المصريين المغتربين بالكويت

[mizozizo]

كل عام وانتم بخير جمعيا ورمضان كريم علينا وعليكم جمعيا

الف شكر اخت بوسي على سؤالك الكريم معلش مشاغل ماقبل رمضان وكنت بدور على فانوس لابني اي نعم هو صغير لسه ميعرفوش بس ملقيتش ولو لقيت كنت جبت لعمر واحد كمان كل اللي هنا حاجة اسمها قرقيعان؟؟؟؟؟

:wub:

انا قلت لا لازم الفانوس المصري المفتكس ولا فلا! وجاري البحث وسنوافيكم بما يجد

[خالد شحاته]

اهلين اختي بوسي اخبارك ايه ويارب تكوني بخير

والله الجو كمان في الرياض غريب من يوم الخميس رطوبه جباره فعلا وحر الله يتقبل من الجميع الصيام والقيام لاتنسونا من الدعو عند الفطور

[تامر مصطفى]

اهلا بالبسبوسة وكل سنه وانتي طيبة وبألف صحة وسلامة

تخيلي اول مرة من 10 سنين احضر اول رمضان هنا في مصر؟؟

الزينه والفوانيس في الشوارع والناس والزحمة والفرحة والتراويح واصوات المساجد وجمعة الاهل والناس اللي بتوزع الشنط الرمضانية على الغلابه والناس الي بتهني بعضها والكل بيضحك .....

كل حاجة جميلة

انا يا ستي عندي بنتين الكبيرة فرح 7 سنوات والصغيرة دانه 3 سنوات

وبفكر لو ربنا رزقني بولد اسميه مخيمر علشان يحمي اخواته البنات والناس تعمله حساب وهشتري له جلابية صغيرة وعمة ونبوت ومن اول ما يبقى عمرة 3 سنين هرميه مع البوابين علشان يطلع خشن وفي سن 10 هعمله بعثة الى صعيد مصر

ربنا يبارك للجميع في شهر رمضان وفي كل ايامكم

كان معكم المعلم تامر من احد شوارع القاهرة تحت فانوس كبير

[pocy]

السلام عليكم ورحمه الله وبركاته

اخى فى الله الاستاذ خالد والله الواحد مش عارف يعمل ايه فى الجو واللى اكتر صعبان على كل اللى بيشتغلوا فى الجو ده وهم صايمين بجد الله يعينهم ويتقبل منهم يارب

الواحد حاسس انه مش عارف يتنفس من الرطوبه الفظيعه دى بس الحمد لله هتنقشع قريبا بإذن الله

وفعلا انا لما رحت الرياض كانت حر جدا فى شهر 4 اللى فات بس الحمد لله ع كل شئ وربنا يرحمنا ويجازينا كل الخير ويتقبل منا صلاتنا وسائر اعمالنا اللهم امين

يعنى محدش قال امين

اخى في الله الاستاذ تامر (طمووووووووووووووووره)

والله انا لما شفت الحاجات دى في التليفزيون حنيت جدا لمصر واد ايه وحشتنى وكان نفسي اكون في وسط عائلتى الكريم واهلى وناسي وجرانى واصحابي بس الحمد لله ع كل شئ وهانت وان شاء الله هاعيد معاهم فى العيد الكبير ويامسهل وبجد رمضان في مصر حاجه تانيه بس مننساش ان هنا الوقت كبير والتفرغ ممكن يكون فى العبادات ودى بصراحه حاجه ممتازه جدا وربنا يقدرنا يارب على صيام الشهر الكريم ويغفرلنا كل زلاتنا ان شاء الله

وكفايه كده يا اخ تامر لحسن هنحقد عليك وانت هناك ههههههههههههههههه

[pocy]

اخى فى الله ميزووووووووووووووووووو

والله انا لقيت فانوس امبارح وقلت الله جميل انا هجري واجيبه لقيته ب7دينار رحت قلت على طول عنى ماجبته يعنى هو لازم الفانوس ههههههههههههههههههههههه

والحمد لله ان جالنا فانوس هديه من مصر هههههههههههههههههههههههه

[قلب ابيض]

وحشتوني

[تامر مصطفى]

وحشتوني

ولما احنا وحشناكي مش بتسألي علينا ليه؟؟

على رأي المثل :

مين راح الساحل الشمالي باصحابه لن يبالي .... وعجبي

وبعدين انا سبت لك قيادة شومبونجو وانتي بعتيها بالرخيص

بس اتطمني انتي سايبة وراكي صبي شاطر ... مش انا طبعا

بس ارجعي للدولة وهتلاقيه بيدافع عنك باستماته

وعموما انتي كمان وحشتينا ووحشنا تواجدك الجميل بينا

والكويت تجمعنا

وعل رأي المثل القديم :

الكويتي انفع :sad:

تم تعديل 25 أغسطس 2009 بواسطة تامر مصطفى

[pocy]

لا لا لا انا زعلانه منك جدا دا حتى مش عيتى علينا ولا سألتى علينا لا لالالا انا زعلانه قوى

على العموم انتى وحشانا اكتر يا قمر ومنتظرينك فى الكويت

[قلب ابيض]

لا لا لا انا زعلانه منك جدا دا حتى مش عيتى علينا ولا سألتى علينا لا لالالا انا زعلانه قوى

على العموم انتى وحشانا اكتر يا قمر ومنتظرينك فى الكويت

يا جزوووووووووووووفى منكم يا ام عمرو

ارجو التماس العذر وجل من لا يسهو00

انت عندك عمووورك وواخد كل وقتك تمام؟؟ انا عندى 5 عمووورى ابقى عامله ازاااااى؟؟

كل سنه وكل حبايبى بخير وسعاده وراحه بال

وصدقونى رمضان بالكويت احسسسسسسسسسسسسن بكتير

لما اجى احكى لكم احسن

هااا ما قررتوش هانتقابل امتى وفين؟

[قلب ابيض]

استاذ تامر

لماذا قمت بألغاء خاصيه استقبال الرسائل؟؟؟

اكيد مش عارف ازاى ؟

كنت اود المشوره على الخاص فى امر يتعلق بوزاره التربيه 00وشكلى هاطلبها على العام بقى

========================

الموضوع: لى صديقه تعاقدت مع مستشفى المواساه للعام القادم 00ابنها حاصل على اولى ثانوى

السؤال : الثانويه العامه بالكويت صارت 3 سنوات والمعدل تراكمى -وضعه هنا ايه ؟؟ هايدخل من اولى ثانوى ؟

ولا يعملوا له معادله ويكمل تانيه وتالته ؟

نرجو سرعه الرد بالافاده

وصلح لوحه التحكم تبعك

تم تعديل 25 أغسطس 2009 بواسطة قلب ابيض

[pocy]

هلاهلا ام نور كيفيك يا قمر وحشانا وحشانا والله فعلا نفسنا نلتقي بالناس الحلوه اللى هنا حتى الاخوه اللى فى السعوديه اتمنى يشاركونا اللقاء ولو بكام ساعه من وقتهم وانا بشوف ناس كتير من السعوديه ومن الرياض بالتحديد بيجوا ويزورونا

انتى بس يا قمر تعالى الكويت واحنا تحت أمرك بس انتى تعالى وقولى امتى وفين وكل واحد يجيب ورده حمرا معاه علشان نعرفه ههههههههههههه بس اوعوا تعملوا زى انا اصلي مش هجبها علشان انا اعرفكم الاول ههههههههههههههههه والا فى الاخر مش هنعرف بعض نهائي ههههههههههههه وتبقي حوسه

منتظرينك يا قمر بشوق كبير وبفارغ الصبر

الاستاذ العظيم الاخ طمورره والشهير بالاستاذ تامر مصطفى فينك بقالك فتره مش ظهرت والله لما بغيب عنكم كام ساعه بتوحشونا

الاخ هيروووووووووووووو لا بجد انا زعلانه منك زعل كبير قوى ياريت تفوت وتسلم علينا نفسنا نسمع عنك سمع خير يارب ان شاء الله

[تامر مصطفى]

الاجازة خلصت بسرعة

شهرين كأنهم 4 ايام

خلاص باقي اسبوع وارجع الكويت تاني ( ادعو لي ربنا يسهلها في نويبع ومنقعدش على الرصيف اكتر من 12 ساعة بس )

راجع تاني لطلابي ( مزعل - هزاع - فدعوس - عزوز - حمني "عبد الرحمن يعني" - ناشي - .........الخ) يا حبايبي وحشتوني ( كداب كبير )

راجع للتحضير ونماذج الدروس ولفت النظر ومشوار المنطقة التعليمية والوزارة واولياء الامور .

بمناسبة اولياء الأمور :

مرة سنه 1997 كنا بنكتب الشهادات بخط اليد (بدون كمبيوتر يعني) وكان عندنا مدير مش بيرحم اي حد يغلط وبيبهدله لفت نظر وتحويل للشؤون القانونية

المهم كل اتنين كتبوا شهادات فصل وبقوا مسؤولين عن توزيعها

انا كنت قاعد بوزع شهادات اخر السنة وجالي ولي أمر وطلب شهادة ابنه قعدت اقلب في الشهادات ملهاش اثر وحصل النقاش التالي :

انا : الظاهر ان ابنك جه اخد شهادته

هو: الولد نايم في البيت

انا: يمكن والدته

هو: والدته ما تطلع من البيت

هو يزأر : انتوا ضيعتوا شهادة الولد وانا بعلمكم شغلكم انا بروح اشتكي في الوزارة

مدرس آخر حب ينقذني من الموقف وياخد الراجل على جنب قبل ما يسمعه المدير ويبهدلني ودخل بيه على غرفة الكنترول علشان يكتب له شهادة بدل اللي ضاعت

دقيقتين وطلع المدرس يضحك والراجل ماشي وراه زي التلميذ الخيبان والمدرس قالي ده الاخ فاقد الذاكرة وابنه كان هنا من سنتين وراح الثانوي وهو لسه متخيل انه في متوسط وجاي يتخانق كمان

ربنا يتوب علينا من المهنة دي

دعواتكم

[herohero]

الاجازة خلصت بسرعة

شهرين كأنهم 4 ايام

خلاص باقي اسبوع وارجع الكويت تاني ( ادعو لي ربنا يسهلها في نويبع ومنقعدش على الرصيف اكتر من 12 ساعة بس )

راجع تاني لطلابي ( مزعل - هزاع - فدعوس - عزوز - حمني "عبد الرحمن يعني" - ناشي - .........الخ) يا حبايبي وحشتوني ( كداب كبير )

راجع للتحضير ونماذج الدروس ولفت النظر ومشوار المنطقة التعليمية والوزارة واولياء الامور .

بمناسبة اولياء الأمور :

مرة سنه 1997 كنا بنكتب الشهادات بخط اليد (بدون كمبيوتر يعني) وكان عندنا مدير مش بيرحم اي حد يغلط وبيبهدله لفت نظر وتحويل للشؤون القانونية

المهم كل اتنين كتبوا شهادات فصل وبقوا مسؤولين عن توزيعها

انا كنت قاعد بوزع شهادات اخر السنة وجالي ولي أمر وطلب شهادة ابنه قعدت اقلب في الشهادات ملهاش اثر وحصل النقاش التالي :

انا : الظاهر ان ابنك جه اخد شهادته

هو: الولد نايم في البيت

انا: يمكن والدته

هو: والدته ما تطلع من البيت

هو يزأر : انتوا ضيعتوا شهادة الولد وانا بعلمكم شغلكم انا بروح اشتكي في الوزارة

مدرس آخر حب ينقذني من الموقف وياخد الراجل على جنب قبل ما يسمعه المدير ويبهدلني ودخل بيه على غرفة الكنترول علشان يكتب له شهادة بدل اللي ضاعت

دقيقتين وطلع المدرس يضحك والراجل ماشي وراه زي التلميذ الخيبان والمدرس قالي ده الاخ فاقد الذاكرة وابنه كان هنا من سنتين وراح الثانوي وهو لسه متخيل انه في متوسط وجاي يتخانق كمان :)

ربنا يتوب علينا من المهنة دي

دعواتكم

كل عام وانت بخير يا استاذ تامر والاخت بوسي ام عمورة كل عام وهي بخير ورمضان كريم ، انا افتقدت المحاورات الفترة اللي فاتت ده لان للاسف كان عندي مشكلة ف الانترنت وفي الشغل كنت مشغول فمكنتش بابقى موجود ف المكتب

الاستاذ تامر فكرتني باللي كان بيقوله والدي دايما كنا لما الاجازة تقرب تخلص كنا احنا كلنا عادي راجعين لصحابنا وحياتنا الطبيعيه لاننا كنا بنبقى حياتنا ف مصر ماهي اكثر من حضور مناسبات وخروج وفسح يعني مكنتش حياتنا الطبيعية فكنا كلنا بنبقى مبسوطين اننا راجعين الكويت

الا والدي من قبل السفر باسبوع تبدأ أعراض قرب نهاية الاجازة وهي تتمثل ف رغبة ف النوم شديدة حالة من الملل حالة من الزهق لانه راجع زي ما كان بيقول لجبلاية القرود تاني

انا والدي اخر فترة ف الكويت كان مدرس ف العارضية وطبعا نوعية الطلبة اللي هناك مزعجة وانا ف نظري طلبة الكويت مزعجين ، فكان والدي يقول راجعين للاشكال العكرة تاني

العيال مش مهمتك انك تفهمهم العيال مهمتك انك تروضهم ، بصراحة كان الله ف عون اي مدرس ف الكويت او ف الخليج عموما

انا بقعد اقول لنفسي لما هما كبار الواحد بيتعب ف التعامل وعشان يوصل للغه يقدر يتواصل معاهم امال لما كانوا اطفال " طبعا اشك انهم باللي كانوا بيعملوه اطفال" كانوا عاملين ازاي

حتى عقدة والدي من اطفال الكويت وطلبتها استمرت معاه يعني انا فاكر من سنتين حجينا مع بعض وكان هو لسه ف الكويت فمعرفش يوصل لمكان الفندق فكنت ماشي معاه فلقينا عيال صغيرين طبعا فكره بحبايبه براعم الايمان اللي ف الكويت لما سالتهم وواحد منهم مشي معانا لحد ماوصلنا والدي بقى مستغرب جدا قالي لو كنا ف الكويت مكنش يعملوا كده ابدا لان فاكر كم العداء اللي بيكنه الطلبة للمدرسين ف الكويت

انا فاكر كان الطلبة الكوايته معايا بيعملوا ايه من تكسير لزجاج السيارة ، لسرقة نمر السيارة ، لبنشرة كفرات السيارة ، يعني خفة دمهم التقليدية

فكلام حضرتك يا استاذ تامر فكرني بهذه الذكريات ، كل عام وانت بخير وربنا يقويك ويقوي كل الاخوة المدرسين على هؤلاء الطلبة امثال حمني و علاوي و عبودي

[قلب ابيض]

طموووووره 00" خليك فاكر انى انا لى السبق فى النيكنيم ده"000توصل بألف سلامه وعلى ماتخلص رحله البر تبعك اكون انا وصلت ان شاء الله

وبجد ضحكتنى مووووت على ولى الامر ده 00وعلى فكره انا قضيت بالتربيه حوالى 5سنوات بمدارس المقرارات ولى فيها صولات وجولات لسنا بصددها الان00

هيرووو ولادى قاعدين متابعنى زى المراقب بتاع لجنه الاختبار 00لهم تعقيب وانا ايضا: انت اخدت ثانويه عامه من الكويت ؟ سنه كام؟

فاكرين حادثه مدرس الكيميا بتاع الاصمعى؟؟؟اللهم انى صايمه00نكمل بعد الفطار

[Om Noor]

كل عام وانتم الى الله اقرب .... ورمضان مبارك عليكم ان شاء الله وبما اننا فى الكويت يبقى عساكم من عوادة

ياترى فاكرينى انا ام دعاء ....

ازيك يااام عمر ويا ام نور اخبار نور ايه انا نور بتاعتى زى الفل .....

طمنونى يا جماعة اخباركو ايه

وياريت اللى يلاقى فانوس يقول

سلام بقى

[herohero]

طموووووره 00" خليك فاكر انى انا لى السبق فى النيكنيم ده"000توصل بألف سلامه وعلى ماتخلص رحله البر تبعك اكون انا وصلت ان شاء الله

وبجد ضحكتنى مووووت على ولى الامر ده 00وعلى فكره انا قضيت بالتربيه حوالى 5سنوات بمدارس المقرارات ولى فيها صولات وجولات لسنا بصددها الان00

هيرووو ولادى قاعدين متابعنى زى المراقب بتاع لجنه الاختبار 00لهم تعقيب وانا ايضا: انت اخدت ثانويه عامه من الكويت ؟ سنه كام؟

فاكرين حادثه مدرس الكيميا بتاع الاصمعى؟؟؟اللهم انى صايمه00نكمل بعد الفطار

انا اخدت ثانوية عامة سنة 1995 كنت ف مدرسة انس بن مالك وقبلها كنت في ثانوية الفروانية افتكر بس هي اتنقلت للرابية وهنا كانت الكارثة هناك بقى شوفت الطلبة الكوايته ع حق لان كل اللي كانوا معايا ف الوقت ده من اولاد النون وعيلة الدويلة الرابية ده كارثة الطلبة اللي هناك فظاع فكملت فيها التيرم ونقلت ع انس بن مالك باقصى سرعة

انا فاكر يوم ماكنت نازل مصر كنت نازل من الطياره وكانت لسه حاصلة حادثة الرئيس ف اديس ابابا يعني كان وشي حلو عليه

بس بصراحة كانت ايام عسل كانت كلها شقاوة انما طبعا شقاوة مصر لها طعم تاني لان لما جه الغزو خطفت لي سنة ف مصر برده ساعدتني ع اضافة افكار شقاوة تانيه

كانت ايام جميلة والله

وعن حوادث المدرسين فحدث ولا حرج ربنا يتسرها مع جميع المدرسين لان العيال هناك بجد خطرين

[تامر مصطفى]

على فكرة يا جماعة مهنة التدريس في الكويت من اصعب المهن

يعني مثلا انا شغال في المرحلة المتوسطة ودي مرحلة صعبة بسبب ان الطالب لا هو راجل ولا هو طفل يعني عايزني اعامله معاملة رجالة وفي نفس الوقت بيعمل حركات طفولية والمفروض انك تتحمله علشان لسه صغير . بس السبب الأساسي في فشل التربية هو اولياء الامور والأمثلة كتير :

أم تيجي تسأل عن ابنها ويكون عندها ولدين في المدرسة يقوم المدرس يقولها " عبود ذكي بس شقي شوية " ترد عليه تقوله عبود؟؟؟ لو بتقولي حمود كنت صدقتك انما عبود ده نسمة في البيت !!! وتروح لمدرس حمود تقوله حمود ؟؟؟؟؟؟؟ لو بتقولي عبود كنت صدقتك وطبعا عبود وحمود الاتنين ولاد ...تييييييييت ... (الرقابة) .

المشكلة الاكبر ان في بعض اولياء الأمور اللي بيعلم ابنه كويس جدا ان المدرس الوافد بياخد فلوس علشان يخدمك فبالتالي لما تطلع عين اهله يبقى حلال ومش عيب ابدا

انا بقى بقالي 14 سنه اتعلمت فيهم مقومات العمل المدرسي وسط الطلاب : ( البرود - الرخامة - التكشيرة - والتباسط مع بعض الطلبة " عملا بمبدأ الأيد اللي متعرفش تعضها بوسها bv:- ).

يعني يطلع لي عيل تنح ورزل ويكون عايز يحرق دمي ويضحك الفصل عليا وانا متنرفز زمان كنت بقع في الفخ بس دلوقتي بقلب الموضوع عليه واخليه تريقة في الفصل وينتهي الأمر باختراع لقب يزلوه العيال بيه طول السنة وبكده اكون حولته لفردة جز....تيييييت .... .

مرة مسكوني اشراف جناح وسط وحوش وكان عمري ساعتها 22 سنه واقصر من اقصر عيل فيهم

المهم دخل عليا وحش عملاق بيعيط ويقولي "استاذ.... فلان بيسبني " سألته قالك ايه؟

قالي : يقولي يالمصري!!!!

طبعا انا اتحرق دمي بس لازم اتصرف بلباقة علشان مخسرش الدنيا واتبهدل وفي نفس الوقت ارد كرامتنا

سألته وهو مصري دي شتيمة هنا؟

قلتله متظاهرا بإني هرد له كرامته : ازاي يقولك يا لمصري في المدرسة ؟؟؟؟ خلاص انت متسكتش وروح قوله على الاقل انا مصري اصلي معروف انما انت اصلك ايه ؟؟ ايراني والا هندي والا عراقي؟؟؟؟؟

الواد بص لي باستغراب وخرج مرجعش عندي تاني وحس انه جاب العار لنفسه وحسيت انه فكر في كلامي وافتكر ان اصله ايراني ..

وهكذا الحياة المدرسية مليانه بالبلاوي ولو في شوية مدرسين ومدرسات ممكن نبقى نحكي النوادر اللي بتحصل في المدارس

[قلب ابيض]

كل عام وانتم الى الله اقرب .... ورمضان مبارك عليكم ان شاء الله وبما اننا فى الكويت يبقى عساكم من عوادة

ياترى فاكرينى انا ام دعاء ....

ازيك يااام عمر ويا ام نور اخبار نور ايه انا نور بتاعتى زى الفل .....

طمنونى يا جماعة اخباركو ايه

وياريت اللى يلاقى فانوس يقول

سلام بقى

ام نووور ودعاء كل سنه وانت طيبه وفرحانه بأولادك يارب

طبعا فاكرينك 00وان شاء الله نتواصل على خير

[pocy]

اه والله فكرتنونى بالطلبه بتوعى ايام زمان والاسامى الجميله انا اول ما جيت الكويت فى طاليه اسمها خزنه لما قلت اسمها استغربت جدا وكنت عماله اضحك جواى وانا بنادى الاسامى علشان اتعرف عليهم

المشكله بقي فى الاسم ده جوزه طب نطقه هيبقي ازاى يا ترى اول ما جيت اقرأه قلت جوزه بضم الجيم والبنات طبعا ضحكوا وبعدين بقيت بعطش الجيم علشان الاسم يبقي مختلف ولا كشطحه مش عارفه ازاى جمعوا الحروف دى مع بعض ههههههههههههه ولا طالب كان عندى اسمه شريده وكل ما اجى انطق اسمه يصححه والشمرى يا سلام لما جيت نطقته من غير شده لقتلك واحد قام وكانى شتمته ههههههههههههه وقالى الشمري الشمري قلتله طيب طيب مش تزعل نفسك وكأنى غلطت فى البخارى سبحان الله

دا غير في واحد عراقي واعترف انه عراقي وكان المجموعه معظمها مدرسين مصريين كنت بديهم دروس اي سي دى ال المهم وكان ساب الطالب ده المدرسه وهو في تالت متوسط وتخيل حقده وكلامه اللازع للمدرسين ويقولهم سيبونا نفهم بقي مش كفايه طلعت بسببكوا ونهبكوا فلوسنا ولانه ولد فظيع ولسانه لازع جدا كان الكل بيطنش وانا طبعا اساسا بسيبه يتكلم معاهم هم احسن بدل ما يكلمنى انا بس بمجرد ما بدأ الكلاس وحياتكم عندى كنت بظبته فى مكانه ومش ينطق وفى مره طرده وقلتله لما تحترم نفسك والمكان اللى انت قاعد فيه يبقي ساعتها تحضر وكان موال صاحب المعهد والمدير وكل الناس كانوا موجودين وحاولوا يحلوا ولما لقوه واد قليل الادب ومش همه حد قالوله خد ورقك وحاجته وفلوس باقي الكورسات اللى انت اخدتها ومش عايزينك هنا

وسبحان الله بعد ده كله كان بيجي يقعد فى الاستراحه بتاعه المعهد وطبعا محدش كان بيكلامه لانه غلاط وصوته عالى بس بجد كان شخص مستفز جدا

فكرتونى ليه بالذي مضي مانا بقالى سنه مستكنيسه فى البيت ونسيت الحاجات دى

بس مجاميع البنات كانت احلى مجاميع بصراحه

[pocy]

أم نورررررررررررررررررر كيفيك يا قمر وانتى طيبه وبخير اخبارك ايه واخبار نور ودعاء ايه ربنا يباركلك فيهم اخيرا رجعتلنا ياقمر

يالا منتظرين جديدك ان شاء الله