المصريين المغتربين بالكويت

[الغريب]

السلام عليكم يأخوانا المغتربين بالكويت

تحياتي للجميع

وعندي موضوع عاوزين نثيره الأسبوع ده لو أمكن أو تقدرو تقولوا أنه تحقيق عن "المدرسين المصريين بالكويت" وده بصراحة لأني من كام يوم كنت قاعد مع أخ كان مدرس وبعد كدة حول لإدارة المناهج براتب أقل بسبب المعاناة التي حدثت معه في التدريس، ولما جيت أفتح التوبيك لقيت الحمدلله الموضوع محل نقاش الآن..

علشان كدة عاوزين الأستاذ تامر والأستاذة سارة يبدأو يخدو المايك ويتكلموا براحتهم عن الموضوع ده ، لأن طبعا كلامهم ده هيكون مرجع لأي حد بيسأل عن الموضوع ده بعد كدة وانا شايف أنه بيتسأل عن موضوع التدريس ده كتيير ..

- ياريت نوضح المعاش "الراتب"

-السكن

-المزايا الأخرى "مثل الدروس الخصوصية"

-إمكانية إحضار الأسرة

-مشكلات المدرسين هنا النفسية وغيرها

-الحياة الخاصة للمدرس بين المدرسين من الجنسيات الأخرى وفي وسط الطلبة الكويتيين

وزي ما قولت أن الموضوع ده أن شاء الله هيفيد كل المراجعين للتوبيك من اللي نويين ييجو الكويت تدريس

وطبعا الموضوع بردو بكيفكم يا جماعة يعني لو مش عاوزين تتكلموا فيه براحتكم ، ده كان بس مجرد إقتراح

صباحكم توووز :blink:

[saramath]

- ياريت نوضح المعاش "الراتب"

مرتب المدرسات غير المدرسين لان ما بيتصرف بدل سكن والمرتب بيكون 370 دينار

-السكن

فيه شقق بتكون اوضتين وصاله وحمامين ومطبخ بيسكن فيها تلت مدرسات

وفيه سكن زي صباح السالم مثلا بيكون فيه تلت غرف كل ثلاث مدرسات غرفه ومطبخ و 3 حمامات وطبعا مبندفعش ايجار وممكن المدرسة تخرج من السكن مع عائلتها لكن لا يصرف لها بدل سكن (( ظلم طبعا))

-المزايا الأخرى "مثل الدروس الخصوصية"

انا عن نفسي مبطلعش دروس لان صعب ادخل بيوت كويتين وانا ضد فكرة ان المدرسة تطلع اخر النهار تدرس دروس وال سمعته من المدرسات فى السكن ان بيحصل مشاكل من مضايقات او ان فيه اهالي مبتدفعش فلوس الحصص بس عامه هنا المدرسات الله ينور يعني فاتحين مدارس بعد الضهر غير المدارس بتاعت الصبح ومش بيهمهم شىء رغم ان الدروس ممنوعه بقرار من الوزارة

الحصة الابتدائى = 5 دينار

المتوسط = 7 دينار

الثانوي = 9 دينار

بس طبعا هنا الكويت فى الدراسة مش زي مصر

فى مصر التلميذ بيتابع الدروس الخصوصيه بجدول يعني التلميذ عنده حصتين كل اسبوع واخر الشهر المدرس بياخد حسابه لكن هنا نظامهم ان قبل الامتحان بيوم او اتنين يتصلوا على المدرسة تيجي تدرس لابنهم او بنتهم ساعه ولا اتنين وكل فتره يتصلوا بالمدرسة قبل الاختبار

ولو المدرسة تحسبها هتلاقي انها بتدفع للتاكس او العربية ال بتوصلها مش أقل من 2 دينار فالموضوع اعتقد انه مش نافع اوي الا لو كانت المدرسة معاها سيارة وعندها ثقه انها تدخل بيوت ناس مش تعرفهم

-إمكانية إحضار الأسرة

اعتقد علشان يكون فيه عائلة لازم يكون زوج المدرسة بردو بيشتغل علشان يساعد على الأقل فى دفع ايجار الشقة ال هيسكنوا فيها ومعرفش بقا انا النظام ايه فى مصاريف المعيشه يعني الاكل والشرب لاني عايشة براحتي شويتين

-مشكلات المدرسين هنا النفسية وغيرها

أغلب البنات المصريات ال هنا غير المصريات ال فى مصر يعني ممكن ال فى مصر أفضل بكتير من هنا وأنا عن نفسي ملقتش حد يستاهل يتصاحب رغم ان فى مصر كان يجي العيد معرفش هخرج مع مين ولا مين من صحباتي بس الأفضل تجنب الأخريين

-الحياة الخاصة للمدرس بين المدرسين من الجنسيات الأخرى وفي وسط الطلبة الكويتيين

تعاملى كان مع مصريات وكويتيات وسبق ووضحت وجه نظري

أما الكويتيات فهم كانوا الجانب الكوميدي في حياتي هنا أخر موقف كان من مدرسة زميله ليا جابت ساعه بحوالى الف وشوية دينار وفرحانه جدا لان الساعه كان سعرها قبل الاوكازيون 4 الالااف دينار

وبكرة ال هتيجي هتشوف ال اكتر من كدا بس فعلا تصرفاتهم بتضحك جدا (ونااااااااااااااسه :lol: mfb: )

[Simba]

بما اني مش مدرس

فأنا اشجب واحتج وأدين مثل هذه الموضوعات :lol:

[تامر مصطفى]

زي ما تفضلت الاستاذة سارة ووضحت

ولكن توضيحها كان من وجهة نظر المعلمات والامر مختلف بعض الشيء للمعلمين الذكور

أولا الراتب :

المعلم حديث التعيين يوظف على راتب اجمالي 430 دينار تشمل مبلغ 60 دينار بدل سكن

الفرق بين معلم معين في 2010 ومعلم تاريخ تعيينه يرجع الى سنة 1991 قد يكون 10 دنانير فقط وهذه العشرة قد يكون حصل عليها بصفة استثنائية ولمرة واحده فقط

ثانيا بالنسبة للسكن :

الأمر مختلف تماما بين معلم ( عازب ) ومعلم (متزوج) واسرته تعيش معه في الكويت

العازب لو اراد الحياة الكريمة ممكن يقيم مع 3 افراد في شقة ايجارها في حدود 200 دينار فتصبح التكلفة الشهرية للايجار عن الفرد الواحد 50 دينار

وخلاف ذلك اذا اراد حياة التوفير ممكن تصل القيمة الايجارية للفرد 15 دينار أو أقل ولكن سيكون العدد في الشقة 15 فرد ( اسمحوا لي اسميها حياة الفيران)

اما المتزوج فالحد الأدنى للايجارات 150 دينار شهريا (غرفة وصالة بمساحة اجمالية 30 متر ) وطبعا البحث عن سكن بالمبلغ ده يحتاج شهوووور في بعض المناطق .

( لان الجماعة بتوع السعودية ممكن يطلع عليهم السكن ما يعادل 300 دينار سنويا ومع ذلك بيشتكوا مر الشكوى من غلاء السكن)

بالنسبة للدروس الخصوصية :

رياضيات - انجليزي - علوم - لغة عربية - فرنسي هم ملوك الدروس الخصوصية

الكمبيوتر (زي حالاتي ) - الالكترونيات - الديكور - الدراسات الاجتماعية - التربية الاسلامية ليس لهم نصيب في الدروس الخصوصية نهائيا

بس بنسمع من بعض الطلاب قصص ( مضحكه مبكية ) عن المعلمين اللي بيزوروهم في البيوت

طبعا في احتمال بنسبة كبيرة ان مدرس يدرس طالب خصوصي وفي النهاية مياخودش لا ابيض ولا اسود بل ويهدده ولي الامر بفضح المعلم وانهاء خدماته في وزارة التربية والامثلة على ذلك كثيييييييييييير .

وباختصار في كلمة قالها محمد هنيدي في فيلم ابو العلمين حموده تلخص الموضوع:

" هو المدرس من دول طالما دخل البيت واتحط أدامه الكيك هيحط عينه في عين الطالب ازاي تاني " - صح لسانك يا هنيدي

طبعا طبيعي انك تسمع من الطلاب بعض القصص الخيالية والتي (تحط ) من مكانة المعلم وطبعا السبب الرئيسي هو (دناءة ) بعض المعلمين رواد الدروس الخصوصية وطلباتهم العجيبة

أما عن مزايا العمل كمعلم في وزارة التربية :

1- سهولة استخراج رخصة القيادة بدون اي شروط للراتب .

2- سهولة احضار الاسرة وعمل الزيارات .

3- كثرة الاجازات خلال العام فقد تصل اجمالي الاجازات في سنة واحدة الى اكثر من 100 يوم ( طبعا في وظائف كتييرة اصحاب بيحلموا ب 40 يوم )

4- الدوام المدرسي لغاية الساعة 1:30 (في اشاعة قوية ان من العام القادم لغاية 3 العصر) .

5- فترات العمل الفعلية قليلة جدا بسبب غيابات الطلاب قبل وبعد المناسبات وقبل الاختبارات.

6- بشكل عام فئة المعلمين محسودة من معظم الفئات التي قد تكون وضعها النفسي والمادي افضل منها .

أما عن عيوب العمل كمعلم في دولة الكويت :

1- الفرق الشاسع في الرواتب ما بين المعلم الكويتي والمعلم الوافد بالرغم من ان المعلم الكويتي ( الا ما رحم ربي ) كثير الغياب والاستئذان والتأخير والوافد هو المتحمل لعمل الكويتي .

2-عدم وجود مزايا مادية (بونص مثلا ) ولا زيادات سنوية ولا اي علاوات تذكر .

3- التعامل مع 300 شخصية مختلفة من الطلاب اسبوعيا (منها المريض نفسيا ومنها المجنون ومنها المعقد ومنها الأهبل ومنها المتعالي على الوافد ...... الخ)

4- لديك مليون رئيس ( رئيس قسم - موجه فني - 2 مدير مساعد - مدير مدرسة - مراقب تعليم - موجه أول - مدير شؤون تعليمية - مدير منطقة ) كل دول فوق راسك وغالبا ما تكون طلباتهم متعارضة مع بعضها .

5- النظرة الدونية للمعلم الوافد من قبل الطالب - ولي الأمر - ادارة المدرسة وطبعا الاتهام المستمر من قبل مؤسسات الدولة بأن المعلم الوافد هو السبب الرئيسي في تدني مستوى التعليم في دولة الكويت ( وسماعك باستمرار امنياتهم برحيل جميع الوافدين )

بالطبع ما سبق من سلبيات يؤثر نفسيا على المعلم الوافد (طبعا ذوي الاحساس منهم ).

[herohero]

انا مش مدرس يارجاله بس انا تلميذ سابق ف مدارس الكويت وابن مدرس فاضل رياضيات 30 سنة تدريس

بصراحه نصيحته ليا اوعى تفكر ف المهنة بجد كان اكتر واحد مكرهني فيها رغم اني بحب الشرح وتوصيل المعلومة بس بجد التعامل مع الطلبة ف الكويت مش سهل وعاوز تكبير دمااااااااااااااااااااغ قوووووووووووووووووووي

انا فاكر كان بيعملوا ايه الطلبة انا والدي رفض يروح ثانوي لان احجام الطلبة كانت family size

انا كان معايا طلبه كتيييييييير بيرفع العارضات بتاعت جون كرة اليد بيلعب بيه يعني جيم ع السريع

وكانو بيقعدوا الديسك او الطرابيزة بتكون طالعه ع رجله مرفوعه من الارض فازاي تتعامل مع هذا المخلوق

احلى ميزة ف مهنة التدريس ف الكويت الاجازات السنوية مدفوعه الراتب

اما عن الدروس فوالدي جربها زمان ايام الفلسطينيين ومش عاوز اقولكم اشي اللي بيفاصلوا واشي اللي ياكلوا الفلوس واشي اللي يقولك مالكش حاجه عندنا والا نبلغ الوزارة

وطبعا لاننسى ان نذكر انك تطلع من المدرسة بعد لجنه الامتحان تلاقي 4 فرد مبنشرين ولا اللوحه بتاعت الارقام متشالة ولا الازاز مكسور

ياه شوية مميزات ممتازة

اكبر مشكلة انك كمدرس بتحس انك شمعه بتحترق فعلا من اجل الاخرين ويمكن تلاقي وحد ابن حلال يتمر فيه ولما يشوفك ف المطار يخدمك ف الوزن ولا ف المرور

بجد كان الله ف عون المدرسين ع الوشوش المنورة كل يوم الصبح تصطبح بيها

ان فاكر والدي كان يقولي مهمتك مش توصيل المعلومة فقط مهمتك ترويض الطلبة

بجد كان الله ف العون

انا اسف اني تطفلت يا استاذ تامر بس حبيت اتمنى كل الخير للاخوة المدرسين لانهم بجد بيتعبوا مع الطلبة الهاديييييييييييييييييين قوووووووووووووووي

[saramath]

أما عن عيوب العمل كمعلم في دولة الكويت :

1- الفرق الشاسع في الرواتب ما بين المعلم الكويتي والمعلم الوافد بالرغم من ان المعلم الكويتي ( الا ما رحم ربي ) كثير الغياب والاستئذان والتأخير والوافد هو المتحمل لعمل الكويتي ( دا فعلا موجود بردو وسط المدرسات الكويتيات فمرتب الوافدة 370 لكن الكويتيه ما شاء الله اللهم لا حسد يعني بيعدي ال 900 وبيكون مسحوب منه تأمين وبالنسبة للأجازات فبما ان الوزاره محلله لنا 15 يوم مرضي خلال السنة الميلادية للوافدين وغير الوافدين فسهل ان الوافدين ياخدوا قسط من الراحة بأنهم يخلصوا كل الأجازات المرضى قبل اخر يوم فى السنه )

3- التعامل مع 300 شخصية مختلفة من الطلاب اسبوعيا (منها المريض نفسيا ومنها المجنون ومنها المعقد ومنها الأهبل ومنها المتعالي على الوافد ...... الخ) وانا عندي صف فيه 23 تلميذه منهم 5 حالات خاصه بيعانوا من تخلف عقلي بس مش مؤذيين بالعكس طيبين جدا بس مكانهم المفروض يكون فى مدارس خاصة لتعليم ذوي الاحتياجات الخاصة

4- لديك مليون رئيس ( رئيس قسم - موجه فني - 2 مدير مساعد - مدير مدرسة - مراقب تعليم - موجه أول - مدير شؤون تعليمية - مدير منطقة ) كل دول فوق راسك وغالبا ما تكون طلباتهم متعارضة مع بعضها . ( فعلا لهم طلبات غريبه وأوامر اغرب زي اخر قرار نزلته المديرة المساعده ان ممنوع ان مدرسات قسم معين التجمع مع مدرسات قسم أخر أو الجلوس فى غرفه اخري غير غرفة قسم المعلمة يعني صحابك فى المدرسة يكونوا فى القسم الذى يخصك فقط ولو مريت على قسم اخر بسرعه بسرعه سلم عليهم قبل ما حد يشوفك وجري على غرفتك wst::

5- النظرة الدونية للمعلم الوافد من قبل الطالب - ولي الأمر - ادارة المدرسة وطبعا الاتهام المستمر من قبل مؤسسات الدولة بأن المعلم الوافد هو السبب الرئيسي في تدني مستوى التعليم في دولة الكويت ( وسماعك باستمرار امنياتهم برحيل جميع الوافدين )

النظرة دي مش ظاهره اوي بالنسبة للمعلمات لان المعلمات الوافدات المصريات ماشاءالله تأسيسهم العلمي افضل بكتير من الاخرين وكتير بيلجأوا الكويتيات للمصريات علشان نشرح لهم ازاي يشرحوا مثلا القسمة المطولة او الضرب فى عدد رمزه مكون من رقمين وحاجات اعتقد ان عيب معلمة تسأل فيها

[pocy]

بسم الله ماشاء الله

تتحسدوا والله يا جماعه انا اروح فى صفحه 109 ارجع الاقيكم فى 113 تبارك الرحم اخاف احسدكم دا الصفحه بتقعد معانا كتير على ما حد منا يعبرها بس بصراحه مداخلتكم غايه فى الروعه ايوه كده اتنشطوا اتنشطوا ربنا يبارك يارب اللهم امين

والله دايما فيك الخير يا اخى العزيز الاستاذ تامر والشهير بطمووووووووووووووووووووووره دائم السؤال عنى وعن الاخوه الافاضل

وفعلا يا سمبا مفتقدين الاستاذ حسن درويش ونفسنا يطمنا عليه وايه الاخبار معاه ربنا يكمله على خير يارب اللهم امين

واخيرا وليس باخرا نحتفل بعوده الاخت الفاضله والمبجله الينا ساره ماث وربنا يكرمك بجد على المعلومات المهمه دى وجزاكى الله عنا وعن كل من يستفيد خيرا

وموضوع ممتاز للمناقشه

بس يا سمبا متيجى بقي وتكلمنا عن الطب والتمريض والمرتبات والحركات دى لان فى طبيب اسنان عايز يجي ومش عارفه المرتبات اخبارها ايه هنا

وجزاك الله خير

[Simba]

بس يا سمبا متيجى بقي وتكلمنا عن الطب والتمريض والمرتبات

لا لا

اخاف من الحسد :wub:

اصل حال المدرسين والكلام اللي فات ده يقطع القلب

[Simba]

بالنسبة لرواتب الاطباء يا مدام بوسي ومزاياهم وده للعاملين في وزارة الصحة فهو ممتاز جدا واخيرا الاطباء الوافدين صرفوا الكادر انا معرفش كام بالظبط لكن هو مبلغ من الدنانير وقدره

[herohero]

زي ما تفضلت الاستاذة سارة ووضحت

ولكن توضيحها كان من وجهة نظر المعلمات والامر مختلف بعض الشيء للمعلمين الذكور

أولا الراتب :

المعلم حديث التعيين يوظف على راتب اجمالي 430 دينار تشمل مبلغ 60 دينار بدل سكن

الفرق بين معلم معين في 2010 ومعلم تاريخ تعيينه يرجع الى سنة 1991 قد يكون 10 دنانير فقط وهذه العشرة قد يكون حصل عليها بصفة استثنائية ولمرة واحده فقط

ثانيا بالنسبة للسكن :

اما المتزوج فالحد الأدنى للايجارات 150 دينار شهريا (غرفة وصالة بمساحة اجمالية 30 متر ) وطبعا البحث عن سكن بالمبلغ ده يحتاج شهوووور في بعض المناطق .

( لان الجماعة بتوع السعودية ممكن يطلع عليهم السكن ما يعادل 300 دينار سنويا ومع ذلك بيشتكوا مر الشكوى من غلاء السكن)

لا يا استاذ تامر 300 دينار ف السنة ده كتير قوووووووووووووي

السكن هنا رخيص خالص

اولا ف الرياض لن تجد اقل من 16000 وشقق عادية وماهي ف مستوى شقق الكويت ام 200 دينار هنا ب 27000 او 30000

السكن هنا مش ارخص من الكويت زي ماحضرتك ماتتصور الا لو انت بتتكلم عن مناطق غير الخبر او جده او الرياض فده لها حسابات تانيه

وانا اتذكر من سنة 98 كان ايجار شقتنا ف خيطان 130 دينار وتكييف سنتر و3 غرف وعمارة جميلة مش قديمة

واسانسير كويس فيعني الكلام ده من 12 سنة وكان المدرس بياخد بدل سكن ساعته 100 دينار

هو طبعا المدرسين دولقتي مع كامل احترامي مدقدقين يعني جايين راسيين ع الدور ليا زميلي بيقولي واحد صاحبه ساكن مع مدرس وهو اول يوم جايبه من المطار بيسال مدرس تاني اخبار الدروس ايه والحصة بكام

[تامر مصطفى]

طيب ممكن يا هيرو تقولي الشقق اللي ب 16000 في الرياض ايه ممكن تكون مواصفاتها؟

يعني كام غرفة - كام حمام - مساحتها تقريبا في حدود كام متر؟

وبعدين السعر اللي كنت ساكن فيه مع الوالد بقى دلوقتي ميجيبش غرفة 3×3 بحمام ومن غير مطبخ

[الغريب]

السلام عليكم :closedeyes:

صباح الخيرات على الجميع :happy:

الحمد لله الجو رائع ويارب يستمر على هذا الحال :blink:

الشكر موصول للأستاذ تامر والأستاذة سارة على ردودهم على أسألتي بخصوص أوضاع المدرسين هنا بالكويت وأتمنى أن يستفيد جميع الزائرين للموضوع من كلامكم الرائع

تحياتي :sad:

[saramath]

السلام عليكم

ياجماعه انا سألت سؤال ومحدش عبرني

عاوزة اعرف فرصة الشغل لخريجي طب بيطري فى الكويت ايه

وممكن مثلا يشتغلوا مندوبين ادوية بدل مجال الطب البيطري الفرصة بتكون متوفرة ولا لأ ولو اتوفرت الراتب بيكون حوالى كم؟؟

[HDarwish]

السلام عليكم ورحمة الله وبركاته

إخواني وإخواتي مصريين في الكويت .. تحياتي إليكم جميعا وسلامي إلى الجميع ولا أخص بالذكر أحداً حتى لا أقع في خطأ السهو

أحب أن أطمئنكم عني فأنا والحمد لله بأحسن صحة وبأحسن حال

الأمور ماشية تمام معايا لحد الوقتي والحمد لله أحسن مما كنت عليه في الكويت والآن أصبحت أعطي رواتب بما يعادل ما كنت أقوم بتوفيره في الكويت

يوم بعد يوم يتأكد لي أني كنت صائباً في إتخاذ قرار العودة وذلك من جوانب متعددة منها الجوانب المادية والجوانب المعنوية والاجتماعية (تكفي إبتسامة جنا في كل صباح)

يملؤني التفاؤل والحياة مٌبشرة بكل خير

أتمنى للجميع التوفيق والسداد .. وللحديث بقية بإذن الله تعالى

[HDarwish]

السلام عليكم

ياجماعه انا سألت سؤال ومحدش عبرني

عاوزة اعرف فرصة الشغل لخريجي طب بيطري فى الكويت ايه

وممكن مثلا يشتغلوا مندوبين ادوية بدل مجال الطب البيطري الفرصة بتكون متوفرة ولا لأ ولو اتوفرت الراتب بيكون حوالى كم؟؟

الفرص قليلة شوية والموضوع مش سهل .. خاصة لو أصريت إنك تشتغل في مجالك .. ظروف العمل بتكون سيئة لدرجة لا يمكن لك أن تتصورها حيث العمل في مناطق على الحدود مثل الوفرة أو العبدلي أو الصليبية حيث مزارع إنتاج المواشي

مندوب مبيعات .. ممكن .. لكن حتتعب الأول على ما تجهز نفسك للموضوع ده .. لإنك حتحتاج رخصة وبعد كده عربية والكلام ده كله ممكن ياخد منك مش أقل من ستة شهور في الست شهور دول هتتعب جداً لإن اليوم في الكويت مش ببلاش والحياة غالية بالإضافة إلى حالتك النفسية

إذا مٌصِر على السفر أرشح لك السعودية إلا إذا كان جايلك عرض كويس في الكويت

بالتوفيق

[saramath]

السلام عليكم

ياجماعه انا سألت سؤال ومحدش عبرني

عاوزة اعرف فرصة الشغل لخريجي طب بيطري فى الكويت ايه

وممكن مثلا يشتغلوا مندوبين ادوية بدل مجال الطب البيطري الفرصة بتكون متوفرة ولا لأ ولو اتوفرت الراتب بيكون حوالى كم؟؟

الفرص قليلة شوية والموضوع مش سهل .. خاصة لو أصريت إنك تشتغل في مجالك .. ظروف العمل بتكون سيئة لدرجة لا يمكن لك أن تتصورها حيث العمل في مناطق على الحدود مثل الوفرة أو العبدلي أو الصليبية حيث مزارع إنتاج المواشي

مندوب مبيعات .. ممكن .. لكن حتتعب الأول على ما تجهز نفسك للموضوع ده .. لإنك حتحتاج رخصة وبعد كده عربية والكلام ده كله ممكن ياخد منك مش أقل من ستة شهور في الست شهور دول هتتعب جداً لإن اليوم في الكويت مش ببلاش والحياة غالية بالإضافة إلى حالتك النفسية

إذا مٌصِر على السفر أرشح لك السعودية إلا إذا كان جايلك عرض كويس في الكويت

بالتوفيق

ال كانت بتسأل دي أنا سارة مش واحد راجل :wub:

وال بيسأل عن الوظيفة هو جوز صحبتي المفروض انها مدرسة هنا والمفروض هتبعت له استقدام عائل

يعني اقولها البوقين دول وبلاش تخلي جوزها يجي؟؟ ولا ايه :P :D

[Simba]

عندي سؤال كدهون صغنن بس مهم

منين اشتري بلاي استيشن 2 في الكويت

هو في الغانم موجود بتلاتين دينار بس المشكلة ان الاجهزة دي محمية ومش بتشغل غير السي ديهات الاصلية والسي الدي الواحد فوق ال 15 دينار

انا اسمع ان فيه محلات بتبعه وبتكون حمايتة مفكوكة وكمان فيه محلات بتبيعه ومعاه 50 لعبة هدية

[شريف مان]

عندي سؤال كدهون صغنن بس مهم

منين اشتري بلاي استيشن 2 في الكويت

هو في الغانم موجود بتلاتين دينار بس المشكلة ان الاجهزة دي محمية ومش بتشغل غير السي ديهات الاصلية والسي الدي الواحد فوق ال 15 دينار

انا اسمع ان فيه محلات بتبعه وبتكون حمايتة مفكوكة وكمان فيه محلات بتبيعه ومعاه 50 لعبة هدية

يا رايق

:P

[الغريب]

السلام عليكم ورحمة الله وبركاته

إخواني وإخواتي مصريين في الكويت .. تحياتي إليكم جميعا وسلامي إلى الجميع ولا أخص بالذكر أحداً حتى لا أقع في خطأ السهو

أحب أن أطمئنكم عني فأنا والحمد لله بأحسن صحة وبأحسن حال

الأمور ماشية تمام معايا لحد الوقتي والحمد لله أحسن مما كنت عليه في الكويت والآن أصبحت أعطي رواتب بما يعادل ما كنت أقوم بتوفيره في الكويت

يوم بعد يوم يتأكد لي أني كنت صائباً في إتخاذ قرار العودة وذلك من جوانب متعددة منها الجوانب المادية والجوانب المعنوية والاجتماعية (تكفي إبتسامة جنا في كل صباح)

يملؤني التفاؤل والحياة مٌبشرة بكل خير

أتمنى للجميع التوفيق والسداد .. وللحديث بقية بإذن الله تعالى

حسن بك والله واحشنى ياراجل وكل يوم بنسأل عليك

وفعلا سعيد جدا أنك مبسوط في وسط أهلك وبلدك ربنا يزيدك سعادة

بس متنساش تشقر علينا وقت بعد التاني تطمنا عليك وعلى البلد والأحوال

بالتوفيق :P

[Simba]

يا رايق

يا أبو الروقان

انا عايز اجيبه علشان العيال

فهمتني غلط