أرجو الافادة

[Outside egypt]

السلام عليكم و رحمة الله

جزاكم الله خيرا اخواني الكرام علي ما تقدمونه من مساعدة لإخوانكم هذا المنتدي

عندي موضوع عاوز آخد رأيكم فيه

أنا أعمل في شركة كبيرة..و لكن نظرا للتعنت في بعض الأمور و عدم تنفيذ بعض الأشياء التي

اتفقنا عليها شفهيا عند التعاقد..و منها مثلا عدم الموافقة علي صرف سلفة لإستئجار سكن عائلي

حيث أنها كانت ضمن الاتفاق..و حاولت معهم كثيرا و رفضوا.

حيث ان زوجتي معي الآن..و أسكن في شقق مفروشة بالرياض..و لك أن تتخيل يعني ايه شقة مفروشة

في الرياض..وبالشهر كمان..أكيد الأخوة عارفين الأسعار هنا عاملة ازاي

المهم..طبعا ظروف العمل الآن لا تخدمني اطلاقاوخصوصا ان عليا بعض الديون في مصر و موضوع الشقة المفروشة ده بياكل جزء كبير من الراتب..و أمامي أكثر من فرصة عمل أخري و بمزايا أفضل بكتير

أنا ناوي ان شاء الله لو ما نفعتش الطريقة العادية في التفاوض إما نقل الكفالة او الخروج النهائي

إني أنزل أجازة عادية و أرجع علي عمل آخر.

أنا ان شاء الله اقامتي هتنتهي بعد حوالي 3 شهور من الآن..كنت ناوي أنزل قبلها..و أستني في مصر لما تأشيرة العودة تنتهي و اقامتي

هنا تنتهي و بعدين أرجع ان شاء الله بتأشيرة زيارة عمل...السؤال الآن..هل دي فيها خطورة عليا؟

وهل حتي لو اقامتي انتهت هنا و لم تجدد.. هل من حق كفيلي برضه انه يبلغ عني هروب؟؟

وهل لو رجعت ان شاء الله بتأشيرة زيارة عمل ..ممكن أبصم في المطار..؟ ولا البصمة للي جايين اقامة بس؟؟

أفيدوني أفادكم الله

تم تعديل 5 أبريل 2009 بواسطة Outside egypt

[doha]

بصراحة انا مذهولة ..

وضعك الحالي وماانت ناوي عليه بالظبط زي واحد مبيعرفش يعوم وواقف على الشط وفجأه من نفسه كده وبدون سبب مقنع راح رامي نفسه في الميه على اساس ان احتمال حد يعدي ويطلعه ..

حاجه من الاثنين اما اني فهمت غلط او اني فهمت غلط لان مش معقول تبقى امورك مستقرة ومعاك اقامه وزوجتك عندك وكل مشكلتك في سلفة الراتب وهتهدم المعبد على من فيه عشان كده ..

بالنسبة لموضوع البصمه وقبل ماتسمع كلمتين في العظم من الاستاذ سين فبقولك انا معنديش فكرة عن استفسارك لكن الي اعرفه اني لما دخلت زياره من كام شهر وكانت زياره عائلية بصموني في المطار في جهاز كده معرفتش انه البصمه غير لما دخلت المنتدى هنا وشفت الكلام الي عنها وسألت في الجوازات فقالوا لي ايوه هو ده البصمه الي راعبه الكل .. فاذا الزيارة العائلية بتبصم يبقى العمل مش هيبصم؟

دلوقت انت بتقول انك في شركه كبيرة وده وضع نادر بالمناسبة لان الطبيعي انك تكون في حته فيها اثنين ثلاثه موظفين وصاحب العمل قاعد على راسكم اربعه وعشرين ساعه يأمر ويشخط وينطر على اساس انكم من بقية ( العماله ) الي عنده بغض النظر عن مؤهلاتكم او وضعكم الاجتماعي او المستوى الي جايين منه فانتم في الاول والآخر شغالين عنده وراتبكم بيطلع من جيبه .. في الشركات الكبيرة الوضع مختلف كتير على الاقل غالبا مديرك هيبقى اعلى منك او حتى قريب من مستواك والاهم انه مش هيمن عليك باللقمه زي لو كفيلك من اياهم ..

الشركات الكبيرة السستم بتاعها معروف وحقوقك بتعتبر محفوظه الى حد كبير لان الي بيصرف لك موظف زيك مش صاحب عمل . .

طبعا مش بقول ان الشركات الكبيرة جنة موعوده لكن هي بالمقارنة بالشركات الصغيره او الفرديه اكيد تكسب .

نيجي لموضوع سلفة الراتب .. انت زعلان ليه انك ماخذتهاش مهو كله عليك في الآخر يعني لو خذتها من دلوقت هتزنقك قدام فالصح انك تدبر نفسك بالموجود حاليا وكفايه الديون الي جيت بيها من مصر ..

ممكن حاليا تسكن في اي شقة في اي مكان تعبان باي ايجار كان وتشتري اي عفش مستعمل ولو تخليها على البلاط يادوب الاساسيات بس وكل شهر هات حاجه .. لكن تترك شغلك وتعرض نفسك للاهوال وانت لسه مفقتش من تسديد ديون سفرك يبقى بجد حرام كانك بعت العزبه واشتريت التروماي ..

وبرضه استخير عشان تبقى مطمئن لقرارك اكتر وربنا يعينك على اتخاذ الموقف السليم ..

[Outside egypt]

السلام عليكم و رحمة الله

أختي الفاضلة doha

بصراحة..عندك حق في كل كلمة قلتيها

و أنا نفسي و أنا بكتب الموضوع كنت عارف اني متسرع جدا

بس غصب عني..يعني مثلا لما المكان اللي أنا فيه يوعدني وعد معين

ويخلفه

وبعدين راتبي X شامل السكن..و بعدين تلاقي مكان تاني أكبر بيقوللك

الراتب عندنا 1.5 X غير السكن

و التأشيرة موجودة..فبالتأكيد لا زم يحصللك شيء من التردد

وده اللي حصللي

أنا عارف اني اتسرعت جدا..و آسف لو كنت ضيعت وقتكم

لكن فعلا غصب عني..وجزاكي الله خيرا

تم تعديل 5 أبريل 2009 بواسطة Outside egypt

[doha]

السلام عليكم و رحمة الله

أختي الفاضلة doha

بصراحة..عندك حق في كل كلمة قلتيها

و أنا نفسي و أنا بكتب الموضوع كنت عارف اني متسرع جدا

بس غصب عني..يعني مثلا لما المكان اللي أنا فيه يوعدني وعد معين

ويخلفه

وبعدين راتبي X شامل السكن..و بعدين تلاقي مكان تاني أكبر بيقوللك

الراتب عندنا 1.5 X غير السكن

و التأشيرة موجودة..فبالتأكيد لا زم يحصللك شيء من التردد

وده اللي حصللي

أنا عارف اني اتسرعت جدا..و آسف لو كنت ضيعت وقتكم

لكن فعلا غصب عني..وجزاكي الله خيرا

وقت ايه بس الي ضيعته عن نفسي قاعده على القهوة بالشيشة لا شغله ولا مشغله ..

بالنسبة لموضوعك انت حر في قرارك انا بس كلمتك بمنطق الي خارج المشكلة فيجوز شايفها اوضح من الي جواها ..

بالنسبة لعروض الشركات التانيه كن على ثقة ان لو مش الشغل عندهم يستاهل الراتب الي عارضينه عليك مكانوش عرضوه بمعنى لو مش هتتعب بقدر الفلوس دي وتطلع عينك بيها مكانوش هيدوهالك .. اذا لما تكون بتاخذ سين من الراتب في شغلك بسين من المزايا وسين من الالتزامات والعيوب فانت لو رحت مكان تاني بيديلك سين في عشرة راتب ومزايا يبقى تاكد هتاخذ سين في عشره شغل وسين في عشره التزامات وسين في عشره طلوع عين ..

ده غير اننا لازم نسلم بالحقيقة القائله بان الي على البر شاطر وانك طالما بعيد عن الشغل هتلاقي كل الوعود والاحلام جاهزه لكن وقت ماتيجي رجلك ممكن نصها يتبخر في الهواء ..

على كل حال القناعه كنز لايفنى والراحه في المكان الي انت فيه بتتحسب بالفلوس برضه يعني لو انت مستقر في شغلك فدي لوحدها لها ثمن حطه جنب مميزات الشغل الماديه لان مش كل الشغل تلاقي فيه استقرار مادي ومعنوي برضه اسم الشركه الي انت فيها ينفعك بعد كده في السي في فلو هي شركه كبيرة متفرطش فيها بالساهل ..

واخيرا انا لو مكان شركتك مستحيل اديلك السلفه الي وعدتك بيها لسبب بسيط انك ناوي تمشي واكيد ده باين عليك جدا في تصرفاتك معاهم وعشان كده هم تراجعوا في موضوع السلفه لان مش عاوزين يخسروا عليك وهم مش ضامنينك معاهم ..

انسى موضوع السلفه دي دلوقت وركز كل تفكيرك تلاقي شقة باي سعر ممكن ووفر من اي مكان تقدر عليه لغايه ماتسيبوا الشقق المفروشه وعلى فكره كان الصح من البدايه انك متستقدمش زوجتك الآن قبل ماتامن حكايه السكن الاول .. على كل حال لعله خير ممكن بقى طالما زوجتك موجوده انكم تستغلوا ذلك في عمل ليها .. يعني ممكن تقدم للعمل في اي مدرسه بياخذوا اي شهاده على فكره بس تكون جامعيه .. وممكن هي تدي دروس في البيت على فكره برضه مطلوب جدا المجال وممكن يدر عليها دخل معتبر بدون ماتطلع من بيتها ..

واخر حاجه احب اضيفها ان الطمع يقل ماجمع فتروى الف مرة قبل ماتاخذ قرار وعلى قولة المثل برضه عصفور في اليد خير من عشرة على الشجرة ..

انت بس ركز كل جهدك حاليا انك تتفانى في خدمه الشغل الي وثق فيك ده والاهم انك متضيعش فرصة للاستفاده باي خبرة فيه الا وتتعلمها واعتبرها مرحلة انتقاليه لغايه مافترة العقد الي بينك وبينهم تخلص وبعدها يبقى لك حرية القرار انك تكمل معاهم اوتشوف غيرهم ومين عارف يمكن وقتها تكون طورت من نفسك اوي فتترقى في نفس الشركه الي طالما كبيرة فاكيد فرصة الترقيات فيها افضل .. دائما بص لقدام ومتبصش للحظة الراهنة لان محدش عارف الخير بالظبط هيكون فين ..

ومعليش سامحني لو ردي الاولاني كان قاسي انا متعمدتش ابدا يوصلك الشعور الي يظهر وصلك من انك ضايقت حد او ماشابه واسفه لو كلامي ضايقك فيمكن بس خانني التعبير ..