المصريين المغتربين بالكويت

[تامر مصطفى]

عدنا والعود احمد

رجعنا للكويت تاني

احتمال الدراسة تتأجل اكتر من كده كمان لان عدد الحالات اللي ظهرت في المدارس الأجنبية وصل لعدد كبير واولياء الامور مصممين انهم ميودوش ابنائهم المدارس

والكلام عن استعداد المدارس كلام فاضي وكله كذب المدارس فيها عيادات بس من غير هيئة تمريض وكانوا بيقولوا انهم هيعقموا الممرات والطاولات 3 مرات في اليوم طبعا ده كذب لان عدد العمال في كل مدرسة غير كافي لكنس المدرسة مرة كل 3 ايام .....

[pocy]

هلاهلا هلا اخوانى واحبائي

كل عام وانتم بالف خير واتمنى تدعولى معاكم فى الايام المباركه ربنا يتقبل منا ومنكم ان شاء الله

وفعلا كلامكم انا سمعته ان الدراسه هتتاجل واللى قريته في احدى الجرائد كان كالاتى يوم 27/9 هتبدأ ان شاء الله المدارس الثانويه ثم وفى 4/10 المرحله المتوسطه والصف الرابع والخامس ابتدائي اما الروضه وباقي الابتدائي هيكون فى 18/11 إن شاء الله

وقدقرأت ايضا كما قالت الاخت ساره انهم قد قدموا بعض الاقتراحاات فى انهم ثم يلغوا السبت كأجازه وايضا أجازه نصف العام والله اعلم وربنا يستر علينا وعلى اولادنا يارب قولوا امين

هلاهلا هلاهلا والله وحشتونى وحشتونى كتير كتير كل ما اجي ادخل الاقي المحاورات فيها مشكله المهم انى التقيت بيكم اخيرا

[pocy]

ام نور اخبارك ايه وصلتى ولا لسه يا قمر واخبارك ايه فى رمضان

هلا بالاستاذ تامر وعودا أحمد (اللى هو جوزى يعنى هههههههههههههههه)

كيف البنوتين االعسويل صايمين ولا لا

[pocy]

الاخت ساره مأكد هنا في شغل ليه بس مش هيكون زى مصر وربنا يوفقه

[قلب ابيض]

حمدلله على سلامتك يا استاذ تامر

بسبس انا حتى الان بمصر وان شاء الرحمن سأكون بالكويت اول يوم العيد

لاسباب خاصه سافر زوجى لزياره عاجله للكويت لمده 3 ايام وعرفت منه السابق بس يا بسبس الابتدائى 18 نوفمبر ولا اكتوبر؟؟

على فكره المدارس فى مصر كمان اتأجلت اسبوع لحين اشعار اخر

الله المستعان

[تامر مصطفى]

الابتدائي 4 اكتوبر

بس اقتراح الغاء اجازة نص السنة والغاء السبت ده في حالة ما يتم تأجيل الدراسة لمدة فصل دراسي كامل يعني العام الدراسي يبدأ في 10 يناير 2010

وكان في اقتراح انهم يقسموا المدرسة نصفين صباحي ومسائي ( يعني ممكن المدرسين يا خدوا راتبين ؟؟ :blink: :rolleyes: )

اعوذ بالله من الحسد

من الواضح انها هتبقى سنه بالألوان الغامقة كلها ........ ربنا يستر

[قلب ابيض]

الصف الخامس والسادس والمتوسط يوم 4اكتوبر

الاول والتاني والتالت يوم 18

المهم نفتح الشباك ولانقفل الشباك_نيجي ولا نأجل الحجز

[pocy]

هلاهلاهلاهلا

ايوه كده نورونا وخلونا نشوفكم اخباركم ايه وحشتونى موت والله

مش عارفه والله يام نور تيجي ولا لا بس هو التاجيل لازال مستمرا وربنا يستر ان شاء الله

الاخ العزيز على قلوبنا جميعا اخباره ايه واخبار الطريق كان ايه معاك والله دعيتلك ان ربنا ييسرلك الطريق ان شاء الله وعودا احمد ان شاء الله

[تامر مصطفى]

هلاهلاهلاهلا

ايوه كده نورونا وخلونا نشوفكم اخباركم ايه وحشتونى موت والله

مش عارفه والله يام نور تيجي ولا لا بس هو التاجيل لازال مستمرا وربنا يستر ان شاء الله

الاخ العزيز على قلوبنا جميعا اخباره ايه واخبار الطريق كان ايه معاك والله دعيتلك ان ربنا ييسرلك الطريق ان شاء الله وعودا احمد ان شاء الله

اهلا اهلا ببسبوسة المنتدى

تسلمي يارب على دعواتك الجميلة

بالنسبة لطريق العودة كان كله كويس الا الاردن تخيلي العبارة وصلت الاردن الساعة 10 مساء وخلصنا المنفذ الساعة 5 صباحا !!!!!

وكل ده بسبب ان الموظفين هناك على قولة اخواننا الكوايتة ( مالهم خلق )

تخيلي الموضوع كله شباك واحد بس ونقف عليه 4 ساعات والموظف كل شوية يقوم بحجة انه مش عارف يشتغل بسبب الازعاج اللي عاملينه الناس

وبعدها بشوية قام علشان يتسحر ورجع خلص معاملتين وقام علشان يصلي الفجر تخيلي من شدة الايمان يصلي الفجر في ساعة كاملة!!!

لغاية ما صعبنا على موظف تاني وجه قعد مكانه وخلص كل الناس المتكدسة في تلت ساعة بس!!

وطبعا احنا ارحم واسهل بكتييييييير من اللي داخل يشتغل في الاردن - ده بيعاملوه كأنه حشرة جايبة معاها طاعون وداخلة عليهم

معلش بقى احنا اتكتب علينا نتبهدل في كل مكان

انا اول ما وصلت الكويت فتحت المنتدى بس لقيت مشاركات كتير ضايعة وقلقت انه يكون اتقفل ونتقطع من التواصل لكن الله سلم

طمنينا عنك وعن عمور وعن زوجك

[HDarwish]

حمدا لله بالسلامة .. أستاذ / تامر

عندك حق أنا بشوف معاملة المصريين في الأردن معاملة سيئة جدا جدا .. وده يمكن يرجع لإن معظم المصريين اللي في الأردن من المهنيين وعمال فقط علشان كده تلاقي معاملتهم للمصرين معاملة غير جيدة .. والحمد لله إنك رجعت بالسلامة .. أنا سامع إن العبارات اتجددت وبئا فيه أكثر من واحدة بس مش كلهم زي بعض وإنت وحظك ممكن تيجي في واحدة كويسة أو واحدة أي كلام .. إيه رأيك أحسن طريق سفاجا ولا نويبع .. أنا يادوب سافرت بري مرتين لكن صراحة توبة .. الطيران مهما كان أنظف وأريح .. بدل بهدلة الطريق وبهدلة المنافذ سواء في الأردن أو أول ما توصل مصر .. يا راجل ده أنا كنت قربت أكره أي حد يقولي حمدا لله على السلامة .. ده غير إن يومين كاملين وبتدخل في الثالث ودول أنا أولى بهم وهي الأجازة فيها كام يوم علشان أضيع أسبوع في السفر رايح جاي ..

على فكرة أنا كنت داخل أقول حمدا لله بالسلامة وبس .. لكن الكلام خادني ..

[pocy]

اهلا اهلا بالاستاذ حسن درويش فينك وفين ايامك وكلامك

لالالا رمضان اخدك مننا على الاخر ربنا يتقبل منك ان شاء الله

اخي العزيز والقريب الي قلب الملايين من منتدانا الفاضل اتمنى ان تكون انت والاسره الكريمه بخير حال بعد الرحله الشاقه اللى قلت عليها دى انا مجربتش بري واعتقد انى مش هجرب بري بعد اللى سمعته وربنا ييسر لينا فى حجز الطيران اليومين دول ان شاء الله نفسي اخد العيد الاضحي في مصر ان شاء الله ونحضر دبح الاضحيه زى زمان اللهم امين وندعي ويكون دعانا مستجاب

الا تعالوا هنا وقلولى محدش اتكلم على انفلوزا الخنازير خالص دا بيقلك ان الكويت بقت الاولى فى العالم من ناحيه الاصابه فى المرض انا لسه سامعه النهارده من اختى ان مدرسه المبشر ولا ابوبشر هنا فى الجهرا مش متذكره الاسم بالضبط هيغلوقها لان فيها مدرستين عندهم المرض ده دا غير دكتورين فى مستشفي الجهرا اتعدوا وعاملين لهم حجر صحى ودا غير روضه ظهرت فيها الحاله واغلقت ودا غير بيتين فى الواحه هنا جنبنا فى الجهرا معزولين تماما لان معظمهم اصيبوا بالمرض

والادهى من كده انى سمعت ان ظهر جيل تالت للمرض في استراليا ان المصل الجديد لم يفلح معه وربنا يستر انتوا سمعتوا برضه الكلام ده

دا غير انى قريت فى جريده الوطن ان وصل مجموع الحالات المصابه للمرض حوالى 2125 وده طبعا رقم يخض وان عدد المتوفين منه خمسه والله اعلم وربنا يسترها علينا وعليكم

و الكوايته هنا والله اعلم برضه بيقولوا افتحوا المدارس براحتكم بس شوفوا بقي مين هيودوا عياله عنهم ماتعلموا بس يكونوا بصحتهم والله ربنا يسترها علينا ويقينا من المرض يارب

تم تعديل 13 سبتمبر 2009 بواسطة pocy

[pocy]

أم نور شكلك هتأجلى السفر بس انا مش متاكده من الكلام ده كله كلام الناس وكلام الجرايد بس مفيش حاجه مأكده

الا صحيح استاذ تامر سمعت ان اى مدرس هيسافر في الفتره اللى مفيش فيها طلبه كأنه بيكتب لنفسه خروج نهائي لانهم بيقولوا البلد فى حاله طوارئ وممكن نبدأ الدراسه فى اى وقت وهنحتاججك فالسفر في الفتره دى كأنه تفنيش هل ده صحيح ولا كلام ولد عم حديت

دا غير انى سمعت ان فى البحرين وعمان قفلوا المدارس وهيبدأوا فى الترم التانى وليس ف الاول ولو لسه الحاله زى ما هى هيلغوا السنه الدراسيه دى نهائي وربنا يسترها علينا وعليهم وع الامه الاسلاميه يارب اللهم امين

[pocy]

تصدقوا بالله(قولوا لا اله الا الله ) ليكم وحشه كبيره من زمان الواحد مش كلمكم

واتمنى فعلا من كل قلبي انكم تكون بخير حال يارب وسلام مؤقت للجميع

[تامر مصطفى]

ازيك يا بسبوسة

بالنسبة لسفر المدرسين في الفترة الحالية فهيكون بأجازة خاصة يعني حق للمدرس

وبعدين نفس الكلام ده سسمعناه في سنة 2003 وقت ضرب العراق وقالوا اللي هيخرج من البلد مش هيرجع تاني وادي كل اللي خرجوا موجودين في البلد لغاية النهاردة .

أما آخر إشاعة قوية جدا سمعتها من داخل مبنى وزارة التربية هي انه ممكن تتأجل الدراسة لغاية شهر مارس اللي جاي والمدرسين هياخدوا اجازة والسنة تبقى متصلة من شهر مارس لغاية نهاية السنة اللي جاية .

يا سلام لو الاشاعة دي اتنفذت هتبقى اجازة 5 شهور غير الشهرين اللي فاتوا .

[pocy]

على رأيك هتبقي أشاعه ممتازه الحق اقول لاختى وتزيعها علشان يمكن ينفذوها ولا حاجه وبدل ما يكون اقتراح يبقي واقع ههههههههههه وتنزل معاى مصر ونتفسح سوا هناك دى هتبقي احلى اجازه

[pocy]

اخبار الكويت معاك ايه فى رمضان ولا مصر فارقه كتير؟؟؟؟؟؟؟؟؟؟؟

[pocy]

انا نفسي انزل النهارده قبل بكره بس نفسي احضر العيد الاضحي هناك وأجازه جوزى شهر واحد ومش عارفه هنأخر السفر ونحضر العيد ولا نبدر السفر ونحضر العيد هنا وربنا يخيرنا بالافضل ان شاء الله

[pocy]

استنى أضحكك اختى جت النهارده صحتنى من النوم الساعه 12 وضحكتنى

هى كان بقالها سنتين ماسكه مكان رئيسه القسم لان مفيش عندهم رئيسه قسم كويتيه بس هى كانت بتقوم باعمالها اليوم جالها رئيه قسم كويتيه فرحت جدا وبعدين بدأت فرحتها تذبل

[pocy]

ياترى كان ايه السبب

[تامر مصطفى]

استاذ حسن درويش وحشتنا يا راجل

الف الف شكر ليك على ذوقك

بالنسبة لسؤالك عن السفر البري فمن وجهة نظري ان طريق العقبة نويبع افضل لعدة اسباب :

اولا البحر في منطقة خليج العقبة هادئ ولا يوجد به تيارات مائية

ثانيا ارخص من حيث التكلفة المادية بمراحل يعني عبارات ضبا سفاجا او ضبا الغردقة تفرق تقريبا 200 دينار كويتي ليا انا واسرتي وسيارتي

وبالنسبة للعبارات الجديدة فده في ضبا سفاجا اما نويبع مفيش تغيير هما العبارتين واللنشين العبارة بتاخد المسافة في 3 ساعات واللنش السريع في 45 دقيقة

اذكر في سنة 2003 سافرت عن طريق ضبا الغردقة وركبت عبارة سريعة وكانت عاملة زي اللعبة على وش الميه بتتشال وتترمي والناس كلها قعدت تتشاهد على نفسها ده غير دوار البحر والنتائج المقرفة اللي بتنتج عنه .

وطبعا بعد غرق العبارة السلام 98 بقت المنطقة دي بالنسبة ليا منطقة رعب .

استحمل الموظفين الاردنيين ولا اني انزل اعوم في عمق 1300 متر

بس الرحلة كلها جميلة وممتعه من الكويت لغاية الاردن وبعدها تنتهي كل المتع وطبعا دخول مصر ده قصة لوحدها عايز منتدى ليا لوحدي علشان احكي عنه وفي العودة اول ما تدخل حدود السعودية الرحلة ترجع جميلة تاني .