المصريين المغتربين بالكويت

[قلب ابيض]

صباح الفل

حبيت اصبح بس واثبت حضور----

ومرحبا بالاستاذ تامر وبوزارة التربيه كلها --وفرصه جميله ان يكون لنا ضلع فىالتربيه

على فكره انا على صله وثيقه بالتربيه يا استاذ تامر --بدايتى فى الكويت كانت عن طريقها من ايام" الربعى " تعرفه اكيد؟؟؟

تم تعديل 14 يونيو 2009 بواسطة قلب ابيض

[الحاج فوزى]

السلام عليكم ورحمة الله وبركاته

وبعد ....

أنا وصلت الكويت من حوالى شهر وحاليا وبدور على شغل ارجو من الاخوة في الكويت مساعدتى في الحصول على عمل مناسب حيث انني خريج كلية تجارة 2006 قسم محاسبةوحاصل على شهادة icdl و خبرة في المحاسبة على برامج الكمبيوتر مثل peachtree وخبرة في الحاسب الآلى.

وياريت لوحد يعرف شركات معينة ممكن اقدم فيها يقولى

أرجو منكم المساعدة وجزاكم الله خير الجزاء

وهذا رقم هاتفي 65662797

أخوكم honda

إحتمال تتوفر وظيفة دعم فنى لنظم ألية خلال الفترة الجاية .

هى وظيفة بتعتمد على المظهر وعلى مهارات الحاسب الألى ، على مشروع مؤقت لمدة 3 أشهر وتجدد .. ( وفى أغلب الأحوال بتجدد للكل ، وتجدد أكيد للمتميزين )

لو مهتم تقدر تبعتلى السى فى .. وأنا أبعتها لحد يعمل معاك إنتر فيو ..

[pocy]

هلا هلا والله باهالى الكويت

[pocy]

معلش انا كتبت هلا هلا من غير ما اعرف نفسي بس انا بقالي تقريبا شهر بحاول اسجل وعايزه ادخل معاكم في المحاورات بس كان التسجيل مغلق معرفش ليه المهم انى بقيت معاكم اخيرا وانا عندى قصص وحكايات احب اشاركم وتشاركونى فيها ومش تقلقوا انا هتلقونى كل يوم موجوده وهبدأ من بكره فى سرد قصتى الاول وبعدين نحكى بقي مع بعض

وللتعارف

انا بوسي (أم عمر ) مهندسه كمبيوتر ومقيمه فى الكويت بقالى تلات سنين يعنى لسه فى الربع الاول وبادعى انى ربنا يسهل لينا ونستمر ونكمل للربع الرابع ان شاء الله

[pocy]

طب انا بس قبل ما اقوم وابدأ فى تحضير العشا ممكن اعرف اوقات تواجدكم امتى حيث انى الان عاطله عن العمل وفاضيالكم ههههههههههههههههه ويارب ما تصدعوا منى ان شاء الله انا مصدقت انى الاقي تجمع للكويت كله للسعوديه وعلى رأى ام مروان وكأنهم في عماره واحده ههههههههههههههههههه ويارب نكون احنا كمان

ام نور واستاذ حسن درويش انا موجوده معاكم يوميا ان شاء الله على الهواء مباشرتا من الصباح وحتى المساء ان شاء الله

[تامر مصطفى]

الف شكر يا استاذ درويش وقلب ابيض وهلا بيكي يا Pocy

على فكرة انا في السنة ال 14 حاليا في الكويت ووزارة التربية

يشرفني اتعرف عليكو اكتر واكتر

[pocy]

صباح الفل والورد والياسمين عليكم كلكم ام نور واستاذ حسن واستاذ تامر والحاج فوزى و الاخ محمد والاخ جوده والاخت ام مروان بجد مش تتصوروا اد ايه انا فرحانه بالتجمع ده

والان بعد الصباح راح ابدأ حكايتى من البدايه وكيف جيت من مصر وهى فيها شويه عبر واتمنى ان بعض الشباب الجداد ياخدوا بالهم منها

فى البدايه كان سبب التفكير فى السفر هو ان خطوبتى طولت وكانت اختى مهندسه كمبيوتر جت هنا الكويت تشتغل فى وزارة التربيه كمدرسه حاسوب وبعدين جابت جوزها زياره مهندس مكانيكا والحمد لله ربنا وفقه ولقي شغل بعد ما تعب واستهلك التلات شهور بتوع الزياره كلها المهم ولقيت اختى اد ايه كانت بتشكر فى العيشه هنا وان الحمد لله عيشتهم هنا احسن من العيشه فى مصر بمراحل وبعد كده حاولت اشجع زوجى على انه يدور على شغل فى الخارج اى منطقه الخليج او اى مكان ولانه مهندس اتصالات والكترونات ومخترع ودماغه نظيفه وفى الانجليزى لبلب كان بيقدم فى ايطاليا وامريكا والمانيا بس برضه كانت خبراته قليله فى مجاله وكان ممتاز فى مجال الهندسه الطبيه لدرجه انه اخترع (ultrasonic cleaner)أو غساله موجات فوق صوتيه لغسل وتعقيم الاجهزه الطبيه الدقيقه والمجوفه وغير المجوفه ودا اللنك بتاع التحقيق بتاعه فى الاهرام بس علشان تبقوا عارفيه كويس ومصر عملت فيه ايه المهم دا اللنك ابقوا اقروه ياريت لو فاضيين طبعا

http://www.ahram.org.eg/archive/Index.asp?...tm&DID=8489

المهم انا بقي بدأت ادور من ناحيتى منا كان عندى اربع سنين خبره فى تدريس برامج الكمبيوتر فى اكتر من معهد ومن ضمنهم الجامعه الامريكيه والمعهد البريطانى في مصر المهم دورت على النت على اى من المعاهد اللى طالبه مهندسات كمبيوتر وسبحان الله لقيت معهد اهلى (خاص) عايز مدربه كمبيوتر وفعلا ده اللى حصل قدمت السيره الذاتيه بتاعتى من على النت عندهم وخليت اختى تروح للمعهد ده بنفسها وتقدم برضه ورقي وسبحان الله بعد مشاكل كتيره قدرت اقنع اهلى واقنع خطيبي انى اسافر واختى وزوجها كان ليهم دور كبير انى اجى هنا وبعدين حصلت مشكله ان المدير اللى اتفقنا معاه فصلوه من المعهد وجه النائب بتاعه وكان انسان كذاب بشكل غير طبيعي وكل يوم يتصل مخصوص من الكويت يقلي حضرى الشنطه هتسافري الاسبوع اللى جاى يوم التلات معرفش يعنى اشمعنى التلات المهم كانت ظروف العمل بتاعتى او الاتفاق على ان مرتبي لاول تلات شهور هيكون 185 دينار كويتى لحد ما اثبت جدارتى ويتم رفع بعد ذلك الى 250 وكان الدوام شفتين وليه كل فتره مكأفاه وكمان السكن والمواصلات كانت عليهم فقلت في نفسي واقنعت والدى واخويا الكبير وخطيبي بالفكره بصعوبه بالغه واخويا الكبير كان بيقلي المبلغ ده قليل وهتتعبى هناك شفتين والكلام ده المهم كتبت كتابي قبل ما اسافر لان المعهد كان طالب انى اكون متزوجه واختى عملتلى زياره عائليه لانهم مش عرفوا يطلعولى زياره تجاريه لان عمرى اقل من 40 سنه والله اعلم دا صدق ولا كدب لان زى ما قلتلكم المدير كذاب لدرجه فظيعه المهم جيت هنا الكويتوبدأوا فى تخليص الاقامه وتحويلها من زياره عائليه الى زياره عمل ودفعوا ال200 دينار تحويل وكانوا عايزينى ادفعلهم ال200دينار دول بس انا قلتلهم ان ده مكنش مذكور في الاتفاق بينا انى ادفع فلوس الاقامه وحصلت مشكله انهم هيستقطعوا جزء ولان المدير كداب وكلهم عارفين كده قالوا خلاص مش هندفعك ودفعوها اللى جت بعدىالمهم بدأت اشتغل بعد ما جيت بتلات ايام وشوفت طبيعه الناس هنا وللعلم انا جايه فى صعيد الكويت (الجهرا)وكانوا محتاجين مدرسه كمبيوتر لان فى اهالى لا يحبون الاختلاط وان مدرس هو اللى يشرحلهم والحمد لله اثبت جدارتى لان والحمد لله اتمتع بتوصيل اى معلومه بطريقه مبسطه وسهله جدا والحمد لله وبعدين مر ست شهور على هنا وانا مرتبي لسه زى ماهو ووعدهم لى انه يزيد راح وكان المدير كل مره يقلي اكتبى طلب وانا هقدمه لصاحب العمل وكنت اكتبه ويقلي اترفض فكتبت انا الطلب ولما لقيت صاحب المعهد موجود رحتله وقلتله ممكن اخد دقيقه من وقتك وشرحتله الموقف ونده على المدير وقال ليش ما زيدوتها طالما هو ده المتفق عليه وزيدت والحمد لله فى الشهر السابع الى 225 دينار فقط وطبعا عرفت السبب لانى بعد كده او بعد ما اكمل سنه هطالبهم بالزياده زى برضه ما قالولى فيزيدونى لحد 250 دينار المهم طبعا لان مرتب كان قليل مكنش ينفع اع5مل زياره لزوجى واشتريت زياره عائليه على واحد كويتى ب50 دينار وسبحان الله نفعت مع ان ده مصري والتانى كويتى المهم كنت انا قبل ما يجي زوجى كنت قدمتله فى كل الشركات اللى ليها علاقه بالهندسه الطبيه والالكترونيه ونظمت الشركات بعناونهم وتليفونتهم وجبت خريطه للكويت علشان يبقي يعرف يركب باص رقم كام لان طبعا انتم عارفين المواصلات هنا غاليه ازاى عمل كذا انترفيوا وسبحان الله قبل ما يرجع بيومين بس مصر اتصلت عليه شركه فى الاحمدى علشان تعمل معاه اوفر وطبعا وافق بسرعه لان مفيش قدامه فرصه تانيه والحمد لله كانت فرصه مش وحشه مع ان المرتب مش اللى هو بس الحمد لله ع كل شئ رجع مصر يخلص كام حاجه ويرتبوا للفرح ونزلت واتجوزنا ورجعنا الكويت هنا طبعا انتم هتقولوا ان الحكايه انتهت لحد هنا لا دى ابتدت منها والمشاكل اللى ظهرت واللى خلتنى احفظ عن ظهر قلب قوانين العمل الكويتى ودى بقي في لقاء تانى ان شاء الله اتمنى انى مكنش ازعجتكم بقصتى

بس نصيحه محدش يجي الا وهو ضامن شغل وعارف كل شئ عنه ويسأل كويس جدا ع الكفيل هل هو مؤذ ولا لا وكمان لو هيوفروهله سكن برضه يحاول يتقصي عنه وكمان المواصلات غاليه هل يوفروله مواصلات وقبل ده كله اخبار المعيشه هنا ايه غاليه ولا ايه لان انت هنا لما يقولك هتقبض 100 دينار يافرحتى هتحسبهم بالمصري الفين جنيه وانا مش لاقي لا 100 دينار دى يا دوبك اكل وشرب وسكن مع 6 او 8 علشان مش تطلع مديون اخر الشهر وربنا يوفق الجميع

وزى ما قلت للحديث بقيه

[pocy]

امال فينكم وفين الترحيب لا زعلتونى يالا عايزه اشوفكم كل يوم ع العموم انا مستنياكم ويارب ما اكون تقلت عليكم بالحديث

تم تعديل 16 يونيو 2009 بواسطة pocy

[pocy]

هلا استاذ حسن كيفيك انا شايفه اسمك تحت موجود انتم بتبقوا موجودين امتى ؟؟؟؟؟؟؟؟؟؟؟؟

[HDarwish]

هلا وغلا .. حياج الله أخت بوسي

نورتي الكويت ونورتي المنتدى ونورتينا إحنا على وجه الخصوص

ما شاء الله عليكي .. عجبتني قوي قصتك .. واضح إنك شوفتي كثير من البلد هنا بدليل الخبرة والكلام الكبير اللي بيدل على حد شاف واتعلم كثير

ذكرت من شوية في كام مداخلة إني قعدت ادور على شغل مدة اربع شهور ونصف لحد ما لقيت وظيفة معقولة وكانت باب خير عليا جامد قوي .. علشان كده تلاقيني مقدر قوي نصايحك اللي في آخر المشاركة بتاعتك .. ولو إن لي تعليق على كام نقطة في قصتك واظن انهم يستاهلوا مواضيع لوحدهم .. لكن للحديث بقية .. نظرا لانشغالي حاليا...

تقبلي مني كل التحية والاحترام

[HDarwish]

الف شكر يا استاذ درويش وقلب ابيض وهلا بيكي يا Pocy

على فكرة انا في السنة ال 14 حاليا في الكويت ووزارة التربية

يشرفني اتعرف عليكو اكتر واكتر

واضح إن وقتك ضيق قوي يا أستاذ تامر .. يعني كل فين وفين لما بنشوفك .. وحتى لما بنشوفك بيبئا يادوب السلام وكلمتين حلوين كده عالضيق ..

عموما يا أستاذنا الشرف لينا .. ما شاء الله عليك خبرة كبيرة ونتمنى نستفيد منك وما تبخلش علينا

تحياتي

[pocy]

الكويت والمنتدى واحنا منورين بوجودك استاذ حسن والله انا برضه بيعجبنى ردودك على البعض واتمنى انهم يعملوا بيها حرام يجوا من بلدهم ويتبهدلوا لانهم مش عارفين الوضع

وبالنسبه للنقاط اللى في قصتى انا مستعده لنقاشها في اى وقت انا عندى فـــــــــــــــــــــــــــراغ كبير ومفيش مشكله ومش هضايقك الان علشان تشوف اللى وراك والله بيعينك ان شاء الله

أم نور وينك ياقمر نفسي اتعرف عليكى والله ومنتظره ردودك يا قمر

امال فين الباقي يالا مستنياكم

وطبعا للحديث بقيه وربنا ييسر اللى فيه الخير ان شاء الله

[ahmedkamal]

انا عارف اني ممكن ما اضيفش جديد بس لان انا من مواليد الكويت ومن محبيها ومعلش لو حد هيعترض ع حبي لها ، انا طبعا حاليا مهندس ف الرياض حياتي كلها قضيتها ف الكويت حتى ايام الكليه كنت بقضي اجازات نص السنه هناك

يا جماعة البلد ده خيرها كتير قوي صحيح دلوقت زي ما بسمع مابقتش زي زمان لكن دمها خفيف ، جوها حر اه ورطوبه جدا وناسها محترمين بس مغرورين شويتين

واللي ينكر كده مالوش حق انا من اولى ابتدائي وكانوا قارفينا انتوا جايين هنا عشان تاخده فلوسنا مع اننا كنا اطفال

طبعا انا حضرت ايام الخير بالقوي يمكن حضراتكم مش هتصدقوا ان المدارس الحكوميه كانت بتوزع علينا ملابس المدرسة بنطلون رصاصي وقمصان بيضاء وبلوفرين كحلي

وكانوا بيوزعوا علينا كشاكيل كان عليها صورة المرحوم الشيخ جابر والمرحوم الشيخ سعد ، كان المدارس الحكوميه ف قمة الشياكه والنظام

انا طبعا كنت ايام الدينار الاحمر اللي كان زمان قبل الغزو بيوصل 9 جنيه كان خير والله ياجماعة

اللي اقصده والدي بدأ صغير كان مدرس ف التربيه والتعليم المرتبات كانت قليله لكن ماتزعلوش مني احنا جيل طماع ومستعجل ، فنصيحتي الغربه محتاج طولة بال صحيح الواحد مايهينش نفسه لان مصر اتغيرت عن زمان والناس الكفاءات لها شغل كويس في مصر واللي مالوش هيلاقي بره برده وده رزق ، مش عارف انا عارف ان كلامي خارج السياق بس اعمل ايه لقيت اسم الكويت فحبيت ادخل اشكر ف البلد ده ، يكفي ف الغزو العراقي وانا في مصر البلد ده صرفت منحة لكل جواز سفر 500 دولار طبعا حكومتنا المصونه خنصرت منها انما يعني ، وبرده التعويضات

فالبلد ده بلد خير معلش شعبها مغرور شويه بس مش بياكله حق حد

ع فكره انا ف السعوديه وبصراحه ف فرق بين البلدين كبير هنا الحياه رخيصه والغريب ان السعوديين غير الكوايته والله العظيم غلابه عن الكوايته انا بحب الكويت بس شعبها مغرور حبتين

وتحياتي للكويت ولمقيمين الكويت

[pocy]

هلا وغلا بالاخ احمد احنا مقناش حاجه ومش غلطنا فيها بس الكويت الان اتغيرت عن مانت كنت فيها الفلوس الكتير والعيشه الرغد والسكن الرخيص كان زمااااااااااااااااااااااااااااااااااااااااااان زمان كنت تقدر تاخد فيلا ايجار ب 50 دينار دلوقتى متلقيش استديو ب 150 دينار وان لقيته يبقي زى الجحر بتاع الفار لالالالالالالالالالالالالالالا الكويت اتغيرت كتتتتتتتتتتتتتتتتتتتتتتتتتييييييييييييييييييييييييييييييير جدا ومع ذلك نفسي اكمل واعيش فيها عارف ليه لانى وانا هنا بعيده عن المشاكل اليوميه وفلان قال وفلان عاد وازمه الرغيف والزحمه والمواصلات والخنقه والقرف مفتقده اهلى طبببببببببببببببببببببببببببببعا مفتقداهم ايه مش عايزه ترجعلكم نفسي ارجعلهم ونفسي اكون معاهم فى رمضان بس الحاجات التانيه تخليك غصب عنك تبعد يا اخ احمد لو قريت اللى انا كتبته مصر هى اللى طردتنى انا وجوزى مع انه مخترع وابقي اقرا اللنك اللى انا حطيته وهتعرف ان بالرشاوى والشغل اللى تحت التربيزه هدم طموح زوجى وخلاه ميفكرش انه يعمل اى حاجه تانى لناس مش تستاهل اقولك هبقي برضه احكيلكم القصه دى بس ان شاء الله مره تانيه يا راجل دول اخدوا القصه بتاعتى اللى حطيتها في بريد الجمعه ايام الله يرحمه عبدالوهاب مطاوع وعملوها مسلسل والنبي متفكرنيش لااله الا الله دا اناوجوزى اخدنا راقات وراقات من مصر تخلينا كل يوم ................................................. بس نرجع ونقول الحمد لله ع اللى احنا فيه الان ونبوس ايدينا وش ظهر ودهن ورجل وكل حاجه على اللى احنا فيه الان

وبرضه للحديث بقيه

[pocy]

واضح ان محدش بيدخل غيري هههههههههههههههههههه

[MoHaMMeD EgYpT]

واضح ان محدش بيدخل غيري هههههههههههههههههههه

لا بس شوية مشاغل

[MoHaMMeD EgYpT]

الناس بيقولوا ان انفلونزا الخنازير ظهرت في الكويت يا تري ده صحيح

بيقولوا ان فيه واحد بيشتغل في مطعم ماكدونالدز جاله انفلونزا الخنازير و ان فيه واحد مش فاكر اسمه بلغ عنه

بس ده طبعا كلام ناس مش جرايد

[ahmedkamal]

هلا وغلا بالاخ احمد احنا مقناش حاجه ومش غلطنا فيها بس الكويت الان اتغيرت عن مانت كنت فيها الفلوس الكتير والعيشه الرغد والسكن الرخيص كان زمااااااااااااااااااااااااااااااااااااااااااان زمان كنت تقدر تاخد فيلا ايجار ب 50 دينار دلوقتى متلقيش استديو ب 150 دينار وان لقيته يبقي زى الجحر بتاع الفار لالالالالالالالالالالالالالالا الكويت اتغيرت كتتتتتتتتتتتتتتتتتتتتتتتتتييييييييييييييييييييييييييييييير جدا ومع ذلك نفسي اكمل واعيش فيها عارف ليه لانى وانا هنا بعيده عن المشاكل اليوميه وفلان قال وفلان عاد وازمه الرغيف والزحمه والمواصلات والخنقه والقرف مفتقده اهلى طبببببببببببببببببببببببببببببعا مفتقداهم ايه مش عايزه ترجعلكم نفسي ارجعلهم ونفسي اكون معاهم فى رمضان بس الحاجات التانيه تخليك غصب عنك تبعد يا اخ احمد لو قريت اللى انا كتبته مصر هى اللى طردتنى انا وجوزى مع انه مخترع وابقي اقرا اللنك اللى انا حطيته وهتعرف ان بالرشاوى والشغل اللى تحت التربيزه هدم طموح زوجى وخلاه ميفكرش انه يعمل اى حاجه تانى لناس مش تستاهل اقولك هبقي برضه احكيلكم القصه دى بس ان شاء الله مره تانيه يا راجل دول اخدوا القصه بتاعتى اللى حطيتها في بريد الجمعه ايام الله يرحمه عبدالوهاب مطاوع وعملوها مسلسل والنبي متفكرنيش لااله الا الله دا اناوجوزى اخدنا راقات وراقات من مصر تخلينا كل يوم ................................................. بس نرجع ونقول الحمد لله ع اللى احنا فيه الان ونبوس ايدينا وش ظهر ودهن ورجل وكل حاجه على اللى احنا فيه الان

وبرضه للحديث بقيه

انا للاسف ومصريين كتير بنحب مصر ومانقبلش كلمه عليها بس العصابه تسيبها

الكويت انا لاحظت تغيرها من اخر مره روحتها سنة 98 اتغيرت وطبعا من بعد الغزو الكويت ماقامتش انا نازل مصر ف الغزو وانا ف تانيه متوسط نزلت ع تانيه اعداي كنت سايب الكويت وانا بعيط اهلها هربوا وسابوها وللاسف اللي كنت خايف منه حصل نزلت مصر تعبت جدا وبعد ماتخرجت صممت اشتغل ف مصر واشتغلت لاربع سنين بس كان رشاوي وقرف زهقت لقيت نفسي مش قادر اكمل لاسف يا سيدتي مصر بتقتل الطامحين واللي عندهم ضمير بقت حكر على ناس معينه

انا هربت منها ع السعوديه صحيح الوضع مش مغري قوي بس اريح من وجع الدماغ والنفاق والمشاكل واهو ايام وبنعيشها

[pocy]

ياااااااااااااااااااااااااه من 1998 ومجتش الكويت لا دا اتغيرت كمان عن التغير اللى انت شوفته تعال وشوفها بقت عامله ازاى الان اتغيرت بشكل انك متعرفش معالمها وبقي في جشع وطمع وكل حاجه ماشيه بالفلوس والواسطه ونظرا لان بقي في مصريين فى مواقع شويه فتلاقي ان اى مكان تبقي ادارته مصريه (زى المكان اللى انا كنت فيه )تحس انه كل مادا بيسوء و يزداد سواء لانه كل ما الادارة ضغطت على الموظفين وخصمت وتفننت فى اختراع القوانين اللى بتزل الموظف كل ما اصحاب العمل كان مبسوطين جدا وطبعا الكلام ده مش من خبرتى وبس لالالالالالالالالالالالالا دا من خبرات متعدده وربنا يبارك فيهم انا فعلا صدقت المقوله اللى بتقول ان المصريين فى الغربه وحشين مع بعض بجد لانى جربت مواقف كتتتتتتتتتتتتتتتتتتتتتتتتتتتيييييييييييييييييييييييره جدا وبعد ما تخرج من الشغل بتاعك يقولوا كلام و ووووووووووووووووو ياه فكرتنى ليه بس بالذي مضى كفايه كده والله انا بس لو ابدأ حكى ما بخلص والله يعين الجميع انا هنا والله بحترم جدا نقاط كتيره فى قانون العمل الكويتى واذا هو وقف جنبي ضد كفيلي الله يرحمه ويرحمنا من أذيته واذاى ان القانون الكويتى احسن من القانون المصري بمراحل

[pocy]

انا كل يوم ادخل اشوف الجرايد المصريه اقول وهيعملوا ايه فينا تانى الله يرحمنا بقي من (العصابه) اللى محدش قادر يقف قصادهم بس تعرف والله انا بقول يارب اديهم كمان وكمان وخايفه عليهم يتوبوا ويرجعوا اللى الله ومش يتحاسبوا على اللى عملوه فينا انت تعرف ان الموقع ده محجوب فى مصر ولا مش تعرف والناس بتدخله بالبروكسي الله بيعين على اللى بيعملوه فينا