المصريين المغتربين بالكويت

[noname]

هانت يا رونا كلها اقل من اسبوع وتجيلنا ياقمر

هتوصي بيك يا نونيم فى العرق سوس مش تقلق هعملك شب كبير وشفشق خده وانت مروح

يا جماعه نص رمضان عدى اول رمضان احس انه مشي بسرعه قوى

كل سنه وانتم طيبين

شكرا يا ام عمر فعلا العرق سوس طلع لذيذ اوى تسلم ايديكى

اما بالنسبة لموضوع الجهرا فكل شئ جايز البلد دى محظوظة فى البترول

[samehmagdy]

يالا مين قال جاى انا النهارده عزماهم على الفطار

كبسه سعودى + سمبوسه جبن وسمبوسه لحم مفروم + بطاطس في الفرن + بانيه + بطاطس محمره +سلطه خضرا سلطه زبادى + شوربه لسان عصفور + زيتون كالاماتا

وطبعا خشاف وعرق سوس و وكريم كرامل للاطفال

وطبعا الفاكهه موز وخوخ وعنب وكفايه كده ولا مفروض اعمل حاجه كمان ؟؟؟؟؟؟؟؟؟؟

الا مين قال جاى ؟؟؟؟؟؟؟؟؟؟؟؟

أنااااااااااااااااااااااااااااااااا

بس ياريت تتوصوا بالعرق سوس

جوعتينا يا بوسى على الصبح وفتحتى نفسنا ولسه بدرى على الفطار

بس لو العزومه لسه موجودها فانا موجووووووووود من العصر على باب الشقه لحد المغرب ما ياذن

وانا معاك يا نو نيم فى العرقسوس اللى يشرب لوحده :blink: pps:

وكل سنه وانت طيبه وهنيالك يا فاعل الخير والثواب et:(

تم تعديل 29 أغسطس 2010 بواسطة samehmagdy

[samehmagdy]

بالنسبه لموضوع البترول اللى فى الجهراء ليه ناس اصحابى كويته من الجهراء

وسمعو عن الموضوع دى فعلا

بس لسه مفيش حد بلغهم بشكل رسمى بالاخلاء

بس متقلقيش لانه الكل هيبقى مستفيد من الموضوع دى

صاحب العماره هيستفيد 100 % طبعا والسكان هيطبق عليهم نظام انهم ميدفعوش ايجار 6 شهور كتعويض او انهم ياخدو القيمه دى كمبلغ على بعضه لو الدوله مستعجله فى موضوع الاخلاء دى

[samehmagdy]

بوس بوس انا ان اشاء الله هاجى بعد اسبوع

على فكرة مافيش رسالة على الخاص

استاز سامح بجد معلومات كويسة

بس فى شوية تصحيح

المركز الصحى الكويتى بيحول النال لمستشفى بدراوى

بعدية بشارعين

والمستشفى بتاخد تمن الكشف 320 جنية

وبعديها بيوم بيتعمل التحليل للفيروس فى وزارة الصحة المصرية

ودة ب 120 جنية

وبعدين تقديم كل التحاليل

ومعاهم الفيش بيتعمل ويتصدق من الخارجية

والتصديق ب 11 جنية

وتقدم كل المستندات والتحاليل للسفارة الكويتية

وكان ثمن التقديم للالتتحاق بعائل 250 جنية للزوجة

ولكل طفل 125 جنية

بالنسبه للاخطاء الموجوده فى الاجراءات فانا نقلتهم زى ماهى من اخ فاضل فى منتدى اخر

وبالنسبه للاجراءت فى مصر بالذات فالحمد لله انا معملتش اى حاجه منها هناك لانى خلصت كل ورقى هنا

[نور السما]

السلام عليكم اخوانى عاملين ايه كلكم شدوا حيلكوا دخلنا فى العشرة الاواخر رمضان جرى السنة دى اسرع من اللى فاتت كل سنة يجرى اسرع من اللى قبلها اظاهر مابقاش يحب يقعد معانا يمكن حاسس انه مش ضيف عزيز علينا زى زمان اكيد العيب فينا انا بصراحة بيجيلى احساس غريب مش زى زمان كده كنت عايز السنة كلها رمضان لا بحس انى مكسل و عايز العيد يجى عشان اعرف اشوف شغلى كويس انا عارف انى اكيد العيب فى بس حبيت افضفض معاكم عشان لو حد حاسس زى مانا حاسس نحاول نأخد بيد بعضينا فى العشرة الاواخر و نشجع بعض ولو بكلام عشان نعوض اى حاجة فى الباقى ؟ ادعوا لى معاكم ربنا ينور لى قلبى فى الايام الباقية و يجعلنا جميعنا نصيب ليلة القدر و كل سنة و انتم طيبين

[samehmagdy]

عندك حق يا نور السما رمضان جرى بسرعه جداااا

هو الضيف العزيز دايما كده

بس موضوع الكسل فى رمضان زى ما انت قلت العيب فينا احنا

بس السبب معروف وهديلك مثال بسيط لو واحد بقاله فتره كبيره لا بيمارس رياضه وجه جرى مره واحده او لعب ماتش كوره هيتعب وينهج بعد دقيقه واحده بس ويقف وهو ماسك صدره

رمضان كده برضه اللى مكنش مستعد ليه من قبل رمضان وبيسخن له علشان يستقبله زى لاعيبه الكوره قبل ما تنزل الماتش اكيد هيتعب بعد اول كام يوم ويبقى عاوز الماتش يخلص ساعتها هيطلع خسران الماتش وخساره رمضان مش اى خساره

فاللى ملحقش الماتش من اوله يلحق ضربات الجزاء العشر الاواخر جايز يجيب هدف العمر كله فى ليله القدر

وكل سنه وانتو طيبين

[noname]

والله يا جماعة رمضان جرى بسرعة

يارب نكون اغتمنا منة الخير

عموما لسة باقى العشر الاواخر وفيهم الخيركلة

عليكم بالاعتكاف والقيام والتهجد

اغتنموا قولة تعالى ( واسالوا الله من فضلة ) وكل عام وانتم بخير

ملحوظة هامة : انتبهوا ايها الرمضانيون

(ان رب رمضان هو الله رب جميع الشهور سبحانة وتعالى )

تم تعديل 31 أغسطس 2010 بواسطة noname

[pocy]

السلام عليكم ورحمه الله وبركاته

انا معاكم جدا ان السنه دى والسنه اللى فاتت رمضان عدى على زى الرهوان والله وخصوصا انى بقالى اسبوع بصحى الساعه 12 وده مضايقنى جدا لانى مش ببقي حاسه بالصيام واليوم وانا صايمه بيعدى بسرعه تجهيز فطار واكل وترتيب البيت وبعدين الفطار وشويه التراويح وبعدين اروح اجيب طلبات وهدوم العيد لعمر وشويه حاجات كده اروح البيت الاقي الساعه 12 بالليل الله وبعدين اليوم راح ومفيش امل انه يرجع تانى ويارب نقدر نستغل الايام المفترجه دى

عايزه استغلكم شويه ممكن

(ادعولى معاكم ان ربنا يرزقنى بشغل فى القريب العاجل وبتيسير الامور ممكن يا اخوانى بالكويت) مش عارفه ليه مكسوفه وانا بقول الطلب ده

[samehmagdy]

ربنا يرزقك بشغل كويس لو كان فيه خير ليكى ان شاء الله

بس انتى بتدورى على شغل فى اى مجال علشان لو فى حد هنا قصاده فرصه شغل او قراء عن وظيفه يبلغك بيها على طول

[عادل أبو عمر]

السلام عليكم و رحمة الله و بركاته

و تقبل الله طاعتكم جميعا وبلغنا ليلة القدر

كل الاحترام و التحية لجميع الإخوة و الأخوات الذين استمتعت بقراءة رسائلهم

انا من يومين بحاول أسجل معاكم و كنت منتظر الموافقة و الحمد لله جت و عقبال الفيزا

سؤال لمن يستطيع مساعدتي أنا معروض علي عمل في الكويت وظيفة مدير تصدير في شركة صناعية الحمد لله اتفقنا على السكن العائلي المؤثث و السيارة و تذاكر السفر للأسرة بس لسة في تفاوض على الراتب

ما أريد معرفته هو متوسط تكاليف المعيشة للأسرة كام دينار في الشهر و تكاليف التعليم ( أحمد الله أن وهبني 3 أولاد 10 سنوات و توام 4 سنوات)

خالص تحياتي

أبو عمر

[sindbad]

السلام عليكم و رحمة الله و بركاته

و تقبل الله طاعتكم جميعا وبلغنا ليلة القدر

كل الاحترام و التحية لجميع الإخوة و الأخوات الذين استمتعت بقراءة رسائلهم

انا من يومين بحاول أسجل معاكم و كنت منتظر الموافقة و الحمد لله جت و عقبال الفيزا

سؤال لمن يستطيع مساعدتي أنا معروض علي عمل في الكويت وظيفة مدير تصدير في شركة صناعية الحمد لله اتفقنا على السكن العائلي المؤثث و السيارة و تذاكر السفر للأسرة بس لسة في تفاوض على الراتب

ما أريد معرفته هو متوسط تكاليف المعيشة للأسرة كام دينار في الشهر و تكاليف التعليم ( أحمد الله أن وهبني 3 أولاد 10 سنوات و توام 4 سنوات)

خالص تحياتي

أبو عمر

اهلا وسهلا ياباشا وتنور الكويت

شوف ياسيدي الموضوع ده محتاج شويه تفاصيل ممله لو مفيش مانع تسمع التفاصيل يبقى اوكى

الدراسه : تعتبر هي اكثر شيء مكلف في الكويت

يعني بالنسبه للمدارس ممكن تبدا ب 400 دينار في السنه او اقل وممكن توصل 1500 دينار للطفل الواحد في السنه

وهناك مذاهب في المدارس يعني في ناس بيحبوا يدخلوا اولادهم مدارس عالميه وطبعا دي فوق 800 دينار في السنه بالنسبه للمراحل الاولى وجايز تزيد شويه

وفي ناس بتدخل اولادها مدارس رخيصه وغير مكلفة زي المدارس الباكستانيه والهنديه ودي رخيصه

وفي الاخر وجهات نظر

[نور السما]

سؤال يا جماعة هو لازم الواحد يبعت فيش جنائى الكويت عشان الكفيل يعمل له زيارة تجارى لو حد عنده فكرة ياريت يفيدنا و جزاكم الله خير ؟ و الفيش ده لازم يتصدق من الخارجية و السفارة ؟ و لا الواحد يتبعتلوا الزيارة بالباسبور بس و هو جاى يجيب الفيش معاه عشان يحول الزيارة الى اقامة لو حد عاش فى الموضوع ده قبل كده ياريت يفيدنا

تم تعديل 31 أغسطس 2010 بواسطة نور السما

[تامر مصطفى]

السلام عليكم

ازيكم يا جماعة

خلاص اجازتي قربت تخلص وارجع الكويت تاني

عايز المرة دي احكيلكم عن حاجة غريبة عليا شخصيا

MAKRO

في شباب منتشرين في معظم مناطق القاهرة شكلهم محترم وولاد ناس وبيقابلوا الناس في المحلات ويعطوهم دليل مكتوب عليه اسم (ماكرو)

اول ما تفتح الدليل ده تفهم انه مركز تجاري جديد مثل كارفور او هايبر ون وحاطط سلع واسعار يبدوا للوهلة الاولى انها تنافسية

الشاب اللطيف يطلب منك عمل عضوية ويقوم بتعبئة بطاقة باسمك عليها رقم باركود ويقوم بتسجيل بياناتك في سجل خاص به وهذه البطاقة تسمى بطاقة العضوية وهي مجانية

لحد كده ممتاز جدا

فكرنا بقى اننا نروح نزور الصرح العملاق ده ونشتري منه

اولا المشوار من عندي في الهرم لغاية مدينة السلام حيث موقع الاخ ماكرو عبر الطريق الدائري استغرق وقت طويل نوعا ما

وعند الوصول شاهدت امام المتجر باركنج سيارات ومحاط بسور شبك مرتفع وله باب تم وضع حاجز حديدي عليه

كان ترتيبي في طابور السيارات الواقفة امام المدخل الرابع ولاحظت ان السيارات الثلاثة اللي أمامي خرجت من امام المدخل ولفت ورجعت تاني

فاقتربت من رجل الامن فقال لي ممنوع دخول الاطفال قلت له يعني اوديهم فين؟؟

راح قالي خليهم في السيارة ودي تعليمات الادارة ومش هيدخلوهم من الباب

قلت له ماشي اخليهم في السيارة فقالي خلاص يبقى متدخلش الباركنج بالسيارة واركنها في الشارع ولو عايز تدخل نزل الاطفال ينتظروك في الشارع وانا ادخلك

طبعا كلام بايخ وغريب وجت سيارة من الجنب فراح موظف الامن يكرر نفس الكلم على صاحبها وبعدين رجع لي تاني وقالي :

اصلا هما مش هيدخلوك جوة!!!!!

فقلت له ليه ؟؟ هو انت هتقولهم اني عندي جرب؟؟

راح قالي لا علشان انت معندكش عضوية ومش معاك كارنيه

رحت مطلع له الكارنيه اللي اخذته من الشباب اللي عدوا علينا

راح قالي ده اتلغى بس مادام معاك خلي الناس اللي معاك تستناك برة وانزل علشان تتصور وتطلع الكارنيه الجديد!!!!

طبعا اتحرق دمي واضطريت اسفا اني اتحفه بكلمتين علشان اروح وانا مرتاح شوية

قلت له سلم على الجماعة اللي جوة وقولهم يغور اللبن من وش القرود

راح قالي شكرا بس انا بنفذ التعليمات

قلت له وانامقلتش ليك انت انا بقول للي اداك التعليمات

ومن يومها وانا منتظر اشوف اي مندوب ليهم معدي من الشارع

الا قولوا لي هي الكويت حر؟؟؟

اصل انا بقالي شهرين في مصر منسيت جو الكويت كان عامل ازاي :lol:

[Simba]

ممنوع دخول الأطفال ليه يعني

هو فيه منكر جوه ولا حاجة ... وحتي لو فيه محلات بتبيع منكر سك وصودا فده برضه مش شرط انهم يمنعوا دخول الاطفال

يعني هيكون اكبر مثلا من سيتي ستارز اللي في مدينة نصر !!!!

عندك حق يا تامر يغور اللبن من وش القرود

خليهم بكرة يقعدوا جنب الحيط .... وبعدين هو فيه راجل متجوز يقدر يخرج من غير عياله ده اكبر دليل للزوجة انه عين ما تزوغش كده ولا كده :lol:

[noname]

سؤال يا جماعة هو لازم الواحد يبعت فيش جنائى الكويت عشان الكفيل يعمل له زيارة تجارى لو حد عنده فكرة ياريت يفيدنا و جزاكم الله خير ؟ و الفيش ده لازم يتصدق من الخارجية و السفارة ؟ و لا الواحد يتبعتلوا الزيارة بالباسبور بس و هو جاى يجيب الفيش معاه عشان يحول الزيارة الى اقامة لو حد عاش فى الموضوع ده قبل كده ياريت يفيدنا

السلام عليكم يا نور السما

بالنسبة لموضوع الفيش دا بتجيبة معاك موثق من الخارجية المصرية والسفارة الكويتية

وكفاية صورة الباسبور علشان الزيارة التجارية

لو المرتب يستاهل تعالى يعنى لو انت عازب ياريت متقبلش اقل من 250 او 300 دينار

وعموما هتنور الكويت وربنا يوفقك

[noname]

السلام عليكم جميعا

ياجماعة انا ساكن فى الفروانية وياريت لو فى حد ساكن كمان فيها يقولى

علشان محتاج اسأل فى شوية حاجات كدة

[رونا]

لوسمحتم ليا سؤال

هو الشتاء فى الكويت اخبارة اية

يعنى بيبقى برد قوى ولا لا

وبيقعد كام شهر برد

اصلى مش عارفة اعمل اية فى الهدوم الشتوى

الشنط مش هتكفى وكمان الوزن

[Simba]

السلام عليكم جميعا

ياجماعة انا ساكن فى الفروانية وياريت لو فى حد ساكن كمان فيها يقولى

علشان محتاج اسأل فى شوية حاجات كدة

انزل بورقة الأسئلة وحط اختيارات -_-

واللي عارف هيجاوب wst::

[Simba]

لوسمحتم ليا سؤال

هو الشتاء فى الكويت اخبارة اية

يعنى بيبقى برد قوى ولا لا

وبيقعد كام شهر برد

اصلى مش عارفة اعمل اية فى الهدوم الشتوى

الشنط مش هتكفى وكمان الوزن

الشتا اخباره في الكويت كويس وبيسلم عليكم

الشتا السنة اللي فاتت كان تقريبا مفيش شتا ومش مطرت غير مرتين او تلاتة بالكتير عموما ما تكتريش من اللبس الشتوي

انا عن نفسي بلبس صيفي في الشغل والبيت لان المكيف بيقلب حار في الشتا .. يدوبك ممكن البس جاكيت بس وانا رايح وانا جاي من الشغل

[رونا]

لوسمحتم ليا سؤال

هو الشتاء فى الكويت اخبارة اية

يعنى بيبقى برد قوى ولا لا

وبيقعد كام شهر برد

اصلى مش عارفة اعمل اية فى الهدوم الشتوى

الشنط مش هتكفى وكمان الوزن

الشتا اخباره في الكويت كويس وبيسلم عليكم

الشتا السنة اللي فاتت كان تقريبا مفيش شتا ومش مطرت غير مرتين او تلاتة بالكتير عموما ما تكتريش من اللبس الشتوي

انا عن نفسي بلبس صيفي في الشغل والبيت لان المكيف بيقلب حار في الشتا .. يدوبك ممكن البس جاكيت بس وانا رايح وانا جاي من الشغل

هههههههههههههههه سلملى علية

انا بس بسئل علشان الشنط مش مكفية والشتوى كتير

وانا محتارة مش عارفة اسيبة ولا اخد كل حاجة