أيهما تختار: الراتب الأعلى أم العمل الذى تحبه؟

[محمد عبدالعزيز]

لنفرض إن هناك وظيفتين متاحتين أمامك, والاتنين منتظرين موافقتك, والاتنين شغل حلال طبعاً عشان ماحدش تفكيره يروح فى سكة تانية, ولكن...

هناك وظيفة راتبها أعلى ولا تحبها, والوظيفة الأخرى راتبها أقل ولكنك تحبها.

هل تضحى بالراتب الأعلى فى مقابل الاستمتاع فى عملك والإبداع فيه؟

أم تضحى بالاستمتاع فى العمل وتقبل الوظيفة ذات الراتب الأعلى؟

جاوبوا لو سمحتم

[fatfouta]

انا بصراحة هختار الوظيفة الى انا بحبها بس ده بحكم انى واحدة ست وممكن يكون مش ورايا مسئوليات ذى اى راجل فكده هيبقى ادامى اختيارين

معرفش بقى الرجال هيقولوا ايه

بس انت عارف لو ضغطوا عليا شوية... ممكن اختار المرتب الاعلى

[مغتربة]

بحيادية تامه و اذا تعذر الدمج بين الموضوعين و لو بنسب متفاوته

الاعلى دخلا

كل العمل فيه مشاكله و همومه

لذلك يطل الراتب هو عامل المفاضله بالنسبه لى

هذا ان لم يكن هناك عيوب اخرى جوهريه

[محمد عبدالعزيز]

انا بصراحة هختار الوظيفة الى انا بحبها بس ده بحكم انى واحدة ست وممكن يكون مش ورايا مسئوليات ذى اى راجل فكده هيبقى ادامى اختيارين

معرفش بقى الرجال هيقولوا ايه

بس انت عارف لو ضغطوا عليا شوية... ممكن اختار المرتب الاعلى

يعنى رأيك يا مدام fatfouta إن المسئوليات اللى بيتحملها الإنسان لها دور فى الاختيار؟

الرجالة الظاهر بيهربوا من السؤال يا مدام fatfouta

أو يمكن شايفينه سؤال مش محتاج إجابة

تم تعديل 9 أبريل 2009 بواسطة محمد عبدالعزيز

[كريم طاهر]

من العادى ان تكون الماديات ذات الاولوية الاعلى لانى ممكن اشتغل عمل انا بحبه ويكون غير مجزى ماديا

ومش هستفاد من الحب ده لكن لو وجد عمل مجزى ماديا وانا اجيده يبقى افضل,إلا إذا كنت لن اعمل ما لا احب

بجهد واتقان وساعتها هيكون حرام عليا إنى اخد اى راتب.

[فــيــروز]

لو كنت فى بداية حياتى الوظيفيه سأختار الراتب الأعلى

لكن لو غير ذلك سأختار العمل الذى أحبه

العمل بشكل عام سواء بتحبّه أو لا تحبّه قد يغلب عليه الرتابه و التكرار بعد فتره ممّا يصيبك بالملل و الزهد فما بالك لو كان أصلا عملا لا تحبه !!

[se_ Elsyed]

هاختار العمل اللي بأحبه .. ابو مرتب عالي

[Folana]

السلام عليكم ورحمة الله....

أجاوب على طول ..ولا أتفلسف شوية؟ :lol:

خلاص حأجاوب من غير زعيق..

عن نفسى لم أعمل من قبل ....

لكن لو أتيحت لى فرصة الخيار....

أختار الوظيفة ذات الراتب الاعلى...طبعا ومن غير تفكير....:happy:

أما عن حب نوع العمل...فأنا أتبع مبدأ - لا أدين له بالكثير....

حب ما تعمل...حتى تعمل ماتحب

يعنى مسيرى ان شاء الله أحب العمل اللى راتبه أعلى.....لكن مش مضمون ان راتب العمل اللى بحبه يرتفع....

بس كده...

[Alshiekh]

ممكن اتفلسف شوية؟

معلش استحملونى

ايه المقصود بوظيفة احبها ووظيفة مرتبها أعلى؟

ايه هى خبراتى ومؤهلاتى وتخصصى؟ راحوا فين ؟

والمرتب الاعلى ( الحلال ) حايتعرض على على اى اساس؟ خبرتى؟ تخصصى؟ أم مجاملة؟

مش متخيل انى اكون مهندس كمبيوتر ناجح واحب مهنتى ، ويعرضوا على وظيفة جراح مخ أو قلب بمرتب مليون دولار واقبل ، لانى واثق من الفشل فى اول عملية.

الا اذا كانت الوظيفة هى

رئاسة الولايات المتحدة زى بوش مثلا ، انا ماليش دعوة بمصر .... انا باقول من دلوقتى.

عموما لو كانت وظيفة مؤقتة ولاتحتاج لخبرات فسوف اختار المرتب الاعلى طالما انها حلال وانها مش مجاملة لواحد قريبى.

[Falcon Crest]

السلام عليكم ورحمة الله....

حب ما تعمل...حتى تعمل ماتحب

بالنسبه لي اختار العمل الي احبه و ده الي عملته لما اتخرجت اشتغلت في شركه بمرتب 500 جنيه 4 سنين و طبعا المرتب كان بيزيد كل سنه و لما بقيت واقف علي رجلي في تخصصي استقلت و الان في شركه متعدده الجنسات و الحمد لله

اهم حاجه الصبر و الاجتهاد و المذاكره

[hanzalah]

مجال العمل مرتبط بطبيعة الدراسة الاكاديمية السابقة للعمل

وبالتالي فكل انسان اختار عمله وتخصصه ومجاله عندما اختار دراسته

منطقة الدراسة هي منطقة الحب .. فيجب ان تدرس ما تحبه لتتفوق فيه وتتقنه وتلم بأصول صنعة المستقبل المتوقع

منطقة العمل هي ليست منطقة اختيار .. فالاختيار تم اثناء الدراسة .. اذن العمل ليس فيه حب

العمل نفسه .. باختصار شديد .. أكل عيش

ان تذهب كل يوم لنفس المكتب لتؤدي نفس المهام الوظيفية .. هذا ليس ترف وليس فيه مجال للحب

فيه مجال للجديه والاجتهاد والتجويد والاتقان .. نعم بكل تأكيد

انا غيرت مكان عملي عشرين مرة .. وكل مرة ذهبت لراتب أعلى بكل تأكيد أو ظروف أفضل .. فالراتب بمفرده ليس كل شيء

بل الشركة (صاحبة عرض الوظيفة) هي لديها باقة تكاملة تعرضها عليك في شكل راتب وتأمينات وبدلات وحوافز وضمان صحي وتذاكر طيران واجازة مدفوعة الى غير ذلك من مفردات هذه الباقة (Package) وانت حر ان تقبلها او ترفضها

وقد تقبلها في البداية وبعد فترة تطول أو تقصر تظهر لك فرصة أفضل من عدة زوايها (ومن بينها الراتب) فتقرر ترك مكانك وتذهب لمكان جديد

من كل ماسبق .. اتصور بكل قناعه .. ان الوظيفة والعمل هو أكل عيش .. ليس فيه مجال للحب

[محمد عبدالعزيز]

بحيادية تامه و اذا تعذر الدمج بين الموضوعين و لو بنسب متفاوته

الاعلى دخلا

كل العمل فيه مشاكله و همومه

لذلك يطل الراتب هو عامل المفاضله بالنسبه لى

هذا ان لم يكن هناك عيوب اخرى جوهريه

بالفعل لا يوجد عمل بدون ومشاكل وهموم, ولكن إذا أضيف إلى هذه المشاكل والهموم بعض الملل والضجر نتيجة عدم الاستمتاع بالعمل, فهل سيعوض ذلك الراتب الأعلى؟

أليس الاستمتاع بالعمل دافع لتحمل كل المشاكل بل والنجاح فى حلها أيضاً؟

[محمد عبدالعزيز]

من العادى ان تكون الماديات ذات الاولوية الاعلى لانى ممكن اشتغل عمل انا بحبه ويكون غير مجزى ماديا

ومش هستفاد من الحب ده لكن لو وجد عمل مجزى ماديا وانا اجيده يبقى افضل,إلا إذا كنت لن اعمل ما لا احب

بجهد واتقان وساعتها هيكون حرام عليا إنى اخد اى راتب.

فى رأيى الماديات لها الأولوية فى ظروف خاصة فقط, كأن يكون الإنسان عليه ديون ومهدد بالسجن إذا لم يسددها مثلاً, أو محتاج أموال ضرورى لإجراء عملية جراحية له أو لأى شخص ممن يعولهم كمثال آخر.

اهتمامى بحب العمل لدرجة الاستمتاع به, هو الوصول لمرحلة الإبداع فى ذلك العمل أياً كان نوعه, ولا يشترط أن تجيد عملاً لأنك تحبه.

ماذا سيتغير فى مجتمعاتنا إذا كان كل من يعمل عملاً يستمتع به ويبدع فيه؟

[محمد عبدالعزيز]

لو كنت فى بداية حياتى الوظيفيه سأختار الراتب الأعلى

لكن لو غير ذلك سأختار العمل الذى أحبه

العمل بشكل عام سواء بتحبّه أو لا تحبّه قد يغلب عليه الرتابه و التكرار بعد فتره ممّا يصيبك بالملل و الزهد فما بالك لو كان أصلا عملا لا تحبه !!

أستطيع أن أستنتج من رأى حضرتك إن الخبرة الحياتية والعملية تؤثر فى هذا القرار, وأتفق معك تماماً فى هذا الرأى.

[محمد عبدالعزيز]

هاختار العمل اللي بأحبه .. ابو مرتب عالي po::

لا يا سي السيد إجابتك من خارج المقرر, وماينفعش عندنا أكثر من اختيار :D

لو سمحت جاوب إجابة من المقرر واشرح لنا وجهة نظرك فى هذا الموضوع, ﻷنه رأيك يهمنا باعتبارك أحد العاملين فى مجال الموارد البشرية وأكيد مر عليك أنواع كتير من البشر وقد يكون منهم من تعرض لهذا السؤال.

[Falcon Crest]

هاختار العمل اللي بأحبه .. ابو مرتب عالي po::

بالظيط كده بس ده بيجي بعد سنوات من الخبره و التدريب و عمره ما ييجي بالحظ او في البدايه

[التونسى]

بدون تفكير .. وباقتناع تام .. وبلا تردد ..اختار المهنه اللى بحبها ... انا احب استمتع بعملى .. وابدع فيه ..مش مجرد تقضية وقت .. لكن طبعا انا مجبر انى اشتغل عمل غير اللى انا بتقنه وبحبه لظروف الغربه .. لكن لو انا فى مصر حشتغل المهنه اللى بحبها بلا جدال رغم ان مرتبى حيبقى شئ لا يذكر مقارنة بمرتبى الحالى

[hOuSsAm]

هاختار العمل اللي بأحبه .. ابو مرتب عالي po::

انا معاك يا سى السيد فعلا هختار الحاجة اللى بحبها وهى باذن الله مع الاجتهاد والصبر هتجيب المرتب العالى

وكمان يا جماعة الموضوع ده بردوا مربوط بتخصصات يعنى قدامى اشتغل محاسب مهنتى اللى بحبها او دكتور براتب 10000 دولار

طيب اشتغل دكتور واموت الناس

طيب لو اتعرض عليا مدرس لغة عربية وانا لا افقه حاجة فى النحو اروح المدرسة والطلبة يضحكوا عليا

اشتغل ميكانيكى واخلى العربيات تدخل فى بعضها

هى الفكرة ممكن تمشى انى بدل مشتغل محاسب مالى انقل ابقى محاسب تكاليف او محلل مالى فى البورصة او اشتغل مسءول عن الائتمان فى البنوك منطقية شوية واى حد ممكن يفكر ويسعى بالطريقة دى

واحد دكتور اطفال حب يقلب للجلدية وشوية كمل على انف واذن وحنجرة اهوكله طب مع الاحترام الكامل للتخصص بس بشوية مجهود بسيط هيعرف يدوس فى الشغل واهو مهنته (الطب)

الفكرة اللى اقصدة التغيير من مهنة لاخرى صعب من وجهة نظرى لكن مفيش مانع التنقل داخل التخصصات

[سهران]

أخترت بلا تردد العمل الذي أحبه ...... العمل و المهنة تقريبا هي أهم ممارسة في حياة الأنسان و لا أتصور أن أمارس أهم نشاط في حياتي و أنا أكرهه و تبقى أيه لزمتها الحياة بعد كدة .... أيه اللي هايحصل لو أشتغلت ما تحب و سكنت في شقة أصغر شوية ....عربية أصغر أو أقدم شوية ..... أكلت لحمة مرة في الأسبوع بدل مرتين مثلا po:: ... مش هاتفرق كتير لو أنت راضي و مستمتع بشغلك .

في بداية حياتي العملية و بعد شهور من وجودي بالمملكة أتعرض عليّ راتب أعلى من اللي كنت باخده .... فكرت شوية لقيت أني مرتاح و مقدر معنويا و منسجم مع المكان و عندي فرص للأبداع و التقدم نتيجة اني بحب الشغل فأنتاجي واضح و غير نمطي بطبيعة الحال ..... كان قراري ساعتها أستمر و بدل ما أتغرب ست سنين مثلا خليهم سبعة في مكان أنا مرتاح فيه .... بدل ستة في مكان قد أعاني فيه مع الراتب الأعلى ...

الفلوس مش كل حاجة و صدقوني فرقها بسيط لو الواحد راضي .... الرضا جنة الدنيا ... و الحياة مش ناقصة حرقة دم في الشغل اللي هو أهم نشاط في حياة الأنسان .

تحياتي .

[حسام يوسف]

شوف يا عم محمد

معايير اختيار العمل فى حالة توفر أكتر من فرصة بالنسبة ليه أنا كحسام كالتالى

أولا المقابل المادى

ثانيا الراحة النفسية

ثالثا فرص مكاسب جديدة

ولكن برضة حسب ظروف كل واحد فى مراحل حياته

يعنى فى مرحلة من حياتى زي اللى أنا فيها

وظروفى دلوقتى

هختار المقابل المادي

ثم المقابل المادي

ثم المقابل المادى

وممكن فى ظروف تانية

أغير اولويات اختيارى أو مسببات قرارى

انت بقى اللى تقدر تعرف ظروف حياتك

وتقرر أى الأولويات انت محتاجلها دلوقتى

واية الأولوية اللى ممكن تستحمل غيابها

القرارات زي العملات

ليها الايجابي وليها السلبي

شوف ايه الايجابية اللى انت محتاجلها قوى دلوقتى

واية الاولوية اللى سلبياته انت ممكن تقدر تستغنى عنها

وقبل كدة صلاح جاهين الله يرحمه قالها

(جالك اوان يا قلبي ووقفت موقف وجود

ياتجود بده ياقلبي

يابده تجود

ماحد يقدر يبقي على كل شيئ

مع ان كل شيئ موجود)

وربنا يكتبلك دايما الخير

ويلهمك الصواب لما فيه مصلحتك

تم تعديل 9 أبريل 2009 بواسطة حسام يوسف