عندك استفسار عن التخدير ؟

[د هشام ابراهيم]

بسم الله الرحمن الرحيم

الحقيقة فكرة الموضوع ده ترجع لاخ فاضل و عزيز اقترح إن العبد لله يرد علي استفسارات الأخوة و الأخوات الافاضل أعضاء منتدانا المحترم فيما يخص المعتقدات الخاطئة الخاصة بالطب

طبعا رحم الله امريء عرف قدر نفسه ....اللي أقدر أعمله اني أرد في المجال اللي أنا متخصص فيه ....التخدير

بداية أعرفكم بنفسي .... اعتبروها زي يافطة عيادة يعني

العبد لله طبيب مصري و عضو بالمنتدي لفترة قصيرة نسبيا .... حاليا مقيم في كندا بعافر مع المعادلات الكندية و قبل كده مدرس في طب القاهرة حيث كانت دراستي

بكالوريوس طب و جراحة ١٩٩٥

ماجستير التخدير ١٩٩٩

دكتوراه التخدير و علاج الألم ٢٠٠٣

توكلنا علي الله

[د هشام ابراهيم]

الحقيقة الأسئلة التالية كانت اتقالت في موضوع تاني انما أعتقد مكانهم أنسب هنا ما دمنا فتحنا الموضوع ده :

عرض إمبارح فى برنامج شوبير على قناة الحياة قصة ولد أسمه عبدالله

طفل عادى عنده 8 سنين...كان رياضى بيلعب كراتيه و كرة قدم تحس بإقباله على الحياة

الولد تعب فى المدرسة ..إتنقل على المستشفى...إتشخصت إلتهاب فى الزايدة

قعد فى العمليات 5 ساعات...

للأسف الولد خرج جثة...يعنى الوردة المفتحة ..دبلت

ودة كله بسبب جرعة زيادة فى التخدير

بصراحة لما شفت شكله قبل و بعد...قلبى وجعنى

أنا عايزة أفهم بس حاجة طبية

إزاى جرعة زيادة تدمره بالشكل دة؟؟؟

الطفل أصبح زى الأطفال المينتال...غير مدرك لأى شىء

يعنى صاحى و مش مدرك

السينترز للسمع و النظر فى المخ إتدمروا

و الحاجة اللى فعلا عايزاك تشرحهالى لأنى عارفة إن تخصصك تخدير

إزاى يعنى يجيلوه تشوهات فى العظام...دة أصبح زى اللى عندهم شلل أطفال أو لين عظام فى شكل أطرافه

حدوث مشاكل أو أثار جانبية أو مضاعفات وارد في مجال الطب و ليه نسب معروفة ..... ديه حاجة..... انما الكوارث الناتجة عن الاهمال حاجة تانية خالص

أنا ما عنديش أي معلومات عن الحادثة ديه بالذات فمش حاقدر أعلق عليها انما فيه نقط عامة ممكن أذكرها

- جملة " جرعة بنج زائدة " ديه كليشيه محفوظ عند الاخوة وكلاء النيابة و ما لوش أي علاقة باللي بيحصل فعلا .....الجملة ديه مفروض تختفي من قاموس الفلكلور المصري لأنها بصراحة لا معني لها في الأغلب الأعم

- معظم المشاكل اللي بنسمع عنها بسبب التخدير ليها علاقة بالتنفس الصناعي ....سواء أنبوبة التنفس الصناعي (Endotracheal tube ) أو جهاز التنفس الصناعي اللي هو جزء لا يتجزأ من جهاز التخدير (Anesthesia Delivery Unit )

- كخطوة أساسية في معظم حالات التخدير الكلي بيتم وضع أنبوبة التنفس الصناعي في القصبة الهوائية للمريض ....الحكاية ديه لازم تتعمل بسرعة و طريقة صحيحة و يتم التأكد من صحة مكان الأنبوبة بعدة وسائل .....بعد كده يتم توصيل المريض بجهاز التخدير

- لو حصلت مشكلة في عملية وضع الأنبوبة ... أو ابقائها في مكانها .... أو مشكلة في جهاز التخدير .إلخ ..... يتم حرمان المريض من الأوكسجين ....لو الموضوع ده طال عن عدة دقائق بيحصل ضرر مباشر للمخ

- المخ لما بيتعرض لنقص الأوكسجين بينتج عنه اصابة (Hypoxic brain insult) الأصابة ديه أعراضها بتختلف حسب درجة النقص و مدي تأثر المخ منها .....بتتراوح من مشاكل بسيطة في الذاكرة أو التفكير مرورا بضمور المخ و الشلل و الغيبوبة و تصل حتي الوفاة

- بسبب اصابة المخ خاصة إذا كانت منطقة الاصابة قريبة من مراكز الحركة المخية ..... المريض بيجيله مشاكل في العضلات من تشنج مستمر و أعراض تانية ده اللي بيخلي أطرافه تبان في أوضاع غير طبيعية

- أغلب الحالات ديه ما دامت وصلت لمراحل متقدمة بيبقى الأمل في شفائها شبه معدوم

لتجنب المشاكل ديه انها تحصل فيه لستة طويلة من الأجراءات اللي لازم تتعمل قبل و أثناء و بعد التخدير ......لو الطبيب إتبع كل الأجراءات ديه و حصلت مشكلة خارج نطاق سيطرته يبقى لا ذنب عليه .....لو فيه خرق أو تجاهل لخطوة أو أكتر من اللستة ديه يبقى إهمال طبي .....

ربنا يقينا جميعا شرور الاهمال ...طبي و غير طبي

[د هشام ابراهيم]

في حاجات كتير الواحد بيسمعها وبجد من كتر تداولها بين الناس بدون علم بترسخ مفهوم غلط

يعني مثلاً انا سمعت ان البنج النصفي ممكن يجيب شلل لأن الحقنه ممكن تدخل في الحبل الشوكي وطبعاً الكلام ده يتهيألي انه نادر قوي بس بيخوف

وكذلك مثلاً اللي بيبقى عنده التهاب سحائي (السحايا) اللي اعرفه لازم ياخدوا عينه من الحبل الشوكي برضو الناس بتخاف من كده

بالنسبة لحدوث مشاكل و مضاعفات للاعصاب مع البنج النصفي (من أول تنميل مستمر مرورا بفقدان الاحساس علي الجلد و لغاية الشلل الدائم ) ديه كلها مضاعفات نادرة جدا للبنج النصفي .... أغلب الأرقام بتتراوح حوالين ١ / ١٠٠٠٠٠ أو أقل ..... فيه عوامل كتير ممكن تبان من الكشف علي منطقة الظهر قبل عملية التخدير نفسها و اللي ممكن تقول المضاعفات ديه نسبة حدوثها قليلة و لا لأ ..... حقنة البنج النصفي لا تصل ابدا إلي الحبل الشوكي (إلا يعني لو دكتور التخدير ما كملش طب و اتخرج من هندسة مدني :lol:)

في حالة الالتهاب السحائي( و أمراض تانية) العينة بتبقى من سائل النخاع الشوكي مش من الحبل الشوكي نفسه و طبيعي لازم اللي يقوم بالعملية ديه يكون متخصص و قام بيها كتير قبل كده ..... طبيب تخدير ...طبيب أمراض عصبية ....طبيب طوارئ ....إلخ

[dongol]

طيب انا هبتدي الاسئله توكلنا علي الله

سؤالي هو هل الانسان له كميه معينه من البنج ياخدها طوال عمره و لو زادت عن كده يبتدي المخ يتأثر و يحصله مضاعفات

معلش انا بسأل لاني عملت 3 عمليات و اخدت بنج كلي في الثلاثه و خايف مع تقدم السن ما اقدرش اخد بنج كلي تاني و ساعتها هتكون مشكله لا قدر الله

شكرا

[د هشام ابراهيم]

طيب انا هبتدي الاسئله توكلنا علي الله

سؤالي هو هل الانسان له كميه معينه من البنج ياخدها طوال عمره و لو زادت عن كده يبتدي المخ يتأثر و يحصله مضاعفات

معلش انا بسأل لاني عملت 3 عمليات و اخدت بنج كلي في الثلاثه و خايف مع تقدم السن ما اقدرش اخد بنج كلي تاني و ساعتها هتكون مشكله لا قدر الله

شكرا

لا يا أفندم .... ما فيش حد أقصي لعدد مرات التخدير اللي الواحد ممكن ياخده ..... و ما فيش ما يمنع التخدير مع تقدم العمر اذا اتبعت الأجراءات و البروتوكولات الصح ..... طبعا مع تقدم العمر أو وجود أي علة او مرض بيبقى فيه احتياطات معينة بيقوم بيها طبيب التخدير لضمان سلامة المريض

مع وجود ملاحظتين :

- التخدير الكلي للمتقدمين في السن ( ما فيش تعريف طبي ثابت لسن الشيخوخة) قد يصاحبه أعراض ذهول و نسيان و سلوك غير منطقي لعدة ساعات قد تمتد لايام فيفضل إن المريض يستني في المستشفي في الفترة ديه

- تكرار التخدير في مدة قصيرة .... يعني ٣ عمليات في يومين مثلا ...برضه ممكن يحصل معاها مشاكل شبيهة و إختلاف في رد فعل الجسم لبعض الأدوية

اطيب تمنياتي بالصحة و السلامة باذن الله

[fatfouta]

ايوه يا دكتور هشام شاطر فتحت موضوع والله كان شغلنى

هسالك سؤال بقى

بص يا سيدى هو فيه حاجة اسمها نحطك على جهاز البنج ؟ يعنى غير حقنه البنج فيه جهاز؟

ولو تكرمت وجاوبتنى هقولك انا سالتك ليه وهسالك سؤال تانى

شكراا

[SoSo R]

مساء الفل يا دكتور:

أولا نهنىء بالكوفى الشوب الجديد..أنت كدة قفلت على المنتدى...مش عاتق يعنى

مش بعيد بعد شوية ألاقيك أزرقيت زى صاحبنا اللى اخضر و ساعتها..........................ربنا يستر!!!

المهم أنا عايزة حق إستغلال المداخلة بتاعتى..

يعنى تفتتح القهوة بالمداخلة بتاعتى....و بعدين ما تذكرش أسمى...ما ينفعش يا فندم!!

المهم ...

عشان نحرك لك الموضوع

هل فيه مرضى بيبقى عندهم حساسية من أنواع معينة من التخدير؟

بتتعرف إزاى؟؟ليها تيست زى سينستيفتى بتاع الأنتيبيوتيكس؟؟؟

دة أنا هاهريك أسئلة......بس أوعى تقول جاااااى

تحياتى

سوسورانى

[ام بودى]

السلام عليكم صباح الخير يا دكتور هشام الحقيقة دة موضوع جميل منك واحييك علية واكيد ححتاجلك فى بعض الاستفسارات الفنية المتعلقة بالمهنة اصل انا طبيبة نسا ودكتور النسا ودكتور التخدير ما يستغنوش عن بعض بس انا مش محضرة حاجة دلوقتى بس لو سمحتلى كنت حابة اسألك فى موضوع تانى غير التخدير انا وحضرتك نفس الجيل انا دفعة 96 ومعايا دبلومة نسا وولادة ومقيمة فى قطر منذ 3 سنوات الشغل هنا صعب بالدبلومة وبفكر جديا فى الزمالة البريطانية كنت عاوزة اسألك عن رأيك يعنى بعد 12 سنة تخرج ينفع ابتدى اذاكر ولا الحكاية دى طويلة وit,s too late وشكرا لحضرتك .

فتفوتتى صباح الفل انا سالت عليكى اول ما دخلت المنتدى قالولى حتلاقيها فى مستوصف الدكتور هوشام فى الحارة اللى ورانا جنب بتاع العصير ما كدبتش خبر وجيت جرى عشان الحقك خير ياختى كفااللة الشر على فكرة لو عندك استشارة حريمى نسا يعنى احنا فى الخدمة ولو حريمى اوى ابعتيلى تلغراف ايميلاوى صباح الجمال

[newcomer]

دايما سباق بالخير يا دكتور.....

توبيك مفيد اوى........ربنا يشفى مرضانا جميعا....امين

بالمناسبة .....انا باخاف من العمليات

اكيد زى كل الناس......

بس انا خوفى من العمليات ....له سبب مرتبط بالتخدير

يعنى ....خوفى من ان عقلى يتغيب....

و يبقى ماليش حق انى اقرر لنفسى...!!

و فى نفس الوقت .....متخيلش نفسى باخد بنج نصفى

و انا صاحية .....و الدكاترة بيشتغلوا....و انا متبعاهم

اكيد حضرتك قابلت ناس زيى كتيير..... مافيش حاجة مريحاهم

الله يكون فى العون

عموما ساعة العمليات....عمرى ما نقيت :happy:

كنت باقول ....حااااااااااضر و بس wst::

سؤال ....على الماشى.....علشان الافتتاح

هوه فعلا شرب كافيين كتيير ...شاى ...قهوة ...نسكافية...كابيتشينو....الخ

بيخلى جرعة البنج اكتر....علشان المريض ينام؟؟؟

[د هشام ابراهيم]

هو فيه حاجة اسمها نحطك على جهاز البنج ؟ يعنى غير حقنه البنج فيه جهاز؟

بالفعل يا سيدتي الفاضلة يوجد جهاز للتخدير ..

في أغلب حالات التخدير الكلي يتم اعطاء أدوية عن طريق الوريد لبداية عملية التخدير ثم يتم توصيل المريض إلي جهاز لمواصلة عملية التخدير عن طريق أدوية التخدير الغازية التي تصل لرئة المريض من خلال أنبوبة (فضلا راجعي المشاركة رقم ٢ في هذا الموضوع )

لجهاز التخدير وظائف عدة أهمها ...التنفس الصناعي و ايصال الاكسجين و غازات التخدير إلي المريض

صورة لجهاز تخدير حديث نسبيا

تقبلي تحياتي و في انتظار بقية السؤال

[د هشام ابراهيم]

هل فيه مرضى بيبقى عندهم حساسية من أنواع معينة من التخدير؟

بتتعرف إزاى؟؟ليها تيست زى سينستيفتى بتاع الأنتيبيوتيكس؟؟؟

أهلا و سهلا بحضرتك يا دكتورة

- أدوية التخدير زيها زي أي دوا ممكن تسبب حساسية ( Allergy ) و ممكن الحساسية ديه تصل لمرحلة خطيرة (Anaphylaxis )

تشخيص الحساسية لدوا معين ممكن خصوصا لو فيه تاريخ عائلي لحساسية أو وجود علات مثل الربو بالذات لو جزء من متلازمة (Asthma or Atopy) أو التهابات جلدية اتصالية (Contact dermatitis)

التشخيص بيبقى أساسا عن طريق التاريخ المرضي و الفحص الاكلينيكي و ساعات فحوصات الدم الخاصة بالحساسية

العلاج بيبقى علاج للاعراض و قد يصل لاعطاء أدرينالين وريدي في الحالات القصوي

- بالمثل الحساسية ممكن تحصل مع اعطاء أي أدوية تانية أثناء التخدير ....مضادات حيوية ....صبغات طبية ....محاليل وريدية إلخ

و أيضا ممكن تحصل مع استخدام جوانتيات طبية معينة أو استخدام قساطر أو أنابيب ..إلخ

- جملة " حساسية من البنج " عادة ما تعني حاجة تانية خالص و تقع تحت استخدام الكليشيهات الخاطئة

في الأغلب بتعني واحدة من اتنين من الأثار الجانبية النادرة لادوية التخدير

١ - ارتفاع درجة الحرارة الخبيث Malignant Hyperthermia

ارتفاع حاد في درجة حرارة المريض مع إعطاء أدوية معينة .....ارتفاع درجة الحراره بيبقى بدرجة مفاجئة و كبيرة و قد تؤدي للوفاة

التشخيص ممكن مع وجود تاريخ عائلي و يوجد اختبار عن طريق عينة بسيطة من العضلات لتأكيد التشخيص

العلاج بيعتمد علي وجود دواء مخصوص لمعالجة الحالة ديه و موجود في المستشفيات الكبيرة و علي علاج الأعراض

٢- توقف التنفس الناتج عن الساكسنيل كولين Succinyl Choline Apnea

الساكسنيل كولين مرخي للعضلات و بيؤدي لتوقف التنفس كده كده .... بالعكس هو ده المطلوب منه ...لكن المفروص إن مفعوله ينتهي بعد دقائق ..... في حالة وجود نقص في الأنزيم المسئول عن التخلص من السكسنيل (كولين استراز) بيمتدد المفعول لساعات ....سواء كان النقص ده في الكيف أو الكم

التشخيص برضه بيعتمد علي التاريخ المرضي كما يوجد إختبار لقياس نسبة كفائة الانزيم (لحد ما سبت مصر ما كانش موجود علي حسب علمي )

العلاج بيبقى الابقاء علي التنفس الصناعي حتي زوال أثار الدواء .... اعطاء مضاد لمفعول الدواء ممكن كمان و لكنه صعب و غير متوافر

تحياتي يا سيدتي الفاضلة و ما تخافيش مش حاقول جاي

[somayasaleh]

بسم الله الرحمن الرحيم

الحقيقة فكرة الموضوع ده ترجع لاخ فاضل و عزيز اقترح إن العبد لله يرد علي استفسارات الأخوة و الأخوات الافاضل أعضاء منتدانا المحترم فيما يخص المعتقدات الخاطئة الخاصة بالطب

طبعا رحم الله امريء عرف قدر نفسه ....اللي أقدر أعمله اني أرد في المجال اللي أنا متخصص فيه ....التخدير

بداية أعرفكم بنفسي .... اعتبروها زي يافطة عيادة يعني

العبد لله طبيب مصري و عضو بالمنتدي لفترة قصيرة نسبيا .... حاليا مقيم في كندا بعافر مع المعادلات الكندية و قبل كده مدرس في طب القاهرة حيث كانت دراستي

بكالوريوس طب و جراحة 1995

ماجستير التخدير 1999

دكتوراه التخدير و علاج الألم 2003

توكلنا علي الله

يا صباح الخير والفل والورد يا د. هشام

مبروووووووووك علي القهوة الجديدة........ وفكرة هايلة فعلا

انا عن نفسي.....كنت زي كل الناس لا اعرف عن التخدير غير ان الانسان ياخد حقنة ينام علي طول.....

لحد لما اسعدني واكرمني الله تعالي بزوجي الفاضل ...( استشاري تخدير حاليا)..... وطبعا كان يصحح لي كل المعلومات الغلط اللي الناس عارفاها عن التخدير

وبصراحة من كتر ما شرح لي في التخدير........حبيت القسم ده جدا،،،، وتمنيت لو الزمن يرجع وادخل طب.... قسم تخدير بالذات

بس علي فكرة الملاحظ ان كل اطباء التخدير........ ذوق ذوق ذوق ...... واخلاق عالية فوق الوصف......يمكن ده لانهم بيهتموا بالمريض جدا اثناء فترة الجراحة

بمعني...... الجراح بيكون عمال يقطع وويفتح في المريض...... بس طبيب التخدير.....هو المسئول عن المريض في كل شيئ

....انا بسمي اطباء التخدير دول.....

الجندي المجهول....... والملاك الحارس ......اثناء العملية

تقبل مروري دكتور هشام...... وفي انتظار رد حضرتك علي الاعضاء للاستفادة

صباح الفل

[د هشام ابراهيم]

انا دفعة 96 ومعايا دبلومة نسا وولادة ومقيمة فى قطر منذ 3 سنوات الشغل هنا صعب بالدبلومة وبفكر جديا فى الزمالة البريطانية كنت عاوزة اسألك عن رأيك يعنى بعد 12 سنة تخرج ينفع ابتدى اذاكر ولا الحكاية دى طويلة وit,s too late وشكرا لحضرتك

أهلا و سهلا بحضرتك يا دكتورة و شاكر لحضرتك كلمات الأطراء

الحقيقة سؤال صعب ....الاجابة واحدة من أشهر الاجابات علي مر التاريخ

It depends

أكيد المذاكرة صعبة كلما كبرنا في السن و المقام و الدرجة العلمية ...إلخ ...انما مش مستحيلة و ممكنة خصوصا مع وجود دافع قوي و حافز واضح

عارفة حضرتك أنا كنت باقول لنفسي كده برضه ...يعني معقول بعد كل ده ترجع تذاكر من أول و جديد ....و بعدين أبص حواليا ألاقي ناس أكبر مني ب-٢٠ و ٢٥ سنة و بيعملوا اللي أنا باعمله ساعتها بابطل شكوي

أطيب التمنيات يا سيدتي الفاضلة

[الجدار]

دكتورنا العزيز مسيو هشام

جزاك الله خير وجعل هذا الموضوع في ميزان حسناتك

انا دفعت الفزيتا قبل ما أدخل

أه .. الصداقة حاجة والشغل حاجة

Business is business

السؤال اللي عايز اسأله ليه الدكاترة بتفضل البنج النصفي عن البنج الكلي ؟

يعني انا كنت بعمل عملية والدكتور قال حديك بنج نصفي وانا تخيلت اني افضل صاحي وواحد عمال يقطع فيا فقلتله لأ انا عايز كلي

وده أبداً أنسى فمش عارف هل ده ليه سبب ؟؟ وبالذات ان الأبرة في الضهر الواحد لما بيتخيلها بيخاف مع انها مش بتوجع (عرفت بعد ما أخدتها)

نفس زمان لما كانوا بيقولولنا ان الكلب لو عض واحد لازم ياخد 21 حقنة في سرته كنت بصراحة بتخيل الأبرة وبحس بألم (لسه ماجبرتهاش وربنا يستر)

مبروك مرة تانية على العيادة

[د هشام ابراهيم]

انا باخاف من العمليات

اكيد زى كل الناس......

بس انا خوفى من العمليات ....له سبب مرتبط بالتخدير

يعنى ....خوفى من ان عقلى يتغيب....

و يبقى ماليش حق انى اقرر لنفسى...!!

و فى نفس الوقت .....متخيلش نفسى باخد بنج نصفى

و انا صاحية .....و الدكاترة بيشتغلوا....و انا متبعاهم

اكيد حضرتك قابلت ناس زيى كتيير..... مافيش حاجة مريحاهم

الخوف ده طبيعي يا سيدتي الفاضلة و منتشر بطبيعة الحال ....طول ما كان في الحدود الطبيعية بيبقى ما فيش مشكلة

الفكرة كلها إن عادة العملية الجراحية بتبقي ليها ضرورة ما ..... و ما ينفعش عملية من غير تخدير بصورة أو باخري .... مع اتخاذ كل الأحتياطات اللازمة التخدير بيبقى عملية آمنة إلي حد كبير و أولا و أخيرا الله خير حافظ

تحياتي يا سعادة المنسق العام wst::

[د هشام ابراهيم]

انا عن نفسي.....كنت زي كل الناس لا اعرف عن التخدير غير ان الانسان ياخد حقنة ينام علي طول.....

لحد لما اسعدني واكرمني الله تعالي بزوجي الفاضل ...( استشاري تخدير حاليا)..... وطبعا كان يصحح لي كل المعلومات الغلط اللي الناس عارفاها عن التخدير

وبصراحة من كتر ما شرح لي في التخدير........حبيت القسم ده جدا،،،، وتمنيت لو الزمن يرجع وادخل طب.... قسم تخدير بالذات

بس علي فكرة الملاحظ ان كل اطباء التخدير........ ذوق ذوق ذوق ...... واخلاق عالية فوق الوصف......يمكن ده لانهم بيهتموا بالمريض جدا اثناء فترة الجراحة

بمعني...... الجراح بيكون عمال يقطع وويفتح في المريض...... بس طبيب التخدير.....هو المسئول عن المريض في كل شيئ

....انا بسمي اطباء التخدير دول.....

الجندي المجهول....... والملاك الحارس ......اثناء العملية

صباح الخيرات يا أفندم

كلام حضرتك ده مفروض يتحط في برواز ذهبي و يتكتب مقدمة لكل كتاب تخدير ....جزاك الله كل خير .....وصف حضرتك لدور طبيب التخدير دقيق تماما و صحيح كلية ..... بارك الله في دكتورنا الفاضل و بارك فيكي يا باشمهندس wst::

[د هشام ابراهيم]

هوه فعلا شرب كافيين كتيير ...شاى ...قهوة ...نسكافية...كابيتشينو....الخ

بيخلى جرعة البنج اكتر....علشان المريض ينام؟؟؟

نظريا لأ ..... خصوصا إن الكافيين عمره مش طويل و الجسم بيتخلص منه سريعا و كمان المريض بيبقى صايم لعدة ساعات قبل التخدير

فرضيا لو كانت نسبة الكافيين عالية في الدم لأي سبب أثناء الأفاقة ممكن تأثر ساعتها بس تأثير غير ضار

ده مش معناه إن الكافيين من غير اضرار عامة

[د هشام ابراهيم]

السؤال اللي عايز اسأله ليه الدكاترة بتفضل البنج النصفي عن البنج الكلي ؟

يعني انا كنت بعمل عملية والدكتور قال حديك بنج نصفي وانا تخيلت اني افضل صاحي وواحد عمال يقطع فيا فقلتله لأ انا عايز كلي

وده أبداً أنسى فمش عارف هل ده ليه سبب ؟؟ وبالذات ان الأبرة في الضهر الواحد لما بيتخيلها بيخاف مع انها مش بتوجع (عرفت بعد ما أخدتها)

يا أفندم حضرتك صاحب بيت و الموضوع كله فكرتك أصلا يا صديقي العزيز

أنا شخصيا لا أفضل نوع تخدير عن الأخر في عدم وجود سبب طبي لاختيار طريقة عن أخري

يعني ساعات التخدير الكلي بيبقى مش مناسب لحالة المريض الصحية و ساعتها بنفضل التخدير النصفي أو الموضعي انما غير كده ما فيش حاجة كبيرة ترجح طريقة عن التانية

أهم ميزة للبنج النصفي إن درجة الالم من أثار العملية بتبقى أقل من مثيلتها لو كانت العملية تحت التخدير الكلي و بالتالي الحاجة لاستخدام أدوية الألم أقل

كمان فترة الأفاقة بتبقى أسهل للعيان من غير الدوخة و اللخبطة بتاعة البنج الكلي ....كمان القدرة علي الاكل و الشرب عادة أسرع

بالطبع غني عن القول إن التخدير النصفي زيه زي أي حاجة في الدنيا ليه عيوب و أثار جانبية فالقرار الأخير بيبقى موازنة للمزايا قصاد العيوب

أخر حاجة : ساعات قرار طريقة التخدير بيبقى لاسباب لوجيستية ليها علاقة بسير العمل في حجرة العمليات اكتر منه أي حاجة تانية و ده مش غلط طالما لم يؤثر علي الرعاية الطبية للمريض

[محمد عيسى]

السلام عليكم يا دكتور هشام

شكرا لحضرتك على الخدمة الممتازه دي و ربنا يبارك فيك

سؤالي عن التخدير في الولادة العاديه، معلوماتي عنه منعدمه فأرجو الإفاده عن مزاياه و عيوبه و أضراره و هل تنصح به كطبيب أم أن الأفضل هو احتمال الألم؟ و هل يفرق في هذا الموضوع نحافة أو سمنة الأم

ربما تشاركنا الدكتورة أم بودي هذه المناقشة .. اتمنى افهم بجد الموضوع ده

[fatfouta]

هو فيه حاجة اسمها نحطك على جهاز البنج ؟ يعنى غير حقنه البنج فيه جهاز؟

بالفعل يا سيدتي الفاضلة يوجد جهاز للتخدير ..

في أغلب حالات التخدير الكلي يتم اعطاء أدوية عن طريق الوريد لبداية عملية التخدير ثم يتم توصيل المريض إلي جهاز لمواصلة عملية التخدير عن طريق أدوية التخدير الغازية التي تصل لرئة المريض من خلال أنبوبة (فضلا راجعي المشاركة رقم ٢ في هذا الموضوع )

لجهاز التخدير وظائف عدة أهمها ...التنفس الصناعي و ايصال الاكسجين و غازات التخدير إلي المريض

صورة لجهاز تخدير حديث نسبيا

تقبلي تحياتي و في انتظار بقية السؤال

الف شكر يا دكتور عالرد

بص حضرتك انا كنت بسالك على موضوع الجهاز ده انا تانى ولادة ليا كانت قيصريه وانا كنت خايفة من البنج والدكتورة قلتلى متخافيش ده احنا هنا بنحط المريض على الجهاز ولما بنخلص بنقول لدكتور البنج خلاص فاهو بيشيلة ويدخلك غرفة الافاقة وانا ساعتها بصراحة قلت ايه جهاز ده وحسيت انها بطمنى وخلاص

والسؤال التانى بقى

هو صحيح مريض السكر لازم ياخد البنج بنسبة معينة ولا ذى الناس العادية؟

وهل مثلا لو واحدة عندها السكر وهتعمل ولادة قيصرية ده بيبقى خطر عليها فى البنج ولا ايه؟

شكرا مقدما