(من اظرف الايميلات ) دعاء المصريين الجديد

[somayasaleh]

من بعد صباح الخير عليكم جميعا

قريت اليوم هذا الاميل عندي وبصراحة قلت تشفوه معاي

وكل واحد يقول ر أيه ايه؟؟؟؟؟

هل يعبر عن ما يجول في خاطر سبعون مليون مواطن مصري مطحون ؟؟؟

مبعد ما قريته مش عارفة لقتني افتكرت المثل اللي بيقول.........شر البليية ما يضحك.......... المصيبة يعني .... مش البلي بتاع العيال

اسيبكم بقي مع الدعاء المستجاب ...يارب

::: دعاء مصري مطحون :::

اللهم أنقذنا من نفسية الز ملاء.. وغباء الأصدقاء

اللهم ارحمنا من استبياع الجيل الجديد..

وحرائق السكة الحديد

واستقصاد كل مدير.. وندالة القرايب

الصغير منهم والكبير

اللهم أغثنا من كل عميل .. ومن فواتير موبينيل

اللهم أرحمنا من تشريفة عربيات المسئولين ,

وزحمة الشوارع في كل حين

وسحب الرخص في كل كمين.. من الغلبان مش م المتين

اللهم أهدى لنا سواقين الميكروباص

والمدير البصباص

اللهم ارحمنا من الشئون القانونية وشئون العاملين

واللي بيقفوا فـ وسط الشارع فجأة وبدون إشارة يمين

اللهم قنا شر الكليبات..

وشر شلل البنات.. ولؤم الستات

وغباوة الحموات

والمينيمم تشارج كافيهات..

وهيافة الصحف والمجلات

وقطع الحرارة فجأة عن التليفونات وقت الزنقات

والمدارس اللي بتطلب تبرعات بالألافات

ووقــــوع السيــرفـــر وقفلـــة السايتـــات

اللهم ارفع مستوى الزمالك ..

لمستوى انبى والحدود.. أو حتى مستوى أسمنت أسيوط

أو أرسل يارب عليهم صاعقة..

بدل ما يخلونا نموت ...

اللهم سدد أقساطنا .. وضلل عنا مآمير الضرايب

اللهم ارزق جيل الوسط عقود عمل في ليبيا وقطر

اللهم افتح لجيلنا القديم الطريق الفسيح

حتى ننظف انتخابات البلد من لعبة المراجيح

اللهم ارحمنا من الاكتئاب مرض العصر والشباب

واحمي يارب سماء مصر من سحابة الهباب

واكفنا شر صاحب الدقن الكداب

وصاحب التصريحات النصاب

اللهم ارزق كل بنت بعريس هدية..

وكل شاب بوظيفة وشقة وعربية

اللهم أحرق الـ 0900

واضرب الحرامية بالحرامية

ونجح أي طالب في أي كلية

حتى ولو كان في التربية الموسيقية

آآميين آآآمين

[مغتربة]

هههههههههههههههههههه

امين امين يا رب العالمين

[سهل جدا]

الدعاء ده لو كنت قرأته من أسبوعين لما كنت في السعودية كنت ضحكت عليه مووت :blush2: :sad: :sad:

لكن دلوقتي لا أملك سوى البكاء... واء واء واء

لأني في مصر دلوقتي :blush2:

بس والله رغم كل المآسي ديه أكثر المصريين عندهم رضا بعيشتهم وبيحمدوا ربنا

سبحان الله , شعب فعلا عجيب .. ربنا يرزقنا جميعا الرضا

دمتم ودام شعب مصر دائما بود

هل يعبر عن ما يجول في خاطر سبعون مليون مواطن مصري مطحون ؟؟؟

على فكرة شعب مصر مش سبعين مليون .. دا تجاوز ال 80 مليون

[fatfouta]

الدعاء ضحكنى جدااااا يا سمسمه

شكرا ليكى

[SoSo R]

جميل جدا يا باشمهندسة سمية

بصراحة كل كلمة لها مغزاها

و تنطبق على واقع الحاجة و تمانين مليون

تحياتى

سوسورانى

[jessika]

هو فعلا لخص كل مشاكل مصر بطريقة كوميدية جميلة وضحكنى انا كمان ............احنا شعب طيب جدا وبنحول مشاكلنا لنكتة ونضحك عليها بدل ما نطق...........ودى للاخ اللى كتبها :blink:

[somayasaleh]

الاخوة والاخوات الافاضل

شكرا علي مروركم علي التوبيك بتاعي

الاخ سهل جدا....... اسم حضرتك يدعو للتفائل في ظل الظروف الصعبة اللي بنعيشها.......بس اول مرة اعرف اننا بقينا 80 مليووووووووون

الفاضلة سوسوراني ميرسي يا روحي.... كلك ذوق... ياريت تشرفينا في توبيك الفيدرالي بعد 2008 وتكتبي عن تجربتك علشان الكل يستفيد

حبيبة قلبي فطومة....اسمك حلو قوي ما شاء الله ،،،،،،علي اسم بنت الرسول.... شكرا لمرورك،،،،

الاخت مغتربة....ايه اخر اخبارك

يا جماعة اللي عنده ايميل ظريف اتبعت له ....يكتبه علشان كلنا نستفيد ولو بالابتسام

[somayasaleh]

هو فعلا لخص كل مشاكل مصر بطريقة كوميدية جميلة وضحكنى انا كمان ............احنا شعب طيب جدا وبنحول مشاكلنا لنكتة ونضحك عليها بدل ما نطق...........ودى للاخ اللى كتبها :blink:

الاخت العزيزة جيسيكا

شكرا لمرور حضرتك..... والله انا لما عرفت السي اس كيو ده ايه..... فرحت لك قوي قوي قوي

تقبلي تهنئتي للمرة الرابعة

[د هشام ابراهيم]

:rolleyes: :rolleyes:

الصراحة يعني الميل ما سابش .... تجسيد حي لمهارة الانسان المصري في تحويل مشكلاته لمادة فكاهية ..... و خفة دم ما لهاش مثيل في أي حتة

شكرا سيدتي الفاضلة :lol: :rolleyes:

[somayasaleh]

:rolleyes: :rolleyes:

الصراحة يعني الميل ما سابش .... تجسيد حي لمهارة الانسان المصري في تحويل مشكلاته لمادة فكاهية ..... و خفة دم ما لهاش مثيل في أي حتة

شكرا سيدتي الفاضلة :lol: :rolleyes:

دكتور هشام عندنا ..... يا دي النور يا دي الهنا

شرفتنا يا فندم علي دخولك التوبيك.......

وصدق اللي قال ان الشعب المصري ده ابن نكته....... يعني الشعب الوحيد اللي بيتريق علي نفسه

بس بصراحة ....افضل كتير من شعوب نكدية.......

اصل لو ما ضحكناش علي مشكلنا.....( اللي ملهاش حل)..... ح نفرقع

[د هشام ابراهيم]

:rolleyes:

الصراحة يعني الميل ما سابش .... تجسيد حي لمهارة الانسان المصري في تحويل مشكلاته لمادة فكاهية ..... و خفة دم ما لهاش مثيل في أي حتة

شكرا سيدتي الفاضلة :lol: :rolleyes:

دكتور هشام عندنا ..... يا دي النور يا دي الهنا

شرفتنا يا فندم علي دخولك التوبيك.......

وصدق اللي قال ان الشعب المصري ده ابن نكته....... يعني الشعب الوحيد اللي بيتريق علي نفسه

بس بصراحة ....افضل كتير من شعوب نكدية.......

اصل لو ما ضحكناش علي مشكلنا.....( اللي ملهاش حل)..... ح نفرقع

العفو يا أفندم ده بس من ذوق حضرتك :rolleyes: ...

و عندك حق طبعا في كل كلمة قولتيها ...ربنا يصلح الحال

[Alshiekh]

الفاضلة / somayasaleh

الأخوة والاخوات الافاضل

قال تعالى " وَقَالَ رَبُّكُمُ ادْعُونِي أَسْتَجِبْ لَكُمْ .... الآية "

وقال سبحانه وتعالى " وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ "

وقال صلى الله علية وسلم : الدعاء هو العبادة ثم قرأ بعدها " وَقَالَ رَبُّكُمُ ادْعُونِي أَسْتَجِبْ لَكُمْ "

وقل صلى الله عليه وسلم " أفضل العبادة الدعاء " وقال ايضا " لايرد القضاء الا الدعاء ....

ولا أظن ان الدعاء ممكن ان يكون مدعاة للابتسام او الضحك أو اللهو والفكاهة ، بل ان الدعاء يصحبه الخشوع والبكاء والتضرع ....

فقط اردت تذكيركم بآداب الدعاء ، وآسف ان كنت قد قطعت على البعض الضخك والابتسام

[مغتربة]

الاخت مغتربة....ايه اخر اخبارك

فى الدنيا بعافر فيها و بتعافر فيا

و دى منى ليكى لسؤالك الرقيق

[omtmam]

هذه أيام طيبة ومفترجة... فتعالوا ندعو معا دعوة المواطنين المصريين البسطاء الغلابة المبتسمين المتفائلين الحزانى المكتئبين القابضين على جمر حب الوطن والغاضبين الهادرين حينما يحتكم الأمر

*******

اللهم اسخط كل مسئول كبير وملظلظ إلى مواطن مصري أصيل يغلق باب المترو على أصابعه كل يوم فلا يتفوه ويقول آه وكمان بيدفع غرامة: إتلاف منشآت الدولة

اللهم اجعل وزراء الحكومة يتشعلقون على أبواب القطارات فتحتك بهم السيارات السائرة إلى الجوار.. بالظبط مثلما حدث أواخر شهر رمضان مع 16 بني آدم مصري... فيصابون بجروح وتقيحات ثم يسقطون جميعا في بحر من كولونيا خمس خمسات المركزة

اللهم اجعل كل الأهلاوية منهم زملكاوية فيعرفون معنى حرقة الدم والشلل الرباعي وإسفكسيا الكورة

اللهم اجعل تليفزيونهم يصاب بلوثة عقلية فلا يعرض لهم طوال اليوم سوى كل مسلسلات السيت كوم ونشرة الأخبار وخطب السيد الرئيس

اللهم أفسد تكييفهم في الصيف ومدفأتهم في الشتاء

*******

اللهم ارزقهم قصورا على شفا المقطم فتسقط كل الصخور المجاورة لهم ويبقى قصرهم كده مع نفسه زي: قرد قطع

اللهم اجعل الميه تنقطع من مواسير دشهم والصابون على وشهم وجوه عينهم

اللهم ارزقهم فولا ملوثا في الصباح وطعمية من نشارة الخشب عند الظهيرة وبصارة انتهت صلاحيتها منذ سبع سنوات في المساء

اللهم املأ مياه الساحل الشمالي بقناديل بحرية شرسة فإذا نزلوا للبلبطة تشكشكوا حتى احمرت كل فتفوته في أجسادهم

اللهم اخسف من عمر كل واحد منهم عددا ضخما من السنين ليعود تلميذا في الابتدائية يرتدي المريلة والشورت فيقضي يوما دراسيا كاملا في مدرسة حكومية

*******

اللهم اجعلهم يسيرون في شوارع وسط البلد ليلة العيد دون تشريفة

اللهم ارزقهم بجيران يلقون بالقمامة حول صندوق القمامة وليس فيه

اللهم اجعل بيوتهم أرضا لمعركة بين جيوش الذباب والناموس وأفسد كل ما لديهم من عبوات ريد وراجون وفليت الأصلي

اللهم ارزقهم بحادث تصادم بسيط فوق كوبري 6 أكتوبر يجعلهم يقضون نصف حياتهم متشعلقين فوق ومش عارفين يروحوا شغلهم

اللهم اجعلهم يقفون في طابور العيش لساعات وساعات حتى إذا وصلوا أخيرا للشباك قال لهم البائع بكل برود الدنيا شطبنا

*******

اللهم اجعلهم يتصلون بالطعام ديلفيري فيصلهم باردا سمجا

اللهم ارزقهم سائق أتوبيس بـجنونة تجعله لا يتوقف أبدا في المحطات المخصصة وإنما بعدها ببتاع كليو ونص فيضطرون للسير على أقدامهم كل هذه المسافة في عز الظهر حتى يصلوا إلى بيوتهم

اللهم اجعلهم أحد أبطال الكليبات التي يتم إنتاجها في أقسام الشرطة

اللهم ارزقهم ضابط رزل يكلبش عربياتهم رغم أنها راكنة صف أول

اللهم أرسل لهم بخناقة بين جيرانهم الذي يمتلكون حنجرة لا تفسد أبدا فلا يعرفون للنوم طريقا أو سبيلا

*******

اللهم إذا أكلوا كفتة اكتشفوا أنها من عند جزار الحمير وإذا أكلوا دجاجا عطسوا عطسة الفرخة البردانة

اللهم ارزقهم سفرا بعبّارة يعيش صاحبها في لندن الآن. وعرضا مسرحيا مشتعلا في مسرح بني سويف، وزيارة إلى الصعيد عبر القطار غير المكيف

اللهم إذا ذهبوا إلى العراق بطريق الخطأ قالوا لكل الشيعة إنهم من أهل السنة وقالوا لأهل السنة إنهم من الشيعة

اللهم أعطهم على قدر نيتهم وقدر عملهم من أجلنا وقدر حبنا لهم.. وده لوحده كفاية عليهم

اللهم اجعلهم يأكلون أكلنا ويشربون ماءنا ويركبون مواصلاتنا ويعملون في وظائفنا ويبقوا يورّونا بقى هيعيشوا إزاي

*******