عندك استفسار عن التخدير ؟

[د هشام ابراهيم]

إزاي موضوع التخدير ممكن يتفاقم و يؤدي لوفاة المريض زي في حالة سعاد نصر الله يرحمها و إزاي الواحد ممكن يحمي نفسه من حاجة زي كدة ؟

صديقي العزيز ..... المشاكل اللي ممكن تحصل مع التخدير غالبا بسبب حاجة من اتنين

مضاعفات طبية خارجة عن سيطرة الأطباء

إهمال طبي

بالنسبة للاحتمال الأول اللي ممكن نعمله :

ما حدش يعمل عملية إلا لو ليها سبب طبي قاهر ....يعني ما حدش يروح يعمل عملية تجميل ما لهاش لازمة و يعرض نفسه لمخاطر الجراحة و التخدير دون داع (الكلام ده ما لوش دعوة بالمرحومة سعاد نصر ..بس الشيء بالشيء يذكر ...أنا ما عنديش معلومات عن المأساة بتاعتها )

لو لازم نعمل عملية يبقى نظبط حالتنا الصحية مع الدكاترة ....يعني اللي عنده الضغط و لا سكر و لا قلب و لا ربو لازم يتابع حالته و يظبط الادوية و يوصل حالته لافضل حالة ممكنة قبل العملية

مصارحة طبيب التخدير بكل التفاصيل الصحية .. راجع المشاركة ٣٣

بالنسبة للاحتمال التاني ....للاسف الاهمال موجود في كل جزء في حياتنا مش بس الطب انما ما باليد حيلة ....المقولة الشهيرة اللي يعيا في مصر يبقى غلطان فيه ناس كتير ما قدمهاش اختيارات تانية

برضه في أماكن أحسن من أماكن نسبيا

اختيار الطبيب حق من حقوق المريض ما دام بيدفع فلوس ..... إختيار طبيب ثقة و علي مستوي علمي عالي مفروض يبقى بديهي .... مش عارفين حد نبقى نختار مستشفي علي مستوي و بلاش المستشفيات الصغيرة

كل اللي قلته ده الحقيقة مش حيضمن رعاية طبية آمنة في بلدنا للاسف الشديد ..... بس علي الأقل يبقى عملنا اللي نقدر عليه

راجع المشاركة ٢٢ برضه كانت بتتكلم علي حاجة مشابهة

[د هشام ابراهيم]

تاني سؤال بعد ما عرفت بعض أنواع الأدوية اللي بتستخدم في التخدير

ماهو نوع المخدر اللي إستخدمته مع سوكا الصلاة عالنبي ؟

فيك الخير يا صديقي لسه فاكر قصة المواطن ده

طبعا القصة قديمة شوية ١٩٩٧ أو ١٩٩٨ فمش فاكر التفاصيل انما ممكن أؤكد لك إن المواطن سوكة و باعتباره كان قتال قتلة ابتدي يدفع حق المجتمع من اليوم ده في المستشفي .... و قبل تحويله للنيابة فالمحاكمة ... و غالبا تلقي نوع فاخر من التخدير ماركة طوارئ القصر العيني و ما ادراك ما عمليات طوارئ القصر العيني

[SoSo R]

مساء الخير يا دكتور

إيه نوع التخدير اللى بيستخدم فى عمليات العيون؟؟ زى عملية المياه البيضا و عملية زراعة العدسة

تحياتى

سوسورانى

[د هشام ابراهيم]

إيه نوع التخدير اللى بيستخدم فى عمليات العيون؟؟ زى عملية المياه البيضا و عملية زراعة العدسة

مساء الفل يا دكتورة

مع تقدم التكنولوجيا المستخدمة في عملية المياه البيضا و استخدام أجهزة حديثة "لشفط " العدسة القديمة بقت فتحة الجرح في منتهي الصغر إللي بيه يا دوبك كام نقطة بنج موضعي كقطرة في العين تكفي

في الأغلب الأعم العملية بقيت تاخد دقائق معدودة في ايدين الأطباء ذي الخبرة

فيه أوقات المريض بيحتاج نوع من المهدئات علشان يستحمل النومة علي سرير العمليات دون حركة

التريكه الوحيدة الموجودة إن عادة المريض بيبقى سنه متقدم و قد يكون يعاني من أمراض الشيخوخة و لازم تظبيط الحالة العامة الطبية للمريض قبل العملية

تم تعديل 14 أبريل 2009 بواسطة د هشام ابراهيم

[SoSo R]

دكتورنا العزيز ميرسى ع الرد بالتريكة المكتصرة دى

سؤالى هو لو نقطتين بنج بس...طيب أنا حماتى لما عملت العملية دى تعبت جدا من البنج أو دة على حد قولها

أنت عارف الناس الكبيرة وسواسيين شويتين

المهم كان فيه نوزيا شديدة

و كان فيه أعوجاج فى الفم

الكلام دة أختفى فى ساعات

بس عايزة أعرف فعلا إيه سببه...لأنها كانت مقتنعة إنه حساسية بنج

و مش مصدقة إن العملية ما فيهاش بنج كلى من أساسه

تحياتى

سوسورانى

[د هشام ابراهيم]

طيب أنا حماتى لما عملت العملية دى تعبت جدا من البنج أو دة على حد قولها

أنت عارف الناس الكبيرة وسواسيين شويتين

المهم كان فيه نوزيا شديدة

و كان فيه أعوجاج فى الفم

الكلام دة أختفى فى ساعات

بس عايزة أعرف فعلا إيه سببه...لأنها كانت مقتنعة إنه حساسية بنج

و مش مصدقة إن العملية ما فيهاش بنج كلى من أساسه

الصراحة العملية مش محتاجة تخدير كلي خالص إلا لو المريض غير متعاون علي الاطلاق و مش قادر يبطل يحرك عينه ساعتها الاطباء بيلجأوا للتخدير الكلي

الصراحة ما أقدرش أفتي في موضوع حماة حضرتك لاني لا أعرف تاريخها المرضي أو تفاصيل اللي حصل يوم العملية ....أنا بتكلم بشكل عام يا باشا بس حكاية الغثيان و اعوجاج الفم دول ما يطمنوش الصراحة

[newcomer]

ربنا يجازيك خير يا دكتور على المعلومات المفيده دى

رجوعا الى سؤالى بتاع الكافيين.......

ناس كتيير يقولوا دكتور البنج ادانى جرعة زيادة لأنى بشرب قهوة كتيير

و تسمع ناس تانيين يقولوا انا ماحسيتش بالدنيا

من اول شكة الحقنة.....لانى ما بشربش حتى الشاى

الكلام ده ....علمى ...سعادتك ؟؟؟؟

[newcomer]

فيه ملاحظتين ...حبيت اضيفهم

* فعلا زى ما قالت الزميلة العزيزة م.سمية ان د.التخدير جندى مجهول

مش كل الناس بتبقى حاسه بفضله ( الفضل لله فى الاول و الأخر)

لكن للاسف بتبقى متجنيه جدا فى خطأه ( لا قدر الله)

* اقبال المحاوريين من اتجاهات و اعمار مختلفة على قراءة التوبيك

اهتمامهم بالأسئلة ....اكيد ليه دلالة...

ان لما بيكون فيه موضوع بيتشرح بضمير و نية صادقة لله

حتى لو موضوع علمى....و صعب شوية على غير المتخصصين

بياخد اهتمام الناس.....

[د هشام ابراهيم]

رجوعا الى سؤالى بتاع الكافيين.......

ناس كتيير يقولوا دكتور البنج ادانى جرعة زيادة لأنى بشرب قهوة كتيير

و تسمع ناس تانيين يقولوا انا ماحسيتش بالدنيا

من اول شكة الحقنة.....لانى ما بشربش حتى الشاى

الكلام ده ....علمى ...سعادتك ؟؟؟؟

الحقيقة لأ

لا شاي و لا قهوة بيفرقوا مع أدوية التخدير..... لا الوريدية (حقنة البنج ) و لا الغازية (جهاز البنج )

الأدوية الحديثة الوريدية بتشتغل في أقل من دقيقة ..... يعني من بداية الحقن العيان بينام في ثواني

اللي ممكن يأثر فيها المشروبات الكحولية و إدمان الأدوية المخدرة انما شاي ليبتون ما لوش دعوة خالص و لا حتي إيرل جراي

[د هشام ابراهيم]

* فعلا زى ما قالت الزميلة العزيزة م.سمية ان د.التخدير جندى مجهول

مش كل الناس بتبقى حاسه بفضله ( الفضل لله فى الاول و الأخر)

لكن للاسف بتبقى متجنيه جدا فى خطأه ( لا قدر الله)

سيدتي الفاضلة كلام حضرتك و الأخت الفاضلة مدام سمية وسام اعتز به و أرجو أن أكون دائما أهل لثقتكم الغالية .... جزاك الله كل خير يا أفندم

[alsaher]

ربنا يوفقك يادكتور ، ويجزاك خير على ما تقوم به

بجد موضوع مهم جدا ، ومتعب بالنسبة لك ، أسئلة ما شاء الله زي المطر

وأنا بجد أحييك من كل قلبي

إمبارح كنت أنا وزملائي في دوامنا في المستشفى التعليمي ، وكنا بنتناقش عن إنه المفروض في حد أدنى من المعرفه في كثير من المجالات المختلفه

وحضرتك في موضوعك ده ، بتوفر كنز معلومات عن تخصص التخدير ، بالنسبة لأعضاء غير الأطباء غالبا يعتبر هذا الإسم بالنسبة لهم شيء مجهول

وخاصة في المجال الطبي ، أعتقد أن الجميع بحاجة لحد معين من المعرفه

تحياتي يا دكتور

وعلى فكره أنا بقالي فتره منشن على التخصص ده

علشان كده حأكون معاك هنا متابع كلمة بكلمه

[لونا]

انا ما عنديش استفسارات و لكن داخلة عشان اقول ربنا يبارك لك,

اسلوبك سلس جدا’’ رغم انك بتشرح موضوع متخصص جدا’’

[fatfouta]

صبا الخير يا دكتور

انا هحكيلك على حاجة وعاوزة رايك

انا كنت بولد ولادتى الاولى فى مصر وكنت لسه مجاليش السكر ساعتها وبالاتفاق مع الدكتور انى اولد قيصرى فولدت طبعا فى مستشفى خاص بيه

روحت الصبح المستشفى وانا صايمة وبس متوترة جدااااااا لانى اول مرة ادخل عملية فى حياتى

ولما حان وقت العملية وبعد ماجهزونى ليها لقيت الممرضة جاية تزعق وتقولى ايه ده انتى لسه مالبستيش البتاع اللى ادتهولك وراحت ياللا البسى وخلصى الدكتور مستنى الكذابة وهقولك ليه كذابة فى التفاصيل

اخدتنى بعد مالبست البالطو من ايدى وسحبانى على رجلى من غرفتى الى غرفة العمليات وانا حافية سورى وعمالة استر فى نفسى من الزفت البالطو ولا مش عارفة بيسموه ايه ولانى انا اللى مختارة الولادة القيصرية فكتمت النفسسسسس

ودخلت غرفة العمليات واول مشوفت المقصات والمشارط عالتربيزة اتسرعتتتتتتتتت والله وبقيت عاوزة اقولهم مش عاوزة اولد خليه جوا

المهم لقيت دكتور مساعد وممرضة ودكتور بنج وهو ده الوحيد والله اللى كان بيضحك فى وشى ساعتها

وطبعا الممرضة قلتلى اطلعى عالسرير طلعت عالزفت السرير وكان السرير اسود اللون وطويل ورفيع ومن رفعه خفت انام عليه لا اقع والله

وطلعت ونمت ودكتور الببنج قالى انتى خايفة كده ليه دى حاجة بسيطة وقعد يتكلم معايا

وبعدين يا سيدى بدور على دكتور التوليد بتاعى ال ايه سمعت صوته فى غرفة من جوا غرفة العمليات ومعاه واحدة بيولدها طبيعى وبعدين دكتور البنج واقف فوق راسى وقاله يادكتور كذا.... انيم؟ ورد عليه قاله اوكى نيم

قام قالى خدى نفس وراح منيم يا سيدى

وبعد كده انا بقى فاكرة انى هصحى مثلا الاقى نفسى ولدت وفى غرفتى

وللاسف صحيت ومش عارفة والله عينى كانت مفتحة ولا لأ لقيت الممرضة هى اللى بتخيط بطنى من ناحية والدكتور المساعد من ناحية تانى والدكتور بتاع الولادة واقف عالباب بيتكلم مع مين مش فاكرة

وطبعا كنت حاسة بكل حاجة ومش قادرة اقولهم الله يخرب بيتكوا انا صاحية ولا قاردة احرك ايدى عشان اشاور

وفجاة لقيت دكتور البنج بيزعقلها ويشتمها (يا ........خلصى واقفلى دى صاحيه) والله شتمها شتيمه وحشة من غيظه منها

وجت تحط البلاستر على الجرح بعد ماقفلت والله انا متاكده انى مرجعتش للبنج تانى ساعتها لكنى غيبت عن الوعى من شدة الالم الشديييييييييييييد

وماحستش غير وانا فى الاوضة بتاعتى ومتالمة جداااااااا

ليه طب هقولك على حاجة مش هتصدقها انا الصبح وانا رايحة اولد اخدت لبانه ونسيت وكلتها من شدة توترى نسيت انى صايمة ولما دخلت غرفة العمليات برده والله العظيم نسيتها جوا فمى

ولما فقت ساعة مالدكتور شتم الممرضة لقيته بيقول .... (ايه ده ايه ده يانهار ابيض ايه اللى بيخرج من بؤها ده.....طيب خلاص خلاص الحمد لله دى لبانه) وراح شتمها تانى وقالها مش كنتى تقوليلها؟ تصدق ده؟

الاسئلة هنا تيجى بقى...

- المريض مايتبنجش قبل مايدخل غرفة العمليات عشان مايشوفش المناظر اللى جوا الغرفة دى؟

- هلى اللى حصل فيا ده غلطة الدكتور بتاع البنح لانه بنجنى بدرى؟ ولا غلطة الدكتور بتاع التوليد لان سيادته كان مش فاضى ومعاه ولادة تانية جوا وجه متاخر؟

- عرفت الممرضة كانت ليه كذابه ؟ عشان قلتلى الدكتور مستنيكى وهو حضرته مكانش مستنى وخلانى الله يسامحه احس بكل ابرة داخلة جسمى والحمد لله انى ماصحتش بقى وهو بيفتح

معلش انا طولت عليك اوى بس انت قلبت عليا مواجع

واستحمل رخامتى ورد عليا الله يخليك احسن انا خلاص بقيت اترعب من حاجة اسمها بنج وعمليات

استحملنى مرة تانى وربنا يجازيك خير

فتفوتة

[fatfouta]

عاوزين كمان دكاترة فى جميع التخصصات يعملولنا مواضبع ذى كده

عشان نزهقهم بالاسئلة ذى الدكتور هشام مابيندم دلوقتى انه فتح الموضوع ده من كتر الاسئله اللى انهااالت عليه

ياللا بقى يا داكترة مستنيين اهو

[د هشام ابراهيم]

وعلى فكره أنا بقالي فتره منشن على التخصص ده

علشان كده حأكون معاك هنا متابع كلمة بكلمه

الله يخليك يا صديقي العزيز و بالتوفيق إن شاء الله .....التخدير تخصص جميل و مطلوب في كل حتة في العالم .... ما عدا القاهرة

كلامك صحيح تماما و فكرني بمقولة لطيفة

المتخصص Someone who knows everything about something

المثقف Someone who knows something about everything

تحياتي و امتناني يا باشا

[د هشام ابراهيم]

اسلوبك سلس جدا’’ رغم انك بتشرح موضوع متخصص جدا’’

جزاك الله كل خير يا سيدتي الفاضلة

أنا فعلا بحاول علي قد ما أقدر إن الكلام يبقى سهل بس ساعات الترجمة ما بتسعفنيش ...

الرجاء من الجميع لو فيه نقطة أو أكتر مش مفهومة انهم يراجعوني فيها

[د هشام ابراهيم]

معلش انا طولت عليك اوى بس انت قلبت عليا مواجع

واستحمل رخامتى ورد عليا الله يخليك احسن انا خلاص بقيت اترعب من حاجة اسمها بنج وعمليات

استحملنى مرة تانى وربنا يجازيك خير

الدكتور هشام بيندم دلوقتى انه فتح الموضوع ده من كتر الاسئله اللى انهااالت عليه

ياللا بقى يا داكترة مستنيين اهو

سيدتي الفاضلة بجد مش عارف أقول لحضرتك إيه ......

أولا عذرا علي التأخير بس فعلا النهارده كان يوم عصيب و مشحون في الشغل ...ده غير فرق التوقيت و أنا تحت أمر حضرتك و السادة الأعضاء

ثانيا أصدق التمنيات و الدعاوي بالصحة و السلامة و انك ما تتعرضيش للمواقف الغير انسانية ديه تاني

ثالثا تعليق جانبي قبل ما أرد علي مشاركة حضرتك نقطة نقطة

مش قادر أوجه أصبع أتهام لأي شخص معين في قصة حضرتك المؤسفة ....الكل غلطان ....الأطباء و التمريض .....

لكن ليه مستغربين من الفوضي و التسيب و الاستخفاف بحياة و أرواح الناس ....ليه مندهشين من أنعدام الضمير و غياب تعاليم الدين و اختفاء أخلاقيات المهنة و حتي الاخلاق الشخصية الحميدة ...ليه بنزعل من الاهمال و الجليطة و بقية لستة المصائب الموجودة في تفاصيل قصة حضرتك اللي يعلم ربنا المتني قد إيه

باقول ليه علي كل ده لأن كل اللي فات بقي جزء لا يتجزء من حياتنا ..... المستشفي مش فارقة عن المدرسة و لا المحكمة و لا الشارع و لا الملعب و لا المسرح و لا حتي العمارة أو البيت اللي ساكنين فيهم .... إيه اللي يخلي القطاع الطبي بمعزل عن بقية المنظومة الفاسدة اللي محوطة حياتنا كلها

لا ادعي الفضيلة سيدتي و لا ادعي الشجاعة حين اتخذت قرار بالهجرة لاني ما بقيتش مستحمل اشارك في مهازل زاي اللي حصل مع حضرتك .... مش لاقي حاجة أقولها غير حسبي الله و نعم الوكيل

[د هشام ابراهيم]

لقيت الممرضة جاية تزعق وتقولى ايه ده انتى لسه مالبستيش البتاع اللى ادتهولك وراحت ياللا البسى وخلصى الدكتور مستنى الكذابة وهقولك ليه كذابة فى التفاصيل

اخدتنى بعد مالبست البالطو من ايدى وسحبانى على رجلى من غرفتى الى غرفة العمليات وانا حافية سورى وعمالة استر فى نفسى من الزفت البالطو ولا مش عارفة بيسموه ايه ولانى انا اللى مختارة الولادة القيصرية فكتمت النفسسسسس

الممرضة ديه عايزة الشنق ..... طريقة المعاملة الغير انسانية ديه جريمة لازم لها عقاب ما ..... التمريض جزء لا يتجزء من العملية الطبية و لو فسد جزء الكل عمره ما حينفع مهما كان

للاسف الشديد مستوي التمريض في مصر متدني لحد مرعب يمكن أكتر من أي عضو تاني في الفريق الطبي

بس بقية القصة تدل علي " اذا كان صاحب البيت بالدف ضاربا ...... "

بس ما كانش مفروض حضرتك تسكتي ....عارف إن الموقف صعب و إن المريض بيبقى في موقف ضعيف انما كده صراحة كتير

----------------------------------------------------------------------

دخلت غرفة العمليات واول مشوفت المقصات والمشارط عالتربيزة اتسرعتتتتتتتتت والله وبقيت عاوزة اقولهم مش عاوزة اولد خليه جوا

يعني مش فاهم ليه السادية ديه ممكن بكل بساطة ترابيزة الأدوات تبقى بعيد عن نظر المريض (ة) و لا أصلا الموضوع مش في ذهن حد ؟!

------------------------------------------------------------------

الممرضة قلتلى اطلعى عالسرير طلعت عالزفت السرير وكان السرير اسود اللون وطويل ورفيع ومن رفعه خفت انام عليه لا اقع والله

سرير العمليات فعلا صغير و غير مريح ..... كلمات بسيطة من التمريض لشرح الحكاية ديه للمريض المساق إلي حجرة العمليات كقربان يساق إلي الأصنام اللي موجودة كانت فرقت كتير

[د هشام ابراهيم]

للاسف صحيت ومش عارفة والله عينى كانت مفتحة ولا لأ لقيت الممرضة هى اللى بتخيط بطنى من ناحية والدكتور المساعد من ناحية تانى والدكتور بتاع الولادة واقف عالباب بيتكلم مع مين مش فاكرة

وطبعا كنت حاسة بكل حاجة ومش قادرة اقولهم الله يخرب بيتكوا انا صاحية ولا قاردة احرك ايدى عشان اشاور

وفجاة لقيت دكتور البنج بيزعقلها ويشتمها (يا ........خلصى واقفلى دى صاحيه) والله شتمها شتيمه وحشة من غيظه منها

وجت تحط البلاستر على الجرح بعد ماقفلت والله انا متاكده انى مرجعتش للبنج تانى ساعتها لكنى غيبت عن الوعى من شدة الالم الشديييييييييييييد

وماحستش غير وانا فى الاوضة بتاعتى ومتالمة جداا

ديه غلطة دكتور التخدير ..... البنج ما بيخلصش يعني و مفروض المريض يفضل نايم لحد ما العملية تخلص .... فيه عمليات بتفضل بال ١٢ ساعة و أكتر كمان ...ما فيش حاجة اسمها نيم بدري أو متأخر

الألم بعد العملية متوقع طبعا بس لازم يتعالج ما يتسبش و يمكن ديه ميزة من مزايا التخدير النصفي إن ألم ما بعد العملية بيبقى أقل من في حالة التخدير الكلي

بالمناسبة في العالم كله تخدير العملية القيصرية بيبقى نصفي ...ما عدا مصر

التخدير النصفي أأمن للام و الجنين من التخدير الكلي في حالة الولادة القيصرية.... انما طبعا ثقافة المجتمع معادية للبنج النصفي بالاضافة إلي إن فيه جراحين كتير بيعارضوه برضه

--------------------------------------------------------

ليه طب هقولك على حاجة مش هتصدقها انا الصبح وانا رايحة اولد اخدت لبانه ونسيت وكلتها من شدة توترى نسيت انى صايمة ولما دخلت غرفة العمليات برده والله العظيم نسيتها جوا فمى

ديه غلطة حضرتك ما فيش كلام ...... إلا لو إن ما حدش أكد علي صيام ما قبل العملية ليكي ....النقطة ديه بالذات ممكن تبقى في غاية الخطورة خصوصا مع الحمل ..... هرمونات الحمل ليها تأثيرات كتيره جدا علي الجسم و منها حاجات بتخلي المريضة الحامل عرضة لمشاكل كتير مع البنج الكلي ..... الصيام قبل العملية بيبقى ضرورة حتمية

[د هشام ابراهيم]

- المريض مايتبنجش قبل مايدخل غرفة العمليات عشان مايشوفش المناظر اللى جوا الغرفة دى؟

لو مريض تسمح حالته مستحب ياخد مهديء قبل ما يدخل حجرة العمليات ....لو حالة المريض لا تسمح ..... و منها الحمل لتأثير الأدوية ديه علي الجنين..... لا يسمح بالمهدئات إلا في حالة الضرورة ....قلق أو خوف مرضي مثلا زاي العيانين اللي عندهم فوبيا

زاي ما قلت لحضرتك مفروض أصلا القيصرية تبقى ببنج نصفي مش كلي