عندك استفسار عن التخدير ؟

[MoHaMMeD EgYpT]

اولا : الف مبرووووووووووووووووووك يا دوك علي العيادة

ثانيا : انا عندي شوية اسئلة لحضرتك clp::

هي المخدارت اقصد الهيروين و الحشيش و العقاقير دي دكاترة التخدير بيستمعلوها اصلي سمعت ان الهيروين النقي بيستعملوه و بصراحة مش مصدق clp::

كمان سؤال معلش طولت عليك :lol: هو سؤال شخصي كده هو حضرتك اشمعنا اختارت التخدير بالذات مافيه مثلا جراحة مخ و اعصاب و بتكسب فلوس كتير و فيه اشياء تانية كتير ولا التخدير فيه شئ معين احسن من الاقسام التانية

والله انا لحد دلوقتي ما عملتش عمليات غير واحدة تقريبا و كانت ببينج موضعي و كانت في ايدي و كنت شايف ايدي بتتفتح قدام و بتتشرح و كنت خااااااااااايف موت و هتجنن :lol: ولا كنت حاسس بالالام

هو ايه الفرق بين البينج الموضعي و النصفي و الكلي و هل فيه انواع تانية ؟؟

[د هشام ابراهيم]

سؤالي عن التخدير في الولادة العاديه، معلوماتي عنه منعدمه فأرجو الإفاده عن مزاياه و عيوبه و أضراره و هل تنصح به كطبيب أم أن الأفضل هو احتمال الألم؟ و هل يفرق في هذا الموضوع نحافة أو سمنة الأم

و عليكم السلام و رحمة الله و بركاته

مدي إستحمال الأم لألام الوضع و الولادة يخضع لعوامل عدة منها ما هو شخصي بحت و يختلف من شخص لاخر ..... و منها ما هو طبي مثل استخدام أدوية "محفزة" لانقباضات الرحم ..... أو وجود تغيير في وضع الجنين مثلا عن الوضع الطبيعي .... أو وجود علة ما تضع صحة الأم في خطر إذا لم تتلقي التخدير (مثل أمراض القلب أو ارتفاع ضغط الدم ......)

القرار راجع للام في المقام الاول و باستشارة طبيب النسا و الولادة و طبيب التخدير

أشهر طريقتين لتخدير الولادة هما التخدير النصفي و أدوية الألم

- التخدير النصفي

يتم عادة بواسطة طريقة تسمي Epidural ( إبيديورال) .... يتم تخدير النصف الأسفل للجسم عن طريق قسطرة متناهية الصغر توضع في ظهر المريض يتم من خلالها اعطاء الأدوية

لادخال القسطرة إلي المكان الصحيح في الظهر نستعين بابرة مفرغة .... يتم مرور القسطرة من خلال الأبرة إلي داخل الظهر ثم تنزع الأبرة و تبقى القسطرة

الطريقة ديه هي آمن و أكثر فاعلية و لكن كطبيعة الأمور لها عيوب (الكمال لله وحده )

توجد عيوب شائعة و فرصة حدوثها عالية و منها :الغثيان - القيء - حكة بالجلد - ألشعور بالبرد - الارتجاف ..... عدم القدرة علي حركة النصف الأسفل من الجسم - بالذات الاقدام - لعدة ساعات .... و تعتمد أساسا علي جرعة الأدوية

توجد أثار جانبية أقل شيوعا و منها : صداع قد يمتد لاسبوعين أو أكثر - عدم عمل التخدير كما ينبغي مما يضطر الطبيب إلي إعادة وضع القسطرة مرة أخري - تأثير محدود علي الجنين ...... أو قد تأثر علي عملية الولادة نفسها (افتراض غير ثابت علميا و عليه اختلاف )

و توجد مضاعفات في منتهي الندرة و منتهي الخطورة و منها: مشاكل في الأعصاب من تنميل أو فقدان للاحساس الجلدي أو شلل - التهاب في أغشية المخ و الحبل الشوكي - تجمع دموي علي الحبل الشوكي ....

اللجوء إلي طبيب خبير في التخدير النصفي يقلل من نسبة حدوث الاثار الجانبية (بحكم عملي في القاهرة سابقا أعرف إنه يوجد بالقاهرة أطباء تخدير معروفين بالاسم لبراعتهم في الابيديورال ....كما توجد مستشفيات متخصصة في الولادة فيها أطباء علي مستوي جيد )

عدم حركة المريض أثناء وضع الابرة أيضا يقلل فرصة حصول مضاعفات و عليه ضروري أن يلزم المريض السكون التام في تلك الأثناء

سمنة الجسم و منطقة الظهر خاصة قد تصعب من العملية و تزيد من إحتمال حدوث مشاكل .....الفيصل هو الكشف الاكلينيكي علي الظهر بواسطة طبيب التخدير لبيان مدي تأثير السمنة علي عملية وضع الابرة

النحافة المفرطة أو وجود عيوب في العمود الفقري (مثل التقوس ) أيضا يزيد من صعوبة العملية

- أدوية الألم

أدوية تعطي إن طريق الوريد أو العضل ....أقل فاعلية من الابيديورال في السيطرة علي الألم المصاحب للوضع .....اذا احتاج الأمر استخدام جفت أو اجراء عملية قيصرية أو فحص الرحم بعد الولادة لابد من وجود وسيلة أخري إضافية للتخدير سواء نصفي أو كلي

أكثر الأثار الجانبية شيوعا هي القيء و الغثيان - حكة بالجلد - النعاس

أخطر الاثار الجانبية (و تحدث خصوصا مع الأدوية القديمة و بصورة أقل مع الأدوية الحديثة) هي تأثر المولود بالادوية ..... و ما يصاحب ذلك من تخدير أو نعاس أو مشاكل بالتنفس

أخيرا أي حاجة في الدنيا لها مميزاتها و عيوبها و منها التخدير

القرار مثله مثل قرارات الحياة يأتي بعد مقارنة المميزات بالعيوب و تطبيق ذلك علي كل حالة بصفة منفردة ..... ما قد يفيد زيد قد يضر عبيد

اتخاذ القرار الصحيح في الوقت المناسب و تنفيذه باقل خسائر ممكنة هو ما يميز طبيب تخدير عن الآخر و ما يميز أي إنسان ناجح عن أقرانه

[د هشام ابراهيم]

انا تانى ولادة ليا كانت قيصريه وانا كنت خايفة من البنج والدكتورة قلتلى متخافيش ده احنا هنا بنحط المريض على الجهاز ولما بنخلص بنقول لدكتور البنج خلاص فاهو بيشيلة ويدخلك غرفة الافاقة وانا ساعتها بصراحة قلت ايه جهاز ده وحسيت انها بطمنى وخلاص

سيدتي الفاضلة .... ما قالته لك الطبيبة تبسيط لعملية التخدير الكلي ....قد يكون مستحب مع طبيعتنا كشرقيين مش عايزين نسمع عن المشاكل أو المضاعفات المحتملة ..... لو في دولة غربية لو اقتصر الشرح علي الكلام ده بس ممكن يعرضها للمسائلة

[د هشام ابراهيم]

هو صحيح مريض السكر لازم ياخد البنج بنسبة معينة ولا ذى الناس العادية؟

وهل مثلا لو واحدة عندها السكر وهتعمل ولادة قيصرية ده بيبقى خطر عليها فى البنج ولا ايه؟

"نسبة" التخدير قد لا تختلف مع مريض السكر و لكن طريقة التخدير قد تختلف .... و العناية الطبية قبل و أثناء و بعد العملية حتما تختلف

بسبب العديد من المشاكل التي قد يسببها مرض السكر قد يستلزم الامر اشراك طبيب باطنة في الرعاية الطبية

أيضا تتبع العديد من الأجراءات لضمان عدم حصول أي مضاعفات

بطبيعة الحال الأمر يختلف باختلاف المريض و مدي تقدم المرض و مدي فاعلية الأدوية في السيطرة علي نسب السكر بالدم

كل ذلك ينطبق علي الولادة القيصرية مثلها مثل أي عملية أخري و إن أمتازت بوجود جنين قد يتأثر بمرض الأم و تمتاز أيضا لوجود تغييرات فسيولوجية في جسم الام تستدعي احتياطات معينة

اذا كان السكر تحت السيطرة لا توجد خطورة مضافة علي المريض من التخدير ....اذا كان السكر (مثله في ذلك كأي مرض ) غير خاضع للسيطرة أو سبب مشاكل و مضاعفات حينها ترتفع نسبة الخطورة

[se_ Elsyed]

أظن لازم يبقى فيه نظام وكدهوت ... إحنا في عيادة وكندية كمان يعني مش كشك في باب الشعرية . أنا حاجز مستعجل وهادخل الأول يعني هادخل الأول .. ويكفي إني مظبط التمرجي اللي عالباب ...

- مساء الخير يا دكتور ... حضترك فاكرني من أيام موسيقى رزع الحلل ؟

أيون عليك نور .. أنا سين سين اللي مش بيطيق الرزع والخبط ..

ما علينا ..

سؤالي الأولاني : إيه العلاقة بين تخدير الأطفال أثناء العمليات التي يُجروها في سن الطفولة وبين والحالة العصبية والنفسية لهم فيما بعد ؟ يعني بالبلدي ومن غير مصطلحات مكلكعه ما بيهمهاش غيرنا يا بتوع كار الطب .. العيل الصغير لما يعمل عملية زي اللوز .. على تثبيت عظام الرسغ على شوية حبشتكنات كده نتيجة الشقاوة زي عمر إبني وكل ده وهو لسه ما كانش تعدى سن الخامسة ... هل فعلاً البنج اللي شربه ده سبب عصبيته الحالية ؟

السؤال التاني من المقرر يا دكتور : ده بقى سؤال سوفيوف لإنه عن بنج الأسنان .. أنا بأخاف من الحقن أوي يا دكتور ولما بأروح عند دكتور السنان بالذات بأبقى أهون عليه أنه يديني خبطه بالكماشة على الأم الحنون بتاعت جمجمتي ويغم عليه ولا إنه يديني حقنة اللثة دي ... فهل حالة الخوف بتؤثر على مفعول البنج وتخليه يتأخر ؟

دكاترة الاسنان بيشتغلوني أخر أشتغاله وبأدفع يومية زيادة لهم عشان البنج الزيادة اللي باخده لإن الحقنة الأولانية ما بتجيبش معايا تأثير وبأبقى لسه حاسس بالألم فبيضطر يديني حقنه تاني عشان أعمل دماغ ويقولي حود على سيستر إعتماد في الريسبشن وإدفع حق الحقنة الزيادة يا حلو ... والله العظيم الدكتور مره بيقولي : هو حضرتك بتتعاطي حاجه ؟ فقلت له أيوه ... أنا بصراحة باتعاطى حرنكش ... ده منظر واحد محشش يا دكتور ؟ ده أنا بادوخ من الميه الساقعه .... ... على فكرة .. عُمر طالع زي أبوه بالظبط ومن شهر كده كنا بنخلع له ضرسة في المغربي ومع إنه واخد بنج إلا إنه بهدلنا والولد كان بيتألم ولا كإنه بيخلع سنانه عند حوده المزين اللي بيعمل عمليات لايف من غير بنج في مولد سيد الطشطوشي ...

سؤال أخراني عشان خاطري وهاخد الباب في إيدي ... الموضوع بتاع المرحومة سعاد نصر - الفنانة - اللي إتبهدلت من أول حقنة بنج وتوفيت بعد ايام .. وطلع السبب إنها كانت مخبية علي الدكاترة وإتكسفت تقول لهم إن بيجيلها تشنجات عصبية وشبه صرع ... الكلام ده صحيح وإيه علاقته بالبنج ... وهل المريض لو خبى عن الدكتور حاجه زي كده بيبقى خطر ؟ .. وإيه الحاجات اللي لازم يتم فيها المصارحة بين المريض وطبيب التخدير غير إن المريض يقول له عندي كام مليون او الحالة المالية له clp:: ؟

أنا طولت عليك لكن دي أسئلة موضع إمتحان وأوعدك هادفع فيزيته دوبل المره الجاية ...

شاكرين أفضالك ونفعك الله بما تعلمته ونفع بك البلاد والعباد

[د هشام ابراهيم]

هي المخدارت اقصد الهيروين و الحشيش و العقاقير دي دكاترة التخدير بيستمعلوها ... اصلي سمعت ان الهيروين النقي بيستعملوه و بصراحة مش مصدق

المخدرات كمصطلح يشمل تحته العديد من المركبات الكميائية التي قد تتشابه في بعض صفاتها

الهيروين تحديدا لا وجود له في مجال الطب كله علي حسب علمي و أكيد لا وجود له في التخدير

الحشيش و ما يطلق عليهم أدوية الشوارع هي مركبات مجهولة المصدر و التركيب و قد يدخل فيها عناصر كميائية غير طبية ....راجع فيلم الكيف clp::

المادة الفعالة في الحشيش أو الماريوانا قد تستخدم في صورة أدوية طبية في حالات السرطان المتقدمة لكن لا إستخدام لها في التخدير

أدوية الالم مثل المورفين و مشتقاته قد تسبب التخدير و فقدان الوعي و قد تؤدي للادمان اذا أسيء استخدامها

أدوية التخدير نفسها فيها ما يؤدي للادمان أو الهلوسة و إن قل استخدام الأدوية تلك في الزمن الحديث

[د هشام ابراهيم]

هو حضرتك اشمعنا اختارت التخدير بالذات مافيه مثلا جراحة مخ و اعصاب و بتكسب فلوس كتير و فيه اشياء تانية كتير ولا التخدير فيه شئ معين احسن من الاقسام التانية

عادة بيبقى فيه عدة أسباب وراء اتخاذ أي قرار ...قليل جدا ما بيبقى سبب واحد و مباشر ...كمان فيه عوامل تانية بتتدخل في الاختيار .... في الأخر الواحد بيجمع المميزات قصاد العيوب و يقارن طبقا لمعاييره هو اللي أكد بتختلف من شخص للتاني ......

بالنسبة لي اختيار التخدير كان بعد تفكير و مقارنة و تباديل و توافيق و كان سبب أساسي للاختيار اني أكمل في سكة الجامعة و أعضاء هيئة التدريس

ما كانش في أختياراتي خالص جراحة المخ و الأعصاب مع احترامي طبعا للمجال ده

اللي بيدور علي الفلوس من الطب يبقى ساذج ..... فيه طرق أسهل و أحسن و أكثر فعالية في الحصول علي الفلوس و من غير وجع القلب بتاع الطب clp::....

[د هشام ابراهيم]

هو ايه الفرق بين البينج الموضعي و النصفي و الكلي و هل فيه انواع تانية ؟؟

ده طبعا موضوع ممكن يتكتب فيه مجلدات و كتب و يملي هارد ديسكات clp::

اختصارا جدا :

١- التخدير الموضعي بيبقى علي قد منطقة محددة في الجسم .... زاي تخدير الأسنان أو عملية صباعك كده ....يا دوبك منطقة مخدرة لعدة ساعات .... عن الطرق و الأدوية فحدث و لا حرج

٢- التخدير النصفي ... أنواع كتير أشهرها الابيديورال اللي لسه شارحها فوق في المشاركة ٢٢ ....ده تخدير للاعصاب المركزية اللي طالعة من الحبل الشوكي (واضحة مش الحبل الشوكي نفسه ) و بتسبب تخدير للنصف الاسفل من الجسم .... هي الحقيقة مش نصف لان ممكن نرفع مستوي التخدير لاعلي ( منطقة الصدر مثلا ....يعني ٣/٤ أهو )

٣- التخدير الكلي ...ده أدوية وريدية و أنبوبة تنفس و جهاز تخدير و غازات تخدير كما شرحت في المشاركة ٢ و ١٠ ....المريض بيبقى فاقد للوعي أثناء العملية و وعيه بيبقى متأثر كمان أثناء الأفاقة

فيه أنواع تانية كتير ...زاي

٤- تخدير الأعصاب الطرفية .... يعني نخدر عصب واحد أو أكتر ....تبسيطا مثلا ندي حقنة قرب الكتف علشان عملية في اليد

فيه كمان

٥- تخدير طرف واحد أو جزء منه أو

٦- تخدير العقد العصبية

كل نوع من دول ١-٦ تحتيه أنواع تانية كتير و طرق مختلفة

[د هشام ابراهيم]

إيه العلاقة بين تخدير الأطفال أثناء العمليات التي يُجروها في سن الطفولة وبين والحالة العصبية والنفسية لهم فيما بعد ؟ يعني بالبلدي ومن غير مصطلحات مكلكعه ما بيهمهاش غيرنا يا بتوع كار الطب .. العيل الصغير لما يعمل عملية زي اللوز .. على تثبيت عظام الرسغ على شوية حبشتكنات كده نتيجة الشقاوة زي عمر إبني وكل ده وهو لسه ما كانش تعدى سن الخامسة ... هل فعلاً البنج اللي شربه ده سبب عصبيته الحالية ؟

و هل يخفي القمر يا سيد س س طبعا عارف حضرتك clp::

التخدير كادوية ما لوش تأثير علي المدي الطويل .... الأغلب الأعم من أدوية التخدير قصيرة المفعول و بتختفي من الجسم في ساعات قليلة

تجربة دخول مستشفي و بالذات حجرة العمليات و اجراء جراحة مع المصاحب لها من انفصال عن الأبوين و ملاقاة دكاترة لابسين ماسكات و ألم ما بعد العملية و شك و تكتيف ...إلخ ........... كل ده ليه تأثير طبعا و تأثير جامد جدا كمان فما بالك إذا تكرر

مثال صغير .....حجرة الأنتظار في مستشفي الأطفال في تورونتو عبارة عن قاعة ألعاب ....بلاي ستاشين و إكس بوكس و ننتندو و مراجيح و عجل و عربيات و عرايس و ليجو ...... و تخدير الاطفال من أبطأ ما يمكن و بالتدريج ..... كمان الابوين بيفضلوا مع الطفل لحد ما يبتدي ينام

ممكن تتخيل الفرق في التجربة .....

[د هشام ابراهيم]

السؤال التاني من المقرر يا دكتور : ده بقى سؤال سوفيوف لإنه عن بنج الأسنان .. أنا بأخاف من الحقن أوي يا دكتور ولما بأروح عند دكتور السنان بالذات بأبقى أهون عليه أنه يديني خبطه بالكماشة على الأم الحنون بتاعت جمجمتي ويغم عليه ولا إنه يديني حقنة اللثة دي ... فهل حالة الخوف بتؤثر على مفعول البنج وتخليه يتأخر ؟

الخوف ما بيأثرش علي حقنة البنج الموضعي انما فيه عوامل تانية ممكن تأثر و منها

- وجود التهاب مثلا أو عدوي أو صديد حتي لو بكمية صغيرة بيقلل من مفعول التخدير الموضعي جدا

- وجود تغذية عصبية مختلفة للمكان المراد تخديره ..... يعني بصورة أبسط .... الهدف من حقنة التخدير هو تخدير العصب المغذي لمنطقة ما ..... في أغلب الناس العصب الفلاني مسئول عن المنطقة الفلانية ..... ساعات بقي تلاقي العصب ده راح مناطق تانية أو المنطقة جالها أعصاب من حتت تانية ...ساعتها يبقي التخدير مش شغال كويس زاي ما حصل معاك

- نوع الدوا المستخدم كمان ممكن يأثر ....كمان الجرعة و التركيز و الفعالية ...إلخ

- خبرة الطبيب ليها عامل كبير كمان

[fatfouta]

اسئلة تانى معلش يا دكتور

هو لما اكون رايحة اعمل عمليه ليه الدكتور بيقولى لازم تيجى صايمه عالاقل 9 ساعات هل ده ليه علاقة بالتخدير ولا بحركة المعدة؟ وهل يتوقف على نوع العملية؟

هل البنج النصفى فعلا بياثر على الظهر؟ لان انا جوزى كان بيعمل الزائدة والدكتور اعطاه بنج نصفى وبعدين جه الدكتور يشتغل قام هو قاله لا انا حاسس بكل حاجة قام الدكتور اتوتر تقريبا واعطاه بنج كلى فهل ده صح؟ زبعدها قعد كتير جدا لمدة شهور ظهره بيوجعه فقولى بس هو كان بيدلع ولا ده شئ حقيقى؟

زهقتك صح؟

بس راجعة تانى ماليش دعوة

[MoHaMMeD EgYpT]

شكرا يا دوك علي الاستشارة بس طبعا اول مرة مجاني clp:: اصلي نسيت محافظتي في البيت و نسيت كارنيه الفيزا المرة الجاية ان شاء الله ابقي احاسب علي كله clp::

[د هشام ابراهيم]

الموضوع بتاع المرحومة سعاد نصر - الفنانة - اللي إتبهدلت من أول حقنة بنج وتوفيت بعد ايام .. وطلع السبب إنها كانت مخبية علي الدكاترة وإتكسفت تقول لهم إن بيجيلها تشنجات عصبية وشبه صرع ... الكلام ده صحيح وإيه علاقته بالبنج ... وهل المريض لو خبى عن الدكتور حاجه زي كده بيبقى خطر ؟ .. وإيه الحاجات اللي لازم يتم فيها المصارحة بين المريض وطبيب التخدير غير إن المريض يقول له عندي كام مليون او الحالة المالية له clp:: ؟

الصراحة أنا ما عنديش معلومات عن واقعة سعاد نصر غير انها تعرضت لغيبوبة بعد عملية تجميل فمش حاقدر أعلق علي الواقعة نفسها انما حاجاوب علي الأسئلة بصورة عامة

أي مرض في الدنيا كبر أو صغر ممكن يأثر علي صحة المريض و ممكن يأثر علي التخدير .....التأثير ده ممكن يبقى بسبب المرض نفسه أو مضاعفاته أو الأدوية اللي بتتاخد علشان تعالجه

لابد من المصارحة التامة مع طبيب التخدير في كل حاجة ....الامراض ، الادوية، الحساسية ، العمليات السابقة ، التاريخ العائلي المرضي ، شرب السجاير ....كل حاجة حتي لو ما حدش يعرف عنها غير المريض

كل تفصيلة ممكن تفرق سواء في طريقة التخدير أو العناية قبل و أثناء و بعد العملية ..... ممكن تفرق حياة أو موت أو شلل أو غيبوبة

الصرع تحديدا ممكن يكون السبب في الغيبوبة اللي أتعرضت ليه سعاد نصر (و ممكن لأ ...الله أعلم ) لكن فرضيا لو أتعرضت لنوبة صرع شديدة أو مستمرة و لم تعالج أو نتج عنها قيء وصل للرئة او ... أو ...أو ده كله ممكن يسبب مشاكل مميتة

برضه للتوضيح وظيفة طبيب التخدير مش بس التخدير clp::

وظيفة طبيب التخدير الاساسية هي العناية بالمريض قبل و أثناء و بعد العملية الجراحية ..... في فترات كتير طبيب التخدير بيبقى متحكم (بامر الله طبعا ) في وظائف المريض الحيوية كلها ..... المخ - القلب - التنفس - الكلي - الدم - الكبد

و في كل الفترات طبيب التخدير هو المسئول الأول عن سلامة المريض و كل جزء من جسمه حتي تمام الافاقة ....مثل بسيط لو المريض خبط دراعه في الحيطة و هو مش واخد باله من تأثير البنج فاتعور ديه مسئولية التخدير ...للدرجة ديه .... فما بالك اذا تعرض المريض لنوبة صرع أو نوبة ربو أو أزمة قلبية أو غيبوبة سكر إلخ أثناء الافاقة مثلا

[د هشام ابراهيم]

هو لما اكون رايحة اعمل عمليه ليه الدكتور بيقولى لازم تيجى صايمه عالاقل 9 ساعات هل ده ليه علاقة بالتخدير ولا بحركة المعدة؟ وهل يتوقف على نوع العملية؟

هو الحقيقة الصيام عادة بيبقى ٨ ساعات للاكل و أقل للسوائل و مفروض يبقى لكل العمليات حتي لو بنج نصفي أو موضعي

الصيام ضروري جدا لضمان خلو المعدة من أي بقايا للاكل

زمن أفراغ المعدة بيختلف من شخص لاخر .... و في نفس الشخص حسب عوامل كتير .....انما ٨ ساعات عادة كفاية

السبب الرئيسي هو إن لو المريض اتعرض لقيء و هو فاقد الوعي قبل أدخال أنبوبة التخدير في القصبة الهوائية ....القيء ده ممكن يوصل للرئة و المريض مش حيعرف يمنعه أو يكحه ..... القيء ده ممكن يعمل مشاكل خطيرة و ممكن يبقى مميت

حتي مع وجود أنبوبة تخدير في القصبة الهوائية برضه الحماية مش ١٠٠ ٪ ( قاعدة في الدنيا ..ما فيش حاجة كفائتها ١٠٠ ٪ )

فيه أمراض بتحتاج فترات صوم أطول أو أقصر و فيه أمراض لازم يتاخد فيها أدوية حتي مع الصيام ..... لازم أستشارة الطبيب لكل حالة و كل مرة

[د هشام ابراهيم]

هل البنج النصفى فعلا بياثر على الظهر؟ لان انا جوزى كان بيعمل الزائدة والدكتور اعطاه بنج نصفى وبعدين جه الدكتور يشتغل قام هو قاله لا انا حاسس بكل حاجة قام الدكتور اتوتر تقريبا واعطاه بنج كلى فهل ده صح؟ زبعدها قعد كتير جدا لمدة شهور ظهره بيوجعه فقولى بس هو كان بيدلع ولا ده شئ حقيقى؟

التخدير النصفي ممكن يأثر علي الضهر

مدي تأثر المريض من الحقنة نفسها.... أو الرقود علي سرير العمليات بطريقة غير صحيحة ..... أو العملية نفسها لازم له تحقيق و كشف مفصل

نوع و مكان الوجع و وجود أعراض تانية ممكن يحدد إيه العصب المتأثر و بالتالي السبب في التأثر ده

كمان عملية التخدير النصفي نفسها كانت طويلة و لا قصيرة ...شكة واحدة و لا شكات متعددة ....المريض اتحرك أثناء التخدير النصفي و لا لأ

عملية الزايدة بالذات كتير ما بينفعش معاها نوع من التخدير النصفي و بتحتاج نوع تاني أو تخدير كلي ....السبب إن الأعصاب المغذية للاعضاء الداخلية مختلفة عن الأعصاب بتاعة الجلد و العضلات ....تلاقي المريض مش حاسس بضربة المشرط علي الجلد انما لما الجراح يبتدي يحرك الأمعاء أو الغشاء البريتوني المريض بيبقى متألم

في الحالة ديه عادة التخدير الكلي هو الحل .....(ده سبب من أسباب إن المريض يجي صايم حتي لو التخدير نصفي زاي ما اتفقنا في المشاركة السابقة )

[اسكندرية تانى]

اخى الكريم د.هشام

الف مبروك على افتتاح العيادة :lol: :lol: :P

 

ايه رأيك نضم لعيادة التخدير عيادة علاج الالم؟

انا بس ليا سؤال واحد.........................

يا بهجت يا اباصيرى ..... ما هو المنطق؟

smk: smk:

تحياتى clp:: clp::

[د هشام ابراهيم]

اخى الكريم د.هشام

الف مبروك على افتتاح العيادة :lol: :lol: :P

 

ايه رأيك نضم لعيادة التخدير عيادة علاج الالم؟

انا بس ليا سؤال واحد.........................

يا بهجت يا اباصيرى ..... ما هو المنطق؟

smk: smk:

تحياتى clp:: clp::

رايح فين يا دكتور هو دخول العيادة زاي خروجه

ساعد أخوك المزنوق كلنا بنتزنق يعني :P :lol:

مشيها بهجت بس خليك مرسي الزناتي بقي :lol:

[الجدار]

الله أكبر العيادة قفلت على اللي حوالينا

clp::

بجد والله انت مش متخيل كمية المعلومات اللي الواحد استفادها وبجد حسيت انك تعبت النهاردة في الردود دي كلها

وردودك حتى مافيهاش كروته رد واحد حابب شغله وحابب يفيد الناس

معلش دي زكاة العلم واستحملنا كلنا

شوف يا سيدي بالنسبة للعمليات في المخ اسمع ان المريض المفروض يفضل صاحي

بس مش متخيل يعني ازاي تخدر الدماغ والمريض يفضل صاحي؟

وهل المخ نفسه لمسه او اي جرح فيه بيؤلم المريض

انا عارف ان خلايا المخ غير متجددة بس هل الخلايا دي كلها عصبية او بتشعر بالألم؟

وكفاية كده انا عارف انك دخلت تنام ربنا يعينك كان شغل كتير في العيادة clp::

:lol:

[د هشام ابراهيم]

بالنسبة للعمليات في المخ اسمع ان المريض المفروض يفضل صاحي

بس مش متخيل يعني ازاي تخدر الدماغ والمريض يفضل صاحي؟

وهل المخ نفسه لمسه او اي جرح فيه بيؤلم المريض

انا عارف ان خلايا المخ غير متجددة بس هل الخلايا دي كلها عصبية او بتشعر بالألم؟

بداية جزاك الله كل خير علي كلماتك الطيبة و المشجعة ....أسرتني بذوقك يا صديقي العزيز clp:: clp::

عمليات المخ مختلفة طبعا و ليها أنواع كتير .....كل منطقة في المخ ليها الاحتياطات الخاصة بها و البروتوكولات المحددة لها ....كمان طبيعة العملية بتأثر ..... ازالة ورم .... قفل تمدد في شريان ..... تفضية نزيف ...إلخ إلخ

المخ البشري واحد من أكثر ايات الله اعجازا و تعقيدا و حتي الان لم يكتشف الأنسان أغواره و أسراره و صدق الله العظيم حيث قال "و ما أوتيتم من العلم إلا قليلا "

بالنسبة لعمليات المخ اللي بتبقى قريبة من مراكز الحركة أو الأحساس أو النظر ....إلخ ..يفضل المريض يبقى صاحي لأن الأماكن ديه مش معروف مكانها بدقة (بنتكلم علي مستوي مجهري ...يعني خلايا غير مرئية بالعين المجردة ممكن تفرق مع المريض ) ....كمان وجود ورم أو اصابة ما بالمخ ممكن تلخبط أماكن المراكز ديه نسبيا

المخ اللي هو مركز الأحساس الرئيسي لا يحس !!

الأغشية المحيطة بالمخ ممكن تتأثر بالشد مثلا انما لو لمست المخ نفسه أو حتي قطعت فيه بمشرط المريض مش حيحس

انما للوصول للمخ لابد من قطع في جلد الرأس و الأنسجة اللي تحت الجلد و عمل فتحة في عظام الجمجمة و كل دول بيحسوا بكل حاجة فلازم تخدير ما ....موضعي أو كلي

في حالة التخدير الكلي المريض بينام لحد ما الجراح يصل للمنطقة الخطرة و بعدين تتم افاقة المريض جزئيا للتجاوب مع الجراح ثم ينام مرة أخري (نفس التكنيك ساعات بيستخدم في جراحات العمود الفقري باختلاف تكنيكي )

في حالة التخدير الموضعي المريض بيبقى صاحي من الأول للاخر

مش كل خلايا المخ خلايا عصبية و مش كل الخلايا العصبية خلايا خاصة بالاحساس ...لكن حتي خلايا الأحساس لا تحس

وظيفة خلايا المخ أساسا هي تفسير الاحساس مش الأحساس نفسه ..... يعني بصورة مبسطة جدا إيه اللي يحدد إن سن ابرة في طرف الأصبع مجرد لمسة أو ألم ؟ و في طرف الأصبع في مكانها بالظبط ....... طبعا الحكاية أكتر تعقيدا من كده بمراحل بس محاولة لتبسيطها

عمليتين أنا باشفهم قمة في الاعجاز ....القلب المفتوح (خصوصا القلب النابض من غير القلب الصناعي ) و عمليات المخ اللي الجمجمة بتتفتح فيها كلية Craniotomy

[MoTo]

انا و الله يا دكتور عرفت شوية معلومات من الموضوع ده حسستني إن انا بقيت ممكن لو فيه ضغط شغل عندك تعتمد عليا في الموضوع ده و تسيبلي كام مريض كدة .. و متقلقش انا هشغلهم كل المزيكا اللي عايزنها لحد ما يغم عليهم رباني .

هي المخدارت اقصد الهيروين و الحشيش و العقاقير دي دكاترة التخدير بيستمعلوها ... اصلي سمعت ان الهيروين النقي بيستعملوه و بصراحة مش مصدق

....راجع فيلم الكيف :lol:

دلوقت يا دكتور انا لي سؤالين

إزاي موضوع التخدير ممكن يتفاقم و يؤدي لوفاة المريض زي في حالة سعاد نصر الله يرحمها و إزاي الواحد ممكن يحمي نفسه من حاجة زي كدة ؟

تاني سؤال بعد ما عرفت بعض أنواع الأدوية اللي بتستخدم في التخدير

ماهو نوع المخدر اللي إستخدمته مع سوكا الصلاة عالنبي ؟