عندك استفسار عن التخدير ؟

[د هشام ابراهيم]

دلوقتى انا بقالى فترة باتعلم heart lung machine as a perfusionist

بمعهد ناصر فى وحدة جراحات القلب والصدر والموضوع لطيف يعنى وماشى الحال

السؤال هو بقى

هل فى شهادة او دبلومة متعارف عليها عالميا للموضوع الماكنة دى

يعنى ما خبيش عليك انا على مشارف انهاء ما جستير الجلدية والتناسلية والدكتورة

اللى اتعلمت منها الموضوع معهاش اى حاجة شهادات يعنى قصدى

ونص الناس بتفكر تاخود ماجستير تخدير

و الله فى ناس معاها دبلومة اطفال

و عليكم السلام و رحمة الله و بركاته

علي قد مصر فيه ناس أصلا كانوا خريجي علوم شغالين علي الماكينة يعني مش أطباء أصلا ....

الحقيقة المستشفي اللي شغال فيها في تورنتو ما فيهاش عمليات قلب انما حاسأل لحضرتك

شاكر ليكي يا دكتورة المتابعة و المديح

[om marawan]

- المريض مايتبنجش قبل مايدخل غرفة العمليات عشان مايشوفش المناظر اللى جوا الغرفة دى؟

لو مريض تسمح حالته مستحب ياخد مهديء قبل ما يدخل حجرة العمليات ....لو حالة المريض لا تسمح ..... و منها الحمل لتأثير الأدوية ديه علي الجنين..... لا يسمح بالمهدئات إلا في حالة الضرورة ....قلق أو خوف مرضي مثلا زاي العيانين اللي عندهم فوبيا

زاي ما قلت لحضرتك مفروض أصلا القيصرية تبقى ببنج نصفي مش كلي

الدكتور الفاضل هشام اولا أشكرك جدا على تعبك وسعة صدرك

ثانيا فعلا أؤكد على رأى حضرتك بخصوص البنج النصفى بس هو الحقيقة أعتقد انه عاوز جرأة اكتر من المريضة خاصة فى المرة الاولى

لانها فكرة التواجد فى غرفة العمليات طول الوقت واعى فى البداية بتكون مقلقة جدا

وزميلتنا العزيزة فتفوتة واضح انها بتتوتر وهتقلق من شكل غرفة العمليات طول وقت الولادة لو بنج نصفى يعنى فيه ناس كتير تقول تنام احسن بس الحقيقة انا جربت النوعين من البنج فى ولاداتى التلاتة اول ولادتين كانوا فى مصر بنج كلى والاخيرة بنج نصفى فى الكويت

لكن فى المرة الاخيرة البنج النصفى كان مريح جداااااا والحقنة غير مؤلمة بالمرة وفعلا لو التمريض كويس الى جانب خبرة الدكتور بتفرق كتير جداااااااا فى هدوئك

بس اللى فهمته ان الدكتور ادانى كمان spinal Epidural

والاعراض الجانبية البسيطة اللى ذكرتها طبعا واردة وهى بسيطة جدا زى الاحساس بالبرد وميل للقىء وبتاخد دقايق لكن حضرتك خوفت الامهات من الولادة بالبنج النصفى جدا واعتقد ان البنج الكلى كمان له مشاكل زى النصفى لكن وقتها مانبفكرش لان البديل ان العملية تكون من غير بنج اصلا :lol:

طبعا اهم حاجة زى ماحضرتك قلت ان المريضة تاخد وقتها فى انها تسأل عن اللى بيناسبها حسب وضعها النفسى والصحى والحمد لله لان الولادة طبعا مهما كانت مريحة الا انه لابد من الالم وخاصة بعد العملية

ومش قادرة اقول لحضرتك فى البنج الكلى لما فقت الالم كان شكله ايه لانى مابداتش اخد المسكنات الوريدية غير بعد مارجعت الغرفة ومش عارفة ليه الدكتور ماختارش وقتها يدينى البيتيدين فى العمليات يمكن الدولاب كان فاضى او حاجة ;)

او يمكن الدكتور قال عادى يعنى هى تستحمل لحد ما ننزل نصرفلها المسكنات من الصيدلية :lol:

تحياتى لمجهودك الجميل واعتذر عن الاطالة

[د هشام ابراهيم]

أؤكد على رأى حضرتك بخصوص البنج النصفى

يعنى فيه ناس كتير تقول تنام احسن

فى المرة الاخيرة البنج النصفى كان مريح جداااااا والحقنة غير مؤلمة بالمرة

بس اللى فهمته ان الدكتور ادانى كمان spinal Epidural

طبعا اهم حاجة زى ماحضرتك قلت ان المريضة تاخد وقتها فى انها تسأل عن اللى بيناسبها حسب وضعها النفسى والصحى

ومش قادرة اقول لحضرتك فى البنج الكلى لما فقت الالم كان شكله ايه لانى مابداتش اخد المسكنات الوريدية غير بعد مارجعت الغرفة ومش عارفة ليه الدكتور ماختارش وقتها يدينى البيتيدين فى العمليات يمكن الدولاب كان فاضى او حاجة :lol:

او يمكن الدكتور قال عادى يعنى هى تستحمل لحد ما ننزل نصرفلها المسكنات من الصيدلية

بالعكس يا سيدتي الفاضلة ...مشاركة حضرتك مهمة جدا لان حضرتك جربت الطريقتين و شفتي الفرق بنفسك ...اسمحيلي أولا اشكر حضرتك علي المتابعة و المديح و أعلق علي كام نقطة

- البنج النصفي للقيصرية مش رأيي ...ده إتجاه عالمي بعد أحصائيات و دراسات أوضحت إن أغلب المشاكل المسجلة عالميا اللي حصلت للامهات أثناء الولادات القيصرية بسبب التخدير كان التخدير الكلي ليه دور فيها و عليه البنج النصفي آمن

- في القيصرية بالذات أمهات كتير بتبقى عايزة تبقى صاحية و واعية علشان تحضر لحظة الولادة و تشوف الوليد ..... ميزة واضحة للبنج النصفي

- مش معني إن القيصرية تبقى ببنج كلي إن علاج ألم ما بعد العملية ما يبقاش موجود ..... في مصر بتبقى مسئولية مشتركة ما بين التخدير و النساء و ساعات بتتوه في النص

- Combined Spinal Epidural طريقة للبنج النصفي تجمع ما بين سرعة أداء ال-spinal و طول أداء ال-Epidural و هي طريقة فعالة و إن كان ليها بعض الأثار الجانبية بطبيعة الحال أهمها بطء في ضربات قلب الجنين عادة لا يستمر كثيرا

- حضرتك جبتي الخلاصة أهم حاجة إن المريضة تاخد وقتها و تسأل عن اللي يناسبها وتلاقي شرح وافي و غير مخل يمكنها من اتخاذ القرار السليم بمساعدة الأطباء

شاكر لحضرتك جدا مساهمتك القيمة و أطيب التمنيات بوافر الصحة و السعادة

[emano]

دكتور هشام

حضرتك كنت قلت ان الاهتمام بالاطفال قبل العمليه بيكون كبير

والام والاب بيكونوا مع الطفل

سؤالى بقى

لو عايزه اعمل عمليه اللحميه لبنتى الاحسن فى السعوديه

ولى فى كندا كنجاح للعمليه

يعنى انا عملتها لابنى بس مش حاسه انه اتحسن كتير

فهل فى كندا احسن

ايمانو

[د هشام ابراهيم]

دكتور هشام

حضرتك كنت قلت ان الاهتمام بالاطفال قبل العمليه بيكون كبير

والام والاب بيكونوا مع الطفل

سؤالى بقى

لو عايزه اعمل عمليه اللحميه لبنتى الاحسن فى السعوديه

ولى فى كندا كنجاح للعمليه

يعنى انا عملتها لابنى بس مش حاسه انه اتحسن كتير

فهل فى كندا احسن

ايمانو

سيدتي الفاضلة .... حضرتك ليه عايزة تعملي عملية لبنتك ....هل عرضتيها علي طبيب أنف و أذن مختص بالاطفال و هو اللي نصح بكده ؟

في كندا ما ينفعش عملية تتعمل من غير سبب طبي واضح و بعد كشف و فحوصات ......لو العملية مطلوبة أكيد في كندا أحسن

مستشفي الأطفال في تورنتو مثلا من أحسن خمس مستشفيات أطفال علي مستوي العالم

نجاح العملية بامر الله طبعا لكن فيه أسباب كتير منها سبب العملية و مدي التوقع منها و اثارها الجانبية ...إلخ

[fatfouta]

وزميلتنا العزيزة فتفوتة واضح انها بتتوتر وهتقلق من شكل غرفة العمليات طول وقت الولادة لو بنج نصفى يعنى فيه ناس كتير تقول تنام احسن بس الحقيقة انا جربت النوعين من البنج فى ولاداتى التلاتة اول ولادتين كانوا فى مصر بنج كلى والاخيرة بنج نصفى فى الكويت

لكن فى المرة الاخيرة البنج النصفى كان مريح جداااااا والحقنة غير مؤلمة بالمرة وفعلا لو التمريض كويس الى جانب خبرة الدكتور بتفرق كتير جداااااااا فى هدوئك

عندك حق يا ام مروان انا فى ولادتى التانية الدكتورة قلتلى ممكن يبقى بنج نصفى لكن انا اللى رفضت لانى بجد بتوتر جداااا من دخولى غرفة العمليات ووشكلها لما بكون جوا اول مابدخل ببقى عاوزة اقولهم الله يخليكوا بنجونى اوام انا مش عاوزة اشوف حاجة خالص

ده انا من بداية دخولى المستشفى وانا رايحة اولد ببقى متوترة جدااا والله وببقى مش عاوزة اشوف حد ولا حد يكلمنى ومرحلة التجهيز بقى كمان بتمر عليا كانها ساااااعات طويلة جدااا..... فعشان كده مقدرتش ساعتها انه يبقى بنج نصفى

لكن انا حامل دلوقتى وبفكر جديا انى المرة دى يكون بنج نصفى لانى شفت ناس كتير ولادتها كانت بيه وقالولى انه اسهل واحسن من البنج الكلى .... اما نشوف

واهو كمان حضرتك طمنتينى بكلامك وشجعتينى لانى كمان عند مشكلة فى البنج الكلى هى لحظة الافاقة منه بالنسبه ليا بتبقى لحظة قاتله لان اول مابصحى ببقى مرعوبة من الالم .. يعنى كنت مش حاسه بالم لكن كنت بقولهم انا تعبانة ودكتور البنج كان واقف جمبى قاللى اذاى انتى اكيد بيتهيالك قمت قلتله طب عطشانه اوى قعد يضحك وقالهم نزلوها اوضتها بقى هى فاقت خلاص وده بييجى من توترى جدااااا اول مابصحى ببقى خايفة بطريقة فظيعة فعشان ماتعديش اللحظة دى بجد المرة دى بفكر انه يكون نصفى بقى واستحمل منظر غرفة العمليات

شكرا يا ام مروان

[fatfouta]

الدكتور العزيز هشام

كنت اخد رايك فى حاجة ضرورى جداااا

انا واحدة جارتى كانت بتولد قيصرى وبعدين الدكتور ماخيرهاش بين الكلى والنصفى لانها كانت فى مستشفى حكومى فى مصر وانت عارف الحكومى بقى بيشتغلوا من غير حتى مايطمنوا المريضة

المهم هو بنجها بنج نصفى وجه يشتغل هى قلتله لا انا حاسه بكل حاجة وهو طبعا خاف فقعد يتكلم مع دكتور التخدير وبعدين رجعوا تانى قالها كده حاسة قلتله ايوه برضو

وبعدين رجع لدكتور التخدير تانى وبصوت عالى قاله..... لا هى كده مش هتريحنى معلش بقى قام دكتور التخدير قاله خلاص ماشى ..... فهى قالت انا بعدها ماحستش بحاجة وكانها كانت مدروخة كده بس لكن ماكنتش نايمة خالص

انا عاوزة اعرف ايه اللى حصل وده كان بنج بالضبط؟

وكمان هل فعلا التوتر ممكن يخلى الواحد يفقد تأثير البنج فعلا ذى ماحصل معاها لانها بتحلف انها كانت حاسه بكل حاجة ولو كان فتح كانت هتحس اكتر....فهل ده من التوتر ولا ايه يا دكتور؟

معلش هتعبك معايا

[د هشام ابراهيم]

انا واحدة جارتى كانت بتولد قيصرى وبعدين الدكتور ماخيرهاش بين الكلى والنصفى بنجها بنج نصفى وجه يشتغل هى قلتله لا انا حاسه بكل حاجة وهو طبعا خاف فقعد يتكلم مع دكتور التخدير وبعدين رجعوا تانى قالها كده حاسة قلتله ايوه برضو

وبعدين رجع لدكتور التخدير تانى وبصوت عالى قاله..... لا هى كده مش هتريحنى معلش بقى قام دكتور التخدير قاله خلاص ماشى ..... فهى قالت انا بعدها ماحستش بحاجة وكانها كانت مدروخة كده بس لكن ماكنتش نايمة خالص

انا عاوزة اعرف ايه اللى حصل وده كان بنج بالضبط؟

وكمان هل فعلا التوتر ممكن يخلى الواحد يفقد تأثير البنج فعلا ذى ماحصل معاها لانها بتحلف انها كانت حاسه بكل حاجة ولو كان فتح كانت هتحس اكتر....فهل ده من التوتر ولا ايه يا دكتور؟

عذرا للتأخير يا سيدتي الفاضلة

بالنسبة لتجربة جارة حضرتك مش حاقدر صراحة أحكم إيه اللي حصل بالظبط في عدم وجود تفاصيل أكتر انما حاقول نقاط عامة

- فيه نسبة فشل للبنج النصفي .....يعني البنج ما يشتغلش ....لا إما عيب في التكنيك ...أو الأدوية ...أو بسبب وجود عيوب خلقية في ظهر المريض

- البنج النصفي للقيصرية كتير بتبقى المريضة حاسة باللمس و الضغط انما ما فيش احساس بالالم ...الأعصاب الحاملة لللمس و الضغط مختلفة عن الأعصاب الحاملة للالم و هما الاتنين مختلفين عن الأعصاب المسئولة عن الحركة

ممكن جدا لو مريضة متوترة جدا تبقى مش طايقة مجرد اللمس و فكرة انها حاسة بحاجة حتي لو ما فيش ألم تخليها متوترة زيادة ...الحل ساعتها هو تهدئتها سواء بالكلام أو الأدوية ...لو ما نفعش يبقى الحل البنج الكلي

- البنج الكلي أنواع و الادوية المستخدمة فيه كتيرة و مختفلة ...فيه أدوية ممكن تخلي المريض يحس بدوخة أو لخبطة بعد العملية و ممكن كمان ينسي كل اللي حصل بعد اعطاء الدواء و حتي الأفاقة رغم إنه ما نامش كلية و فيه أدوية بتنييم خالص و أدوية بتسبب ذهول و هلوسة وقتية ....و غيرهم

برضه زاي ما قلنا قبل كده يفضل الحوار مع الأطباء قبل أي عملية لاختيار نوع البنج المناسب لكل حالة كل مرة

[om marawan]

الدكتور الفاضل هشام أشكرك على اهتمامك بالرد

فعلا دكتورة التخدير ذكرت ان ده اتجاه عالمى لتخدير القيصرية لانه افضل لصحة الام والطفل واقل تأثير طبعا على الجنين

وجزاك الله خيرا

لكن انا حامل دلوقتى وبفكر جديا انى المرة دى يكون بنج نصفى لانى شفت ناس كتير ولادتها كانت بيه وقالولى انه اسهل واحسن من البنج الكلى .... اما نشوف

العزيزة الجميلة فتفوتة

اولا ربنا يقومك بالف سلامة يارب

تانى حاجة انا هاقولك بصراحة بأه طالما نويتى :lol:

انا بصراحة لحد قبل الولادة كنت قلقانة زيك ومش عارفة اختار ايه وعلى قد ما انا المفروض قلبى جامد شوية المفروض يعنى لكن طبيعى الواحد يتوتر

لكن انا حطيت كل تركيزى فى ان ساعة الولادة ثوابها كبير جدا باذن الله وانه بيحوطك ملاك وطبعا غير انها ساعة قبول دعاء باذن الله ففرصة تدعى لولادك وكل حبايبك

معلش يادكتور هشام هنخرج عن الموضوع شوية

الحقيقة قوضة العمليات مش لطيفة اوى ده طبيعى بس تمسكى بانك ماتتفرجيش كتير اول ماتدخلى

شكة الابرة عادية ويمكن غير محسوسة وممكن تحسى برعشة او تنميل لما البنج يمشى فى القدمين المهم ماتقطعيش الذكر ابداا ابداا عن لسانك والموضوع بسيط ومش بياخد اكتر من ثوانى

الدكتور شرحلى بهدوء الخطوات وانا باخد الحقنة وماتقلقيش لانه بيعملك اختبار للاحساس اكتر من مرة بكيس تلج او اى حاجة

فمافيش قلق من انك تحسى بالعملية

وعلى فكرة انا كنت متخيلة انى هاكون قلقانة جداااا وهم بيشتغلوا لكن الحقيقة الحمد لله رب العالمين بينزل عليكى سكينة وهدوء

وتفضلى تدعى لاولادك ولوالديكى ولنفسك طبعا واحفظى ادعية التيسير او الاستغفار ياسلام هيعدى الوقت من اجمل مايكون

لحد ماتيجى لحظة لا تعوض انك تكونى بدون الم بفضل الله وتسمعى صوت المولود وبعدين تشوفيه بعد مايتلف والذى منه

بعدها كل حاجة ماتخلص ان شاء الله هتحسى بعد شوية برعشة وبررررد :lol: وده طبيعى وبيروح بعد شوية يعنى

نسيت اقولك ان اللى حسم ترددى بخصوص البنج انى فى الكويت انا وزوجى لوحدنا وطبعا ولادى كانوا برة مستنيينى وماكنتش عاوزة اطلعلهم باهلوس عشان مايتخضوش :D

معلش طولت تانى جدااا mfb: استخيرى وباذن الله تقومى بالف سلامة انتى والمولود والله المستعان

تقبلى تحياتى

تم تعديل 5 يونيو 2009 بواسطة om marawan

[د هشام ابراهيم]

الدكتور الفاضل هشام أشكرك على اهتمامك بالرد

فعلا دكتورة التخدير ذكرت ان ده اتجاه عالمى لتخدير القيصرية لانه افضل لصحة الام والطفل واقل تأثير طبعا على الجنين

وجزاك الله خيرا

..............

معلش يادكتور هشام هنخرج عن الموضوع شوية

...........

العفو يا أفندم و بالعكس كتر ألف خير حضرتك علي نقل التجربة الشخصية لكل المتابعين .....أنا متأكد إن سماع التجربة من شخص خاضها بيفرق مع الناس كتير .....جزاك الله كل خير و أطيب التمنيات بالصحة للجميع

[emano]

دكتور هشام ان عندى سؤال هل كثره اخذ البنج بيخلى الواحد بعد كده لازم الدكتور يزود فى الجرعه

لان انا عملت منضار وكنت واخده بنج بس حاسه بكل حاجه

فدكتور قالى ايه ده دنتى دماغك متكلفه فوى

وراح مزود فى الجرعه علشان محسش

بس كنت بصحى وانام مش كل الوقت فايقه ومش كل الوقت نايمه

بس بعد اما رجعت البيت نمت كتير قوى ومكنتش حاسه خالص

فهل ده له علاقه بعدد القيصريات الى عملتها ابل كده

وكنت عايزه اعرف هل البنج بياثر على الذاكره لحسن الواحد بقى بينسى بطريقه غريبه

يعنى الواحد يدخل الغرفه علشان يجيب حاجه ينسى هو داخل علشان ايه

اردعلى التلفون انسى جوزى كان عايز ايه

والله فعلا صباح الصطل الى انا فيه

الله يكرمك طمنى هو انا حيجيلى زهيمر ولى ايه

[د هشام ابراهيم]

دلوقتى انا بقالى فترة باتعلم heart lung machine as a perfusionist

بمعهد ناصر فى وحدة جراحات القلب والصدر والموضوع لطيف يعنى وماشى الحال

السؤال هو بقى

هل فى شهادة او دبلومة متعارف عليها عالميا للموضوع الماكنة دى

الحقيقة سألت النهارده حد من قسم اخصائيين التنفس (Respiratory Therapists ) علي شغل ال-perfusionists فقالي إنه في تورنتو ديه وظيفة unregulated لحد دلوقتي و عليه مش محتاجة معادلة أو امتحانات ..... أغلب ال-perfusionsts هنا إما ممرضين أو اخصائيين تنفس و بيدرسوا سنة في الكلية ديه و بعديها يقدروا يشتغلوا علي الماكينة

رابط الكلية :

The Michener Institute

بالتوفيق يا دكتورة

[د هشام ابراهيم]

هل كثره اخذ البنج بيخلى الواحد بعد كده لازم الدكتور يزود فى الجرعه

انا عملت منضار وكنت واخده بنج بس حاسه بكل حاجه فدكتور قالى ايه ده دنتى دماغك متكلفه فوى وراح مزود فى الجرعه علشان محسش بس كنت بصحى وانام مش كل الوقت فايقه ومش كل الوقت نايمه بس بعد اما رجعت البيت نمت كتير قوى ومكنتش حاسه خالص فهل ده له علاقه بعدد القيصريات الى عملتها ابل كده

الأجابة اختصارا لأ ...... عدد العمليات و التخدير في السابق ما لوش دعوة بجرعة أدوية التخدير

بس فيه شوية ملاحظات

- جرعة الدواء مش ثابتة من شخص لاخر و تحديدها بيخضع لعوامل كتير منها وزن المريض و الأدوية اللي بياخدها و حالة الكبد و الكلي ...إلخ ....كمان فيه فروق ما بين كل شخص و أخر حتي لو كانوا زاي بعض في كل حاجة

بصورة مبسطة كل شخص مختلف عن الأخر .... حتي نفس الشخص بيختلف من يوم ليوم و عليه استخدام جرعة ثابتة لكل مريض عمرها ما حتنفع و إلا كانوا جابوا روبوت بدل الدكتور

- منظار الجهاز الهضمي أو القولون أو المعدة و غيرهم من المناظير عادة ما بيحتاجوش تخدير كلي عادة بتتم بحاجة اسمها Conscious sedation ....اختصارا مهدئات و مسكنات بجرعات معينة اللي بيها المريض بيبقى لا نايم و لا صاحي .....حالة الوعي متغيرة بس مش لدرجة التخدير ....بنسميها Twilight يعني لا نور و لا ضلمة

في الحالة ديه كتير المريض بيفتكر أحداث و بيبقى حاسس بحاجات المفروض ما تبقاش مؤلمة أو سيئة

حسب جرعات الادوية و نوعها ممكن المريض يفضل "نايمان " كذا ساعة بعد المنظار

- الحالة الوحيدة اللي تكرار التخدير ممكن يأثر علي الجرعة لو المريض عمل كذا عملية في وقت قصير ....مثلا ٣ عمليات في يوم واحد ينام و يصحي و نضطر ننيمه تاني و تالت ...ساعتها لازم الجرعة تقل

أو ٤ ٥ عمليات في الأسبوع ....كنا بنشوفها في مرضي الحروق المتقدمة اللي بيحتاجوا يناموا كل يوم للغيار علي الجرح ....بعد كذا يوم الجرعة بتتأثر

[د هشام ابراهيم]

هل البنج بياثر على الذاكره لحسن الواحد بقى بينسى بطريقه غريبه

سؤال بيتسأل كتير

الأجابة المباشرة لأ .....التخدير ما بيأثرش علي الذاكرة علي قد ما نعرف في الوقت الحالي

أسرار المخ البشري لم تكشف بعد و عليه فيه حاجات كتير مش معروفة أو مفهومة

الأستثناء الوحيد تخدير كبار السن ( ما فيش تعريف واضح لسن الشيخوخة انما ممكن نقول المرضي فوق ٦٥ سنة مثلا ) فيه تأثير ممكن يحصل لبعض الناس (النسبة غير معلومة ) و بتبان في صورة نسيان أو تأخر في وظائف المخ العليا ...التفكير و الحساب إلخ

كتير قوي بيفسروا الحكاية ديه انها كانت حتحصل حتحصل لكن التخدير و كمان الجراحة سرعوها أو وضحوها

- بالنسبة للنسيان ده طبيعي ...كلنا بننسي ...طبيعة بشرية طول ما زادتش عن الطبيعي أو عرضت الانسان لخطر (تكرار نسيان البوتوجاز مفتوح مثلا ) ....لو النسيان تعدي مرحلة الطبيعي لابد من أستشارة طبيب

أطيب التمنيات بالصحة للجميع و عذرا علي التأخير في الرد

[enjisultan]

شكرا جدا جدا جدا

وشكرا لاهتمام حضرتك يا دكتور هشام

[محمد عيسى]

جزاك الله كل خير و جعله في ميزان حسناتك

استفدت كييرا من العرض و خاصة انني خدت تخدير مرتين في اخر خمس شهور و ان شاء الله لي عوده لذكر انطباعاتي

[adrianocrespo]

استاذنا دكتور هشام

انا عندي استفسار كده بس مش عن التخدير

هل في نسبه معينه لانقاذ حالات الطوارئ في امريكا او كندا ؟ و تبقي حوالي كام ؟

سبب السؤال اني باحب الدراما الطبيه جدا

و باتابع ER و Grey anatomy

و احيانا Dr House

و زمان Strong medicine

و قرأت مقالات و اراء من دكاتره في امريكا يرون مبالغات كبيره في هذه المسلسلات من حيث عدد مرات الانعاش القلبي الكثيره

و نسبه انقاذ المرضي العاليه و هم في حالات معدومه الامل

تقبل تحياتي

تم تعديل 20 يونيو 2009 بواسطة adrianocrespo

[emano]

دكتور هشام ربنا يباركلك ويديك الصحه والعافيه على سعه صدرك

وتكرمك بالرد السريع على الاسئله

ويارب يجعله فى ميزان حسناتك

ويرزقك كل ما تتمنى

وجزاك الله كل خير

اختك فى الله

ايمانو

[د هشام ابراهيم]

شكرا جدا جدا جدا وشكرا لاهتمام حضرتك

جزاك الله كل خير و جعله في ميزان حسناتك

ربنا يباركلك ويديك الصحه والعافيه على سعه صدرك وتكرمك بالرد السريع على الاسئله ويارب يجعله فى ميزان حسناتك ويرزقك كل ما تتمنى وجزاك الله كل خير

جزاكم الله كل خير علي المديح و الدعاء الصالح ....ربنا يتقبل منا و منكم جميعا ......تحياتي و احترامي

[د هشام ابراهيم]

هل في نسبه معينه لانقاذ حالات الطوارئ في امريكا او كندا ؟ و تبقي حوالي كام ؟

سبب السؤال اني باحب الدراما الطبيه جدا

و باتابع ER و Grey anatomy

و احيانا Dr House

و زمان Strong medicine

و قرأت مقالات و اراء من دكاتره في امريكا يرون مبالغات كبيره في هذه المسلسلات من حيث عدد مرات الانعاش القلبي الكثيره

و نسبه انقاذ المرضي العاليه و هم في حالات معدومه الامل

أهلا و سهلا بحضرتك ...سؤال جميل

الحقيقة فعلا الدراما التليفزيونية بتبالغ في نسبة نجاح انعاش القلب و الرئة ....المعروف ب-CPR أو cardiopulmonary resuscitation

نسب النجاح بتتفاوت من مكان لمكان و بتعتمد علي حاجات كتير ...نوعية المريض مثلا .....مريض عنده سرطان منتشر غير شاب غرق بقاله ٣ دقايق ....و عوامل تانية يمكن أهمها الوقت المنقضي من لحظة توقف القلب و التنفس لبدء عملية الأنعاش ..... ٢٥ ٪ رقم متفائل ......الدراما التليفزيونية حاجة تانية

المبالغات في الدراما التيلفزيونية بتتعدي ال-CPR كمان .....House و Grey's Anatomy مثالين صارخين للمبالغات و الغلطات الطبية ......ER أكيد افضلهم علي الأطلاق من حيث الألتزام بالحقائق الطبية و غياب "التحابيش الدرامية " غير المعقولة

خصوصا في الأجزاء الاولي أيام كلوني ....الحلقات كانت مرأة حقيقية للواقع

الحقيقة أنا ما أعرفش strong medicine فمش حاقدر اعلق عليه