المصريين المغتربين بالكويت

[HDarwish]

شكرا يا استاذ درويش بس زيادة توضيح لو سمحت يعنى اية مدة 15 يوم بمعنى اية

يا سيدي أنا اللي اشكرك لإتاحتك الفرصة لكسب ثواب بالسهولة دي

بالنسبة لمدة 15 يوم دي بتبقى مذكورة في الأوفر أو الكونتراكت مع الشركة اللي بتتعاقد معاها بيبقى مذكور حاجه اسمها Notice Period في حالة لو ذكرت النقطة دي يبقى لازم من تاريخ تقديم الاستقالة تداوم 15 يوم قبل ما تترك العمل نهائياً .. ودي بتحطها الشركات علشان مش أي حد يقدم الاستقالة ويقول للناس السلام عليكم .. جايز يكون معاه شغل لازم يخلصه أو يكون الموظف عمل مشكلة وعايز يهرب منها .. فبتبقى زي فترة آمان للشركة وفي نفس الوقت فترة مفاوضات (زي ما حصل معايا)

واية هو الفرق بين عقد محدد المدة وغير محدد المدة وايهما الأفضل بالنسبة للموظف

عقد محدد المدة (عقدة بسنة أو سنتين أو خمسة) بعدها بتبقى حرية التصرف للطرفين سواء بتجديد العقد أو إنهاءه وللطرفين أيضاً إنهاءه في أي وقت مع شموله على شروط معينة في بعض الأوقات زي إن بعد الخمس سنين التعاقد يكون هناك مستحقات مثلا شهر على السنة وفي حالة إن الموظف اتم الخمس سنين دول بياخد مستحقاته كاملة أو لو لم يتم فترة التعاقد يُحرم من المستحقات .. أو كما يتفق الطرفان ..

وأظن لو حصل مشاكل لا قدر الله ما بيبئاش هناك فرق كثير في العقدين .. أنا عن نفسي أفضل عقد مفتوح غير محدد المدة .. ليه؟؟ مش عارف!! وأظن الأخت بوسي تقدر تفيدك في النقطة دي أكثر مني

وانا من باب العلم معايا اقامة التحاق بعائل لمدة سنة على زوجتى التى تعمل معلمة بوزارة التعليم ولما سألت فى الشئون قالو ان اقامة التحاق بعائل تحول لأقامة عمل بعد سنة

طيب إنت قالق نفسك ليه طالما انت اقامة التحاق بعائل .. إن شاء الله أول ما تحصل وظيفة مناسبة تحول عليها على طول وما يكون فيها مشاكل إن شاء الله .. وأظن الأخت بوسي كمان تقدر تفيدك في النقطة دي أكثر مني

معلش بقا يا باشا بتقل عليك استحملنا اللة يكرمك

خد راحتك .. أهم حاجة ربنا يوفقك فيما فيه الخير

تحياتي

[pocy]

اخى الكريم اخبارك ايه اولا بالنسبه للعقد بتاعك اذا كان محدد المده او غير محدد المده والفرق بينهم فانا هحطلك مواد القانون الكويتى علشان تعرف بالضبط ولو مش فاهم اى نقطه قلي وانا اشرحالك بالتفصيل الممل

المادة 52

اذا كان عقد العمل محدد المدة واستمر الطرفان في تنفيذه بعد انقضاء مدته اعتبر مجددا لمدة غير محددة وبالشروط الواردة فيه.

المادة 53

اذا كان العقد غير محدد المدة جاز لكل من الطرفين فسخه بعد اعلان الطرف الاخر كتابة ويكون الاعلان على الوجه التالي: أ- قبل فسخ العقد بخمسة عشر يوما على الاقل في حالة العمال المعينين بأجر شهري. ب- قبل فسخ العقد بسبعة ايام على الاقل في حالة العمال الآخرين. ويجوز ان يؤدي الطرف الذي فسخ العقد بدل اعلان للطرف الثاني مساويا لاجر العامل عن المدة المحددة للاعلان في الفقرة (أ)، (ب) من هذه المادة. اما اذا كان العقد محدد المدة وقام احد الطرفين بفسخه دون ان يكون بشروط العقد ما يعالج ذلك فان الطرف الذي فسخ العقد يقوم بتعويض الطرف الاخر عما اصابه من ضرر. فان كان هذا الفسخ من جهة رب العمل ولغير الاسباب المنصوص عليها في المادة (55) فانه يكون ملزما بالتعويض عما اصاب العامل من ضرر مع مراعاة العرف الجاري وطبيعة العمل ومدة العقد وبوجه عام جميع الاحوال التي يتحقق معها وقوع الضرر ويتحدد مداه، على ان لا يتجاوز مبلغ التعويض باي حال من الاحوال ما يساوي بقية الاجر عن المدة الباقية من العقد. اما اذا كان الفسخ من جهة العامل ولغير الاسباب الواردة في المادة (57) فان العامل يكون ملزما بتعويض صاحب العمل عن الخسارة التي لحقت به نتيجة فسخ العقد.

دى المواد اللى بتشرح ليك الفرق بين العقد محدد المده وغير محدد المده ولو عايز الملخص او المجمل بتاع الكلام ده

ان لو عقدك غير محدد المده فممكن تسيبهم فى اى وقت انت عايزه دون ان تدفع اى غرامه مع العلم انك لازم تبلغهم قبل 15 يوم من انك هتسيب العمل ده زى ما قال الاخ الفاضل الاستاذ حسن وذكر السبب فوق

اما بقي يا باشا (على قولتك) لو كان عقدك محدد المده فانت حاجه من حاجتين يأما تسيبهم في اى وقت وتدفع لصاحب العمل اجرك لباقي الشهور القادمه او انك تستنى لحد ما ينتهى العقد وبرضه تبلغ قبلها ب 15 يوم انك هتسيبهم وفى الحاله دى انت مش مضطر تدفع اى حاجه بس خد بالك يا حلو من نقطه معينه وهو انك لازم يكون معاك اى شئ يدل انك سلمت الاستقاله قبل 15 يوم من تركك للعمل وذلك للاسباب التاليه حتى لا يستطيع هو التلاعب وتقديم شكوي ضدك فى الشئون بالتغيب اكتر من 6 وساعتها تيجي تقلهم دانا مقدم الاستقاله بقالى كام يوم وبداوم برضه يقولك لا فانت تبقي ضامن نفسك من الاول بوصل او باى شئ يضمن انك سلمت الاستقاله وكمان مش تصدق اى شئ يقولهولك فى موضوع غيب انت براحتك وانا هبقي احولك لانى اتلدعت من الموضوع ده قبل كده بس الحمد لله ان ربنا سترها معاى وانى سمعت بدون قصد منهم انهم ناويين يأذونى وللاسف كانوا مصريين هم اللى بيفكروا للكفيل سامحهم الله

اعتقد انا كده قلت اللى اقدر اقوله ولو فى اى شئ مش فاهمه انت أأمر بس وهتلاقينى هنا لازقه فى المنتدي دايما هههههههههه

[pocy]

اهه بالنسبه بقي لان اقامتك التحاق بعائل على زوجتك هو الموضوع ده لو زى اللى فى بالى فده مشكله لكن مش زى اللى في بالي فالتحويل عادى جدا بمعنى

انا التحاق بعائل لو لقيت شغل في اى حته ممكن احول لان كفيلي هو زوجى وبالتالى هيوافق ومفيش مشاكل ولسه واحده صحبتى محوله لكن انا سمعت حاجه بقي ومش اكيده منها ان هنا لما الوزاره فتحت موضوع امكانيه استقدام الزوج كالتحاق بعائل على الزوجه عملت برضه معاها قرار انه مش يمكن التحويل من التحاق بعائل لشغل والله اعلم فياريت تتاكد من الموضوع ده لو القرار مش مضبوط يبقي في امكانك التحويل على اى عمل وفى اى وقت وربنا يوفقك للى فيه الخير يارب

واحنا دايما فى الخدمه

[pocy]

معلش يا شباب الايام دى انا هيبقي دخولى قليل شويه مش طول اليوم يعنى هههههههههههه

لان عمورى الله يشفيه ويشفي مرضي المسلمين اجمعين الحراره عنده عاليه وبيسنن فمغلبنى حبيب قلبي شويه الله بيعينه بجد على السنان ويعينا معاه

[pocy]

أخيرا من اول امبارح والحراره ما نزلت معاه الحمد لله عمورى الان حرارته نورمال يعنى 37.5 يارب تستمر على كده لان وصلت لاربعين امبارح

[pocy]

والله كل يوم بفتح المنتدى وبقول يارب الاقي حد موجود بس الظاهر والله اعلم ان دعائي مش مستجاب ولا ايه ؟؟؟؟؟؟؟؟؟؟؟؟

المهم ان يكون المانع عنا هنا يكون خير

[pocy]

انا جوزى بالامس كان بيقرأ الصفحات وبيقلي انتى اخده الصفح لحسابك بتتكلمى وتردى ع نفسك قلتله طب اشترك وابقي رد على علشان مش احس انى لوحدى قالى هو انا ناقص (هههههههههههههه)

فى البيت وع التليفون على طول وكمان على النت ارحمينى هههههههههههههههه قال يعنى متقله عليه دا اتصال كل عشر دقايق بس امال لو خمس دقايق كان عمل ايه ههههههههههههههههههه

[pocy]

طب انا مليت من انى ارد على فاستناكم لما تدخولوا ان شاء الله

أم نور عايزه اخد رأيك فى موضوع الهدايا يالا ادخلى ومن فين اقدر اجيب حاجات حلوه واسعار مهاوده والله بيعين ههههههههههههههههه على الهدايا ما اكرهش اد وانا نازله وباجيب الهدايا ومتخوفه ان الهدايا متعجبش بعد اللف والدوران عليها

ام مروان فينك تعالى واشتركي معانا واللى يعرف حاجه عن الهدايا يبقي يقلي وعلشان اكون محدده

اجيب الهدايا من فين وامتى احسن وقت انزل اجيب فيه الهدايا وياريت الاماكن تكون اسعارها عاديه ومحدش يقلي الافينوس وواوتاد والحركات دى لانها كلها حاجات مضره للجيب هههههههههه

[aboutabeakh]

الف شكر يا ام عمرو ويبارك فيكى على فكرة انا بردة ربنا كرمنا انا وزوجتى بابننا الأول محمد وهو فى الشهر الخامس وانا حاسس ان سنانة بتبتدى تطلع من جوة لو فية نصايح خاصة بالأطفال يا ريت تفيدينا وبالنسبة لموضوعنا فية نقطة عايز اعرفها ازاى ابلغ صاحب العمل بالأستقالة فى حالة رفضها اية الوسائل الرسمية المستخدمة اما موضوع الألتحاق بعائل فاحنا سألنا فى الشئون قالوا اننا ممكن نحول بعد سنة واقامتى فى البطاقة المدنية التحاق بعائل مادة 22 فأعتقد ان لو القانون بيقول التحاق بعائل يحول بعد سنة يبقى ملوش علاقة التحاق بعائل على الزوج ولا الزوجة وشاكرين على ذوقك واهتمامك اختى الكريمة

[pocy]

لا شكر الا ع واجب ثم انا معملتش حاجه يا ابو محمد ولا ايه والف مبروك على محمد ويتربي في عزكم يارب اللهم امين بص بقي يا سيدى هو طبعا فى عد ه وسائل لتقديم الاستقاله منها ارسال بالفاكس و يكون معاك نسخه من التقرير انه قد ارسل الحاجه التانيه باليد مع الحصول على نسخه طبق الاصل ولكن عليها امضاءه بالعلم بمعنى يكتب تم العلم على النسخه بتاعتك ويمضي الحاجه التالته اذا رفض فى بعض الناس بيروحوا على الشئون ويقدموا الاستقاله هناك بس انا مجربتش الموضوع التالت ده يمكن حد من الاخوان يبقي عارف ويأكد الموضوع التالت دى الطرق اللى انا اعرفها

فعلا انا كمان ماده 22 التحاق بعائل يسمع من بقك ربنا ويكون فعلا كده وساعتها مش هيكون معاك اى مشكله ويكرمك بعمل مناسب لامكانياتك ان شاء الله

بالنسبه لموضوع التسنين هتكلم عنه بالتفصيل بعد شوى ان شاء الله

[قلب ابيض]

اعتذر لعدم التواصل فى الفتره السابقه

انا الان بمصر

دعواتكم لبنوتى 000مشغوله معاها فى مشروع التخرج

دعواتكم والقاكم قريبا

[HDarwish]

دعواتنا بالتوفيق وسداد خُطاكم .. يا أم نور

منتظرينك ترجعي بالسلامة إن شاء الله

[pocy]

أم نور ربنا يوفقها يارب ويحميها بس مقلتيش هى كليه ايه ؟؟؟؟؟؟؟؟؟

ومنتظرينك ان شاء الله

[pocy]

هلا اخوانى والله انا جيت بس اطمنكم انى كويسه (قال يعنى حد سأل )

وطبعا اصبح على الكل اشوفكم على خير ان شاء الله انا هروح انام بقي بغيظكم اكمن معظمكم في الشغل ههههههههههههههههه

ربنا يوفقها بنوتك الحلوه يارب يا أم نور وتطمنينا عليها وعلى التخرج بتاعها وتقوليلنا هى في كليه ايه

وكفايه كده وتصبحوا على خير

[HDarwish]

إنتي ندهتي على الناس كلها اللي موجوده في الكويت .. أظن ما فاضلش حد ..

بالنسبة لنزولك في الشتا .. نصيحة أخوية بلاش ..

أنا آخر أجازة لي كانت في شهر 12 وواحد بالتحديد بعد ما أديت الحج مباشرة .. وبصراحة مش ناوي أكررها تاني في التوقيت ده تحديداً .. وخصوصا لو معاكي بيبي زي عمرو (اعذريني انا ما بحبش ادلع الأطفال الأولاد) .. هتلاقي نفسك مكتفة في البيت ومش هتعرفي تخرجي ولا تقضي أجازة كويسة وكل شوية بحجة إن البيبي ممكن يتعب ..

تحياتي

صباح الخير أستاذه / بوسي ..

أنا سألت عليكي وعلى عمرو ومن ساعتها انتي ما ردتيش علي علشان تعرفي بس اني سألت بس انتي اللي ما اخدتيش بالك أو طنشتيني ..

تحياتي

[pocy]

لا لا لا ما اقدر اطنش ابدا طبعا بس تلاقي عمورى شغلننى ساعتها وما رديت في ساعتها فنسيت مش اكتر

والله فيك الخير استاذ حسن انت اخبارك ايه واخبار العائلة

[pocy]

اخوانى اخباركم ايه فينكم هو انا اغيب بس شويه برضه ملقاش غيري اللى كاتبه كنت اتمنى اشوف الموضوع ده زى المواضيع بتاعه السعوديه وعمان والامارات بجد هناك تحس انك عرفت البلد كويس من كتر الحكاوى وتعيش فين ولا بلاش المنطقه دى لدرجه ان المدارس هناك معروفه وبينصحوا بعض بيها لكن احنا هنا عددنا قليل مع ان المصريين هنا مش قليلين اتمنى بجد اننا نتكلم شويه على المعيشه نظام الكفاله العقود والفسح والخروجات فين فى البلد دى اخبار الجو الحاجات دى كلها اسعار السكن يعنى انا نفسي مثلا اعرف اسعار الشقق فى منطقه الاحمدى والفحاحيل بس ياترى مين هيلقي في حين اننا منعرفيش مين ساكن فين وهكذا ومبدئيا انا هتكلم عن نفسي واتمنى باقي الزملاء الافاضل المشاركين يتكلموا برضه عنه

اولا انا وزوجى وابنى ساكنين في الجهراء وبمعنى اصح فى منطقه الجهرا القديمه وساكنه فى الشهر ب 160 دينار وتخيلوا ال160 دينار دى على ايه اوضه وصاله ومطبخ وحمام بس الشقه بصراحه فى عماره جديده وع الشارع والواحد مرتاح فيها جدا بعكس الشقه الاولى اللى كنت ساكنه فيها وميزه العماره دى ان كلها مصريين والحمد لله يعنى لا هتلاقي روائح غريبه ولا الحاجات اللى بتمشي على الحيط وهاكمل معاكم بعدين شرح مفصل لمنطقه الجهرا اصل ميعاد نوم عمورى جه

[pocy]

صباح الخير عليكم انتم لسه برضه مش موجودين اتمنى يكون المانع خير المهم هاكملكم منطقه الجهرا طبقه دى منطقه معروفه ان اهلها من البدو والبدون فهتلاقي نفسك بتتعامل مع اطفال الله يعينا ويعين اهليهم عليهم انتم مأكد لسه سامعين عن المصري اللى عنده 27 سنه وتوفي بسبب العيال اللى دايما وكالعاده واقفين عند سلطان بيستنوا الاتوبيس علشان يضربوه بالطوب و بس المره دى الطوبه جت فى دماغ الشاب المصري شوفتم ان العيال هنا للاسف في منهم مش متربيبن دا غير طبعا وانت ماشي ممكن تتسرق منك شنطه الايد او عيل ماشي كده وشافك وانت مش عاجبه يضربك ويجري او يضربك ويستني يشوفك هتعمل ايه وطبعا دول عيال البدون المهم بس الواحد مينكرش انه شاف منهم ناس محترمه يعنى لما تيجي الجهراء تبقي تاخد بالك من العيال الصغيره لانهم مش بيفكروا غير في الاذي بس اما بقي بالنسبه للفسح هنا فهى اماكن قليله جدا هذكر منها مركز سلطان والمحاميد والوافي وطبعا والاكثر زياره الان سليل الجهرا اد ايه فعلا جميل فى من سيتى ستارز فى مصر والمطاعم هناك ممتازه وطبعا المولات زى العالميه مول والمنار مول وسوق الرجل وبعض الاسواق اللى ماكد سمعتم عن اسمها فى اماكن تانيه زلى سوق كرز الموعد الوزير مجمع وراه التجارى والباشا وسوق عثمان وسوق الامارات كل دى اسواق هنا معظمها فى ازواق هنديه للاسف (كع -يع) ويمكن تلاقي فيها حاجه داخله غلط وتشتريها بس المجمعات الكبيره والمولات فيها حاجات شيك جدا بصراحه واسعارها مناسبه مش غاليه قوى بس طبعا الحاجات الى انا قلت عليها كخ او يع دى مسأله ازواق بس انتم مش تتخيلوا فى سوق هنا بدون ذكر اسمه لما دخلت فيه اجاركم الله ايه كميه الكخ واليع دى طب الواحد لو عايز يشترى مفيش مكان تانى يبص فيه داخل السوق من غير ما اشوف فيه كخ ويع الله بيعين وطبعا الواحد علشان يلاقي لبس او يشوفه ينزل حولى والسالميه او تروح سلطان من فوق او بيت اولادنا برضه في سلطان يمكن تلاقي حاجه كويسه اما المطاعم فهى موجوده كلها فى سليل الجهرا بس عاجبنى بالنسبه لباقي اللى موجود فى الجهرا وطبعا كنتاكى وبرجركنج وهارديز وهلم جره كل الحاجات دى موجوده وحتى فرغلى موجود هنا بس انا نفسى اهل المنطقه يتمدنوا شويه

بس ارجع واوقول ان الاسعار هنا بتاعه الاكل كويسه ورخيصه بالنسبه لداخل الديره يعنى مثلا انا رحت سلطان اللى فى الجهرا ورحت سلطان اللى فى السالميه لا في فرق كبير في الاسعار مش زى بعض تقريبا على حسب الاماكن حتى الاوبشن اللى محطوط مختلف بمعنى مثلا هنا مش هلاقي بيض نعام بيتباع لكن فى سلطان السالميه هتلاقي حاجات كده مثلا على فكره كانت البيضه الواحده بتاعه النعام ب 7.500دينار يعنى حاجه بسيطه كده ههههههههههه ده للى بيحب بيض النعام طبعا وده طبعا بدون تعليق

ااما المدراس هنا فمعروفه المدارس الحكوميه والمدارس الخاصه والاخيره منها عددها قليل بمعنى فى مدرسه الجهرا الاهليه ومدرسه الرفعه ومدرسه مشاعل الجهرا والباكستانيه والكويت ثنائيه اللغه بس هم دول المدارس الخاصه اللى قدمت فيهم السنه دى ما عدا الرفعه لانها بنين بس مدرسه ممتازه بصراحه بس ربنا يسهل ان شاء الله ونشوف هندخل عمر ايه واحنا هنكون فين ساعتها

بصراحه نفسي انقل لحولي او الاحمدى بس مش عارفه اذا كان السكن هناك غالى ولا لا وغالى اد ايه ولو شقه زى بتاعتى واسعه بس اوضه وصاله ومطبخ وحمام تبقي على كام ؟؟؟؟؟؟؟؟؟؟؟؟

اتمنى حد يفيدنى على المناطق دى وربنا يسهل ان شاء الله

[HDarwish]

دورت شوية في موضوع الشقق ده قبل كده واللي لقيته كالتالي

الفروانية

غرفة وصالة (شقة مش واسعة) تكييف مركزي وبناية معقولة أو جديدة حوالي 170 دينار

حولي

غرفة وصالة (شقة مش واسعة) تكييف مركزي بناية جديدة لا تقل عن 180 إلا ما ندر

السالمية

ماليش فيها وأساسا مش عايز اسكن فيها .. ليه ؟! .. نفسيا كده .. ممكن انزلها لكن اسكن فيها ؟ ,, مش عايز

خيطان

متفاوته جدا بس قريبة إلى حد ما من اسعار الفروانية

المنطقة العاشرة (الأحمدي والمنقف وابو حليفة والمهبولة والفنطاس) عدا الفحيحيل

الشقة غرفتين وصالة وتكييف مركزي وعمارة جديدة والمساحة معقولة 150 و 160

الفحيحيل

كانت الأول رخيصة الوقتي بئت غالية مووت يعني أسعارها بئت شبيهة بأسعار حولي ..

بصراحة أفضل مكان برشحه لسكن العائلات وفي نفس الوقت يكون المواصفات معقولة والسعر معقول كمان هما منطقتين بجوار بعض (المهبولة والفنطاس) ومحدش يقوللي دول في آخر الدنيا .. أنا في رأيي بعتبرها في المنتصف .. مش بعيدة قوي كلها ربع ساعة عن حولي أو السالمية أو الفروانية (ده لو الطريق مش زحمة) إنما لو زحمة إديها بئا من نصف ساعة لساعة إلا ربع)

يارب أكون أفدت ..

واللي شايف خطأ أو تعديل يعدل ورايا أو لو في إضافة يبئا جازاه الله خيرا

تحياتي

[pocy]

والله جزاك الله كل الخير يا اخ حسن بجد انت وفيت وكفيت بس انا كنت اعتقد ان الشقه فى حولى لا تقل عن 250 دينا ر نظرا لانها قريبه جدا من كل حاجه ومليانه شركات كأنها وسط البلد بس 180 بس ياربت ودى فينها دى

وكنت متوقعه منك رد برضه المهم مش رديت عليى كيفيك وكيف العائلة