ممكن اعرف مرتبات المدرسين في المدارس العالمية

[أحب الله]

السلام عليكم ورحمة الله وبركاته

انا قدمت لزوجي في مدرسة ألمانية بجدة ( وهي تابعة للسفارة الألمانية ومديرها الماني )وهو رافض طبعا لأنه حاسس انه مستواه هنا كويس

بس انا مش برتاح للدروس الخصوصية وبصراحة فلوسها بتطيييييييييييييييير بطريقة غريبة

اولياء الأمور مش مسامحين فيها الظاهر ولا ايه

كمان لو قعدنا نحوش باقي عمرنا مش حنقدر نطلع الحج انا وهو ووالده ووالدته

معلش انا دوشتكم وخاصة ان الكل بيسأل وتسافروا ليه ما انتو هنا كويسين فحبيت اديكم فكرة علشان متسألش تاني نفس السؤال وزوجي اول واحد سألني السؤال ده بس حاسة انه لو المرتب كويس هو حيعيد نظر خاصة بدل الشحططة في الدروس

وهل ينفع ناخد والده ووالدته معانا لأنهم عايشين معانا وبصراحة هو ميقدرش يسيبهم

وجزاكم الله خيرا

[بندق أفندى]

حتى الدروس هنا .. الحصة ب 300 ريال تقريبا

الرواتب على حسب المدرسة .. فيه مدارس البيسك بيبدأ من 5000 ريال غير البدلات ..

مدرسة تبع السفارة الألمانية ممكن تبقى مقيمة الراواتب حسب النظام فى ألمانيا .. مثلا 10 يورو فى الساعة ..

المم بالتوفيق . وطالما النية خير ان شاء الله ميسرة ..

دفعت لابنى فى سنتى الثانوية العامة فى مصر .. حوالى 45 الف جنيه فى الدروس وطبعا كان فى مجموعات مش درس لوحده والا كان الرقم تضاعف مرات .. يا ترى أخدتم منهم حاجة؟

الغريب بقى .. انه مدرسين الدروس الخصوصية دول كانو بيعاقبو الولاد والبنات على التقصير فى المذاكرة بالضرب .. والكل قابل .. عشان الولاد ينتبهو وما تضيعش الفلوس هدر .. يا ترى ده صح؟

[أحب الله]

جزاك الله خيرا استاذ بندق على ردك

بالنسبة للدروس حاسة المبلغ كبير قوي

احنا عندنا المادة ب 40 جنيه ساعتين في الأسبوع وزوجي بيضرب العيال فعلا علشان ميستهتروش لأن بعض العيال بتاخد الدروس استهبال ولأني على طول محسساه ان فلوس الدروس حرام بيحاول يراعي ربنا على قد ما يقدر

يعني العيل بيعملوا امتحانات كل شهر حصص المراجعة النهائية مجانا تعويضا لأي ضحك او تضييع وقت في حصص الشرح

اي عيل ميحسش انه حيجيب درجة حلوة يبقى برا بيكلم اولياء الأمور باستمرار علشان يبقوا عارفين مستوى ابنهم

في محافظتنا لو 20 عيل جابوا النهائية( 50) يبقوا 15 كانوا عنده

وكل درجات باقي العيال تتراوح بين 44 و48

ولا اتذكر اي طالب خلال 10 سنوات جاب اقل من 40 والله العظيم الا اخويا كان بياخد عنده ببلاش

جاب 37

قالي اخوكي شوه سمعتي

[بندق أفندى]

أشد ما استغربت له .. انه الحصة كان بيحضرها بين 40 الى 50 طالب .. كل طالب يدفع فى المادة شهريا .. بين 300 الى 450 جنيه .. حسب المادة وحسب شهرة المستر بتاعها .. وكل أسبوع امتحان رسومه 20 جنيه .. طبعا لو هياخد هو ومجموعة اقل من 5 هيكون الحصة بحوالى 100 الى 150 جنيه

مثلا مدرس الماس .. هو مهندس أصلا .. وبحسبة بسيطة تجديه بيعمل دخل شهريا حوالى 90 الف جنيه .. بس الحقيقة هو رجل مخلص جدا .. وكان عون كبير للولاد ... كل من كانو فى المجموعات دى حصلوا على 96% فما فوق ..

انا رأيى تنتقلوا للقاهرة أسهل من الانتقال لجدة .. ههههههه

وبعدين بطلى تحسسى الرجل بالذنب وهو بياخد 40 جنيه فى الشهر ..

[أحب الله]

لأ والعيال كانوا من5 الى 6 والسنة الي فاتت زاد الاقبال على اللغة الألمانية كمادة مجموع لنها اسهل بكتيير من الفرنساوي فبقت المجموعة 10 والسنة دي لأن كل الي في المحافظة عايزين ينقلوا عنده بقوا 13 والي عملوه اولياء الأمور لزيادة العدد

والله انا مش مهتمة بالفلوس قوي قد ما مهتمة ان احنا حنبقى قريبين من مكة ده انا بحلم اننا نسكن مكة وهو يروح جدة كل يوم

بس طبعا انا بفكر بعاطفية شوية لكن هو بيفكر انه لما يسافر ويرجع مش حيلاقي اسمه الي تعب فيه السنين الي فاتت

ده غير ان كل زمايله الي بيسافروا السعودية بيرجعوا قبل ما يكملوا السنة بس ده لأنهم بيشتغلوا في معاهد خاصة مرتبات ضعيفة جدا شغل طول اليوم تحكم

لكن الميزة ان هو حتبقى ادارته المانية

هو مشغول قوي بحكاية غلو المعيشة هناك وانه لازم راتب كويس يعيش منه كويس بس انا جوزي مالوش في التحويش لأنه مسرف جدا

يعني احنا حصيلة شغله هنا 10 سنين رجوع الساعة 12 ليلا

لا يدخر اي مبلغ انا عندي دفتر توفير فيه 1210 جنيها مصريا فقط لا غير

والحمد لله

بس طبعا ده لأنه مسئول عن اهله واخواته لأنه الكبير

والكبير عندنا في الصعيد يتحمل بكل شئ

ا

[doha]

المشكلة ان على كلامك كده المستقبل بالنسبة لزوجك في مصر مش السعوديه .. لانه مهما حوش في السعوديه هيرجع يبدأ في مصر من الصفر

لو محتاجين مبلغ معين لهدف معين يعني مثلا جوزك دكتور ومحتاج يلم ثمن عياده مثلا ولا ساكنين ايجار وعاوزين شقة ملك يبقى في الحاله دي فكروا في السفر بره وبرضه يعمل حسابه انه يشتغل دروس برا طالما هو ماشاء الله متمكن كده وفي فترة قياسية هيقدر يعمل قرشين حلوين بس يرجع بعدهم .

اما لو طالعين بس كده فالي هتاخذوه هتصرفوه ولو حوشتم حاجه هترجعوا تلاقوها متجيبش شيء .. يعني اقل شقة بالشيء الفلاني هتلاقوا معاكم فلوس لا هي قليلة فتنسوها ولا كتيرة فينفع تتجمد في شيء ده غير زي ماقلت لك هيقعد سنين تاني على مايعمل اسم ويتعرف وفي خلال السنين دي هتصرفوا الي حوشتوه ..

الخلاصه .. استخيروا احسن ولو شايفه ان اوضاع زوجك من حسن الى احسن يبقى خليكم في مصر افضل .. وبرضه متزعليش ان زوجك بيصرف معظم دخله او بيدي جزء منه لاهله لان مين عارف يمكن ده رزقهم اصلا وبيجريه على ايده ..

[أحب الله]

لا والله انا مش زعلانة خالص انه بيدي اهله صح كنت زعلانة في الأول بس بعد كده اقتنعت انه كل واحد بياخد الي ربنا كاتبه ودي ارزاق وفعلا ده رزقهم وهما ناس بصراحة كويسين جدا جدا ويستاهلوا

اما موضوع التحويش فانا كتبته كده اصلا جوزي عايز يبقى المرتب كويس علشان يعيش هناك كويس بس لكن فكرة التحويش دي لا في دماغه هنا ولا هناك واحنا الحمد لله شقتنا تمليك صغنونة بس حلوة الحمد لله

وانا فكرت في السفر بس علشان مكة ده كان فيه فرص تانية في قطر والامارات بس انا اتعلقت بالفرصة دي اكتر

انا لما الحيت عليه بموضوع الحج فكر انه ممكن نسافر سنة واحدة نحج ونرجع

انا وافقت بس في نيتي تعجبه العيشة هناك و نقعد اكتر

وعلى العموم احنا صلينا استخارة وربنا ييسر الأمور بس انا كنت عايزة اعرف يعني الحد الأدنى للمرتب كام علشان يتشجع لأنه مش متشجع خالص

انا الي ببعت للمدرسة وانا الي براسل المدير

ده حتى المدير ساألني وهو الشخص نفسه فين احرجني طبعا

لدرجة اني هددته اني حقدم لأني ليسانس السن الماني بس كسولة جدا واكره العمل جدا وبحب ابلط في البيت وانام حتى زوجي لما يتناقش معايا اقوله اعتبرني معايا

دبلون زي ما بينطقوه عندنا في الصعيد

وقلتله لو قبلوني حاخد اخويا محرم واسيبك