أنقلاب في نفاقستان

[المهندسه]

استاذ سكوربيون تحياتى لك بجد مش قادره اصدق عنيا و انا بقرأ التطابق الغير منطقى والذى لا يقدر ان يصدقه عقل ابداعن جميع توقعات منذ سنوااااات طويله

طيب ياريت حضرتك تاخد فنجان قهوه و تقعد مع نفسك شويتين و تخمخ فى ملامح المرحله ال جايا...

[أبو محمد]

خللوا بالكم بقى إن سيدنا "المبروك" الشهير بسكوربيون كان زعيم الشلة اللى حصلوا على وسام "المرجفين" من الطبقة التانية .. ووسام "المنخنخين" من الطبقة الأولى :P

[Scorpion]

العملية مش محتاجة قراية الطالع ... الموضوع ببساطة شديدة قراية تجارب

تجارب اشخاص ... و دول تلاقيهم هنا في المحاورات و بالذات الرعيل الأول و حكمة الموجودين حاليآ و اللي اتعلمنا كلنا منهم ..
تجارب شعوب ( و بالذات شعوب امريكا الجنوبية ) اللي مرت بنفس اللي حصل عندنا ...

اضربيهم مع بعض و فكري في طباعنا كمصريين حتلاقي اللي حصل و اللي حيحصل قدامك ..

الموضوع دايمآ مسألة وقت ....

بالنسبة ليا لما بضرب الودع شايف المستقبل مشوش ....
مش عارف افرح و الا أحزن



لكن في كل الأحوال .... المصريين عرفوا طريقهم خلاص ...

[سقراط المصري]

سكوربيون إنسان مصري أصيل - مبدع في عمله.

زمااااااااااااااان من حوالي من تسع سنوات (على رأي سكوربيون ).... الرعيل الأول كانت ولازالت المحاورات مصدر للإلهام والابداع

سكوربيون اسمه الحركي سكوب (فاكر الدلع ده)

تحياتي للمبدع الاصيل سكوب

سقراط

[لونا]

:hi: :hi: :hi:

[se_ Elsyed]

طبعاً 7 سنين كفيلة إن الواحد ينسى هو قرا إيه او كتب إيه

لكن إسمح لي أرفع لك الطربوش يا عزيزي سكوب على قصتك الطليعية الوحدوية التقديمة

بجد تسلم إيدك

اخوك .. الاديب الشاب سين سين عضو جمعية الكتاب ذوي الأحتياجات الخاصة

[Folana]

السلام عليكم ورحمة الله...

برافو سكوب يا سابق عصرك وأوانك....طول عمرى بأقول عليك فلتة من فلتات الزمن...

طب الله يخليك بقى كملها لنا..عايزة أعرف مولانا راح فين بعد التنحى...وحيفوق من الغيبوبة قصدى من الشلل النفسى ولا لأ..وبعد ماعمل نفسه ميت الشعب حيعمل ايه معاه..ولا هو كده خلاص بخ..تنحى وطويت صفحته؟

سلمت اناملك ..:)

[عبير يونس]

بجد لما قريتها قعدت ابص على التاريخ و مش مصدقة

انت من الاحرار يا سكوب يابني

روح الهي يكتب لك في كل خطوة تقييم ايجابي يا قادر يا كريم

و يحميك من شر ال....محلاوي اللي لسه في السَلَطة مع خيار الناس الحقيقة

:closedeyes:

[Salwa]

مش حكاية حكمة...ولا حكاية استنتاج.

الحكاية ببساطة أن فيه ناس (( زيك ياكامل يامواطن مصرى أصيل)) بتحب قوى قوى البلد دى وعلى طول شايفاها كأنها الأم والأبنة ف نفس الوقت .

عارفة ايه اللى حايحصل ...لها..و...منها.

تنبؤات صدقت.

صدقت كل تنبؤاتك ياكامل .

صدقت كل تنبؤات أعضاء المحاورات المصريين قوى ..اللى بيحبوها قوى

تعرف ياكامل ؟؟؟

انت بتثبت هنا ايه؟؟

لما تبقى مصرى مش شرط تكون منين ف مصر؟؟ ومش شرط تكون عايش فين دلوقت؟؟؟مش شرط يكون دينك ايه؟؟مش شرط أى حاجة .

الشرط الأول والأساسى أنك تكون مصرى وبس .

تكون مولود على أرضها وأختلطت مسام جلدك بهواها ولابد تفضل تهواها لآخر العمر .

هل نقول ؟؟ صعب التنبؤ الآن بما...سوف يحدث ؟؟

هل هو صعب ياكامل ؟؟؟

لا لم يعد صعبا...أتعلم لماذا ؟؟؟ لأننا الآن تركنا مرحلة التنبؤات وبدأنا فعليا فى مرحلة تقرير المصير.

اصبحنا نقرر ونضع امام اعيننا لافتة ضخمة مكتوب عليها ..انا أريد...اذن انا استطيع.

عد ياكامل ...عد الى موقعك...عد الى مكانك.

فمثلك اضافة جميلة دائما.

عد....لنقلق معا..,وننتظر معا مرحلةما بعد ( الرحيل ) بكل ما تحمله من تغيرات .

عد ياكامل ....لنفرح معا..بكل الانجازات التى ( سوف تسير ) على الطريق الصحيح.

عد ياكامل ....لتنظر زهرة يانعة تبتسم فرحة وهى ترى النور . :clappingrose:

[م تيمور المراغي]

ما ترجعش يا كامل

لو رجعت حزعل

[م تيمور المراغي]

في قصر الرئاسة

- الحق يا بابا فيه ناس ماشية في الشارع عمالة تهتف

-و ايه الجديد يا حبيبي ... ما هم كل يوم يهتفولي و يمسحولي جوخ

-لأ يا يا سيدي .. دول بيهتفوا ضدك ... عمالين يقولو قولو للفاجر .. كفاية مش قادر... و ناس تانية بتقول قولوا للسلطان نهايته قاراميدان

- يا نهار اسود .. ده عندنا هنا ده

- آه و حياة ماما

في توتر شديد يرفع السلطان سماعة التليفون ة يخاطب مستشار الداخلية ...

-ايه يا سي زفت اللي بيحصل في البلد ده .. انتوا نايمين علي ودانكم

- يا مولانا دول شوية عيال شيوعيين عمالين يهبهبوا .. قلنا نسيبهم شوية علشان نوري لأمريكا ان احنا عندنا ديموقراطية

- و ديني يا هابلي الكلب لو العملية دي ما اتلمتش فورآ لحبعتك سجن ابو زعتر و اسيبك في ايدين اللي سحلتهم

تنزل العسس في الشوارع تطيح بالمتظاهرين الضرب مستخدمين كل ادوات القمع من كرابيج و سنج ... رصاص .. و قنابل مسيلة للدموع ... و لكن ما ان يبدأ القمع حتي زاد غضب المتظاهرين .. و كسبوا تعاطف من كان يشاهد من بعيد ممصمصآ شفاه

- شوفي ولاد الكلب نازلين في العيال ضرب ازاي .. كفاية مش قادر

- رايح علي فين يا بو عادل ... مالناش دعوة

- ماهي مالناش دعوة دي اللي جابتلي الكافية ... اللي مخلياني مش عارف اعيش لا أنا و لا أنتي و لا عادل نفسه .. ياللآ العمر واحد و الرب واحد ..

و يذهب الي المظاهرات و معه آخرين و آخرين ...

السلطان متابعآ ما يحدث علي شاشات السي ان ان و أبتدأت المكالمات المحمومة مع مستشار الداخلية في سلطانيته

- ايه الأخبار يا هابلي

- الأمر تحت السيطرة يا مولانا

- سيطرة ايه يا معفن ... انت مش شايف اللي بيحصل في ميدان العروبة .. ده فيه ما يقلش عن 5 تلاف واحد اتصرف يا هباب بسرعة

- ننزل شوية عيال بدقون وسطيهم يا مولانا .. تقوم امريكا تخاف و تكش و تبعتلنا المساعدة

- و احنا لسه حنستني مساعدة امريكا .. اضرب يا هابلي .. اضرب

يزيد الضرب .. و تتضاعف الأعداد التي تنزل الي الشوارع منادية بسقوط السلطان

يدور السلطان في ارجاء قصره متوترآ ... و يفكر .. انا طول عمري بتاع امريكا .. اتصل بيهم يقولولي اعمل ايه

- الو .. جود مورنينج يور هاينسي

- هو ايز توكينج

- انا سلطان نفاقستان

- آه .. هو انت ... خير .. عايز ايه

- ايه الوش الأبلاكاش ده .. انت مش شايف اللي بيحصل هنا ... اعمل ايه ؟؟

- تعمل ايه ... اعمل شوية ديموكراسي في البلد

- يعني ؟

- ادي للكلب عضمة يتلهي فيها

- يعني ؟

- اديهم حاجة ... ادي الناس حاجة ..

- منحة يعني ؟؟

- لأ موش بقت تنفع دلوقتي ... لازم تعمل تغييرات سياسية

لحظة سكوت ... و يهز السلطان راسه .. ثم يتصل بالأذاعة و التليفزيو ليذيع بيان علي الشعب

- يا شعبي الحبيب ... وصلت لي تطلعات شوية عيال من الناس ... و بما اني عمري ما كسرت كلام ليكم .. فلقد قررت اعدام مستشار الداخلية بعد ما اكتشفت انه كان بيعاملكم بقلة ادب

لا يرضي الشعب و تزداد المظاهرات

بيان آخر .. يا شعبي الحبيب .. بعد تفكير وجدت ان مستشار الداخلية ما هو الا مخلب القط لكل المستشارين الوحشين اللي كانوا حواليا و اللي اكتشفت انهم كانوا بيخبوا عليا دايمآ الحقيقة .... و بناء عليه قررت القبض عليهم كلهم و توزيع املاكهم علي الفقرا .. و اختيار مستشارين جدد يحظوا بحبكم

لا يرضي الشعب و تزداد الجموع ...

بيان آخر ... يا شعبي الحبيب .. سمعت ان فيه اشاعات مغرضة بتقول ان ابني الصغير سيحكم من بعدي متخطيآ دور اخيه الأكبر .. و الكلام ده و عهد الله كذب .. و النيعمة الطاهرة دي .. كذب .. و لأثبات ده .... انا خلاص بعت ابني الي مدرسة داخلية في سويسرا .. و مش حيرجع منها ابدآ ...

لا يرضي الشعب و تزداد الجموع حتي لا يبقي مكان لقدم في شوارع السلطنة ....

اعمل ايه يا ربي .. اعمل ايه يا ربي ... يقولها السلطان و الخوف يقتله ... و في تلك اللحظة يدخل محلاوي رئيس الجيش و بهدؤ يقول

يا مولانا ... فيه عربية مستنية حضرتك تحت .. من غير مناهدة تلم خلجاتك و تركبها و تسيب السلطنة النهارده

- دي آخرتها يا محلاوي ... بعد كل اللي عملته لك و لأصحابك .. تعملوا انقلاب عسكري عليا انا ؟؟

-اتشطر الأول علي امريكا و بعدين ابقي تعال اتنطط عليا ... ياللالا يا مولانا سكة السلامة

- هي دي أخرتها ... هي دي اخرتها ...

كانت تلك آخر كلمات ينطقها قبل ان يصاب بشلل نصفي

في التليفزيون في نفس المساء .. يظهر الطنطاوي معلنآ رحيل الطاغية .. و ان الجيش الآن هو الحاكم الفعلي و سيعمل جهده علي اعادة الحق الي اصحابه ...

تهتز البلاد فرحآ ... و تسمع الأغاني و الأناشيد في كل مكان .. و ترجع الناس الي بيوتها مهنئة بعضها البعض بنجاح الثورة آملين في يومآ جديدآ مشرقآ .. و مستقبلآ يحمل الخير .. و الذي ظهرت اول بوادره مع البيان الأول من القوات المسلحة :

البيان الأول

تطبيقآ لمباديء الثورة الشعبية فلقد تقرر

واحد : تأميم جميع الأراضي الزراعية و توزيعها مجانيآ بواقع 3 فدادين لكل فلاح

اتنين ... تأميم ...

يستمر الحاكم العسكري في سرد القرارات بينما يتعالي صوت عبد الحليم حافظ و هو يغني ... تاني تاني تاني

تمت

وصيتكم جونيور و أمه ...

يا خبر ابيض !!

ايه ده !!!!!!!!!!!

[عماد حمدي]

تم الارسال 09 September 2003 - 04:37 PM - :blink:

دا أنته لو بتحكي اللي حصل فعلاً في الثورة ، مش هتحكي بالتفاصيل المٌفصلة اللي سردتها من 8 سنين !

سبحــــــان الله ، مُبدع والله