى تختفى فيها الصراصير

وخطورة الصراصير تكمن فى أنها تلوث الطعام وأوانى المطبخ كما يعلق بعضها بمخلفات الانسان داخل التواليت وخاصة الصرصار الأمريكى وبذا ينقل الميكروبات الخاصة بكثير من الأمراض وخاصة بكتريا التسمم الغذائى

مثل الشيجيلا Shigella

والسالمونيلا Salmonella

وينقل أيضا التهاب الكبد الفيروسى hepatitis virus A , B

وسأنشر لاحقا جزء من هذا البحث ان شاء الله

أما من الناحية النفسية والخوف منها فيسأل فى ذلك أخونا الدكتور أبو حلاوة

[freefreer]

عندى قصة طريفة فى مواضيع الفوبيا .. كان عندى صديق مسكين بيخاف من الفيران .. و ليلة الدخلة راحوا شقتهم الجديدة .. و بعدين احتاج حاجة من المطبخ .. فوجد فيه فار .. فجرى على مراته يستنجد بها لطرد الفار .. حتى يستطيع دخوا المطبخ .. و قد كان ..

المهم عندما حكى لنا القصة .. متنا على روحنا من الضحك أن يحدث هذا ليلة الدخلة ..

أظن ان العلاج صعب جدا .. خاصة بالنسبة للكبار ..

[disappointed]

أريد النصيحة و هل هناك علاج ناجح لذلك الأمر و ما هى كيفية العلاج

هوّه فيه Trend عام فى علاج حالات الفوبيا بيقول انّه أفضل علاج للفوبيا من شيئ ما هو تعريض المريض للشيئ الذى يخاف منه لفترة متّصلة و بصورة مكثّفة حتّى يتخلّص من خوفه منه ويكسر الحاجز النفسى الملازم له تجاهه (حاجه كده زى وجع ساعة ولا كل ساعه أو زى علقة وتفوت) كأن يتم وضع المريض فى غرفة مغلقة لفترة طويلة اذا كان يخاف من الأماكن المغلقه أو اصطحابه الى أعلى نقطه فى برج القاهرة اذا كان يخاف من الأماكن العاليه...وهكذا

بس فى موضوع الصراصير ده أشك ان المريضة دى حتستحمل مثل هذه التجربه ناهيك عن صعوبة تنفيذها عمليّا

بالمناسبه:

فيه حكايه لو سمعتها قريبتك يا أستاذ عادل حيغمى عليها...أنا حأقولها ليك بس ما تقولهاش لقريبتك

وأنا فى فترة الامتياز كنت سهران فى الطوارئ وجالى واحد من عساكر الأمن المركزى الصعايدة الغلابه اللى بيصعبوا على الواحد من قسوة ظروفهم المعيشيّة فى معسكراتهم...جه امتى بقى....الساعة 2 الفجر.. وكان بيشتكى من ألم شديد و "زنّه " متقطّعة فى أحد أذنيه...وكانت المفاجئة المذهلة لمّا بصّيت على ودنه...لقيت صرصار صاحى دخل ودنه وهوّه نايم فى المعسكر واتزنق جوّه ومش عارف يطلع وعمّال يعافر جوّه ودنه......طبعا كان الحل الوحيد قدّامى هوّه التصرّف بالتفكير التلقائى لأننا مادرسناش الحقيقه نعمل ايه لمّا يكون فيه صرصار فى الودن...فقمت بسكب داخل الأذن بعض من مخدّر الزايلوكين السائل الذى نستخدمه فى الحقن الموضعى عند خياطة الجروح...وانتظرت بضعة دقائق حتّى خارت قوى الصرصار فقمت بسحبّه من أذن المريض بماسك الخيوط (أو تقدر تقول كده قمت بانتشال الصرصار من أذن المريض كما يتم انتشال قطّه من بالوعة)

الغريب انّى ثانى يوم لمّا بأحكى القصّة لبعض المدرّسن المساعدين من باب التندّر و الاتيان بقصّة تفوق الخيال لقيتهم بيقولوا لى : "ييييييه....دى بتحصل على طول...انت بس اللى جديد على نوبتجيّات الحوادث فى الدمرداش "

وش واحد راشش فليت النهارده

[Lighthouse]

انا الحمد لله ماعنديش فوبيا الصراصير دي

بس باقرف منهم

ولو حد فكر يستخدم معايا الطريقة دي

- طريقة الغمر

بمعنى ان تضع الشخص الخائف من الصراصير مع عدد من الصراصير في حجره بمفرده. طبعا هيصرخ ويتشنج ، بس بعد ذلك سيغلب على مخاوفه وتصبح شيىء عادي.

مميزاتها انها سريعه

ح اغمره هو مع الصراصير هههههههههههه

[فــيــروز]

الخوف من الاماكن المغلقه او الضيقه مثل الأسانسير....وهكذا

علاج الفوبيا

1- طريقة الغمر

ايوه زمان وانا صغيره اوى كنت باخاف جدا من الاسانسير ومش عارفه ليه كان بيبقى عندى هلع فظيع من ركوبه و اعتقاد جازم انه سيتوقف بى للابد وهاموت فيه مخنوقه حتى كتير كنت احلم بالاسناسيرات !! وكنت اشعر بالهلع كلما مر المصعد امام الحائط فى طريق الصعود او النزول .. وكان احيان ممكن الباب يتفتح بطريق الصدفه ويقف الاسانسير ثوانى مخيفه بالنسبه لى ..

لغاية ما فى يوم من ايام العيد الكبير كنت مع بعض اقاربى فى الاسانسير وكان عندى مثلا عشر سنين وانا اكبر الموجودين فيه ووقف الاسانسير .. ونحاول نشغله يهديك يرضيك انه يتحرك ابدا .. وانا بدات اعيط بهلع و قعدت على الارض فى الاسانسير اندب حظى واعيط بهستيريا واقول لهم خلاص هنموت ومش عارفه لو كنت لوحدى ساعتها كنت عملت ايه .. المهم وصل البواب اخيرا و سحب الاسناسير بالتصوير البطئ .. وبعد ما خرجنا فضلت فتره لا اركب الاسانسير مطلقا واطلع عشرة ادوار على السلم .. وكنت قبل موضوع تعطل الاسانسير مش باركبه لوحدى اصلا و بعدها فضلت فتره لا اركبه خالص بس بعد كده بقيت آخد الامر ببساطه شديده ومابقيتش اخاف منه لا وايه بقيت اركبه لوحدى !! واعتقد ان تعطله فى تلك المره كان هو السبب .. بس ده مايمنعش انى مش باتحمل اطلاقا ابقى فى مكان ضيق و باحس بالاختناق بمجرد تفكيرى فى الوجود بمكان ضيق و باتعصب جدا لو حد حاول مثلا من قبيل الهزار البايخ انه يحط غطا على وشى .. عقد و شراشيب ..

[maksoof]

1- طريقة الغمر

بمعنى ان تضع الشخص الخائف من الصراصير مع عدد من الصراصير في حجره بمفرده. طبعا هيصرخ ويتشنج ، بس بعد ذلك سيغلب على مخاوفه وتصبح شيىء عادي.

مميزاتها انها سريعه

عيوبها انها لاتصلح مع من يعانون القلب او اعراض من شانها ان تسبب ألما جسديا ، بمعنى ان اسلوب الغمر قد يحدث فيه افرازات عرق وزيادة ضربات القلب قد تكون مميته احيانا في حالة اذا كان الشخص مريض بأحد الامراض الجسديه مثل الفلب.

فى المشمش!

و الحمد لله المشمش ما بيتزرعش هنا فى شمال كندا.

بصراحة أنا بترعب من الصراصير و ده واحد من الأسباب اللى مخليانى مبسوط هنا حتى ولو درجة الحرارة بتحصل ناقص50 مئوية!

يعنى أنا شفت دب مرة Grizly و ما خفتش. إتصرفت زى الكتاب ما بيقول و راح لحاله و سابني فى حالى. و التعابين و التماسيح و حتي العفاريت ما يخوفونيش.

إلا الصراصير!

و متشكر قوى .. مش عايز علاج.. حاعيش و أموت بالمرض بتاعى.

[سقراط المصري]

الاخ او الاخت الفاضله مكسوف

مع احترامي الشديد للمشمش، إلا انني قد لخصت الرأي العلمي في موضوع الفوبيا.

تريد العلاج او لا تريده هذه حريتك. بس الكلام المكتوب عن الفوبيا والخوف كلام علمي.

شكرا

سقراط المصري

[linux]

فى الشهر المنصرم قضيت فترة فى الساحل الشمالى  و حقيقة كنت فى أمس الحاجة إليها.

الأخ الفاضل عادل أبوزيد:

رآي الشخصي بدون ماتفهمة غلط: أنا حاسس أنك رجعت من المصيف أكثر أسترخاء ... ربنا يذيدك راحة بال ...

خدت بالى أنك بتكتب أكتر فى موضوعات ظريفة قوى ... زي موضوع المانجة مثلا ...

شكرا جزيلا على المواضيع الظريفة ...

بالنسبة لموضوع الفوبيا:

فعلا زى ماقال الدكتور سقراط المصري، أنا بشوف هنا فى المدارس و التليفزيون موضوع معالجة الفوبيا بالظبط زى ماقال الدكتور ...

طيب فيه حاجة غريبة فى نفس الموضوع ...

ممكن يكون عندك فوبيا و أنت ماتعرفش !!

السبب أنك ما أتحتطش فى موقف يظهر الفوبيا دى قبل كدة ...

أخوكم كان عفريت و هو صغير و فاكر أني كنت ساعات بستخبا من أخويا جوة الدولاب !! يعني مافيش خوف من الضلمة أو الأماكن المغلقة ... حلو؟ ... لا مش حلو!

من سنه أصبت و أنا بلعب كورة ... و بعدين طلبوا منى آشعة مقطعية على الرقبة ... عادي ...

رحت المستشفي و قالوا لى ها تخش الجهاز بتاع الأشعة المقطعية و هاتكون فيه لمدة أربعين دقيقة ... عادي ...

و عينك ما تشوف الا النور ...

أول مانمت على ضهرى و زقونى جوة لقيت نفسي كأني فى قبر و العياذ بالله ...

مش عارف (و ممنوع) أتحرك أو حتى أبلع ريقي !!

خفت بجد و غمضت عينيه و قعدت أقرأ قـــرآن ...

بعد ما خرجت، العامل على الجهاز قال لى أنى كنت شجاع (!!) و أن أكتر من 50% من الناس بتصرخ و تعيط و بتطلب أنها تطلع ... مع العلم أن قبل ما أدخل الجهاز ما كانش عندي أي قلق !!

بعديها بكام أسبوع شفت أعلان فى مجلة او التلفزيون عن جهاز آشعة مقطعية من أنتاج GE مصمم مخصوص علشان الموضوع ده ... مش عامل زى الأنبوبة لكن مفتوح خالص و فيه جزء بيلف حول الجسم من بره ... كنت ها أعيط !!

[se_ Elsyed]

يا نهار أبيض اللى انا سامعه ده ... فوبيا من الصراصير والأبراص والسحالي ؟!!!!! ده المفروض فى ظل الظروف التى تعيشها مصر الآن أن تكون هذا المخلوقات الآليفة جزء من حياتنا اليومية ... على العموم الحمد لله أنا مابأخافش من حاجة أبداً ( إلا الحُقن الطبية بأقول أي قبل ماتقرب مني ) بس اللي يشوف بالاوي الناس على الأقل الحقن ممكن يبقى لها بديل .

على حسب معلوماتي أن موضوع الخوف من حاجة معينة بيكون سببه التنشأة الخاطئة في الطفولة ، فتلاقي مثلاً الأم تقول لأبنها الصغير لو عملت شقاوة هاجيبلك الصرصار أو هاحبسك فى الأوضة الضلمة أو أبو رجل مسلوخة ( صحيح بجد مين أبو رجل مسلوخة ده .. يعني هل هو حاجة كده زي أبو زيد الهلالي مثلاً عايز أعرف بجد علشان لما أهدد الواد عمر أبني ممكن يحرجني ويسألني مين أبو رجل مسلوخة يا بابا ؟ فهاسقط من نظرة لو ماعرفتش أجاوب ) ...

فمن كتر التهديدات دي تلاقي الواد لما يكبر يبقى مكلكع وعنده عقد الدنيا ... هذا بالنسبة للصبيان ، مابالنا بقى بالبنات اللي هما أساساً مرهفي الأحساس ونواعم خالص ....

مش عارف ليه وأنا بأقرأ التوبيك ده أفتكرت شيرين فى مسرحية المتزوجون .

[Mohammad Abouzied]

هو المرض فعلا منتشر عندنا في العيلة وانا تغلبت عليه فعلا وعالجت اكثر اخواتي البنات منه وحتى زوجتى والمسئلة بسيطة جدا

احضرت عدد لا بأس به من علب المبيدات الحشرية وذهبنا الى الاسكندرية في شقة والدي القديمة في شارع خالد بن الوليد وهي كانت مهجورة تقريبا من مدة

ودخلناها وكل واحد في ايدة علبة مبيد صراصير وبدأت معركة حامية في كل مكان واحنا لابسين كمامات ونظارات البحر وخرجنا بعدها على طول بعد معركة نصف ساعة تقريبا

وبعد ثلاثة ايام عملنا نفس العملية ووجدت جراءة منقطعة النظير من زوجتي وأختها في الجري وراء الصراصير وقتلهم بالمبيد وبعدها طبعا اصبح عادي على زوجتي اذا رأت صرصار تجري على المبيد على طول وتشوف شغلها معاه

[Spider]

بما أنى أحد أسباب مرض الفوبيا كان لازم أشارك هنا وأسأل سؤال محيرنى :

أذا كانت الشقق بتكون غير مأهولة لفترة طويلة من الزمن فكيف تستطيع هذه الكائنات العيش فيها؟ على ماذا تتغذى أذا كان البيت من المفترض أن يكون خاليا تماما؟!!!!!!!!!!!!!!!!!

[maksoof]

بما أنى أحد أسباب مرض الفوبيا كان لازم أشارك هنا وأسأل سؤال محيرنى :

أذا كانت الشقق بتكون غير مأهولة لفترة طويلة من الزمن فكيف تستطيع هذه الكائنات العيش فيها؟ على ماذا تتغذى أذا كان البيت من المفترض أن يكون خاليا تماما؟!!!!!!!!!!!!!!!!!

بياكلوا ورق و كرتون و أحذية و حشرات ميتة.

http://www.cce.cornell.edu/suffolk/grownet...cockroaches.htm

[Farida]

انا أول مرة قريت الموضوع ده خفت ادخله من الأصل علشان كلمه الصرصار ... انا بأموت منه و كذلك اخوتى و اعتقد ان امى السبب لإنها هى كمان بتخاف منه موت و لما قريت طريقه العلاج بالغمر دى متهيألى ممكن يغمى على ....انا قصصى مع الصراصير كتير بس فاكرة مرة كنت بايته مع بنت خالى لإن خالى و مرات خالى كانوا مسافرين و لقينا صرصار فى أودة النوم و عنها قفلنا الأوضه الى فيها الصرصار لمدة 3 ايام و ما دخلنهاش و لا اننا نصادف بسلامته ...و بعد الزواج اكتشفت ان أهم ميزة فى الزواج بجانب الإستقرار و الأمان و السكن و الموده و الرحمه و نعمة الولاد انى الاقى حد فى اى وقت من الليل او النهار يموت اى صرصار اشوفه او حتى احس بيه ...ربنا يخلى لى سى الأستاذ

اما موضوع الأماكن المرتفعه دى مشكله تانيه لو صادفت و روحت لحد ساكن فى التالت او ما فوق لا يمكن ابص من الشباك احس انى حاقع من فوق و لو دخلت البلكونه اوطى على ركبتى و اخلى راسى بس هى اللى على السور احسن اقع و بيبقى شكلى مسخرة علشان كده ما أحبش احرج نفسى .... بس بافكر طريقه الغمر فى الحالة دى تبقى ازاى انى امشى على سور البلكونه مثلا ......

[سقراط المصري]

فريده كتبت:

بس بافكر طريقه الغمر فى الحالة دى تبقى ازاى انى امشى على سور البلكونه مثلا ......

بسيطه ، خذي أحد من أفراد اسرتك واقضي نصف ساعه فوق برج القاهره . بعدها هتتغلبي على مخاوفك . ولو منفعتش طريقة الغمر ، تكون طريقة التدريج أفضل.

ملحوظه هامه جداً:

أنا لما قدمت ملخص علمي عن الفوبيا قدمته بإسلوب علمي بدرجة دكتوراه

وشكراً

سقراط

( متخصص بدرجة دكتوراه" فعلاً")

[Spider]

الأخ سقراط

بما ان حضرتك متخصص فى الفوبيا فعندى سؤال لك:

أنا عندى خوف من المياه أذا كانت مياه بحر أو حمام سباحة (ومن المياه الداكنة اللون مثل النيل) ولكنه ليس مرضى بمعنى أننى يمكننى الأستحمام فى كليهما بشكل طبيعى ويمكننى النظر الى مياه النيل دون الأصابة بدوار ألا أننى أشعر برهبة أذا نظرت للمياه العميقة عن قرب وخصوصا لو كنت وحدى وطبعا طريقة العلاج بالغمر بتكون مفهومة وسهلة فى هذه الظروف ولكن فى اليوم التالى تتكرر نفس الرهبة فى البداية وتختفى بعد الغمر أذا كنت على دراية بالعمق أما أذا دخلت فى حتة غويطة شوية لا أستطيع اختبار العمق عن طريق اللمس بالقدم لأنى لو لم اجد شىء تحتهما أتلخم وأحس أنى تحتى بير ملوش قرار... فسؤالى كيف سيكون العلاج فى حالة الفوبيا من شىء كهذا أذا كانت المسألة بتكرر مع كل بداية؟ أقصد أنه أذا تم علاج الفوبيا فى لحظة معينة ما الذى يضمن عدم تكرار المعاناة فى المرات القادمة وهل حالتى فيها شيىء من الفوبيا؟

[سقراط المصري]

spider كتب:

أنا عندى خوف من المياه أذا كانت مياه بحر أو حمام سباحة (ومن المياه الداكنة اللون مثل النيل) ولكنه ليس مرضى بمعنى أننى يمكننى الأستحمام فى كليهما بشكل طبيعى ويمكننى النظر الى مياه النيل دون الأصابة بدوار ألا أننى أشعر برهبة أذا نظرت للمياه العميقة عن قرب وخصوصا لو كنت وحدى

وانا أيضاً عندي نفس حالة الرهبة من المياه ، مثلك.

وطبعا طريقة العلاج بالغمر بتكون مفهومة وسهلة فى هذه الظروف ولكن فى اليوم التالى تتكرر نفس الرهبة فى البداية وتختفى بعد الغمر أذا كنت على دراية بالعمق أما أذا دخلت فى حتة غويطة شوية لا أستطيع اختبار العمق عن طريق اللمس بالقدم لأنى لو لم اجد شىء تحتهما أتلخم وأحس أنى تحتى بير ملوش قرار... فسؤالى كيف سيكون العلاج فى حالة الفوبيا من شىء كهذا أذا كانت المسألة بتكرر مع كل بداية؟ أقصد أنه أذا تم علاج الفوبيا فى لحظة معينة ما الذى يضمن عدم تكرار المعاناة فى المرات القادمة وهل حالتى فيها شيىء من الفوبيا؟

احب اوضح لك في البدايه خالص ان سيادتك لايوجد لديك مرض الفوبيا للأسباب الأتيه:

1- انت يمكنك الإستحمام ، ولاتوجد مشكله لديك في ذلك.

2- كذلك انت قادر على الاستحمام ايضاً في حمام السباحه.

3- ذكرت انه لاتوجد لديك مشاكل مع النظر لنهر النيل.

4-وكمان انت لاتتشنج او تصرخ مثلاً او تتصبب عرقاً لو قربت من الماء.

مشكلتك الأن هي :

الرهبه من النظر للمياه العميقه.

عادي خالص مافيش اي مشكله في كده ، خد بالك ان المياه العميقه بيكون فيها إلى حد ما خداع بصري ، واحياناً هذا الغموض ( الخداع البصري )بيولد حاله من عدم الارتياح . مثال على ذلك بريمة ارشميدس والتي لنا تنظر إليها تحس انك دايخ وما إالى ذلك.

وشوف انت بنفسك دللت على رأيي وقلت :

أما أذا دخلت فى حتة غويطة شوية لا أستطيع اختبار العمق عن طريق اللمس بالقدم لأنى لو لم اجد شىء تحتهما أتلخم وأحس أنى تحتى بير ملوش قرار..

كل اللي عندك مره أخرى شىء عادي ورهبه عاديه خالص.

تحياتي

سقراط

[Spider]

شكرا أخى سقراط

بس المشكلة أن الواحد فى الأماكن دى بيشوف ناس قلبها جامد لا بيهمها حتة غويطة ولا حتة مش غويطة وهو ده اللى خلانى أسأل