المصريين المغتربين بالكويت

[HDarwish]

موضوع السيارة ده .. هتلاقي فيه اختلافات كثيره جدا

علشان كده وعلشان ما توهشي نفسك .. شوف امكانياتك بالاضافة للهدف من السيارة وانت ترتاح

يعني مثلا

عايز تنزلها مصر

يبقى لازم تشتري زيرو وفي الحالة دي القسط هيكون غالي حبتين وكمان لو فكرت تبعها بعد كده هتلاقي نفسك خسرت فيها كثير مقارنةً لو كنت اشتريت مستعمل وبعتها بعد نفس مده الاستهلاك ..

عايز تجيب تريل بليزر ،،

سياره جميله جدا انا عن نفسي بفضلها عن أي سياره شكل وامكانيات وكل حاجه .. بس غالية شوية .. وكمان حوت بنزين

عايز تجيب سياره مستعملة ،،

حاجة بئا ياباني .. لانسر (سيارتي) .. كورولا .. نيسان صني .. وبصراحه أرجحلك التويوتا بيعتبروها هنا زي الشيك في جيبك وده قدامي حصل الكلام ده واحد اشتراها بئاله سنة ب مثلا 2400 دينار وبعد السنة باعها بنفس الثمن بدون أي خسارة

وطبعا حط في دماغك القاعدة المعروفة للسيارات

الياباني .. اقتصادية ................. قطع غيار رخيص وسعرها مش عالي ونسبة الخسارة بعد الاستهلاك مش عالية

الألماني .. باور وسرعة ............ قطع غيار رخيصة(أيوه قطع غيار رخيصة) لكن الصنايعي اللي بيشتغل فيها أجرته عاليه قوي يمكن اكثر من ثمن قطعة الغيار اللي ركبتها .. وسعرها إلى حد ما معقول .. نسبة الخسارة بعد الاستهلاك أكثر من الياباني

الأمريكي .. الرفاهية أكثر من الإمكانيات ... قطع غيارها غاليه .. وسعرها جديد غالي لكن مستعمل رخيص ونسبة الخسارة بعد الاستهلاك عالية جدا جدا بتوصل لنصف ثمن العربية

إنت بئا إحسب حسبتك وإمكانياتك وإيه اللي انت عايزه في السيارة .. وإتوكل على الله

وأي حاجه عايزها إحنا في الخدمة

تحياتي

حسن درويش

تم تعديل 6 مايو 2009 بواسطة HDarwish

[قلب ابيض]

لأ بجد .. أنا بحس دايما إني غريب في البلد دي .. الناس والأماكن حوليا كلها غريبه عني .. ما بين هندي وبنغالي وباكستاين وإيراني حتى العرب فلسطينيين ولبنانيين وسوريين ده حتى المصريين اللي هنا مش زي اللي هناك .. ما تعرفيش بئا هل الغربه اللي غيرتهم لما وصلوا الكويت ولا اساسا ما بيجيش الكويت إلا العينة الغير مرغوب فيها .. آه والله صدقيني حاسس كإن فعلا المصريين اللي هنا مش مصريين حاجه تانية بس مش مصريين..

طولت عليكي .. أنا آسف .. لكن حضرتك سألتي سؤالين عايزين مجلدات الواحد يكتب فيها علشان يقدر يجاوب عليهم .. سؤالين اللي يجاوب عليهم لازم يفضفض ويقول كل اللي مضايقه ورافضه.

بدايه يا ابو على مشكور على هالرد الزين

وابشرك ان ده كلام كل المخضرمين الان فى الكويت-- بمعنى ان اول تلات اربع سنين بيكون ده احساسك بالغربه والوحشه وبعدين الموضوع بيتبدل تماما

مش عارفه الموضوع نسبى من شخص لشخص ومن طبيعه عمل لآخرى يعنى حسب المناخ اللى انت عايششه او فرض عليك

احنا جينا الكويت محددين هدفنا سنه واحده بس ومش هنجدد---زى بابا حسنى كده من يوم مامات بابا انور قال كده وحتى الان بيتوغل وينتشرويستمر

المهم السنه مرت ووراها سنه وسنين زى ماقلك مهندس الكهربا---بس بجد لو الزمن رجع تانى انا هاعمل نفس الشىء وعلى فكره انا بحب مصر جدا جدا جدا وحتى الان مابنطقش كلمه كويتى مع ان مجال عملى كله كويته ----ومع ذلك بشعر بغربه بعيد ن الكويت ---تصدق دى ؟؟؟؟

وبعدين بلدك فين يا جحا ؟؟؟ اللى فيها مراتى "جوزى " وعيالى وشغلى وراحه بالى

وااااااااااضح ان للحديث بقيه

:) ;) تحياتى لكم جميعا

تم تعديل 8 مايو 2009 بواسطة قلب ابيض

[HDarwish]

عندك حق يا أم نور

لكن كلامك ده بيترتب عليه حاجات كثير

زي مثلا .. إنعدام الحياة الاجتماعية .. بمعنى إن حسب مبدأ إن بلدي اللي فيها مراتي "زوجي" وشغلي وخلاص يبقى الحياه الاجتماعية عندي بئت ممثلة في مراتي وعيالي وبس .. فين بئا الأصدقاء (كل واحد مشغول في همه) طب فين الأم والأب (لما تنزل أجازه كل سنة ومرة هيفرحوا بيك أكثر وإنت معاك الفلوس أحسن ما تكون معاهم وتحتاج تستلف منهم) .. والإخوات والقرايب والزيارات وكده ..

أنا بقول الكلام وبرد على نفسي لإني عارف إنك أكيد هتقولولي أساسا الحياه الاجتماعة في مصر بئت منعدمة .. لكن إسمحيلي حتى لو الكلام اللي فوق ده كله صح إلا إني بفضل الحياه في مصر عن الحياه في أي مكان تاني ...

نقطة تانيه كمان .. وهي إن البداية إللي هيبدأ أي حد في مشوار حياته من غير ما يسافر .. هي نفس البداية اللي هيبدأها أي واحد بعد عشرين سنة غربه .. والإسم إنه ضيع عشرين سنة هباءاً وبدون أي فايده وكمان فيهم ثمرة شبابه .. وده على فكره عن أمثله واقعية ونماذج حية قدامي ..منهم ناس كانت في الخليج وإستقروا في مصر في نفس الوقت اللي كانوا اصحابهم او اخواتهم ما سافروش وكانت النتيجه بعد كم سنة غربه هي هياها .. ده بنى بيت وده اشترى بيت .. ده عمل مشروع وبيدخله باب رزق كويس وده لسه بيدور وبيفكر يعمل إيه وعلشان هو اساسا بعيد عن البلد ومش عارف إيه اللي ممكن يمشي وإيه اللي بسرعة يفشل فبتكون 90% بفشل زريع ...

فعلا زي ما قلتي فهي عملية نسبية وبتختلف من شخص للتاني ..

دمتي عزيزه طيبة ..

طيب سؤال كده على السريع علشان نشجع الناس اللي في الكويت اللي نايمه دي ومش عايزه تشارك معانا ..

سؤالي هيكون من خلال موقف شايفه قدامي ومن خلاله غير كل تفكيري وعايز تأكدوا الكلام أو تنفوه

واحد صاحبي متجوز ومعاه طفلين (سنتين وأربع سنين) مرتبه 450 ومراته 250 وعلى فكره هو دايما صادق معايا وما بيكدبش ولا بيزود الأمور ولا بيقللها وحتى علشان يقنعك بيحسبهالك بالورقه والقلم .. نرجع لمرجوعنا .. يعني دخلهم 700 دينار .. وآخر قرار له إنه قال السنة دي آخر سنة لمراته معاه وإنه هينزلها مصر .. نسأله طب ليه يا عم ده احنا ما صدقنا انها اشتغلت يقول إن اللي جاي على قد اللي رايح لدرجه إن مفيش مجال لأي حاجه طارئه زي طفل تعب أو حادثة لاقدر الله يادوب العملية ماشيه بالعافية وعلشان كده هينزل مراته وعياله ويبقى عازب علشان يقدر يحوش حاجه وتبقى الغربة جابت همها شويه .. إيه رأيكم في الكلام ده ..

إعتذار رسمي من خلال محاورات المصريين وعلى الهواء للسيد"ssmaly"

أنا آسف جدا لعدم حضوري حسب الموعد المتفق عليه وده بسبب مشاغل كثيرة جدا مخلياني مافيش عندي وقت خالص .. حبيت تقبل اعتذاري لإن دي مش عادتي خالص إني أوعد وأخلف وعدي .. وإن شاء الله أعدي عليك قريب جدا

دمتم جميعا بخير

[قلب ابيض]

..

طيب سؤال كده على السريع علشان نشجع الناس اللي في الكويت اللي نايمه دي ومش عايزه تشارك معانا ..

سؤالي هيكون من خلال موقف شايفه قدامي ومن خلاله غير كل تفكيري وعايز تأكدوا الكلام أو تنفوه

واحد صاحبي متجوز ومعاه طفلين (سنتين وأربع سنين) مرتبه 450 ومراته 250 وعلى فكره هو دايما صادق معايا وما بيكدبش ولا بيزود الأمور ولا بيقللها وحتى علشان يقنعك بيحسبهالك بالورقه والقلم .. نرجع لمرجوعنا .. يعني دخلهم 700 دينار .. وآخر قرار له إنه قال السنة دي آخر سنة لمراته معاه وإنه هينزلها مصر .. نسأله طب ليه يا عم ده احنا ما صدقنا انها اشتغلت يقول إن اللي جاي على قد اللي رايح لدرجه إن مفيش مجال لأي حاجه طارئه زي طفل تعب أو حادثة لاقدر الله يادوب العملية ماشيه بالعافية وعلشان كده هينزل مراته وعياله ويبقى عازب علشان يقدر يحوش حاجه وتبقى الغربة جابت همها شويه .. إيه رأيكم في الكلام ده ..

إإإإإإياكم والعزوبيه بعد الزواج

موضوع فاشل جدا جدا جدا ---بيبدأ بأننا لازم نضحى واللى هتصرفوه هنا تصرفوه فى مصر وانا انزل لكم كل ما اقدر والسكن هايتوفر نصه والمعيشه ووووو-------الخ

خدوا عندكم : القصه دى حصلت لآقرب الاقربين مننا والله ما هاغير من الحقيقه حرف لعلنا نتعظ

اسره اب وام وولد وبنت الوضع المادى عادى جدا مع محاولات من جانب الاب لزياده الدخل وتوفير من الام لتوازن العمليه الماديه يعنى تفاهم م الجانبين --الاولاد بمدارس حكوميه --الزوج انسان ملتزم جدا قمه فى الاخلاق والتدين ومحب لآسرته جدا جدا

وذات مره وتفكيرا فى مستقبل الاولاد والدروس والبنت مسيرها تبقى عروسه والجامعه والدراسه وتيته وحشتنا وجدو تعبان وياااااه من زمان نفسى ارمضن فى مصر وكل شىء من هذا القبيل

المهم استقر الحال على نزول الاسره وبقاء الاب المضحى المكافح عزوبى

ومر شهر واتنين وبدأ الشوق للاولاد والزوجه ومايقدروش يجيوا عشان المدارس وهو نزل مره والتانيه يبقى معملناش حاجه اللى هيوفره هيصرفه تذاكر طيران وهدايا

ماطولش عليكم ---قولوا طولى ----شفتوا مسلسل الهام شاهين ومصطفى فهمى " مش فاكره اسمه " و ده الباقى

حب الزوج يرجع الاستقرار اللى اتعود عليه فى جو اسرى رفضت الزوجه الى كانت بتبنى البيت الجديد

تزوج الزوج بأخرى وعااااش حياته مستقر وبقى يسأل عليهم من باب الواجب وتحملت الام والابناء النتيجه

ده واحد

وعندى امثله تانيه والله من الواقع

قول لصاحبك مرتب زوجتك مع مرتبك والاولاد لسه مش فى مدارس بدايه حلوه جدا بس بلاش الهدايا الثانويه واللى يزعل منك مش مهم فى النهايه كله بيتساوى والله

هو ممكن يصرف راتبه مسكن ومأكل ويوفر مرتب الزوجه او هما ادرى بشئونهم من اى حد بس لاداعى اطلااااااقا لبعد الزوج عن زوجته طالما ميسر لهم لم الشمل مايعوضش الاولاد فى اى سن حد عن الاب و الام ابدا

ده كفايه كل اسبوع تاخد الولاد والمدام وتتمشوا على الوجهه البحريه ولا حديقه الشويخ وتاكلوا فطاير ولا سندوتشات بيتى وكوبايه شاى بالدنيا وما فيها وصدقنى مش هاتعرف تعمل ده فى مصر مش امكانيات لاء لكن وقت ونفسيه

كل فكره انا مقيمه مابين مصر والكويت يعنى عايشه هنا وهناك كل بلد بمنطقها وحياتها هتقولوا لى ازاى ؟؟؟؟

مش هاقولكم -----تابعونايا تمشوا سوا ---يا تقعدوا سوا على الحلوه والمره

مش بس عشان اللى قلته لاء ده هى كمان عليها مجاملات وواجبات لاسرتها واسره زوجها مش هاتخليها تتشتغل ولا تركز مع اولاده ناهيك عن تفكيرها فى الغايب -----واسال مجرب

وجعت دماغكم بس الموضوع ده بيستفزنى جدا

تحياتى

[ابو حودة]

[/quote تمشوا سوا ---يا تقعدوا سوا على الحلوه والمره

]

اوافقك الرأي تماما حتى لو كان الشريك ده مخالف احسن من القعدة عازب بعد الزواج

[HDarwish]

'ابو حودة"

تمشوا سوا ---يا تقعدوا سوا على الحلوه والمره

اوافقك الرأي تماما حتى لو كان الشريك ده مخالف احسن من القعدة عازب بعد الزواج

بصراحة فهمت نص اللي عايز تقولوا .. ياريت توضح أكثر

[HDarwish]

مش بس عشان اللى قلته لاء ده هى كمان عليها مجاملات وواجبات لاسرتها واسره زوجها مش هاتخليها تتشتغل ولا تركز مع اولاده ناهيك عن تفكيرها فى الغايب -----واسال مجرب

وجعت دماغكم بس الموضوع ده بيستفزنى جدا

أنا كل شوية أدخل على الموضوع واشوف أم نور تعليقها إيه على الكلام ده .. لكن إظاهر مشاركتها كانت مدارية ورا مشاركة أبو حوده

كلامك يا أم نور وراه ياما .. وما يفهمشي رؤوس المواضيع اللي إنتي كتبتيها دي إلا اللي جربها ..

أنا برضه معاكي في التفكير ده والمنطق ده واللي ماشي بيه ناس كثير قوي ... في حين إن فيه ناس تانية لها منطق تاني خالص .. وهو بدل ما اقعد اعاني اني ومراتي واولادي في الغربة وابقى مضيق عليهم شويه وعلى بيتي شويتين علشان نقدر نوفر حاجه طب ما هو ممكن نستحمل سنتين ثلاثه بالكثير والراجل عزوبي ومراته وعياله في مصر وبعدها يقول للغربة سلامو عليكم وينزل يقعد في مصر بعدها .. بمعنى نقعد نعاني معاناة خفيفة عشرين سنة .. ولا نعاني معاناة شديدة سنتين ثلاثه .. وبعدها الأمور ترجع طبيعية من تاني ..

كلها وجهات نظر واختلافات في التخطيط للمستقبل

دمتم أعزاء في خير وسعادة

[قلب ابيض]

صدقنى يا اخى الفاضل "درويش" مش عارفه الاسم صح كده ولا ايه ؟؟

صدقنى السنه اللى بتقول عليها دى عمرها ما هاتبقى سنه خااااصه فىالكويت -جايز فى السعوديه لان الحياه مختلفه تماما مابين هنا وهناك

المهم --انا عند رأيى مادامت الظروف تسمح بتواجد الاسره مع بعضها ولو بشىء من التقشف افضل بكتير من الانقسام الاسرى اللى بيعقبه تفكك نتيجه احساس الزوج بالحريه اوالعزوبيه بعد الزواج واحتياج الزوجه لوقفه الزوج معاها واحتياج الابناء لوجود اب اللى مايعوضوش خال ولا جد ولاعم

يمكن انا محبكاها شويتين وكلامى مايعجبش بعضكم ولكن ده رأيى ونصيحتى للى بيمر بالظروف دى خاصه اللى اولادهم لسه اطفال سن الحضانه والابتدائى

وللحديث بقيه ----بس الناس فين ؟؟؟

اين تفاعلكم يا مقيمى الكويت ---على فكره انا فى مصر حاليا وجايه كمان ايام

حد عاوز حاجه ؟؟؟؟؟؟؟

تحياتى

[الحاج فوزى]

أيهما أفضل ؟؟

بين أن أعيش وسط أسرتى وأدخر القليل .. وبين أن نعيش غرباء .. وادخر الكثير !

بالطبع تختلف الإجابة طبقا ً لحالات المغتربين الخاصة ..

لكني أعلق على الحالة العامة ..

لا تتساوى أبدا ً أموال الغربة بأيام العمر التي تضيع ..

وخاصة عندما يكون لك زوجة وأولاد .. يشبون بعيدا ً عنك ..

تشكي زوجتك الوحدة .. ويعاني أبنائك تربية فردية تزيد فى الهوة التى بينهم وبينك !

أفهم أن تنتقل الزوجة والأبناء فى بعد عمر ٍ للعيش ببلدهم على أن يلحقهم الأب بعد سنة كفترة فى نهاية الغربة مثلا ً

ورغم أنى لا أحبذها ، لكنى أفهم عذرها ..

لكن لا أفهم أن تكون فى بداية الغربة ..

لأنها ستكون مطمعا ً للإستمرار .. وكل يوم ٍ يمر ، يزيد الهوة بقدر ٍ يضعفها .. ويضعف معها علاقة الأب بأسرته ..

وكم من نماذج نراها ،، يتحول فيها الأب لماكينة سحب آلى للأموال .. حتى يصل لدرجة أن عودته وقربه لا اعنى سوى توقف هذه الأموال وبعده وغربته تعنى إستمرار هذا النعيم الزائف !

نصيحتي هى عش لأسرتك بأسرتك .. ولا تأخذ أحدهما فقط وتترك الأخر .. فلا تعش لأسرتك بدونها .. ولا تعش بها دون أن تجتهد لوضع ٍ أفضل ٍ لها .

بالطبع هذا رأيي الذى لا ألزم به أحد ، ولا أقفز به على ظروف أحد .. فالكل أدرى بوضعه وظروفه .. لكن ليتفكر فى هذه الكلمات عسى أن يلحق شيئا ً لو فاته فربما لا يعود .

لطفا ً تقبلوا جميعا ً التحية والتقدير .

[ابو حودة]

'ابو حودة"

إقتباس

تمشوا سوا ---يا تقعدوا سوا على الحلوه والمره

اوافقك الرأي تماما حتى لو كان الشريك ده مخالف احسن من القعدة عازب بعد الزواج

بصراحة فهمت نص اللي عايز تقولوا .. ياريت توضح أكثر

اقصد انه هناك كتير من المشاكل في تفرقة العائلة بين مصر والخليج لكل من الزوج والزوجة والاولاد يعني بأقول حتى لو كانت الزوجة فيه مشاكل بينها وبين زوجها برضه هما مع بعض ممكن تتحل لكن البعد جفا زي ما بيقولوا وشوية شوية يبقى الزوج مجرد حصالة وضيف غير مرغوب في وجوده

يعني هو حلو لما يبعت فلوس بس لما يرجع ويلاقي حاجات مش واخد عليها يبدأ يتكلم فيقوم الولاد والزوجة كمان يقولوا امتى تخلص اجازته ونرجع لحياتنا اللي احنا متعودين عليها

هو ده النمط اللي لازم اي حد عاوز يسيب مراته في مصر يحطه قدامه

[HDarwish]

صدقنى يا اخى الفاضل "درويش" مش عارفه الاسم صح كده ولا ايه ؟؟

أختي الفاضلة .. أم نور .. الإسم كده صح ..

صدقنى السنه اللى بتقول عليها دى عمرها ما هاتبقى سنه خااااصه فىالكويت -جايز فى السعوديه لان الحياه مختلفه تماما مابين هنا وهناك

المهم --انا عند رأيى مادامت الظروف تسمح بتواجد الاسره مع بعضها ولو بشىء من التقشف افضل بكتير من الانقسام الاسرى اللى بيعقبه تفكك نتيجه احساس الزوج بالحريه اوالعزوبيه بعد الزواج واحتياج الزوجه لوقفه الزوج معاها واحتياج الابناء لوجود اب اللى مايعوضوش خال ولا جد ولاعم

يمكن انا محبكاها شويتين وكلامى مايعجبش بعضكم ولكن ده رأيى ونصيحتى للى بيمر بالظروف دى خاصه اللى اولادهم لسه اطفال سن الحضانه والابتدائى

العفو يا أم نور .. لكن فعلا بحس في كلامك إنه بعيد كل البعد عن السطحية وأكثر عمقاً .. وده أكيد نابع من حد مر بالتجربة حتى ولو لفترة صغيرة لكن مر بها ..

لكي كل التحية والتقدير ...

وللحديث بقيه ----بس الناس فين ؟؟؟

اين تفاعلكم يا مقيمى الكويت ---على فكره انا فى مصر حاليا وجايه كمان ايام

حد عاوز حاجه ؟؟؟؟؟؟؟

وللحديث بقية أيضا أختنا الفاضلة

مش عارف المقيمين في الكويت .. يإما كسلانين يكتبوا .. يإما مش فاضيين والدنيا شاغلاهم قوي لدرجة إن مفيش وقت إن حد يعبر عن رأيه .. كان الله في عون الجميع

حضرتك جايه من مصر .. لو تعرفي تجيبي المدام وبنتي في إيدك وانتي جايه يبقى كثر خيرك .. لو فيها مشكلة يبقى خلاص شوية ملوخية من بتوع مصر على قفصين خوخ .. أصل دول بالذات الواحد قرب ينسى طعمهم إيه .. أنا بهزر على فكره .. توصلي بالسلامه إن شاء الله.

تحياتي

أيهما أفضل ؟؟

بين أن أعيش وسط أسرتى وأدخر القليل .. وبين أن نعيش غرباء .. وادخر الكثير !

طبعا أعيش وسط أسرتي وأدخر الكثير :D ... ما تزعلشي من الهزار لكن جايلك أهوه يا حاج في الكلام الجد

بالطبع تختلف الإجابة طبقا ً لحالات المغتربين الخاصة ..

لكني أعلق على الحالة العامة ..

لا تتساوى أبدا ً أموال الغربة بأيام العمر التي تضيع ..

وخاصة عندما يكون لك زوجة وأولاد .. يشبون بعيدا ً عنك ..

تشكي زوجتك الوحدة .. ويعاني أبنائك تربية فردية تزيد فى الهوة التى بينهم وبينك !

أفهم أن تنتقل الزوجة والأبناء فى بعد عمر ٍ للعيش ببلدهم على أن يلحقهم الأب بعد سنة كفترة فى نهاية الغربة مثلا ً

ورغم أنى لا أحبذها ، لكنى أفهم عذرها ..

لكن لا أفهم أن تكون فى بداية الغربة ..

لأنها ستكون مطمعا ً للإستمرار .. وكل يوم ٍ يمر ، يزيد الهوة بقدر ٍ يضعفها .. ويضعف معها علاقة الأب بأسرته ..

كلامك منطقي جدا يا حاج فوزي .. لكن اللي عايز يوصل لإجابة سؤال حضرتك في بداية المشاركة .. لازم يجاوب على سؤال تاني .. لو عرف يجاوب عليه هيعرف يجاوبك .. والسؤال هو "ليه سافر وجيه الكويت من البداية؟" لو تمت الاجابة على السؤال ده هيبقى سهل قوي الاجابة على سؤال حضرتك .. فيه واحد سايب مصر وكارهها وكاره اللي فيها وخلاص ما عدشي عايز ينزلها وحابب إنه يتأقلم ويعيش عيشه هنا أو حتى مش كاره مصر لكن من منظوره شايف إن الحياه في الكويت أفضل بكثير من الحياه في مصر .. وفيه ناس تانية حاسبه حسبتها إنه عايز مبلغ معين كبر المبلغ ده أو قل .. لكنه محتاجه علشان يعرف يبدأ حياته في مصر ويعيش .. أنا في نظري ده الصح والباقي كله غلط بمعنى إن المفروض اللي عايز يسافر من البداية يسافر وهو عازب يقعد سنة اثنين عشره وبعد كده ينزل يتجوز يعمل المشروع اللي عايز يعمله ويقعد بئا ويستقر في بلده .. لكن علشان يجي هنا ويادوب كمل ثمن الشبكة ويقوللي أنا عاوز اتجوز طب وبعدين يقعد يستلف علشان يتجوز ويبقى مديون ويرجع تاني الكويت يسدد ديون الجواز وسنينه وطبعا عايز يجيب مراته مش هينفع إنه يكون عريس ويسيب مراته في مصر وهو هنا ويادوب يبقى خلص ديون الجواز يدخل في دوين تانيه علشان يقدر يمشي المركب .. وهكذا يطلع من ديون يدخل في دوين والاسم في الكويت ومتغرب ويبقبضله يجي سبعة الاف جنيه شهريا .. الموضوع لو قعدت أكتب فيه من هنا للصبح مش هخلص مع أمثلة ونماذج كثير قدام عينيا وكلها نتيجة سؤ تخطيط من البداية ...

وكم من نماذج نراها ،، يتحول فيها الأب لماكينة سحب آلى للأموال .. حتى يصل لدرجة أن عودته وقربه لا اعنى سوى توقف هذه الأموال وبعده وغربته تعنى إستمرار هذا النعيم الزائف !

أنا كمان لا يرضيني الوضع ده بتاتا .. واوعوا تفكروا اني علشان مُتعارض مع فكره الاستقرار في الغربة بدون توفير يبقى يرضيني الوضع اللي فوق ده .. أبداً.. ده أنا حتى في مرة استلمتلك واحد معانا في الشركة شغال فني جاي من مصر وبئاله حوالي سبع أو ثمن سنين كل سنة بينزل شهر أو شهر ونصف بالعافية .. وسألته سؤال إبنك في مصر .. وانت في الأجازة ما حصلش موقف منه ضايقك وكان لازم تعاقبه .. قاللي يا عم هو أنا نازل افسحه وابسطه ولا اضربه؟؟ طبعا انا عينيا فنجلت وفتحت بوئي دليل على اندهاشي يعني حتى الاجازه اللي بينزيلها يادوب علشان يدلعه .. طيب قولتله نفرض إنه حصل وحبيت تعاقبه .. تعرف يرد عليا يقول إيه .. يا بيه إزاي هضربه في حته الشهر اللي بيشوفني فيه في السنة .. أنا في ذهول طبعا قولتله يعني إنت دورك إيه الوقتي في حياه عيالك .. طبعا هو مقتنع إنه يادوب معيشهم كويس يبقى كده عمل اللي عليه .. أنا بئا قولتله إنت يا حبيبي دلوقتي بالظبط دورك ما هو إلا صورة متعلقه في الصالون كل شويه يقولوله بابا أهوه طبعا بغرض إنه يفتكرك لما تنزله السنة اللي بعده وتاني حاجه الشيك اللي كل شهر بيوصلهم عالبيت .. صح كده ؟؟!!

نصيحتي هى عش لأسرتك بأسرتك .. ولا تأخذ أحدهما فقط وتترك الأخر .. فلا تعش لأسرتك بدونها .. ولا تعش بها دون أن تجتهد لوضع ٍ أفضل ٍ لها .

بالطبع هذا رأيي الذى لا ألزم به أحد ، ولا أقفز به على ظروف أحد .. فالكل أدرى بوضعه وظروفه .. لكن ليتفكر فى هذه الكلمات عسى أن يلحق شيئا ً لو فاته فربما لا يعود .

لطفا ً تقبلوا جميعا ً التحية والتقدير .

نصيحه نحترمها ونقدرها .. لكن بصراحه أنا برأيي .. غربة بدون توفير = عيشه في مصر بدون توفير أيضا .. يبقى في الحاله دي من الأفضل إنهم ينزلوا مصر ويعيشوا هناك أحسن .. والمقولة المشهورة .. محدش بيبات في مصر من غير عشا .. بالعكس ده إنت بتتعشى وتاكل زبادي وتحلي كمان

دمت عزيزا طيبا

اقصد انه هناك كتير من المشاكل في تفرقة العائلة بين مصر والخليج لكل من الزوج والزوجة والاولاد يعني بأقول حتى لو كانت الزوجة فيه مشاكل بينها وبين زوجها برضه هما مع بعض ممكن تتحل لكن البعد جفا زي ما بيقولوا وشوية شوية يبقى الزوج مجرد حصالة وضيف غير مرغوب في وجوده

يعني هو حلو لما يبعت فلوس بس لما يرجع ويلاقي حاجات مش واخد عليها يبدأ يتكلم فيقوم الولاد والزوجة كمان يقولوا امتى تخلص اجازته ونرجع لحياتنا اللي احنا متعودين عليها

هو ده النمط اللي لازم اي حد عاوز يسيب مراته في مصر يحطه قدامه

عندك حق والله يا ابو حوده .. وفعلا ده مصير أي حد هيفضل سايب مراته وعياله فترة كبيره توصل لعشرين سنة وينزلهم كل سنة شهر يعني بحسبة صغيره جدا بعد عشرين سنة لو حب يحسب المده اللي قضاها مع أهله هتكون سنة وثمن شهور خلال العشرين سنة .. طبعا لازم هيشعروا إنه غريب وسطيهم وفي حاله لو اتنرفز ولا حب إنه يبرز دوره وهيبته في البيت .. طبعا هتُقابل بنفور كبير جدا ..

لكن لو الأب ده سافر بالظبط أربع سنين خليهم ياسيدي خمس سنين .. وإتحملوا شويه سواء هو أو هي والعيال كمان .. وخاصة لو لسه الطفل ده بيبي ولسه ما دخلش المدرسة .. ساعتها لما يجي يرجع هيواجهه صعوبة في الأول لكن بسهوله هيقدر يبرز دوره ومكانته داخل الأسره .. مع الاعتبار طبعا إنه بيفوته أحلى لحظات وهي لما يشوف طفله بيكبر قدام عينيه شوية طلعله سنه شوية بيحبي شوية بدأ يمشي .. أظن برضه الحاجات دي ما تتعوضشي ..

يا جماعة مفيش حل غير إن اللي عايز يسافر .. يسافر عازب لحد ما يقدر يكون قرش كويس يتجوز بيه بالإضافه لإنه يخليه قادر إنه يبدأ بدايه معقوله وساعة ما يتجوز يقعد بئا بلا سفر بلا تعب قلب ..

وطبعا للحديث بقية ..

دمتم أعزاء كرام طيبين

[قلب ابيض]

صح لسانك

الله يفتح عليكم ---كده متفقين :D

[HDarwish]

صح لسانك

الله يفتح عليكم ---كده متفقين

الحمد لله متفقين ..

يا جماعة الموضوع طويل ولسه في كلام كثير جدا وعايزين مشاركات باقي المقيمين في الكويت

كمان عايزين نتوسع في الحوار شوية ونضم لموضوعاتنا بالإضافة إلى فرصه التعارف .. نقدم خدمات زي إخوانا المقيمين في السعودية .. يعني للي بيستفسر عن أي حاجه ونقدر نفيده بيها إحنا هنا في الخدمة .. كمان اللي شايف حاجه يقدر يقدمها بدون ما حد يطلب يبقى كثر خيره .. أو حتى آخر الآخبار اللي تهم أي واحد مقيم في الكويت .. خلينا نساعد بعض .. إيه رأيكم؟ :D

تحياتي

[قلب ابيض]

بمناسبه امكانيه ان نفيد بعضنا من خلال لقائتنا هنا

ممكن ابدأبخبر صغنون سمعته وانا بالكويت الشهر اللى طاف - wst:: --ان الايجارات هتنزل 30فى الميه من شهر 6 اللى جاى

ياله بقى هاتوا العيال وامهم :ninja:

[قلب ابيض]

وبما اننى قادمه فى مرحله نزول الناس اجازات فأخبركم انى على موعد معكم لنقل اخبار السوق والعروض اللى ممكن تهمكم فيما قبل النزول لمصر

بس تقلوا جيوبكم ---" مع ان كل شىء موجود والله بمصر 00000الا الدينار :ninja:

[قلب ابيض]

انتوا فين يا جماعه الخير ؟؟؟

عسى ماشر!!!

ايش صار ؟ وييينكم ؟

[HDarwish]

موجودين يا أم نور بس إظاهر إن كل في الكويت بيبقوا مشغولين جداً لدرجة إن محدش فاضي للتاني

بس بجد يا أم نور كفيتي ووفيتي وأنا عن نفسي في إنتظار مشاركاتك الجاية بفارغ الصبر لإني نازل إن شاء الله على آخر سبعة كده وأكيد هاحتاج العروض والحاجات دي أصل بيني وبينك كل اللي شايل همه هي الهدايا ,, أحسبها يمين أحسبها شمال ألاقي إن الهدايا هي اللي هتبوظ الميزانية ومن غير الهدايا دي هلاقي نفسي مقضي أجازه ميه ميه بالإضافة إلى إني هاروق على بيتي كويس قوي ،، ضريبة لازم ندفعها وفي الآخر مش عاجب.

مش عارف ليه مش متأكد من موضوع الإيجارات ده وحاسس إنه أوشاعه .. من شهرين كده وفي عز الأزمة جمعنا نفسنا أنا وزمايلي في السكن وعدينا على شقة شقة في العمارة وقولنالهم إننا هنجمع من كل شقة واحد وننزل للحارس ونقوله مافيش إيجار الشهر ده إلا لما الإيجار ينزل على الأقل 25 في الميه وده علشان الأزمة الاقتصادية وإن معظم الناس هنا اللي راتبهم قل واللي اتفنشوا وكده يعني ونزلنا بالصلاة على النبي كده حوالي 30 واحد والراجل اقتنع بكلامنا وقال هيبلغ صاحب البناية لكن في النهاية يبقى الوضع كما هو عليه واللي مش عاجبه يسيب السكن وطبعا الكل دفع الإيجار .. حاسس إن مفيش أمل في الموضوع ده .. بس أتمنى ذلك جدا جدا جدا جدا

تحياتي للجميع .. ويا جماعة الكويت يلا كفاية كده نوم بئا عايزين مشاركاتكم..

[قلب ابيض]

موجودين يا أم نور بس إظاهر إن كل في الكويت بيبقوا مشغولين جداً لدرجة إن محدش فاضي للتاني

بس بجد يا أم نور كفيتي ووفيتي وأنا عن نفسي في إنتظار مشاركاتك الجاية بفارغ الصبر لإني نازل إن شاء الله على آخر سبعة كده وأكيد هاحتاج العروض والحاجات دي أصل بيني وبينك كل اللي شايل همه هي الهدايا ,, أحسبها يمين أحسبها شمال ألاقي إن الهدايا هي اللي هتبوظ الميزانية ومن غير الهدايا دي هلاقي نفسي مقضي أجازه ميه ميه بالإضافة إلى إني هاروق على بيتي كويس قوي ،، ضريبة لازم ندفعها وفي الآخر مش عاجب.

مش عارف ليه مش متأكد من موضوع الإيجارات ده وحاسس إنه أوشاعه .. من شهرين كده وفي عز الأزمة جمعنا نفسنا أنا وزمايلي في السكن وعدينا على شقة شقة في العمارة وقولنالهم إننا هنجمع من كل شقة واحد وننزل للحارس ونقوله مافيش إيجار الشهر ده إلا لما الإيجار ينزل على الأقل 25 في الميه وده علشان الأزمة الاقتصادية وإن معظم الناس هنا اللي راتبهم قل واللي اتفنشوا وكده يعني ونزلنا بالصلاة على النبي كده حوالي 30 واحد والراجل اقتنع بكلامنا وقال هيبلغ صاحب البناية لكن في النهاية يبقى الوضع كما هو عليه واللي مش عاجبه يسيب السكن وطبعا الكل دفع الإيجار .. حاسس إن مفيش أمل في الموضوع ده .. بس أتمنى ذلك جدا جدا جدا جدا

تحياتي للجميع .. ويا جماعة الكويت يلا كفاية كده نوم بئا عايزين مشاركاتكم..

سلامات يادرش 000

موضوع الايجارات ده قرار حكومى وليس ودى مع صاحب البنايه

بس اللى انا عارفاه انه هايتنفذ من شهر 6 وانا على فكره مسافره عشان اعزل لمكان غير اللى انا فيه وكله هيبقى على الطبيعه

وهابلغكم برده عن السكن العزوبى او العوايل

وبعدين ما اكيدلازم تروش العيال فى النزوله بتاعتك ربنا يخليك ليهم ويخليهم ليك وبالامانه كده : هى الحاجه لها طعم من غيرهم ؟؟؟؟؟

[HDarwish]

إوعوا تفكروني بخيل .. والله أبداً ..

أنا أقصد يا أم نور .. الهدايا لغير قرايب الدرجة الأولى زي العم والعمة والخال والخالة وأولاد كل منهم وزوجات كل من أولادهم وأطفال كل من ابناء العمومة وابناء أولاد الخال والخاله والأصدقاء والجيران وعم محمد الحلاق وعم أحمد البقال .. يعني بالمرتاح كده مش أقل من 500 دينار .. طيب يبقى الهدايا أحق ولا اروح أجيب لمراتي شبكة دهب من تاني أحسن .. أو أخد مراتي وبنتي واقعد اسبوع في شرم الشيخ .. ولا أغير شوية في أثاث البيت .. ولا ولا .. حاجات كتير أولى وتستحق عن الهدايا .. والمشكلة الأكبر بعد ما تجيب لحد مثلا قميص يقولك طب ما كنتش عارف تجيب عليه بنطلون علشان الطقم يكمل .. ولا جبت لواحد ساعة مثلا او برفان تلاقيه يقولك يا عم إنت بتضحك علينا دي مش ماركة أصلية .. وآه بئا لما يشوف عليك حاجه حلوة وعاجبته يقولك ما كنتش عارف تجيبلنا حاجة عليها القيمة زي دي .. وتحس من كلامهم إنك قاعد في الكويت تعبي فلوس .. أحسن حاجه إني أنفض للكل مرة واحدة واعمل نفسي مش واخد بالي ..

[almohager]

السلام عليكم

انا أحمد

مصري ومقيم بالكويت من حوالي 5 سنوات

باعمل باحدى الشركات بالمنطقه الحرة

احب اتعرف على كل المصريين الموجودين بالمنتدي وبالكويت

تقبلوا تحياتي