المصريين المغتربين بالكويت

[قلب ابيض]

وحشتونى و هتوحشونى

مسافره اخر الشهر طبعا مش مبسوطه لانى نازله مصر و مش عارفه هنرجع ولالا و اهلى كلهم هنا و اخواتى والوالد و الوالده يعنى عندى اكتئاب جامد جدا

قلت اسلم قبل ما انشغل فى العفش و التجهيز للسفر

بجد محتاجه دعواتكم لان الوضع صعب عليا لانه جه فجاه ولان مليش حد فى مصر

حد محتاج حاجه من مصر ؟؟

دكتورة ياسو مش عارفه الاسم كده صح ولا غلط بخصوص السفر للكويت و الفرق بينه و بين الامارات الكويت ممكن تقولى عليها بين السعوديه و الامارات فى المصاريف و مستوى المعيشه يعنى الامارات غاليه فى الايجارات و مصاريفها المعيشيه كتير اما الكويت فمعقوله مستوى معيشى و مادى كويس يعنى تعيشى كويس و كمان تحوشى

اما عن الشغل هنا فالخاص فترتين يعنى 4 ساعات و بريك و العصر 4 ساعات تانيين اما الحكومه فبيبقى فترة واحده على بعض و ممكن يبقى فى نبطشيات على حسب المؤهل يعنى مسجل ولا مسجل اول ولا اخصائى الاستشاريين هناغير مرغوب فيهم بمعنى تانى مش مطلوبين لان شغلهم بيقى اقل و مرتبهم عالى

بالماجيستير ممكن توصلى بالمرتب 1500 دينار و ممكن اقل حسب المكان طبعا المصاريف بتبقى حسب عدد افراد الاسرة و اذا فى مدارس ولالا

يارب اكون افدتك

اه نسيت اقولك اسالى على المكان كويس قبل ما توقعى لان فى مستشفيات هنا خصوصا فى الخاص سمعتها مش حلوه فى التعامل مع الاطباء و كمان قبل ما تمضى اى عقد اسالى الجماعه هنا فى المحاورات و هما اكيد هيفيدوكى لان ممكن يبقى فى اى بند يضايقك فى المستقبل ربنا معاكى

واضح جدا ..انه نزول اضطرارى ...

مصر مش وحشه كده يا كب يا حبيبتى ...

ولكن طبعا بما ان الاهل هنا ..فالصوره هاتكون بالعكس ..كانك سيباهم هناك ...وجايه هنا

الغربه الصعبه هى غربه النفس فعلا مش غربه المكان

اعتقد انك مش هاتنقطعى عن الكويت لو مش اقامه فأكيييييد زيارات

اطمنى اللى بيجى الكويت صعب انه ينقطع عنها ..على قوله اخوننا الكويتيتن...واكل عين النجرور ...صح يا امل حياتى؟؟؟

والدليل حسن درويش........

ربنا يوفقك فى كل خطواتك يارب..ويكتب لك الخير وين ماتكونى

وتأكدى ان ربنا ما بيريدش لعبده الا الخير

فى امان الله

[noname]

i'm looking for job there , i'm Accountant with 2 y in accounting and 1 y in Auditing , is there job vacancy in Kuwait ?

النبى عربى

[الغريب]

السلام عليكم

تأكيدا لكلام قلب أبيض

الجزيرة تسير أولى رحلاتها لمطار القاهرة في مايو إن شاء الله

أنا حجزت ليا وللأولاد على الكويتية ، وكان نفسي بصراحة أحجز على المصرية بس موضوع الوزن ده أصبح مؤرق جدا

على العموم كله خير إن شاء الله ، هلت نسايم الأجازات

يارب تكون أجازة سعيدة للجميع

[الغريب]

مبروووووووووك

أنا مقدر كمية الفرحة اللي إنت فيها وعقبال ما نباركلك على استلام الليسن

بس

عايز اقولك على حاجة

إنت عديت المرحلة السهلة اللي جاي هو اللي صعب

وكمان مرور حولي !!!!

ربنا يوفقك مش عايز أحبطك لكن هقولك بس إن إبن عمي فضل يمتحن أربع مرات لما يئس وحس إنه مش هيسوق عربية (سيارة) في الكويت مدى الحياة

لكن إن بعد العسر يسر

وخلي نفسك طويل

بالتوفيق

شكرا يا أستاذ حسن

ربنا يكرمك أنا بكون مبسوط لما بشوف مشاركاتك هنا

بس بالفعل أنا بسمع كتير عن صعوبة موضوع التراي ، بس أكيد اللامانع كان أصعب بالنسبة ليا لأن ورقي كله كان خالص بس للأسف طبيعة الورق مختلفة شوية عن الورق العادي بسبب شغلي ، علشان كدة الأمور كانت بتتصعب كل مرة أروح فيها

على العموم الحمدلله ، وربنا يكرم في موضوع التراي

تحياتي

[الغريب]

اليوم الأربعاء الساعة 12 ظهر

فيه ندوة للدكتور عصام شرف في مسرح كلية الحقوق جامعة الكويت بالشويخ ، والدعوة عامة

أنا آعرف بالندوة من ثلاثة أيام ولكن للأسف نسيت أنوه هنا علشان لو حد نفسه يروح يعمل حسابه

ليا صديقي في العمل أتخانقنا أنا وهو من ياخد الإذن ويروح لأن مينفعش أحنا الاتنين نستأزن ، وفي الآخر هو اللي فاز ، إن شاء الله لما يرجع هقولكم حصل أيه في الندوة

تحياتي..

[ام سلمي]

سلام عليكم

ممكن اسأل الاخوة والاخوات في الكويت عن موضوع لو حد يعرف له حل ، حماتي كانت زارت ابنها في الكويت من مدة وحاول يعمل لها اقامة علشان مالهاش حد في مصر المهم طلع في التحاليل عندها فيرس سي و اتسجل اسمها علي الكمبيوتر لمنعها من دخول الكويت بعد كدة ، المهم هل في اي طريقة انها تقدر تروح لابنها زيارة حتي واللا خلاص كدة ما عدش ينفع ؟

[الغريب]

سلام عليكم

ممكن اسأل الاخوة والاخوات في الكويت عن موضوع لو حد يعرف له حل ، حماتي كانت زارت ابنها في الكويت من مدة وحاول يعمل لها اقامة علشان مالهاش حد في مصر المهم طلع في التحاليل عندها فيرس سي و اتسجل اسمها علي الكمبيوتر لمنعها من دخول الكويت بعد كدة ، المهم هل في اي طريقة انها تقدر تروح لابنها زيارة حتي واللا خلاص كدة ما عدش ينفع ؟

الزيارة ملهاش كشف طبي ، يقدر يجبها في أي وقت زيارة عائلية

[ام سلمي]

سلام عليكم

ممكن اسأل الاخوة والاخوات في الكويت عن موضوع لو حد يعرف له حل ، حماتي كانت زارت ابنها في الكويت من مدة وحاول يعمل لها اقامة علشان مالهاش حد في مصر المهم طلع في التحاليل عندها فيرس سي و اتسجل اسمها علي الكمبيوتر لمنعها من دخول الكويت بعد كدة ، المهم هل في اي طريقة انها تقدر تروح لابنها زيارة حتي واللا خلاص كدة ما عدش ينفع ؟

الزيارة ملهاش كشف طبي ، يقدر يجبها في أي وقت زيارة عائلية

انا عارفة ان الزيارة مالهاش كشف طبي ،وهي دخلت قبل ما تعمل التحليل زيارة عادي ، بس اخو جوزي قال ان لما عملت التحاليل في الكويت اثناء الزيارة واكتشفوا وجود فيرس سي سجلوا اسمها علي الكمبيوتر لمنع دخولها ، وان كدة ما تقدرش تدخل الكويت تاني حتي زيارة

مش عارفة هل تعتقد ان الكلام ده مش صحيح ؟

تم تعديل 27 أبريل 2011 بواسطة ام سلمي

[أمل حياتي]

اختي ام سلمى اسمحيلي اقولك ان ابنها كان مفروض

احتياطا يعمل لها الفحص بمختبر خاص او حتى كان ممكن يعمله في مصر وذلك

للأطمئنان قبل ما يحاول يضع اقامه ويعمل فحص بالحكومه ويكتشف الموضوع لان في ناس كتير حسب ما اعرف

حامله المرض وغير مصابه به وبيظهر في التحليل

اعتقد كده ما تقدرش تدخل مدام اتسجل على الحاسب الالي بس حاسالك غدا وارد عليكي باذن الله

[ام سلمي]

اختي ام سلمى اسمحيلي اقولك ان ابنها كان مفروض

احتياطا يعمل لها الفحص بمختبر خاص او حتى كان ممكن يعمله في مصر وذلك

للأطمئنان قبل ما يحاول يضع اقامه ويعمل فحص بالحكومه ويكتشف الموضوع لان في ناس كتير حسب ما اعرف

حامله المرض وغير مصابه به وبيظهر في التحليل

اعتقد كده ما تقدرش تدخل مدام اتسجل على الحاسب الالي بس حاسالك غدا وارد عليكي باذن الله

شكرا جزيلا امل حياتي ، وهو الحقيقة كان فعلا المفروض ابنها يعمل كدة بس ماكانش يخطر ببال حد انه بكون عندها فيرس سي لأن ما كانتش بتشتكي من اي حاجة ، علي العموم قدر الله وما شاء فعل ، ويا ربت فعلا لو عرفتي ان كان في اي طريقة تانية لدخولها زيارة حتي تقولي لي ، وجزاكي الله خير

[أمل حياتي]

عزيزتي ام سلمى

للاسف بعد سؤالي لاحد العاملين في الداخليه فقد ابلغني ان كلام اخو زوجك صحيح

وان طالما قد تم تسجيلها على الحاسب الالي فلا تستطيع الدخول مره اخرى

ورغم ذلك فساحاول ان اسال اذا كانت هناك طريقه للمساعده وابلغك مع تحياتي

[hakeem]

السلام عليكم يا اخوانا مغتربى الكويت..

ياجماعة انا طالب خدمة من اى حد موجود فى منطقة السالمية..وأسف على طلبى الغريب ده بس والله محتار ومش عارف اعمل ايه ولا اتصرف ازاى..فاللى يقدر يساعد ربنا يجازية خير واللى ما يقدرش يساعد ياريت يدعيلنا نوصل لحل..

اللى عايز يساعد يا جماعة يبعتلى اميلة اراسله علية..واسف مرة تانية على طلبى وجزاكم الله خيرا..

[أبوعمار]

جه الدور عليا إني أسأل على الغايبين

القلب الكبير الغالية قلب أبيض ... فين مش شايف لك مداخلات بقالي كام يوم؟

يارب يكون المانع خير

أعزائي الغاليين: تامر .... سامح ... سمبا

فينكم من الديوانية ؟؟ هاجرينها من فترة؟

طمننوني عليكم ونوروها من تاني

وأخيرا سلامي للأعضاء المتوجدين

الأخ الفاضل الغريب

الفاضلة أمل حياتي

العزيز الذيذ حاتم noname

تحياتي يا أحلى ديوانية

[أمل حياتي]

عزيزي ابو عمار

الديوانيه مهجوره مفيش غيري اللي باشقر عليها ههههه

عشان انا مخلصه ليها وهيه السبب اللي عرفتني عليكم

احنا حتلاقينا في صفحة قهوة المغتربين على طول هناك على الفيس بوك اسرع لينا بالكتابه والتواصل اليومي

لكن الجماعه بيدخلوا طبعا المنتدى ويشاركوا

وده اخر اسم للصفحه اصل احنا كل يوم براي ههه

قهوة المغتربين وحياك الله معانا

[noname]

السلام عليكم

عزيزى ابو عمار .. الديوانية مش مهجورة بس فى بديل لذيذ

اختنا ام على قالت البديل .

منتظرينك على الفيس بوك تنورنا

تم تعديل 30 أبريل 2011 بواسطة noname

[Simba]

رسالة كويتي لقناة سكوب

من منتدي كويتي

لا أعلم حقيقة سبب تعنت قناة سكوب بالاستمرار بما تقدمه بشأن حسني مبارك..؟؟

ولهذا اوجه إلى هذه القناة..التي تضرنا أكثر من أن تقدم لنا الخير..واقول..

إن ما تقدمونه من مشاهد لنصرة حسني مبارك..هو متابع من قبل المصريين

وحتما هذا الأمر سيرتد علينا ككويتين لما نرغب بالسفر لمصر..

وأعلموا يا سكوب.. إنه بدأت الآن حملة اعلامية بمصر عبر بعض الكتاب والمتابعين بالقول لشعب مصر الكريم(( انظروا ماذا يقول عنكم الكوايته..!!!))

فهؤلاء اعتقدوا إن قناة سكوب تمثل الشعب الكويتي باسره..وهم محقين بهذا الاعتقاد

وأعلموا يا سكوب إن اي ضرر أو اعتداء على اي كويتي أو أي عائلة كويتية سنسمعه مستقبلا ستكونون أنتم السبب..

وأعلموا إن الشعب المصري الآن..ليس كالسابق الذي يقبل الرشوة أو الاكرامية

بل بدأت صدور بعضهم تشحن ضد الكويتيين عن طريق كما قلنا بعض صحفهم وقنواتهم وخاصة تلك الاقلام أو البرامج المباشرة والتي يديرها بعض الذين ((اصلا))يكرهوننا كره العمى

وها نحن نقدم لهم اسرنا واهلنا قربانا بسبب قناة سكوب..

وبالنهاية اقول..

الشعب المصري اختار طريقه..

فلماذا نتدخل نحن محاولين تغيير ذلك الطريق..؟؟

فيا سكوب نرجوكم..فلتكن نظرتكم واقعية..

فإذا كان الشعب المصري يريد محاكمة رئيسه السابق..فهذا شأنه وحده

ولنحتفظ نحن بمشاعرنا تجاه افعال حسني مبارك..ولا ننطلق خلف الاوهام

وتتسببون بإيذاء أهلنا عندما يسافرون لمصر..

فالشعب المصري معروف عنه..رغم بساطته..إلا إنه يصدق اي شيء

فهناك محترفين لنشر وقلب وبتر بعض الحقائق..

فما لكم لا تستوعبون يا سكوب..؟؟

[الغريب]

مقال اليوم لفؤاد الهاشم (أحب أسلوبه ولا أحب توجهاته) مقال جميل ، بخصوص قناة سكوب

علامة تعجب!!

«الكوايته».. لما.. «يخبّطوا في.. الحلل»!!

فؤاد الهاشم

.. تخيلت نفسي واحدا من شباب «ثورة 25 يناير» في مصر قرر ان يرد على العديد من الكويتيين الذين «يتعاطفون بشدة» مع الرئيس السابق «حسني مبارك» - وبلهجته المصرية المحببة – قائلا:

٭٭٭

.. أعزائي «الكوايته» الحلوين:

.. انا عايز اقول لكم انكم.. مش فاهمين حاجة خالص عننا، وعن اللي جرالنا! انتو بتيجوا مصر – كم يوم كده – وتنزلوا في «هيلتون» واللا.. «شيراتون» واللا.. «سميراميس» ومعاكم.. «ميري» و«راني» و«صوفيا» و«كومار» و.. السواق «البدون» بتاعكم، وتتفسحوا وتاكلوا عند «كبابجي» الشيراتون حمام مشوي وكباب وكفتة وواحد زي الاستاز «فؤاد الهاشم» يسكن في «الفورسيزون»، وبعدين يروح يتفرج على «دينا» - وهي بترقص بجسمها الجميل اللي عامل زي الملبن – وتاني يوم يروح «العزبة» في محافظة الشرقية عند واحد صاحبه، ويفطر «عسل اسود وفطير»، ويتغدى «وز وبط»، وتاني – او تالت يوم – يسافر بلده، زيكم كده لما تهيصوا وتتفسحوا وتروحوا «كرداسة» علشان تشتروا.. «دراريع» - او «بلاليع» - .. واللي ما اعرفش بتسموها كده.. ليه؟! تعرفوا ايه عن الناس الغلابا اللي عايشين في.. «الامام الشافعي» مع الاموات؟ عن الناس الغلابا اللي عايشين في.. «الحسين» و«السيدة زينب» و«الورّاق» و«المدبح» و«نزلة السمان» و«روض الفرج» و.. «حارة قواوير» و.. غيرها، وغيرها.. وغيرها؟! تعرفوا ايه – يا كوايته – عن «العشوائيات» والجوع والفقر والمرض ودخل يومي ما يزيدش عن «ستميت فلس» - بالفلوس بتاعتكم – وانتوا بتدوا .. «ميري» واللا.. «ماريا» واللا.. «كومار».. دينار واللا دينارين، لما يعوزوا يروحوا الكنيسة اللي جنب الشيراتون بتاعكم كل «يوم.. حد»؟!

.. أعزائي «الكوايته».. الحلوين:

.. احنا بنطفح «الكوته» علشان لقمة العيش، ونظام الريس السابق خلانا.. «نخبّط في الحلل»!.. عارفين يعني ايه.. «نخبّط في.. الحلل»؟! يعني ماشيين ومش عارفين احنا فوق الارض واللا.. تحتها؟ عظامنا عليها لحمة وشحمة، واللا.. مدفونة وشبع منها دود.. الارض؟! ما شفتوش اهالينا اللي راحوا يحجوا لبيت الله ويشتكوا لربنا وحبيبه النبي المصطفى على اللي بيحصل لهم في بلدهم مصر، ولما ركبوا العبّارات ووصلوا لنص البحر الأحمر، غرقت بيهم، واكلهم.. سمك القرش! ليه؟ علشان.. صاحب العبّارة «ممدوح اسماعيل» طلع صاحب «زكريا عزمي» - رئيس ديوان رئيس الجمهورية، واللي بيحبه الريس اكثر من شعبه، سمحوا للقاتل اللي قتل الف روح جايه بعدما زارت بيت ربنا وقبر حبيبه النبي عليه الصلاة والسلام، انه يهرب ويروح يعيش – مع ملايينه الغرقانه بدم الشهداء – في لندن بعدما اتحكم عليه بـ.. ثلاث سنين سجن مافيش غيرهم! الف روح ماتت، والقاتل يأخذ ثلاث سنين سجن.. وياريته اتسجن كمان! ده لو كان دابح الف «قطة وقرد» كان حيتحكم عليه باكثر من.. كده!! ا ولادنا بيغرقوا في البحر المتوسط – كمان – وهم رايحين على مراكب تعبانه علشان ياكلوا لقمة عيش في «ايطاليا» واللا «اليونان»! فين ايام زمان، لما كانوا.. «الطلاينة واليونانيين والفرنساوية والانجليز».. بيجوا بلدنا علشان يشتغلوا عندنا وياكلوا لقمة عيش؟ شفتوا الضباط وحكمهم عمل فينا.. ايه؟ وآخرهم «الضابط الجوي حسني.. مبارك» اللي خلانا ناكل «المشّ بدوده» هو وولاده ومراته وصحاب ولاده، وشلة الحرامية اللي نحتوا جسم مصر ووبرها، ووصلوا لعظامها.. وقعدوا يلحسوا ويمصمصوا فيه.. كمان؟!

.. أعزائي «الكوايته» الحلوين:

.. ولما نطفش من بلدنا – من الخوف والجوع والمستقبل اللي مالوش ملامح – ونبيع الجاموسة ونبوس ايد العمدة علشان نسافر الكويت ناكل لقمة بالحلال، تطلع لنا الست «عزيزة المفرج» وتقولنا.. «طلعوا من.. ديرتنا»!! وبعدين بتقولو لنا.. «حرام عليكم، اللي بتعملوه في حسني مبارك وولاده ومراته»؟! هو صحيح حرر بلدكم من «العرائيين»، لكنه استعبد – واستعمر – بلدنا بالحرامية والهليبة والبلطجية وخاربين الذمة لتلاتين سنة لما.. «اتهرينا»!! عايزين.. مبارك وبتحبوه؟! خدوه عندكم – اشبعوا بيه – بس هو بقى مش عايزكم ومش عايز «السعودية» ولا «الامارات»، هو عايز «شرم الشيخ» ومش حيخرج منها الا على سجن.. «طرة»! سيبوه بقى، هو عايز كده، وقبل كده.. ربنا عايز كده كمان!

.. أعزائي «الكوايته».. الحلوين:

.. عندنا «مسل» بيقول: «يا داخل بين البصلة وقشرتها…..»! فارجوكم سيبونا في حالنا، وما تقولوش علينا «ما عندناش وفا ولا اخلاص»، لان «ايدكم» اللي غطسانه لتلاتين سنة في «الميه الساقعة» بتاعة فنادق الخمس نجوم، مش زي ايدينا اللي اتحرقت واتشوت من.. «ميه الحزب الوطني اللي.. بتغلي»!!

[samehmagdy]

سلام عليكم

ممكن اسأل الاخوة والاخوات في الكويت عن موضوع لو حد يعرف له حل ، حماتي كانت زارت ابنها في الكويت من مدة وحاول يعمل لها اقامة علشان مالهاش حد في مصر المهم طلع في التحاليل عندها فيرس سي و اتسجل اسمها علي الكمبيوتر لمنعها من دخول الكويت بعد كدة ، المهم هل في اي طريقة انها تقدر تروح لابنها زيارة حتي واللا خلاص كدة ما عدش ينفع ؟

السلام عليكم ورحمه الله وبركاته

الاخ ام سلمى

فعلا زى ما الاخت امل حياتى قالتلك ان طالما اسمها نزل على الكمبيوتر فمش هتعرف تدخل الا بطريقه واحده

تغير جواز السفر القديم بجواز جديد

لانها اكيد متسجله على الكمبيوتر برقم الجواز القديم والجواز الجديد بياخد حوالى 4 ايام بالكتير وبيتكلف حوالى 150 جنيه على ما اعتقد

وتيجى بالسلامه ان شاء الله

[samehmagdy]

السلام عليكم ورحمه الله وبركاته

ابو عمار تسلم على سؤالك واهتمامك يا راجل يا طيب انا مش هاجر الديوانيه ولا حاجه والله بس مشغول بشكل رهييييب الفتره دى

بالذات علشان قربت انزل اجازه ففى شغل كتييير جدا لازم يخلص الاول

الغريب

الف الف مبروك على الا مانع يا باشا وربنا يتمملك بخير وتاخد الليسن وان شاء الله هيكون اسهل

لان الواسطه بتنفع جدا فى موضوع الرخصه بس بتبقى صعبه اوى فى الا مانع

كب كيك

انا عارف انى برد متاخر وممكن تكون فى مصر دلوقتى

اكيد الغربه بتبقى غربه اهل قبل ما تبقى غربه ارض

بس انتى متعرفيش الخير فين لان كل شى بترتيب ربنا سبحانه وتعالى

وربنا يكتبلكو الخير سوا كان رجوع الكويت تانى او الاستقرار فى مصر

ماما قلب ابيض مسيو تامر سيمبا ابو عمار حاتم امل حياتى ااهات روح حوريه استاذ العربى حسن ابو على الغريب الكاشف وكل اخوانى واخوتنا اسم اسم علشان مبقاش نسيت حد فى الديوانيه

وحشنى جدااا جدااا والله ومفتقدكم جداااا

[ام سلمي]

سلام عليكم

ممكن اسأل الاخوة والاخوات في الكويت عن موضوع لو حد يعرف له حل ، حماتي كانت زارت ابنها في الكويت من مدة وحاول يعمل لها اقامة علشان مالهاش حد في مصر المهم طلع في التحاليل عندها فيرس سي و اتسجل اسمها علي الكمبيوتر لمنعها من دخول الكويت بعد كدة ، المهم هل في اي طريقة انها تقدر تروح لابنها زيارة حتي واللا خلاص كدة ما عدش ينفع ؟

السلام عليكم ورحمه الله وبركاته

الاخ ام سلمى

فعلا زى ما الاخت امل حياتى قالتلك ان طالما اسمها نزل على الكمبيوتر فمش هتعرف تدخل الا بطريقه واحده

تغير جواز السفر القديم بجواز جديد

لانها اكيد متسجله على الكمبيوتر برقم الجواز القديم والجواز الجديد بياخد حوالى 4 ايام بالكتير وبيتكلف حوالى 150 جنيه على ما اعتقد

وتيجى بالسلامه ان شاء الله

شكرا جزيلا لرد حضرتك بس عندي سؤال هو التسجيل علي الكمبيوتر بيبقي برقم الجواز بس واللا الاسم كمان ؟ يعني لو غيرت رقم الجواز والاسم نفسه هل برضه حيعرفوا انها هي ؟