المصريين المغتربين بالكويت

[رونا]

كل سنة وانتم طيبين

رمضان كريم

[cup cake]

"]اولا احب اشكر الاخت بوسى على ترحيبها و اتمنى انى اكون صديقة ليها و للاخت قلب ابيض و للجميع ثانيا احب بقى احكيلكم عن تجربتى مع اجراءات الالتحاق بعائل يعنى منها فضفضة و رغى ما انا اصلى فاضية و يمكن حد يستفيد من تجربتى مين عارف المهم انا من مواليد دولة الكويت عشت فيها تقريبا معظم عمرى كان عندى اقامه لحد ما اتجوزت و مقدرتش اسافر الكويت نهايته الاقامة سقطت و لجل حظى الحلو جوزى جاله عقد عمل فى الكويت و سافرت معاه بكرت زيارة لان اهلى و اخواتى كلهم هنا فى الكويت و حولنا كتير احول الزيارة لاقامه لكن دون جدوى لا واسطة نافعه و لا اى حاجة المهم علشان مطولش عليكوا استسلمت لقدرى و نزلت مصر المشكله انى مليش حد هناك والدى قال هياخد اجازة و يحصلنى اصله بيشتغل فى الكويت الموظفه هنا فى الجوازات قالت لجوزى ان ورقة الالتحاق بعائل هتقعد اسبوعين لحد ما توصلى مصر فنزلت انا الاول ووالدى حصلنى بعدها باسبوعين و ابتدت رحلة العذاب

الاسبوع الاول

رحت تانى يوم بعد وصولى والدى مصر و كلى امل و سعاده و بقول خلاص هانت و هرجع لجوزى و لاهلى خصوصا ان الاسبوعين الى قضيتهم لوحدى كانوا متعبين جدا رحت الحجر الصحى فى المهندسين للعلم بس انا مش من القاهرة فكان المشوار متعب و خصوصا و انا معايا ابنى لسه عنده سنه و نص المهم قالولنا لازم نكون فى الحجر الساعة 6 الصبح كل ده مكنش مشكله المشكله لما روحنا الحجر اكتشفت انى مكنتش مضطرة استنى اسبوعين و ان مفيش حاجة اسمها الورق هيتبعت مصر و ثانيا المستشفى الى اتحولنا عليها مبيفتحش قسم الكشف الطبى غير 10 الصبح ورفضوا يدخلونا المستشفى و فضلنا واقفين فى الشارع من 7 الصبح لحد 10 مش انا ووالدى بس احنا كنا كتير جدا الى جاى من الصعيد و الى من دمياط و الى من بورسعيد المهم بعد عذابنا فى الحر و البهدلة دخلنا انا بس ممنوع دخول والدى او ابنى معايا طبعا هتقولوا مسبتش ابنى ليه مع حد هقولكم لانى مليش حد فى مصر امى و اخواتى فى الكويت اما الجران فمين الى كنت هصحية 6 الصبح و اديله ابنى المهم والدى و ابنى استنونى بره و قلبى كان متقطع عليهم و بودى جارد المستشفى رفض يدخلهم اه اصل المستشفى عقبال امليتكم فيها 4 بودى جارد يخضوا قالوا لبابا ان الاستراحه للمرضى و السيدات و منعوه يدخل ما علينا المهم ابتدى الكشف الطبى اخدوا من كل واحد موجود 340ج و صورونا و استنينا و بعد طول انتظار ابتدينا اشعة و تحاليل دم و غيرة و كشف رمد و باطنة المهم بعد التوهة دى خلصنا الساعه 1 الظهر قالولنا بعدها نروح و تانى يوم نروم المعامل المركزية علشان نحلل دم تانى طب يا عم مينفعش النهارده احنا جايين من سفر قال لا لازم بكرة المهم روحنا برضو المعامل المركزيه و سالنا قالوا نفس الكلام اخيرا روحنا و رجعنا تانى يوم للمعامل المركزيه اخدوا 120ج و قعدت انا جوه و والدى قعد فى الشارع و رفضوا يدخلوه قالوا مش عايزين زحمه المهم بعد انتظار 3 ساعات اخدوا العينه و قالوا النتيجة هتتحول للمستشفى و روحنا لكن الرحلة لم تنتهى و للحديث بقية

[pocy]

يا هلا والف غلا باختنا رونا اخبارك ايه ووصلتى ولا لسه وربنا يكرمك ياقمر وكل سنه وانتى طيبه وبالف صحه وسلامه يارب اللهم امين

حبيبتى فى الله كب كيك احنا اللى يشرفننا انك تكونى اخت وصديقه لينا ياقمر وانا منتظره للحديث بقيه واله يكون فى عونكم يارب الا انتى الان موجوده فين فى الكويت ولا القاهره ؟؟؟؟؟؟؟؟؟؟؟؟

ويارب يكون الورق خلص على خير وتكونوا نوروا الكويت وقوليلي ابنك العسول اسمه ايه اصل عمر هو اصغر محاوراتى وشكله كده ابنك هو اللى هيكون اخر العنقود وربنا يكرمك بيه يارب اللهم امين

وكل سنه وانتى طيبه ياقمر

[رونا]

ميرسى يابوسى على سؤالك واهتمامك

انا ياستى لسة فى مشوار الكشف الطبى

وحصل لى نفس البهدلة للاخد كب كيك

الصراحة متعبين قوى

وخصوصا المستشفى اللى عمانا فيها الكشف الطبى

بوظان

وحكاية 6 الصبح دى

اصلهم بيشتغلو فى مطتب الصحة الكويتى من 6 الصبح الى 10 وبس

[cup cake]

نكمل بعد ما خلصت الكشف الطبى و التحاليل حسيت انها خلاص فرجت و هانت لكن هيهات اصل مصر بتحبنى اوى و مش من السهل تستغنا عنى كان فاضل اسبوع و استلم ورقى و اطلع على السفارة و اذ فجأة يجينى اتصال من المستشفى الى عملت فيها الكشف الطبى عايزين يعملولى تحاليل و فحوصات جديدة ليه؟ خير هو فى حاجه؟ محدش بيرد عليكى كل الى كان يهم الموظف انى اجيب 340ج وبس طب انا عندى اية ؟طب ليه طب مين ؟ مفيش فايدة المهم بعد عياط طول الليل نزلنا الصبح المستشفى اخدوا منا الفلوس احنا و شوية ناس من الى كانوا معايا الكشف الى فات و سابونا شوية لحد ما وصل الدكتور و لما سالناه عن سبب طلبنا تانى قال ان الى عنده زياده فى انزيمات الكبد و الى عنده السكر و خلافه و عايزين يطمنوا قبل ما يحولوا ورقنا للسفاره المهم خلصنا و روحنا و اضطريت اغير حجز السفر عشر ايام لحد الورق ما يخلص و قبل ميعاد استيلام الورق بيوم اتصلت المستشفى تانى عايزنى اروح احلل تانى و اجيب فلوس معايا و برضو فضلت اعيط طول الليل ما انا مش عارفه انا مريضه بايه و محدش عايز يعرفنى فى المستشفى و كمان هطر ااجل السفر للمره التانيه

[areeg]

اخواننا المغتربين في الكويت كل عام وانتم بالف خير

ان شاء الله خير يا كب كيك ويكون عين وصبتك ورب العرش ينجيكي علي راي التكاتك ههه بدام بيبعتولك تاني يكون الموضوع بسيط ولو غير لائق كانو بعتو للسفاره علي طول وبرضو حاولي تسالي المدير في المستشفي ليه كده بدل مانتي عماله تدفعي فلوس ومعلشي ان شاء الله خير معلشي بقي يا اخت رونا والاخت كب كيك احكولنا بالتفصيل الممل الاجراءات كلها والاخت رونا جوزك اخد قد ايه وقت عقبال مدق الاقامه وبعتلكم التحاق بعائل

[رونا]

الاخت كب كيك

ربنا معاكى ويخلص الورق على خير

ومتقلقيش من المستشفى

همابيعملو كدة مع ناس كتير

علشان بس يخدو شوية فلوس زيادة

ولو كان فى اى حاجة فى الكشف الطبى

كانو بعتو لمكتب الصحة الكويتى النتيجة على طول سواء لائق او غير لائق

الاخت اريج

كل سنة وانتى طيبة

انا جوزى اخد فترة كبيرة شوية علشان الاقامة

لانة اتأخر فى امتحان المعادلة

تم تعديل 13 أغسطس 2010 بواسطة رونا

[areeg]

علي فكرة يا روني انا طبيبه وزوجي طبيب بس رايح حكومه ان شاء الله ايه امتحان المعادله ده هو زوجك رايح خاص قصدك المقابله

[cup cake]

نكمل باقى الحكاية رحت المستشفى للمرة التالته دخلت للدكتور قالى ان التحاليل لانزيمات الكبد طلعت كويسه بس المشكله ان طلع عندى سكر و انا مكنتش اعرف و مكنتش بشتكى من حاجه و قالى ان التوتر ممكن يجيب السكر و بما انى معايا سكر فانا مش هينفع اسافر الا لما سكرى يتظبط و كتبلى على دواء و قالى اجى كل اسبوع متابعه و لما سكرى ينزل يبقوا يحولوا ورقى للسفاره و طبعا انا اتخانقت معاهم لانى اول مره اعرف ان السكر يمنع السفر لكن هما ولا فرق معاهم و قالوا لما سكرك ينزل نديكى ورقك و روحت و انا فى قمه الغضب و الحزن ولاول مرة احس فعلا باعراض السكر المهم فضلت 3 اسابيع اورح المستشفى و اتابع و كل مره ادفع المعلوم 50ج و برضو السكر مش عايز ينزل لحد ما اعصابى تعبت ووالدى حصلتله مشاكل فى شغله مهو مش عايز يرجع الكويت و يسيبنى لوحدى فى الاسبوع الرابع قلت مبدهاش و اخدت حقنه انسولين قبل التحليل وده خفض السكر بس دخت بعدها و كان هيغمى عليا بس المهم انها جت بفايده و بعد شهر و نص فى المستشفى اخدت ورقى و كان اجمل يوم فى حياتى و طلعت جرى على السفاره و هناك خلصولى ورقى فى يومين على فكره فى السفاره بيطلبو فيش موثق من الخارجيه و السفاره و قسيمه الجواز موثقه من الخارجيه و السفاره و شهاده ميلاد الاطفال موثقه برضو و طبعا بعد تاجيل الحجز 3 مرات و دخول موسم السفر كان صعب الاقى تذاكر بس ربنا سهلها بس الى ضايقى و خلانى احكى حكايتى هو ليه كده؟ من امتى و السكر بيمنع السفر ؟و ليه بيحصل فينا كده؟ و ليه البهدله دى ؟ الحمد لله على كل حال وربنا ميكتبش على حد يدوخ الدوخه دى الحمد لله انا دلوقتى فى الكويت ومع انى بحب مصر الا انى زعلانه منها للى عملته فيا

[cup cake]

احب اشكر اختى اريج و رونا على كلامهم اللطيف و دعاهم ليا اما بخصوص الاقامات هنا فهى بتاخد شويه وقت خصوصا للاطباء لان فى امتحان معادله او رخصة مزاوله المهنه اى كان الاسم المهم انهم هنا فى الكويت لازم يعملوا للطبيب مقابله شويه دكاتره مصريين على كوايته و هو و حظه و بعدين بيقعدوا فتره اسبوع او اتنين على ما تطلع النتيجه و ممكن لا قدر الله ميعديش و يعملولوا مقابله تانى و حسب علمى له 3 مرات اعاده فقط و طبعا مينفعش الطبيب يعمل اقامه الا لما يعدى المقابله دى لكن لو عداها بسلام يبدا يخلص الورق و ده ممكن باخد اسبوعين ده حسب ما سمعت

[مصطفى محمد]

السلام عليكم

لو سمحتوا ياجماعة الفيزا بتاعى عدم الممانعة وصلت وكنت عايز حد من السادة الاعضاء المسافرين قريب يقولى اية الخطوة الجابة ان شاء الله لان انا من المنصورة وعارف ان فية كشف طبى وبهدلة وسفر الى مصر فمش عايز اسافر على الفاضى واعطل نفسى فياريت حد من الاخوة يقولى نظام الكشف اية والتكلفة كام لحد ما استلم التأشيرة فى الجواز ،،انا عارف انها اسئلة كتير وانااسف على الاطالة ومسنى ردكم وكل عام وانتم بخير ورمضان كريم.

[cup cake]

شوف يا اخ مصطفى اولا هتعمل فيش ب7ج تقريبا و تصدقة من الخارجيه و تروح الكشف الطبى و ده هيتكلف 340ج تقريبا اما المعامل المركزيه و دى هتروحها تانى يوم كشف هتدفع 120ج يمكن تحتاج توثق شهاداتك الدراسيه من الخارجيه و السفارة دى بقى تسال فيها جهة العمل ولازم تشوف موقفك من التجنيد و متنساش تاخد معاك صور شخصية و انت بتعمل الفيش و كمان فى الكشف الطبى و المعامل المركزيه و كمان تاخد دايما صور لاوراقك كلها لانك ممكن تحتاجها يارب اكون افدتك و لو بشئ بسيط و ربنا يوفقك

[areeg]

عزيزتي كب كيك الف سلامه عليكي طبعا ده استهبال من المستشفي وربنا ينتقم منهم عشان دي سرقه رسمي وانا لو منك كنت قدمت شكوي قي المكتب الصحي بس انتي اكيد كنتي مستعجله عشان تمشي

معلش بقي

سؤال لو سمحتي هو الفيش اللي انت قصداه للزوج ام للزوجه

[رونا]

الحمد لله و الف سلا مة على وصولك الكويت يا كب كيك

اما بالنسبة للفيش كل الناس بتعمل سواء الزوج او الزوجة

وسعرة 11 جنية

ولازم تاريخ الفيش يبقى بعد تاريخ اصدار عدم الممانعة او ورقة الالتحاق بعائل

علشان فى ناس كتير بعد لما خلصت كل حاجة

رجعوها علشان الفيش قبل تاريخ الممانعة او فى نفس اليوم

[قلب ابيض]

يااااااصباح الخيرات والبركات وكل الحاجات الحلوات فى احلى ايام فى السنه كلها

كالمعتاد عاوزه ارد على كل الناس فى اقل وقت ممكن -_-

"هلا وغلا ومرحبا بكب كيك " اللهم انى صايمه

محمود فريد..ومحمود الكيميائى ..مرحبا بكم بين اخوانكم واخواتكم

سندباد ...صباح الفل

فرحان صديقنا اللى بطل يزهق انا فرحانه بتعديل النفسيه تبع سيلدتك وتوصل بالف سلامه يارب ويجعل لك كل خير فى مصرنا الحبيبه الغاليه ويجعلها عند حسن ظنك ياااااااااااارب

مش عارفه ليه افتكرت حسن درويش دلوقتى ؟؟ صباح الفل يا ابوعلى

" موضوع قمع او قرطاس الكريمه اللى بيسال عليه تقريبا سندباد" هارجع للمداخله واصحح الاسم لو غلط

لو مالقتش فى المجمعات او سلطان اسمع الزبده بقى ..حته قماش نضيفه حاجه زى الدمور كده ..وتقفلها على شكل مثلث او قرطاس وتطير بوزها بالمقص وتستخدمها نفس الاستخدام وتتتغسل كويس بعد كل استخدام

او كيس نايلون سميك شويه ولو عندك القمع المشرشر حطه فى الطرف

" بس خلاص " الجيش قالك اتصرف

يا جماعه موضوع شات المحاورات ده ايه نظامه؟؟

يعنى ممكن مثلا نتقابل عليه فى وقت ما كلنا؟؟؟

سمبا غريب بسبس ازيكم وحشتونى

ماتعرفوش فين طبيبه مصريه وام مروان وجايه لك يا كندا ؟؟؟الناس دى وحشتنى هما فين؟؟؟؟؟

تم تعديل 15 أغسطس 2010 بواسطة قلب ابيض

[تامر مصطفى]

السلام عليكم ورحمة الله وبركاته

اهلا بكل المصريين اللي في الكويت وكل اخواني واخواتي اللي كانوا معانا من زمان والجدد اللي نوروا الكويت ونوروا موضوعنا في المحاورات

حبيت اسلم عليكم واسلم على كل من سأل عني او حتى نسي يسأل عني (واخدة بالك يا قلبو)

عموما كلكم احبابي وافتكرتكم النهاردة وانا بتسحر عند اخر ساعة في وسط البلد والجو رمضاني فظييييييع والناس سهرانه ومتجمعه والقعدة كانت ناقصة وجودكم

بيت اسأل عن اختي اللي دايما تسأل عني بسبوسة

وحبيت كمان اتطمن على احوال الماما قلب واخليني انا قلبي ابيض

[قلب ابيض]

انت الكبير يا تامر بردوووووو

قولى هاتفطر ولا هاتتسحر فى وسط البلد امتى بالظبط عشان اقابلك صدفه انا وولادى هناك

صدفه من غير اى غرض والله wst::

[تامر مصطفى]

انت الكبير يا تامر بردوووووو

قولى هاتفطر ولا هاتتسحر فى وسط البلد امتى بالظبط عشان اقابلك صدفه انا وولادى هناك

صدفه من غير اى غرض والله wst::

تنوري بس مش انتي واولادك

دا انتي واولادك وجيرانك وحبايبك كلهم

بس انا بيني وبينك بفكر اروح افطر في خيمة مشمشية جنب المطار

سمعت ان عندهم بوفيه مفتوح على مستوى بس انا هفطر وامشي على طول علشان عندهم مطربين ومطربات والرقص بعد الساعة 12 لغاية السحور

على هامش الخيم الرمضانية

دلوقتي بقى الاهل يزعلوا اوي من بنتهم لو اتأخرت في الشارع عن الساعة 2 الفجر طبعا ده قبل وبعد رمضان

اما في ايام رمضان فالوقت المسموح به لغاية الساعة 4 بس لو اتأخرت دقيقة واحدة بتبقى ليلتها سودة وتتحرم من الخروج في اليوم التالي

ربنا يستر من اللي جاي

وبالنسبة للتشات فلو دخلنا كلنا في وقت واحد ممكن نحكي مع بعض اون لاين

لايف يعني

عايزين نجرب الموضوع ده

تم تعديل 15 أغسطس 2010 بواسطة تامر مصطفى

[sindbad]

صباح الفل على الكل

الف شكر اخت قلب ابيض على موضوع الكيس ده. انا جربت كيس النايلون وللاسف فشلت المحاوله فشل ذريع موضوع القماش ده مجربتوش

بس اعتقد ان لازم حد ترزي هو اللي يقفله عشان الكريمه متتطلعش منه :lol: كالعاده

تقبل الله منا صالح الاعمال

[pocy]

السلام عليكم ورحمه الله وبركاته

اخباركم ايه يارب يكونوا الجميع بخير

والله انا بقالى يومين مضايقه جدا بسبب موضوع عدم اصطحاب الاطفال الى المسجد انا عمر ابنى هادى جدا وبصراحه الصلاه فى البيت غير الصلاه فى المسجد نهائي ونفسي جدا اروح ولان كل جيرانى مسافرين وانا اللى قاعده زى البتاع كده مش عارفه اروح المسجد والمسجد فيه حجره للاطفال ومعاهم خادمه بس نقول ايه بقي لي سي عمر اللى لازق في لازمه يا علم بيها الا ربنا ومش بيرضي يسيبنى المهم هو الموضوع ده فى مساجد الجهراء فقط ولا كمان عندكم فى باقي المساجد

كب كيك الف الف مبروووووووووووووووك على الورق اللى خلص واحمد ربنا انى عملت تحويل من هنا وارتاحت ولله الحمد بدل البهدله دى

اخى فى الله الاستاذ تامر والشهير بطموووووووووووووووووره والله يا اخى نفسي الاقي هنا خيمه من الخيم الرمضانيه دى علشان الواحد يحس انه فعلا فى رمضان انا حاسه ان رمضان بيمشي بسرعه جدا جدا النهارده خامس يوم مع انى حاسه انه مفروض يبقي النهارده تانى او بالكتير تالت يوم وفعلا اجواء مصر اكيد كلها رمضانيه

بس انا نفسي اعرف الدعه المصريه مين اللى بداها ان رمضان يبقي شهر المسلسلات والفوازير والحاجات دى والحمد لله انا مش بتابع حاجه لانى عارفه ان كل الحاجات دى هتتعاد بعد كدهلحد ما نكرهها وسلامى للاسره الكريمه وبالذات فرح ربنا يكرمك بيهم يارب اللهم امين

استاذي سمبا اين انت من المحاورات هذه الايام اتمنى ان تكون بخير

اخى الغريب هل سافرت ام ماذا

الاخت اريج ربنا يوفقك يارب انتى ورونا وتخلص اوراقكم على خير يارب اللهم امين ومش تقلقي هنا محتاجيين الدكاتره جدا جدا وربنا يوفقك يارب اللهم امين

استاذي واخى الكبير حسن درويش اين انت اتمنى ان تكون فى احسن حال

ماما قلب ابيض عايزه اقولك ان الشات مش شغال الايام دى معرفش ليه ولو فعلا موجود هيبقي حاجه حلوه جدا لو متواجدين كلنا فى نفس الوقت

استاذ سندباد هو حضرتك لسه مش عرفت تجيب القرطاس ولا ايه ؟؟؟؟؟؟؟؟؟؟؟؟؟؟ الله يعينك يارب اللهم امين وتلاقيه وتعملنا احلى حلويات ان شاء الله

استاذ زهقان ربنا يفرحك ويكرمك وترجع بلدك بالف سلامه ويوفقك يارب دائما