انا محاسب ولدى فرصه عمل فى السعوديه

[ali mohammad]

انا محاسب مقيم فى مصر فى مقتبل العمر لدى فرصه للعمل فى السعوديه ولكن التاشيره ستكون سائق خاص مع العلم انى لن ادفع فيها اى فلوس لانها جايه من معرفه والراتب بدايته 2500 ريال مع توفير سكن وسياره ولكن سمعت كلام عن عدم امكانيه استقدام الزوجه وعدم امكانيه تغيير المهنه على الرغم ان الشخص اللى جايب التاشيره قالى لى فى التليفون انى ممكن استقدم الزوجه ارجو الافاده من الاخوه الاعضاء عن كل جوانب الموضوع وتعريفى بالمميزات والعيوب سواء كانت بالنسبه للفيزا او الراتب او استقدام الزوجه علما بانى حتى الان اعزب والعمل سيكون فى الدمام وشكرا جزيلا ارجو سرعه الرد لان التاشيره جاهزه وانا بخلص فلى اجراءات الرخصه

[زعلان]

هي المواضيع بقت شبه بعضها ولا ايه

لا تقبل لا تقبل يا ولدي المعرفة ده ميصحش تعرفه بعد كده أولا التاشيرة تكون محاسب او اداري ثانيا المرتب يكون 4 الاف ريال + بدل سكن علشان تقدر تعيش و تجيب زوجتك ومن غير ما تحوش اي مليم

[elfakhrany]

لا تقبل لا تقبل يا ولدي المعرفة ده ميصحش تعرفه بعد كده

انت دايما بتحب تهدى النفوووووس ياعم زعلان :blink:

أخى العزيز على

أولا بالنسبة للراتب فهذا راتب محاسب مبتدىء أو محاسب بدون خبرة أما لو معاك خبرة فالراتب المناسب فعلا يبدأ من 3500

ثانيا بالنسبة لمهنة السائق الخاص فهى مهنة غير قابلة للتغيير وغير قابلة لاستقدام الزوجة ولا حتى الزيارة ولا حتى نقل الكفالة لاحقا يعنى أوعى تهوب ناحيتها

ثالتا بالنسبة لتوفير السيارة دة شىء اساسى لانك متعرفش تتحرك من غيرها وخصوصا هنا الدمام فى الصيف الرطوبة بتكون عالية وبالنسبة للسكن لازم تتفق على

بدل سكن مناسب يعنى لو مرتبك 4000 بيكون 3 شهور يعنى 12000 ودول ممكن تزود عليهم 2000 وتحصل شقة حلوة ... و أى استفسار أحنا تحت أمرك

تم تعديل 12 أبريل 2009 بواسطة elfakhrany

[jamalpody]

2500 راتب خريج جديد اعتقد مناسب

لكن بهذا الراتب طبعا لازم تكون اعزب

يعني تعيش في سكن جماعي علشان تقدر توفر

بالنسبة للاستقدام علي هذه المهنة انا اعرف حالتين استطاعوا يعملوا استقدام لاولادهم

يعني الاستقدام بهذه المهنة ممكن لكن الاستقدام بهذا الراتب مستحيل بمعني

ان انت بهذا الراتب صعب جدا جدا تعيش ومعك اولادك

[السيد توفيق]

الراتب مناسب بما انك خرج جديد واصلا مستحيل تحصل تأشيرة محاسب وبما انك اعزب اقبل العرض افضل لك من بلاش وممكن تصرف 500 ريال شهريا وتحوش 2000 لمدة سنتين وتشتري لك شقه وترتاح وبعدها تقدر ترجع لمصر وتكون قطعت 40 سنه لقدام

[زعلان]

حيصرف 500 ريال بس في الشهر ازاي ده صعب جدا ده معناه انه حيقتر على نفسه جدا ويحرم نفسه من ان يعيش حياة طبيعية وغير كده ما تضمنش مفاجئات الحياة

والموضوع طبعا بيفرق من واحد لتاني

انا بقولك انك لو حوشت 12 الف ريال في السنة يبقى شيء ممتاز مقارنة بالراتب ده يعني بالكثير حوالي 18 الف جنيه في السنة هل ده طموحك و يناسبك يبقى اعقلها وتوكل طبعا ممكن تحوش اكثر حسب الظروف وممكن تحوش اقل و ممكن ظروفك ما تخلكش تحوش حاجة خالص لأن المبلغ ضعيف في حد ذاته

[elfakhrany]

حيصرف 500 ريال بس في الشهر ازاي ده صعب جدا ده معناه انه حيقتر على نفسه جدا ويحرم نفسه من ان يعيش حياة طبيعية وغير كده ما تضمنش مفاجئات الحياة

والموضوع طبعا بيفرق من واحد لتاني

انا بقولك انك لو حوشت 12 الف ريال في السنة يبقى شيء ممتاز مقارنة بالراتب ده يعني بالكثير حوالي 18 الف جنيه في السنة هل ده طموحك و يناسبك يبقى اعقلها وتوكل طبعا ممكن تحوش اكثر حسب الظروف وممكن تحوش اقل و ممكن ظروفك ما تخلكش تحوش حاجة خالص لأن المبلغ ضعيف في حد ذاته

بضم صوتى لصوتك يا أستاذ زعلان وبجد أنا أول مرة اسمع انك تصرف 500 ريال دى ومن وجهة نظرى للعازب حوالى 1000 ريال وانت طالع حسب مصاريفك

وبالنسبة للفيزا انا كتبتلك المعلومات اللى اعرفها فوووق اللهم بلغت اللهم فاشهد أنا كدة عملت اللى عليا

أما الأستاذ السيد توفيق ياريت تقولنا فين الشقة اللى تشتريها فى سنتين وتوفر 40 سنة عشان لو كدة اجيب شقتين وأوفر 80 سنة وأرجع من الغربة :lol:

تم تعديل 12 أبريل 2009 بواسطة elfakhrany

[ali mohammad]

الاخوه الاعزاء شاكر جدا على النصائح الغاليه ولكن مع هذا الوضع لو امكنى ان اتفاوض ما هو المبلغ المناسب علما بانى لدى خبره 3 سنوات وهل هناك حل باى ثمن بعد ذلك لتغير المهنه وايه اخبار حاله الطقس فى الدمام

[doha]

ناخذ الموضوع وحده وحده عشان تعرف هو مناسب ولا لاه ..

اولا : خبرتك تعتبر بسيطه يعني ثلاث سنوات فانت حديث التخرج

ثانيا: غير متزوج واعتقد مادام لسه متخرج يبقى ممكن تنتظر كام سنة كمان على ماتتزوج .

ثالثا : مش هتدفع ولا مليم في التاشيرة دي .

رابعا: مفيش قدامك فرصة عمل افضل في مصر .

بما ان الاسباب دي كلها مجتمعه فبقولك العرض يعتبر اجمالا مناسب لكن بعد عمل الآتي ..

اولا : استخير اكتر من مرة لان انت مقدم على خطوة قد تغير حياتك نهائيا فمينفعش تروح كده وخلاص بدون ماتكون واثق في الي بتعمله .

ثانيا : لازم جدا توثق العقد هنا في مصر وتاخذ احتياطاتك لان المعرفه الي في السعوديه باين عليه مش عارف حاجه وممكن يورطك فوثق عقدك عشان مش هينفعك بعد كده الا نفسك .

ثالثا : خلي مدة العقد سنتين فقط كحد اقصى وقابلة للتجديد .

بعد ماتقبل العرض ده يبقى واضح امامك عده نقاط برضه بالترتيب كده :

اولا : موت نفسك تحويش لان الراتب فعلا صغير اوي ومش هيضرك لو مسكت على نفسك سنه ولا اثنين محدش عارف الفلوس دي ممكن تنفعك في ايه بعد كده كمان وضعك حاليا كاعزب اسهل في الادخار خاصه وانت لسه جاي من مصر يعني متعودتش على نمط الحياه الاستهلاكي في السعوديه ..

ثانيا : موت نفسك في الشغل بس مش على حساب صحتك ويكون هدفك انك تكتسب اكبر قدر ممكن من الخبرة عشان تبقى وظيفتك دي مرحلة تروح منها بعد كده لوظيفة افضل باذن الله ..

ثالثا : المثل بيقول ابنك على ماتربيه وكفيلك على ماتعوديه فخلي بالك وبرضه خير الامور الوسط يعني لا تطلع فيها اوي ولا تطاطي اوي .

بعد السنتين ان شاء الله هتكون اكتسبت خبرة كويسه خاصه ان خبرة منطقة الخليج دي لها حساب لوحدها لما بتيجي تقدم على وظيفة يعني بيكون لك اولولية طالما سبق لك العمل في السعوديه عن غيرك الي لسه جاي من مصر ( خام ) .. برضه حوش فلوسك يمكن تضطر تشتري لك فيزا تانيه ولا عقد بس اعتقد انك لو اشتغلت كويس اوي ممكن باذن الله بعد سنتين تقدر تعمل علاقات تؤهلك للانتقال لشركه تانيه افضل .. وبرضه بقولك خلي مده العقد سنتين عشان كده عشان تقدر ترجع مصر وترجع السعوديه تاني بلا مشاكل مع الكفيل الاولاني ..

وربنا معاك ان شاء الله ويهديك للي فيه الخير وزي ما قلت لك الاساس هو الاستخاره ..

[ali mohammad]

والله انا مسرور جدا من معلوماتكم القيمه وربنا يبارك فيكم والى عنده اى ايضاح يبلغنى وانا شاكر جدا