المصريين المغتربين بالكويت

[Folana]

السلام عليكم ورحمة الله....

ماذا أقول بعد كل ماقيل...

أظن من الافضل ان يتوقف الكلام حول الموضوع المغلق عند هذا الحد...لاننا جميعا أدلينا بدلونا وقلنا الحقيقة مجردة ...بعيدا عن الاحاسيس الخاصة والتنبؤات...

وبالفعل كلنا نجتمع على هدف واحد هو تقديم يد المساعدة للاخر....بدون تصنيفات او مراكز....لاننا جميعا نحمل صفة انسان التى يجب ان تنزهنا عن أن نفكر فى تصنيف البشر او تنوعيهم......فالجميع يتسم بالاخلاق الحميدة والصفات الجميلة والوضوح فى الكلام والتى تجعلنى اتشرف بالتعامل معكم جميعا

وصدقونى يا جماعة...المشرف مش بس ببدلته...المشرف بعطائه وهمته... :rolleyes:

وده ينطبق على الاعضاء جميعا فالجميع يحمل فى داخلة صفة المشرف طالما قادر على العطاء والحرص على الارتقاء بالمكان ومراعاة مشاعر الغير وحقوقه الانسانية على الاخر ....

الاخ الفاضل النسر المصرى....قمت بالرد على سطرك الاخير على الخاص.....

تحياتى واحترامى ومودتى للجميع....

نقطة.

[HDarwish]

الفاضلة فولانة .. العزيز تهامي .. الفاضل النسر المصري ...

حصل خير

وللتوضيح أيضاً .. أنا لم أكن أقصد بكلامي هذا أن أسيء لإدارة الموقع ومشرفينه .. بل بالعكس يعلم الله أنني أكن لكم كل الحب والاحترام والتقدير ..

وبالفعل قد تم إيضاح السبب في غلق الموضوع وقد تفهمته جيداً

كل التحية والتقدير والاحترام

[الحاج فوزى]

الحقيقة ترددت فى أن أضع تعليقا ً ..

ففى المعتاد ينبغى ترك سوء الفهم ليزول من نفسه بدلا ً من تكرار توضيحه ..

لكن للإشارة لشخصى فى أكثر من مداخلة أجدنى ولا مفر من وضع بضع كلمات ..

فى البدء أشكر كل الأفاضل والفضليات الذين واللواتى تفضلوا وتفضلن بترك بعض الكلمات الطيبة فى حقى ..

ثانيا ً ، هناك نقطة قد تغيب عن البعض ، ألا وهى أنه جرى العرف فى عالم المنتديات أنه من يتولى أى مهام إدارية فى أحدهم ، لا يولى فى الأخر .. لأنه بالطبع .. " صاحب بالين كذاب "

وأنا والفاضل النسر المصري ، بالفعل نحمل مسميات إدارية فى أماكن أخرى .. ،

وأنا واثق أنها فقط الحماسة وحب المكان الأم .. هى التى دفعت العزيز النسر للتفاعل بهذا الشكل ..

فكما أسلفت ، المحاورات هى الأم التى تضع لنا كل فترة وليدا ً جديد .. ، وهى التى يدين لها الجميع بالفضل فى التعرف على هذا العالم الواسع .. وأفضال أخرى ، أخشى إن بدأت فى سردها أن أتهم بمغازلة المكان أو الطعن فى أماكن أخرى !

النقطة الثانية .. يشهد الله أنه لا خلاف بينى وبين أى فرد فى إدارة هذا المكان الحالية .. ، ربما إحقاقا ً للحق ، كان هناك خلاف بينى وبين أحد المشرفين المقالين ، هذا الخلاف الذى أدى لإنقطاعى ، وأخرين ، لفترة عن المحاورات .

وربما لم يكن بينى وبينه فقط ، بل بينه وبين النسر أيضا ً ،، لكنه فى نهاية المطاف .. "راح لحاله " سواء هو .. أو الخلاف .

لكن بكل صدق .. المجموعة الحالية من أفضل ما يكون .. وتتمتع بقدر كبير من المرونة مقارنة ً بالفترات السابقة .. وبالفعل نلمس تطورا ً ملحوظا ً فى كيفية تعاملها مع المعطيات اليومية .. وحتى المواقف الحرجة منها ..

وبالفعل نقدر لها كم وكيف تعبها ، منتهزا ً الفرصة لأكتب شاكرا ً لها الحفاظ على المكان كما عهدته ، واضحا ً خطوطه ومعالمه ، وهو مجهود أعلم علم اليقين أنه ليس بسهل ..

وعن نفسى وعن قناعة شخصية ، لا أعتقد أبدا ً بصحة ما ورد من بعض التكهنات ..

وإن كان إعتقادى فى الأحوال العادية يصل لما يزيد عن 90 % .. ، فعندما يكون صاحب المداخلة والتفسير لسبب الغلق هو الأستاذ عادل أبو زيد .. فإن إيماني بصدق ذلك يتجاوز المئتين فوق المئة .

أود أن أضيف أكثر ، لكن لأكن مداخلا ً خفيفا ً عليكم .. ، راجيا ً الله عز وجل أن يزيد مسائكم سعادة ، وصباحكم بهجة .

أعتذر مقدما ً إن كان بمداخلتى ما يسوء أى طرف . .

تم تعديل 2 أكتوبر 2009 بواسطة الحاج فوزى

[pocy]

وحشتونى اليومين دول حاسه انى بقالى فتره طويله مش دخلت اخباركم اه يا اخوانى واخواتى

أم نور كيفيك يا قمر اتمنى تكون مشكله الرسايل الخاصه تتحل قريب علشان اتعرف عليكى واكلمك

لا لالالالا مين منور المنتدى استاذه فولانه والحاج فوزى والنسر المصري وانا اقول برضه ايه النور ده كله طيب تتكلموا وانا مش موجوده كان نفسي ابقي موجوده وانت بتكتبوا الردود وارد فى ساعتها

منورنا واتمنى نشوفكم معانا دايما

[تامر مصطفى]

فتحت المدارس ابوابها حيث استقبلت طلاب المرحلة الثانوية اولا ثم اليوم الاحد 4/10 الصفوف الرابع والخامس الابتدائي والمرحلة المتوسطة

خلال الاسبوع الماضي ظهرت حالات لانفلوانزا الخنازير في المدراس وحدث تعتيم اعلامي وضغوط كبيرة لعدم النشر

في المنطقة التي اعمل بها:

- مدرسة ثانوية للبنين ظهر بها 4 حالات خلال الاسبوع الماضي ( الاسبوع الأول ) وتم نقلهم بواسطة سيارات الاسعاف وسط تكتم شديد.

- المدرسة التي اعمل بها اشتبهنا في 3 حالات في اليوم الاول للدراسة بالمرحلة المتوسطة.

وما خفي كان اعظم

المشكلة ان الواحد محتار !! اودي بنتي ذات السبع سنوات المدرسة والا لأ؟؟؟؟؟!!!!!!!!!

في حالة الانقطاع سيتم اتخاذ الاجراءات حسب لائحة الغياب وتفصل بعد غياب 14 يوم ( خصوصا انها وافدة )

وفي نفس الوقت نزولها للمدرسة يشكل قلق كبير للأسرة

الواحد محتار والله وربنا يستر

[pocy]

أولا صباح الفل على احلى مصريين

ثانيا والله يا أخى الفاضل الاستاذ تامر هنا هيعتبروا دي حالات فرديه عادي مش هيوقفو الدراسة الا لو بقى وباء يعني بتاع 20% علشان كده اعتقد فى تكتيم بس كل اللى اقدر اقوله لك صلي استخاره واستفتى قلبك وان شاء الله هيصير خير وربنا ييسر وميكنش في اى نوع من انواع المشاكل وربنا ييسر اللى فيه الخير ودايما نرمي تكالنا على الله بعد ما ناخد بالاسباب ولا ايه يا شباب

[pocy]

أولا السلام عليكم ورحمه الله وبركاته

ثانيا انا زعلانه جدا من بعض الناس هنا وبدون ذكر اسماء تعرفوا ليه لان كتير بشوفهم يدخلوا ويقرا الكلام وخلاص بدون اضافه اى تعليق ولو حتى بالسلام (دا بيقولوا حتى السلام لله )

انا اصبحت اعمل زيكم لدرجه انى ادخل مبلاقيش ردود وسبحان الله غبت كام يوم ملقتش حاجه اضافت لا جديده ولا قديمه طب ليه هل بعض الناس لديهم المشاغل لدرجه انهم مش قادرين يكتبوا السلام عليكم اخباركم ايه بذمتكم الكلمه دى هتاخد منكم اد ايه ؟؟؟؟؟؟؟؟؟؟؟؟؟؟؟؟؟؟؟؟ وهل الواحد عنده حق انه يزعل ولا لا ؟؟؟؟؟؟؟؟؟؟؟؟

والله بجد زعلانه بجد ومحدش يقلي انتى فاضيه لانى ورايا بيت وزوج وطفل برعايهم وبراعى ربنا فيهم كويس لكن اى وقت الاقيه فاضي بسأل على معظم الاخوه هنا وخصوصا الاخوات الذين يتغيبون لفترات طويله ولا نعرف السبب ودايما بعذر واقول لعل المانع خير

بس عموما انا اسفه جدا اذا اطلت عليكم بالحديث

[قلب ابيض]

انا جيييييييت

وحشتونى وحشتونى وحشتونى

[قلب ابيض]

انا جيييييييت

وحشتونى وحشتونى وحشتونى

طبعا انا دخلت اسلم وابووووس " حريم بس " ولاقيت الموضوع ماشاء الله كبر ورعرع

انا قلت اسلم وبعدين امزمز فى المداخلات واحكى لكم تطوراتى ومفاجاتى

سلام مؤقت wst::

[قلب ابيض]

والمشكله ان في مواليد بنات ودول انا بحب اجيبلهم دهب بس الدهب هنا غالي وخايفه انزل اجيبه من مصر يقولولى استرخصت وجابت من مصر

ايييييييه هو اكل وبحلقه " خايفه يقولوا استرحصت ؟؟؟"

عليكي وعلى المحاميد>>>> حبيب الشعب.

صح لسانك يا استاذ تامر - - - خااااصه فى الاطفال

ووالله والله فى مصر احلى واشيك بكتيييير بس نقول ايه بقى - - لازم بركه الطياره تحل على الهدايا

ربنا يقدرك ويجعله سبيل للود والمحبه وصدقينى والله مش كل الناس تستاهل تقيميهم

[قلب ابيض]

ينفع كده - - - اغيب شويه الاقى المحاورين فى الكويت عاملين القلق ده كله ؟؟؟؟

انا كان بودى اعقب على كل كلمه كتبت فى الموضوع الخاص بفتح باب لمحاورى الكويت بس وجدت ما شاء الله الاخوه اللى قاموا بالررد كفوا ووفوا والحمد لله اننا كلنا على وتيره واحده والهدف من تواجدنا معا واحد اللى بيقدر يفيد بمعلومه اونصيحه بيسارع بها واللى بيكتفى بمرور الكرام مشكور ايضا

المهم اننا كلنا هنا ومع بعض وان فارقت بينا المسافات والبلاد فى النهايه انا شأنى شان اى واحد مننا بشعر بعزوه بينكم صدقونى والله

فرحتى برؤيتكم النهارده " تجاوزا طبعا " غيرت من مودى جدا جدا جدا خاصه ما ألم بى من هموم لاتعد ولا تحصى قبيل مجيىء لكويتنا الحبيبه وحتى انهاء اجراءات نقل المدارس والغاء اقامه الشغاله الهربانه wst:: ولله الحمد عسى ان تكرهوا شىء وهو خير لكم

استاذ حسن

الحاج فوزى

بوسى

تامر

ام نور 2

كووووول الناس - - - وحشتونى مووت

[تامر مصطفى]

اهلاااااااااااااااااااااااا ام تور

نورتي منتداكي ونورتي الكويت

اشتقنا لوجودك بينا

منتظرين نسمع حكاياتك ومشاركاتك الجميلة

بوسي اهلا بيكي ازيك عاملة ايه اخبارك ايه؟

اوعي تكوني حاطاني في قائمة "الوحشين " اللي مش بيسألوا!!!

[قلب ابيض]

اهلاااااااااااااااااااااااا ام تور

نورتي منتداكي ونورتي الكويت

اشتقنا لوجودك بينا

منتظرين نسمع حكاياتك ومشاركاتك الجميلة

ده نورك ونور حبايبى يا استاذ طموووره

انا كمان اشتقت لكم كلكم وعندى امل نتقابل قريب لايف ان شاء الله

بس عاوزه احذرك يا استاذ من التصريحات الواضحه بتاعت مدرستك ده اسمه افشاء لأسرار المدرسه والمنتدى مراقب ومدرستك معروفه 000أيوه خللى بالك من نفسك لحسن ساعتها لا خنازير هاتنفع ولا حتى اسود00

وعلى ذكر الخنازير وانفلونزتها 0000تصدق انى مبسوطه من اللى بيحصل ده00ماتفهمنيش غلط مش مبسوطه من الوباء ده لاسمح الله بسس مبسوطه لانى شايفه العيال فى شنط مدارسهم صابون وفوطه ومعقم

وهاريين ايديهم غسيل والنظافه الله ينور 000000طب من الاول ولا لازم نعطس ونكح الاول ؟؟؟

رب ضاره نافعه

وان شاء الله مايصير الا الخير

بس برده احذرك احنا هنا بالكويت مش فى شومبونجو

[HDarwish]

إوعي تكوني نسيتي القفص .. أكيد نسيتي .. طبعا بهزر عارفك بتخديها جد أو في الحاجات دي

حمدا لله بالسلامة .. وشوفتي أنا أد إيه طلعت وحش في الفترة اللي فاتت؟! وزعلت الناس كلها مني؟! برغم إني لم أقصد الإساءة لأي أحد وأساسا دي مش عادتي ولا بعرف أصلاً إني أسيء لأحد .. ده أنا طيب خالص والله ... :D

[قلب ابيض]

الله الامانه جايه على اسمك

بس انت حدد مكان ووقت تسليم البضاعه يا معلم

" هو مش قفص اوى!!!! تقدر تقول قفيص :D

تم تعديل 7 أكتوبر 2009 بواسطة قلب ابيض

[طبيبة مصرية]

السلام عليكم

تسمحولى انضم لتجمعكم الجميل ده.........

فكرة جميلة اوى اننا نتعرف على بعض المصريين المقيمين بدولة الكويت..........

انا هحاول اقرا كل اللى فاتنى علشان اخد فكرة عن الناس وعن المواضيع المطروحة..........

[pocy]

خبر جديد لنج

وصول الملكه قلب ابيض وتربعها على عرش الملك أمس بعد مفاوضات ضامت عده اشهر بسبب هروب جزء من الشعب منها ولكن الموضوع اتحل والحمد لله هههههههههههههههه

وحشانا يا قمر اخيرا وصلتى عايزه اشوفك كل يوم يا جميل علشان اصطبح على احلى قلب ابيض في الوجود وحمدالله على السلامه مره اخري

[pocy]

طبيبه مصريه طبعا يشرفنا انك تكونى معانا ومرحب بيكى فى بيتك فى الكويت ويالا اقرئي بسرعه وتعالي حكى معانا شويه

أم نور فينك يا قمر ولا البنات مغلبينك الله يعينك يا قمر

أم مروان فينك نفسنا تيجي معانا شويه قلب ابيض رجعت وعايزين نلتف حوليها وتحكيلنا واحنا نتعظ

أخي تامر انت اخر واحد ممكن ازعل منه والله لانك فعلا انسان تستاهل كل التقدير والاحترام وربنا يكرمك بمخيمر عن قريب ان شاء الله ويجي هنا ويقول مين هناك ؟؟؟؟؟؟؟؟؟؟

أخى الفاضل الاخ هيروووووووووو ان شاء الله تيجي بالسلامه وموفق ان شاء الله فى رحلتك

أخى الفاضل الاخ خالد شحاته الف سلامه على الوالده ونتمنى نشوفك فى القريب العاجل

أخى الفاضل ميزوووووووووووووووو والله ليك وحشه كبيره فينك وفين أراضيك نتمنى نشوفك قريب ان شاء الله

الاستاذه فلانه والاستاذ حاج فوزى نتمنى نشوفكم دايما ونتشرف انكم تطلوا علينا كل فتره

[pocy]

ونقول الف الف الف مليون مبرووووووووووووووووووووووووووووووووووك لاخ الفاضل الاستاذ رمضان على زواجه فى المنصوره يوم 26/9 ونتمنى رجوعه هو والعروسه فى القريب العاجل ان شاء الله ونقول الف مبروك مره تانيه

تم تعديل 8 أكتوبر 2009 بواسطة pocy

[HDarwish]

يا ست الكل قفيص .. قفيص .. جبر الخواطر على الله ..

تسلمي يا أم نور .. صاحبة واجب والله ..

أما بالنسبة للمكان والزمان

يبئا يوم الثلاثاء بعد صلاة الجمعة عند ترعة المحمودية ..

تم تعديل 8 أكتوبر 2009 بواسطة HDarwish