عايزة اشترى خاتم الماس وعايزة نصيحتكم ؟؟

[ذهبية]

السلام عليكم اخوانى و اخواتى

عايزة نصيحة منكم لو سمحتوا انا قررت انى اشترى خاتم الماظ لانى زهقت من الدهب و عايزة اغير

انا اعرف كل التفاصيل عن كيفية شراء الدهب و اسعارة و كل شىء لانى بحب اشترى علطول

لكن الالماظ فاعزرونى لا اعرف اى شىءءءءء

عايزة اعرف كيفية الشراء و ازاىاعرف الاسعار بتاعتة و بتحدد على اىاساس مش عايزة حد يضحك عليا من الاخر

و سمعت ان لازم يكون فية شهادة معاة فيها كل شىء طيب ادور على اية بالضبط وانا باشترية

لو حبيت ابيعة فى اى وقت هل سعرة بيتغير و بيتحدد ازاى حسب مزاج بتاع الدهب و لا لة بورصة خاصة بية زى بتاعة الدهب كدة

فيدونى بسرعةةةة لانى هانزل اشترى خلال يومين و شكرا مقدمااااااا

[newcomer]

السلام عليكم اخوانى و اخواتى

عايزة نصيحة منكم لو سمحتوا انا قررت انى اشترى خاتم الماظ لانى زهقت من الدهب و عايزة اغير

انا اعرف كل التفاصيل عن كيفية شراء الدهب و اسعارة و كل شىء لانى بحب اشترى علطول

لكن الالماظ فاعزرونى لا اعرف اى شىءءءءء

عايزة اعرف كيفية الشراء و ازاىاعرف الاسعار بتاعتة و بتحدد على اىاساس مش عايزة حد يضحك عليا من الاخر

و سمعت ان لازم يكون فية شهادة معاة فيها كل شىء طيب ادور على اية بالضبط وانا باشترية

لو حبيت ابيعة فى اى وقت هل سعرة بيتغير و بيتحدد ازاى حسب مزاج بتاع الدهب و لا لة بورصة خاصة بية زى بتاعة الدهب كدة

فيدونى بسرعةةةة لانى هانزل اشترى خلال يومين و شكرا مقدمااااااا

لو حضرتك فى مصر.....احسن حاجة تشترى من الصايغ بتاع حضرتك

أو حد بتثقى فيه طبعا.....

فيه معايير للالماظ ....غير انه كام قيراط أو جزء منه

يعنى مثلا درجة نقائه بتفرق فى سعره ....انا باتكلم على الفص...

و بعدين الموتيف او الخاتم اللى حضرتك هاتركبى فيه الفص

فيه قد ايه الماظ.....الشغل اللى فيه...كده يعنى

اقول لحضرتك حاجة.......خدى حد يكون عنه خبره فى الاماظات

و لو مش متوفر حد .....فيه محلات فى القاهرة و الاسكندرية

سمعتهم زى الفل..... صعب اوى انهم يغشوا.....

و مبروك مقدما.... :ninja:

[شاب مصري]

لا اله الا الله

حظك ونصيبك يا أخت ذهبية

واحد حبيبي لسا واصل من جنوب افريقيا وجايبلي معاه تشكيلة تجنن

ابعتيلي الفلوس خلال يومين وهبعتلك الخاتم في رسالة خاصة :ninja:

عموما ألف مبروك مقدما ان شاء الله

بس نصيحة أخ .. مش كده قدام الناس .. الحالة الاقتصادية لمعظم الناس وحشة و الكلام في المواضيع دي على الملأ هيخلي ناس (زيي العبدلله :blink: ) يحقدوا عليكي ويبدأ الحسد والقر والحاجات الجميلة دي :)

بس أنا أسمع ان الألماظات هنا في مصر الجواهرجية بينصبوا فيها للصبح عشان بيستغلوا قلة خبرة الناس فيها ويبيعوها بسعر غالي أكتر من اللازم

فياريت تاخدي حذرك .

[wagdi]

السلام عليكم ورحمة الله....

شوفي أنا حاجيبلك الحكاية من أولها...وبأحذرك من الأول أنا ممل حبتين...

الألماظ عادة له أربع خواص بتحدد قيمته... معروفين بالfour Cs...وهما

cut...وبتحدد مدى الدقة التي تم بها قطع وتلميع الفص وحاقولك حكايته...

color... أو اللون...

calrity... أو نقاء الفص...

carat...أو القيراط وبيقيس كتلة الفص..

حاقولك بقى حكاية كل خاصية....

أولاً القطع من أهم خواص فص الألماظ ومع لك أقلها من حيث إهتمام أو معرفة الناس بها... والقطع بالمناسبة حاجة ووشكل الفص حاجة تانية... يعني الفص ممكن يكون دائري أو ماركيز أو برينسيس أو قلب.. وفيه اشكال تانية كتير... لكن إحنا إلى بنتكلم عليه هنا هو الطريقة إلى أتقطع بها الشكل ده... والقطع بيكون على أساس نسب معينة... وكل ما كانت النسب دي مظبوطة كل ما الفص يدي بريق ووهج أكتر... وعلشان كدة ممكن تلاقي فص قيراط بيلعلع في إيد صاحبته وفص تاني إتنين قيراط نفس اللون والنقاء بس تبصي له تحسيه مطفي... الفرق في النسب...فلو كان الفص مفلطح زيادة عن اللزوم أو عميق زيادة عن اللزوم الضوء مش حينعكس منه... وللأسف فيه ناس كتير مايتفهمش ده ويجيوا يشتروا الفص الجواهرجي يطلع لهم فصين واحد مفلطح وواحد نسبه مظبوطه... لما تشوفيهم الفص المفلطح يديكي إحساس إنه أكبر من حجمه... لكن بريقه (وبالتالي سعره) ما بيكونش زي الفص المظبوط...

عامل تاني هو الpolishing أو التلميع لو صح التعبير... الفص بعد ما يتم قطعه بيتم تلميع كل الأوجه بتاعته... جودة التلميع ده برضه بتفرق جامد في بريقه بعد كدة...

درجات القطع خمسة: Ideal-Premium-very good-good-poor

الideal والpremium مابيفرقوش في الround أو الفص الدائري... بس بيفرقوا في الأشكال التانية...

نخش على الخاصية التانية...اللون..

والمقصود باللون هنا هو قياس مدى وجود لون من عدمه... فكل ما كان الحجر شفاف كل ما يسمح بمرور الضوء من خلاله وبالتالي يعطي بريق أكتر... ولأن عملية تكون حجر الماس نادراً ما تعطى حجر شفاف مائة في المائة بالتالي اللون يعتبر من العوامل الأساسية في قيمة الفص... (بالمناسبة الكلام ده كله على الماس العادي أو الأبيض زي ما بيقولوا... أما الماس الملون...فده بيبقى نادر جداً وغالي جداً... ودي حدوتة تانية ممكن نبقى نتكلم عليها بعدين)...

درجات اللون بتبدأ من D و تتدرج حتى X... كون D شفاف تماماً وX تقريباً أصفر... عادة الماس إلى بيتركب في الخواتم بيكون من D لحاد J بعد كدة بيبقى الصفار واضح...

نيجي على النقاء... وهو درجة نقاء الحجر...طب نقائه من إيه؟ في معيارين لنقاء حجر الماس... النقاء الداخلي والنقاء الخارجي... وعادة المعيار بيكون بالنقاء الداخلي كونه مرتبط بالحجر نفسه... حاوضح أهه...

النقاء الداخلي... يعني نقاء الحجر من الداخل من أي شوائب أو فقاقيع هواء أو شروخ...

وده ماحدش له دخل فيه... ده مرتبط بالبالظروف إلى تعرض لها حجر الماس خلال عشرات الألاف من السنين ليتكون... النقاء الخارجي يعني نقاء سطح الحجر من الخدوش والى عادة بتحصل وقت تقطبع الحجر...

والنقاء درجاته هي: F أو Flawless، وبعدين IF أو Internally Flawless يعني نقي تماماً من الداخل بس فيه بعض الخدوش على السطح، VVS1,VVS2 أو very very slightly included وده بتكون الشوائب فيه قليلة جداً ومن الصعب جداً رؤيتها بواسطة خبير تحت تكبير عشر مرات، VS1, VS2 أو very slightly included ويتكون رؤية الشوائب فيها صعبة تحت تكبير 10 مرات، SI2, SI1 أو slightly included ويتكون الشوائب سهلة الرؤية تحت التكبير ، وأخيراً I1, I2, I3 أو Included وفيه تكون الشوائب مرئية للعين المجردة...

نيجي بقى على أخر خاصية وهي القيراط أو كتلة الحجر... والقيراط يساوي 200ميليجرام من الماس...(وبالمناسبة كلمة قيراط جاية من carob أو الخروب... وكان الناس بيستخدموا بذر الخروب قديماً في الوزن...ودي لها حكاية ممكن أبقى أحكيهالك بعدين) ما علينا... حجر الماس عادة ما يستخرج بأحجام صغيرة وكل ما حجمه يكبر كل ما تمنه يزيد... والعلاقة بين الوزن والسعر مش linear... يعني تمن فصين كل فص فيهم واحد قيراط لا يساوي تمن فص اتنين قيراط... لأن فرصه إستخراج حجر ينفع يتقطع أتنين قيراط ليست نصف فرصة إستخراج حجر ينفع قيراط... بل أقل من ذلك بكتير... ودي برضه لها حواديت ممكن نبقى نحكيها... المهم علشان نقول يا خاتم يبقى بنتكلم على الأقل في فص ربع قيراط وإنتي طالعة بقى... عندك لحاد 20 قيراط لو عايزة... بس عادة فص من نص ل واحد قيراط يعمل خاتم كويس... من واحد لواحد ونص يعمل خاتم محترم... من واحد ونص لأتنين تبقى من علية القوم... وفوق الأنتين ماما تزعقلي... :lol:

طبعاً انا باهزر العبرة مش في الخاتم العبرة في إلى لابسة الخاتم)

ولاد الحلال بقى جم وأضافوا C خامسة ألا وهي الcertificate... والأصل هو أن الماس لما بتشتريه من الجواهرجي فأنتي مافيش حاجة تضمن ليكي المواصفات بتاعة الفص غير الكلام بتاع الجواهرجي...فلو قالك ده فص لون H ونقاء VVS1 فأنتي مش حاتعدي وراه... والجميل إن معظم جواهرجية مصر لما يطلعلك فص يروح قايلك ده H و VVS1، عمري ما شفت جواهرجي قاللي ده فص SI مثلاً مع إن الVVS1 ده المفروض نادر جداً...بلدنا كلها VVS1... :happy: ما علينا... المهم إن الفص لما بيكون معتمد بيكون مقفول جوه غطاء بلاستيكي ومعاه شهادة فيها كل خواص الفص...والغطاء عليه مايكروفيش بالشهادة دي... المعامل إلى بتعتمد الفصوص مش كتير أشهرها GIA, AGS, EGL, IGI... تكلفة إعتماد الفص بتكون حوالي 300 دولار... وعلشان كدة الفص المقفول بيبفى اغلى من المفتوح بحوالي ألفين أو تلات ألاف جنيه... وبالتالي لو بتشتري فص ب25 أو 30 ألف وطالع يبقى من الحكمة إنك تدفعي ألفين جنيه زيادة وتبقى متأكدة من إلى بتشتريه...

بالمناسبة ممكن تشتري فص غالي ومن غير شهادة لة بتثقي في الجواهرجي... خاصة لة ده جواهرجي العيلة مثلاً وببتعاملوا معاه من سنين طويلة وهو أصلاً جواهرجي ألماظ (مش بتاع دهب وربنا فتح عليه) يعني فاهم ودارس وله سمعته وتاريخه... فهو مش حايغامر بسمعته أو إنه يخسر عائلة بتتعامل معاه لسنين  بأنه يخمك... بس للأسف دول قلة جداً جداً جداً في مصر....

طيب بعد ماوجعت دماغك اجيبلك الخلاصة...

الموضوع بيعتمد على حاجة واحدة بس... إنتي عايزة إيه من فص الألماظ ده...

لو بتدوري على حاجة تبان كبيرة والسلام والناس يقولوا ياحلاوة... يبقى إنتي ضيعتي وقتك في القراية

أما لو بتدوري على القيمة الحقيقية يبقى تحطي فلوسك في فص محترم بشهادة حتى لو صغير... بس فيه تريكات ممكن أقولهالك...

مثلاً... سعر قيراط الماس مقسم لشرائح على حسب حجمه... كل شريحة نص قيراط... يعني من 0.5 لحاد0.99 قيراط دي شريحة سعر... من 1.00 لحاد 1.49 قيراط دي شريحة تانية... كل نص بتطلعى شريحة والسعر بيزيد بشكل لوغاريتمي... فمثلاً لو فص 0.48 قيرط تلاقي تمنه 1100 دولار مثلاً... وفص تاني بنفس النقاء واللون ودرجة القطع بس 0.54...تلاقيه ب1800 دولار... مع إن الفرق 0.06 ده لا يذكر... ومستحيل تلاحظي إن فيه فرق في الحجم بين الأتنين بالعين المجردة ومع ذلك التمن أكتر بستين في المية فقط لأنه دخل من شريحة لشريحة أعلى... فا دي حاجة تاخدي بالك منها علشان ماتصرفيش فلوس على الفاضي...

حاجة تانية... بالنسبة للنقاء... شوفي.. طالما مش I... فالشوائب في الفص فعلاً غير مرئية بالعين المجردة... فالموضوع موضوع قيمة مش جمال... فلو مش ناوية تبيعي الفص دي في يوم من الأيام أو الفص عاجبك جداً بس مثلاً نقائه SI... فدي مش مشكلة أوي لأنه شئ مش بيتشاف إلا بعدسة... أما لو عايزة القيمة الفعلية يبقى على الأقل VS1...ويستحسن لو VVS... طبعاً السعر بيفرق...

حاجة تالتة... اللون... والخدعة هنا هو إنك تشوفي إنتي حتركبي الفص على خاتم دهب أبيض أو بلاتين ولا دهب أصفر... فلو حتحطيه على دهب أصفر يبقى مافيش معنى للون نقي أوي لأن كدة كدة الفص حيعكس لون الدهب ويبان مصفر شوية... يبقى مثلاً ممكن تروحي للون I أو حتى J... أما لو حيتركب على دهب أبيض يبقىH... وعادة أعلى من H مش حيفرق كتير إلى في الأحجام الكبيرة (2 قيراط فأكبر)...

يعني... ده ملخص كدة على السريع... هو الموضوع كبير... وكل نقطة من إلى قلتهوملك لها موال وحكاية...

بقولك إيه...

ماتخليكي في الدهب أحسن... :rolleyes:

تحياتي...

[dongol]

هو المحل بتاع حضرتك فين بقي علشان انت اكيد جواهرجي بس متخفي :rolleyes:

[se_ Elsyed]

وجدي ده لُقطه وبيشتغل في كل حاجه حلوه ..

يعني لما يتكلم عن البرفانات وطريقة صنعها .. تحس إنه عم فكري بتاع ريحة الشبراويشي

لما يتكلم عن الدهب والأولماظات - على رأي علي الكسار - تحس إنه السرجاني بتاع الدهب

[jessika]

فعلا يا استاذ سى السيد تعليقاتك ملهاش حل ودايما تضحكنى ورغم انى صاحية مضايقة النهاردة ومن الصعب حد يضحكنى الا انى وما قريت تعليقاتك فعلا ضحكت مرسى ليك انك بتقدر تعمل كدة :rolleyes:

[se_ Elsyed]

شرف كبير لنا يا جسيكا هانم .. ونهارك سعيد ..

بس خير صاحية متضايقة ليه مع إن النهاردة مش 6 أبريل ؟ :rolleyes:

طب بمناسبة الألماظات أقول لك خبر يفرحك ..

بيقولك يا ستي أحمد باشا عـــ ز بتاع الأسياخ .. لما اتجوز عضوة مجلس الشعب شاهيناز النجار صاحبة فندق النبيلة اللي في المهندسين .. بيقولك الشبكة كانت عبارة عن خاتم ألماظ ثمنه مليون جنيه مقفلين ...

يا نهار مش فايت ؟

ده أنا متخيله خاتم وزنه ييجي 5 كيلو ...

وشاهيناز هانم تجيب 4 فلبينيين على كفالتها عشان يشيلوا صابعها طول ما هي ماشيه في الشارع من تُقل الخاتم ..

فاكره كسرى ملك الفرس لما كان عاملين له تاج عامل زي الطرطور وكله مجوهرات وألماظات وزبرجد وحركات من دي ... ومن تقله كان عامل جنش في السقف مكان المروحة ومعلقه بجنازير .. بحيث لما ييجي يقعد على كرسي العرش يبقى التاج متسنطر على دماغه ؟

اهو الخاتم بتاع شاهيناز ده هايبقى كده

الحمد لله يارب على الخلاخيل والكردان عيار 18 ...

[الحاج فوزى]

الأخت الفاضلة ذهبية ..

بالطبع الألماس له بريقه الذى يخطف الأبصار وهو عنوان السيدة المدللة والراقية كما يروج له فى الإعلانات :rolleyes:

لكن أتمنى أن تضعى فى بالك مقدار الخسارة فى حالة إعادة البيع ..

طبعا ً وقت الشراء الجميع يقول أنه لا يفكر فى البيع ..

لكن فى حقيقة الأمر ، عندما تدفعين مبلغا ً من المال فى شيى ما يقتنى ، يجب أن تحصلى على ماقيمته هذا المبلغ و تزيد قيمته مع الأيام لتعوض فرق تضخم العملة وتدنى قيمتها مع الزمن

وعلى الأقل إن كانت لن تحفظ القوة الشرائية مع الزمن .. على الأقل تحفظ قيمة الأصل المدفوع .

وهو مالا يتحقق مع شراء الألماس بكل أسف .

فعلى العكس تماما ً تقل قيمته بنسبة كبيرة فور شرائه ، ويقل مع الزمن ولا يزيد ..

لو كنت مليت من الذهب التقليدى .. فعندك الموديلات الجديدة لآزوردى وغيره كل يومين تقريبا ً موديل جديد بشكل جديد تحفة . ( وش واحد طلع عينه من مراته ههههههه )

وتلك الأنواع وإن كانت أغلى قليلا ً من الأسعار العادية ، إلا أنها فى النهاية ذهب .

ومبروك مقدما ً على إختيارك سواء كان ألماس أو ذهب

تم تعديل 5 أبريل 2009 بواسطة الحاج فوزى

[بندق أفندى]

الأخت الفاضلة ذهبية ..

بالطبع الألماس له بريقه الذى يخطف الأبصار وهو عنوان السيدة المدللة والراقية كما يروج له فى الإعلانات :rolleyes:

لكن أتمنى أن تضعى فى بالك مقدار الخسارة فى حالة إعادة البيع ..

طبعا ً وقت الشراء الجميع يقول أنه لا يفكر فى البيع ..

لكن فى حقيقة الأمر ، عندما تدفعين مبلغا ً من المال فى شيى ما يقتنى ، يجب أن تحصلى على ماقيمته هذا المبلغ و تزيد قيمته مع الأيام لتعوض فرق تضخم العملة وتدنى قيمتها مع الزمن

وعلى الأقل إن كانت لن تحفظ القوة الشرائية مع الزمن .. على الأقل تحفظ قيمة الأصل المدفوع .

وهو مالا يتحقق مع شراء الألماس بكل أسف .

فعلى العكس تماما ً تقل قيمته بنسبة كبيرة فور شرائه ، ويقل مع الزمن ولا يزيد ..

لو كنت مليت من الذهب التقليدى .. فعندك الموديلات الجديدة لآزوردى وغيره كل يومين تقريبا ً موديل جديد بشكل جديد تحفة . ( وش واحد طلع عينه من مراته ههههههه )

وتلك الأنواع وإن كانت أغلى قليلا ً من الأسعار العادية ، إلا أنها فى النهاية ذهب .

ومبروك مقدما ً على إختيارك سواء كان ألماس أو ذهب

صديقى الحاج فوزى دخلت فى نفق مظلم .. اياك وتلك النصحية (ههههههههه) .. يا عزيزى أيضا الموديلات التحفة والجميلة تكون فى الدهب عيار 18 والذى يخسر 50% من قيمتة .. وغالبا تباع بالقطعة وليس بالوزن .. ونادرا ما تجد عيار 21 قطع مميزة ..

[الحاج فوزى]

لماذا يخسر 50 % من قيمته ؟!!!!

أنا لا أشترى الذهب بالقطعة يا عم بندق ..

أنا أشتريه بالجرام بسعر السوق المعتاد + مصنعيته للجرام ..

فى المعتاد تزداد المصنعية لهذه الموديلات قليلا ً.. بمعدل من 20 - 30 % عن الذهب الإعتيادى ..

( خلى بالك 20 او 30 % من المصنعية وليس من القيمة الكلية ، يعنى لو مصنعية على الجرام فى المعتاد 2 وحدة ، تكون مصنعية هذه الموديلات 2ونصف وحدة مثلا ً )

والذهب لا يخسر بشرائه وإعادة بيعه إلا مصنعيته فقط .. ومن ثم سعر الجرام يباع به كما هو زيادة أو نقص .

[Folana]

السلام عليكم ورحمة الله....

والله أنا لما لقيت اسم وجدى فى الموضوع...قلت أكيد حاقرأ "درر" وكلام ألماظ عن " الماس"...وقد كان...

بس اتمنى ان الاخت ذهبية مايكونش مصيرها زى " أبو صلاح"...بعد رجله ماجت فى ليلة البرفانات اياها :happy:

بأشكرك يا استاذ وجدى على المعلومات الهايلة دى...وربنا يوفقك ياذهبية وتتمتعى بكل اللى نفسك تقتنيه ان شاء الله...

أضيف ايضا ان كلام العزيز الحاج فوزى مظبوط الى حدما....بس يعنى لو خاتم قيراط كده ولا حاجة مش حيخسر قوى :lol: ...وحتتوارثه الاجيال....خلي السيدات تنبسط ...هناك اشياء قد يراها البعض بسيطة او خسارة...ولكنها تسبب لنا السعادة.....فدعونا نسعد ياجماعة ...مش كله بيع وشراء كده...

فكرتنى يا حاج فوزى...بصديقة لى كانت بنتها بتتخطب من فترة...ويعنى المتعارف عليه فى اسرتها ووسطها ان الشبكة تكون الماظ. ( منظرة فاضية طبعا :wub: ) ......فأم العريس قالت.. مافيش داعى الماظ...ده بيخسر عند البيع ...نجيب دهب قيمته فيه.... B)

ومش حاقولك بقى الكلام اللى سمعته وقتها... :P

وربنا يزيدك ياذهبية وتشترى لاولادك الالماظ ....

تحياتى للجميع.... :rolleyes:

[بندق أفندى]

لماذا يخسر 50 % من قيمته ؟!!!!

أنا لا أشترى الذهب بالقطعة يا عم بندق ..

أنا أشتريه بالجرام بسعر السوق المعتاد + مصنعيته للجرام ..

فى المعتاد تزداد المصنعية لهذه الموديلات قليلا ً.. بمعدل من 20 - 30 % عن الذهب الإعتيادى ..

( خلى بالك 20 او 30 % من المصنعية وليس من القيمة الكلية ، يعنى لو مصنعية على الجرام فى المعتاد 2 وحدة ، تكون مصنعية هذه الموديلات 2ونصف وحدة مثلا ً )

والذهب لا يخسر بشرائه وإعادة بيعه إلا مصنعيته فقط .. ومن ثم سعر الجرام يباع به كما هو زيادة أو نقص .

الدهب الايطالى أو السويسرى يا عزيزى فيه صنعه نصف قيمته بالضبط ..

الستات لهم تركيبة لن تستطيع يغييرها .. طبعا بمناسبة انه كنا فى جدة الأسبوع الماضى فكان لابد من المرور على المحلات التى تعودنا الشراء منها ..

يعنى الأحداث قريبة جدا .. واشترينا قطعة مميزة .. ولو حسبتها بالجرام هتكون أغلى كتير جدا من السعر المعلن ..

[الحاج فوزى]

فكرتنى يا حاج فوزى...بصديقة لى كانت بنتها بتتخطب من فترة...ويعنى المتعارف عليه فى اسرتها ووسطها ان الشبكة تكون الماظ. ( منظرة فاضية طبعا :lol: ) ......فأم العريس قالت.. مافيش داعى الماظ...ده بيخسر عند البيع ...نجيب دهب قيمته فيه.... :wub:

مهو كلامى يا سيدتى من واقع تجربة حياتية شبكاواتية تدبيساتية فى خاتم ألماس بالشىء الفولانى .. لو كنت وقتها إشتريته ذهبا ً لكان اليوم بالشىء الفولانى B)

والحمد لله لا بعت ولا مزنوق للبيع ، لكنى أتحدث عن الفكرة فى مجملها ..

لكن بالطبع .. الكلمة الأخيرة ..

لكم . :happy:

:rolleyes:

[الحاج فوزى]

لماذا يخسر 50 % من قيمته ؟!!!!

أنا لا أشترى الذهب بالقطعة يا عم بندق ..

أنا أشتريه بالجرام بسعر السوق المعتاد + مصنعيته للجرام ..

فى المعتاد تزداد المصنعية لهذه الموديلات قليلا ً.. بمعدل من 20 - 30 % عن الذهب الإعتيادى ..

( خلى بالك 20 او 30 % من المصنعية وليس من القيمة الكلية ، يعنى لو مصنعية على الجرام فى المعتاد 2 وحدة ، تكون مصنعية هذه الموديلات 2ونصف وحدة مثلا ً )

والذهب لا يخسر بشرائه وإعادة بيعه إلا مصنعيته فقط .. ومن ثم سعر الجرام يباع به كما هو زيادة أو نقص .

الدهب الايطالى أو السويسرى يا عزيزى فيه صنعه نصف قيمته بالضبط ..

الستات لهم تركيبة لن تستطيع يغييرها .. طبعا بمناسبة انه كنا فى جدة الأسبوع الماضى فكان لابد من المرور على المحلات التى تعودنا الشراء منها ..

يعنى الأحداث قريبة جدا .. واشترينا قطعة مميزة .. ولو حسبتها بالجرام هتكون أغلى كتير جدا من السعر المعلن ..

أنا بخلى مراتى تحسبها معايا كل مرة .. لحد ما ألفت الفكرة سعر الجرام شىء وسعر المصنعية شىء وليه القطعة ديه مصنعية أكثر وليه ديه اقل ..

والحمد لله أخر مرة كانت هى اللى بتفاصل الصائغ :rolleyes:

[سهران]

السلام عليكم اخوانى و اخواتى

عايزة نصيحة منكم لو سمحتوا انا قررت انى اشترى خاتم الماظ لانى زهقت من الدهب

الأخت ذهبيــــــة زهقت خلاص من الدهب و ناوية تشتري ألماظ.... و طبعا كدة ما ينفعش ....... هو ده مش يخالف أي قاعدة من قواعد المحاورات؟ :rolleyes:

أول ما حضرتك تشتري الألماظ بلغي الأدارة .... طبعا لزوم تغيير الأسم من دهبية الى ألماظية :happy: :lol:

مبروك مقدما .......... الخاتم و الأسم الجديد

[newcomer]

السلام عليكم ورحمة الله....

شوفي أنا حاجيبلك الحكاية من أولها...وبأحذرك من الأول أنا ممل حبتين...

الألماظ عادة له أربع خواص بتحدد قيمته... معروفين بالfour Cs...وهما

cut...وبتحدد مدى الدقة التي تم بها قطع وتلميع الفص وحاقولك حكايته...

color... أو اللون...

calrity... أو نقاء الفص...

carat...أو القيراط وبيقيس كتلة الفص..

حاقولك بقى حكاية كل خاصية....

ما شاء الله .....الله ينور عليك ......معلومات مترتبة و قيمة ......

:rolleyes: :happy:

[jessika]

ماشى يا استاذ سى السيد تعيش وتضحكنا :happy: :rolleyes:

[doha]

كنت داخله اقولك ان متشتريش غير حاجه تمنها زايد عندك لانك لما تيجي تبيعي هتخسري فيها كتير وكتير اوي .. يعني اشتري حاجه كانك بتشتري طقم اكسسوار فالصو بس شيك شويه .. بس بصراحه قرأت مداخله الاخ وجدي فلقيت اني اسكت احسن .. ماشاء الله تبارك الله على قولة اخوانا السعوديين كفى ووفا انا شخصيا استفدت جدا من المداخله القيمه دي معلومات مظبوطه واسلوب في الشرح ماشاء الله ربنا يبارك .. شكرا لك على موضوعك الي طلع لنا الدرر دي واكيد طبعا الف شكر للاستاذ وجدي على رده القيم الي يتثاقل بالماس المتغلف الي مكمل تعليمه وجاي بالشهاده الكبيرة كمان ..

[Tarek_ml]

فيدونى بسرعةةةة لانى هانزل اشترى خلال يومين و شكرا مقدمااااااا

استنى شويه ربنا يخليكى انا بدور على خاتم مراتى ماعرفش دفساه فيه وهابعهولك

تم تعديل 6 أبريل 2009 بواسطة Tarek_ml