عشق المصريين للمانجو

[khedr]

من العنوان قلت انك جيت

وبصيت لقيت موضوع الترحيب

حمد الله علي السلامه

اروح ارحب بيك هناك ونرجع للمانجه

[se_ Elsyed]

عمي وعم عيالي الحاج الكبير أخناتون

والله العظيم بأفرح جداً عندما أجد إسمك يتلألأ في منتدانا العامر .. وربنا يديك الصحة وتنزل مصر في الصيف قبل موسم المنجا ما يخلص

والف الف شكر على لينك الموضوع الجميل

بس إيه الجملة الغريبة

الواحده انتاج الهند بيورو واحد

يعني على كده لو أنا فتحت هوت لاين بين سوق العبور وبين هامبورج بألمانيا ونلغمتت الدنيا عندكو بالامنجا .. ده سنة واحده وأبقى ولا بيل جيتس في ثراءة الفاحش ...

بس بجد والله : ماعندكش سكة لحد مستورد عندكو نقدر نصدره مانجا مصري إسمعلاوي 10/10 ونسبتك محفوظة .. وعندي المصدرين هناك بالكوم ؟

-------------

إبننا العزيز المصارع كين ...

روح يابني .. قبلناك عضو عامل في حزب الصفر المانجاوي .. وهانصرف بطاقة العضوية مع مانجاية عويسي كل يوم ....

بالمناسبة ..

فتحت اللنك اللي وضعه عمي أخناتون ولقت لي مًداخلة من سنة 2003 تحمل نفس المضمون ويمكن التعبيرات كمان .. والظاهر إن حالتي بتتأخر كل مدى وإن الإدمان أستفحل عندي ... بس ولو برضو فهو إدمان لذذذذذذذذذذذذذذذذذذذذذذذذيذذذذذذذذذذذذذذذذذ

[م الغزالى]

اولا حمدا لله على وصولك بالسلامة يامنجاوى باشا

طبعا ياسيد س س انت قدمت لى خدمة جليلة بموضوعك هذا حيث ثيت لحرمنا المصون أننى لست مجنون المنجة الوحيد فى الكون !

هنا فى ألمانيا - طبعا كما ذكر عمنا أخناتون متعه الله بالصحة - المنجة الوحيدة الجيدة هى الهندى ودى بتيبقى فى الأيام المفترجة دى والتى قاربت على الإنتهاء وطبعا للأسف باسافر تفريبا 460 كم كى أحضر هذه المنجة من فرانكفورت حيث يوجد محلات الهنود والباتان ولكنها بصراحة تستاهل الكرتونة فيها 2 كج تقريبا خمس حبات من النوع المتوسط فى اول الموسم بتبقى ب 7 يورو وبعدين تبقى بخمسة و ترجع مرة أخرى فى نهايته من 7 ل عشرة يورو

المشكلة الأن إن إبنى الصغير أصبح ينافسنى و مقضى يومه منجة فى منجة حتى إنه نسى إن فيه فاكهة و أكل أخر

للأسف الأيام المفترجة دى ستولى قريبا ولن يكون امامنا سوى منجة امريكا الأتينية التى كلها ألياف

هانت وننزل مصر فى رمضان يمكن نلحق حاجة باقية من نهاية الموسم

[لخبطه]

زي زي أي مخلوق في مصر ما أكلتش غير الأنواع العادية اللى هيا البلدي و الزبديه والسكري

وشاءات الاقدار أنى اعمل في فترة الصيف محاسب في سوق جمله فاكهة فكنت على موعد بالعويس والفونس و الفص , ............. العجل , الهندية والتيمور و الكوبانية ومن خلال العمل نميت عندي مهارة تمييز الاصناف من رائحتها لذلك انا شمام مانجو :ninja: :wub:

وكان اليوم الموعود إللى تاجر من الاسماعيلية حب يصطفيني وانا الافندي ( المحاسب كما يطلق عليه التجار) بحبة مانجو فاعطاني حبه واحدة فص ومن غشمي زعلت جدا ازاى يعني يعطيني حبة مانجو انا كبير على كدا لكن لما اكلت المانجيه عرفت قد ايه الراجل دابيحبني فعلا طعم غير مختلف تماما عن ان صنف مانجو وحتى قالى وقتها ان شجره الفص والعويس أقل شجر في الانتاج بل في بعض السنين مش تنتج خالص لذلك بعض المزراعين يحط شجره بس ولا اتنين في المزرعة كلها .............. مانجو الشرقيه مش للحريفه مش ينفع خالص للماتشات الدولية يلعب محلي بس

[Folana]

مــــــانجــــــــــــــا يــا مـــانجـــــــاااااااااااا...أكلة فى أكلة شغلنى هوااااااكىىى....حتى القشرة وطعم البذرة شبكنى معاكـــــــــــــــى ...مانجا يامانجا ..حلوة يامانجاااااااااااااااااااا....

(مع الاعتذار للاغنية)

....................................................

تم تعديل 26 أغسطس 2006 بواسطة folana

[Salwa]

نهارك عسل ...ومانجا..

وهو فيه احلى من كدة ؟؟ دى ملكة الفواكه طبعا ...

الف حمدلله على السلامة ....

هنيالكم وعقبالى ...

عقبال ما اقول برضه انا كنت هناك ولسا يادوبك راجعة وعندى اكتفاء منجاوى ...

هنا ..احيانا بيكون فيه مانجا من امريكا اللاتينية بس برضه زى ما قلت كأنها مجرد الياف ...وطعمها غريب ..

هى مرة واحدة اللى لقينا مانجا زى العسل ..( بس مش فونس...ولا عويس .. ) ..وكانت من يافا .

برضه كانت فى معرض اغذية ...

الله يسامحك يابو عمر ..

هو احنا ناقصين حنين ...

[Diab]

أنا بحب المانجة بس مش قوي كدة يعني

ده كفاية الأملاح اللي فيها

بس عشان خاطر س س أنا ألفت قصيدة من الشعر الجاهلي بيقولها مطلعها ( ع اليمين و أنت داخل :angry: )

المانجة عقل سي السيد

دي عينه وقلبه وفشته

لو شافها يوم مع سريح

قوام بيقفل ورشته

يهادي بيها أصحابه

وتبقي هي رشته

سي السيد والمانجة عاشيقين

مشاها هي ومشته

وعجبي

ثكرا ثكرا ( وش واحد بيحي الجمهور وعلي وشه أثار طماطم وبيض )

تم تعديل 24 أغسطس 2006 بواسطة Diab

[se_ Elsyed]

بيت الشعر ( والدقن ) مظبوط وقافيته من البحر الطويل .. وكنت ماشي تمام يا دياب يا ولدي لحد ما أنكسر منك البيت في الحتة دي

يهادي بيها أصحابه

وتبقي هي رشته

مين قال كده ؟... ده على جثتي .. أنا أهادي أي حاجه .. فلوسي عربيتي .. الموبيل ال ستة ستميه .. إنما المانجا ... ما أعطلكش ..

-------------

الهر العزيز غزالي ... مرحباً بحضرتك في نادي المانجا .. شد حيلك عايزين ناخد الدوري السنة دي ..

لخبطة أفندي أبو اللخابيط ... ممكن كرت توصية من معاليك عند تجار المانجا على اساس يبقى لي ضهر ؟

حبيبة قلبي ومامتنا العزيزة مدام سلوى ... متعكي الله بالصحة والعافية وربنا يديك طولة العمر وتاكلي مانجا بدون اي قيود أو شروط ..

[مصريه بالكويت]

:o :o :o

وانا اللى كنت مفكره نفسى المهرب الاول للمنجا برا الاراضى المصريه :angry2:

اكتشف ان فيه مهربين كبار غيرى

بس انا اكلت منجا لما شبعت بصراحه الاجازه دى

ولانى نزلت لوحدى من غير زوجى الغالى كانت وصيته ليا قبل ما انزل اجيب ه له منجه ( اصله مدمن قديم للست منجه)

وقعدت انتظر ظهور الست منجه واول ما ظهرت بعت جبت لى 10 كيلو وقعدت قشرتهم ف طبق كبييييييييييييير

وعبيتهم ف اكياس وصدرتهم الى ثلاجة شقتى علشان افضى المكان ف ثلاجة بيت اهلى علشان الوصية التانيه ( بط

رمضان)

وقبل السفر بيومين رحت اقفل الشقه وقلت ابص واطل على الفريزر اللى فيه المنجه

( وش واحده مخضوضه) :o :o :o دا الثلاجه مفصوله واكياس المنجه بقت سودا الغاز هرب من الثلاجه

رجعت لاهلى والخيبه والحسره ف وشى يلا فدايا mfb:

وراح بابا جاب 10 كيلو تانيين وبسرعه جهزتهم

دا بالنسبه لمنجة العصير

لكنى اخدت له 3 كيلو فص للاكل

وربنا يسامح ثلاجتى

[بنت النيل]

كنت بتمشى كدا فى المنتدى وفجاة اشم رائحتها اللى بتاخدنى لمصر وترجعنى :o

الكلام على مين الكلام على مين

على المانجا حبيبتى :angry2: mfb:

اقولكم على سر انا من كتر مابحبها اخواتى مسمينى مانجا ههههههههههههههه :o

اعمل ايه مابقدرش اقاومها :o

وبعدين يا ست مصرية بالكويت طيب شوفى اختك بمنجايه كدا ولا حاجة

دا احنا جيران برده ولا كنتى قولى وانا كنت جيت اخذتك من المطار لحد البيت واحسب لك العداد كيلو مانجا :o

وبقولكم ايه كفايه بقى لحسن انا اتقهرت خالص واتفرست كمان

اصلنا مانزلناش اجازة السنة دى :o :o

ارحمو عزيز قوما ازل

[مصريه بالكويت]

يا حبيبتى يا بنت النيل طيب قوليلى انتى قاعده فين وانا ابعت لك منجا من المتهربه مدام بتقولى احنا جيران :o

[بنت النيل]

الله يخليكى يامصرية قد القول والله

انا بهزر معاكى الف عافيه عليكم وكانى اكلت منها بظبط

انا من سكان الفروانية انتى فى الكويت من زمان على فكرة فى عضوات معنا بالكويت برده وبنتعرف على بعض وعلى اتصال خارج المنتدى

ومرة تانية مشكورة حبيبتى على ذوقك وكرمك

[shahd]

ياحلاوة المنجا لما تبقى مخلل اممممممممم ولو عليها شطه ياسلااااااااااااااااام

ماحدش يقولي هو في مخلل منجا :D

ده لزيز جدااااااااااااااا

:lol:

[أسد]

في أجازة الصيف أكثر سبب يسبب لي زيادة الوزن هي المانجو ..

قبل بداية الإجازة الصيفية أودع أصدقائي ومعارفي في السعودية وأقول لهم ..

رايح آكل مانجا .. بدلاً من أن أقول لهم رايح أجازة...

ولكني عند عودتي من الإجازة .. لا أحمل معي مانجو .. أو أي مأكولات أخرى ...

أنواع المانجو في مصر عديدة وكثيرة .. بعضها رائع .. وقد أسهب سي السيد والأستاذ عادل في وصفها مثل الفص .. وبعضها أي كلام ..

وهناك المانجو التي تزرع في الإسماعيلية .. وتعد هي الأفضل والأجود .. والبعض يزرع في الصعيد .. وهي أقل جودة وأقل سعراً ..

أنا شخصياً من عشاق المانجو الإسماعيلاوي ..

وأشتري المانجو من على طريق الإسماعيلية ..

الغريب في الأمر .. أن المانجو المصري رخيصة السعر .. وعالية الجودة .. وغزيرة الإنتاج .. ولكن يتم إستيرادها إلى السعودية بكميات قليلة وتكون أسعارها مرتفعة ..

فهي أجود من المانجو السوداني بكثير .. وأجود من الباكستاني .. وأكثر حلاوة من الهندي .. ومع ذلك تجد تلك الأنواع هي الطاغية في دول الخليج ...

ووجود المانجو المصري قليل وينحصر في السكري وألفونس فقط .. وهما من أقل أنواع المانجو المصري جودة ...

[se_ Elsyed]

.. ولكن يتم إستيرادها إلى السعودية بكميات قليلة وتكون أسعارها مرتفعة ..

...

تخيل لقيت صفقة في أسواق العُثيم سعر الكيلو 3.5 ريال .. ونوعها زبدية مصري .. وعمال في الرايحة والجاية أبصلها وأتحسر لإن كان وقتها لسه عندي ستوك .... يالله ما علينا

المهم من 3 أيام وصلني إمدادات من مصر يعني بنتكلم في حوالي 40 ك - اللهم صلي عالنبي ومش عايزين نق من حد - لكن يا خسارة الأفندي كان عنده تدري في جده لمدة إسبوع وقعد بهم هناك وعلى ما وصل الرياض بقوا عصير مانجا مش مانجا سليمه .. مع إنه شاريها من مصر ناشفه زي الحجر ...

إضحك بقى يا أسد على الموقف المتكرر ده

- الأسبوع الماضي لقيت مدير المشتريات عندنا ماشي يكلم نفسه وبيبرطم .. وشكله كان بيشتم في حد ... سألته : إيه يا عم في إيه ؟ فقال لي : ما بقاش ورايا شغلانه غير المنجا .. وسيبت الكمبيوتر وقطع الغيار والسوفتوير وبقيت مانجاوي غصبٍ عني ... إزاي يابا : قال لي : إن أصحاب الشركة وبشكل يتكرر كل يومين أو تلاته يخلوا الجماعة بتوعنا هناك يشتروا لهم كرتونة واحده مانجا فص ويبعتوها عن طريق الشحن الجوي فيقوم هو بالإتصال والتنسيق مع المخلص الجمركي عشان يخلصها قوام قوام عشان تتاكل طازة .. فقلت له طب ليه ما بيجيبوش كمية ؟ فقال لي : إزاي .. وليه ما ياكلوهاش طازة ويقرفوا أهلي أنا ... وساعات مالقيش سواق فبأروح بنفسي المطار أجيبها من هناك وبأبقى عامل زي حمار الفكهاني اللي بيبقى شايل الفاكهة لكن محروم منها وكبيره قوي بياكل برسيم ...

وهكذ يا سادة تلعب المانجا دورها في الوقيعة بين العامل وصاحب العمل ..

[MZohairy]

باردون

يعني ايه مانجا يا سي السيد؟ :D

[نانو]

مش عارفه ليه رجليا جابتني للموضوع اللي رحيته حلوه اوي ده

يا ساتر يارب ..اوقات الواحد بيعمل حاجات غريبه في نفسه

ما انا كنت ناسيه

من يومين كده روحت اجيب شويه حاجات و لقيت مكتوب منجه افريقي

قلت اه هيا ديه ...لا تقولي منجه عويس ولا الفونس ولا حتي فص

قلت افريقيا و غابات افريقيا الاستوائيه ...و المنجه اللي قد البطيخه ما حدش قادر يشيلها

روحت اخدت في وشي وهات يا منجه

واول ما روحت روحت عليها كده بنفس مفتوحه ...و كانت المفأجاه المذريه ان الخيار احلي منها

عمار يا مصر

[se_ Elsyed]

للرفع

وللقراءة فقط اثناء الصيام

متخيل منظركم

شهد تمعنني في الموضوع ده

[Virus]

يا سلام ...ده موضوع يفرح بصحيح..أيوه كده ياراجل مش تقولي طلعت مصطفى وبنت العميد والنكد ده..

الظاهر إن المحاورات فيها كنوز مدفونة مشافوهاش الأعضاء الجداد اللي زيي..وحبذا لو اتعمل مكتبة للمواضيع المتميزة..أقصد موضوع به لينكات لأهم المواضيع...

أما المانجة..فماذا أقول عن حلاها ..والقلب قد ذاب في هواها

وأنا كنت فاكر نفسي مش طبيعي لما يسألوني في الشغل عملت إيه في الأجازة في مصر أقولهم كلت مانجة..دي أهم حاجة عملتها في مصر!!!

وبجد ياجماعة ومحدش يضحك..أحيانا كثيرة بحس بالفخر والإنتماء الوطني لما أشوف المانجة المصري...بحس إن مصر لسه قادرة تطلع منتج نضيف مفيهوش هرمونات لا كيماوي ولا لعب في المواصفات وفي نفس الوقت ومنتج فريد على مستوى العالم مفيش له مثيل

وإنت كنت بزعل جداً إننا لا نتوسع في زراعتها ونصدر!!!

المهم ..(اللي جاب سيرة الوطن دلوقتي ده انا نكدي صحيح) ...مع احترامي لكل عشاق الفص وهي طبعاً حاجة اكسترررا على رأي القصري..

إلا إنه يبقى عشقي الأول والأخير...هي العويس العويس ولا شيء غير العويس..طبعا الإسماعيلاوي الأصلي مش الصعيدي اللي بينزلوها أول الموسم يضحكوا بيها على اللي مش عارف

وفيما يلي أقص على حضراتكم هذا المشهد المانجوي اللذي يصور ما حدث مع آخر عويساية أكلتها قبل السفر...

كنت جالساً في غرفة المعيشة وقد اتخذت كافة الاحتياطات اللازمة..فالتكييف يعمل والأولاد طردوا خارجاً والتلفزيون مغلق وكله تمام..

أمرت بأن يدخلوها علي..فجاءتني تتهادى كالعروس تزف لعريسها محمولة على أفخم الأطباق الصيني وبجانبها سكين خاص..

كانت الرائحة تملأ الغرفة والشقة وربما الشارع أيضاً فيما كانت هي متكئة على حرف الطبق تنظر إلي في دلال ..

كان لحمها البرتقالي الرائع يبدوا مغرياً تحت الغلالة الرقيقة المسماة بالقشرة

قلت لها وقد استبد بي الشوق..يا أهلا يا اهلاً منورة ياعروسة..

أجابتني في خجل..يوه ..متكسفنيش بقى يا سي فايرس

تيييييييييييت================================

حدث قطع في المشهد..(ييه الرقابة كمان في المانجة)..وتنتقل الكاميرا لنرى فايرس وقد تحول لون ملابسه للون البرتقالي الغامق وقد تمدد على الأريكة في استمتاع واضح...

النهاية

[الباشدكتور]

جامدة اوي المانجا

من 3 سنين بابا (مهندس) كان بيبني عمارة لواحد تاجر فاكهة جملة كبير

بجد الاتعاب كلها بابا اخدها مانجا

كنت بفطر مانجا واشرب مانجا وبعدين اتغدي عل خفيف واكمل مانجا واشرب مانجا واقعد انقنق في مانجا لغاية العشا الي كان مانجا اكل وعصير وكده مش الصيف وبس لا كمل معانا بفضل التلاجة ربنا يسترها

طبعا هدايا اقفاص مانجا لكل قرايبنا و شوية معارف

واكل المانجا ده مزاج مش اي كلام كده

لازم ابقي قاعد (بالفانلة الداخلية ) واللي كلها بتبقي مانجا حتي ضهرها وبعد ما اخلص القشرة بالمعلقة احط البذرة بما تحمل في بوئي

وطبعا كل ده لازم اكون قاعد لوحدي وفيه هدوء وممكن اشغل موسيقي هادية

وبعد ماكل انام علي ضهري مغمض عيني بس صاحي

انا عايز اتجوز بنت فكهاني :lol: