لعبه جديده لانج

[مغتربة]

كما هو موضح فى وصف الموضوع

اللعبه تقوم على ان تكون مرآتى

بمعنى ان المشارك القادم يدخل و يقول بمنتهى الامانه و بعيدا عن المجامله او التقليل

كيف يرانى كمغتربه العضوة معه فى المحاورات

من حيث الاسلوب الحوارى

او الشخصيه على المنتدى

و هكذا

مع ذكر كل السلبيات او الايجابيات التى يراها بمنتهى الحياديه

ثم ينتظر دوره هو لان المشارك الذى سيدخل بعده

سيقوم معه بنفس الدور

و هكذا

ملحوظه

هذا الموضوع اساسه ان نعرف كيف يرانا الاخرون معنا فى المحاورات

لنتبصر بنقاط قوتنا و ضعفنا

و ليس الهدف منه تصفيه خلافات او حزازيات شخصيه

فارجو من المشاركيين الالتزام بذلك

و لا لن يعتد بالمشاركه

هه

جاهزين

على خيره الله

مين هيدخل اول واحد و يقول رايه فيا بكل صراحه

ربنا يستر :lol: :lol: :lol:

[fatfouta]

تقريبا يا مغتربة يا حبيبتى كل الناس خايفة تلعب مش عشان هتقول رايها فيكى لا لان اللى هيدخل لازم كمان الناس هيقولوا رايهم فيه

بس انا هقولك ومش خايفة من اللى هيدخل بعدى

بصى يا ستى وبصراحة بجد

انا شايفاكى واحدة متحملة المسئوليه

عاقلة

مثقفة

وكمان حبوبة وفى نفس الوقت مش منافقة

ومش بتقبلى بالآراء الخاطئة وممكن تردى عليها بمنتهى الدبلوماسية وبدون ماتعملى اى عداء مع اصحابها

معلش بقى طلع بختك فيا انا

شكرا على موضوعك الجميل

اختك فتفوتة

[ذهبية]

انا مبسوطة انى وراكى يا فتفوتة لانى بجد بحبك فى الله و عايزة اسالك انتى فين من زمان غيبتى كدة فجاة لكن حمد الله على سلامتك

موضوعك يا مغتربة جرىء و جديد ومش اى حد هيعرف يلعب اللعبة دى لكن هاحاول و ربنا يستر بقى

راى فى فتفوتة انها طيوبةةة و حساسة لابعد الحدود و قلبها زى اللبن الحليب

جدعة و بنت بلد تلاقيها ساعة الشدة اول واحدة تقف جنبك منساش لها رسالة رقيقة على الخاص لما قولت انى مكتئبة تسال عليا و كانت لفتة اكثر من رائعة منها انا لسة فاكرها و اثرت فيا جداااا

فتفوتة بتحب بيتها و ست بيت ممتازة و دمها زى العسل ومتواضعة دايما فى ردودها و مش بتحب تزعل حد

و تحس انها اخت لنا جميعاااا دة احساسى بيها

اشكرك يا مغتربة على موضوعك الجرىء و اتمنى ان الاعضاء يكون عندهم الجراة الكفاية ان اللعبة تكمل

اختكم ذهبية

[SoSo R]

على فكرة مش شرط أن الناس ما بتشتركش عشان خايفة!!

مش كل الناس عارفة بعض...أو عندها صورة كاملة عن الكل

عشان تدى رأيك فى حد لازم يكون فى ظرفين عشان الرأى دة يبقى مضبوط

يا إما العضو مشاركاته كتير جدا لدرجة إنك قاريه شخصيته

يا إما حد لفت نظرك بمداخلة فى أحد الموضوعات وبقيتى مهتمة تدورى على مداخلاته الأخرى

بصى يا ذهبية أنا هاحاول أشترك بس فيه إحتمال كبير ما أبقاش مضبوطة قوى فى كلامى

أنت شخصية قوية...بتعرفى تهزرى و تضحكى بس مش مع أى حد لازم حد يكون أهل للثقة

أمرأة حساسة...بتحبى الحب و الحنان و الدلع

بتحبى الدهب و كنتى بتفكرى فى الألماظ و غيرتى رأيك :blink:

لازم بقى تصلحى لى ورقتى و تقولى لى إيه المضبوط فى الكلام

تحياتى

سوسورانى

[مغتربة]

معلش بقى طلع بختك فيا انا

دا انا كده بختى من السما يا فتفوته

الف شكر على كلماتك التى اعطتنى اكتر من حقى

بس استنى

فين السلبيات يا جميل

يالله قولى متخافيش

انا مش بزعل و لا حاجه :) :)

:lol: :wub:

[مغتربة]

ايه يا جماعه اللعبه مش عجباكوا و لا ايه

و لا انتوا مش بتحبوا اللعب الى من النوع ده swar:: swar:: swar::

wst:: wst:: wst::

[عنبو]

لا والله اللعبه جميله بس انا من امباح كنت بحاول اضيف رد وكنت هبقى اول واحد يرد على اللعبه بس للاسف النت كان عندى تعبان خالص

على العموم مش مشكله وده راى فى مغتربه

اولا السلام عليكم ورحمة الله وبركاته قبل انا اقول راى كان لابد من قرائة اغلب مشاركات العضو حتى اعرف احكم على الشخص

من خلال قراتى لبعض المشاركات واضح ان العضوه انسانه مثقفه جدا وقارئه ممتازه جدا وتتمتع باسلوب ممتاز وليها فكر فى كل المواضيع مع انى الاحظ ان بعض تكباتها تميل شويه الى الفلسفه مما يعجز الضعفاء امثالى على فهمه وده طبعا العيب مش عندها العيب عند الضعفاء امثالى ؟؟؟؟ !!!

شغوفه بمعرفة الناس اقصد كيف يفكرون ؟؟ تهتم براى الاخر ؟؟ انسانه ايجابيه ؟؟

ولكى منى جزيل الشكر والتقدير

اما بالنسبه ل SoSoRaNy فهى هى عضوه ممتازه تتمتع بخفة ظل ويعجبنى ارائها وطبعا تحب الصدق لا الكلام المذيف وشكرا

[مغتربة]

من خلال قراتى لبعض المشاركات واضح ان العضوه انسانه مثقفه جدا وقارئه ممتازه جدا وتتمتع باسلوب ممتاز وليها فكر فى كل المواضيع مع انى الاحظ ان بعض تكباتها تميل شويه الى الفلسفه مما يعجز الضعفاء امثالى على فهمه وده طبعا العيب مش عندها العيب عند الضعفاء امثالى ؟؟؟؟ !!!

اشكر لك كلماتك اخى الكريم

و صدقنى هى ليست ميل للفلسفه اكثر مما هو اسلوب كتابه يتمتع به كل انسان عن الاخر

و بالنسبه لما قد يغمض عليك من كلماتى فبالتاكيد ان الخطا منى لاننى لم استطيع تووضيح فكرتى بشكل واضح

فاسالنى اخى الكريم عما يلتبس عليك فيها بلا اى مشكله

دمت بالف خير

[التونسى]

على فكرة مش شرط أن الناس ما بتشتركش عشان خايفة!!

مش كل الناس عارفة بعض...أو عندها صورة كاملة عن الكل

عشان تدى رأيك فى حد لازم يكون فى ظرفين عشان الرأى دة يبقى مضبوط

يا إما العضو مشاركاته كتير جدا لدرجة إنك قاريه شخصيته

يا إما حد لفت نظرك بمداخلة فى أحد الموضوعات وبقيتى مهتمة تدورى على مداخلاته الأخرى

سوسورانى

كلامك اعلاه اختى الكريمه واقعى الى حد كبير

ومن هذا المنطلق ممكن اقولك رأيى ((او انطباعى المبدئى )) عنك

أرى أنكى شخصيه جريئه بعض الشئ ((لااعرف ان كانت جراءتك فقط من وراء حجاب.. اى عبر الانترنت او ما شابه .. او هى جراءة فى الواقع الحياتى ايضا )) .. تميلين الى الحريه الفكريه فى مناقشة كافة الموضوعات .. حتى فى الموضوعات الحساسه او ما نعتبرها كمصريين ((موضوعات محظور او غير مستحب الخوض فيها ومناقشتها على الملأ))..

أراكى شخصيه مثقفه بدرجه جيده .. لديك وجهة نظرك الخاصه .. والمغايره فى بعض الاحيان .. مما يجلب عليكى بعضا من متاعب اللبس وسوء الفهم عند البعض

تهتمين بالمراءه ككيان ترين انه يحتاج لمزيد من الاهتمام فى سبر اغواره وكشف النقاب عن ماهيته الحقيقيه .. المختلفه عن الصوره الذهنيه المرسومه لدى البعض

متذوقه ومحبه للادب والشعر .. مما أشعرنى ان شخصيتك تتأرجح بي الحالميه والواقعيه

وكفايه كده واتمنى مكنش شطحت برأيى الى ما هو ابعد من شخصيتك الحقيقيه .. ومتنسيش ان موضوعاتك ومداخلاتك وفترة تواجدك بالمحاورات غير كافيه للتعرف عليكى بالشكل الكافى

منساش احيى الاخت الفاضله مغتربه على اللعبه الجميله والمثيره فى نفس الوقت

مع خالص تحيتى

التونسى

[SoSo R]

الفاضل التونسى:

لا أعلم إذا كان التعقيب مسموح به فى هذه اللعبة أم لا...ولكن لتسمح لى مغتربة بالتعقيب..

أحييك سيدى على وجهة نظرك السديدة

لقد قرأت ما بين سطورى رغم أن عمرى المحاوراتى-كما ذكرت- ليس كبيرا

الجرأة ليست سبة بل على العكس أعشق الشخص الجرىء رجلا أم مرأة

لأنها تنعكس على كل ظروفه الحياتية..كل تعاملاته..كل قراراته

أصبت سيدى حينما قلت أن البعض قد يروا هذه الجرأة على أنها ضرب من الوقاحة

ولكن لا يهم..مادام الأنسان يعبر عما يختلج فى صدره

إذا لم يستوعبوك الأشخاص المحيطين فى حينه..قد يقدروك فيما بعد

أما عن المرأة ...ذلك اللغز المحير لكثيرين

والذى قيل أن فهمها هو ضرب من الجنون...

لها حق أن نضىء ضوء كاشف داخلها...ليرى الآخرون جمال هذا الكائن العذب الذى يضفى وجوده مذاقا على كل ما يلمسه و يتعامل معه

دورى..

أنت شخص مثقف جدا

حساس

مشاعرك جياشة

شاعر بدرجة دكتور

أحيانا أجد صعوبة فى مجاراة كلماتك و إستيعابها

ألمس أحيانا لمسة حزن تزين كلماتك

هل هى هموم الوطن؟؟؟

أم هموم الحياة؟؟

تحتاج إلى قليل من البسمة

و تقليل من الجدية

تحياتى

سوسورانى

[سهل جدا]

طيب أنا دلوقتي مش عارف أحط مين في المرايا ...

الأخ الفاضل المهذب التونسي تكلم عن الأخت سوسو راني

وبعدين راحت هي تكلمت عنه

فمش عارف أتكلم عن مين دلوقتي

طيب ..

هاضطر أشوف صاحبة الموضوع كده ..

أعني الحاجة مغتربة bv:-

الكل بيجاملها ما حدش نقدها خالص

وأنا بصراحة طول عمري راجل مدبّ ما بعرفش أجامل .. :lol:

شوفي يا ست مغتربة ..

من صفاتك الجيدة: الثقافة - الذكاء , وأكيد طبعا في صفات جيدة أخرى بس هاكتفي بالاتنين دول عشان ما تصابيش بالغرور :blush2:

أما بقى العيب اللي لمسته فيكي (بدون زعل) هو إن ثقتك بعقلك زائدة عن اللزوم

ولاحظت إنك أحيانا تقدمين العقل على بعض الأحكام الشرعية..

على فكرة أنا أتفق معاكي في إن العقل محترم جدا في الإسلام , وآيات القرآن كثيرة في كده ..

فهو يخاطب (أولي الألباب) ... (قوم يتفكرون) ... (قوم يعقلون) وغيرها من الآيات الكثيرة التي تؤكد احترام العقل

لكن مربط الفرس هو أن العقل له حدود لا ينبغي أن يتخطاها..

فلا يمكن بحال أن يعلق المؤمن إتباعه لله ورسوله على عقله ..

وإنما لسان حال المؤمن أن يقول: {سمعنا وأطعنا}

سواء علم الحكمة من الأمر الإلهي أم لم يعلم

وقد حدثت قصة مع أفقه وأعلم امرأة عرفها التاريخ.. السيدة عائشة رضي الله عنها

حينما جاءت امرأة وسألتها: مَا بَالُ الْحَائِضِ تَقْضِي الصَّوْمَ وَلَا تَقْضِي الصَّلَاةَ

فَقَالَتْ السيدة عائشة لها: أَحَرُورِيَّةٌ أَنْتِ..

كَانَ يُصِيبُنَا ذَلِكَ فَنُؤْمَرُ بِقَضَاءِ الصَّوْمِ وَلَا نُؤْمَرُ بِقَضَاءِ الصَّلَاةِ...

والحديث في صحيح البخاري ومسلم..

الشاهد من هذه القصة هو أن مجرد الأمر بقضاء الصيام وعدم قضاء الصلاة للحائض يكفي لاتباعه , دون معرفة الحكمة من ذلك

ومثله من يقحم عقله في تشريع الله مثلا في موضوع تعدد الزوجات ويتساءل لماذا وما سببه ولماذا أربع تحديدا؟؟

ومثله من يعترض على تحر يم التعامل مع البنوك التي تتعامل بالربا معتبرا إياها ضرورة من ضرورات العصر ..

ومثله ومثله ومثله ....

أعتذر عن المضايقة وتقبلي مروري :lol:

[مغتربة]

طيب أنا دلوقتي مش عارف أحط مين في المرايا ...

الأخ الفاضل المهذب التونسي تكلم عن الأخت سوسو راني

وبعدين راحت هي تكلمت عنه

فمش عارف أتكلم عن مين دلوقتي

طيب ..

هاضطر أشوف صاحبة الموضوع كده ..

أعني الحاجة مغتربة :)

لم احج حتى الان للاسف ربنا يسمع منك

الكل بيجاملها ما حدش نقدها خالص

وأنا بصراحة طول عمري راجل مدبّ ما بعرفش أجامل ..

ما هو احنا من اول يا استاذ سهل قولنا من غير مجامله يعنى متقلقش اساسا الصنف مش عايزينه

شوفي يا ست مغتربة ..

من صفاتك الجيدة: الثقافة - الذكاء , وأكيد طبعا في صفات جيدة أخرى بس هاكتفي بالاتنين دول عشان ما تصابيش بالغرور :)

لا ما تخفش اعوذ بالله من الغرور او ان اكون من اهله

لكن هناك فرق بين الغرور و الثقه فى النفس

أما بقى العيب اللي لمسته فيكي (بدون زعل) هو إن ثقتك بعقلك زائدة عن اللزوم

ولاحظت إنك أحيانا تقدمين العقل على بعض الأحكام الشرعية..

لم يحدث و اقولها لك بكل ثقه

و اذا كان لديك ما يدعم قولك من مشاركاتى فذكرنى به

و لكن اطمئنك من الان لن تجد باذن الله تعالى

على فكرة أنا أتفق معاكي في إن العقل محترم جدا في الإسلام , وآيات القرآن كثيرة في كده ..

فهو يخاطب (أولي الألباب) ... (قوم يتفكرون) ... (قوم يعقلون) وغيرها من الآيات الكثيرة التي تؤكد احترام العقل

لكن مربط الفرس هو أن العقل له حدود لا ينبغي أن يتخطاها..

فلا يمكن بحال أن يعلق المؤمن إتباعه لله ورسوله على عقله ..

وإنما لسان حال المؤمن أن يقول: {سمعنا وأطعنا}

سواء علم الحكمة من الأمر الإلهي أم لم يعلم

وقد حدثت قصة مع أفقه وأعلم امرأة عرفها التاريخ.. السيدة عائشة رضي الله عنها

حينما جاءت امرأة وسألتها: مَا بَالُ الْحَائِضِ تَقْضِي الصَّوْمَ وَلَا تَقْضِي الصَّلَاةَ

فَقَالَتْ السيدة عائشة لها: أَحَرُورِيَّةٌ أَنْتِ..

كَانَ يُصِيبُنَا ذَلِكَ فَنُؤْمَرُ بِقَضَاءِ الصَّوْمِ وَلَا نُؤْمَرُ بِقَضَاءِ الصَّلَاةِ...

والحديث في صحيح البخاري ومسلم..

الشاهد من هذه القصة هو أن مجرد الأمر بقضاء الصيام وعدم قضاء الصلاة للحائض يكفي لاتباعه , دون معرفة الحكمة من ذلك

ومثله من يقحم عقله في تشريع الله مثلا في موضوع تعدد الزوجات ويتساءل لماذا وما سببه ولماذا أربع تحديدا؟؟

ومثله من يعترض على تحر يم التعامل مع البنوك التي تتعامل بالربا معتبرا إياها ضرورة من ضرورات العصر ..

ومثله ومثله ومثله ....

اخى الكريم لا احد يدعو لاعمال العقل فى الاحكام الشرعيه

لانها قاطعه وواضحه

و علينا حقا ان نقول سمعنا و اطعنا

و لكن هناك فرق كبير بين الاشياء التى حسمها الشرع بصوره قاطعه

و بين المساحه الفضفاضه الاخرى المتروكه

و الا لما نشات معظم العلوم الدينيه المعروفه حاليا

و لاصبحت مفاهيم كثيره تحتل ركن كبير فى الفقه الاسلامى كالقياس و الاستنباط و الموازنه لا محل لها من الاستخدام

و لا تنسى انه من اهم الاسس الراسخه فى علم الفتوى

ان الفتوى تتغير بتغير الزمان و المكان

و لا لايه

أعتذر عن المضايقة وتقبلي مروري :rolleyes:

لا توجد اى مضايقه اخى الكريم

دمت بالف خير

والان استاذ سهل جدا استعد لان العضو القادم سيكون مرآتك انت

هه مين يا جماعه سيقدم لنا رؤيته للاستاذ سهل جدا

تحياتى لكل من شارك فى الموضوع

[alsaher]

إنتو غيرته رأيكم ولا إيه النظاااااااااام ؟؟

انا شايف الموضوع قلب نقاش clp::

الأخ سهل جدا

حسب إستنتاجي فإنت راجل ملتزم ، تحمل شيئا من المرح في داخلك ويظهر في بعض ردودك ، أعتقد أنك لا تحمل ضغينة أو كره لأحد حتى لو إشتد النقاش معه

نيجي للسلبيات اللي حضرتك بتحبها :lol:

في نظري متشدد نوعا ما في بعض وجهات نظرك

أحيانا تخلط بين الجد والمزاح ، مما يؤدي لفهم خاطئ من الآخرين لحضرتك

وأعتقد إنه ده بيكون بنية سليمه لتلطيف أجواء النقاش ، لكن أحيانا بيجيب نتائج عكسيه :lol:

قضية تعدد الزوجات ، أراك واثق من نفسك في مقدرتك على تحقيق شرط العدالة ولمبني عليه تحليل التعدد ، ودائما تقول أنه حق من حقوق الرجل

في حين أنني أرى أو أفهم أنه مخرج للرجل يسره الله وأباحه ضمن شرطه ليس كقاعده وإنما كحل لكثير من المشاكل الإجتماعية وتيسير منه سبحانه

وحفت الجنة بالمكاره وحفة النار بالشبهات ، والعدل قضية شائكة قد تدخل ضمن الشبهات !!

عموما في إعتقادي أنك تناقش الأمر من ناحية فقهية ولا أظن أنك قد تقدم عليه clp::

أمر أخير أحيانا اشعر أنك تقوم بدور الوعظ أكثر من النقاش ، في بعض المسائل

وبالطبع هذا يبقى رأي شخصي ، ليس بالضروره صحته

وإتمنى أكون ما ضايقت حضرتك

وتحياتي لك وللجميع هنا

[waloaa]

لعبة جميلة جدا

شكرا ليكي يا مغتربة

بتهيألي حتوضح انطباعتنا عن بعضنا...ومدي تطابقها مع الواقع

بالنسبة ليك يا ساهر

مش عارفة ليه كنت ف الاول متوقعة انك كبير ف السن...يعني اواخر التلاتينات

يمكن بسبب اراءك اللي كنت بحس ان وراها خبرة كبيرةفي الحياه

بس بجد ما شاء الله انت بتتمتع بسمو في التفكير وبعد ف النظر

اسلوبك ف الكتابة مميز ...مجامل وبتحافظ على مشاعر الاخرين clp::

بالنسبة للسلبيات: بحس انك ساعات بتكون عصبي ....يمكن لما اللي قدامك ما بيكونش فاهم وجهة نظرك وانت بتحاول توضحهاله

اه نسيت حاجة تانية .....انك بتسهر كتير يا ساهر........حافظ على صحتك يا راجل clp::

[ام بودى]

ممكن اشترك معاكم بالنسبة لولوءة اراها بنوتة لذيذة تتمتع بخفة دم وروح طفولية ولها حضور يضفى روحا شبابية مرحة على الموضوع الذى تشارك فية طيوبة ودودة ومهذبة فى كل ردودها اما عيوبها انها بتقعد على النت كتير وانا عايزاها تذاكر مااااشى يا لولو

[Alrefaey]

هل من الممكن ان احكم على شخصية شخصا ما طبقا لكتاباتة اكيد فية صورة معينة اتكونت فى اذهانا عن باقى الاعضاء لكن فى اعتقادى انها لا تمثل فى اقصى تقدير الا 30 % من الشخصية الواقعيه

فيه بعض الصفات ممكن تستشف من الكتابة كالثقافه العامة ,اللباقة ,الجد او المزح .....

اما اكثرية الصفات الحياتية العملية اعتقد انها صعبة انها تظهر فى الكتابة بصورة واضحة

بمعنى الاخت مغتربة مثلا تبدو من كتابتها انها مثقفه ,مرتبة ,ذو شخصية عاقلة تتحمل المسؤلية لكن هناك الكثير من الصفات لا تتضح الا عن قرب

الاخت فاتفوتة مثلا تبدو بسيطة ,مودية ,مرحة ممكن تكون قلوقه شوية

الاخ سهل جدا مثلا اعتقد انى لو قابلته فى الواقع مش هعرفة تماما

تحياتى واوعى حد يزعل دى مجرد انطباعات

[fatfouta]

الاخت فاتفوتة مثلا تبدو بسيطة ,مودية ,مرحة ممكن تكون قلوقه شوية

شكرا يا رفاعى على النقد البناء والوصف الجميل

اقول انا بقى؟

انت بقى يا سيدى انك طموح جدااااااااا وده شى كويس فيك وكمان معتمد على نفسك وده برده كويس وكمان مش بتعرف تجامل

لكن السلبيات بقى اللى دايما بحسها فيك انك بتحب الغربة وعجباك وبتهاجم مصر كتير وبتظهر سلبياتها وانا عارفة ان ده كويس عشان نحط ايدينا عالسلبيات الكتييييييير لكن لازم تحب مصر اكتر من اى بلد عشان دى مصر مهما ان كنت سعيد هنا اقصد فى الغربة يعنى وماتزعلش منى

ياللا يا جماعة انتوا وقفتوا ليه؟؟؟؟

تم تعديل 15 أبريل 2009 بواسطة fatfouta

[عنبو]

الاخت فتفوته بجد تحس انها اختك قريبتك معرفش ليه بس شكلها عصبيه شويتين وطبعا لما بتبقى عصبيه بتبقى انسانه تانيه خالص

بتحب اولادها كتير وبيتها وطبعا جوزها على العموم انسانه بنت بلد

طبعا ده كلامى من خلال قراتى لمشاركات العضوه

وشكرا

[مغتربة]

إنتو غيرته رأيكم ولا إيه النظاااااااااام ؟؟

انا شايف الموضوع قلب نقاش

لا ابدا يا ريس

هيه بس شويه تحابيش انت عارف برضه ان الامر ميسلمش

لازم برضه حته دراما على حته اكشن و شويه خفيف

علشان يبقى فيلم مصرى بامتياز

[مغتربة]

تحياتى واوعى حد يزعل دى مجرد انطباعات

لا مجال للزعل اخى الكريم كلنا اخوه هنا

و اشاركك فى اغلب رايك عن مدى القدره على الحكم على الشخصيه

و اشكر لك جدا كلماتك فى حقى

دمت بالف خير