اللى مش عاجبنا فى مصر ? ........طيب ايه اللى عاجبك

[newcomer]

بيعجبني في مصر روح الحياه فيها

ونس الناس في شوارعها وحواريها

زحمة الاتوبيس في عز ضهريها

وحوي يا وحوي رمضان جانا غنوة في لياليها

ياليلة العيد انستينا لما نغنيها

بيعجبني في مصر وشوش الشقيانين فيها

بيعجبني في مصر انها بلدي ومسيري ادفن فيها

[ذهبية]

يعجبنى الست المصرية جدااااا ست بمية راجل بتشتغل و تطبخ و تشقى و بتعمل كل حاجة باديها و توفر

علشان بيتها و جوزها تلاقيها بتخيط و تطرز وتعلم و تكبر شايلة هم ولادها من الميلاد ايدها بايد جوزها

لو فلاحة تروح معاها تفلح فى الارض لو سيدة عاملة تصحى من الفجر تعمل شغل البيت لو مش بتشتغل تتعلم خياطة و تطرز و توفر باى شكل

عندها قدرة رهيبة عل انها تعمل قرش من مفيش و تعمل من الفسيخ شربات كلنا بلا استثناء لو سرحنا فى

امهاتنا نقول اية الست دى كانت بتقدر تعمل كل دة ازاى ازاى

الست المصرية الام المصرية لها اكبر تحية لانها بجد احسن ست فى العالم

[Tarek_ml]

فى وسط زحمه المواضيع الساخطه على مصر ..... نفتح الموضوع ده تانى

[doudy]

اللى عاجبنى فى مصر انها وطنى اللى مقدرش اغيره

انى بحس فيها بالامان انا و اولادى

رغم ان فيها بعض العيوب

بس اكيد هية بالنسبة ليا احسن من غيرها

دودى

[مصري أصيل]

اللي عاجبني في مصر . أنك تقدر تستمتع فيها و تضيع الملل و تجدد نشاطك بسهولة ... بمعني أن لو واحد أمكانياته علي قده و مشي شويه علي النيل و شم شوية هوا نضيف و أشتري شوية ترمس هوه و أسرته أو كوزين بطاطا هيجدد نشاطه و يخرج من حالة الملل اللي بيكون فيها . أو ياخد اسرته و يروح سينما مثلاً . أو يروح الحسين لو من سكان القاهرة و يقعد قاعده حلوه و مش هتكلفه كتير أو ياكل طبق رز بلبن أو بليله من عند المالكي اللي في الحسين و انتهي الموضوع.

و لو أمكانياته متوسطه ممكن يروح كام يوم اسكندرية أو مرسي مطروح يغير جو و برضه التكلفة هتكون معقوله.

أما لو أمكانياته عالية هيروح يقضي أسبوع في مارينا أو شرم الشيخ و يرجع زي الفل.

اللي أقصده ان الغني و الفقير يقدر يستمتع و يقدر يغير جو و يجدد نشاطه و اللي عايز يعمل كده بعشرة جنيه هيعمل و اللي عايز يصرف آلاف هيصرف.

أنما اللي عايش في الخليج زي حالاتي بيبقي معاه الفلوس و مش عارف يستمتع بيها لأن الجو هنا يا أما برد يا أما حر زمهرير و الفتره اللي ممكن تخرج فيها و تستمتع بالطبيعه و تشم هوا نضيف بتكون عشر أيام في السنه بين الصيف و الشتا و عشرة تانين بين الشتا و الصيف . و باقي ايام السنة بنقضيها في المولات و الأسواق و نشتري حاجات ممكن مش محتاجينها بس هنعمل ايه اهو ده اللي موجود.

و كلمة سمعتها من واحد كويتي .. كان بيقول أحسن شيء في مصر ان لو معاك مليون دينار و عايز تصرفهم في مصر في أجازة هتصرفهم أنما هنا في الكويت بتكون مخباتك (يعني محفظتك) فيها فلوس هالكتر (و بيشاور بأيده ) و مع ذلك مو عارف وين تصرفهم .

يعني أنا و أسرتي بنمر بحالة زهق حالياً رهيبة و الله و منتظرين مدارس الأولاد تخلص و هنروح أن شاء الله نعمل عمرة أو أنزلهم مصر يقضوا شهر شهرين عشان يخرجوا من حالة الملل دي و أنا بقي ربنا يتولاني لأن ظروفي لا تسمح بنزول مصر معهم و ليست الظروف المادية و لكن ظروف أخري .

تقبلوا تحياتي

أبو كريم